ثمرة الماضي

part 23

ماريد جنة ولا قصر ..
    وياك ارد أگضي العمر ..
يحبَيبي ما احمل هجر ..
    ياروحي ما احمل هجر ..
لا عاش عمري ولا عشت ..
        لو يوم عن بالي رحت ..
.. حبَيبي وعليك تعودت ..
ما أكدر انه بلياك ..
   خليني ..خليني وياك ..
انته عمري ..وانته روحي ..
     .. خليني يمك ..

ــــــــــــــــــــــــــــــــــــــــــــــــــ

سارة ام صگر : يمه اخلاص جيبي التلفون..اريد اشوف اخوج وصل بعده..

اخلاص : اي هسة لحظة..
سارة : مرمرني هذا الرجال..اكلة يمه من توصل خابرني يكول اي ويغلس..حتى بفترة السقوط يروح يلتحق..اكعدلك جم يوم لا شلون ميصير..اجت اخلاص جابتلي التلفون.. دورت اسمة وخابرت..دكيت اول مره ماجاوب..كمت على حيلي ورحت للصالة..انتظرت دقايق ورجعت خابرتة..جاوبني..

صگر : ها يمة شلونج..
سارة : شلوني..عايفني هج حتى ماتكول امي خطية يضل گلبهه علي..وصلت بعدك؟..

صگر : تعذريني والله التهيت..هسة يله فضيت..

سارة : ها خوش..شكد وتنزل..

صگر : مو گتلج مطول هلمرة..بال١٥ يوم..اذا كلش عشر ايام واجي..خير اكو شي..

سارة : لا سلامتك..يلة بالك على نفسك..
صگر : يمة اصبري..

سارة : ها عيني كول..
صگر : باجر خطوبة سرور..روحي وره ما تخلص الهوسة شوفيلي دنوة شلونهه..ضل بالي عليهه..
سارة : ليش شبيهه..

صگر : بس شوفيهه وكليلهه صگر سأل عليج..
سارة : اويلي انته وراسك..يله ماشي..سديتة ورحت للمطبخ.. جنت مخلية الاكل ع النار..داسوي دولمة ومنهه اوزع للجيران ثواب لحامد..واكفه ع الطباخ واتذكرة..

اخذني انه وصغيره جنت طالعة وي امي لمحل ذهب..اذكر جنت لابسة تنورة جوه الركبة بشوي وقميص ابو الياخة..وشعري كاريه قصير.. بعد شوي عن المحل جان اكو مطعم..هو طلع وي اصدقائه ويعدل بدگم الردان مالت القميص..ملامحه جذبتني طوله ورزانته طبيت وي امي للصايغ..جان عدهه ترچية مكسوره تريد تبدلهه..ضل منظره ببالي..حسبته راح هسة بس من طلعنه جان واكف..رجعنة للبيت وبعده ببالي..گبل كلشي ماكو..لا تلفون بيدك..تطلع وي امك لو احد من عائلتك وترجع يعني الشي بصعوبة يتحصل

وراهه بلشت اداوم..طبعا انه خلصت ثالث متوسط وراهه دخلت معهد تجارة..جان عندي اخت توم بس متشبهني..بس بالاسم توم..فتجي وياي للدوام يعني سجلنة سوه..طلعت من بيتنة براس الفرع شفتة واكف.. بالبداية خفت الة نيه موزينه وياي جي شافني صغيرة يحسب اتساهل واتقشمر..غسلت ع الموضوع ولو جنت اشوفة كل يوم بس اسوي روحي مشفتة ضليت تقريب الاربع شهور..لحد امتحانات نص السنة..طلعت من الامتحان ابجي..جنت ممجاوبة وخفت ارسب..ابوي من يدخلنه للمدرسة يكول اليرسب يبطل..وگبل مجان اكو خصوصي ودورات تقوية فالطالب يعتمد على نفسة وبس..