قـلعـة الشيــوخ ( قلعة الشيخ مهران)

حلقه (٤)

قلعة الشيخ مهران
حلقه (4) بقلم يـاسـة

توجد في حياة الانسان لحظــه غريبة
لا يعرف كيف يفسرها ولا يــدرك
سرها ابداً لكنها تصنع كل شيء
في حــياة القــادمــة

..................

جرني من امي ومشى بيه ضليت اصيح بنص الشارع تعالو ليه يهالوام خلصوني من هالزلمه نهبني

التمت الوادم على صوتي وصوت امي الطايحه بالگاع تثغب وراي منعو ياخذني وگفو بدربه هو هنا نفض ايده مني وصاح بعلو صوته

عگاب :- حاضركم يعلم غايبكم انه عگاب ابن عجاج رديت للسلفه من بعد هالسنين وهالبت هاي موش بت صگبان وشعلة هالبت هاي بتي انه وجمرة وهي بت حلال انه جنت عاگد على امها على سنة الله ورسولة

تاضي :- انه سمعته وانه إحس روحي بادت مني وجسمي لزمته السعفه يا جمرة يا عگاب شنهي هذا الجاي اسمعه الوادم ضلت تتهامس بيناتهم

_يا طلع هو زلمة جمرة
_وين جان طول هالسنين
_المسجينه راحت انكتلت وضاع دمها بسبته
_ ياهو اليگول حجيه صدگ

اشكال الكلام انگال وسمعته بس ما اهتميت اله ولا خليته  على الي كل همي انه بتمن هساع وياهو ابوي وياهي امي جمرة التبجي عليها امي ليل نهار هي امي وشعلة الكبرتني وربتني موش امي و انه السنين الراحت كلها ما معروف اصلي وفصلي جدام الوادم وكلها تعرف بسالفتي وبس انه ما اعرف

رد لزمني من إيدي ومشى بيه ضل يعت بيه وانه امشي وياه مثل الضايعه وما تدري بروحها وين ماشيه .. ضايعه ادور على اهلي يمشي بيه بطرك الدشداشه والشيلة بلايه عبايه

لحد ما وصلنه البيت عم أبوي فتح الباب ودش
وانه وراه تلگونه اخوته ازلام اكبار وياهم اولادهم
وابنياتهم ونسوانهم تگول سرب طلعن علينه كلهن يباعن ويتبسبسن بيناتهن

اخذني من ايدي ودش على وحدة من الحجر
جانت نايمة بيها مره عجوز صاير هاگداتها
لا بيها تگوم ولا بيها تگعد سويده وجهه ما رحمن

عگاب :- ردت حفيدتج يــا يمه

فخرية :- هلا يجــدة تعاي احبنج

تاضي :- انتِ ياهي وهو ياهو وانه وبتمن وانتم ياهم

فخرية :- انه جدتج وهذا الزلمه ابوج

_انه ابوي صگبان

_لاله موش صگبان انتِ بت عگاب

_ردوني الاهلي انه ما اعرفكم اريد امي شعلة تفهمني السالفه

سلطان :- امج موش شعلة امج جمرة وراحت الرحمة ربها

_لاله انه بت شعلة

_شعلة خالتج موش امج

رجليه ماتت اريد اشيلهن ما يعيني يهالوادم عودينه صدگ الجاي يصير وياي يو انه بحلم