قـلت ليهو ماف داعي للحركات دي ، بـكل بساطه كان ممكن تقول لـي عايزك تمشي معانا ، ما ضروري تخرب وش ، إتلفت علي و إبتسم إبتسامه مستفزهـ و قـال لي أكيد ما جادهـ ، قلت ليهو أثبت لي عدم صـحة كلامي ، قـال لي انتِ منو ذاتك عشان أحاول أثبت ليك إني ما شايلك من أرضك !! قلت ليهو معناها وقف العـربيه و نزلني ، قال لي حأقيف لمن أحـس إني عايز أقيف ما بأمر منك ....بقى يلف في الشوارع و يغني بصوت عالي ، في سري قلت صوت حمار بس !!
كان واضح إنـو عايز يضايقني أكتر و يستفزني ، رجعت لـ ورا و ربعت يديني و إسترخيت و بقيت أعاين بالشباك ، طبعاً ناس طيف استغربوا فيني ، هو كان بغني و بعاين لي في المرآيه لمن لقاني مستكينه اتغاظ و إستغرب ، بقى يبذل أقصى جهد عشان يضايقني و يستفزني بس ما أبديت ليهو أي ردة فعل ، سفهتو كأني لا شايفاهو لا سامعاهو ! طبعاً التطنيش أقوى سلاح و أفضل وسيله عشان تقهر بيها الطـرف التاني ، بعـد مسافه وقف العربيه و قـال لي يلا اتخارجي ، طيف قالت ليهو بزعل قصي عيب !!
قلت لـ قبس انزلي عشان أنزل ، فعلاً عن سكات نزلت و أنا نزلت بعديها ، قلت ليهو : مالاد malade 😏 قال لي انتِ كمان مالاد ، طبعاً أنا متأكدة إنو ما عارف معناها شنو عشان كدا قال لي انتِ كمان مالاد ، بمعنى مريض....
طيف نزلت و قالت لي أرجوك يا مها ما تزعلي من الحصل ، قصي دا ما كدا والله ، قلت ليها ما بهمني ، قالت لي آسفه شديد و خجلانه اقول ليك أرح معانا ، بس انا عايزاك تمشي معانا ، قلت ليها مستحيل ، قبس نزلت و قالت ليها ما حتسمع منك يا طيف و أكيد بعد الحصل بينها و بين قصي ما ظنيت نفسها تسمح ليها تركب في عربيتو تاني ، أخوها ضرب ليها بوري و قال ليها خلصينا يااااخ !! ما ردت عليهو ، قالت لي آسفه مره تانيه ، قلت ليها ماف مشكله و طوالي إتحركت شويه من جنبهم ، هي زعلت شديد من أخوها و أول ما ركبت معاهو سامعاها بتشاكل فيهو بعدها دور العربيه و مشى يلحق الباقين...
كنت بنبذ فيهو في سري ، بقيت واقفه و بأشر لأي مواصلات جايه ماره بجنبي بس للأسف كلهم شاحنات ، الكريه نزلني في مكان ما فيهو مواصلات عشان كدا اضطريت أقطع الزلط و أمشي مسافه طويله بعدها لقيت مواصلات ، ركبت و نزلت في العربي ، طبعاً أنا كرهتي في الدنيا الأسواق و الزحمه ، ما بطيقها و بـكره نظرات الرجال الكلها قرف دي !! كنت بحاول أمشي بإستعجال بس الناس زحمه و ماشين براحه ، حسيت روحي حـ تطلع والله ! إحساس إنو وراي و قدامي و يميني و شمالي ناس حاجه ما كانت مريحه بالنسبه لي ، مسكت شنطتي قوي ، بقيت أمشي و أتلفت وراي عشان ما اسمح لزول يتلصق فيني بالذات الرجال ، لمن قربت للمواصلات استعجلت في المشي ، فجأه في مره وقعت قدامي و الناس إتلمت فيها ، طبعاً أنا اتهجمت لأنو فجأه كدا هي جات واقعه و خلعتني ، فجأه حسيت بحركه وراي ، لمن إتلفت لقيتو راجل كان مقرب مني شديد عشان كدا حسيت بيهو ، جسمي كلو بقى يرجف ، هو عامل رايح و طوالي مشى و أنا والله المشي غلبني ، قعدت على الأرض و أطرافي كلها بترتعش ، للسبب دا انا بكره الزحمه و الأسواق ، عندي فوبيا من الرجال ديل و بخاف من قربهم ، يمكن الموقف دا يكون قابل للتجاوز بالنسبه لـ غيري بس أنا لا ، قلبي كان بضرب شديد و حسيت نفسي مهبطه ، بقينا أنا و المره واقعين في نفس المكان ، هي على الأقل كان معاها زول بس انا لا ، الناس إتلمت فيني و بقوا شغالين لي في شنو يا بت الناس كدي قومي على حيلك.....البكى كان غالبني والله رغم إنو قلبي كان بتقطع حته حته ، جات مره رفعتني و قالت لي مالك يا بتي في شنو ؟؟!
قلت ليها وديني مواصلات الكلاكله بس ، قالت لي طيب ، كان معاها واحد كدا أظنو ولدها ، لمن وصلنا مواصلات الكلاكله اللفه الحافله اتملت و مشت و غيرها كانوا كتار ، المره قالت لي شكلك ما تمام خلينا نوصلك معانا ، قلت ليها لا شكراً ، الولد قال لي الدنيا ما أمان و انت بت براك ، قلت ليهم لا لا بمشي براي شكراً ليكم ، ركبوني حافله و المره جاتني بالشباك و قالت لي ما تدفعي ، قلت ليها شكراً ليك بس انا معاي قروش ، قالت لي ماف مشكله دفعت و إنتهيت ، المهم بعد ما مشت كنت كل ما أشوف راجل جاي عشان يركب بخت الشنطه في الكرسي الجنبي عشان يظن إنو محجوز و يركب في مكان تاني ، المهم الحافله إتملت بس بقى فيها مقعدين ، واحد جنبي و واحد في الجانب التاني ، جات بت راكبه زحيت شنطتي عشان تقعد بس للأسف قعدت في الكرسي التاني ، وراها طوالي جا راجل و ياهو باقي كرسي واحد ، أول ما جا علي ، من دون ما أحس قلت ليهو بصوت عالي لاااا لمن كل الناس إتلفتت علي ، عاينت للبت و قلت ليها ممكن تجي و تقعدي جنبي ؟؟
قالت لي طيب و جات قعدت جنبي و خلت الراجل يقعد مكانها ، طبعاً شماني شمه ، بعد قعد قال لي هسي انتِ السألك منو ؟؟ ما اتكلمت معاهو و الحافـله إتحركت بس أصابعي كانت بترتعش .....
طبعاً انا ساكنه الشجره عشان كدا نزلت قبل ما الحافله تصل الكلاكلـه اللفه ، أول ما وصلت لقيت عصام قاعد و بتكلم مع أمي في الحوش و كان معاهم خالتو رقـيه أم تامر ، عصام كان بقول ليهم تامر دا جاهل ساي و أناني و أصلاً دا طبعو أنا في البدايه زعلت من تصرفو بس تاني كبرت عقلي و قلت إذا هو جاهل أنا ابقى احسن منو و انتوا كمان مفروض تكونوا أوعى منو ، أم تامر قالت لأمي أنا ما عندي مشكله مع وحده من بناتك بس كمان ما عايزا الموضوع دا يعمل خلاف بين الولد و عمو ، شينه والله الناس تقول علينا شنو !!؟....دخلت توووش و قلت لـ عصام أنا برطن ؟؟ طيب بتكلم إسباني ؟؟ كلامي مش واضح ليكم كلكم !! قلت ليك ما عايزاك يعني ما عايزاك ، تاني ماف داعي للعباطه !! أمي قالت لي بنهره مها !! قلت ليها أنا بحاول أمسك أعصابي و اتكلم بهدواه بس انتوا بترفعوا كثافتي !! ما عارفه شنو الما مفهوم في كلامي ! قلت ليك و ليهو و لأبوي و للعالم كلو اني ماااا عايزااااهو لو بقى آخر راجـل في الدنيا دي ، خالتو رقيه قالت لي نحنا ما عايزين تحصل مشاكل بين تامر و عمو ، قلت ليها طيب انا دخلني شنو ؟؟ قالت لي ما شايفاهم الإتنين مصرين عليك كيف ؟؟
قلت ليها كلامي ثابت ، عصام دا لو بقى الراجل الوحيد في الدنيا دي ما بعرسو ، و بالنسبه لخوفك من المشاكل الممكن تحصل بيناتهم أنا ما هاماني والله لأنهم ما شفع ، بس لو الموضوع فارق معاكم شديد و شايفين إنو ممكن يأثر عليكم بتقدري تتكلمي مع تامر ولدك ، قالت لي لو كان بسمع كلامي ما كان جيت فتحت الموضوع مع أمـك ، قلت ليها تمام اتكلموا في أي شي بس ما ضروري تدخلوا الراجل دا و تجيبوا لي سيرتو لأنو بالنسبه لي موضوعو محسوم...
قلت كدا و دخلت خليتهم و هم وراي طلعوا طوالي و عصام كان حـ يطق من شدة الزعل ، عرفت دا من صوتو الإتكلم بيهو لمن قام طالع مع خالتو رقيه أم تامر.....
أمـي جاتني داخله و قالت لي عشان ما تقعدي تنقي ساي عصام دا أساساً ماف زول جابرك عليهو خليهو يجي و يقول العندو ماف زول شغال بيهو بس رقيه أنا بخت كلامها عين الإعتبار ، لأنو ما معقوله ولدها و حماها يتشاكلوا فيك ، قلت ليها و أنا ذنبي شنو ؟ عصام الحمار دا لو بفهم ما بلصق اللصقه دي كلها !! المهم أنا الموضوع دا ما هاميني و ما فارق معاي والله ، أي زول عندو كلام يمشي يقولو لـ تامر ما لي أنا ، قالت لي أنا زاتي ما عارفه هم متشبكين فيك كدا عشان شنو !! لو كان لميس كان معليش لأنها النصيحه سمحه شديد و مهتمه بنفسها و أنيقه و كلامها لبق ، لكن انتِ !!... طبعاً كلامها زعلني شديد مع إنو دي ما أول مره تقول كدا ، المهم بعد صلاة العشاء كدا تلفوني رن و الرقم كان غريب ، لمن رديت عرفت إنو تامر ، بعد ما سلم علي قال لي أمي دي قالت ليك شنو ؟؟
طوالي حكيت ليهو الحصل و قلت ليهو والله يا تامر أنا ما ناقصه وجع راس و أمك إذا ما موافقه احسن تسمع كلامها و......قاطعني و قال لي أمي ما عندها مشكله معاك ، عصام لاعب ليها في عقلها و بحاول بأي طريقه يقنعها إني ما جادي في العرس دا و عايز اتحداهو بس ، شابك ناس البيت انو عايزك قبليني و من زمان و على كل حال أنا كلامو ما بهمني ولا كلام ناس البيت ، كل العايزو منك انك ما تشتغلي بيهم أنا العايزك ما زول غيري ، قلت ليها عمك دا عندو مشكله في الإستيعاب ؟؟ زهجت و حلقي نشف و أنا بقول ليهو مااا عايزاك !! قال لي أصلو أناني و جنو ركوب راس بس انا راس أقوى منو و ما يتوقع مني أسكت ليهو...........
المهم تامر اتكلم معاي كتير و اقنعني إنو دي كلها خطط من عمو عشان يفشل الزواج دا ، في الآخر قال لي بعدين حأجي و اتفاهم مع أبوك في الموضوع و عشان ما تقولي ما ختيتك في الصوره حـ افتح ليهو موضوع العرس ....العرس ما الخطوبه عشان الموضوع دا ذاتو يتقفل و العشمان إنو العرس دا ما يتم يتخذل ، قلت ليهو شنوووو !؟ كيف يعني عرس ؟!! قال أهدي ! بعدين لمن أجي لأبوك حـ نقعد كلنا و نتفاهم ، المهم اشوفك بعدين ....مع السلامه....
لمن قفل بقيت اقول مستحيل إنو اوافق على العرس و أنا الخطوبه دي متردده فيها !!
المهم المسا جا و تامر جا لأبوي ، اتكلم معاهو شويه بعدها نادونا كلنا إلا عبد الله بس الما كان موجود ، أبوي قال لينا تامر دا قال عايز يعقد طوالي ، أمـي ما قالت حاجه بس لميس قالت ليهو ليه الإستعجال دا يعني ؟؟؟
تامر إتلفت علي و قال لي بعد إذنك حابي أعقد عليك و ما تخافي حـ أديك مهله كافيه عشان ترتبي بيها أوضاعك و فيما بعد حـ نجهز ترتيبات حفل الزواج سوا بس حالياً ياريت نعقد لأنو الخطوبه دي جر هوا ساي و كلها مشاكل .....قبل ما أقول حاجه لميس قالت ليهو الإستعجال ما حبابو و فترة الخطوبه مهمه شديد عشان تتعرفوا فيها على بعض و بعدها تقرروا إذا حتقدروا تكملوا مع بعض ولا لااا ...قالت كدا و عاينت لي جوه عيوني ، كأنها بتقول لي تامر ما حيقدر يتحملك و بكرا حـ يخليك ، أبوي عاين لأمي و قال ليها عندك كلام ؟؟ قالت ليهو خليهم يشوفوا هم عايزين شنو .... طبعاً طبعاً أمـي مستحيل تهتم بحاجه بتخصني ، لو كانت لميس مكاني كان الوضع إختلف و متأكده انها كانت حتتكلم و تديهم رايها و تخت شروطها ، لميس قالت ليهو والله لو سمعت مني يا تامر بكون أحسن لأنو......ما خليتها تتم كلامها ، قلت ليهو أنا موافقه ، قال لي كويس شديد ، إذاً العقد الجمعه الجايه ، عاين لأبوي و قال ليهو عندك مانع يا عمي ، أبوي قال ليهو لا ، و الله يقدم الفيها خير ....للحظات إتوترت و حسيت إني إستعجلت و ما اتخيلت العقد يكون الجمعه الجايه دي !! بس شوفة لميس و هي صاره وشها و غضبانه خففت توتري و خلتني أثبت شويه ، طوالي قامت و مشت دخلت جوه و أمي مشت لحقتها ، طبيعي ما دي لميس دكتورتها و حبيبة قلبها و هي ما بترضى فيها ، المهم أنا ذاتي قمت و مشيت دخلت جوه ، بعدها الأيام مشت بسرعه و أنا كأني ما عروس ، ايوه أمي عملت الواجب بس ما كان برضاها ولا كانت فرحانه ، بتجامل الناس بس و لميس تاني ما شفت وشها ، بتطلع الصباح بدري و بتجي المسا لا بتشوفني لا بشوفها ، المهم يوم العقد كان معاي بنات جيرانا ، ظبطونا و بخروا لي شعري و لبسي ، تحت التوب فستان تلات إربع باللون الذهبي و التوب أحمر عليهو نقش بالذهبي و الهيلز ذهبي و كل الإكسسوارات ذهبيه ، ختوا لي الجدله و ختوا القرمصيص على راسي ، بقيت أعاين لنفسي في المرايه و أنا ما مصدقـه إني بعد دقايق حأكون على ذمة راجل ، سرحت بعيد و أنا بفكر ، رجّع إنتباهي صوت خالتي نجوى و هي بتقول عقدوا يا بنات و من هناك إنطلقت أصوات الزغاريد و التبريكات ، كنت مجرده من أي إحساس حلو ، ما حسيت غير بالقلق و التوتر ، دخلوا نسوان الجيران و بناتهم باركوا لي ، بعدها جات أم تامر و أمي باركوا لي و طلعوا و عمات تامر ديل بس سلموا علي بطرف يدينهم و طلعوا برا ، جات وحده من أهل تامر ، باركت لي و قالت بعد دا أطلعوا يا بنات العريس جاي داخـل ، هنا قلبي بقى شغال دق دق ، في ثواني إختفوا كلهم و بقيت قاعده براي ما سامعه شي غير أنفاسي و دقات قلبي و خطوات جايه علي ، طبعاً وشي كان مغطى بالقرمصيص ، تامر جا داخل و بقى ماشي علي و أنا مدياهو ضهري ، جا وقف قدامي و خت يديهو على أكتافي و وقفني على حيلي ، قال لي مبروك علينا و ضماني عليهو ، رفع القرمصيص و باسني على جبيني و قال لي ما مصدق والله ، كنت منتظر اللحظات دي من زمان ، حالياً أنا عاجز عن التعبير فـ الحمدلله .... كنت مغمضه عيوني شديد و قلبي شغال دق دق ، مسك يدي و قال لي ما تتوتري ، جات بت جيرانا و قال لينا معليييش قطعت ليكم اللحظات الرومانسيه دي لكن الناس منتظرنكم برا ، المهم طلعنا وسط زغاريد و دلوكه و ابشر يا عريس ، قعدنا و جوا الناس باركوا لينا و عملوا قعده و حفله بسيطه كـ إشهار للزواج ، بعدها جوا الناس باركوا لينا ، لميس دي صدفه ما شفتها ، عصام جا آخر زول بارك لينا ، مد يدو و سلم على تامر و قال ليهو ولد أخوي الشلبني مبروك عليك ، لمن مد لي يدو عشان يبارك لي ، تامر صافحو بدلي و قال ليهو الله يبارك فيك يا عم ☺️ عصام تاني ما قال شي ، اتحرك طوالي ، المهم اليوم دا عدا على خير ، تاني يوم طوالي تامر اتصل علي ، لمن رديت عليهو قال لي مرتي السمحه صباح الخير .... طبعاً أنا بتوتر من الكلام الزي دا ، قلت ليهو أهلين صباح النور ، قال لي امبارح كنت ناوي اتصل عليك بس قلت بتكوني تعبانه ، المهم كيفك ؟؟
قلت ليهو كويسه الحمدلله ، طبعاً هو كان منتظرني اتكلم أكتر و اسألو عن حالو بس انا ما عرفت اقول شي زياده ، حسيت لساني مربوط ، أنا ما قاصده أسكت بس ما بعرف أعبر و أساساً كيف حـ اعبر عن حاجه أنا ما حاسه بيها ؟؟ و لو على المجامله أنا ما بعرف اجامل و اظهر احساس أنا ما حاسه بيهو ، قال لي اليوم ما عندك جامعه صح ؟؟ قلت ليهو أيوه ، قال لي بكرا عندك ، قلت ليهو أيوه....قال لي طيب أطلعي لي بدري ، قلت ليهو ليييه!؟؟.. طبعاً نسيت ، قال لي معقوله تمشي بالمواصلات و راجلك قاعده ؟؟
قلبي دا حسيتو زي الدلوكه ، بلعت ريقي و قلت ليهو طيب ، بعدها سكتنا الإتنين ، قال لي حأقفل بعد دا ، قلت ليهو طيب ، قال لي مع السلامه و قفلنا من بعض .....قعدت و بقيت أفكر في الحصل ، كيف حصل بالسرعه دي !؟ يعني خلاص انا و تامر بقينا متزوجين !!؟
ضميري ما كان مريحني ، حسيت إني استعجلت و ظلمت نفسي رغم إنو تامر ما فيهو كلمه بس الزواج دا ما راكب لي في راسي ، باب الأوضه كان فاتح و لميس جات مارهـ بجنبي ، أدتني نظرهـ مليانه حقد و زعل ، مشت و تاني جات راجعه و قالت لي عارفاك حتكوني طياره من الفرح كيف بعد ما عملتي العايزاهو و عرستي تامر حساده منك بس !!...ما اتكلمت معاها ، قالت لي ان شاء الله ما تتهني معاهو ولا يوم ، يا رب حياتك معاهو تكون عذاب في عذاب ، شاحده ربي تبكي دم و تعضي أصابعك من الندم ، شفتي أنا ليل و نهار حـ أدعي عليك ، ان شاء الله ما تضوقي السعاده في حياتك كلها ، ما حـ تتخيلي أنا بكرهك قدر كيف و حالياً كرهي ليك اتضاعف ، قلت ليها إحساس متبادل ، أنا شدة ما بكرهك اسمك دا ما بطيق أسمعو ، أمي جات و قالت ليها يا بت يا لميس في شنو ؟؟ قالت ليها ولا شي بتكلم مع الحاقده دي ، قالت كدا و طوالي مشت ، أمي عاينت لي مسافه بعدها جاتني داخله و قالت لي هسي انتِ يا مها كدا استفيدتي شنو !؟ ما معقوله والله تحقدي على أختك للدرجه دي ، يا بتي..... قاطعتها و قلت ليها العرس خلاص تم و تاني ماف مجال للنقاش ، قالت لي كدا قلبك برد ؟؟ قلت ليها شديد ، قالت لي كويس و طلعت طوالي ....ما أكذب إنو للحظات ضميري أنبني و جاني إحساس كعب شديد بس هونت على نفسي و ذكرتها بالمرات الكتيره البكيت فيها بسبب لميس ، بسبب التفرقه بيني و بين أخواني ، بسبب أمي الدائماً بتختار السمح لـ لميس و أنا بتديني الفضلات دا طبعاً في حال اتذكرتني و فكرت فيني ، يعني حتى بعد ما العرس دا تم هم ما رضيانين و لو عليهم هسي دي اتطلق منو 💔
كنت حأطق من الزعل ، دخلت الفيس و يدي على الماسنجر ، تحديداً دردشة دكتور خالد ، من اليوم القال لي آسف على الإزعاج ما اتواصلنا تاني ، حسيت إنو قد يكون زعل مني و شفتها ما حلوه اعمل رايحه و أرسل ليهو تاني ، بعد تردد قررت ما أرسل ليهو ، بس ما قدرت اتحمل التوتر و القلق المسببو لي الزواج دا ، شهر و حاجه و أنا اتعودت اتكلم مع دكتور خالد و أحكي ليهو ، ما قاعده احكي ليهو بالتفصيل أو اشاركو بأدق الحاجات البتخصني ، مع اني قلت ما حـ ارسل ليهو بس رسلت ليهو ، كتبت ليهو السلام عليكم كيفك ؟؟
بقيت ماسكه تلفوني و منتظراهو يرد ، بعد حكاية ساعتين دخل و قال لي و عليكم السلام ، بخير الحمدلله ، انتِ كيفك ؟؟
قلت ليهو ما عارفه والله ، قال لي هااا ناس بيتكم عملوا ليك شنو تاني ؟؟
قلت ليهو انا اتخذت قرار ما متأكده إذا صح او غلط ، قال لي القرار دا شنو ؟؟
قلت ليهو في واحد اتقدم لي و انا في لحظات زعل من أختي و أمي لأنهم ما عايزنوا لي و عايزنوا لأختي وافقت عليهو و حالياً أنا بين نارين ، قال لي عندك ليهو مشاعر ؟؟
قلت ليهو ما عارفه لأني ما بفهم في الحاجات دي و ما شغاله بيها ، قال لي أنا ذاتي قلت كدا 😂 ما حـ استغرب لو قلتي انك ما حصل حبيتي ، قلت ليهو فعلاً ، الكلمه دي أنا بكرها شديد و ما عندي حاجه لأي زول ، قال لي خلاص فهمت !!
قلت ليهو هسي أنا ما عارفه اعمل شنو !! حاسه نفسي في متاهه ، قال لي بسيطه ، أرفضيهو و خلاص لأنو موافقتك عليهو كانت في لحظة زعل زي ما قلتي ، يعني بدون تفكير ، قلت ليهو أرفضو كيف و نحنا أمبارح كان زواجنا !!
قرا رسالتي بس ما رد عليها ، قلت يمكن انشغل بـ حاجه أو الشبكه ، قلت ليهو هو كويس و أخلاقو عاليه بس المشكله فيني ، أنا والله ما زولة عرس ولا بقدر اتحمل علاقه مدى الحياة ، اقول ليك حاجه !؟
أنا انسانه ممله و غير صالحه لأي علاقه ، و ما بقدر أقدم حاجه لأي زول ، أنا في نفسي ما لقيت زول قدم لي شي ، و اذا قدمت عطائي بكون محدود ، أنا ما بقدر أضمن لزول إني اسعدو لفتره طويله ، لو اليوم ضحكت معاك بكرا لا ، بمل بسرعه من الناس ، المشاعر و الأماكن ، أنا ممكن اتكلم معاك في اليوم الأول بطريقه كويسه ، بس تاني يوم و اليوم البعدو حـ تلاحظ الفرق و كيف المزاج إنقلب ، حـ تلاحظ إني ما طايقه اسمع منك ولا حرف عكس أول يوم ، أنا بكل جداره فشلت في إني أكون إجتماعية ، فشلت في الإحتفاظ بالمشاعر و الناس ، تامر زول كويس بس انا متأكده إنو بكرا لو حصل نقاش بيني و بينو كـ طبيعة حال المتزوجين و الناس عموماً أنا ما حـ أسعى عشان أراضيهو ولا حـ اجتهد عشان أحل المشكله البيناتنا ، أنا طول عمري بنفض مشاكلي و علاقاتي من دون ما أحاول أصلحها أو أحلها ، بقول في نفسي أصلحها ليه أساساً ؟!! يعني أنا عديمة الرغبه في كل شي ، ما قاعده اتعب نفسي عشان زول ، تامر بكرا حـ يكتشف إنو الحاجات من بعيد ما بتشبه نفسها عن قرب ، بكرا حـ يكتشف إنو أكبر غلطه غلطها في حياتو يوم جا و أتقدم لي ، ما تشاؤوم مني بس انا قادره أشوف شكل حياتي معاهو و مع غيرو حتكون كيف ، تامر ظلم نفسو و بكرا حـ يكتشف الحاجه دي 💔
برضو قراها و ما رد عليها !!
لعل أسمى انتصاراتي هو أني لم أترُك الأشياء دون حبكة، ولم أدع الأمور تركض دون أن أهبها دليلًا تستدلّ به و نهايةً تتوقف عندها، و لم أترك شيئًا بنهايةٍ مفتوحةٍ فلطالما و ضعتُ النقاط، و لم أدع أحدًا بين تقاذُف الأسئلة ، لم أترُكهم دون أسبابٍ و أجوبة 🌷🦋
يتبع......
