قـلعـة الشيــوخ ( قلعة الشيخ مهران)

حلقه (٢٩)

قلعة الشيوخ ( قلعة الشيخ مهران)
حلقه (٢٩) بقلم ياسـة

ليس كل ما في القلب قابل للبوح
هناك ما يولد ويموت ولا يفصحُ عنهُ

.......................

أمامه :- كافي عمو عوفنا انام باجر عندي مدرسة الصبح

أسير :- اريد اللعب وياه صديقي آراي

_ ينعـس يريد ينام

_ ما ما اريد العب وياه

تاضي :- بسك يا يمه لا تمل ولا تكف من الصبح لليل تلعب خلهم ينـامون وباجـر الصبح العبوا

أسير :- يله صحيح الصبح هاي الخبيثه بالمدرسة واني ابقى وحدي اللعب

اخذت أخوي ودخلت للغرفه سديت الباب وفرشت اله وتمددت بصفه صار سنتين على هذا الوضع اللي يشوفني ما يگول طفلة لا صرت اله ام وصديقة واخت شگد نينه تتعب وياه بس اني اتعب اكثر هي تعبانة وكافي عليها عمو أسير
انقهر عليها من اشوفها تشيل آراي وتغسل اله وتبدل اله گمت اساعدها بيــه ابدل اله واحظر ممته واخذ من وقت ابقى وياه بالغرفه لحد ما ينعس وينام

بابا تعب وتغير صار واحد ثاني و بس يختلي بنفسه يگعد يطلع صور أمي ويبقى حاضنهن ويبچي صار سنتين على هذا الوضع كل اسبوع و عشر أيام يروح للنجف يخلص ليلة كاملة بالمقبرة ويرجع هلكان من گد ما باچي

جدو صار فترة يلح عليه يريده يـزوج بنت بيبي حكاية بس هو رافض الفكرة نهائيًا وهاي صار كم مرة بيبي تجينه وتجيبها وياها بحجه يشوفونه بس هي چذب يحاولن يسحبن بابا الهن بيوم اللي تچي اموت من القهر واحقد عليها وعلى بيبي حكاية من اشوفها شلون تغمز الها وتسوي حركات براسها تعلمها حتى تتقرب من بابا چنت طول الوقت اراقبهن وين ما اشوف بابا يروح اروح وراه
ما اريده يگعد يمها ولا يحچي وياها

توحيد :- يا أمامه نمتوا حبيبتي

أمامه :- اي نمنه

_ يله تصبحين ع خير الصبح اگعدج للمدرسة عود

_ شكراً ما اريد بابا يگعدني

_ اي هو اني اگعد اسوي الكم ريوگ

_ عود من نگعد الله كريم بس عوفينه نـنام هسه

خزرتني ما عجبها الكلام وراحت بقيت بفراشي واباوع على أخوي شلون نايم عقله مو كلش تمام
صح يفهم ويلعب بس أحس اكو اشياء ما يستوعبها يتعب من اقل حركة ومن يبچي حلگه يزرگ ويفحط بابا من تجي توحيد وامها يهج من البيت بحيث الناس تنام وهو ما راجع ينتظرهن ينامن يله