قـلعـة الشيــوخ ( قلعة الشيخ مهران)

حلقه (٣)

قلعة الشيخ مهران
الحلقه (٣) بقـلم يـاسـة

لا احد يعلم أين الخير ومتى ومع من
الكل يساق لقدره

...................

تاضي:- فتحت عيني على الدنيه وانه بهاي الدار
حجرة بطن حجرة مبنيات من طين وبيبانهن من بطاطين مدگوگات بالحايط بسامير وباب الشارع
من سعفات وحدايد

امي شعلة وأبوي صگبان فقيرين الحال وشوكت ما جالهم يو يسرحون بالحلال يو يخدمون بيت الشيخ ساجي

لا نطلع ولا ندش حدنا البيت الشيخ ونرد ومن وانه زغيره اساعد أمي بشغلها بقصر الشيخ ونوبات اطلع وياها بالحلال علمتني على كلشي من عمر الست سنين وانه اشتغل بالبيت وياها وانوبينه علمتني شلون احوك وشلون اخيط وشلون احلب الحلال واسوي كيمر وجبن منه تعلمت على الخبز بتنور الطين وعلى الطبخ والطابگ ما خلت شي ما علمتنياه

ولمن وصلت التســع سنين انه كامله مكمله
وبهذاك الوكت جنه البت اول ما تشب لزوم تاخذ
واذا غسلت نوبه نوبين وما اخذت تبگه تدعي ربها
لا تضل بلايه نصيب عبن يسمونها البايره

ياهي تغسل (تحيض) حتى لو عمرها ثمان سنين تعرس واكو بيهن حتى گبل لا يغسلن يعرسن
وانه اليوم اول مره اغسل وطرت من الفرح يماي
يمه صرت جبيره وراح اعرس

امي شعلــة بس سمعت بيه ركضت عليه خلت تلاث من اصابعي بطن الطحين يگلون ما يطولن ايام الحيض اذا خليت ثلاث تضل تلاث ايام واذا خليتي اربعه تضل اربع ايام بعد هاي عاداتنا من زمان ناس تتوارثها من ناس

سبحت وحنيت اديه ورجيلاتي بمناسبة هاي الفرحة وهم باجر عرس ابن الشيخ ساجي ولزوم اتزهب ثاني يوم رحنه للعرس ساعه اندك وساعه نشتغل لحد ما ردينه ومات الشيخ الفجر مت عيني عليه

امي شعلة تسودنت ادگ وتنوح والوادم حزنت كلها عليه عبن زلمه حگاني صايم مصلي راح الشيخ ساجي ونصبو بمچانه ابنه الشيخ مهران

ومن الهساعه صار السلف بحمايته وشيخ مهران وعدكم الحساب بعد زلم معدل ابن اجاويد
جلمته وحدة والوادم كلها تحبه وتهابه بعده بحيله بدايت العشرين اضن عمره ويطر السلف طول بعرض يتنشد على احوال الوادم

احنه ظلينه بدارنا وعايشين من خير بيت الشيخ
وامي مره معدله كدت ولمت واشترت حلال الها
واليوم عدها اثنين طليان وهايشه

هذني صارن حصتي ليل نهار انه يمهن
اخذهن غاد بالبستان اسرح بيهن ومن ارد
اغسلهن واوجلهن حتى على بيت الشيخ بعد ما رحت التهيت بيهن عبن انقهر من اروح الهم هذني بنيات الشيخ ما يحبني ويغورني بذهيباتهن وهديماتهن

ومن اشترينا الحلال گلت الله جابه خليني التهي بي ولا اروح غاد واشبع قهر

مرت الايام وراحت الايام واحنه على حطتنا
وحالنه نفس ماهو كل واحد بيه حاير بشغله
وهاي صار جم يوم ابوي مت عيني مريض
نسأله شمالك شيوجعك ما يرد بس يگول
راسي يدگ طبول يوم بعد يوم ابوي يذبل ويشكي من راسه شوكت ما جاله