قـلعـة الشيــوخ ( قلعة الشيخ مهران)

حلقه (٦٧)

قلعة الشيوخ ( قلعة الشيخ مهران)
حلقه ٦٧ بقــلــم يــاســة

تشاغبني كي أجن بـهـا
وتزاعلني كــي أسعى اليهـا
وتهجرني كــي أنشغل عليها
أبلغوا تلك الصغيـرة إنني مسكون بها

...................................

أمامة :- خلص كلامه وياي وعيونه بعيونه منتظر من عندي احچي ما رديت بس دموعي تنزلرجع مد إيده مسح دموعي سحبت نفسي من عنده قوي من شاف ردت فعلي نزل إيديه ولازمهن وحده بداخل وحده ورجع گال بهدوء

مَتين :- ما اريدج تحبيني بس لا تكرهيني اعرف صعب عليج الموضوع واعرف هذا الشي تشوفينه غلط ومو من حقي اسوي هيج شي وياج بس مو بأيدي والله كل الصار مو بأيدي گلبي حبج وروحي ذابت بيج

أمامة :- من شوكت وانتَ هيج مستغفلني من تدري جان يجي إسلام ويحچيلي عنك جنت أرزله لان اعرفك شنو اعرف نفسي شنو اعنيلك اكثر شخص أأمن يمه واكثر شخص ارتاح واني احچي اله جنت اشوفك هذاك العم الغيور الطيب الحنون اللي ما ينام إذا ما يطمأن عن أمانة عمه وابن عمه تالي طلعت شي مو بالحسبان تعرف متقززه منك لدرجه متقززة منك ومن  كل هاي العائله اني وين وانتم وين ياريت متت وي أهلي ولا اجيت وعشت بنصكم

مَتين :- ما عندي كلام احچي ولا اگدر اشرحلج اكثر من الشرح اللي شرحته وعاذرج وجنت اعرف بردت فعلج الهذا السبب سكتت ودست على گلبي انطيني فرصه وانطي النفسج فرصه لا تبقين بهاي الفكرة لا تموتيني اكثر الله يخليج

أمامة :- اذا خلصت ياريت تعوفني وحدي

مَتين :- گومي ارتاحي بغرفتج

_ ما اريد اگوم المكان هنا اگعد

_  مو مكان گعده هذا المكان روحي الغرفتج ارتاحي ونامي تعبتي اليوم

_ ليش شنو هذا المكان ممكن اعرف

_ مضيف مال عشاير مو مال نوم

_ والعشاير تقبل باللي سويته

سكتت ما رد بقى بس يباوع وراها بشوية گال

مَتين :- شنو سويت بشنو غلطت والله ما باوعتلج غلط ولا فكرت بيج غلط و حتى وافقت تتزوجين عماد في سبيل اشوفج مرتاحه

أمامة :- عوفني أنام الله يخليك كافي ما اريد اسمع بعد

مَتين :- ماشي نامي

رجعت درت وجهي وغطيت نفسي بالعباة وبچيت بچيت لحد ما تعبت ونمت ما عرفت اذا بقى يمي لو طلع بس الصبح سمعت صوت عمو إياد يحچي وياه

إياد :- الشيوخ بالباب گعدها

اجى عليه يگعد بيه ما ارد عليه مره مرتين ثلاثه ما جاوبته اخر شي وخر العباة مني ويهز بيه ويگول

مَتين :- أمامة بلى أخبال الله يخليج العالم بالباب گومي لا تفضحينا

نفس الشي ما ارد رجع گال