قـلعـة الشيــوخ ( قلعة الشيخ مهران)

حلقة (١٣)

قلعة الشيخ مهران
بقلم يـاسـة حلقة (١٣)

شيوصلني الشواطي أهلي البعيدين 
وهوى الغربة رمح والرية الشراع
وملامح مگبره وجوه الغريبين
وإحس حتى الجدم مستغرب الگاع

...........................

تاضي :- دشيت بغداد وانه تايهه بشوارعها وناسها كل شي هنا يختلف عنه عاداتهم تقاليدهم عيشتهم لبسهم حجيهم كل شي بيها غريب عليه وعلى امي شلون راح نعيش ونتحمل شلون راح نكمل ما نعرف كل النعرف الروح عزيزة ومن حسينه نريد نموت اشترينها شراية وركضنه بــ الليل البارد بس حتى ما نموت مشت بينه السيارة جثير اباوع على الشوارع وعلى الوادم على البنيان على يا صفحة اصفن كل شوي تروح عينه على حاجه لحد ما وصلنه للأمام الكاظم ابو الجوادين فدوة اروح الإسمه

الزلمة گال دشن هنا راح اجيب الجن هديمات واجل وارد لا تتحركن من مجانجن ضلينه جويعدين باب الامام ونبچي وندعي شوي ورد جايــب علاگت هدوم وعلاگت اجل دلانه على الحمامات رحنه غيرنا هديماتنا وهديمات الوليدات  لبستهم ودفيتهم وطلعنه لگينه الزلمه مغير هديماته حاله من حالنه المسجين شاف الضيم ويانا رد جاب كارتون ومده زغيرة ما ادري منين وگعدنا عليها فتحنه الزاد وسمينه بسم الله واكلنه وهو ما رضا يگعد يمنه اخذله لفيفه وتكتر بعيد واكلها يستحي من عدنا

خلصنه اجلنه وگال ظلن بالامام انه رايح ادور على مجان الجن وارد لا تتحركن من مجانج هذا ما گلنه باطل دشينه للضريح زرنا وصلينه وبچينه لحد ما خوه ماي راسنه دعيت وثغبت بضريحه رايده الستر رايده اخلص من هالمصيبة واحفظ على وليداتي شوي ونمنه بلامام المجان دافي والريحة ترد الروح واحنه تعيبانين ما حسينه على ارواحنه رحنه بسابع نومه ضلينه بالساعة نايمين ماكو احد يحاسب ويمنعنه عبن الامام ابو الكل وبابه مفتوح للوادم كلها

انه وامي صحينه بس الوليدات ضلو نويمين على الدفو مت عيني أسير يگح استبرد وانه گلبي غده نار عليه من الخوف

ساعة ساعتين ثلاث ساعات وزلمة مهران ما بين دخيلك يبو طلبه داشه الحضرتك وداگه بابك تسهلها عليه وعلى وليداتي اگعد واستقر متت من الركضه من ديرة الديره ياربي عاين الحالي والحال هالمساكين

شعلة :- تأخر وين راح بس لا هدنه ومشى

تاضي :- لاله شلون يهدنه هذه معدل ابن اصول مهران يو ما مأمن بيه ما يخليه هو يجيبنه ويودينه

_ چا وين راح يا يمـة انه ما بيه بعد فايده

_ شوي ويجـي الغايب عذره وياه تلگينه يدور على مجين النه عبن بغداد موش مثل السلف هاي جبيرة والمجانات بيها بعيده موش ناس لازگه بناس مثلنه غاد

سكتت امي وضلت تعاين على الوادم كل شوي وشاهت عينه على وحيدة من الحريم عبن حريمهم موش مثل حريمنة شحلاتهن تگول ليلوات وين احنه المتعوبات من الدنية وين هنه الفتحن عيونهن على العز والدلال