درب القطاطعية(مكتملة)

النهاية❤️‍🔥✨

🧩درب القــــطـــــااطــــــعــــيــة🎭♟️

*البارت مئة و ستة وتسعون (196)

•بأنامل :khadija Akrouch

🥂بناات القرية فدرب القطاطعية 🎭🍷

_ وَأراكَ في ڪُّلِ بِقاعِ الارضِ ڪأَنَّما ، لا جُرمَ في فَلڪي يدورُ سواک

فاق الصباح على صوت الصداع والحركة عندهم فالدار زايدة ماشي كيف ما موالف اله‍دؤ ويفيق على خاطروو ..ناض قارن حجباوونو وخرج من بيتو شاف باهية واقفة عند الدروج كتشوف فالخدم لتحت كيتحرك ..مشا لعندها باسها على راسها وسولها شنو واقع ..هزات كتافها ومحركة راسها دليل على انها تاهي ماعندها معلومة ..شد ليها بإيديها ونزلو للتحت بزوج ...وصلو للكوزينة وبانت ليهم الخذامة وقفها امير وسولها ...

امير: شنو وااقع ولاش هادشي كامل ...

" عندنا عرس اسيدي "

كي سمع كلامها خرج فيها عينيها ما مصدقش شنو مخرجة من فمها...

امير: لااا ما تگوليهاش ..مامشا تا دارها مزال..تاشرف عادا بغا يتزوج ...

ضار بالزربة كي سمع جدو من وراه كيضحك تا تغمضو عينيه ..مكالي بعكازو ومقرب تا وقف قدامو ...حط ايديه على كتفو وبصوت غالبة عليه الضحكة مجاوبو...

الحاج: معلوووم جدك وخا شرف راه باقي كي العاود...ولكن عجباتني الفكرة نلقا عروس وندير لحفيدي شي عراسية ..انما هاد العرس ماشي ديالي ..ولكن ديالك نت والغزالة بهية ..غتمشو توجدو راسكم باش فالعشية ديرو العقد ديالكم

الصدمة بانت على وجهم زرب عليهم ماخلوش يستوعبو ...و ماكنوش متوقعين الفكرة تكون هي حفل زفاف ولكن من ناحية عجبهم الحال حيت واخيرا غتولي بسميتو وكلشي يشهد على علاقتهم ...بالفرحة عنقها وهزها كيضور بيها ...جا بغا يبوسها فشفايفها وهي تحط ايديها على فمو حابساه حشامانة من جدو لي واقف قدامو ..تخشات مخبية فعنقو كي سمعات هضرت جدو وهو عاطيهم بالظهر ....

الحاج: سير اولدي سير غتصدق داير شي فضيحة .

خرجو ولقاو طموبيل كاتسناهم مشاو للصالون لي وصا ليهم عليه جدو ... هو حسن شعرو وقاد لحيتو وهي دارت سوان والماكياج لي خصها ..وكيف ما قال لييه جدو هو تكلف بكلشي ..كان كلشي موجد كيتسناهم غي هما واغلب العائلات لي عندهم معرفة مع الحاج حضرو كيتسناو غي العرسان اوصلو وحتى من الصحافيين موجودين ..حيت الطبقة الغنية  عارفين الخوت الثوأم بلي عنذهم مشاريع .

ضربات الثمنية داليل وقفات الطموبيل ولكن فيها غي بهية حيت امير كمل قبل منها وفضل يسبقهل للدار...وااقف قدام باب الڤيلا كيحرك فرجليه وكيفرك إيديه بسبب التوثر .. واخيرا اللحظة لي كيتمناها وصلات وقدام عينيه دازت اياامو معاها ..وخا شي مرات كتعصبو ولكن كان كيحاول يتحكم فأعصابو ..علماتو يكون انسان عندو قلب علماتو كيفاش يضحك وكيفاش يتصرف ..زرعات احساس جديد فقلبو ماعمر تخيل راسو يوصل لهاد المرحلة وهاهو وصل ليها بسبب "بخوشة"كي لقبها هو ...هبطات وتفتحو عينيه معاها ..كانت وسط كسوة بيضة  مزيرة من الصدر ومشبكة.. ومن لتحت عريضة  وكلها محجرة ..جات مع جسمها كأنها مفصلة غي ليها هي بووحدها...دايرة مكياج خفيف مخلي ملامحها الهادئة تبان كيف ماخلقها مولانا ..شعرها طالقاه كيف ما كيعيجو ..زادت مقربة لعندو بشوية مد ليها ايديه شدات فيه وهو يجرها لعندو معنقها ومخشي فيها مخبي وجهو ومخبي الدمعة لي نزلات من عينيه مسحها بالزربة وبعد عليها شاد فإيديها غادي بيها عند العدول .