ثمرة الماضي

part 16

شنو ذنبي..؟
وحرمني الضيم عِشريني..
شنو ذنبي..؟
وحرمني المشط والحنة..
وعلى جروحي يتچيني ؟..
أعيش إلمن ؟
وأموت بـ ليش !
آنه أصلاً ضمير الناس موتني ما يحينيي ..
آنه بلا ظفيرة وشوگ..
..تشعل ظلمة سنيني...؛
ــــــــــــــــــــــــــــــــــــــــــــــــــــــــــ

طبيت جوه..سلمت عليهم..رحت ع جدتي..
مشتاقتلهه..گبل جنت شكد اكعد وياهه ونسولف..
احب سوالفهه مال گبل..
كاعدة وياهه..جان تجي نوارة..

- عمي محيي يريدج بالغرفة..
اي هسة..خليت ايدي على ايد جدتي..كتلهه حروح اشوف ابوي شيريد..

- روحي يمه..شوفي شيريد..
طبيت للغرفة وسديت الباب..
- تعاي كعدي بابا..عندي وياج موضوع مهم..
خوفني..

اجيت كعدت بسده..
خلى ايده على ايدي..وبلش يحجي..
- امج توفت گبل ١٥ سنة..ما انكر حبيتهه..
اكثر من روحي..لو تطلب عمري انطيهه..
ما اعز عليهه نسمة الهوى والله..
لو عايشة الله يرحمهه جان كالت نفس الحجي..
ماتت واخذت سرهه وياهه..

گلبي يكلي ما مستحيل حسناء تسوي شي شين..
بس الوادم كلهه تكول العكس..وعدهم دليل..
انه بيمن اثق واصدك؟..والكثرة تغلب الشجاعة..
مرات تشوفيني احجي..

بس ما تتخيلين شكد اتحسر على كل كلمة حجيتهه ضدهه وهي بگبرهه..

تدرين... انتي مثل سمارهه ونعومتهه..
بس ملامحج علي..عيونج شكلهن ولونهن..
خشمج وحواجبج..استنساخ..
خوما تضوجين چي تشبهيني؟..

ابتسمت..لا بالعكس..اطلع حلوه مثلك..
ابتسم وجر نفس طويل..بي حسرات مالت سنين..
اريدج تسامحيني على كلشي سويتة..
زواجتج من عقيل جانت غلطه..بسبب تفكيري القديم..

الوكت مو مناسب احجيلج شصار..
بس عرفت روحي غلطان ومتندم على كلشي سويتة..

ما ادري..يمكن مرتاحه انتي وعقيل..
ما اريد اخرب عليكم..

شوفي يابه..من اليوم ورايح انه سندج..
وياج خطوه بخطوه..واكيد حساندج بقراراتج..
اذا شفتي عقيل موش زين وياج بس كليلي..
اخلي يطلگج بنفس الدقيقة..واذا ما بيناتكم شي مو زين..الله يهنيكم..

الشغلة الثانيه..
يا يابه..انه رجال..واحتاج مره..
تكويلي ملابسي..تسويلي لگمة..
من يوم الماتت حسناء خسرت الدنيا هي واهلهه..
لحد ما الله دزلي وحده..كدرت تعوضني ولو بأعشار..
انه متزوج..من زمان حيل..

وعندي بنات ثنين توم..اصغر منج ب٣ سنوات..
عاينت علي بنظرات مابيهه تفسير..
مذهوله من كلماته الحنينة..الي عوضتني عن الايام الي جان ميهتملي بيهه..

متفاجئة من اعترافه بخطئه..
ومتفاجئه لأن طلع متزوج مثل ما فكرت..
حضني وباسني من راسي..
- اسف.. غالية وعزيزة..وقطعة من امج محطوطه بگلبي..