قـلعـة الشيــوخ ( قلعة الشيخ مهران)

حلقه (٣١)

قلعة الشيوخ (قلعة الشيخ مهران)
حلقه (٣١) بقلم ياسـة

أســتقيمي أيتها النفس عسى
أن يكون الرحيل قريباً

.....................................

مؤنس :- إذا تحبوني وتفكرون بيه إذا الي بگلبكم قطرة حب سدوا الموضوع ولا ترجعون تفتحونه الله يخليكم

مهران :- البت صغيرة وحليوة وما يعيبها شيء وبنيت عمتك وتحن على فريخاتك اول هيل تحسها صعبة بس شوي شوي تتقبل الوضع

_ يابه والقرآن و حق رب الكون ازعل منك وبعد ما احچي وياك واخذ اطفالي وامشي بمكان محد يندله لو رجعت فتحت هالموضوع گتلك ما اريد لا هاي ولا غيرها ولا اي مرة تحلى بعيني من بعد ثُريا يابه اني گلبي دفنته وياها

تاضي :- بكيفك يمه محد يجبرك وانتَ فكر براحتك واللي تعجبك بس شاور عليها اروح اخطبها الك لا انه ولا ابوك ولا جدتك بعد نفتح السالفة هاي وياك وانتَ ظل على راحتك و اريد ربي العالي بلايه عمدان يبرد گلبك ويباوع الحالك

ومن هذا اليوم انسد الموضوع ما انفتح لان بابا گال الهم اخذ اطفال و اروح وهم خافوا لا يسويها صدگ ويروح .. مــرت الايام علينا واحنا مثل ما احنا نروح للمدرسة اني وبابا ونرجع سوى نتغده ونقرأ وباقي النهار يخلصه ويا آراي هاي السنة اني سادس أبتدائي وبابا ذاب كل حيلة وياي يريدني اطلع معدل زين والحمد لله عدت السنة وطلعت درجات ترفع الراس والفضل يرجع البابا الجان اب وصديق ومعلم وكل شيء حلو بحياتي

عطلنا آخر السنة و بهاي الفترة سمعنا بتوحيد
انخطبت الرجال من معارف جدوا و يا فرحتي من سمعت بالخبر اللي يشوفني شلون فرحانة يگول خطوبتي اني مو خطبة توحيد شگد رادت تاخذ بابا وحاولت هي و امها بكل الطرق بس بابا جان رافض الفكرة نهائيًا ومن قطعت الامل من بابا
بقت تحوم على عمو أياد ابن جدو رضوان بس عمو أياد جانت عينه على وحدة من بنات بيبي نهاية جاية مرة ما اعرف مرتين تشوف امها ويا اخوانها وهو منعجب بيها فاتح اهلها بالموضوع

وهنا جانت العلاقه مقطوعة بين بيت حچي شامي وبين بيت جدو مهران حتى اولاد بيبي نهاية ما رجعوا عاشوا يمها لا بقوا بيت جدهم شامي ومن كبرو يله گاموا يجون الامهم بالسنة مرة بس يسلمون عليها ويرحــون 

حاول جدو رضوان يتواصل وياهم ويدز ناس عليهم حتى يخطبها منهم العمو أياد بس اجاهم الرد ما عندنا مرة الكم ولا تفتحون الموضوع مرة ثانية هنا عمو مَتين جان بين فترة وفترة يتواصل وياه اخواله ومن شاف ردهم و رفضهم الاخو قطع علاقته بيهم نهائيًا واليوم جدو عندنا وكلش ضايج

تاضي :- ما تسوى يضيج خلگك قسمة وما صارت

مهران :- ما ضايج خلگي عليها انه تروح مرة تجي بمجانها الف مرة وأياد زلمة نشمي ومعدل الف وحدة تتمناه بس الضيج خلگي رضوان مارد عليه گتله لا طرش وادم الهم ما يطونك بيناتنا دم وثأر كف منهم ولا تتفاش جدام العالم ما سمع مني وگال السالفة قديمة و الفات مات والبنيه بنية عمته تالي فشل روحه وفشلنا وجسر واهس ابنه من العرس كله