ثمرة الماضي

part 8

ببيبي ما اكدر انا....
انســــاك...
  والله ما اتحمل
بلـيـــاك....
عمـري انگضى بس اطلب انا....
رضــــاك....
صبري خلص..وين انا ..
الگــــاك....

ـــــــــــــــــــــــــــــــــــــــــــــــــــــــــــــــ

يمه..مابيه شي..هسه اكل و امدد شويه اصير زين..
بس المهم انتي زينه..تره اضيع بدونج ها..
ابتسمت هي و باستني من وجنتي..اخذت هندامي
وترخصت منهه و دخلت للحمام سبحت..
سمعت صوت......
ورود و امهه يسولفن يم الباب..سديت مي الدوش..
سمعت حجيهن وليتني ما سامع..
ورود : يمه لهسه ماكو خبر على دنوة..شلون بينه..
فاطمة ام ورود : اييي هسه انا شمعرفني..وين ودوهه هذوله..
ما اتفقنه هشكل..گناله يوم يومين و خابر ابوهه..
ادور هل صگر هذا لا يحجي و لا يكول..شلون حنعرف ماادري..
- كله من وراج يمه..كتلج يحبهه يحبهه..اوف شلون بلوه..
- انلصمي انتي..كال يحبهه كال..شيحب منهه..
فگر و بس تبجي..شوفي انتي شحلاتج..
- اي خل يفيد هل حجي..من هو حتى ما يعاين عليه..
ما يطيقني..شبيج يمه..دحاجيهم..شوفي وين ودوهه..
اذا عرف جدي نضيع..او ليش جدي..صگر بس يعرف الله يستر..
- دمشي دمشي..محد يعرف..خل ارتاح تعبت من الهوسه..

صگر........................
وگف شعر راسي..شلون هجي؟ شلون نطاهه گلبهه تأذيهه..
شلون تأذي دنوة..هاي البريئه الحلوه..الي رجل دجاجه متحل..
هجي اكو ناس تكرهه و توصل لهل مواصيل؟
خاف انا متوهم..يجوز مسمعت زين..يجوز مخربط..
چي منايم و مماكل..لك حتخبل..
ااخ لو زلم ثنيناتكم..
اكمشهم بنص الفاتحه اسويهم وصل وصل..
بس هسه ما اتصرف أي تصرف..
اول شي اروح للمركز..
افتح تحقيق وي هذا زيد جبير مالتهم..
وراهه اذا جان حچيه نفس الحجي السمعته..اعرف شتصرف..
بدلت و طلعت..دخلت للمطبخ..ورود واگفه بالباب..
صديت عنهه..كلت : وين سرور..نوارة..اي وحده..
ورود : انا هنا..أمر..رايد شي..
- عفتهه و رحت لغرفة الوالده..جانت بالحمام مال غرفه..
طلعت شافتني كاعد عل كرسي و مدد رجليه من التعب..
- شبيك يمه..متجي تنام..
- ما اريد..ميجيني نوم..بس اريد منج شغله صغيره..
- اي يمه عيوني الك..شتريد..
- مشتهي اكل من ايدج..صار يومين مماكل شي..غادي فدنوب..
- يمه صخام الوجه..يومين مماكل؟..چا انا شنو هنا..
ما ادري بيك هجي مهمل..
- رحت للمطبخ و شافتني ورود..بس ما استسيغ الاكل منهه..
ما اطيقهه..سويلي انتي..اي شي..حي الله..
بس ديصير بيه حيل..حتى اطلع وي الزلم بالفاتحه..
- اي والله حتى انا و لا احبهه..ادور بس تحجي ع لبنيه..
خطيه حتى و هي مموجوده يحجون عليهه..الله يسامحهم..
- گزيت ع اسناني..ااخ بس لو اشوفج وحدج انتي و امج الحيه..
اخليكم حلم توصلون لهل ديره بعد..راحت امي..
ضليت كاعد بالغرفه..يا يابه..فد تعبااان..احس بس جسد..
هلكد ما روحي تعبانه..جسمي تعبان..كلشي بيه تعبان..
رحت تمددت عل جربايه..فتحت المجر..لكيت البوم صور..
كل الاجه ببالي هاي صور امي و ابوي..بس لكيت غير شي..
صور امي و دنوة..امي و سرور و نوارة..مرة عمي قاسم ابتسام..
هجي صور العائله..
لكيت صوره لدنوة وحدهه..
كاعده عند النخله بالحديقه الجبيره..و ضاحكه..
شعرهه نازل على جتفاهه..
مشيت اصبعي عل صوره..
على وجهه و ضحكتهه..شفايفهه..جريت نفس طويل..
و زفرته بتعب..اخذت الصوره..خليتهه بجيبي..
وره شويه اجت امي جايبه صينيه بيهه اكل..
يمه ليش تعبتي نفسج..كتلي سوي اي شي بس يلزم گلبي..
- عزيز گلبي ما اتعب نفسي عليه..چا المن اتعب..
- فدوه لكلبج..خلت الصينيه بالكع..جيت كعدت..اكلت..
كملت..صحت اخلاص شالت الصينيه و راحت..
طلعت من الغرفه..رحت للديوانيه..عمامي كلهه هناك..
محيي و قاسم و كاظم و فيصل و لواء..بس ابوي جوه لتراب..
سلمت و كعدت يمهم..ديتناقشون بموضوع الخطفه..
الجد : ما لگينالهه اثر..ادور يطلعون كاتليهه و مندري بيهه..
فيصل : يابه انا عندي جماعه يشتغلون يمي..
واصلين خوش مواصيل..ادزهم للمناطق المشبوهه يدوروهه..
- اي يبه شكو تسألني..توكل و كلفهم يدورون..
محيي : بس تجي ازوجهه..ماريد اشوف وجهه بعد..
الجد : شنو سالفتك انته؟..شوف احنه وين ملتهين و انته وين..
شبيك وي البنت..شمسويتلك..اشو جوه ايدك..
وين ما تريدهه تروح..تروح..و كلشي تسويلك..
ما ادري شتريد..
- اريدهه تروح و ماشوف شكلهه..
- مو هي هسه رايحه و محد شايفهه..
- لا تزوج و تروح..و مترجعلي..و لا تكول عندي اب..
صگر : بهل اثناء دخل احمد..
احمد : انا ازوجهه يعمي.. بس خل ترجع سالمه..
- حسيت گلبي يفور..كمت وكفت من مكاني..
انته لو بيك خير روح دورهه..موش كاعد هنا چنك مره..
حتى ما كلفت نفسك و سألتني عنهه شي..
قاسم : انته شبيك وي ابني..هو احگ بيهه منك..
- و ليش احگ بيهه مني؟ اولا انا ما داك رجل مثله..
و اذا ردتهه اخذهه جدام الكل و غصب عنكم كلكم..
انا گلبي شايغ عليهه..چي بعدهه صغيره و محد دايرلهه بال..
بس انا و جدي دنسوي العلينه..كلفت نفسك؟
انته و انته..و كلكم..محد طلع بره البيت و كال و حچى..
انا لو ردتهه..اخذهه من هي و صغيره..
چي اعرفهه من زمان.
و ادري شنو وضعهه بالبيت..
حتى دراسهه اخليهه تكمل..و ماخليكم تلمحون طيفهه..
بس ما ردت ادخل بطريقه موش مال زلم و ناس ما عدهه اسلوب..
ما اكول غير استغفر الله..عفتهم و طلعت..بالباب صاحني
عمي كاظم.. : تعال اكعد لا تروح..
- رجعت كعدت بمكاني..بس كاعد على اعصابي..
بس اعاين على احمد..احس نار تصير بصدري..شكد سخيف..
اكره و ما اكره هو هذا..
هسه تأكدت ان حجي دنوة صحيح..
يمكن ما جانت متقصده..و هو السرسري اجاهه
كاظم : كلنه گلبنه محترك على دنوة..مو بس انته..
خلي البنيه هي تختار شريك حياتهه..مالنه دخل..
هذا ابوهه عدل..هو يعرف يتصرف..
و الواحد ليش ينكر....
حچي صگر صحيح..كلنه ملتهين بالفاتحه و المعازيم..
و صگر الوحيد يروح للفاتحه..و يروح للمركز..و يدور عليهه..
و انته ياحمد..مالك حگ تفتح حلجك و لا كلمه..
- يعمي انا ما يهمني كل هل حجي..انا بس اريد اردهه..
اريد ارجعهه للبيت..بنيه وحدهه بين هل ذيابه..
تره والله صعبه....
انا هذا الاريده بس..وعد بس اردهه..محد يشوفني هنا..بس اكمل شغلي هنا و اروح..
الجد : ما مسموحلك تعبر الديره..انته اگربلي من ولد عمك..
اريد دنوة تصير يمك..متأكد حتكون بأمان اكثر من أي مكان..
- يجدي انا بس اريد اردهه للبيت..بعدين شيصير خل يصير..
ترخصت منهم و طلعت..نصبت الچادر..انا و عصام..
جبنه الكراسي خليناهن..و بدت الناس تجي..
مشى اليوم مثل البارحه..گلبي خلص من التعب و من دنوة..
بس لو ترد..تردلي روحي و كل تعب بيه يروح و ما يبقاله اثر..
خلصت الفاتحه بـ ٦ ونص العصر..شلت الچادر و الكراسي..
رجعتهن لصاحبهن..رجعت للبيت..بالطريق خابرني عمار..
عمار : اهلا سيدي..
- هلا عمار..خير شبيك..
عمار : سيدي لازم تجي للمركز..تحاجي زيد..
لأن اليوم اجو جماعه رادوا يشوفوه..بس ما خليناهم..
و بالگوه طلعناهم...حتى اذا وراهم شي..نتصرف..
- هسه جاي انا..و نتفاهم بالمركز..سديت الاتصال..
و بوجهي رحت للمركز..
وصلت..طفيت السياره و نزلت..
سلمت ع احمد و منتصر..وراهه دخلت للغرفه الي بيهه زيد..
سديت الباب و دخلت..جريت كرسي و كعدت جدامه..
- اي ...احجي شعندك..
زيد : احجيلك كلشي..بس اريد ضمان..
- ضمان لشنو..
- اذا حجيتلك لازم اطلع..يجوز اكدر اساعدك حتى تلگاهه..
- انتو تضحكون عليه؟..ساعه صاحبك حيدر يكلي اساعدك..
هسه انته تكلي اساعدك..سلامات..خوما شايفيني اثول..
يول فار هاي الدنيا كلهه بهل اصبع..شفت الماشافه الشايب..
موش تجي انته زعطوط تضحك عليه..طلعه متطلع..
لحد ما اجيب البنيه جدام عيني..وراهه تاخذ جزاتك و خلص..
- لا ما يصرفلي هل حجي..
- هذا العندي..تحجي لو متحجي..انته باقي هنا..
- يله راح احجي..ما خسران شي انا..عود اطلع بطريقه..
- اسمعك..
- انا جنت اشتغل بجمعيه..يبيعون بيهه اجهزه منزليه للموظفين..
ام المركز جانت تجي كل فتره تتفقد الشغل و المبيعات..
ما اعتقد هي هاي ام المركز..يمكن المشرفه هيج شي..
فد مره انا جنت متعارك وي واحد موظف ويايه بالجمعيه..
كتله انا اشتغل بفلان مكان..و اكدر انهيك من الوجود..
الظاهر هي سامعتني..لأن فديوم اجت هي..
و شافت نقص..كامت تصيح و خبصتنه..كمت انا تعاركت وياهه..
وره ما صفت الاجواء..صاحتني عدهه بالسياره..
هددتني ان تفضحني..لأن طلعت سامعتني من هددت الرجال..
گالت عدهه صديقه اعلاميه بصحيفة مدري شنو..
تنشر صورتي و تكتب تصريحات ضدي..
على انّي ابتز العالم..و اخذ منهم فلوس..
انا رضختلهه صراحه...
و اشتغلت كله جوه ايدهه..حتى غرگتني بالفلوس..
لحد ما..قبل شهر و نص تقريبا..گلتلي رايدتك بشغله..
بس مو شلون مجان..كتلهه اي تدللين..اطلبي..
كلتلي ابن حماي عنده منصب جبير بالجيش..و كل كم سنه..
يترفع من منصبه و ياخذ منصب اعلى..و رايدته لبنتي..
اريدك تخطف شخص عزيز عليه و تهدده بمنصبه..
حتى يتنازل و يذب استقاله..يضل بدون شغل..
و انا اشغله بجمعيتي..وكتهه يضطر يقبل يزوج بنتي..
انا استلمت المهمه و عرفت موقع البيت..و كلشي عرفت..
بقيت بس انتظر اشاره منهه..
وكتهه خابرتني بالليل..
كلتلي طلع يحب بت عمه..و راح اخليهه تروح للمگبره وياه..
مناك انته اخذهه..
و ضل ساومه على منصبه اكثر من مره..
مره اطلب منه فلوس..مره اطلب منه يتنازل عن منصبه..
اذا ما قبل و ضل معند..وديهه لبيت دعاره بالطوايل..
كم اسبوع و ارجع خابره..گله البنت بفلان مكان و هجي صار..
ليش ما انته عرفت موقع العماره الچنه بيهه؟؟...
اضطريت اترك المكان و اروح لجرف الصخر..حسب معارفهه..
البنيه..الله شاهد..جنت ما مأذيهه..حتى جبتلهه ملابس..
شفتهه مصخنه و تتراجف..و جبتلهه اكل..
بعدين بالليل..نزلت اشرب مي..شفت باب الطرمه مفتوحه..
عبالي واحد من الولد طالع يدخن لو يخابر..رحت لغرفتهه..
لگيتهه مموجوده..عرفت هي الطالعه..و انهزمت..
انا خابرت المره رأسا..لأن ما اكدر اتحمل مسؤولية البنت..
تصير عليه تهمتين..خطف و البنيه ضاعت..
كتلهه تره البنيه موش موجوده بالبيت..انا سويت العليه..
و بعد تره انا ما مسؤول عن اي شي..و سديت التلفون..
- انته مخرف لو تحجي من كل عقلك؟..
- سيدي كل الحجيته حقيقي..و لا كلمه جبتهه من عندي..
- شنو بيت دعاره..شنو هل مصيبه..انته خبل شي؟؟
هاي المره شسمهه؟؟جمعيتهه وين..اي شي عنهه..
- ام قصي..متروسه شويه..
- من كثر الصدمه..حسيت راسي يصيح من الوجع..
عفته و طلعت..صحت منتصر قفل الباب..وصيته ميدخل احد..
حت لو كال انا كرابته لو شي..
طلعت من المركز....
صعدت السياره و رحت للبيت..الطريق كله مصدوم..
يعني مرة عمي لواء؟ ..اذا متت بفراشي محد يكول ليش مات..
من كثر الصدمات هل فتره..طبكت السياره بالكراج..
و طبيت للبيت..شويه خافّه الهوسه..عاينت عل ساعه..
بـ ١٠ صارت..
رحت لغرفة امي..نايمه و يمهه اخلاص..طلعت بهدوء..
ما اريد تحس عليه..ادور يضل بالهه خاف ما اكلت و خاف مدري شنو..
طبيت لغرفة دنوة..رفعت راسي شفت ورود..استغفر الله..
ما ناويه تفك ياخه مني هل بنت..
ورود : شعندك هنا..مبين حنيتلهه..
- تگربت منهه..و كمشتهه من زندهه.. :
انتي الوحيده..مالج حگ تحجين و لا حرف واحد..انتي و امج..
لو ما لخاطر عمي..اسوي بيكم سوايه..اخليج تكرهين اسمي..
يله امشي طلعي بره..و اذا شفتج مره لخ هنا اعرف شسوي..
عتيتهه حيل..و شمرتهه يم باب الغرفه..
ورود : والله اذا رجعت دنوة اخليهه تكرهك..و متعاين بوجهك..
انا احبك موش هي..هاي شمفهمهه بالحب و سوالفه..
- هذا حب؟ تسمي حب؟ أي حب هذا؟
الي يودي بنت فقيره..
لا تحل و لا تربط..عايشه بحال سبيلهه..يوديهه بمكان مجهول..
تره سمعت كلشي انا..و ادري هاي لعبتكم انتي و امج..
بس ما صدكت..و جذبت نفسي..
چي كلت مستحيل توصل لهل مواصيل..
تبقى مرة عمي و اكيد هي عايشه وي دنوة و متأذيهه..
لج اكرهج يا بشر..انتي شنو حتى احبج..متستاهلين.....
متستاهلين ذرة حب..لج ما اطيق اعاين على الخلقه هاي..
شكد ما انتي حلوه..بس ولا تحلين بعيني..
و اذا بقيتي اخر بنيه بالدنيا كلهه..ما تدني نفسي عليج..
و دنوة بس الكاهه تحرمين تشوفيهه والله..
حسبالج هينه..انتي و امج..لج انتن شنو..انتن بشر عود؟
هاي امج بس اشوفهه انا اعرف اتصرف..
و دنوة اذا اجت و بيهه شي..ما تشوفين غير انتي و امج بره..
و بعد طبه للديره ما الكم..امشي طلعي..
و كوليلهه لامج ضاعت البنيه من وره غيرتج..
و لا انتي الحصلتي صگر..و لا امج كدرت تسعدج..
صيحت بوجهه : امشي طلعي كتلج..
و اذا شفت وجهج جدامي..اخليج تكرهين اليوم الحبيتيني بي والله..يله بره..
طلعت تبجي..و لا تكسر الگلب..عود مثل دنوة....
نزلت دموعهه عبالك روحي طاحت وياهن..
لج تحلمين تصيرين مكانهه..انا من ما شايفهه و حابهه..
و لا سويت علاقه و لا حبيت..موش ادور هسه وره ما شفتهه..
و كمشتهه بيدي..و سمعت صوتهه و شفت عيونهه تريدين اكرهه..
و احبج الج..يا حلمج الصعب تحقيقه ....
مددت عل جربايه..زين متمدد و كاعد بهدوء..
شكد متحمل بروحي انا..
تذكرت ابويه..حسيت گلبي نقبض..
طلعت الصوره من جيبي..ضليت اعاين عليهه...
ابويه و دنوة..شلون ثنين اعز من هل روح..
شلون حكدر انام و يغفالي جفن..غمضت عيوني جبر..
چي منايم صارلي يومين و هذا الثالث..بس كم ساعه..
نمت و ماحسيت بالدنيا بعد..بس رايح بسابع نومه..
عرگان و مختنك..مدري شجاريلي..
فتحت الباب و طلعت..عاينت..بعده حتى الفجر ما طالع..
بـ ٢ ونص..اخذت باكيت الجكاير و طلعت للمزرعه ادخن..
سمعت صوت بنت..يمكن يتخايلي..مستحيل تكون هي..
تمشيت شويه بالمزرعه..شفتهه هي..كاعده هاي كعدتهه..
تغني نفس الاغنيه الي سمعتهه تغنيهه اول مره..
جيت يمهه كعدت..عاينت عليه و ابتسمت..
        ' روحي وردت من شافت طولج..
و گلبي هام و ضاعت تفاصيله من سمع حسج..'
مديت ايدي..كمشت خصله من شعرهه..قربتهه يمي..و شميتهه..
اوووف ولج..وين جنتي عني..مشتاك لعيونج..
كلتلي : اجي..بس مو هسه..
كامت و راحت تتمشى بعيد..بس صوت ضحكتهه اسمعه..
لحد ما اختفى خيالهه..
گعدت مخنووك من بلعومي و الدنيا ما واسعتني..
عاينت بالغرفه..محد اكو..طلعت للمزرعه..هم محد اكو..
يعني جنت حلمان..يعني ما شفتهه..
ضبيت ايدي..ااخ يابه..فوك القهر..شسوي....
رجعت للغرفه تمددت..طلعت صورتهه و ضليت اعاين عليهه..
لحد ما غفيت.........