ခင်ပွန်းလောင်း၏ မာယာပရိယာယ်
အခန်း (၁)
အရောင်ကို ရွှေနှင့်ငွေရောင်ကို အသားပေး အသုံးပြု၍ ကနုတ်ပန်းများနှင့် တန်ဖိုးကြီးပန်းချီကားချပ်များ၊ရှားပါးပန်းပင်များ၊လှပသော မီးဆိုင်းကြီးတွေနှင့် တန်ဆာဆင်ပြီး...
နန်းတော်ကြီးသဖွယ် ဒီဇိုင်းဆန်းဆန်းနဲ့ ခမ်းနားကြီးကျယ်စွာဖြင့် တည်ဆောက်ထားသည့် မန္တလေးမြို့ရှိ အကြီးဆုံးဟိုတယ်ကြီးဖြစ်သည့် New Star World ဟိုတယ်ကြီး၏ ရီဆက်ရှင်ရှိသော မြေညီထပ်ဟောခန်းကျယ်ကြီး၏ အလည်၌ ရောက်နေသော ပန်ပန်မှာ ချိန်းဆိုထားသော လူတစ်ယောက်နှင့် တွေ့ဖို့အတွက် ဘယ်နေရာကို သွားရမယ်မှန်း မသိဖြစ်နေရသည်။
အလုပ်နဲ့ အိမ်ကလွဲရင် အပြင်ကိုသိပ်မထွက်သည့် ပန်ပန်အဖို့ ဒီလိုကြီးကျယ်ခမ်းနားတဲ့ ကြယ်ငါးပွင့်အဆင့်ရှိသော ဟိုတယ်ကြီးထဲကိုရောက်လာတဲ့ အခိုက်မှာတော့... တခြားကမ္ဘာသစ်တစ်ခုကို ရောက်သွားရသလို ခံစားရစေသည်။
သောင်းဂဏန်းပတ်ချာလည်သာရှိသော ပေါင်လည် ဂျင်းစကပ်အနက်ရောင်လေးနှင့် အဖြူရောင်တီရှပ်လက်တိုလေးက်ိုသာ ဝတ်ထားသည့် ပန်ပန်မှာ ဟိုတယ်ကြီး၏ ခမ်းနားပုံနှင့် ဟိုတယ်
ကြီးအတွင်းမှာသွားလာနေကျသည့် အထက်တန်းစား ဧည့်သည်များကို နှိုင်းယှဥ်ကြည့်ပြီး... ကိုယ့်ကိုယ်ကိုယ် ပြန်ပြောမိသည်က....
" ဒီလိုနေရာမှာ ငါက ကြာကြာနေလို့ မသင့်တဲ့
သူပဲ "
ဟိုတယ်ထဲကို ဝင်လာတုန်းကထက် လူနည်းနည်းပါးသွားပြီဖြစ်တဲ့ ရီဆက်ရှင်အနားကို...
ပန်ပန်သည် လွယ်ထားတဲ့ ကြိုးရှည်စလင်ဘတ်အိတ်လေး၏ ကြိုးလေးကို လက်ကလေးနှစ်ဖက်နှင့်ခပ်တင်းတင်းလေး ဆုပ်ကိုင်ပြီး... လျှောက်သွားလိုက်သည်။
" ဟို ဟိုလေ... "
" ဟုတ်ကဲ့ ပြောပါ ညီမလေး။အစ်မတို့ ဘာများ
ကူညီပေးရမလဲ "
ရီဆက်ရှင်ကောင်တာရှိ ဟိုတယ်ဝန်ထမ်း အစ်မ၏ ဖော်ရွေသောအပြုံးလေးနှင့် ပြောလာစကားကြောင့်... အနည်းငယ် ကြောက်ရွံ့နေမိသည့် စိတ်လေးက အဝေးကို လွင့်စင်သွားချေသည်။
