اتكئ على كتفي

مراجعة للفصول السابقة

هلوو حبايب..🙋🏻‍♀️
بما انو قريبا نرجع نكمل الرواية بإذن الله قررت انزللكم مراجعة للاحداث السابقة.. لأن أكيد اغلبكم نسه الأحداث(واني وحدة منكم🫠)
المراجعة مو مفصلة بس تذكير لأهم الأحداث..
يالله ننطلق🤝🏻

الشخصيات الرئيسية

ماسة:

البطلة، عمرها حالياً 21 سنة. تدرس قانون.

رائد:

أخو البطلة، عمره 24. يدرس آخر سنة هندسة معمارية.

يونس:

ابن عم البطلة، عمره 23، يدرس طب أسنان.

نائل:

صديق رائد وجان جيرانهم، عمره 24. يدرس آخر سنة هندسة معمارية ببريطانيا.

الشخصيات الثانوية

أمجد: الأخ الأكبر ليونس

ليالي: اخت يونس الصغيرة

مريم: اخت نائل الكبيرة (تركت الدراسة بعد وفاة والدتها حتى تعتني بأخوها وابوها، حالياً متزوجة)

فرح: صديقة ماسة (سجاجة وتحب الكوريين). والدها مات اثناء عملية لاستئصال ورم خبيث.

دلال: البنت الي حبها رائد وبعدين تركته علمود عريس لقطة من السويد😒

كريسي: بنية بريطانية زميلة نائل بالجامعة، معجبة بنائل.

مارك: فرنسي، زميل نائل ببريطانيا.

آريا: تركية، زميلة نائل ببريطانيا.

الأحداث:

الرباعي المرح (ماسة، رائد، يونس ونائل) قضوا كل طفولتهم وبداية شبابهم سوه.. ماسة بشخصيتها القوية والعنيدة، رائد بتحمل مسؤوليتها ومصايبها، يونس بإرضائها مهما كانت مخطئة، ونائل بمساندة صديقه رائد بكل المصائب..
مكانهم المفضل جان بالبستان وره البيت وبالتحديد شجر التوت الأبيض (التكي).. وحدة من الشجرات منقوش عليها بالبسمار اساميهم و "فرقة الدعم الخاصة".. النقش سووه بعد عركة وي أولاد الجيران (كلهم تزورگوا بالعركة إلا صاحبة المصيبة 😊)

بالصغر جانت ماسة تتمنى لو مولودة ولد بسبب تصرفات البنات وياها. بس من كبرت صارت عندها صديقة وفية، فرح. وبدت شخصية ماسة تهدأ جزئياً، بس مستحيل تسكت عن حقها لو تخلي أحد يتجاوز عليها. (تذكرون هذا الابتلة على عمره وغازلها بالجامعة؟ 😃)

تغيرت حياة الرباعي المرح بعدما حصل نائل على منحة للدراسة بالخارج، ماسة قاطعته مقاطعة تامة، رائد فقد صديقه المقرب، ويونس انشغل بدراسة السادس (بمساعدة من ماسة الي كل شويه جايبتله زبيب).

نائل ما تحمل غرفة السكن بسبب شريكه الي ما تهمه النظافة والترتيب، فاضطر يدور شغل حتى يكدر ينتقل لشقة، ونجح بهالشي بعدما تعرف على كريسي وحجتله عن شركة والدها. اشتغل نائل كعامل نظافة بالشركة وگدر يدبر شقة على گد الراتب. بين فترة وفترة نائل يدز رسائل لماسة، بس هي فقط تقراهن وما ترد (ام راس يابس😒). أما تواصله وي رائد ويونس فصار يقل مع مرور الوقت، حتى صاروا أشبه بالغرباء.

بهالفترة رائد حب زميلته دلال، بس تركته بشكل مفاجئ بعد علاقة طويلة، وعرف من صديقتها انو تقدملها واحد من السويد ووافقت وراح تنتقل للخارج (شدعي عليج 😑).. رائد تحطم بعد هالخذلان، فماسة ويونس حاولوا يغيرون نفسيته عن طريق الجيم، وصار هو ويونس يواضبون على التدريب لحد ما بدا جسمهم ينشد واكتسبوا لياقة عالية.. 

بس بيوم من الأيام اكتشف يونس وجود كتلة بظهر رائد، وجبره يروح للطبيب، بعد الفحوصات تبيّن أنه ورم خبيث.. رائد طلب من يونس يخلي الموضوع سري وما يكول لأحد من أهله حتى ما يقلقهم، بس ماسة حست أن يونس يخفي شي وبالاخير جبرته يحجي الحقيقة(مسكين وين يكدرلها)، بس ما راحت واجهت رائد.. وسط انهيارها ما أجه ببالها غير نائل.. اتصلت بيه وطلبت منه ياسعدهم حتى رائد يتلقى علاجه بالخارج وتكون فرصة نجاته أكبر.. 

نائل ظل يدور على طريقة يجيبهم لبريطانيا بس عجز.. لحد ما عرضت كريسي أن والدها يسويلهم دعوة عمل.. بشرط..

أن نائل يصير حبيبها (طبعا ماكو خدمة لله، لازم مصلحة😒)..

ونائل وافق (حسابك عسير.. عسير لو ببسي.. مسحوها بوجهي)..

والله يستر من الجاي (جاي لو ماي.. لا هاي ما تنمسح حقكم عليه)..

متحمسين للاحداث الجاية؟😁 أريد تسوولي حماااس🔥
مقررة منا ورايح أعلق وياكم لأن مشتاقة للتحشيش والتفاهة (ما راح اكول تفاهة لو برتقالة)

نلتقي على خير❤️