𝑝𝑜𝑖𝑠𝑜𝑛𝑒𝑑 - 𝐾.𝑇𝐻☆𝐽.𝐽𝐾

21.

დამძიმებული თვალები რომ გაახილა და უცხო, წამლების სპეციფიკური სუნით გაჟღენთილ კედლებს შეხვდა მზერით, შიში იგრძნო, მაგრამ ომეგის დამამშვიდებელმა, დედურმა შეხებამ მხარზე და დამაიდებელმა ღიმილმა ერთიანად მოხსნა დაძაბულობა. ბევრი არაფერი ახსოვდა გონის დაკარგვიდან ამ წუთამდე, მაგრამ იცოდა, რომ ახალი ნაოპერაციებელი იყო და სწორედ ნარკოზის ზემოქმედება არ აძლევდა თამამად საუბრის საშუალებას. დასუსტებულმა სხეულმა ჩვეული ენერგია მაშინ დაიბრუნა, საავადმყოფოდან სახლში რომ გასწერეს. სულ ერთი დღე-ღამის გატარება მოუწია საავადმყოფოში და მიუხედავად ამ პატარა პერიოდისა, სურვილი საკუთარი ალფის ნახვის იმდენად დიდი იყო, რამდენად ნაკლებიც გახლდათ იმედი. ჯონგუკს არ მოუკითხავს, ყოველ შემთხვევაში თეჰიონს ტელეფონი არ ჰქონდა პალატაში და რომ დაერეკა ალფას, კიმი ვერ გაიგებდა. ბეტამ ისიც იცოდა, რომ უფროსმა მხოლოდ ოპერაციის მეორე დღეს გაიგო ეს ამბავი და საღამომდე, სანამ სახლში გაწერდნენ, თეჰიონს უბრალოდ ძალიან უნდოდა პალატის კარი გახსნილიყო და ჯონგუკი შემოსულიყო თავისი მზრუნველი მზერით. დედამ მოუყვა თუ როგორი შეშინებული მოადგა სახლის კართან ჯეონი და ფაქტმა, რომ ბიჭი მასზე დარდობდა, ერთი-ორად გაახარა, მაგრამ მიუხედავად ჯონგუკის ღელვისა, ის თეჰიონთან არც საავადმყოფოში მისულა და არც გამოწერის შემდეგ ორი დღის განმავლობაში გამოჩენილა. ბეტას შეეძლო გაეგო ის, რომ ალფა ხალხს ერიდებოდა და ამიტომ არ მიაკითხა მას საავადმყოფოში, მაგრამ კიმი იმას ვერ ხვდებოდა, რა პრობლემას შეუქმნიდა ჯონგუკს მასთან სახლში ვიზიტი. უფროსს ეს ხომ მაინც შეეძლო?! წყენა თავისას შვრებოდა და ოპერაციის შემდგომ პერიოდში უხასიათობა უფრო მეტად დააწვა ბეტას კისერზე.

მართალია ჯონგუკი არა, მაგრამ იუჯინი გვერდიდან არ მოშორებია. მანვე მიიყვანა იმ დღეს საავადმყოფოში და სახლში გაწერისასაც გვერდით ედგა ბეტას. ინსტიქტური იყო თეჰიონის მხრიდან ყველა ის ფიქრი თუ რეაქცია, რომელიც იუჯინის დანახვისას იპყრობდა. ახალგაზრდა ალფისგან ყურადღება სასიამოვნო იყო და ის იმაზე მეტად ცდილობდა, ვიდრე თვითონ ჯონგუკი, რაც საშინლად გამაღიზიანებელიც კი იყო ბეტასთვის, არა უფროსის ინტერესი და მისი თბილი, ყურადღებიანი ჟესტები, არამედ ფაქტი, რომ ვიღაც უცხოც კი უკეთ ფიქრობდა ბეტაზე, ვიდრე მისი ალფა.