ثمرة الماضي

part 19

يامفتاح روحي ..
      والسوالف بيك تحلَى ..
والهوى يمرني ويرطبني هبوبك ..
      يانِدى الغبشة ..
ياخطار عيني هاكثر مِختاض ..
     مِن رمش لرمش زعلان تتمشى ..
  وانا حبَيبك ..
     عمر زتني حنانك مثل الحمَيمة..

سرور : گبل لا ترجع دنوة بيومين كعدت الصبح مثل كل مره..انه اكعد گبل الكل..اذا جدي كاعد اسويله ريوك ويطلع للفلاليح يشوف شغلهم ويشوف المزرعه..هي بالحقيقة دوانم مساحتهه جبيره كلش بس جزء منهه قريب على بيتنه..هذا ابوي وعمي فيصل دايرين بالهم علي..والبعيد على جدي.. طلعت من الغرفه والشال على چتافي..طبع بيه هذا..طبيت للحمام غسلت وطلعت لكيت جدي بالباب..صبحت علي..اسويلك ريوك ؟..

الجد : اي والله..دا اريد اروح للدوانم اشوف الشغل..
سرور : حاضر..طبيت للمطبخ حضرت الريوك وخليته ع الميز.. اجه جدي وره شوي..لابس دشداشه وفوكاهه مثل الستره چي الجو بارد..كعد تريك..

الجد : يالله..انه اروح..تعاي سدي الباب براي..
سرور : اي ميخالف..طلع وانه وراه..طبعا هو من يطلع بحده لازم وياه سيارتين..بس اذا وياه ابوي لو واحد من عمامي يروحون سوه..من بعيد لمحت واحد لابس كله اسود ومنتچي ع الباب مالت السياره..طوله متوسط..

گلبي ضل يدك..يمكن هو..بس شعنده اجه؟..وهسه؟..ليش عود..انتهى كلشي وماكو مجال خاطر يقبلون..اول ما طلعت السيارات كام يتلفت بعدين حط اديه بجيبه ويتمشى لعند بيتنه..وي كل خطوه يمشيهه گلبي يدك اسرع..لحد ما صار جدامي وتأكدت هذا هو..حسام..اي..حييل صار شكد..كمشت روحي..بدون ما ابجي لو تنزل دمعه مني..شبعت بجي بيوم العرفت بي ماكو نصيب بيناتنه بسبب احمد..

تنازلت عن حبي لخاطر اخوي..بس اكو رب ينصف عبده..واكيد يعرف بگلبي شكد متلوع من ٢٠٠٢ نصهه لحد هاي اللحظة..صار ٣ سنوات..

اول ما شفته تذكرت هاي السنوات كلهه..گلبي ضل يدك سريع..كلشي صار بيناتنه تذكرته..المكالمات والحب واللهفة..هو جان صديق احمد..كلش صحبان ويجي لبيتنه..احمد بسنة ٢٠٠٢ خلص سادس بس ما قدم ع الكلية..هج لحالة بدون سبب..مدلل ع الاخير..فراح يشتغل وي صديقة ببغداد..منو صديقه؟ معرفته بالبداية بعدين طلع حسام..

گبلهه اول ما بلش يشتغل وياه يضل ببغداد اسبوع لو ثنين ومن يجي اسمعه يحجي وي ابوي وعصام وسالم عنه..ما ادري حسيته شهم وملامحة حلوه من حچي احمد والمواقف الصايره بيناتهم..

لحد ما فديوم جابه احمد واجه..بهذا اليوم شفته وشافني بالصدفة..حسبته طلع.. فطبيت للديوانية گبل حتى شال ماكو ع راسي..شفته ابتسم من شافني لأن منظري صدك جان يضحك..وانه طابه واحجي ها حماده خلصت..طلع صديقك..وهو جان بالديوان..هم زين ما شافني احمد..جان صارت مشكلة بذاك اليوم..طلعت بالعجل..بعدهه كثرت جياته

انتبهت على نظراته وتصرفاته.. روحي كامت تنجذبله بدون ما احس..كمت ابتسم من اشوفه..احس بشعور غريب من اسمع احمد يكول سوو مجال حسام هنا..دنوة تحجيلي شلون تحس من تشوف صگر لو من تسمع بطاري..ابتسم بداخلي..نفس الشعور احسه من اسمع بحسام..