قـلعـة الشيــوخ ( قلعة الشيخ مهران)

حلقه (٣٨)

قلعة الشيوخ ( قلعة الشيخ مهران)
حلقه ٣٨ بقلم ياسـة

خلف الصبر هنـاك أشياء جميلة تنتظرنا

.............................

مَتين :- روحي نامي و ارتاحي لا تفكرين بشيء ثاني احنا نعرف ناسنا الشغلة مو يمج لا تخلين بالج وياها

أمامة :- الخاطري هالمـره اترجاك عمو لا تخلونها تصير بوجهي

_ يصير خير هسه روحي نامي والصباح ربـاح

إسلام :- هو صح احنا مرتاحين لأن حتى أبوي ماكو بس ميخالف رجعوهن هاي المره الخاطر بجعة مهران

مَتين :- انتَ تنجب حبيبي ولا تدخل

_ من ذوقــك هذا

_ گوم اغسل المواعين قبل لا تنام

_ عوزها و الله الف مره بالبيت وإسلام يغسل مواعين

_ البنات تعبن ونظفن ونامن انتَ اكلت اغسل مواعينك وياك ما يشتغلن عندك

_ إنه اكلت وحدي لو اكو احد شاركني

_ راح اروح انام واذا گعدت الصبح وسألت وطلعت ما غاسلهن قسماً بالله اخليك تمسح الگاع

أمامة :- اني اغسلهم عمو

_لا انتِ روحي نامي مو شافني سكتت على طردته عباله ما راح يتعاقب ترى ادري بسوالفك سالفه سالفه المواعين عقاب بمكان الطرده اختار لو تنام بالبستان لو تغسلهن

_ راح اغسلهن مو خايف من تهديدك بس خطيه البنات منظفات ونايمات

_ عفيه بالبطــل

شال الصينيه ومشى بيها للمطبخ بس شنو يدردم ما عاجبه أبتسمت على العقاب مالته يستاهل اول شي عافه ياكل ويحچي براحته وراها عاقبه ما ناسي اله الموضوع

مَتين :- تصبحين على خير

أمامة :- وانتَ بخير

رجعت للغرفه تمددت بين عمو أسير وبين آراي اباوع الهم نايمه بين جنتين يوم بعد يوم جاي احبهم اكثر واتعلق بيهم اكثر اتمنى اشيل منهم المرض اتمنى ابقى سند الهم طول العمر شلون اكمل واني بنص هالغابه عايشه

بقيت بينهم لحد ما إذن الفجر واني ما جايني نوم گمت توضيت ورجعت بسرعه اول ما بديت اصلي سمعت صوتهم گعدوا حركه صارت بداخل البيت
صوت جدو وهو يصلي على النبي ويفتر عليهم غرفه عرفه يگعدهم للصلاة وصوت نينه تصلي على النبي وتصيح الله اكبر لا اكبر من الله شيء