ابتسم وباوعلي
-حلالك ابن العم
ازهر:: يبقه يمكم؟
-اكيد
ازهر:: عاشت ايدك
-هذا الحصان مو بس اخذته لا صار روحي وي الاحبها جان شكله فخم كل ماصار عندي مجال صرت اروح اله افتر بيه وارجعه اندمج وياي حيل بس طول الشهر هو متعلق بلمهرة مالته
-كل يوم اتفقدها اشوفها بلدوام من بعيد وارجع لشغلي بلمستشفئ
خلصت عمليه بلغرفه وطلعت لاكاني واحد من الدكاترة
-السلام عليكم دكتور
ازهر:: اهلاً وعليكم السلام.
-دكتورنه اسمك مطلوب بندوة اليوم
ازهر:: ياوقت؟؟
-بعد ساعتين اذا تحب نروح سويه
ازهر:: دزلي العنوان دكتور واني اروح
-لا دكتورنه نروح سويه اذا مابيها زحمه
ازهر:: تمام
استغربت من الحاحه... دخلت لغرفتي اخذت السويج وسترتي وطلعت رحت كبل سبحت وطلعت فتحت كنتور الملابس "لو هي اهنا جان اختارتلي شراح اللبس" سحبت قاط اسود لبسته
تقدمت رفعت المشط ومشطت شعري
اخذت ساعتي ومحبسي
رشيت العطر مالتي من ذوقها
واخذت سويجي ومفتاح السيارة ونزلت
اتصلت عليه ثواني ورد
-هلاا دكتور ازهر
ازهر:: اهلاً بيك نروح؟
-اي نعم جايك بلطريق بس وين انت؟
ازهر:: شارع *****
-تمام اعرفه اعرفه ثواني ويمك
ازهر:: تمام
/ماطول اقل العشر دقايق واتصل طلعتله وكبل للندوة
وحدة من الندوات الي كدرت افيد بيها ناس اهوواي هاي عاشر وحدة غير الي بمحافضتي الي اني سويتها وحدي وبيها مجموعه دكاترة
اي سؤال اجه بهل ندوة وضحته اللهم اني والدكاترة الباقين
……………………………
رغد::
-بدينه دوام اول يوم كعدت بـ 6 ونص كلت اللحك اجهز نفسي واتريك ع راحتي... تفاجئت لكيت كل البنات كاعدة الي تتريك والي جاي تبدل
كمت بسرعه غسلت وجهي وطلعتلي لفه جبن اكلتها بسرعه وفتحت الكنتور ... احس اريد ابجي لئن صدك راح اتأخر طلعت بنطرون ابيض وي بلوزة بيضه وسترة شتائيه يوصل طولها للركبه لون حنيَ خليت السترة ع السرير
-وكعدت اسوي بوجهي خليت شي خفيف بس الحمرة شويه لون اغمق... صارت بـ 7 ونص والبنات بدت تنزل للخط جاي اللف بلشال وندك الباب ودخلت المشرفه
-يلااا تأخرتن وابو الخط خبص الدنيا
ايدي كامت ترجف احوالي تخربطت كعدت ع السرير وباوعت لزهراء وهمست
