قـلعـة الشيــوخ ( قلعة الشيخ مهران)

حلقه (٣٥)

مساء العافية عليكم  ♥️

بس اريد احچي وياكم قبل لا تبدون بالبارت
موعد النشر بين يوم ويوم ومن بدأت القصة لليوم إني ملتزمه وياكم بعد ليش التجاوزات عليه بالخاص والحچي الماصخ ليش هالاسلوب تحسسوني أشتغل عندكم ومانين عليه لان جاي تقرون إني هم عندي بيت واطفال و ما فارغه من الصبح لليل بس اگعد اكتب وانشر ولا  اشتغل عند احد ولا جابره احد يتابع واللي ما يعجبه النشر مو بس يحذفها لا خلي يحظرني وياه
وفوگ التجاوزات البلاغات عليه هم بالواتباد وهم بصفحتي بالفيس يعني ادخل على حساباتي ويسجلن خروج اثنيناتهن بشنو مأذيتكم إني ليش هــذا الحقد

قلعة الشيوخ (قلعة الشيخ مهران)
حلقه ٣٥ بقلم يــاسـة

يليق بك أن تكون ضوءاً لا ينطفئ
أن تكون ورداً لا يموت وماءُ لا يجف
يليق بك كل الاشياء الجميلة التي ممكن
أن يعبرها الحزن يوماً ما

..................................

بيت جديد وحياة جديدة ناس جدد عــادات وتقاليد جديدة كُل شيء هنا يختلف عن حياتي السابقة هنا اني يتيمة لا أب ولا أم من هذا اليوم اني مسؤؤله عن طفل مريض بالداون وبالقلب وعم مريض بـ أضطراب عقلي و مرأة كبيرة بالعمر فاقدة اغلى ما تملك لازم تصرفاتي تصير غير تفكيري يصير غير لازم أحسب الكلامي والخطواتي
لازم اجتهد وانجح لازم ولازم ولازم الى ما لا نهاية

كُل هذولي مطالبة بيهم و اني بهذا العمر راح اتحمل و أستمر لو راح انهزم من أولها
من اول ما دخلت باب القصر و اني هالكلمات والافكار يفترون برأسي

الكل طلع يستقبلنا اكو اللي بچى على بچي نينه وهي داخلة واكو اللي أخذ جانب المتفرج واكو اللي ما قابل بجيتنا ونظراته جانت كُلها سم

سلمنا عليهم واحد واحد لحد ما خلصنا السلام وتوجهنا الغرفة نينه هاي الغرفة الصار فوگ العشرين سنة من انهزمت منها اجى الوقت وافترت الدنيا ورجعت الها طلعت منها وهي بعمر الشباب بأيدها أولادها الأثنين و رجعت الها وهي عجوز فاقدة واحد من اولادها والثاني عايش على رحمة الله لا يفهم ولا يفتهم

مهران :- هلا و كل الهلا بالجاي ومحمل علينا
نور الگصر

نهاية :- شحلات دشتكم علينا هلا بيكم

أبرار :- وين راح سند يجي ويشوف أمامة وصلت
تعالن ولجن سلمن على بنيت عمجن

تقدمن بنات ثلاثه بـ أعمار متقاربه ثنين اكبر مني وحدة اصغر مني بالعمر سلمن عليه وگعدن بصفي

روان :- اني روان الجبيرة وهاي ليان الوسطانية وهاي أفيان الزغيرة اكيد تذكرينا مو

أمامة :- اي اتذكركم

ليان :- البقية بحياتج ردنا نچي للفاتحه مال عمي بس محد رضا يجيبنا وأبوي جان عندكم وبس أمي اجت