حكيت لـ طيف كل شي و كلمتها إني مشيت و زرت أهل ميادهـ... لمن خلصت قالت لي مبالغه يا مها ! الراجل دا بالجد طلع حقير و مقرف ! بس الموضوع ما خطير ببساطه بنقدر نمشي و نبلغ عنو ، الشرطه حـ تجي فجأه و تداهم المصحه العقليه ، طبعاً حـ نجيب أهل البت عشان يشوفوها و يأكدوا للناس انها بتهم الإختفت من سنين ، خلينا نمشي بس و نفتح بلاغ ، قلت ليها لا الخطوهـ دي لسه عليها شويه ، قالت لي يا مها والله الموضوع ما بحتاج المماطله دي كلها ، حرام البت تقعد أكتر في المصحه و أهلها ما عارفين !!
قلت ليها لا يا طيف ، أنا حاسـه الموضوع أكبر من كدا ، عصام ليه دخل مرتو المصحه ؟؟ قالت لي يمكن عشان خانتو ! المهم لمن الشرطه تلقي القبض عليهو كل حاجه حـ توضح ، دا شغل الشرطه يا مها و عصام دا شكلو مريض نفسي هو المحتاج مصحه عقليه عشان يتعالج فيها ، قلت ليها المهم لمن نتلاقى حـ نشوف حل للموضوع دا ، قالت لي طيب ، اتكلمنا شويه كدا و قفلنا من بعض ، المهم يوم الجمعه ، أسيل قالت إنها زهجانه و حاسـه نفسها مخنوقه ، قالت لي أرح نطلع الشارع نتمشي شويه و نسوق حمودي معانا عشان يسكت شويه .... صراحة أنا ذاتي كنت حاسه بزهج و عايزا أطـلع من البيت ، قلت ليها طيب ، لفحنا تيابنا و طلعنا ، كلمنا أمي قبل ما نمشي ، قالت هي ذاتا طالعه ، قالت لينا ما تتأخروا عشان لميس ما تقعد براها ، المهم طلعنا الشارع و بقينا لافين ، أثناء ما نحنا بنتمشى أسيل أخدت نفس عميق و قالت لي متمنيه الزمن يقيف و ما يمشي ، عايزا أقعد ألف كدا و ما أرجع البيت ، عايزا اريح نفسي من المشاحنات الفي البيت و عايزا وجع قلبي دا يقيف شويه .... قالت لي انتِ عارفـه ، مرات كتيرهـ لمن أكون براي في المطبـخ بشيل السكين و بفكر انتحر بس بمجرد ما اتذكر حمودي أو أسمع صوتو بلقى نفسي رميت السكين ، من بدري حاولت انهي حياتي و ارتاح من كلام الناس و من معاملة أهلي و نظرة نسابتي لي و من كرهـ أخوك لي و لـ ولدي ، أخوك محسسني كأنو أنا براي الغلطت ، ياخ أنا لو ما حمودي دا من زمان كنت قتلت نفسي و ارتحت 💔
قلت ليها حـ ترتاحي وين ؟؟
الواحد قبل ما يغلط أو يعمل حاجـه حرام بفكر مية مرهـ ، انتوا اتخطيتوا الحدود و عملتو الحرام و جبتو ولد ، يعني دي اسوأ حاجه ، عايزا تقنعيني بإنو معاملة أهلك و نظرة أهلي ليك أصعب و اكعب من العملتيهو ؟؟
شوفي انتوا خلاص عملتوا عملتكم و الشايلاهو دا كان النتيجه ، بدل ما تحاولي تعملي حاجه حرام تااااني يلي هي الإنتحار الأفضل إنك تتحملي نتيجة غلطك و تقيفي عليها ، لأنك اتجاوزتي المراحل الأصعب ، بداية من الحصل بينك و بين عبدالله ، للحظة ظهور الحمل و معرفة أهلك بيهو و ما حصل بعدها لـ مرحلة زواجك من عبدالله أخوي و الحرج الدخلتي فيهو مع أهلك و نسابتك و باقي الناس ، لمرحلة الـ 9 شهور تبع حملك لحد أصعب لحظه يلي هي لحظة ولادتك .... اتخطيتي ديل كلهم غالبك تتحملي مشاكلك مع عبدالله ؟؟
على فكرهـ انتِ محظوظه و ربنا سترك لأنك عرستي الغلط معاك ، في غيرك اتبهدلو بهدلة السواد و ما لقوا اليسترهم ، حالياً انتِ بس ركزي على ولدك و ربيهو كويس و ما تخلي مشاكلك مع عبدالله تأثر على علاقتك بـ ولدك ، ما تقولي زي ما أنا أمو هو أبوهو ، لو عبدالله ما عمل واجبو اتجاه ولدو انتِ ما تتحامقي و ما تقصري منو بسبب زعلك من عبدالله ، دور الأم ما زي دور الأب ، على الأقل الأم بتقدر تأدي دورها و دور الأب و العكس غير صحيح ، لو استمريتو بالحاله دي ولدكم هو الوحيد الحيكون مضرر و بكرا لمن يكبر و يكرهكم الإتنين ما تقعدوا تتباكوا ، لأنو وقتها ما حيكون عليهو لوم .... طبعاً هي كانت بتسمع فيني و عيونها مليانه دموع ، قعدت في أقرب مصطبه و بقت تبكي و هي شايله ولدها ، هو ذاتو بقى يبكي معاها ، قالت لي أنا تعبت ، والله تعبت من الحياة دي 💔
بالجد حنيت عليها ، يعني في الوقت المفروض تكون فيهو نازله معسكرات و شايله هم تالته ثانوي ، ماسكه طفل و بتحاول تربي فيهو !!
صراحة هي و عبدالله غلطوا و غلطهم شين و كبير بس انا شايفه إنو أهلهم هم السبب ، عبدالله أنا عارفـه انو ابوي كان مديهو حريتو و لو شافو بعمل غلط بكذب عيونو و مرات بقول دا ولد و ما بعمل غلط ، يمكن لأنو معظم الناس حاسه إنو العار بجي من البت ما من الولد !! هسي العملو عبدالله دا ما جاب لأبوي العار ؟؟ ما خرب ليهو سمعتو !؟.... برضو أهل أسيل ، أنا ما عارفه هم كانوا خاتين بالهم وين عشان بتهم تمشي مع ولد و تغلط معاهو غلطه زي دي !! يعني أكيد هم ما لقوا بعض مرهـ وحدهـ و مشوا غلطوا طوالي !! معقوله أمها ما ملاحظه لـ بتها !؟ ما بتعرفها إذا بتعمل حاجات غلط من وراها أو لا !! غيتو إلا إذا امها دي من نوعية أمي !! من نوعية النسوان البكونو حايمين ساي و الوحده ما جايبه خبر لأولادها ، ما عارفاهم بمشوا وين و بجوا من وين ، مفتكرهـ انها لمن تخلي ليهم الأكل جاهز و تطلع تحوم حوامتها كدا بتكون عملت واجبها !!.... التربيه لا أكل ولا لبس جديد ، كل أم و أب مسؤولين مسؤولية كااامله عن أولادهم ، بمشوا وين ، بجوا من وين ، مصاحبين منو ، بعملوا في شنو ، بصلوا أو لا ، في الشارع بعملوا حاجات غلط أو لا .... الخ دي كلها و غيرها من التفاصيل مفروض الأهل يكونوا عارفنها ، ما بس تمسكوا لينا في جملة : أنا ولدي ما بعمل كدا !"... عرفتيهو كيف ما بعمل كدا ؟؟ ثقه في تربيتك ولا كلام ساي !....
الأسـره هي نواة المجتمع لو صلحت صلح المجتمع و لو فسدت فسد المجتمع ، التربيه الصحيحه ما حاجه بتخص كل أسرهـ براها ، ما بنقدر نقول كل أهل حرين في تربية أولادهم لأنو أولادكم ديل جزو من المجتمع ، الحراميه ، المجرمين ، النصابين و غيرهم من أصحاب النفوس الوسخه قايلنهم جاين من الشارع ؟؟ ديل برضو طالعين من أسر ، بس من أسر ما عرفت تربي و ما قدرت تزرع الأخلاق في نفوس أولادها و ما أدت دورها على أكمل وجه.....
أسيل بقت حاضنه ولدها و بتبكي و أنا تاني ما عرفت أقول ليها شنو ... كنا على مسافه بعيدهـ من الميدان ، فجأه كدا ظهر عبدالله في وشنا !! كان شايل كورهـ و صاري وشو ، نادى شافع و قال ليهو أدي الكورهـ دي لـ ناس الميدان ، الولد شالها و مشى ، عاين لي و قال لي في شنو ؟! دي مالا ؟؟
قلت ليهو اسألها ... خليتهم في الشارع و رجعت البيت ، أول ما جيت داخـله سمعت صوت بكى جاي من الأوضه ، من الصوت عرفت إنو دي لميس ، سألت نفسي دي كمان بتبكي مالا ! بس ما قدرت أمشي و اسألها ....
المهم اليوم البعدو كان يوم سبت ، كسلت والله و ما حبيت أمشي الشغل ، كنت جادهـ لمن قلت لـ قصي ما حـ أجي يوم السبت ، لمن الساعه 8:30 جات طيف اتصلت علي و قالت لي متأخـرهـ وين للزمن دا !؟؟ قلت ليها أنا اليوم ما جايـه , قالت لي ليه ؟؟ في حاجه ؟؟
قلت ليها لا بس ساي كدا ما جايه ، قالت لي متأكدهـ ماف شي !؟ قلت ليها والله العظيم مـاف شي ، قالت لي طيب تمام ، بعدها قفلنا من بعض ، لحد الساعه 10 كدا ما لقيت لي موضوع ، ضربتها يمين و شمال و قلت أحسن أمشي الشغل ، والله التقول الشركه حقت أبوي ، لمن جهزت نفسي أمي قالت لي ماشه وين ؟؟ قلت ليها الشغل ، قالت لي اليوم طالعه متأخره ! قلت ليها لأني ما كنت عايزا أمشي و هسي غيرت رأيي ، المهم أول ما طلعت لقيت عبدالله واقف جنب الباب ، شايل حجار و بجدعهم على الأرض واحد ورا التاني ، يعني زي حالة الزول الزهجان و الحيران ، إتحركت من جنبو بس تاني رجعت ، قلت ليهو شوفي أنا فاهمه و عارفه اسباب مشاكلك انت و أسيل بس ما معقوله تحملها مسؤولية غلط انتوا مشتركين فيهو ، بعد دا المشاكل و العتاب ما بنفعوا لأنو الحصل حصل حتى لو ما عاجبك لأنك من البدايه ما كنت عامل حساب لـ تصرفاتك و دائماً شايف انك صح و إنو ماف زول بقدر عليك ، حتى أبوي لمن أمي كانت بتهددك بيهو بتقول ليها ما خايف منو ، أمشي كلميهو ، شفت حالياً انت بتحصد في الزرعتو ، قال لي أمشي شغلك .... قلت ليهو أنا ما جايه اعاتبك ولا اشاكلك لأنو ما بتقدر ترجع الزمن لـ ورا بس بتقدر
تخطي خطوهـ لـ قدام و تصلح نفسك و تمشي في طريق مستقيم و تبطل كل الكنت بتعمل فيهو ، عشان ما تعاند أكتر و تركب راس ، دا ما أمر مني ، دي نصيحه ليك بتمنى انك تاخد بيها.....
قلت كدا و مشيت خليتو و صراحة كنت مستغربه في نفسي و ما عارفه جبت الكلام دا من وين ، يمكن من مرارة الجربتو و العشتو !!... حاسـه نفسي خدت تجارب و جربت أحاسيس كتيرهـ خلت يكون عندي بعد نظر في أي حاجه ، بقيت حاسه إني بقدر أحس بالناس و بفهم طريقة تفكيرهم !
المهم لمن وصلت مدخل باب الشركه ، عملت بصمتي و دخلت ، البت الشغالـه في الريسيبشن ندهت علي ، لمن مشيت عليها ، قالت لي طالبنك في مكتب الموارد البشرية ، قلت ليها طيب ، طوالي مشيت ليهم في المكتب ، طبعاً هرشوني و وحده منهم قالت لي الشركـه دي ما بتاعة أبوك عشان تطلعي و تجي على كيفك ، قلت ليهم كان في زحمه في الطريق ، وحده دائماً صارهـ وشها اسمها زبيده ، الموظفين كلهم بكرهوها ، قالت لي و نحنا قاعدين نجي بـ طياره ؟؟ ما ياهو بنجي بنفس الشوارع البتقول عنها زحمه دي ، وحده تانيه قالت لي و يوم الخميس برضو كان زحمه ؟ و بعدين تعالي هنا انتِ قاعده تشيلي إذن من منو ؟ ... قالت لي جاوبي أنا بتكلم معاك ، قلت ليها ما من زول ، قالت لي من حيوان يعني ! انتوا قايلين الشركه دي زريبة بقر و ما بنجيب ليكم خبر تطلعوا و تدخلوا على كيفكم ؟؟ شفتي الشركه دي لو دخلتها نمله بنكون عاااارفنها و متابعين تحركاتها ، فـ ما تحاولي تتحايلي ، يا تلتزمي بالشغل يا تقدمي استقالتك و تتخارجي من الشركه ... كان معاهم راجل كبير كدا لابس نظاره من قبيل ساكت ، قال ليهم خلاص خلوها تمشي بعد دا ، قال لي ما تعيديها تاني ، هزيت ليهو راسي و طلعت و أنا عايزا أطـق من الزعل ، ذلوني شديد ، ركبت المصعد و مشيت الطابق التالت ، أول ما طلعت منو كدا شفت قصي واقف مع وحدهـ كانت بتوريهو في ملف ، لمن جيت مارهـ بجنبهم هو شافني بس ما قال لي حاجـه ...
المهم دخلت المكتب و مشيت سلمت على طيف ، اتفاجأت لمن شافتني ، قالت لي قلتي لي ما جايه !!؟ قلت ليها غيرت رأيي لمن حسيت بزهج ، قالت لي الشغل رغم إنو ضاغط بس بملى فراغ الواحد ... قلت ليها ما وريتك ، قالت لي شنو قولي !؟ قلت ليها ناس الـ HR كانوا طالبني في مكتبهم ، عشان يوم الخميس ما جيت و اليوم جيت متأخره ، ضحكت و قالت لي بالجد !! قالوا ليك شنو ؟
قلت ليها اسكتي ساي ، ذلوني و بهدلوني بهدلة السواد بالذات الإسمها زبيده دي .... طبعاً أنا أحكي ليها و هـي تضحك ، المهم بعدها قعدت و اشتغلت شغلي ، لمن حسيت بالجوع قلت لـ طيف أنا حأمشي الكافتيريا ، قالت لي انتظري خلي باقي القروب يمشي معانا ، نحنا ذاتنا ما فطرنا ، قبيل اتناقشنا في كم حاجه كدا و اليوم حـ نبدا الشغل الفعلي على التطبيق ، قلت ليها تمام ، نادتهم و قالت ليهم ارحكم الكافتيريا ، طلعنا و مشينا الكافتيريا الفوق ، سمير قال لي شايفك اليوم قربتي تسجلي غيابك ، قلت ليهو لكن جيت في الدقايق الآخيره ، ضحك و قال لي أعملي حسابك ناس الشركه ديل الإنضباط و الدقه في المواعيد عندهم خط أحمر .... قلت ليهو أيوه اليوم عرفت ، شادي قال لي ليه الحصل شنو ؟؟ طيف قالت ليهم قبضوها ناس الـ HR ، و وروها الصح من الغلط ، قعدوا يضحكوا ، داليا قالت لي زبيدهـ الفقر كانت موجودهـ ؟؟ قلت ليها اتخيلي ، ندى قالت لي المرهـ دي أنا بحس إنو الهرش و الكواريك وظيفتها في الشركه دي !! عاد لو ما كوركت ما بترتاح ، قالوا ليها فعلاً و ضحكوا .....
المهم فطرنا بمزاج ، بعدها شادي قال لينا يلا على غرفة الإجتماعات ، أنا استأذنت عشان أمشي الحمامات ، لمن مشيت و جيت راجعه لقيت سمير لسه قاعد ، قلت ليهو ليه ما مشيت معاهم ؟؟
قال لي كان عـندي مكالمه ضروريه ، المهم خلينا نمشي ليهم ، طلعنا سوا و نزلنا الطابق الأرضي ، و نحنا ماشين على غرفة الإجتماعات للمرهـ التانيه شفت قصي ، سمير كان بتكلم معاي و بحكي لي في موقف و بضحك ، قال لي ما تحسسيني إني بقول في عباطه ، قولي حاجه ، قلت ليهو منتظراك تنتهي عشان أقول الحاجه دي ، قال لي ما حركه ظريفه إنو زول يتكلم معاك و انتِ تكوني ساكته ، على فكرهـ أنا شايفك مفتريه شديد ، قلت ليهو الله يسامحك ، قال لي ما أنا بس ، تقريباً الشركه كلها شايفاك كدا ، أخدت نفس و قلت ليهو بس انا ما كدا ، قال لي يمكن ، فيك شي غامض و في نفس الوقت جذاب ، لمن قال لي كدا ضيقت ليهو عيوني ، قال لي سوووري لو ضايقتك ، قلت ليهو خلينا نمشي ، طبعاً كنا واقفين بنتكلم ، لمن إتحركنا انتبهت إنو قصي لـسه واقف بعاين لينا !!
المهم لمن دخلنا غرفة الإجتماعات ندى قالت لينا اتأخرتوا وين ! انتوا عارفين إنو ما بسمحوا لينا ندخل هنا على طول ، شادي قال خلوني نبدا ، طلع اللابتوب و وصلو بالبروجكتر ، داليا قالت ليهو ممكن تخلي تصميم اللوقو علي ؟؟
قال ليها تمام ماف مشكله ، المهم بدينا ببناء هيكل البرنامج ، بعدها أدخلنا الأوامر ، ندى و داليا طوالي بدوا في تصميم اللوقو بـ لابتوب تاني ، ما طولنا كتير و ما خلصنا شغلنا ، طلعنا من قاعة الإجتماعات و رجعنا لمكاتبنا ، طيف قالت لي بالنسبه لموضوع عصام ؟؟ قلت ليها أول شي خلينا ننتهي من مشروعنا دا ، قالت لي طيب ، المهم في نهاية الدوام و أنا طالعه لقيت طيف و قصي واقفين جنب الباب !! أنا اتزاوغت و اتأخرت جوهـ قصداً عشان ما يقولوا لي نوصلك معانا ، أول ما طيف شافتني قالت لي اتأخرتي شديد !! قلت ليها يعني انتِ منتظراني ؟؟ في حاجه ؟؟
قالت لي بطلي استهبال و طوالي جرتني من يدي على عربية أخوها ، لمن فتحت لي الباب قلت ليها يا طيف المواصلات متوفره ماف داعي تتعبوا نفسكم !! قالت لي خلي العوارهـ و أركبي !! قلت ليها بس..... جا قصي قاطعني و قال لي ما معقوله كل يوم نفس الحوار !! شوفي انتِ و طيف بالنسبه لي واحد ، يعني انتِ زي أختي ، اعتبريني أخوك عشان حساسيتك دي تزول ، طيف قالت لي فعلاً نحنا زي أخوانك و طوالي ركبتني و ركبت ، طيف كانت بتونس فينا ساي ، و لمن جبنا سيرة الشركه و الموظفين طيف قالت لي قصي ما وريتك ، طوالي ختيت يدي على خشمها ، بقت تضحك و تصارع فيني عشان تزح يدي من خشمها ، قصي بقى يضحك علينا ، قال لي خليها تتكلم ، كنت لسه قـافله ليها خشمها ، قصي قال لي خلي أختي في حالها 😂
طيف عضتني في يدي ، قلت ليها واااي أنا يا جحمانه ، قالت لي تستاهلي ، قصي قال ليها براحه عليها ، قالت ليهو انت واقف معاي ولا معاها ؟؟
قال ليها أنا ضد العنف 😂 لاحظي لمن هي كانت بتصارع فيك و قافله ليك خشمك أنا وقفت معاك و هسي لمن عضيتيها بسنونك الحادهـ دي وقفت معاها ، قلت ليهو عضتها حارهـ ! أختك سنونها زي المسمار ، أدتني ضربه على كتفي و قالت لي أعوذ بالله منكم انتوا الإتنين ، بقت تقرص فيني ، طبعاً الإتنين قاعدين ورا ، قلت ليهو قصي اتكلم مع أختك دي ، كفى الله الشر سنون و اظافر ، قعد يضحك ، قال ليها طييييف !! خلاص خليها ، قالت ليهو ما شاء الله ! شايفاك واقف معاها شديد ، المهم خليني أشمر ليك كنت عايزا اقول شنو ، سبقتها و قلت ليهو قبيل ناس الموارد البشريه شاكلوني عشان جيت متأخره و عشان قبلها ما جيت ، بس دا كل الموضوع ، قال لي أنا نبهتك ! طيف قعدتك تضحك بصوت عالي عشان تغيظني ، قالت ليهو أتخيل يا قصي زبيدهـ كانت معاهم ، قادر تتخيل حتكون بهدلتها كيف صح ؟🤣🤣
قصي المرهـ دي ما ضحك لأنو شافني ساكته ، قال لـ طيف كفايه مزاح و ضحك ، طيف بطلت ضحك و قالت لي زعلتي ؟؟ ما رديت عليها ، قالت لي والله انا قاعدهـ اهاظر معاك و الموضوع ايزي ، أنا القدامك دي الناس ديل هرشوني أكتر من مرهـ اسألي قصي دا ، قصي قال لي صحبتك دي أكتر وحده اتذلت في الشركه و أكتر موظفه إنطردت من قاعة الإجتماعات و..... طيف قاطعتو و قالت ليهو خلاص استر أختك يا مان 🤣
بالجد كلامهم ضحكني فـ قعدت أضحك ، طيف قالت لي يعني ما زعلتي صح ؟؟
قلت ليها ما زعلت بس كنت بمثل عليك عشان تلمي لسانك و تنطمي ، قصي قال لي تمثيل ممتاز ، طيف قالت لي شلت هم ، الحمدلله انك ما زعلتي .... المهم قعدنا نتونس لحد ما وصلنا البيت ، قلت ليهم المرهـ دي لازم تنزلوا معاي و أصريت عليهم ، المهم دخلوا معاي البيت و سلموا على ناس أمي ، طيف قالت ليها مشتاااقين يا خالتو ناهد ، قالت بالأكتر والله يا طيف يا بتي .... طبعاً أمي و طيف بتفقوا مع بعض و من أول لقاء إنسجموا ، أصلاً طيف بت ظريفه و دمها خفيف و جميله من الداخل و الخارج و التعامل معاها مريح ، البشوفها بحبها طوالي ، بتدخل القلب بدون استئذان 💜
بعد مسافه أبوي جا داخل و لقاهم حلف إلا يتغدوا معانا ، قعدوا صلوا المغرب و اتغدوا و مشوا ، أمي قالت لي البت دي حلاتها و دمها شربات والله لو كان عندي ولد تاني كان عرستو ليها ، بت زي العسل ، أبوي قال لي ظاهر عليهم ناس برجوازيين لكن كويسين و متواضعين ، قلت ليهو فعلاً ....
زي الساعه 10 كدا كنت بتكلم مع طيف في الواتس و وريتها الكلام القالتو أمي عنها ، قالت لي والله أمك العسل و كلامها حلو .... طيف ما أول وحدهـ تقول كدا عن أمي ، معظم الناس و بالذات البنات بقولو انها ظريفه و فصيحه و دمها خفيف ، كنت بتمنى إني أشوفها بعيون الناس ، بس هي ما كانت بتعاملني بربع المعامله البتعاملها للناس الغرباء ، لمن أشوفها كيف بتسلم على طيف و كيف بتونسها و تضمها بسأل نفسي و بقول ليه ما كانت بتعمل لي كدا ؟؟
المهم أثناء ما بندردش طيف قالت لي البت ديك اسمها اسيل ولا منو دي أختك ؟؟ من زمان عايزا اسألك بس بنسى ، قلت ليها لا دي زوجة عبدالله أخوي ، قالت لي أخوك الصغير دا !! سجمي دا من الجامعه ما اتخرج ! و البت ذاتا صغيره شديد و فوقها أم كمان !! حسستني بالبوره والله..... كنت عايزا أكذب بس ما ينفع لأنو أكيد طيف شكت ، قلت ليها ما أكذب عليك ، أخوي غلط مع البت دي و بقت حامل عشان كدا جبروهو يتزوجها..... قرت الرساله و ردت بعد مسافه و قالت لي اهااا ... حسيتها اتحيرت و اتفاجأت ...
المهم تاني يوم كان يوم الأحد ، برضو اشتغلنا شويه على تطبيقنا ، كنا بنشتغل على مهلنا لأنو حاسين الزمن كافـي ، ... أنا و طيف كنا في الكافتيريا لمن فتحنا موضوع ميادهـ ، قالت لي أنا ما جبت سيرهـ لـ زول بس رايك شنو نكلم رانيا خالتي ! صدقيني حـ تقدر تساعدنا و ممكن بأي طريقه تمشي الطابق التالت و تحاول تعرف في شنو هناك ! قلت ليها صراحة أنا برضو فكرت أكلمها و على فكره أنا حـ أمشي المصحه ، قالت لي تمام بـس حـ تدخلي كيف و بـ صفتك منو ؟؟ قلت ليها ما عارفه بس متأكدهـ ألقى حل ، قالت لي يعني أكلم خالتي !؟؟ قلت ليها كلميها ، طوالي اتصلت عليها و حكت ليها ، لمن خلصت قالت لي خالتي قالت حـ تجي مارهـ علينا بعد ساعتين كدا ، قلت ليها تمام ، بعدها رجعنا على شغلنا ، كانت ماسكه ملف و لمن خلصتو لازم يوقع عليهو مدير قسمنا بس ما كان موجود ، طيف قالت لي أمشي لـ قصي عشان يوقعو ليك ، قلت ليها طيب ، ركبت المصعد و صلت لحد آخر طابق ، اتوجهت على مكتبو طوالي ، كان في سكرتيره جنب مكتبو ، المهم كلمتو إنو في موظفه عايزا توقعو ضروري ، بعدها سمح ليها تدخلني ، لمن دخلت ، قال لي يعني دي انتِ ، قلت ليهو أيوه ، في ملف لازم يتوقع و مستر نادر ما موجود ، شال قلم و قال لي جيبي الملف ، مديتو ليهو ، بقى يدقق فيهو ، بعد مسافه سألني عن نقطه ، شلت منو الملف و بديت أشرحو ليهو كلو و أنا عيني في الملف ، لمن خلصت و رفعت راسي لقيتو بعاين لي ، للحظات جاني إحساس غريب ، حسيت بكهربه في جسمي ، هو ذاتو ظهر عليهو التوتر ، قال لي تمام فهمت و شال الملف و وقعو ، قبل ما أطلع قال لي شايفك اتأقلمتي مع موظفين الشركه !!... صراحه استغربت ! قلت ليهو كيف يعني ! قال لي عادي يعني بقيتي بتتكلمي معاهم و شكلك كونتي ليك شله ، قلت ليهو ما حصل ، قال لي الولد الكان معاك أمبارح لمن طلعتوا من المصعد ، دا صاحبك الجديد ولا شنو ؟!.... قالها بضحكه كدا ، صراحة إحترت فيهو !! قلت ليهو لا صحبي لا شي ، قال لي الموضوع ما بستاهل الضيق دا كلو !! سألتك عشان حسب علمي غير طيف انتِ ما مصاحبه زول .... لمن سكت و ما رديت قال لي بتقدري تمشي بعد دا ، شلت الملف و طلعت منو و أنا قلبي شغال دق دق ، حسيت إنو في الدقايق الآخيره كان في توتر و في إحساس غريب كدا !! نفضت الأفكار من راسي و مشيت واصلت شغلي لحد ما جات دكتورهـ رانيا ، كويس انها جات في الوقت الخلص فيهو دوامنا ، ما دخلت جوه قالت لـ طيف اطلعوا لي منتظراكم برا ، طيف إتصلت على قصي و كلمتو اننا طالعين مع خالتها .... بعد قفلت منو قالت لينا ثواني قصي قال جاي ، فعلاً بعد دقيقتين جانا برا الشركه ، سلم على خالتو و قال خير يا جماعه !! ماشين على وين ؟؟
دكتورهـ رانيا كانت عايزا تتكلم بس انا قاطعتها بسرعه و قلت ليهو طالعين نتونس و نرفه شويه عن نفسنا .... طبعاً واضح إني كنت بكذب لأني قاطعت كلام دكتورهـ رانيا ، لمن قصي عاين لـ طيف هزت ليهو راسها ، بعدها استأذن و مشى ، دكتوره رانيا قالت لي يعني ما كلمتو قصي ؟؟ قلت ليها لا ، طيف قالت لي خلينا نكلمو يا مها ، والله حـ يساعدنا ، قلت ليها لا ....
المهم مشينا سوا و حكينا لدكتورهـ رانيا القصه من بدايتها لنهايتها ، طيف قالت ليها يا خالتي أنا شايفه الموضوع بسيط ، مش مفروض تكلم أهل البت و تخليهم يمشوا يفتحوا بلاغ ، بعدها الشرطه حـ تتولى الموضوع و ترجع ليهم بتهم و عصام حـ يتحاسب !! يعني حتى لو حاسه إنو في شي في الطابق التالت لمن الشرطه تصل حـ تداهم المصحه كلها و تحقق في الموضوع !....
قلت ليها لا ما بسيط يا طيف ، الشاهده الوحيده على وجود ميادهـ في المصحه هي أنا ! يلي برضو كنت في المصحه بغض النظر عن الطريقه الدخلت بيها ، فرضاً إنو كلمت أهل ميادهـ بإني شفت بتهم الإختفت قبل سنوات في المصحه عقليه حـ يسألوا عن اسم المصحه و لمن يعرفوا انها بتاعة عصام من دون تردد حـ يتواصلوا معاهو عشان يتأكدوا من كلامي ، طيف قالت لي و هم ليه يتواصلوا مع عصام البتهم في المصحه تبعو و هو ما كلمهم ؟؟
قلت ليها لأنهم ما عارفين حقيقتو ، شايفين إنو بتهم غلطانه و عصام صورتو نضيفه قدامهم ، قالت لي طيب انتِ كلميهم ، قولي ليهم عصام هو الدخلها المصحه !!... قلت ليها يا طيف..... دكتورهـ رانيا قالت ليها مها معاها حق ، على فكرهـ أنا متأكدة 100٪ إنو في سر متعلق بالطابق التالت ، حرصهم عليهو بالطريقه دي و منع الناس منو حاجه بتشكك ، أنا ما طولت معاهم في المصحه لي 3 ، 4 شهور كدا بس حاسه في شي ، قبل كدا بالصدفه سمعت واحد قال لدكتور عصام إنو في عناصر من الشرطه حـ تجي بعد 3 ساعات عشان تفتش المصحه ، طيف قالت ليها و هو عرف كيف إنو الشرطه حـ تجي و كمان بعد 3 ساعات !! قالت ليها عشان تعرفي إنو الموضوع ما بسيط و عصام دا ما براهو و عندو ناسو الواقفين معاهو و البنقلو ليهو الأخبار .... طبعاً بعد كلامها دا حسيت الموضوع بقى خطير شديد ، قلت ليها أنا عايزا أي طريقه تدخلني المصحه ، عايزا أشوف ارشيف المرضى ، قالت لي حاجه صعبه خاصة إنو الكاميرات في كل مكان و صعب تدخلي غرفة الأرشيف ، قلت ليها تمام بس مهم جداً أدخل المصحه ، عاينت لدكتورهـ رانيا و قلت ليها عندك فكرهـ مكتب عصام وين ؟؟ قالت لي عندو مكتبين ، في التالت و الرابع ، قلت ليها برضو لو دخلت مكتبو حاجه ما بطاله ، الأرشيف في الطابق الرابع ؟؟ قالت لي ايوهـ .... بقينا نفكر و نخطط لـ طريقه عشان ندخل بيها المصحه ، في الآخر اتوصلنا لـ فكرهـ قلنا حـ ننفذها يوم الأربعاء بعد نخلص من موضوع التطبيق البنكي ....
المهم يوم الإثنين عدا عادي و نحنا خلصنا شغل على تطبيقنا ، كان في لابتوب شادي ، المهم يوم الثلاثاء ، كان اليوم المفروض نعرض فيهو تطبيقاتنا على إدارة الشركه و إدارة البنك ، أنا اليوم داك على غير العادهـ صحيت متأخره شديد و قمت مخلوعه و جرى بقيت أجهز في نفسي ، على بال ما أجهز الساعه 10 جات ، طبعاً تلفوني كان برن ساي ، مرهـ داليا و مرهـ طيف و الباقين ، زعلت من نفسي شديد ، لمن رديت على طيف قالت لي وين انتِ الناس بدت تقدم في تطبيقاتها !! نحنا إلا قلنا ليهم خلونا آخر قروب و هسي قدامنا اتنين بس ، قلت ليها آسفه آسفه شديد بس لو اتأخرت خلي واحد منكم يشرح ليهم ، قالت لي بس انتِ عارفـه انك أكتر وحده عارفه خطوات التطبيق دا بالتفصيل و نحنا معتمدين عليك ، قلت ليها اشتغلناهو سوا يا طيف و أكيد انتوا عارفين ، قالت لي طيب بس حاولي تجي لأنو لا ندى لا طيف عندهم استعداد يقيفوا قدام الخلق دي كلها و يشرحوا ليهم ، قلت ليها في انتِ و في شادي و سمير ! قالت لي شادي لسه ما جا و المشكله إنو التطبيق في لابتوبو !! قلت ليها ياخ أنا كلمتو و قلت ليهو رسل لينا نسخ منو تحسباً للظروف الزي دي .... المهم قفلت منها و اتصلت على شادي بس تلفونو كان مغلق ، خليتو و اتصلت على سمير و قلت ليهو شادي دا وين ؟؟ قال لي والله ما عارفو يا مها بتصل عليهو و تلفونو مغلق ، المهم انتِ وين ؟؟
قلت ليهو في الطريق ....
المهم لمن وصلت الشركه لقيت ناس طيف واقفين برا باب المعرض ، طبعاً حاجات زي دي بتنعرض في غرفة اجتماعات بس عشان في إداريين و موظفين قسمنا العدد بقى كبير عشان كدا دخلوهم المعرض ، لمن وصلتهم قلت ليهم شادي لسه ما جا ؟؟ طيف قالت لي لسه و بعد كم دقيقه كدا حيجي دورنا ... طبعاً كانوا زعلانين شديد ، يشيلوا و يشتموا في شادي ، قلت ليهم يمكن حاصله عليهو حاجه ، سمير قال لي أنا كلمتو و قلت ليهو رسل لينا نسخ كلنا عشان لو حصل ظرف زي دا نقدر نتصرف !! قلت ليهم روقوا لأنو..... جا قصي طالع و قال لينا خير يا شباب في شنو ؟؟
طوالي حكوا ليهو ، قال ليهم ليه ما اتصرفتوا !!؟ دوركم جا !! داليا قالت ليهو نعمل شنو يا مستر و الشغل كلو مع زميلنا و هو تلفونو مغلق !!
بقوا جايطين و أصواتهم عليت و أنا بتكلم معاهم بس هم ما جايبين لي خبر ، عليت صوتي و قلت ليهم أنا معااااي تطبيق ! اسكتوا ياخ !! كلهم اتلفتوا علي و قالوا لي شنووو ؟؟ قلت ليهم جبت لابتوبي معاي ، طيف قالت لي يعني عندك نسخه من التطبيق ؟؟قلت ليها لا بس كنت مصممه غيرو ، داليا قالت الحمدلله واااي ما قادرهـ أصدق ، سمير قال لي عملتيهو متين ؟؟ قلت ليهو في الوقت الكنا شغالين فيهو على التطبيق داك ، صراحة الشغل عجبني و حاولت تصمم تطبيق تاني ، ندى قالت لي أنقذتينا يا مها ، ان شاء الله يكون زي تطبيقنا داك ، قلت ليها زيو و يمكن أفضل ، طيف ضمتني شديد و قالت لي كويس انك معانا ، قلت ليهم المهم خلونا ندخل .... طبعاً قصي كان بعاين لي ساي ، لمن دخلنا المكان كان مليان ناس ، الموظفين ورا و الإداريين قدام ، لمن وقفنا في المنصه ، سمير وقف قدامنا سلم عليهم و عرفهم بأسمائنا ، وصلت اللابتوب في البروجكتر و خليت سمير يتكلم عليهم عن عيوب التطبيقات البنكيه الحاليه ، بعدها جا دوري و اتكلمت ليهم عن التطبيق و لخصت ليهم مميزات في نقاط :
1_ يعمل بكل سلاسة على هواتف الأندرويد و الأيفون مع تكامل بشكل قوي لكل إصدارات الأندرويد
2_ يتم تطوير التطبيق بإستمرار من القائمين
3_ يتعامل تطبيق مع الكثير من البنوك السودانية ، و يدعم التحويل منها أو إليها بشكل لحظي مما يسهل الكثير من المعاملات ويقلل الوقت و الجهد
4_ القدرة على إرسال و إستقبال الأموال عن طريق رقم الهاتف المحمول أو الخدمات الفورية و المحافظ الهاتفية في ثوان معدودة بكل بأمان
5_تحويل الأموال في التطبيق يجرى على مدار الساعة خلال الأسبوع و بدون توقف أو إجازات ، مما يسهل الكثير من الوقت على المستخدمين
6_القدرة على التحقق من الرصيد المصرفي الموجود بالحساب البنكي بسهولة
7_القدرة على تتبع آخر 20 معاملة مالية تم إجرائها عن طريق التطبيق ، مما يساعد على تحديد أوجه الإنفاق للتطبيق و إعطاء موثوقية أكبر في أمانه
8_حجمه صغير للهواتف لا يتعدى 48 ميجابايت
لمن خلصت حسيت بالرضى ، هم ذاتهم كانوا مبسوطين ، شكرونا و شكرو كل القروبات القدمت قبلينا ، قالوا بعد يدرسوا التطبيقات دي كلها حـ يختاروا الأفضل ، بعد طلعنا سمير قال لي طلعتي خطيرهـ عديل ، طيف قالت لي و الأخطر طريقة تقديمك ، كنتِ واثقه شديد من نفسك ، المهم بقوا يشكروا فيني ، قلت ليهم لو استمريتوا كدا حـ أشوف نفسي عليكم ، قعدوا يضحكوا ، ندى قالت بعد دا خلونا نشوف ولد الناس دا طفش وين !! داليا قالت ليهم أرح الكافتيريا و حـ نجرب نتصل عليهو هناك ، أول ما اتحركنا كدا قصي جا طالع و ناداني قدامهم ، طبعاً كلهم قعدوا يعاينوا لي و ليهو !! سمير قال لي نحنا حـ نمشي ، لمن تخلصي تعالينا ، كلهم مشوا إلا طيف ، قالت لي الشمار حرقني ، لمن وصلني ، قال لـ طيف انتِ اسمك مها !؟ قالت ليهو لا بس انا و مها واحد ، عايز تقول شنو الشمار حرقني ، قال ليها الليله عشان وقفتك دي ما حـ أقول ، قالت ليهو اشششششي من متين في أسرار بيناتكم !؟😂
بقوا يتناقروا مع بعض و أنا بضحك عليهم بس الفضول كان كاتلني و عايزا أعرف قصي عايز يقول لي شنو ، طيف قالت ليهو أصبر لـ شجن حـ أوريها عمايلك في الشركـه.....
قال ليها أصلاً عارفك جايه هنا جاسوسه ليها .... لمن جاب سيرة شجن حسيت كأنو انضربت كف على وشي !! أنا نسيتها على الآخر و شلتها من بالي !!.... قلت لـ طيف أنا ماشه و من دون ما انتظر رد منهم مشيت طوالي 💔
في نوع من المشاعر ما بنقدر نعبر عنها في رساله ، نبرة الصوت هي البتظهرها ، في عبارات ما بنقدر نقولها بصريح العباره بس أفعالنا بتحكيها ، في عتاب ما بكون بالكلام ، أحياناً كتيره الصمت عتاب ، الحياة ما واضحه زي ما نحنا شايفنها في تفاصيل صغيره خفيه أصدق من الوضوح ....
يتبع.....
