ثمرة الماضي

part 25

وازعلك ..
لذتك بالعشگ من تغتاض ..
واتگرط شفافك عسل گنطاري ..
وارضيك بـ ولك ..
يابعد هاي وهاي ..
واتعذر سنة وماتقبل اعذاري ..
واحبك من صدك ..
من حب زمان الفات ..
مو حب هلوكت والعشگ طياري ..

زهــراء الـــﻜناني........

طبيت للفراش ضليت اتكلب ما اكدر انام..احس الصار حلم مو حقيقة..

كعدت اتذكر صگر وصوتة ذاك اليوم شكد مقهور..واليوم شلون متغير والفرحة بصوتة مبينة شحال لو بعيونة..ورة ساعه ما اجاني نوم..نزلت جوة اشرب مي واجيب شي اكلة..الباب مالت المطبخ مفتوحة بس الكل نايم..منو برة.. طلعت على كيفي..وكفت بالباب مالت المطبخ..هاي شذى..

شعدهه هسة بالليل..وويامن دتحجي اصلا..شوي وسدت الباب اندارت شافتني..مثل الخطف لونهه..اجت يمي

شذى بهمس : اذا فكيتي حلكج اموتج..لا عبالج جنت طالعة اشوف صاحبي مثلج..هاي مرة صديقتي انطيتهه شغلة

دنوة : وانه شنو..صديقتج يخصج..لا تضلين تهددين هي جم يوم واروح بعد متشوفيني..

شذى : اكص ايدي اذا رحتي باب الحوش..
دنوة : عفتهه ورحت شربت مي..هي قفلت البيبان وطبت لغرفتهه..وانه صعدت فوك..حتى اذا صديقتهه مدري منو بس شنو هسة تتذكر تجي..ب١٢ ونص بالليل..هذا نهار الله شطولة ..شكد غريبة هاي المرة..

تمددت وغفيت..كعدت الصبح كمت غسلت ونزلت جوة..ابوي جان ديحاجي شذى..

محيي : حيجون خواني وعائلة قاسم بس..بيت خالتهه همات ما اريد تحجين شي يسمهم..هي دقايق ويروحون..

شذى : لا عمي براحتهم..قابل هو بس بيتي..
محيي : اي واطلعي وياهه اجريلهه فستان اليوم..هي حتصير خطوبة وعقد بنفس الوكت..مو تنسين..

شذى : ميخالف..هسة نكمل ريوك واخذهه ونروح..
دنوة : ابتسمت ورحت صبحت عليهم..كال حطلع للشغل كبل لا يجون اخابركم ..اكل بالعجل وطلع..اندارتلي شذى

شذى : سمعتي ابوج شكال..لازم اخذج تستنكين فستان للعقد اليوم..اكلي حتى نطلع..

دنوة : اي..حتى من الفرحة ما اشتهي..احس شبعانة.. اكلت لكمتين وزيتون وكمت فوك لبست الصاية والشال ونزلت.. هي هم جانت مبدلة وكاعدة تنتظر..طلعنة للشارع واخذنة تكسي نزلنة عند المحل الاشتريت منة بخطوبة دنيا..ضليت اتصفن ما ادري شختار..عاد الرجال كال لشنو ماخذيهه..
شذى : للعقد مالتهه عيني..

كال اي هذني يناسبن..وشوفنة اكثر من موديل..هي اختارتلي ذوقهه حلو..رحت كدرتة..اجة فت علي..اخذت لونة طوخ عيب من صگر وامة..الرجال كال هسة تدفعون لو من ترجعو مراح تفرق..كلتلة لعد من نرجعة ابوهه يجي..خلاه بعلاكة عليهه اسم المحل وطلعنة..اخذنة تكسي ورجعنة للبيت..مارحت صالون

كلشي يهون لصگر..مثل ما هو اجة وخطبني اكثر من مرة ولو ابو ميت انه هم اسوي اليطلع بيدي..
وكفت ع الطباخ اسوي الغدة..كملت وصبيتة..رزان وسما كلساع يجون علي..ها محتاجة شي اسوي يالعروسة..شكد فرحت بيهم..