قـلعـة الشيــوخ ( قلعة الشيخ مهران)

حلقه (١٧)

قلعة الشيخ مهران
حلقه (١٧) بقلم يـاسـة

أن الحب لسر رباني
ينبغي أن يحفظ في مأمن
من كافة العيون الغريبة

صح بالبداية تعذبت بس الله ارحم بيه
بالتالي عوضني بمرة تسوه الكرة الارضية

،،،،،،،،،،،،،،،،،،،،،،،،،،،،،،،،،،،

ثُريا :- من بعد هذا العمر الطويل صرت زوجته وملكة انتظرت من اني صغيرة حبيته وحبيت أسلوبة وياي ويا اخواتي جان يجينا ويروح ويا بابا للشغل مرات بابا ما يتركه اذا ما يتغده لو يتعشى ويانا تعلقت بيه وشوية شوية گمت اشتاق اله لحد ما اكتشفت اني احبه حاولت اكثر من مره اوضح أله فد حركة مني لو فد كلمة بس جان ما يركز على هيج شي حاسبنا اخواته وما يتجاوز حدوده ويانا يحترمنا ويخاف علينا وهذا الشيء علقني بيه اكثر واكثر انتظرت يحس بيه لو ينتبه عليه بس ماكو

آخر شيء ما تحملت اكثر رحت واعترفت أله اول مرة انصدم وهو يسمعني اگول اله اني احبك وراها من استوعب الكلام اللي حچيته رزلني وعاط بيه بهذا الوقت جنت مراهقه ومن شفته صداني ورزلني حزت بداخلي واخذت عهد على نفسي لا احچي وياه ولا اخليه يشوف وجهي بعد هو مو احسن مني حتى يتعالى عليه ويصدني هيج أني اصغر منه واحلى والف واحد يتمناني ليش هيج نزلت نفسي ورحت اعترفت اله

مرت الايام واني ما ملتقيه بيه ولا حاچيه وياه طبعاً جان عندي غرور وما احب احد يرفض الي شيء من فتحت عيوني للدنيا كُل شيء متوفر الي ما ردت شيء وما حصلته ان كان اني او اخواتي بابا الله يرحمه مدللنه دلال وما عايف شيء بنفسنا لذلك من رفضني حسيت بالكسره واخذت عهد ابتعد عنه وما اشوفه وجهي

چنت ما البس حچاب واظفر شعري گصيبة شوكت ما جالني گصيبتي واني ما اعرف شنو حرام وشنو عيب لان بابا  وماما بعيدين عن التشدد الديني يعني كُلشي عادي نبقى بدون حجاب وما يجبرون وحده بينا عليه اللي عاجبها تلبس حجاب تلبس واللي ميعجبها تبقى براحتها شوكت ما تقتنع هي تلبس بدون تشدد او غصب

وبيوم من الايام چنت طالعة للمدرسة الصبح الدنيا باردة والجو بيه ندى وضباب لابسة ملابس شتائية ومدفية نفسي كُلش زين بس شعري ما مغطيته  المهم طلعت من بيتنا وصلت النص الفرع

الشارع جان فارغ ما اكو احد بيه بس اني حسيت على خطوات بني آدم وراي درت اريد اشوف منو تفاجأت بمـؤنس يمشي وراي لابس مثلي شتائي ومغطي راسه بشماغ واديه بجيوب بنطرونه اول ما شافني انداريت ابتسم وتقرب مني اني من شفته جاي عليه وشفت ابتسامته بسرعة درت وجهي منه وسرعت بخطواتي بقيت امشي سريع وگلبي يدگ حيل ما اريد التقي بيه ولا اريد اشوفه هم خجلانة من الموقف اللي حطيت نفسي بيه وهم مقهورة من زرالته الي وصلت للشارع وهو بعدة يمشي وراي آخر شيء صاح عليه