قـلعـة الشيــوخ ( قلعة الشيخ مهران)

(أحداث 3)

قلعــة الشيــوخ (قلعة الشيخ مهران)

بقلـم يــاســة 🍃

رأيــت الشيب لأح فقلت اهلاً
وودعــت الغويـة والشبابُ
وما أن شبــتُ من كبـرٍ ولـكن
رأيـت من الاحـبـة ما اشابُ

الشيب شيب الگلب حبيني يعني شصار
أسنين عمري المضن مو أخر المشوار
الأبيض البراس ما يعني عمر الناس
ظهر النخل ينحني بس الگلب جمار
بالشيب ما مبتلي ولا روحي همها العطش
وياك إذا اختلي ارجع للأربع طعش

.................................

إمامة :- بدون ما ارد شي طلعت من الغرفه لگيت نينه واگفه بـ الممر الظاهر اجت على صوت عياطه

تاضي :- ها يمه شماله زلمتج

امامة :-ماكو شي لا يظل بالج

تاضي :- عليش يصيح عليج شعامله

امامة :- لان اتصلت بــسارة

_ اختاض منج على هاي

_ ايي يگول شلون هيج تتصرفين وتنزلين نفسج وتعوفيني وره ظهرج

_ تردين احجي وياه

_ لا عوفيه هسه معصب من يهدى عود نتفاهم

بعدنا نحجي واجانا صوت زبادي تبجي بصوت عالي ركضت اشوف شبيها لگيت بنات عمو أياد وبنات أيهاب دايرات عليها اربعتهن وشابعاتها ضرب وعض  وحده تجر بشعرها وحده تعض بيها وحدة تسطر موتنها موت بس شافني اجيت ركضن مهزومات شلتها من الگاع غسلت الها ولميت شعرها وطلعت گعدت بيها بالضيف وشبعت بچي بعد ما تحمل هذا حدي الى متى هذا التعب وهاي المسؤوليه الصعبة اني ابچي وهي تبچي وياي بالساعة هذا حالنا لحد ما انفتح الباب ودخل علي

علي :- ماما ادور عليج

امامة :- تعال حبيبي

علي :- ليش تبچين بابا مزاعلج

امامة :- لا حبيبي ممزاعلني

علي :- زبادي ليش تبچين انتِ وماما

زبادي :-  هيج شعري وعيوني  منا

تحجي وتأشر شلون انضربت

علي :- تعالي وياي نضربهن بالنعال

امامة :- علي عيب ماما ميصير هنّ بنات لا تتدخل بيهم شوية ويصالحون

علي :- ما اله اضربهن ضربن اختي بابا گال من احد يحجي ويا اختك طيح حظه اريد اطيح حظهن