ဤပန်းပွင့်ငယ်၌ အဆိပ်ရှိသည် (ဤပႏ္းျပင့္ငယ္၌ အဆိပ္႐ြိသၫ္ )

part 21

သွမ့်ဟွားယွဲ့က သူ၏မျက်လုံးများကိုဖွင့်လိုက်ပြီး ဝေဝေဝါးဝါးအသွင်ဖြင့် ငေးမောနေသည်။အချိန်အတော်ကြာမလှုပ်ရှားခဲ့သည့်သူ၏လက်ကို မြှောက်လိုက်ချိန်တွင် စုန့်ယွီကနိုးကြားသွားပြီး သူမသား၏လက်ကိုဆုပ်ကိုင်လိုက်သည်။

"ယွဲ့အာ..ယွဲ့အာ သားသတိရလာပြီလား"

သွမ့်ဟွားယွဲ့ကခေါင်းကိုခပ်လေးလေးညိတ်ပြလိုက်ပြီးအသက်ကိုဖြည်းညင်းစွာရှူသွင်းလိုက်သည်။စုန့်ယွီကသူ၏လည်ချောင်းအတွက် ရေအနည်းငယ်ခွံ့တိုက်ပြီးချိန်မှ သွမ့်ဟွားယွဲ့၏ခန္ဓာကိုယ်ကအနည်းငယ်အဆင်ပြေလာသည်။ သူကအားနည်းကာမောပန်းနွမ်းနယ်နေသည့်ခန္ဓာကိုယ်ကိုလျစ်လျူရှုကာ စုန့်ယွီကိုကြည့်လိုက်သည်။

စုန့်ယွီ၏နုပျိုနေသည့်မျက်နှာလေးက စိတ်ပင်ပန်းမှုများကြောင့် အနည်းငယ်နွမ်းလျနေပြီဖြစ်ကာ သွမ့်ဟွားယွဲ့၏အကြည့်ကိုလက်ခံရရှိချိန်တွင် သူမကမထိန်းချုပ်နိုင်တော့ပဲ မျက်ရည်များကျဆင်းလာတော့သည်။

"မေမေ မငိုပါနဲ့..."
သွမ့်ဟွားယွဲ့က ဆေးထိုးအပ်ရာများပေပွနေသည့် သူ၏လက်ကိုမြှောက်ကာ သူမ၏မျက်ရည်များကိုအသာအယာသုတ်ပေးလိုက်လေသည်။ သူကအခန်းကိုဝေ့ကြည့်လိုက်ပြီး အနည်းငယ်အလိုမကျဖြစ်သွားသည်။

"ဖေဖေဘယ်မှာလဲ...ပြီးတော့ တုကျစ်ရှဲ့ရောဟင်...ကျွန်တော်သတိရနေတာကို သူတို့ကိုအကြောင်းမကြားထားဘူးလား"

သွမ့်ဟွားယွဲ့ကသူ၏အနားတွင် အလုပ်များနေကြသည့် အိမ်အကူများနှင့် ဆရာဝန်ကိုကြည့်ကာ ပို၍အလိုမကျဖြစ်လာသည်။

စုန့်ယွီ၏မျက်နှာကသူ၏မေးခွန်းအောက်တွင် အနည်းငယ်ပျက်ရွင်းသွားပြီး သူမကအကြည့်လွှဲကာအနည်းငယ်တွေဝေနေသည်။ သွမ့်ဟွားယွဲ့ကသူမကိုအာရုံမစိုက်နိုင်ပဲ ဆရာဝန်၏စမ်းသပ်ချက်များကိုခံယူနေရသည်။

"အကြောင်းကြားပြီးပါပြီ သားရဲ့ဖေဖေကမကြာခင်ရောက်လာလိမ့်မယ်...အားရှဲ့ကတော့"

စုန့်ယွီကသူမ၏စကားကိုရပ်တန့်လိုက်ပြီး သွမ့်ဟွားယွဲ့ကိုကြည့်ကာချိန်ဆနေရသည်။သူမက သွမ့်ဟွားယွဲ့၏အခြေအနေကြောင့် ယခုထိထိတ်လန့်နေဆဲပင်။ အကယ်၍ သူသာတုကျစ်ရှဲ့၏သတင်းကိုကြားသိ၍ ထပ်မံမေ့မျောသွားခဲ့လျှင်။