قـلعـة الشيــوخ ( قلعة الشيخ مهران)

حلقه (٢٤)

قلعة الشيوخ ( قلعة الشيخ مهران)
حلقه (٢٤) بقلم يـاسـة

مهما كانت الحياة مغطاه بالسواد
ثمة ثقب للنور للضحك للأصدقاء
نستطيع من خلاله أن نبصر
الوجه الأخر للحياة والوجه الانقى لها

................................

تاضي :- طاگاه الفرخ وشـرد وأسير لزم رأسه وظل يثغب ركضت عليه يصب دم ويصيح بكُل صوته طلع مؤنس يركض على صوت الصياح بس شافه سابح بدمه وانه يمه ادگ على وجهي بساع ركض بيه للمضمد

رديت للبيت مثل المسودنة اريد عبيتي حتى الحگهم رجليه ما تعيني يبس الدم بيهن منا لمن طلعت وصلت للمضمد لگيته يخيط بيه بلايه بنج ومؤنس مشبگ اديه وبعد وياه ثنين ازلام ما اعرفهم اظن جانوا جاين للمضمد كُلهم متعاونين عليه ولازمينه يثبتونه وهو يشيل روحه ويرگعها وانه مگابلته واللطم على وجهي

مؤنس :- گولي يا الله يمه صدگ جذب خبلتيه بالزايد

تاضي :- اخيـك ولك يمه راح يروح مني

المضمد :- صلِ على النبي حجيه جرح بسيط وهاي كملت

جاب شاش ولف رأسه بيه وهو عمت عيني راحت روحه منه من الوجع مال الخياط شال المضمد دواه وانطاه المؤنس واخذه وتحاسب وياه وطلعنا
رادين الدارنا

أسير خلص الدرب كُله يبچي هو المضمد موش بعيد عنا صاير برأس الشارع ردينا نمشي مشي ولازمينه من إديه وهو يدگ وينوح لمن وصلنا لگينا امي واگفة بالباب ناطرتنا

شعلـة :- يماااي يمــةةة سودة بوجهي صخام الصخمني ولك جدة منين اجتك

مؤنس :- يمعودات گولن يا الله مو خبلتنا بهذا اللطم مالجن  تعال حبيبي تعال ادخل

طبينا للدار وانه ركضت فرشتله وحطيت اله مخدة ومؤنس نومة على فراشة وجاب الدواء وشربة منه وهو يبچي مثل فرخ الجاهل وانه وامي مگابلينة ونبچي وياه

شبيدي على أمر الله وشأسوي يا يمة اللي بعمرك خلف وحطلة بيت وانتَ مكتوبة عليك تلعب وياه الجهال اخ يا وجع روحي يا الولد يبني

بعدنا گاعدين واندگ الباب گام مؤنس يشوف ياهو اللي أجانا والله بس طلع ولنه يصيح اهلاً وسهلاً يا هلا وميت هلا تفضلوا تفضلوا گمت اشوف ياهو هذا اللي أجى لينا بعدني توني طلعت من الحجرة واجى مؤنس يمشي سريع

مؤنس :- يمة مي وچاي فدوة الطولج إذا مابيها زحمة عليج ثُريا ما تگدر تگوم

تاضي :- ياهو العدنا ياهم هذول

مؤنس :- اهل الطفل اللي ضرب أسير جاين يشوفونه ويتعذرون لا تحچين يم أسير شيء لا يجي يمهم ويروح يضرب احد بيهم عيب