ဤပန်းပွင့်ငယ်၌ အဆိပ်ရှိသည် (ဤပႏ္းျပင့္ငယ္၌ အဆိပ္႐ြိသၫ္ )

Part 27

"သွမ့်ဟွားယွဲ့က ကြားထားတဲ့သတင်းတွေထဲကထက်တော့ ပိုလှတာပဲ"
လုရိရဲ့မျက်နှာကအမှောင်ထဲမှာ အနည်းငယ်ခက်ထန်နေပြီး သီးသန့်အခန်းဘက်ကိုကြည့်ကာ အတွေးနက်နေသည်။

"သွမ့်ဟွားယွဲ့ ဘယ်လောက်လှလှ လုရိကိုမှီနိုင်မှာတဲ့လား"
လုရိလဲကျသွားစဉ်က ထိန်းပေးခဲ့သည့်လူကဝင်ပြောလာခဲ့ပြီး သူကလုရိ၏မျက်နှာလေးအား နူးညံ့သည့်အကြည့်ဖြင့်ငေးမောနေလေသည်။ လူအုပ်ကထိုအခါမှလုရိအားလှည့်ကြည့်လာကြပြီး ထိခိုက်မှုရှိမရှိစစ်ဆေးကြတော့သည်။

"ရွှီလန် ကျွန်တော်တကယ်ဘာမှမဖြစ်သွားပါဘူး အင်္ကျီပေသွားရုံပါပဲ စိတ်ပူပေးလို့ကျေးဇူးတင်ပါတယ်နော်"

လုရိကချိုမြသည့်အပြုံးဖြင့် သူ့ကိုထိန်းကိုင်ပေးထားသူကိုကျေးဇူးတင်လိုက်ပြီး ရွှီလန်၏မျက်နှာကလုရိကြောင့်နီမြန်းသွားရတော့သည်။ လုရိ၏အနည်းငယ်ရုန်းကန်မှုကိုသတိထားမိသည်နှင့်သူ၏လက်ကိုနှမျောတသဖြစ်စွာလွှတ်ပေးလိုက်သော်လည်း ရွှီလန်၏မျက်နှာတွင်အပြုံးကြီးကြီးရှိနေဆဲပင်။

"မင်းဘာမှမဖြစ်သွားတာတော်ပါသေးတယ် ဒီသွမ့်ဟွားယွဲ့!"
ရွှီလန်၏မျက်နှာကမဲမှောင်သွားကာ သီးသန့်ခန်းဘက်သို့မျက်နှာမူပြီးဆဲရေးလိုက်လေသည်။

"ပိုင်းလုံးကောင်ကများ လုရိကိုညစ်ပေသွားအောင်လုပ်ကြံရဲတယ် သူကလုရိနဲ့ငါ့ကိုရန်စလိုက်တာပဲ"

ရွှီလန်၏ဆဲဆိုသံကစင်္ကြန်တစ်လျှောက်ပျံ့သွားပြီး လူအုပ်ထဲရှိရွှီလန်၏နောက်လိုက်များကပိုမိုတက်ကြွသွားတော့သည်။
"ရွှီကောပြောတာမှန်တယ် သွမ့်မိသားစုကချမ်းသာနေတာနဲ့ပဲသူ့ကိုယ်သူဘာများထင်နေတာလဲ သခင်လေးလုနဲ့ရွှီကောလို အရည်အချင်းမရှိပဲ ‌ချမ်းသာတဲ့ယောက်ျားနောက်လိုက်ဖို့ပဲတွေးနေတယ် ရွံစရာကောင်းလိုက်တာ"

"ငါကြားခဲ့တာတော့ သွမ့်ဟွားယွဲ့ကအထက်တန်းတောင်မပြီးသေးပဲနဲ့ ပထမသခင်လေးတုကိုမြူစွယ်ပြီး ‌သူနဲ့စေ့စပ်ဖြစ်အောင်အတင်းအကြပ်ကြိုးစားခဲ့တာတဲ့"

ရွှီလန်၏မျက်နှာကမှောင်မဲသွားကာ ရွံရှာသည့်အမူအရာကထွက်ပေါ်လာတော့သည်။