ثمرة الماضي

part 13

زهــراء الـــﻜناني

نسهر ونبچي...
اعله مودك
عادي متروسين حيل...

إشعدنه ناسينك ؟؟...
اذا بالدنيا ليل....

شوي واجت لابسه صايه وشال..چنهه تريد تطلع.
- اكلج حبيبتي..انه طالعة انطي باقي الفلوس لام الصالون..

كالت تعاليلي باجر..تعاي وياي..ما نطول..
يله هسه..غسلت ايدي ورحت لبست صايتي والشال واجيت..صعدت بالسيارة وطلعنه..
گبل شارعين من محل الصالون..تفاجئت..
شلون؟..لا اكيد مخربطة....

شفت سيارة ابوي طابگه عند باب بيت...
بيت مو حيل جبير..بابه بيضه وبيهه اسود..
هي هاي سيارته..انه متأكدة..بس ش
جابهه هنا؟..
مره انطخت السيارة وتشخطت..
فعرفتهه من الطخه هاي..خاف بيت صديقة هنا؟..
لو شنو..؟..من ارجع اسألة احسن شي..
خاطر ما اضل افكر خاف هج وخاف هج..

وصلنه للصالون..نزلت خالتي انطت الفلوس لام الصالون..انه ضليت بالسيارة كاعده..
شوية واجت..هي بنت المنطقة من جان رجلهه عايش..

اكيد تعرف اهل هذا البيت..ضليت اكول اسألهه لو اعوف السالفة؟..انتظرت لحد گبل ما نوصل لمكان البيت بشوية..اكلج خالة..

- ها عيني..كولي..

تعرفين اهل هذا البيت؟..وأشرتلهه عليه..
- اي

سيارتمن هاي؟..مالتهه يعني؟..

- لا خالة مال رجلهه..يجيهه كل فترة..
ليش يجي كل فترة؟..

- سمعت مزوجة بالسر..والله اعلم..
ليش؟..شعندج..

صدمتني..زين معقوله ابوي مزوجهه؟..
هاي سيارته انه متأكدة..زين ليش ما حچى وكال؟..
ها...لا هج ردت اسأل

شوية و وصلنه للبيت..
مشى اليوم مثل البارحة..بس الفرق ضلينه بالبيت..
دنيا وره الغده كعدت تحجيلي على علاقتهم گبل الخطوبة..

تونست وانه اسمعلهه..
للعصر جابوا كرزات وجباسه..
هج خلص اليوم..لملمنه البيت بالليل..
صعدو كلهم..ضليت انه جوه..

عاينت عالتلفون..هسه انه شكو واكفه هنا..
شنتظر عود..يخابر؟..هي مره وحده قابل شكد..
صعدت فوك يم البنات..بعدهن كاعدات..
طبيت للغرفة صافنه..

حلا : شبيج دنوة..المن شفتي..وغمزتلي..
ابتسمت..لج المن اشوف..مو يمكم من الصبح..
انه باجر ارجع..

دنيا : هاي شنو يمعودة..هي هاي هم جيه..
كلشي ما شفنه منج..ابقيلج بعد چم يوم..

- مو.......

- سكتي لا مو ولا مو مو..
هو ابوج مو كلج من تضوجين خابريني؟..
شنو ضجتي حضرتج يعني..

- ضحكت..ولا ينطون مجال..
خلص..كلت اضل بعد..

تمددت..بين ضحكه وسالفة غفوا البنات..بقيت انه..
ضليت اتگلب بالفراش..عود ليش ما خابر اليوم؟..
دنوة قابل كل يومية تريدي يخابر..