للحظات كنت بردد في نفسي دكتور خالد منو ؟؟
أول ما اتذكرت حسيت الدنيا لافه بي ، لساني اتربط ! حسيت كأنـو في زول ضربني كف !! سحب يدو و إبتسم لي و قبل ما أستوعب الحاصل لقيتو إختفى من قدامي ! كنت بسأل في نفسي كيف يعني قصي هو دكتور خالد ! كيف شخصيتين يكونوا شخصيه وحده ! و أصلاً كيف هو دكتور و كيف يعني إسمو خالد !
رجعت دخلت الشـركه و بقيت أفتش عليهو بس ما لـقيتو ، طلعت تلفوني و بقيت اتصل عليهو بس ما برد علي ، فتشتو في كل الشركه بس ما لقيتو ، طلعت من الشركه و مشيت البيت و كنت طول الطريق بحاول ألقى أجوبه لـ اسئلتي ! لمن وصلت البيت لقيتهم بادين تجهيزات حفلة تخرج عبدالله ، كانوا أمي و خالتي و كم وحدهـ كدا من الجيـران بخبزو ، سلمت عليهم و دخلت طوالي ، ختيت شنطتي و قلعت الجزمه ، فتحت تلفوني و دخلت الواتس ، كتبت اسم قصي فوق لمن ظهر لي حسابو رسلت ليهو و قلت ليهو ممكن تفهمني حاجه ؟؟ كيف يعني انت دكتور خالد !!؟
الرساله مشت بس هو ما استلمها ، واضح إنو ما فاتح الشبكه ، مشيت الفيس الطولت منو ، بقيت أحاول اتذكر كلمة سر حسابي كانت شنو لمن ما اتذكرتها طوالي ضغطت على نسيت كلمة السر و عملت وحدهـ جديدهـ ، طوالي مشيت على الماسنجر و دخـلت دردشة دكتور خالد القديييمه ديك ، بديت أراجع فيها من أول رسالـه بيناتنا ، ما بنـكر إنـو في البدايه أسلوبو معـاي كان حلو و مهذب ، راجعت محادثتنا لحد آخر رسايل منو :
_"ما تقعدي تعملي لي وجع راس ، ياخ أنا مالي و مال مشاكلك "
_" غلطان أنا لأني من البدايه ما كان أرسل ليك "
_"ياخ إذا أنا شهرين بس حسيت بطاقه سلبيه بسببك فـ ما بالك بناس بيتكم ، عرسي عرسك و خلي النكد و الكلام الكتير عشان على الأقل ترتاحي من ناس بيتكم و تطلعي من اكتئابك دا ....و حاجه آخيره ، ما ترسلي لي تاني..."
قلبي قبضني لمن قريت الكـلام دا مـرهـ تانيه ، حسيت بوخزه في قلبي ! كيف قصي يقول إنو دكتور خالد ! يمكن بكذب علي ؟؟ طيب عرف دكتور خالد من وين ؟؟ معقوله يكون صحبو ؟؟ يمكن هو صحبو و حكى ليهو عني !؟ طيب هو عرف كيف إنو دي أنا !!؟
طوالي اتذكرت دفتري ، يوم كنت هاربه من المصحه و إصطدمت بقصي و دفتري وقع مني هو شالو و زي ما براهو قال لي ، قرا دفتري كلو !!
رديت على رسايلو الليها أكتر من سنه و قلت ليهو غـلطانه أنا لأني اتقبلت تطفلك و بقيت افضفض ليك...
دخلت صفحتو المهجورهـ و بقيت أشوف في بوستاتو القبل سنـه ، شكلو ما قاعد يدخل كتير أو بدخل بس ما قاعد ينزل بوستات !!
أول ما طلعت من الماسنجر و كنت حـ أطلع من الفيـس ظهرت لي رساله في الماسنجر ، كانت منو هو !! كاتب لي آسف !
قلت ليهو منو انت ؟؟
قال لي مها أنا قبيل وريتك 😊
قلت ليهو عايزين تلعبوا علي صح ؟؟ ما عارفه هسي انت خالد ولا قصي بس الأكيد انكم متفقين و عايزين تجهجهوني ، قال لي قصي و خالد نفس الشخصيه .... كنت عايزا أردمو و اشاكلو بس خطرت على بالي فكره ، قلت ليهو صراحة في البدايه زعلت بس هسي لا و في حاجه مهمه عايزا اقولها ليك من زمان ، قال لي يلي هي ؟؟
قلت ليهو ثواني .... رسلت ليهو رابط و قلت ليهو الكلام النفسي اقولو ليك يا قصي حـ تلقاهو مكتوب هنا ، صح ما كتبتو أنا بس صدقني نفس الشي الكنت عايزا أقولو ليك ...
طبعاً قرا رسالتي بقيت أدعي و أقول يارب يدخل الرابط ، يا رب ما يشك .... طبعاً الرابط دا عاملاهو أنا ، أول ما يدخل فيهو حـ يطلب منو تسجيل الدخول و هو حـ يضطر يدخل بياناتو تبع الفيس زي كلمة السر أو البريد الإلكتروني..... بقيت قاعده و مترقبه لحد ما هو وقع في الفخ 😈
كلمة سرو و رقمو العامل بيهو حسابو بقوا عندي لأنو كتبهم في رااابط المزيف حقي ، طوالي استلمتهم و عن طريقهم قدرت أخترق صفحتو ، افتكرت إنو حيكون في صور ولا بوستات مخصصه بس لأصحابو بس كانت خلا ، نفس البوستات القديمه الظهرت لي قبل اخترق حسابو ياها هسي ، دخلت الماسنجر حقو ، كان في كميه من المحادثات و كلها مع بنات ، دخلتهم دردشه دردشه و قريت معظم الرسايل الفيهم ، ساعه كامله و أنا بفرا في المحادثات ، طبعاً قصي كان بتصل علي بس كنت بفصل الخط و بتابع قراية للمحادثات ، في النهايه الطلعت بيهو و الإتأكد منو إنو خالد دا ما دكتور نفسي ولا شي !؛ بدخل على البنات و بمثل إنو دكتور نفسي عشان يتكلم معاهم لأنو نفس السيناريو العملو لي عاملو مع كتار غيري !! راجعت اشعاراتو القديمه و اكتشفت إنو مباري البنات ! بشرك ليهم في الكومنتات و بعدها بدخل عليهم خاص ! ما قادره أصدق إنو قدر يخدعني !! ما مستوعبه إني حكيت جزو من تفاصيل حياتي لـ واحد منافق ! كذب علي و عمل نفسو دكتور نفسي !! ما مصدقه إني طلعت بالغباء دا و ما شكيت فيهو رغم إنو أنا ما بالساهل أنخدع !!
دخلت حسابو و كتبت : أنا واحد تافه و حقير و نسونجي و على فكره أنا ما طبيب نفسي ، كنت بخدع البنات و بستدرجهم عشان بس ألعب بمشاعرهم ...
طوالي نشرت البوست دا و أنا بنبذ فيهو ساي ، لمن إتصالات قصي كترت فتحت الخط و قلت ليهو عايزا تقول شنو !؟؟ بالجد انتوا تافهين و حقيرين و ما عندكم موضوع ، الإتنين كلاب ، انت و الزفت صحبك العامل فيها طبيب نفسي دا ، لو قاعد جنبك قول ليهو أرجل شويه و بطل تتنفس بنات ، و لو رااااجل خليهو يواجهني و يعترف قدامي ، واحد حيوان و ما شادي حيلو و نتن و..... قصي قاطعني و قال لي أنا آسف حقك علي 💔
قلت ليهو حُقه تخنقكم انتوا الإتنين ان شاء الله ، قال لي مها ...قلت ليهو ما عايزا أسمع منك شي و ياريت انت كمان تبطل حركاتك دي ، قال لي ما مصدقه إنو خالد و قصي إسمين لـ نفس الشخصيه ؟؟
ما رديت عليهو ، كنت غضبانه و أعصابي تلفانه و فيوزاتي ضاربه و أفكاري متضاربه ، قال لي والله العظيم ما كنت عارف إنو دي إنتِ ، ما عرفت إلا لمن دفترك وقع منك و شلتو و قريتو و لقيتك كاتبه نفس التفاصيل و ذاكره إسم خالد مرهـ أو مرتين كدا و كنتِ كاتبه إنك داخله الفيس بإسم مارسلين ، أنا بعد القريتو من دفترك عرفت مارسـلين دي انتِ!! ، صدقيني حسيت بالندم لأني كتبت ليك الكلام الجارح داك و .... ما خليتو يتم كلامـو ، طوالي قفلت الخط في وشو و أنا عاضه شفايفي من شدة الغضب و الزعل ، محروقه و مغيوظه شديد انـو إنلعب بـي !! أنا كيف بقيت غبـيه للدرجه دي و من دون ما اتأكد قعدت اتراسل مع واحـد مخادع و قعدت أفضفض ليهو !!!
اليوم داك زعلت زعل و طول الليل كنت بفكر في الموضوع و قررت إني أقدم إستقالتي من الشـركه ....
تاني يوم لمن مشيت الشركه أول ما وصلت اتجهت على مكتب قصي بس السكرتيره قالت لي إنو لـسه ما جا ، بقيت واقفه ليهو جنب مكتبو بس اتأخر شديد ، طيف اتصلت علي و قالت لي اليوم ما جايـه ولا شنو ؟؟
قلت ليها أصلاً أنا في الشركه ، هسي بجي عليك ، ركبت المصعد و نزلت تحت ، قلت مسافة يجي حـ اشتغل شويه ، حيكون آخر شغل لي في الشـركه دي ، المهم دخلت مكاتب الموظفين ، سلمت على طيف و ناس داليا ، في الفترهـ الآخيرهـ بقيت براي بمشي و بسلم عليهم ، أول مرهـ استغربوا فيني ، عشان كنت ما بسلم على زول غير طيف ، سمير قال لي في تطور حاصل ، قلت ليهو كيف ؟؟
قال لي أخيراً نزلتي من برج الغرور حقك ، قلت ليهو الله يسامحك ، ندى قالت لي بالجد كنا شايفنك مغرورهـ ، داليا قالت لي لأنك ما مديـه زول وش غيـر طيف ، قلت ليهم ما كنت حاسـه على روحي 😅
المهم اتكلمت معاهم شويه بعدها قعدت مكاني و فتحت الكمبيوتر ، طيف جات قعدت لي في التربيزه و قالت لي في شنو أحكي !!
قلت ليها ماف شي ، قالت لي حاساك متضايقه !! قلت ليها لأني مصدعه ، قالت لي بلعتي مسكن ؟؟ قلت ليها ايوه ، قالت لي طيب أرح الإستراحة ، ارتاحي شويه و لو الصداع ما خف أخدي إذن و أمشي البيت ، قلت ليها لا لا هسي حـ يروح....
المهم لمن جا زمن البريك كلنا مشينا الكافتيريا ، بعد الفطور هم كانوا بتونسوا ، استأذنت منهم و كنت حـ أمشي ، طيف قالت لي ماشه وين ؟ في حاجه ؟؟
قلت ليها لا ، هسي برجع ، طلعت من الكافتيريا ، طلعت المصعد و مشيت آخر طابق ، المرهـ دي السكرتيرهـ ما كانت موجودهـ فتحت باب مكتبو و دخلت طوالي و أنا معصبه ، لقيتو بتكلم بالتلفون ، إتلفت علي و إبتسم ، ربعت يديني و بقيت أعاين ليهو بحدهـ جوه عيونو ، هو نفس الشي ، كان بعاين لي و بتكلم بالتلفون و على وشو إبتسامه ، أول ما خلص المكالمه ، قال الشرسه جات ، مشيت عليهو و أول ما وقفت قصادو شاااكلتو قدرتي و سمعتو نفس كلام امبارح و اسوأ منو ، طلعت كل غضبي فيهو ، و هو ما أبدا أي ردة فعل كان بعاين لي بنفس إبتسامتو كأني بحكي ليهو قصه !! إبتسامتو إستفزتني و ضايقتني زيادهـ ، قلت ليهو ياخ انت مصنوع من شنو نفسي أفهم بس ! بعد الكلام دا كلو لسه بتتبسم ! ما عارفاك جايب البرود و البياخه دي من وين !؟
قال لي خلصتي ؟؟
قلت ليهو في الختام عايزا اقول ليك إنو ما بشرفني اشتغل معاك في نفس المكان عـشان كدا اليوم حـ أقدم إستقالتي ....قلت كدا و إتلفت منو مشيت على الباب ، أول ما فتحتو كدا فجأه جا هو من وراي و قفلو ، لمن إتلفت عليهو قال لي قلتي العندك و جا دوري عشان أقول العندي ، قلت ليهو ما عايزا أسمعك ، قال لي غصب عنك حـ تسمعيني ، وقف لي جنب الباب و إتكل عليهو ، قال لي ليك حق تزعلي و ليك حق تضايقي و أنا آسف شديد ، بس الأكيد إني ما كنت عارف إنو انتِ و مارسلين نفس الشخصيه ، بالمختصر أنا و زي ما قلتي كنت بلعب بالبنات ، دخلت بحساب مزيف مخصوص عشان اتسلى و بس ، و أنا لا دكتور نفسي لا غيرو ، لمن رسلت ليك على أساس إني دكتور خالد و ما أديتيني وش ختيتك في راسي لأني ما متعود اتحرج ولا متعود بت تفصلها مني ، كل البنات الكنت برسل ليهم في الخاص كانوا بتفاعلوا معاي و معظمهم أدوني أرقامهم ، المهم حسيت انك وحدهـ عنيدهـ و ما ساهله عشان كدا اتغمست دور الطبيب النفسي ، كنت منتظر تجي اللحظه الأقدر فيها أشيل منك رقمك بس انتِ كنتِ عامـله حدود و اتأكد بالجد انك ما ساهله و دا الخلاني أصر زيادهـ إنو اتواصل معاك ، إعتبرتك تحدي كبير و كنت مستمتع و أنا عامل فيها دكتور نفسي ، أبداً ما كنت متقبل فكرة إني أنهزم قدامك و أتراجع ، رغم الكلام الإيجابي الكنت بكتبو ليك بس صدقيني ما كنت مهتم بـ كلامك بس برضو مُصر إني أوقعك في الفخ بس ما كنتِ فريسه سهله ، قلت ليهو بالجد انت واحد تافه !! ما قادره اصدق انك طلعت بالشكل دا .... جا علي و قال لي يا مها أنا ، قاطعتو و قلت ليهو كفايه ما عايزا أسمع منك شي !! انت سقطت من نظري ، قال لي دي تصرفاتي لمن كنت واحد طايش ، قصي الواقف قدامك دا ما نفسو قصي الكان قبل 3 سنوات ، لاحظي إني حتى في أقصى مراحل طيشي و فارغتي لمن عرفت انك عرستي إنسحبت و وقفت البعمل فيهو إحتراماً لزواجك و غيرها أنا أصلاً كنت على أبواب عرسي ، لمن رسلتي لي تاني بعد ما عرفت انك عرستي حسيت إني خسرت التحدي مع نفسي و بما إني خلاص انسحبت و وقفت التمثيل ما كنت طايق أسمع أكتر من قصصك عشان قلت القلتو وقتها و أنا آسف جداً ، قلت ليهو و أنا مستحيل أقبل إعتذارك دا ، ليه لمن عرفت إنو دي أنا ما جيت كلمتني ؟؟
قال لي لأنو متوقع ردة فعلك و لو كنت حكيت ليك ما كنتِ حـ تقبلي أي مساعدهـ مني ، ما كنت عايزا الموضوع دا ينفتح تاني و حسيت إنو ما ضروري اقول الحقيقه و انك ما ضروري تعرفي ، بس أمبارح ما عارف الحصل لي شنو ، يعني فجأه كدا حسيت إني عايزا أقول ليك العملتو ....
قلت ليهو زح لي من الباب أنا طالعه ، قال لي بعد تقبلي إعتذاري ، قلت ليهو مستحيل ، قال لي إذًا ماف ليك طلوع من هنا ، قلت ليهو أنا ما بهظر معاك ، قال لي ولا أنا .... ربع يدينو و قال لي ما عندي مانع أقيف هنا لحد بكرا ، قلت ليهو ما تخليني أصرخ و ألم عليك الخلق ديل كلهم ، قال لي يلاااا منتظرهـ شنو ، قلت ليهو أنا جادهـ ، قال لي أثبتي لي جديتك ، قلت ليهو عشان انت أخو طيف و صاحب الشركه قايلني حـ أتردد ؟؟ صدقني أنا بقدر أصرخ و ألم الشركه كلها عليك و أتهمك إتهامات لا حصل سمعت بيها لا شفتها ، قال لي تمام وريني شطارتك ....
قلت ليهو زح من وشي ، قال لي غيرتي الخطه ؟؟
ما رديت عليهو ، قرب مني و قال لي ما حـ تقدري ، ما لأنك ما قادرهـ تصرخي لأنك ما عايزا كدا ، اقول ليك ليه ؟؟.... لأنو البحب ما بيأذي و انتِ بتحبيني و أنا واثق من الحاجه دي 😊
طبعاً اتهجمت و بقيت منططه ليهو عيوني ، أفكاري جاطت و التوتر مسكني ، حسيت رجليني حـ يسيحوا و قلبي كان شغال زي الدلوكه ، لساني إتربط و حالتي بقت حاله ، إبتسم و قال لي في وحدهـ بتفكر تعمل كدا في راجلها ؟؟
قال كدا و هو قريب مني ، لزيتو بكل قوتي و قلت ليهو إياك تتجاوز حدودك ، ما عشان انت مدير الشركه تقعد تقل أدبك و تألف كلام من عندك ، إحترم نفسك ياخ و إحترم مرتك الفي بيتك ديك 😊
قلت كدا و طوالي فتحت الباب بإستعجال ، أول ما طلعت كدا لقيت طيف في وشي ، إتخلعت زيادهـ و خفت انها تكون سمعتنا ، حالتي كانت بطاله شديد و فِكري كان مشتت ، عاينت لي بإستغراب و قالت لي مالك في شنو ؟؟
صراحة ما عرفت أقول ليها شنو ولا كنت قادرهـ اتكلم ذاتو ، خليتها واقفه و طوالي مشيت ركبت المصعد ، على طول مشيت الطابق الأرضي و منو طلعت من الشركه و مشيت البيت ، لا استأذنت من زول لا كلمت زول ، قلت خليهم يفصلوني أصلاً دا كدا كدا كنت حـ أقدم إستقالتي ، لمن وصلت البيت ، لقيت ناس أمي مشوا رسمو و جوا راجعين ، أسيل قالت لي انتِ حـ ترسمي ؟؟ قلت ليها لا و طوالي مشيت و دخلت جوه الأوضه ، طبعاً أبوي بدا شويه شويه تصليح في البيت ، العمال بجوا الصباح و بمشوا بعد الضهر عشان كدا لمن أرجع ما بلقاهم ، طبعاً كلام قصي ما فارق عقلي لحظه ، بذات لمن قال لي انتِ بتحبيني !! لُمت نفسي و عاتبتها أشد العتاب و قلت كلو بسببي لأني أديتو وش و من هبالتي و تصرفاتي حس إني بحبو ، واحد غبي و متخلف ، أحب ليهو شنو !؟ لا لا أنا ما بحب ولا عايزا أفكر فيهو ذاتو ، قصي واحد متزوج ، إذا هو طلع تافه و خاين أنا مستحيل أكون زيو ، أنا حالياً فهمت الحاصل ، قصي لسه متحدي نفسو و مُصر إنو يوقعني في شباكو عشان يحس بالإنتصار ، بالجد واحد مريض ، و أنا المتخلفه أديتو وش و خليتو يساعدني لمن قعدت في بيتو و لمن شغلني هنا و لمن حل قصة عصام ، حسيت عقلي حـ يطق من كترة التفكير ، قمت من مكاني و طلعت إتوضيت و جيت صليت الضهر ، الساعه قربت تبقى 2 ، بعدها رقدت على السرير و بقيت أعاين للسقف و عقلي زي الطاحونه شغال تفكير ، كل ما أغمض عيوني بتذكر كيف كان قريب مني و الثقه القال بيها إني بحبو !!
فجأه كدا تلفوني رن ، لمن عاينت لقيتها طيف ، عملتو صامت و إتلفت على الحيطه ، شويه كدا لميس جات داخـله و قالت لي أمـي بتناديك ، قلت ليها جايه ، طلعت مـن الأوضه و مشيت ليهم في المـظله لقيت خالتي نجوى معاهم ، شكلها جات قبل شويه ، لمن سلمت عليها قالت الليله جايه بدري مالك ؟؟
قلت ليها خلصتي شغلي و أصلاً كنت مصدعه عشان كدا جيت طوالي ، كانت معاها بتها حنين ، قالت لي سرحيني قلت ليها أنا في نفسي عايزا زول يسرح لي ، لميس قالت ليها تعالي أنا بسرح ليك ، أمي كانت باشكه ملابس في السرير ، قالت لي تعالي شوفي الفساتين دي اشتريتهم ليكم امبارح ، ليك انتِ و لميس و أسيل ، اختاروا البعجبكم ، أسيل قالت ليها ما قصرتي والله يا عمتو ، لميس قالت عايزا الفستان المورد و أسيل قالت عايزا المخطط لأنو دا الوحيد المقاسو صغير يعني قدرها ، قلت ليها خلاص انا حـ أشيل الساده دا ، فستاني لونو زيتوني غاااامض و خامتو حلوهـ شديد ، خالتي قالت لي عااااد أمكن ما قصرت ، حنين قالت ليها و أنا يا خالتو ليه ما جبتي لي فستان زيهم ؟؟ نسيتيني ولا شنو ؟
أمي قالت ليها بري ما نسيتك والله ، دقيقه ، فتحت كيس و طلعت فستانين صغار و قالت ليها ديل حقاتك ...
طبعاً حنين فرحت شديييد و جات باست أمي ، أسيل قالت لـ لميس انتِ حـ تلبسي الفستان دا ولا الأدتك ليهو طيف ؟؟ خالتي قالت ليها طيف دي منو ؟ أمي قالت ليها دي صحبة مها ، ما شاء الله بت حلاااة الدنيا عليها ، كانت بتجينا طوالي ، خالتي قالت ليها ما حصل شفتها ، لميس قالت ليها محتاره والله ، الإتنين حلوات ، طبعاً لمن مشينا لـ طيف لمن كانت عيانه أدت لميس فستان ، كانوا بتكلموا عن ماركة فساتين مشهوره و لميس قالت بتحب الماركه دي و بتعجبها فساتينها فـ طيف قالت عندها منهم كتااار و أدتها واحد ، دا لمن قالت ليها أرح معاي أوريك ليهو و أنا كنت منتظراهم جنب الباب .....
أسيل قالت لينا حـ أقوم و أظبط ليكم جبنه كااااربه كدا ، خالتي قالت ليها اي عليك الله أنا جايه مخصوص لـ جبنتك السمحه دي ، قلت ليهم أنا ماشه ارقد شويه لمن تجهز الجبنه نادوني ، خالتي قالت لي تعالي ارقدي جنبي هنا أحسن ليك ، قلت ليها طيب و طوالي مشيت رقدت جنبها ، أمي قالت لي ما تشربي جبنه قبل ما تفطري ، قلت ليها والله انا شبعااانه ، أكلت قبل ما أطـلع من الشـركه ، بقوا بتونسوا و أنا ساكـته ساي و شاردهـ ما حسيت إلا لمن خالتي هزت رجلي ، وعيت على نفسي ، قالت لي سارحه وين انتِ ، الجبنه دي ما بردت !!
شلت كباية الجبنه و بديت أشرب منها ، لمن رفعت راسي لقيت أمي بتعاين لي ساي ، إبتسمت ليها بس و بعدها حاولت أشارك معاهم في الونـسه عشان شايفه أمـي مركزهـ معـاي شـديـد ، المهم بليل زي الساعه 9 كدا ناس أمي كانوا راقدين في الحوش و أنا راقده جوهـ براي ، كنت فاتحه اللابـتوب و شـغاله عليهو عشان ألهي نفسي و أوقف عقلي عن التفكير في الحصل قبيل في مكتب قصي ، المهم فجأه كدا أمي جاتني داخـله ، قالت لي عيونك دي ريحيها شويه ، ما معقوله تفكي التلفون و تمسكي اللابتوب ، قلت ليها ياداب الساعـه 9 عشان كدا ما جاييني نوم ، قعدت جنبي و ختت يدها على جبيني ، قالت لي في شي واجعك ؟؟
قلت ليها لا ، قالت لي طيب مالك مهمومه كدا ، من قبيل شايفاك ما تمام ، قلت ليها دا كـلو بسبب الشغل ، سكتت مسافه بعدها قالت لي لو في شي قولي لي ، إعتبريني صحبتك ، قلت ليها بس ماف شي ، قالت رغم إني حاسه إنو في شي بس حـ أمشيك لكن لو في حاجه حصلت معاك تعالي قولي لي ، هزيت ليها راسي بس ... و هي طالعه من الأوضه أنا كنت بعاين ليها ساي ، عمري ما حسيت بالإحساس الجاني لمن جات قعدت جنبي و سألت إذا حاصل معاي شي ، الطمأنينه و عدم الوحدهـ الحسيتو لمن كانت قاعدهـ معاي جديد علي و عمري ما حسيت زيو ، في الفترهـ الآخيرهـ أمي بقت تبذل جهد عشان تتقرب مني ، قبل ما أطلب حاجه بلقاها عملتها لي ، ملابسي مرات كتيرهـ بتغسلها و بتكويها لي ، بلقاها مطبقه جاهزه في الدولاب.....
المهم في اليوم البعدو أنا ما مشيت الشركه و ما كنت برد على إتصالات طـيف ، أمي بدت تتصل و تعزم أهلنا القراب لـ تخريج عبدالله أخوي ، طبعاً كذبت و قلت ليهم ماخدهـ كم يوم كدا إجازهـ ، أمي قالت لي اعزمي طيف و أهلها ، طبعاً أنا ما بقدر إتصل على طيف بعد تطنيشي لـ اتصالاتها و رسائلها ، ما متأكدهـ هي سمعت كلامنا أنا و قصي ولا لا بس انا خجلانه من نفسي و منها ، ما عـارفه كيف نفسي سمحت لي أعاين لـ راجل متزوج ، قلبي أناني شديد و كنت فاضحه نفسي و زي ما قصي عرف معناها طيف كمان حست ، قصي عايزا يستغل النقطه دي و يبذل أقصى جهد عشان يعلقني فيهو ، أنا خلاص فهمتو كويس بس مستحيل أسمح ليهو يتمادى أكتر .... أديت أمي رقم طيف و قلت ليها اتصل انتِ و أعزميها شخصياً ، شالت مني الرقم و إتصلت عليها و عزمتها هي و أهلها ، اتوقعت إنو طيف تسألها عني و تقول ليها إني ما برد عليها بس ما جابت سيرتي لأمي ، لحد اليوم التالت هي تاني ما إتصلت علي ، اليوم الرابع كان يوم تخريج عبدالله في نادي الضباط ، ما إتوقعتها تجي بس جات هي و أمها و دكتورهـ رانيا ، طبعاً لا عاتبتني لا جابت لي سيرة الموضوع ، سلمت علي عادي و بقت تتكلم مع أمي و عرفت أمي بـ أمها ، المهم طول التخريج طيف ما إتكلمت معاي ولا كانت قاعدهـ جنبي ، مشت قعدت جنب لميس ، طبعاً أمي و أبوي و خالتي و رجالها و معاهم عمتي و عمي و مرتو ، كانوا قاعدين في اتجاه تاني و باقي الناس و المعازم في اتجاه براهم ، طبعاً عزمنا ناس خالتو رقيه بس ماف غير عمو عادل راجل خالتي جا معانا ، المهم بعد انتهى موضوع التخريج دا كلو أمي و خالتو رشيدهـ أم طيف لمن طلعنا برا كانوا بتكلمو مع بعض ، أمي قالت ليها تعالوا زورونا في البيت ، خالتو رشيدهـ قالت ليها بنجي عليكم ان شاء الله ، طبعاً أنا و طيف واقفين معاهم لكن خالص ما إتكلمنا مع بعض و أنا ما كان عندي ليها تبريرات و هي ذاتا فهمت كدا عشان كدا قنعت مني و نحنا كلنا واقفين و كل اتنين بتكلموا مع بعض فجأه ظهر قصي في وشي ، عاين لي بطرف عينو بس و جا سلم على أهلي و بارك ليهم ، أمي قالت ليهو زعلانين منك ليه ما جيت حضرت التخريج ؟؟
قال ليها معليش والله بس كنت مشغول ، خالتو رشيدهـ قالت ليها قصي دا نحنا ما قاعد يفضى لينا ، شفت 24 ساعه في الشغل و معظم اليوم برا البيت ، أمي قالت ليها ربنا يوفقو ان شاء الله ، قصي ضرب طيف ضربه خفيفه على راسها و قال ليها اليوم مسجله غياب عن الشركه ! خالتو رشيدهـ ضحكت و قالت ليهو طيف دي جنها تتهرب ياها حركاتها ، أمي قالت ليها طيف براها ! فلانه دي ذاتا شايفاها اليومين ديل جرت واااطي و بقت تهرب من الشغل .... طبعاً قاصداني أنا ، قصي عاين لي بس ما قال حاجه ، دكتورهـ رانيا قالت ليهو يا قصي البنات ديل شكلهم مستغلين نقطة انك صاحب الشركـه 😂
أمي قالت ليهو عشااان كدا إلا تقسى عليهن و تعاملهن زي باقي الموظفين ، خالتو رشيده قالت ليهو ايييوه ، اوعك تخليهن على راحتهن يا قصي ، أنسى إنو دي أختك و دي صحبتها ، زي ما بقولوا أولياء الأمور للمدرسين : ليك العضم و لينا اللحمه ، طيف قالت ليهم بعد كلامكم دا انا حاساهو حـ يجيبنا الشركه من صلاة الصبح !! قصي قال ليها قريتي أفكاري ولا شنو !! قالت ليهو وااااي أنا منك والله بتعملها ، دكتورهـ رانيا قالت ليها انتِ الفترهـ دي الله نجاك منو ، مع الحبسه ما حـ تمشي الشركه ، خالتو رشيدهـ قالت لي أمي طيف دي بعد يومين حـ نبدها نحبسها و عرسها 15 الشهر الجاي و طبعاً معزومين و حضوركم بشرفنا والله ، أمي قالت ليها ألففف مبروك ليها والله و ربنا يتم ليها على خير و يسعدها ، أمي قالت كدا و ضمت طيف و باستها ، خالتو رشيدهـ قالت ليها الله يبارك فيك و عقبال البنيات ان شاء الله ، في اللحظه دي قصي عاين لي ، حسيت نفسي بردانه عديل ، طبعاً بعدها ودعونا و مشوا مع قصي ، أما نحنا كنا منتظرين عبدالله ، قال حـ يودع دفعتو و يجينا طالع ، انتظرناهو زي ربع ساعه كدا و لمن جا كل الناس ركبت الحافلات ، كنا جايبين حافلتين ما شاء الله كلهن كانوا مدفوسات ، الناس كانوا كتار....
تاني يوم برضو ما مشيت الشركه رغم إني كنت مفكرهـ أمشي و أقدم إستقالتي ، تاني قلت يمكن خلال اليوم دا يجيني خبر إنو تم فصلي من الشغل ، قلت خلاص ماف داعي أمشي و أتعب نفسي ساي مدام كدا كدا حـ اتفصل ، طبعاً لاحظت إنو أسيل دي من أمبارح زعـلانه ، لمن سألتها قالت لي مـاف شي ، المهم و أنا في المطبخ هي جات داخله زهجانه ، المرهـ دي نهايه ما سألتها ، سامعاها تطنطن سااااي بس نهاي ما قلت ليها مالك ، براها قالت لي الرجال ديل كلهم ما مضمونين ، قلت ليها البضمن الرجال يضمن المويه في الغربال ، قالت لي الواحد لو بقيتي ليهو زي النجفه برضو عينو ما حـ تتملي ، قلت ليها ما بملاها إلا التراب ، قالت لي كلهم كلاب ، قلت ليها و ما نافعين ، إتلفتت علي و قالت لي يعني لـ متين حـ تقعدي تتمي لي في الكلام و توافقيني الرأي !! عايزاك تقولي لي لا ما كلهم كدا ، عايزاك تقولي لي مثلاً عندك عبدالله أخوي ما حصل عاين لـ بت ، قلت ليها لو قلت ليك كدا حـ تصدقيني ؟؟
قالت لي أكيد لا بس في موقف زي دا أنا عايزا زول يواسيني و يفند كل الشكوك الفي راسي ! قلت ليها المرهـ لو حست إنو راجلها بخونها معناها فعلاً بخونها 💁
قالت لي الله يطمنك ، قلت ليها مالو عبدالله ، خانك مع منو ؟؟
قالت لي واااي منك بتقوليها بكل البساطه دي !!؟
قلت ليها طبيب قولي لي حاسه عبدالله بخونك ؟؟
قالت لي الله لا جاب الخيانه بس لصقة بت دفعتو الأمبارح ديك فيهو ماااا عاجباني ، ما شفتيها طول التخريج قاعدهـ جنبو كيف و لمن يقوم يرقص مع واحد من أصحابو بتقوم معاهو و بتاااع الكاميرا كأنو عايزا يحرق قلبي ، كل دقيقتين يجيبهم لي مع بعض ، حتى لمن يمشوا خلف الكواليس !! ياخ البت دي ما عندها أهل !! ما معقوله تلصق اللصقه دي كلها ، قلت ليها يمكن الموضوع ما زي ما انتِ متخيله !!
قالت لي أنا متأكدهـ إنو زي ما أنا متخيله و البت دي خاته عينها على أخوك ، نحنا بنات و بنفهم بعض و البت دي أنا متأكدهـ انها ما لاصقه سااااي كدا في أخوك ، أنا بستغرب كيف الوحدهـ بتخلي الشباب الحولينها ديل كلهم و بتخت عينها على واحد متزوج !! المتزوج دا حلاااتو شنو عشان تخلي العذابه و تعاين للمتزوجين....
طبعاً و هي بتتكلم أنا كنت بقطع في البصل و لمن قالت المقطع الآخير من دون ما أنتبه جرحت يدي بالسكين ، كلامها جاني في الجرح ، حسيت كأنو خنجر اتغز جوه قلبي ! كأنو الكلام دا إنقال لي أنا ....
قالت لي يا بت ما شايفه الدم دا !! سرحتي وين لمن جرحتي نفسك ، قلت ليهو ما مشكله ، قالت لي الجرحه دي كبيره والله ، عايني الدم سايل كيف ، أمي جات داخله و قالت لي مالا يدك ، قلت ليها دي السكين ، قالت لي أمشي غسليها و تعالي ، مشيت غسلتها و لمن جيتها الدم لسه كان بطلع ، عملت لي فيها شوية بن ، شلت السكين و كنت حـ أواصل شغلي ، أمي قالت لي خليهو بقطعو أنا ، أسيل قالت ليها أنا بقطعو ، قلت ليها لا انتِ أمشي شوفي قرايتك بـ وين و أنا و أمي حـ نعمل الفطور ، فجأه كدا جانا صوت حمودي و هو ببكي ، قالت لي قرايه مع حمودي دا ، مستحيييله ، أمي قالت ليها انتِ بس شدي حيلك ، المهم لمن جهزنا الفطور و ختيناهو أمي قالت لي أمشي نادي أسيل ، طبعاً عشان العمال قاعدين نحنا لابسين عبايات ، المهم اول ما وصلت باب الأوضه كدا جاني صوت عبدالله و هو بقول : اقسم بالله يا أسيل أشوفك لافه في الحوش دا 24 ساعه ما يحصل خير ، شيلي حمودي و أمشي أقعدي مع ناس أمي هناك في المظله ، قالت ليهو أنا قاعدهـ اقرا ، قال ليها أقري هناك بس ما تجي هنا ، ما شايفه العمال ديل !! قالت ليهو ما عندي بيهم شغله ، قال ليها أنا كلمتك و التوب الشفاف دا ما تلبسيهو لو لبستي عبايه أفضل ، قالت ليهو رايك شنو ألبس شوال ؟؟ قال ليها أفضل برضو ، قالت ليهو افضل شنو الدنيا براها مسخنه و أنا التوب دا ذاتو ما متعوده ألبسو و ما متعوده أقيد نفسي في البيت ، قال ليها هسي انتِ ما في بيتكم هنا غصب عنك حـ تتقيدي ، فتح الدولاب و جدع ليها طرحه و عبايه ، قالت ليهو اففف منك ياخ !!
دقيت الباب و قلت ليها اسيل قالوا ليك تعالي الفطور ، قالت لي طيب جايه ، طوالي إتحركت و مشيت ، رغم انهم مكابرين بس أنا حاسه انهم في الفترهـ الآخيره بقوا مركزين مع بعض بالذات عبدالله ، لو أسيل دي مشت بيت الجيران بجي يسأل بطريقه غير مباشره و بكون داخل و طالع كدا لحد ما هي تجي راجعه و عااااد لو اتأخرت ببقى زي البركان ، طبعاً بتحجج بـ حمودي و بشاكلها بحجة انها مشت و خلت حمودي مع إنو أمي بتكون ماسكاهو و مرات بكون نااايم ، طبعاً حركاتو كلنا فهمناها و عااارفين إنو غياب أسيل بفرق معاهو و هي كمان اليوم اثبتت لي انها بتغار عليهو بس اسيل ما زيو و ما اظن عندها مشكله تصرح بمشاعرها و غيرتها على راجلها ، أنا عبدالله مغرور و رااافع راسو فوق....
المهم في اليوم البعدو جاني إتصال من رقم غريب ، أول ما رديت جاني صوت قصي و هو بقول لي حالياً الساعه 7 ، قبل ما 9 تجي ألقاك في الشركه ، قلت ليهو حااااضر يا سيادة الرئيس ، قال لي دا ما هظار ، قلت ليهو استحاله يكون جد و كنت حـ اقفل الخط بس استعجل و قال لي تعااالي اليوم عشان تقدمي استقالتك ولا عايزا تواصلي شغل في الشركه ؟؟
قلت ليهو حـ أقدم إستقالتي أكيد دي ما عايزا ليها اتنين تلاته ، قال لي عشان شايفك طولتي ، قلت ليهو لأني كنت متوقعه يصلني خبر فصلي من الشغل و ما حبيت أمشي الشركه و اتعب نفسي ، قال لي حـ تضطري تتعبي نفسك و تجي ، قلت ليهو أصلاً دا.... ما خلاني أتم كلامي و طوالي قفل الخط في وشي !!
شوووف دا كمان ؟!
منو المفروض يقفل الخط في وش التاني !! أصلاً دا كلو بسببي مفروض من أول ما سمعت صوتو اقفل الخط أو من ما قلت ليهو حـ أجي و اقدم استقالتي مفروض طوالي اقفل الخط في وشو لأنو خلاص قلت العندي بس أنا بالجد متخلفه !! حسسني إني جاااريه وراهو و ميته عشان اتكلم معاهو !!
طوالي جهزت نفسي و مشيت الشركه .....
أقبَلني بالسَّواد الدائر حولَ عينّى، بمُلاحظتي للتَّفاصيل الصغيرة وتضخيمها، بمزاجي شديد التقلُّب، بأحاديثي المُثيرة للضَّجر بتعجرُفي وكبريائي الطفولي، بِخجلي الذي بلا سبب، بغيرتي ذاتَ الطَّابع الشَّرقي، بفلستفي البائسة والمتشائمة، أقبلني بأنانيتي التي تُريدك أن تكون لها، لها فقط
لكاتبه
يتبع.....
