الحياة مليـانه مشاكل و عقبات و تحديات ، شكلها زي المتاهه ، تلف فيها يمين و شمال ، تقع و تقوم ، تمشي مشوار طويل و لمن تصل تكتشف إنك سلكت طريق غلط فـ تضطر إنك تلملم خيبتك و ترجع لنقطة البدايه و تبدا من جديد ...
كل واحد فينا عندو إختبارات و عقبات بتختلف عن التاني بس الأكيد إنـو كلنا عانينا و لسه بنعاني ، فينا البعد كل وقعه بتزيد همتو و بصر أكتر على إنو يصل مبتغاه و فينا الوقع و ما قدر يقوم فـ إستسلم و فينا اللسه بحاول يقوم ....طرق مختلفه و مصاعب كتيره بتتخت قدامنا و تحديات مرهقه بتفرضها علينا الحياه ، أنا دا كلو كان كوم و مشاكلي التانيه كانت كوم تاني ، ما أعتقد إنو في زول بعاني من تفاصيل حياتو زيي !
كتبت الكلام دا في النوته تبع اللابتوب ، كنت مفكره أكتب روايه و دا الطلع معاي كـ بدايه ، حاولت أكمل بس زهجت و ما قدرت ، طلعت من النوته و بقيت أدخل روابط و مواقع مختلفه ....
بصوره غير إحترافيه أنا هكرز بس لسه ما وصلت المراحل البعيده ديك من التهكير ، معتمده شديد على التعليم الذاتي ، اتعلمت 3 لغات ، فرنسيه ، إنجليزيه ، روسيه و أقربهم لقلبي اللغه الفرنسيه ، حالياً بدرس It , السنه الرابعه ....المهم في الآخر رسيت و بقيت أحضر فيديوهات لـ واحد أجنبي بحكي عن تجربتو لمن دخل الديب ويب .... موضوع الديب ويب أو الدارك ويب قد يكون مخيف لناس كتيره إلا أنا عمري ما خفت منو و حاسه إنو مـاف شـي بخوفني ، الممنوع عندي مرغوب ، بخوض التحديات و بعمل الفي راسي ، بعشق البرمجه و الشبكات و تطوير المواقع و التطبيقات و أي حاجه ليها علاقه بالتكنولوجيا الرقميه ، المهم و أنا قاعده قدام اللابتوب و بحضر في الفيديو خالتي نجوى جات داخله ، قالت لي أنا و أولادي ماشين بيت نسابتي ، تمشي معانا ؟؟
قلت ليها نو ..
قالت لي طيب قاعده للمسا ولا حـ ترجعي بيتكم ؟؟
قلت ليها ما عارفه ، لو قررت أمشي حـ اقفل ليك البيت ، خلي لي المفاتيح ، قالت لي أنا قفلت البيت كلو إلا الغرفه دي ، المهم ديل المفاتيح ، اقفليها كويس و ختي لي المفاتيح تحت الحجر الجنب الباب ، قلت ليها اوكي....المهم هي ساقت أولادها و مشت فـ بقيت قاعده براي ، أخدت نفس عميق و قلت أخيراً البيت هدا و الواحد قعد براهو ! ، أولاد خالتي مشاغبين شديد و جنهم كواريك و جوطه و أنا بكرهـ الزحمه و الأصوات العاليه بس هنا أخف قدراً من بيتنا لأنو أمي هناك عامله ليها قعدة صندوق و البيت مليان نسوان بـ شُفعهم ...المهم أثناء ما أنا مندمجه مع الفيديوهات ، فجأه حسيت بـ يدين بتتخت على أكتافي ! ، لمن إتلفت لقيتو دا عصام أخو عادل راجل خالتي ...قمت من مكاني طوالي ، قال لي معليش ياخ ما قصدي أخوفك ...ما إتكلمت معاهو ، فصلت شاحن اللابتوب و قفلتو و فتحت الشنطه عشان أدخلو فيها ، قال لي بس ما أكـون ضايقتك !؟
ما إتكلمت معاهو ، دخلت اللابتوب و شلت الشنطه و أنا قلبي برجف ، وقف لي جنب باب الغرفه و قال لي يا زوله قولي بسم الله مالك هسي ، قلت ليهو زح من وشي ، قال لي خلينا نقعد ندردش مع بعض شويه ، قلت ليهو ما أردد كلامي دا تاني ...جا علي و قال لي انتِ ليه طبعك حاد كدا و ما مديه زول وش ، أنا بس عايز أتونس معاك و أعرف أخبارك ، أول ما قرب مني و خت يدو على كتفي من دون ما أتردد ضربتو كف و لزيتو من قدامي و طلعت طوالي ، أول ما وصلت باب الشارع السلك إتجر و الباب إتفتح و طلع تامر في وشي ، عاين لي بإستغراب و قال لي في شنو !! مالك عامله كدا ؟؟
قلت ليهو ولا شي و طوالي طلعت ، الطريق كلو أصابعي بترتعـش و قلبي شغال دق دق ! و كل ما اتذكر الثواني الرفع فيها يدو و ختاها على كتفي جلدي بكش ... الراجل القذر دا انا بكروهو ، من و أنا صغيره هو بضايقني و بتحرش بي و بحاول يقرب مني و لحد الآن بعمل لي حركاتو دي عشان كدا ما بطيق أشوف خلقتو دي ، هو واحد حقير و تافه و قليل أدب ، طبعاً عادل راجل خالتي نجوى و عصام الزفت الهسي دا أعمام تامر يعني خالتي بتبقى لـ تامر زوجة عمو ، لمن جيت داخله البيت في نسوان كانوا طالعين ، وحده منهم قالت لي 24 ساعه حايمه بشنطتك دي ، شايله فيها قروش ولا شنو ؟؟ التانيه قالت ليها لا لا دي شنطة لابتوب ....ما اتكلمت معاهم دخلت بيتنا طوالي ، النسوان كانوا قاعدين في المظله و عاملين جوطه شديده و شفعهم بلعبوا في الحوش ، دخلت أقرب أوضه و قفلت الباب علي ، بعد شويه لميس جات و فتحت الباب ، قالت لي الدنيا براها سخانه قافلاها مالك !!؟
قلت ليها أمـشي الأوضه التانيه ، قالت لـي ما على كيفك ، عايزا أقعد هنا ، جات زحت الستاير و فتحت الشبابيك ، ولا إتناقشت معاها شلت اللابتوب و طلعت ، سامعه أمـي من المظله شغاله تنادي و تقول يا بت تعالي ...ما كنت عايزا أمشي بس لمن بقت تنادي كتير و النسوان معاها ، مشيت ليها لمن وقفت ليها جنب باب المظله قالت لي هيي كنت قايلاك لميس والله ، لميس طوالي جات و قالت ليها جيت يا أمـي مالك ؟؟
أمـي عاينت لـ وحده كدا و قالت ليها يا إحسان دي لميس بتي الحكيت ليك عنها بتقرا طب ، المرا قالت ليها ما شاء الله والله حلاتا ، أمـي قالت ليها و كمان شاطره شديد هسي في الجامعه جات أولى الدفعه ، النسوان قالوا ليها ما شاء الله والله و أمـي بقت تشيل و تشكر فيها قدامهم و أنـا كأني صنم أو مختفيه ، طوالي إنسحبت و دخلت أوضه في نهاية البيت ختيت اللابتوب جنبي و رقدت نمت ...
لمن صحيت مشيت إتوضيت و جيت صليت العـصر ، بعدها جبت تلفوني و دخلت الفيس ، اصلاً أنا ما شغاله كتير بالميديا و ما عندي غير الفيس و الواتس الداخله بيهو قروبات الدفعه بس ، يعني الواتس زيو و زي الفيس خلا ما فيهو شي ، لقيت كذا إشعار من البوست الكنت منزلاهو في قروب حق سايكولوجي ، كنت منزله بوست و كاتبه : أنا بحس انو أهلي ما بحبوني ، مرات كتيره بسأل نفسي و بقول معقوله أكون ما بتهم !!؟ أمي يا جماعه المفروض تكون أقرب زول لي هي أكتر وحده بحسها بعيده عني ...في العاده الواحد بحس نفسو متضايق و زي الرايحه ليهو حاجه لمن أمو تكون برا البيت بس انا صدقوني غيابها و وجودها واحد بالنسبه لي ، لدرجة انو لو طلعت و جات متأخره ما بكون ملاحظه إنها طلعت أساساً ، أنا ربيت و كبرت في بيت مفتقر للترابط الأسري و ماف زول شغال بزول أو خليني اقول انهم ما شغالين بي ، كل إتنين واقفين مع بعض ، أمي و اختي بطلعوا سوا و بتونسوا سوا و لو أبوي شاكل أختي أمي بتقيف في وشو و كذلك أمي لو شاكلت أخوي أبوي بقيف في وشها إلا أنا كلهم بحسهم واقفين ضدي ، وسطهم أنا زي الكلمه الشاذه ، أنا حاسه إني وحيده و ضايعه و ماف زول معاي و مرات كتيره بفكر انتحر و أنهي حياتي المميته بس بستغفر و بتراجع ...دلوني اعمل شنو عشان اتجاوز دا كلو و أعزز ثقتي في نفسي....
لقيت كذا كومنت مستنكرين فيهو كلامي دا و قالوا لي كيف في أهل بكرهو أولادهم أو أم تكره بتها !! باقي الكومنتات مكتوب فيها الأفضل إنك تقابلي طبيب نفسي و في كم بنت كدا أدوني نصايح بس حسيتها ما حـ تفيدني و أساساً حسيت إني ما قدرت أوصف ليهم و لو جزو صغير من الحاسه بيهو و العايشاهو ، بالنسبه لي البوست ما كان كفايه عشان أوصل ليهم إحساسي و البحصل في البيت و كمية الفراغ و الخراب الجواي ، بقيت اقرا في الكومنتات بملل لغاية ما وصلت آخر كومنت ، كان من واحد كاتب لي : رسلت ليك خاص ...قلت الوهمي دا كمان مالو ، رديت عليهو و قلت ليهو وليه ترسل لي في الخاص !! لو قلت هنا مالك بتخجل يعني ؟؟
رد علي في نفس الدقيقه و قـال لي لا ما تفهميني غلط ، أنا دكتور نفسي و حبيت أساعدك ....كان اسمو خالد منير ...إترددت قبل ما أرد عليهو بس في الآخر فتحت رسالتو ، لقيتو كاتب لي : السلام عليكم ، معاك دكتور خالد منير ، طبيب نفسي ، قريت رسالتو بس ما رديت عليهو ...تاني لا رسل لي لا رسلت ليهو ، دخلت صفحتو لقيتها فاضيه و ما فيها بوستات كتيره عشان كدا ما فكرت اتكلم معاهو و أحكي ليهو بحجة إنو طبيب نفسي....
المهم طلعت رشيت الحوش و كنستو و جبت لي كرسي و تربيزه ختيتهم تحت الشجره و مشيت جبت اللابتوب و جريت وصله من جوه الأوضه و وصلتو فيها و بديت اشتغل عليهو ، بعد شويه عبدالله أخوي جا داخل و هو بصفر ، أمـي قالت ليهو كنت وين يا عبودي ؟؟ من دون ما يعاين ليها قال ليها في الميدان و طوالي مشى... طبعاً أنا أكبر وحده ، بقرا في جامعة حكوميه It ، بعديني عبودي يلي هو عبدالله بقرا هندسة برمجيات السنه التالته في كليه خاصه ، آخر وحده لميس ، بتقرا طب السنه الأولى في جامعه خاصه عشان كدا هم في الدراسه ماشين أسرع مني ، و ما بعيده لميس و عبدالله يتخرجوا قبليني ...المهم دخل الديوان و جا طالع و هو شايل قميص و بنطلون و بقى ينادي بصوت عالي ، لميييس ، لميييس يا زفته تعالي هنا ، لميس ما طلعت ليهو طوالي مشى دخل ليها جوه الأوضه و بقى يشاكل فيها ، قال ليها مش قلت ليك أمشي و أجي ألقى القميص و البنطلون ديل مغسلات !!.... طبعاً لميس بترد عليهو طوالي فـ أصواتهم بقت عاليه ، أمي دخلت عليهم و بقت تشاكل في عبدالله قالت ليهو البت دي ما فاضيه و قرايتها قدر التراب ، قال ليك هي ما عندها شغله غير المكوه و الغسيل !! قال ليها و أنا فاضي يعني !براها البتقرا في الجامعه ؟؟! لميس قالت ليهو أنا البت الوحيده في البيت دا !!ديك مالك ما بتقول ليها غسلي و اكوي لي ولا بتخاف منها ؟؟
قال ليها والله أديك كف أنسيك اسمك ، أمـي نهرتو و قالت ليهو احترم نفسك !! كمان ناوي تمد يدك على أختك الأصغر منك يا عبودي !!؟
قال ليها ياخ كرهتونا ذاتو ، بناتك كلهن ما نافعات ، جا طالع جدع ملابسو على الأرض و طلع طوالي من البيت ، لميس شكلها بكت لأنو سامعه صوت أمي بتحنس فيها و بتقول ليها ما تشتغلي بيهو ، بعدها أمـي جات طالعه ، شالت ملابسو و جات علي ، قالت لي هسي أخوك دا لو جا راجع و ما لقاهم مغسلات حـ يعمل لينا موضوع ، عشان كدا قومي غسليهم ليهو سرعه ...ما رديت عليها ، قالت دي ولادة الندامه ذاتا ، ياريتني عقرت و ما جبت الأولاد العاق ديل !!
برضو ما اتكلمت معاها ، ختت الملابس و مشت ، بعد ما خلصت شغلي شلت القميص و البنطلون مشيت غسلتهم لأنـو أصلاً عندي ملابس عايزا أغسلها فـ غسلتهم مع حقاتي ، المهم بعد المغرب أبوي جا داخل ، طبعاً هو عندو دكان إجمالي في السوق المركزي ، بطلع الصباح و برجع المسا ، المهم اول ما صلى المغرب قال ختو الغدا ، أمي قالت ليهو اصبر خلي ولدك المغضب داك يجي راجع ، قال ليها مشى وين هو ؟؟
قالت ليهو طلع و كالعاده ما قال ماشي وين ، قال ليها أكيد زعلتوهو ، لميس قالت ليهو هو يا أبوي براهو بجي بنفعل و بتزهج في الناس و لمن نتكلم معاهو بعمل زعلان ، قال ليهم عملتوا ليهو شنو ؟؟
أمي قالت ليهو قال ملابسو ما اتغسلت و جا شاكل لميس ، قال ليها و انتوا ليه ما غسلتوا ليهو ملابسو !! يغسلهم براهو يعني ؟؟
أمي قالت ليهو هوووي انت براك شايف البت دي تعبانه كيف مع قراية الطب و أكل زي الناس ذاتو ما فاضيه عشان تاكل ! قال ليها عندك بت وحده انتِ ؟؟ ديك بتعمل في شنو ؟؟
قالت ليهو أمشي اسألها اليوم كلو قاعده قدام اللابتوب لا بتجدع لا بتجيب الحجاره ..... طبعاً أنا من جوه الأوضه كنت سامعه كلامهم كلو ، المهم بعد شويه عبدو جا داخل ، أبوي قال ليهو يا ولد تعال هنا مشيت وين ؟؟
قال ليهو كنت في الميدان يا أبوي ، قال ليهو انت راجل البزعلك شنو ؟! معقوله تطلع ليهن من البيت زعلان ؟؟
قال ليهو أعمل شنو يا أبوي زهجني و قفلنها معاي ، أنا ملابسي دي يومياً بجي ألقاها وسخانه و لو نضيفه بتكون ما مكويه ، اتكلمت كدا لمن حلقي دا نشف يا أبوي ، قال ليهو تتكلم ليه ! البتقل أدبها عليك ما تـقصر منها ، أوعك تخليهن يركبن ليك في راسك ، قال ليهو حاضر يا أبوي ، أمي قالت ليهم المهم لميس
الدكتوره دي ما تسألوها لي ، عبدالله قال ليها ليه ممنوعه من الصرف ؟؟ ما عندي بيها شغله تقرا طب ولا غيرو المهم تاني ملابسي دي تكون مغسله و مكويه ، أبوي قال ليهم سامعين الكلام دا ولا لا ؟!!
المهم بعد شويه ختوا الغدا و نادوني ، من جوه الغرفه قلت ليهم ما عايزا ، تاني ماف زول اشتغل بي و دي ما أول مره ..
