ဤပန်းပွင့်ငယ်၌ အဆိပ်ရှိသည် (ဤပႏ္းျပင့္ငယ္၌ အဆိပ္႐ြိသၫ္ )

Part 25

လေပြေများကတိုက်ခတ်နေပြီး သစ်ရွက်ကြွေများကလမ်းမထက် ပျံ့ကြဲနေကာ လှုပ်ရှားသွားလာနေသည့်လူအများ၏ခြေရင်းတွင်ဝပ်တွားနေကြသည်။ Bမြို့၏အကျော်ကြား‌ဆုံးတက္ကသိုလ်ဝင်းကသက်ဝင်လှုပ်ရှားနေပြီး ဆူညံကာကျောင်းသားများဖြင့်ပြည့်နှက်နေသည်။

သွမ့်ဟွားယွဲ့က သူ၏အတန်းဖော်နှင့်တူ တက္ကသိုလ်ဝင်းအပြင်ဘက်သို့ လမ်းအတူလျှောက်ကြရင်း တစ်ခါတစ်ရံ၌သွားတက်လေးများပေါ်သည်အထိပြုံးနေတတ်သည်။ မြို့တော်၏ဆက်သွယ်ရေးကအလွန်အမင်းကောင်းမွန်ပြီး နာမည်ကျော်ကြားသောသွမ့်မိသားစု၏ဤသခင်ငယ်လေးကို မသိသည့်သူမှာအလွန်နည်းပါးလွန်းလေသည်။

သွမ့်ဟွားယွဲ့၏အတန်းဖော်ဖြစ်သူအမည်က လီယန်ဖြစ်ပြီး သွမ့်ဟွားယွဲ့၏အထက်တန်းမှအတန်းဖော်လဲဖြစ်ခဲ့သည်။
သူ၏ဂုဏ်ပြုပွဲအခမ်းအနားကောလဟာလတွင် တန်းခွဲAက သူ့ကိုထောက်ပံ့ပေးခဲ့ကြသည့်အတွက် သွမ့်ဟွားယွဲ့ကသူတို့အားလုံးအပေါ်တွင်အမြင်ကောင်းများရှိသည်။ထို့ကြောင့် သူ့ကိုသံသယမဝင်ကြောင်းဦးစွာထုတ်ဖော်ခဲ့သည့် လီအိမ်တော်၏အနှီသခင်ငယ်လေးနှင့် တက္ကသိုလ်တစ်ခုတည်းတွင်ပြန်ဆုံချိန်၌ တဖက်လူတွင်မကောင်းသည့်ရည်ရွယ်ချက်မရှိကြောင်းသူအကဲခတ်ပြီးသည်နှင့် သူငယ်ချင်းဖြစ်ရန်သဘောတူခဲ့သည်။

တက္ကသိုလ်၏ဝင်းက ကျယ်ဝန်းလှပြီး သွမ့်ဟွားယွဲ့နှင့်လီယန်က အေးဆေးသက်သာစွာပင် စကားပြောရင်းအချိန်ဖြုန်းနေကြပေမယ့် လမ်းတစ်လျှောက်ရှိလူများကတော့ သူတို့နှစ်ဦးကိုကြည့်ပြီး တီးတိုးဝေဖန်ကာ ဓာတ်ပုံပင်တိတ်တဆိတ်ရိုက်နေကြသေးသည်။

လီယန်က သူ၏ပတ်လည်ရှိတီးတိုးပြောသံများကိုနားထောင်ပြီးနောက် တခစ်ခစ်ရီမောလိုက်ပြီး သူ့ဘေးကသွမ့်ဟွားယွဲ့၏ပခုံးစွန်းကိုတိုက်လိုက်သည်။
"သခင်လေးသွမ့်ကတော့ ကျောင်းတက်ပြီး၃လမပြည့်ခင်မှာတင် တက္ကသိုလ်တစ်ခုလုံးကိုတုန်လှုပ်အောင် လုပ်နိုင်စွမ်းရှိနေပြီပဲ"

သွမ့်ဟွားယွဲ့၏မျက်ခုံးများကပင့်သွားပြီး သူ့ဘေးကလီယန်ကိုတိတ်တဆိတ်ကြည့်လိုက်သည်။
လီယန်က သူ၏ဂရုမစိုက်သည့်အမူအယာကိုမြင်တော့ အနည်းငယ်တွေဝေသွားပြီး‌မမေးပဲ‌ မနေနိုင်တော့ပေ။