قـلعـة الشيــوخ ( قلعة الشيخ مهران)

حلقه (٤٢)

قلعة الشيوخ ( قلعة الشيخ مهران)
حلقه ٤٢ بقلم يــاسـة

أمــامــه تگول 👇

الجان سيفي من الليالي
صورة على الحايط بقالي
( للكبير المرحوم سمير صبيح )

....................................

أستاذ فاروق :- بصراحه دكتور كرم يصير ابن اخوي وبمثابة ابني وهو معلم يمنا بالمدرسة وهسه شاف ابنيتكم و وداني بدون مقدمات اخطبها منك على سنة الله ورســوله

عمو مَتين باوع اله متفاجئ ورجع يباوع الي نزلت راسي خجلانه قبل لا يرد على المدير طلع السويج انطاني  وطلب من عندي أنتظره بالسيارة  اخذت السويج وطلعت منهم  بعد ما عرفت شنو صار ولا سمعت الحديث الدار بينهم

اول ما طلعت من العيادة شفت نفس الولد واگف باب المدرسة وعيونه على العيادة بس شافني أبتسم درت وجهي منه على آراي صعدته وصعدت رفعت راسي شفته بعده يباوع النا وعيونه احسها دخلت بنص السيارة من گد ما مركز ويانا خمس دقايق تقريباً وطلعوا المدير وعمو المدير رجع للمدرسة وعمو  قفل باب العيادة واجى للسيارة بس صعد صارت عيونه على المدرسة شاف الولد واگف بالباب ما علق شي بسرعه شغل ومشى

لا هو فتح الموضع ولا اني فتحت الموضوع وسألت شنو صار بينهم غلست خلص الطريق كله ساكت لحد ما وصلنا طبگ السيارة بالگراج نزلنا اني وآراي وهو ورانا بس دخلنا للبيت اجت رسل تركض على ابوها شالها و دخل بيها

اني بوجهي الغرفة نينه احچيلها شلون قبلوا يسجلونه وشلون راح يدوام وهي تبوس بيه وتهوسله

-- الطارش گول المؤنس وليدك سجلنا
الطارش گول المؤنس وليدك سجلنا

بس سمعت كلامها بچيت ما تحملت اصبر اكثر اني بچيت وهي بچت وياي كذب الگال الايام تنسي كل يوم فراگه يشعل نار بصدورنا اكثر واكثر كل يوم نشتاقله اكثر واكثر ما گاعد نتقبل الوضع كل تصرف كل حركه كل كلمه كل موقف جاي يذكرونا بيه

اخذت نفس و رفعت راسي ليفوگ دعيت بيني وبين ربي ، يارب صبرك وقوتك يالله قويني و صبرني ما اريد شي ثاني غيرهم

دخل جدو علينا آراي گام عليه يركض فرحان

آراي :- سجلت بالمدرسة

مهران :- بالمبارك يجدي يعزيز روحي يوم الاشوفك أحسن الناس يا حلو

آراي :- اريد جنطه بيها سيارة

مهران :- عساك على جنطه اشريلك محل جنط كامل باجر اخذكم للولاية وتشترون مناك اليعجبكم انتَ واخيتك