ثمرة الماضي

part 14

زهــراء الـــﻜناني

زعلان لوَ ..
مشتاقلك بيش أبدي
بفِراگ وجهك
لو معِزتك عندي ..!

عفتهه ورحت للغرفة..سديت الباب واجيت كعدت..
تلمست رجلي..ما مصدكة..احسه حلم..
گلبي كام يدك سريع..
كل دگة بيهه اسم صگر..

بس شنو الفايدة اذا حصير لغيره..
جريت نفس بقلة حيله..
تمددت ونمت..وانه كل تفكيري ارد اعرف شلون اجه....

كعدت الصبح..غسلت ورحت للمطبخ..
ما صار شي جديد..اطلع من المطبخ اروح للغرفة..
لو تجي سرور يمي تحاجيني..
تدري بيه اضوج واكعد اتذكر صگر..
گلتلي ان البارحة من صاحهه صگر..

گايللهه اجي بالليل اشوف دنوة..وهي تفتحله الباب..
وهجي اجه صگر..
خالتي وبناتهه ما اجن..عرفوا من ابوي انخطبت..
بس خابرتني دنيا..كامت تبجي گبلي..

دنيا : لج صدك انخطبتي لابن عمج؟..لعد وصگر؟..
هي جابت اسمه ودموعي نزلت..
اوف دنيا..ما اكدر احجيلج..هواي سوالف..
خليهه بعدين..

كالت نجي بيوم زواجج..علاقل نوكف وياج..
شكد حمدت ربي چي اكو ناس مهتمتلي..
حاسة بگلبي شلون تعبان وما راضي بكلشي ديصير..
يعني بيوم زواجي راح احجيلهم عن حبي..
المفروض اكون يمه..مو يم عقيل..

شكد صعبة..صعبه يالله..ساعدني بس..
ادور فاطمة مرة عمي بس تذبلي حجي..
ما ادري شنو عداوتهه وياي..انه حتى ما جايه يمهه..
گبل اربعين ابو صگر بيوم..
بلشنه تجهيز الاكل..الچادر رجع انصب..
يوم واحد بس..

ضليت بالمطبخ من الصبح لليل ما لحكت اسوي شي..

سويت الحشوة مالت البرياني ٣ مرات..
صارن ٣ جدوره كبار كلش..
بعد كومة اكل..

جدي كال لازم ابنه يجي عالاربعين..
محمد جان موجود..بس صگر ماكو..
كال خابروه يجي..ما يصير..
راحت خالة ام صگر خابرته..
اجت للمطبخ..سألتهه خالة ابتسام..

- ها خية بشري..حيجي؟..
- اي عيني..كال انزل يومين طوارئ ما ادري شسماهه..

فرحت من كالت حيجي..
بس يمكن ما اكدر اشوفه..
صار ٣ ايام احس گلبي خلص هلكد ما اكل بروحي..
منظرة من جان شارب ابد ما راح من بالي..
جان يحجي بحرگة وتعب..

مثل واحد عاف الدنيا كلهه وره ظهره هلكد ما تعبته..
هم ديحجون وانه واكفه اسوي بالاكل واسمعهم..
عقيل ما شفته من ذاك اليوم..

بس سمعت مشتريلي نيشان وذهب..
جنت مريضة وبس اكوم ادوخ..فما رحت وياهم..
ولا عبالك على باب زواج وعلاقة جديده...
گلبي مو يمه والله..حظلمه وياي..واظلم روحي..
والاهم صگر..

گضيت الايام هاي بس ابجي..كل ما اتذكره..
كل ما اتذكر شلون اجه بالليل بس خاطر يشوفني..
ما كدرت انام بالغرفة بعد..
اتخيلة كاعد عالجرباية بنفس الوضعيه مالت ذاك اليوم..