أول ما وصلت الشركه كدا لقيت قصي قاعد في الإنتظار و خـالف رجل على رجل ، لمن شافني قال اووو الهكرز شرفت ، ما اشتغلت بيهو ، واصلت مشي ، أول ما طلعت المصعد اتفاجأت بيهو راكب معـاي ، قلت ليهو لاحقني ليـه ؟؟
قال لي لاحقك كيف ؟؟ المصعد دا مسجل بإسمك و ممنوع يركب فيهو زول غيرك ولا شنو ؟؟
ما رديت عليهو ، لمن وصلت الطابق التالت نزلت طوالي و إتحركت بس وقفت لمن جاني صوت قصي و بقول لي ضروري تقري الكلام دا ، لمن إتلفت عليهو لقيتو شايل ملف ، لمن وصلني طلع منو ورقـه و مداها لي ، كان فيها سياسة و قوانين الشـركه من ضمن الشروط أو القوانين دي إنو الموظف ما بقدر يقدم إستقالتو إلا بعد 6 شهور أو دفع غرامه ماليه و طبعاً المبلغ كان فوووق إستطاعتي و حتى لو معـاي مستحيل أدفع ليهم مبلغ زي دا عشان يقبلو إستقالتي !!
قلت ليهو بس أنا لمن وقعت و وافقت على الشروط دي ما كان في شرط زي دا !!
قال لي دي ما مشكلتنا والله ! الغلط غلطك لأنك ما قريتي المكتوب كويس و من دون ما تنتبهي وقعتي ! المهم ما علينا لو عايزا تقدمي إستقالتك قدميها طوالي بس ما تنسي تدفعي المبلغ دا خلال 3 أيـام عشان الشـركه ما تضطر تاخد معاك منحنى تاني ....
شـال مني الورقه و طوالي إتحرك ، قبل ما يمشي بعيد قلت ليهو الحضور في المواعيد من ضمن قوانين و ضوابط الشركه دي ،و أي موظف يغيب تلات أيام من دون إذن بيتم فصلو !! و أنا غبت أكتر من 3 مرات فـ ليه ما فصلتوني ؟؟
إتلفت علي و قال لي منتظرنك تقدمي إستقالتك عشان بس نشيل منك قروش ، قلت ليهو فعلاً دا الحاصل ، واضح انكم بتستغلوا الموظف أبشع إستغلال ، قال لي بالذات الموظفين الراسهم قوي و ما بنفع معاهم إلا العين الحمرهـ و الوش التاني ، قلت ليهو كل يوم بتسقط عن نظري أكتر !!
قال لي نظرك دا مكون من كم طابق !؟ معقوله لسه ما وصلت الطابق الأرضي !؟.... عاينت ليهو بغيييظ و مشيت من جنبو ، بقيت لافه و أنا بفكر اها حـ أعمل شنو !؟ اقدم إستقالتي و أدفع المبلغ الكبير دا ولا لا !؟
محـتارهـ و ما عارفه اعمل شنو و في نفس الوقت ما عايزا احسس قصي إنو قدر علي أو إنو قيدني ! ما عايزاهو يحس و لو شويه إنو غلبني و انتـصر علي ! ... و أنا حايمه كدا و بشاور في روحي إتلاقيت مع ندى و داليا ، سلموا علي و قالوا لي وووين مختفيه الأيام دي !! قلت ليهم كنت عيانه ، قالوا لي سلامتك ، ندى قالت لي لكن بيني و بينك كدا عيانه بالجد و لا عايزا تتحبسي مع طيف ؟😂
قلت ليها لا لا والله ما للدرجه دي ، داليا قالت لي أمبارح مشينا ليها و إتوقعنا نلقاك معاها بس ما جيتي ، ندى قالت لي معناها فعلاً عيـانه ، المهم نحنا ماشين الكافتيريا ، تمشي معانا ؟؟
قلت ليهم ايوهـ و طوالي مشيت معاهم ، لقينا سمير و شادي هناك ، لمن شافونا رفعوا لينا يدينهم عشان نجيهم ، المهم مشينا ليهم ، شادي أخد طلباتنا و مشى يجيبهم لينا ، سمير قال لي بديت أشك إنو الشركه حقت أبوك ، ضحكت و قلت ليهو ياريت ، قال لي يا زولـه غيابك كتر شديد !!
داليا قالت لي سمير دا أكتر واحد بسأل عنك ، قلت ليها كيف ما يسأل عني و أنا البساعدو في شغلو ، سمير ضحك و قال لي استروني ياخ و بالجد سؤالي ما سؤال مصلحه ، ندى قالت ليهو سؤال شنو مثلاً ؟! حب ؟!🌚
قلت ليها حب شنو ، شكلك بتحضري مسلسلات كتيرهـ ، ملاحظه ليك انك دائماً بتدخلي الحب فـي كل شي ، داليا قالت لي فعلاً ، ياخ امبارح في موظف و موظفه اتطاقشوا مع بعض من دون قصد و هو ساعدها لمن رفع ليها الأوراق الوقت فـ ندى قالت لي دي بداية قصة حبهم ، ياخ البت دي مهووسه لكن ضحكتني ضحك 😂😂
قلت ليها ظاهر عليها ، بتحب تألف قصص و سيناريوهات ، ندى قالت لي أنا خبرهـ في المجال دا و نظرتي ما قاعدهـ تخيب و نفس الموظفين ديل يا داليا و أمبارح شفتهم قاعدين براااهم في الكافتيريا ، اها كيف و كيف !؟
قلت ليها ما ضروري أي موقف يحصل بين بت و ولد يكون بدايه لـ قصة حب ، دي مجرد أوهام موجودهـ في عقول البنات بسبب المسلسلات و الأفلام و الروايات البقروها ، الوحدهـ بتصدق البتشوفو و البتقراهو و بتعتقد إنو نفس الموقف الحصل مع أبطال المسلسلات أو الروايات حـ يحصل معاها ... يعني حتى لو حصل دا ما معناهو إنو حـ ينطبق عليك نفس سيناريو القصه أو المسلسل ، فـ بس الناس تعيش الواقع و تطلع الأوهـام دي من بالها ، ندى قالت لي برررضو عند فِكري و متمسكه شديييد بأوهامي دي ، قلت ليها طيب على راحتك ، سمير قال لي بس في صدف كتيرهـ كانت بداية حب اتنين و إتوجت بالزواج ، قلت ليهو زي منو مثلاً ؟؟
قال لي عندي صحبي ، الصدفه جمعتو بـ وحده ، حباها و حبتو و إتزوجوا !! يعني الموضوع ايزي و ما حاجه مستحيله !!... فجأه ظهر شادي خت لكل واحد طلبو قدامـو و قال لـ سمير شنو الحاجه الما مستحيله ؟؟
سمير قال ليهو إنو اتنين يتلاقوا صـدفه و يحبوا بعض ، شادي ضحك و قال ليهو أنا شايفك الأيام دي ما براك ، شكلك واقع ليك وقعه سودهـ ، داليا قالت ليهو إتلاقيت صدفـه مع وحدهـ و حبيتها ولا شنو ؟؟
ندى قالت ليهو الصدفـه جمعتكم كيف ؟؟ اتطاقشتوا مع بعض ؟؟
ضحك و قال ليها عرفتي كيف ؟؟
التلاته قالوا ليهو يعني بالجد حابي ليك وحدهـ ؟؟ دي منووو ؟
قال ليهم روقوا يا شباب بهظر معاكم ، شادي قال ليهو بس شكلك دا ما شكل زول بهظر !
ندى قالت ليهو حلففتك يا سمير أحكي لينا الصدفه جمعتكم كيف ، داليا قالت ليهو اي عليك الله يا سمير ، أحكي لينا ياخ !!
قال ليهم غيتو انتوا !!!...
المهم يا شباب أنا كنت داخل الكافتيريا و هـي طالعه و بالغلط ضربت فيني و رغم إنو هـي الغلطانه بس اتزهجت فيني و طبعاً أنا كنت سارح فيها و ما إهتميت لـ نقطة انها غلطانه و بتشاكل فيني ، والله ما قدرت أرفع صوتي عليها ، البت سحرتني من أول نظرهـ ، شادي ضحك و قال ليهو باطل من يومك يا سمير ، داليا قالت ليهو واااي يعني البت معانا هنا في الشركـه ؟؟ شغاله في أي قسم و ليه ما عرفتنا عليها ، ندى قالت ليهو هسسسي دي تقوم تورينا ليها ، قال ليهم يـاخ انتوا ليه معاطين كدا !؟ البت من يومها ما لميت فيها تاني و ما بعرف شي عنها !!
داليا قالت ليهو واااي مبالغه !! ربنا يجمعك بيها لأنو واضح انها خطفت عقلك و قلبك ، قال ليها صدقتي ، ندى قالت ليهو ديك كانت أول حلقه من قصتكم عشان كدا أنا متأكدهـ انك حـ تلاقيها تاني و كتييير كمان ، قال ليها و أنا كمـان حاسي كدا و حاسي انها قريبه مني و شديد كمان ... ناس داليا قعدوا يتلفتوا يمين و شمال ، ندى قالت ليهو إتلفت معانا إحتمال تلقاها !!
قال ليها هي أساساً قدامـي ، داليا قالت ليهو شنووو ، قصدك منو ؟؟... ندى إتلفتت على البنات الورانا لأنو كان بعاين ليهم و قالت ليهو أي وحده فيهم ؟؟
قال ليها ولا وحدهـ أنا كنت قاصد إنو صورتها في عيوني و بتخيلها قدامي في كـل لحظه ، شادي قال ليهو لا لا يا صحبي انت حالتك بقت مستعصيه شديد و البت دي إلا نفتشها ليك........
طبعاً هـم بتكلموا و أنا مرهـ أعاين ليهم و مرهـ أعاين في تلفوني و أنا فطر سااااي ، شادي قال لي شنووو ياااا ما تقولي حاجه ولا ونستنا دي ما عاجباك !؟ ختيت تلفوني و قلت ليهو أبداً والله ، ندى لكزت داليا و قالت ليها شوفي داك منو ، كنت حـ أتلفت بس اول ما سمعت داليا قالت مستر قصي ما إتلفت ، ندى قالت ليها بقى يجي الكافتيريا ، زماااان نهاي ما بنشوفو إلا صدفه جنب المدخل أو في الإجتماعات ، داليا قالت ليها لا لا والله ، مستر قصي على طول بحوم و بلف الأقسام الفي الشركه كلها عشان يشوف الشغل ماشي كيف ، ندى قالت ليها ايوه بس ما كان يجي الكافتيريا على طول ! شادي قال ليهم المشكله وين !؟ ما كان بجي و هسي بقى يجي ، عادي !!
ندى طوالي عاينت لـ داليا ، شادي و سمير ضحكوا و قالوا ليها عارفنك عايزا تقولي شنو ، داليا قالت ليهم فعلاً أنا ذاتي إتوقعتها عايزا تقول شنو ، غيتو ندى دي ربنا يشفيها ، قلت ليهم ما فهمت عايزا تقول شنو ؟؟
داليا قالت لي عايزا تقول إنو احتمال مستر قصي حابي ليهو وحدهـ في الشركه هنا و يمكن هـي حالياً في الكافتيريا و بتجي ليها على طول عشان كدا هو هنا !
حسيت باللخبطه لمن هي قالت كدا ! تاني عاينت يمين و شمال و حسيت إني عايزا أتلفت عليهو و أشوف هو بعاين وين ! يمكن جد جد يكون في وحدهـ في حياتو !!... سمير قال ليهم بس انا على حد علمي هو متزوج !!
ندى قالت ليهو و يعني ؟؟ دا بمنعو يحب ولا بمنعو يتزوج تاني ! داليا قالت ليها بس هو لو بحب مرتو ما ظنيتو يعاين لـ وحده غيرها ! شادي قال ليها اسمعها مني نحنا الرجال المرهـ الوحدهـ ما بتملى عيونا حتى لو ما عرسناهم بنقعد نعاين ليهم كدا لحد ما نموت ، يعني الرجال مستحيل يكتفي بمرهـ وحدهـ و عينو ما تزوغ يمين و شمال ! سمير قال ليهو ما كل الرجال ، في نوع تاني بكتفي بـ وحدهـ بس بتمسخ عليهو باقي البنات بس مديركم دا شكلو عايز يلعب و يتسلى سااااي !
أنا حرفيـاً بعد كلامهم دا حسيت بـ حاجه واقفه لي في حلقي ، شربت شويه من البارد حقي و قلت ليهم عن إذنكم حـ أمشي بعد دا ، داليا قالت لي لسـه البريك ما خلص ، قلت ليها ايوه بس انا عندي شغل قبيل ما كملتو ، قالوا لي طيب حـ نلحقك بعد شويـه ، لمن إتحركت و وصلت باب الكافتيريا ، سمعت صوت سمير و هو بنادي علي ، لمن إتلفت عليهو لقيتو جاي علي ، طبعاً لمن قصي بعاين لينا ساااي بس ما عاينت فيهو كتير و أديتو إحساس إني ما شفتو ، لمن سمير وصلني مدى لي تلفوني و قال لي خليتو على الطاولـه ، قلت ليهو شكراً يا سمير ، قال لي ما عملت شي ، المهم أنا كمان ماشي أشوف شغلي فـ أرح ، أول ما طلعنا من الكـافتيريا كدا قال لي مدخل الكافتيريا ما ذكرك حاجه ؟؟ قلت ليهو حاجة شنو ؟؟ قال لي موقف أو أي شي المهم ما اتذكرتي ؟؟
قلت ليهو أبداً والله وريني انت !!
قال لي خلينا نمشي ، قلت ليهو لا قول لي مفروض اتذكر شنو !؟
قال لي بعد تقعدي مع نفسك براااك و تفكري بعمق و تتفحصي الكلمات و الجمل حـ تعرفي أنا قاصد شنو .... طبعاً الوقت داك أنا بالجد ما كنت فاهمه هو قاصد شنو أو عايز يوصل شنو ، مخي كان مقفول عديل و تفكيري في حاجه وحدهـ و هي هل أقدم إستقالتي و أدفع القروش ولا اضطر أتم الـ 6 شهور !!
المهم مشينا و باشرنا شغلنا لحد ما ديلك جوا و برضو واصلو في شغلهم ، في نهـاية الدوام اتخذت قرار إني أواصل في شغلي و أتم الـ 6 شهور دي اليمكن باقي منها زي 3 شهور كدا لأني اشتغلت في الشركه دي أكتر من شهرين ، المهم لمن طلعت برا الشـركه لاقيت سمير جنب الباب ، قال لي تعالي معـاي أوصلك ، قلت ليهو لكن.... قاطعني و قال لي مش ساكنه الشجرهـ ؟؟ يلا انا ساكن اللاماب ، طريقنا واحد أرح .... صراحـة ما عرفت اتحجج ليهو بشنو تاني !!... أول ما ركبت معاهو كدا و دور العربـيه تلفوني رن ، كان رقم موظفة الإستقبال ، لمن رديت عليها قالت لي الإدارهـ العليا طالبه تشوفك ، قلت ليها ليه في شنو ؟؟
قالت لي ما عندي علم ، قلت ليها طيب في أي مكتب ؟؟ قالت لي المكتب z ، قلت ليها تمام ، بعد قفلت منها قلت لـ سمير أقيف لي هنا راجعه الشركه ، قال لي ليه في شنو ؟؟ قلت ليهو ما عارفه بس الإدارهـ طالباني ، لف بالعربيه و رجعنا الشركه أصلاً ما مشينا بعيد ، لمن نزلت قلت ليهو أمشي ما تنتظرني يا سمير ، المهم ركبت المصعد و مشيت الطابق الآخير ، لمن وصلت المكتب و فتحتو ما لقيت زول ، قلت حـ أطلع اسأل أي زول أو أي سكرتيره ، أول ما إتحركت كدا قصي جا داخل ، قفل الباب و قال لي إجتماعنا لـسه ما بدا ، قلت ليهو بخصوص شنو ؟؟ قال لي لمن يجوا الباقين حـ تعرفي ، المهم عايزك تراجعي لـي الملف دا ، بقيت أعاين ليهو بس ، مسكني ليهو و قال لي بما انك قـاعده في الشركه للزمن دا معناها شلتي فكرة تقديم الإستقالة من بالك ، قلت ليهو كلها 3 شهور بعدها حـ اتفكفك من الشركه دي ، قال لي للزمن داك الله كريم ، المهم راجعي لي الملف دا ، قلت ليهو ، الملف دا ليهو علاقـه بالإجتماع الحـ يحصل بعد شويه ؟؟
قال لي ايوه ، قلت ليهو تمام إتحركت عشان اطلع بالملف وقفني و قال لي وين وين !؟ أقعدي راجعيهو هنا ، الجماعه ديل هسي حـ يجوا ، المهم قعدت و بقيت أراجع في الملف و هو حايم في المكتب و كل دقيقتين بمشي يقيف في واجهة القزاز و يعاين لـ تحت ، قلت ليهو انت مراقب زول ولا شنو ؟؟
قال لي لا ...
المهم واصلت شغلي و قرايتي للملف ، لمن خلصت قلت ليهو راجعتو و بعداك ؟؟
قال لي لمن نبدا الإجتماع ، بقينا قاعدين و منتظرنهم يجوا ، قلت ليهو اتأخروا ياخ ! قال لي فعلاً لكن خلي عندك صبر !!....بقينا الإتنين ساكتين ، كسر الصمت و قال لي متين ناويـه ترجعي لي حسابي يا حضرة الهكر !! قلت ليهو لمن مزاجي يحكم ، قال لي مزحتك ما كانت ظريـفه خالص 😊
قلت ليهو الغش حار صح ؟؟
قال لي أنا كلمتك و قلت ليك ما كنت عارف إنو دي إنتِ ! قلت ليهو لو أنا لو غيري في النهايه دا غش و نفاااق ، بترضى حاجه زي دي لـ طيف أختك ؟؟ بترضى ينلعب بيها ؟؟
قال لي الكلام دا ما هسي ياخ !!
أنا هسي ما بالسوء دا و مستحيل أفكر أعمل الكنت بعملو زمان ، حاجات كتيرهـ كعبه أنا بطلتها لأني وعيت على نفسي و فهمت إنها غلط و لو ما كان عرفت وعيت على نفسي ما كان إعترفت بأغلاطي !!.... قلت ليهو والله كتر خير شجن الغيرتك ، قال لي شجن ما ليها عـلاقـه بالتغيير دا ، في فرق بين لمن تتغير بسبب زول و لمن تتغير لأنك عايز تتغير ، لأنك حسيت بالمسؤوليه و لأنك عرفت الصح من الغلط ، قلت ليهو برضو دا ما بمحي إنو شجن ليها الفضل الكبير ، العرس نفعك والله ، قال لي عشان كدا مفكر أعرس تاني ، عشان المنفعه تزيد ، قلت ليهو شجن دي شكلها مسكينه عشان كدا حاااقر بيها و ناوي تدبل فيها ، قال لي يعني ما عايزاني أعـرس فيها ؟؟
قلت ليهو of course .... لأنو الضُر حاااار و مـاف مرهـ بترضى بالحاجه دي ، قال لي امممم يعني الواحد عشان مرتو ما عايزا الضره مفروض يمتنع عن عدم الزواج مرهـ تانيه ؟؟
قلت ليهو هو أصلاً من البدايـه ليه معرسها لو حاسس إنو ما حيكون مرتاح معاها ؟! ليه من البدايه ما مشى و عرس العايزها بديل ما يجيبها فوقها ؟؟
قال لي طيب يعمل شنو لو كان بحب مرتو الأولى دي بس مع الزمن اكتشف انهم ما متفقين ولا ممكن يتفقوا و حبهم لبعض ما قدر يشفع ليهم قدام مشاكلهم الكتيرهـ !؟ يعمل شنو إذا هو و هي وصلوا لطريق مسدود و اتأكدت تماماً أنهم ما ممكن يكملوا مع بعض و لو كملوا حـ يكملوا زي الغرباء و مـاف واحد عندو حاجه عشان يقدمها للتاني ، رصيدهم من الحب و الشوق كـلو خلص بسبب مشاكلهم الكتيرهـ !!
طبعاً بقيت أعاين ليهو بإسـتغراب !!
قلت ليهو يا قصي.....
جاني قريب و قعد في الكرسـي المقاصدني و قـال لي يا مها أنا و شجن ما مرتاحين ولا متفقين مع بعض ، ما عارف كيف بس بقى ما عندي ليها حاجه ، كل الحب الكنتو بحبو ليها بقى في مهب الريح ، بسبب مشاكلها و جوطتها الكتيرهـ و عدم إحترامها لي و لناس البيت أنا بقيت ما بطيق أقعد معاها في بيت واحد ، معظم وقتي بقضيهو في الشركه و مرات بمشي على بيتي الفـي أمدرمان ، في البدايه افتكرت إنو بعدي عنها حـ يعذبها بس اكتشفت إنو وجودي و عدمو ما فارق معاها !! اكتشفت إني ما مهم بالنسبه ليها يا مها ، بعد حبي ليها دا كـلو هي ما عندها لي حاجه و ما خاته لي ذرة إحترام و ما مستعده تتنازل عشـاني 💔
شجن أنانيـه شديد ، ما خاته لي إعتبار و ما محترمـه مشاعري ، أنا غضيت نظر عن تـصرفاتها دي كلها و اتأقلمت معاها و كنت بحاول قدر الإمكان ما أخلي الفجوهـ البيناتنا تكبر حتى و هي غلطانه أنا بجي و اعتذر منها و ما كنت بخلي مشاكلنا تستمر يومين ، نهاية كل نقاش بيناتنا بكون بإعتذار مني و دا الخلاها تتمادى أكتر ، أنا إتوقعت منها كـل شي إلا إنو هي تختار سعادتها و شغلها على سعادتي و سعادة أسرتي ، اتخيلي إنها كانت بتاخد حبوب منع حمل و لو حملت بتجهض عن قصد كل عـشان بس تواصل شغلها !! عـارفه إنها عشان تكون مودل و جسمها منسق بتجهض !! كانت بتكذب علي و تقول انو الإجهاض حـصل بدون قصد ، مع إني كنت شاكي بس صدقتها لحد ما يوم سمعتها بتتكلم مع صحبتها و بتحكي ليها عن قصة إجهاضاتها المستمرهـ ، مرهـ كذابه و أنانيه زي دي أنا حـ استمر معاها كيف ؟؟ لمن واجهتها ما حاولت تكذب ولا فكرة تبرر لي !! قالت لي أنا ما جاهزه لـ ولادهـ حالياً !! و لو الحاجه دي مضايقاك طلقني !!
يعني اتخيلي انا المضرر و انـا الصابر و أنا البسامح و أنا البغض نظر عن تصرفاتها الغلط و فوق دا كلو ما فكرت تعتذر أو تبرر لي ! بكل وقاحه قالت لي طلقني لو الوضع ما عاجبك !! يعني أنا المفـروض أقنع منها و أجيب ليها سيرة الطلاق ! في الفترهـ الآخيرهـ بقت تفتعل مشاكل من مـاف عشان تزهجني أكتر و على طول ماسكه لي سيرة الطلاق 💔
طبعاً كنت ساكته و مستغربه في نفس الوقت و مـا عارفه اقول ليهو شنو و أصلاً هو ليـه حكى لي مشاكلو مع مرتو !!... سكت و بقى يعاين لي ، يمكن منظر مني أقول حاجه و أنا ما عارفه أقول ليهو شنو أساساً !!
قال لي آسف لو عملت ليك وجع راسها بكلامـي ، قال كدا و وقف على حيلو و إتحرك من قدامي ، مش وقف قدامي شبابيك القزاز و دخل يدينو جوهـ جيوبو و أداني ضهرو ، كنت بفكر في كلامـو و حسيت إنو مقهور شديد و صابر على مرتو ، البشوفو ما بقول الزول دا بعاني شديد من مرتو و ما بقول إنو في مشاكل كتيرهـ في حياتو 💔
بـعد صمت دام زمن طويـل قلت ليهو ناس الإجتماع ديل ما جاين ، أخد مسافه بعدها من دون ما يتلفت علي قال لي شكلهم ما جاين ، لو عايزا بتقدري تمشي ، ما متأكدهـ بس حسيت إنو حكى لي عشان أواسيهو ، حسيت إنو منتظرني أقـول ليهو حاجه ، للحظات إتعاطفت معاهو و في إحساس إتحرك جواي بس تاني لمن اتذكرت كذبو و نفاقو لمن مثل علي إنو دكتور نفسي قلت يمكن دي برضو تمثيليه منو ! لو بالجد مشاكلو مـع مرتو وصلت للدرجه دي ليه ما طلقها و هـي طالبه الطـلاق !!
قلت عايز يختبرني و يديني إحساس إنو حـ ينفصل عن مرتو عشان اتعشم فيهو ، زي ما قال سمير قبيل ، شكلو عايز يتسلى و يلعب ، مشيت عليهو و لـمن وصلتو قلت ليهو مـاف بيت بكون خـالي من المشاكل و انتوا ما أول زوجين تحصل معاهم مشكله زي دي ، شجن شايفه إنها ما بتقدر تحمل هسي عشان شغلها طيب ممكن تقعد معاها تشرح ليها رغبتك و وجهت نظرك و تديها إحساس انك متفهمها و حاسي بيها و عارف أهمية شغلها بالنسبه ليها ، صدقني لو حسستها إنو رغبتها بتهمك براها حـ تتراجع و تتنازل .... من دون ما يتلفت علي قال لي بنهرهـ أطلعـي برا .... طبعاً إتخلعت و للحظات حسيت إني سمعتو غلط ، إتلفت علي و قال لي ما سمعتيني قلت شنو ؟؟ اتفضلي أطلعي برا 😊
طبعاً اللحظه ديك شميتو شّمه و زعلت زعل ما عادي ، قلت ليهو كويـس حـ أطلع برا و تاني إياك تعارض طريقي و إياك تحكي لي مشاكلك و بتمنى ما أتواجد معاك في نفس المكان و خلقتك دي ما عايزا أشوفها تاني ، طبعاً ليك حق تزعل عشـان خطتك ما ظبطت ، كنت عايزني أتعاطف معاك و اصدق خرافة إنو في خلافات بينك و بين مرتك عشان تخليني اتعشم فيك و كلو عشان تكمل البدايتو في الفيس بإسم دكتور خالد ، شكلك مهوس حاجه إسمها تحدي ، أنا شايفه إنو المفروض تمشي تتعالج و ربنا يشفيك ...
عاين لي بإستغراب بعدها نظرات الإستغراب إتبدلت لـ نظرات حادهـ ، قال لي والله ما عارف اقول ليك شنو !! بالجد كنت مفكرهـ كدا ؟!
ياخ انتِ متأكدهـ إنو عندك عقل !! كيف يعني أمثل عليك عشان أخليك تتعشمي فيني ؟؟ لو براك متعلقه فيني يا استاذه دي ما مشكلتي والله ، ما ترمي اللوم علي و تقولي إني بحاول أعلقك فيني !!
ربعت يديني و قلت ليهو طيب أشرح لي ليييه حكيت لي مشاكلك مع مرتك ؟؟ و بعدين أتعلقك فيك شنو !! انت بالجد ما يا قصي ! عندك مرضه اسمها البت تتعلق بي !!
قال إذا حكيت ليك حاجه مضايقاني معناها إني بحاول أعلقك فيني ؟؟ الفي قلبو حرقص براااهو برقص !!
طبعاً طبعاً غاظني لأنو في كل مرهـ بقلب الطاوله و بطلعني أنا الجاااريه وراهو !!
قلت ليهو على فكرهـ انت الجاري وراي و بتحاول تعمل المستحيل عشان تخلق مواضيع معاي و بتلاحقني وين ما أمشي و بتلمح لي كمان و لمن نويت أقدم إستقالتي طلعت لي بشرط تعجيزي و كلو عشان تخليني أقعد فـي الشركه !!
ربع يدينو و قال لي ما شاء الله ، تأليف جد !!
قلت ليهو يعني دا ما انت الأداني ورقة شروط و قوانين الشركه و قال لي لو عايزا تقدمي إستقالتك مفروض تدفعي مبلغ ؟؟
إبتسم و قال لي ليه انا حاسس انك متمنيه يكون في شي بيناتنا !؟
قلت ليهو عليك الله تف من خشمك ، انت بالنسبه لي مديري في الشركه و أخوي صحبتي و بسسسس ، .... قعد يعاين لي جوهـ عيوني و على وشو مرسومه إبتسامة سخريـه !!
جهجهني طبعاً ، كأنو بقول لي والله كذابه ، قلبي اشتغل زي الدلوكه ، و عشان أقوي موقفي ، قلت ليهو و عشان أريحك من الكلام الفارغ دا كلو ، أنا مرتبطه ، قال لي والله ! إلا كان مرتبطه بزول في مخيلتك !
قلت ليهو أنا ليه حاسـه انك خاتيني هدف في راسك و عايز بأي طريقه تلفت نظري و تخليني اتكلم معاك !!.... قبل ما يقول حاجه تلفوني رن ، لمن عاينت لقيتو سمير ، قلت سبحان الله كأنو عرف إني بفكر فيهو ، مشيت بعيد من قصي و رديت ، قال لي ما قربتي ؟؟ قلت ليهو شنووو يعني ما مشيت انت ؟؟
قال لي ما مشيت والله قلت انتظرك ، قلت ليهو بتبالغ يا سمير ، قال لي حسيتها ما حركه ظريفه أمشي و أخليك بعد ما كنتِ راكبه معاي ، قلت ليهو بتبالغ والله ، اتأخرت عليك شديد ، قال لي لو خلصتي تعالي ، قلت ليهو ايوه خلصت هسي حـ أطلع ، قفلت منو و إتحركت على تربيزة المكتب و شلت شنطتي ، ابتسمت و عاينت لـ قصي و قلت ليهو الزول المرتبطه معاهو في خيالي منتظرني برا ، يلاااا " أو غوفواغ_ Au revoir " *إلى اللقاء *...
خليتو واقف و طلعت ، طبعاً أنا بكرهـ كلمة إرتباط دي ولا بحب يكون في علاقه بيني و بين ولد و ما بحب اتعامل معاهم كتير بس اضطريت أكذب على قصي و اقول حاجه أنا لا بحبها لا حصل عملتها و أساساً ما بشجع عليها ، المهم لمن طلعت برا الشركه قلت ذاتو سمير دا منو القال ليهو ينتظرني !!
طلعت و حاولت أتزاوغ منو بس شافني و ناداني ، لمن وصلتو جنب عربيتو رفعت راسي فوووق و حسيت إنو ممكن قصي يكون شايفنا ، المهم ركبت معاهو و إتحركنا ، طول الطريق كان بفتح معـاي مواضيع و بونس فيني قدرتو و أنا بس بتكلم لمن يسألني و لمن أحس إنو سكاتي طال ، المهم وصلني بيتنا ، قلت ليهو اتفضل معاي و انا من جواي بقول ان شاء الله يرفض ، ابتسم و قال لي المرهـ الجايه ان شاء الله !!
المهم لمن دخلت البيت لقيت أمي بتسقي في الشتلات ، طبعاً أنا كل يوم بوصيهم عليها ، البيت كلو مليتو شجر ، بعد سلمت عليها دخلت جوهـ.....
في اليوم البعدو مزاااج مني ساي ما مشيت الشركه و بدلها قررت أمشي لدكتورهـ رانيا في عيادتها ، بقيت متابعه معاها و لو ما مشيت ليها بتواصل معـاها في الواتس و قلت بعدها حـ أمشي أزور طيف ، ما عـارفه حـ أبرر ليها كيف أو اقول ليها شنو بس شينه في حقي لـو ما مشيت ليها ، المهم المرهـ دي لمن قعدت مع دكتورهـ رانيا قالت لي حـاسه إنو عندك كلام كتييير عايزا تقوليهو ، قلت ليها فعلاً بس ما نفسي أقولو ، قالت لي عايزا ترجعي تكتمي تاني ؟؟
قلت ليها لا بس الموضوع دا بضايقني و كمـان معقد شديد ، قالت لي عشان كدا الأحسن تحكي و تريحي نفسك و أفكارك ، قلت ليها ما عارفاك حـ تفهميني ولا لا بس انا ما راضيه اتكلم لأني زعـلانه من نفسي و في نفس الوقت ما قـادره افهم الحاصل ، قالت لي أحكي ، قلت ليها صدقيني لو عرفتي حـ تضايقي مني و يمكن صورتي تبهُت قدامك ، ضحكت و قالت لي للدرجه دي ؟؟
ليـه عملتي شنو انتِ ؟؟
قلت ليها ما نفسي أحكي و في اللحظه ذاتا الكلام واقف لي في حلقي و عقلي حـ يطق من كترة التفكير !! قالت لي ثواني ، فتحت الدرج و طلعت قماشه سوداء ، لفتها حولين عيوني و قالت لي زي ما بقول ليك كـل مرهـ اتخيلي انك بتتكلمي مع نفسي ، اعتبري صوتك الخارجي هو صوتك الداخلي ، أرخي أعصابك و أخدي نفس عميق و صفي دهنك و إتكلمي بكل أريحيه و أنسي إني موجودهـ هنا ، قلت ليها طيب ...
عملت زي ما قالت لي ، أخدت نفس عميق و إسترخيت ، قلت ليها ما عـارفه أبدا من وين أو اقول شنو .... ما اتكلمت معاي ، اتنهدت و شلت القماشه عن عيوني و قلت ليها أنسي الموضوع ، قالت لي ما تخلي حاجه تكون واقفه ليك في حلقك ، ما تكتمي كلامـي ، اتكلمي طلعي الجواك ، طقطقت أصابعي و قلت ليها في واحد .... قالت لي أبسط ليك الموضوع ، حسب القدرت استنتجو من حالتك دي و بما انك قلتي في واحد ، معناها أنتِ واااقعه في الحب ، قلت ليها لاااا ، قالت لي إعجاب!! قلت ليها لاااا
قالت لي اها شنو يا مها !! قلت ليها والله ما عـارفه بس انا ما عايزا أحب ، ما عايزا مشاعري تتحرك تجاهـ أي زول بالذات الراجل دا ، بس بقيت حاسه إني ما قـادره اتحكم في نفسي لما أشوفو ، مع إني بكون مخططه إنو اضبط نفسي و ما أديهو وش أو أوقف تعاملي معاهو بس اول ما يبدا يتكلم معاي بلقى نفسي بسمع ليهو لا و كمان بتكلم معاهو ، يعني أنا قدامو بكون زي الزول المنوم مغنطيسياً !!
قالت لي طيب يا مها انتِ ليه عايزا تمنعني نفسك منو ؟؟ يعني هو ما ببادلك بنفس الإحـساس ؟؟
قلت ليها ما متأكدهـ ، مرات كتيرهـ بحس إني بهتم بي و كتير كان بلمح لي و وين ما أمشي بلقاهو في وشي و كمان بخترع حجج عشـان يتكلم معاي و مرهـ عديل قال لي انتِ بتحبيني و كان مبسوط من الحاجه دي !!
قالت لي و هو ما قال ليك حاجه ؟؟
قلت ليها لا ما قال و صراحة أنا ما عايزاهو يقول و ما عايزاهو يحس بالمشاعر دي ، لو في شي جواي ليهو حـ أدفنو في مكانو ، لأنو دا غلط و ما ممكن إنو نحب بعض ، قال لي لييييه ؟؟ المانع شنو ؟؟.... ما تقولي لي عشان حاسه بالذنب بسبب تامر ربنا يرحمو !!... عايني يا مها الحياة دي ما واقفه على زول ، بموتوا آلاف الناس و الحياة بتستمر ، عدم زواجك و حبك لـ زول تاني ما بيعتبر وفاء لزوجك والله ، دي سنة الحياة و صدقيني لو كان حاصل العكس تامر برضو كان حـ يتزوج و يواصل حياتو ، انتِ لسه صغيره و في ريعان شبابك عشان كدا ما تظلمي نفسك و تحرميها من الزواج و ونِس الزوج ، صدقيني صعب الواحد يعيش حياتو وحيد....
قلت ليها عـارفه ، دا سبب بس تاني في سبب .... و هو إنو الراجل دا متزوج ، سكتت مسافه بعدها قالت لي هو بحبك ولا لا ؟؟ قلت ليها ما بقدر أجزم ليك بس حتى لو حباني حـ ارفضو ، ما بقبل أشاركو خيانتو لـ مرتو ، ما حـ اقبل يخرب بيتو بسببي ، قالت لي لو هو زول جادي و جا و أتقدم ليك دي ما تعتبر خيانه ! من حقو يعدد !!
قلت ليها صدقيني الموضوع معقد شديد و أنا أصلاً خلاص اتخذت قراري و ما عايزا ادخل نفسي في حتات ضيقه ....
بعدهـا غيرنا الموضوع و حكيت ليها تفاصيل تانيه ، قالت لي انتِ قاعدهـ تستخدمي الحبوب الوصفتها ليك ؟؟ قلت ليها ايوه و خلصتها امبارح ، قالت لي كويس شديد ، أنا ملاحظه انو في تحسن و تغيير في نفسيتك ، قلت ليها و أنا كمان بس عندي سؤال ! الحبوب الكان بديني ليها عصام في المصحه قريبه من الحبوب دي ، ما ركزت في إسمها ما عارفه إذا انتِ متذكراها أو لا ، قالت لي متذكراها ، ديك حبوب بتتأخد للإكتئاب ، قلت ليها ما كنت ببلعها على طول إلا لمن يكون عصام واقف في وشي ، عشان ما بثق فيهو أي حاجه منو بشك فيها و ما باخدها ، قالت لي ليك حق ، براك شفتي في النهايه طلع شنو .... المهم اتكلمنا شويه و كلمتها إني حـ أمشي أشوف طيـف ، قالت لي أنا كمان طالعه بعد شويه ، انتظريني قلت ليها تمام ، طلعت و مشيت قعدت برا في الإنتظار ، طبعاً المصحه قفلوها عشان كدا دكتورهـ رانيا بقت شغاله في العيادهـ دي فقط ، على سيرة عـصام سألت نفسي لمن أنا هربت هو عرف مكاني وين و جا ساقني ؟!!... تاني اتذكرت هو طلع شنو في النهايه ، أكيد زول زي دا و وراهـو ناس كبيرهـ داعماهو ما بغلبو يفتش علي و يلقاني .... إتمنيت إنو عصام ما يظهر في حياتي تاني ... غمضت عيوني و قلت ان شاء الله يختفي من الوجود الراجل الكريـه دا ....
فتحت تلفوني و دخلت الواتس ، رغم إنو ما فيهو شي غير قروبات ناس الشركه ، المهم رسلت لـ طيف في الواتس و قلت ليها كيفك ، مشتاااقين والله .... شكلها ما فاتحه الشبكه
طبعاً عـارفه إنو المفروض اتصل عديل بس جات كدا و حسيت إني مُفضله فكرة الرساله على المكالمه ، طبعاً انتبهت إنو قصي رافع استوري و طيف كمان عامله إستوري ، فتحت إستوري طيف كاتبه كلام حب و كدا ... بعدها طوالي إستوري قصي ، خاتي صورتو و كاتب : أخبروها أن لو كان لي ألف قلب لأحببتها بكل قلب ألف مرة 💜
قلت في سري حركاااات ...
صورت نفسي و لأول مرهـ بعد زمن طوييييل ، رفعت إستوري و كتبت عليها : " ملأتْ السعادةُ قلبي مـنذ أن إلتقيتُ بـك "
طبعاً ما تمت دقيقه لقيت قصي شافها ، إنتظرت شويه بعدها رفعت إستوري غيرها و كتبت فيها : " M & S " كـم وددتُ أن اخبرك منذ أول وهلة و أول لقاء أني مغرمة بك ، لو تدري كم أودُ الإعـتراف 🌷
برضو قصي شافها ، المرهـ دي رد علي و قال لي حركاااات بايخه و أنا متأكد إنو مـاف زول فـي حياتك ، قلت ليهو مالك مركز معاي ؟؟ بطل تطفل و خليني في حالي ، قال لي ما قصدي اتطفل بس بالجد بشمئز لمن أشوف كذب و تمثيل زي دا !! قلت ليهو يااااخ انت مالك ؟؟ ليه موجود إني مرتبطه دا مضايقك ؟
قال لي اتضايق ليه ؟؟
قلت ليهو اسأل نفسك ! ما ملاحظ انك متدخل في حياتي بدون سبب و من دون أي حق !!
قرا رسالتي بس ما رد عليها ، حسيت إني عايزاهو يرد و عايزا اقعد اتكلم معاهو كـدا .... تاني وعيت على نفسي و قلت انتِ هبله ولا شنو يا مها !!؟ تصرفات زي دي ما بتليق فيني ، طوالي مشيت و حذفت الإستوريهات ، بعدها بمسافه دكتورهـ رانيا جات طالعه ، المهم ركبنا سوا و مشينا بيت ناس طـيف ، لقينا معاهم بنات أهلهم و بـيتهم مليان ، طيف لمن شافتني سلمت علي عادي !!
صراحـة إنصدمت ! ايوه انا عارفـه إنو تصرفي ما كان سليم و إنو مهما يحصل بيني و بين قصي ما مفروض أفصلها منها خاصة إنو هي ما عارفه !!
كنت مفتكرهـ إنو جيتي حـ تفرحها و إنو أول ما أعتذر منها حـ تقبل إعتذاري و ترجع تتعامل معاي عادي ! بس دا كلو ما حصل و هي أساساً ما أدتني وش !! بعد ما ضيفوني بقيت قاعدهـ و ساكته و طيف بتتونس مع بنات جيرانها و بنات أهلها ، خالتو رشيدهـ جات سلمت علي و قالت لي والله امبارح و القبلو سألت منك طيف ، قلت ليها غريبه مها ما جات ، قلت ليها كنتِ عيـانه ، قالت لي سلامتك يا بتي ، أنا ذاتي قلت كدا ، كما الشديد القوي كنتِ حـ تجي من أول يوم ، المهم خالتو رشيدهـ نادت وحدهـ من بنات أهلها و قالت ليها عليك الله يا وداد أعملي لينا جبنه كااااربه كدا ، وداد قالت ليها حاضر يا خالتو ، وحدهـ تانيه قالت ليها ما تنسي يا ودو في كيك جيبي لينا معاك ، قالت ليها تمام تمام و مشت .... طبعاً النسوان الكبار كانوا في الهول تحت و نحنا البنات في غرفة طيف ، طبعاً طيف سفهتني سفهه ما عاديه ، حسيت إني صنم أو مختفيه ! مـاف زول عبرني ! طيف كانت بتعاين ليهم كلهم و تتونس معاهم إلا أنا ! غير سلمت علي ما قالت لي شي تاني !! بالجد حسيت بالإهانه و حسيت اني متواجدهـ في مكان ما مرغوبه فيهو ، ايوه طيف ليها حق تزعل مني بس التصرف دا ما حلو و أنا ما بحب التجاهل بالذات لو كان قدام الناس ، حسيت نفسي وحدهـ متطفله قاعدهـ في نصهم ، فجأه تلفوني رن ، كانت خالتي ، شلت التلفون و طلعت برا ، لمن رديت عليها قالت لي وين انتِ ؟؟
قلت ليها في بيت ناس طيف !.... كان في صوت جوطه و كواريك حولينها ، قلبي قبضني بالجد !! قلت ليها بخلعه في شنو يا خالتي ؟؟ ديل منو الببكوا ؟؟
قالت لي كلنا في بين ناس حبوبه آمنه ، قالوا عصام دا إتوفى ، غيتو ما متأكدهـ لكن دا السمعناهو و عمران و عادل ما فهمونا شي طلعوا مشوا و لحد اللحظه لا جوا لا ردوا على تلفوناتهم !!... طبعاً إتخلعت !! قلت ليها متين الكلام دا و انتوا منو القال ليكم كدا ؟؟
قالت لي علياء دي بالصدفه سمعت عمك عمران بتكلم مع عادل في الشارع و من هناك بدت الكواريك لمن لمتنا كلنا ، هسي كلنا متلمين في بيت واحد و منتظرين ناس عمك عمران ، قلت ليها ربنا يستر ، بعد شويه حـ أجي ، قالت لي كويس ، قفلت منها و أنا لسه بحاول استوعب في السمعتو !! معقولـه عصام مات !!
نزلت تحت و قلت لـ خالتو رشيده أنا حـ أمشي بعد دا ، هي و دكتورهـ رانيا و حبوبتهم الزهراء حلفوا و قالوا لي إلا تشربي الجبنه ، قلت ليهم مرهـ تانيه يا جماعه ، قالوا لي لا لا ماشه مننا سريع ليه ؟؟
قلت ليهم والله ناس البيت اتصلوا علي و قالوا عايزني ضروري ، خالتو رشيدهـ قالت لي ليه في شنو ان شاء الله كلهم كويسين ؟!!
قلت ليها ما عارفه الموضوع ، إلا أمشي و اتأكد ، قالت لي سمح لمن تصلي طمنينا على ناس بيتكم ، قلت ليها حاضر ، ودعتهم و طلعت مستعجله ، إتلاقيت مع قصي جنب الباب بس لا اتكلمت معاهو لا اتكلم معاي ، لمن وصلت حينا لقيت الناس داخلين و طالعين من بيت حبوبه آمنه يلي هي أم عصام ، لمن دخلت لقيت أخواتو ديل يبكوا سااااي و الجارات يحنسوا فيهم ، شفت ناس أمي وين و مشيت قعدت معاهم ، قلت ليهم بصوت واطي يعني هسي إتوفى ولا لا ؟؟
أمي لكزتني و قالت لي هوووس ، فجأه جا سامر داخل ، حبوبه آمنه جرت عليهو و قالت ليهو برد قلبي على ولدي يا سامر ، قول لي إنو حي ، قال ليها والله ما عارف اقول ليك شنو يا حبوبه !! لا أبوي لا عمي بردو على تلفوناتهم !!
تاااني قعدوا يبكوا و ملوا البيت صريخ ، قعدنا معاهم لحد ما بعد العصر بس ماف أي خبر ، أمي قالت لي انتِ و لميس و أسيل أمشوا البيت ، لو حصل شي تعالوا راجعين ، قلت ليها طيب لأني فترانه ، المهم قمنا و مشينا البيت ، بعدها بشويه أمي جات لاحقانا قالت لينا حـ أعمل الغدا ، قالت لـ لميس أبوك قال ليك شنو لمن اتصلتي عليهو ؟!؟
لميس قالت ليها ما قال لي شي غير إنو ماشي يشوف ناس عمو عمران ، قال لو في شي حـ يكلمنا ، أسيل قالت ليها معناها هو عارف هم وين و يمكن معاهم ، معناها الراجل دا بالجد إتوفى !! أمي قالت ليها فعلاً خبر الموت دا مستحيل يكون كذب ، بس الكتلو شنو يا ربي !!!
لميس قالت ليها كتلتو عمايلو ، غيتو خبرو لو انتشر نص السودان حـ يفرح بالذات أهل الناس الهو جننهم و الكان حابسهم تحت الأرض و الكان بتاجر بأعضائهم ، عصام دا أعمالو سيئه شديد ، ما عارفه حـ يقابل ربو كيف !!
المهم بقينا قاعدين في البيت و أمي بتعمل في الغدا ، لمن عبدالله أخوي جا كلمناهو طوالي مشى لـيهم بهناك ، بعد صلينا المغرب أسيل قالت قايمه تخت لينا الغدا ، فجأه كدا سمعنا صوت صريخ عاااالي حسيتو حـ يشق الأرض ، والله خمينا تيابنا بس و قمنا جاريين و البيت ذاتو ما قفلناهو كويـس ، لمن طلعنا الشارع ، الناس دي كلها كانت جاريه على بيت حبوبه آمنه ، لمن دخلنا لقيناها قاعـده على الأرض و بناتها نوال و علياء جنبها و بصرخوا بأعلى حس و خالتو رقيه و تيسير ببكوا على إتجاهـ و سامر دا شغال ليهم استغفروا يا جماعه ، الموت علينا حق ، حبوبه آمنه دي غمرت عديل ، خالتي جابت مويه و رشتها بيها ، بعدها سامر و أولاد نوال رفعوها و دخلوها جوه و هنا الكواريك ماليه الحوش ، أمي قالت لخالتي الحصل شنو ؟؟
قالت ليها عمران اتصل على سامر و قال إنو عصام دا لقوهو مكتول و يمكن بعد شويه يجيبو جنازتو ، غيتو ما فهمونا الحصل شنو بالتفصيل بس المؤكد إنو عصام دا خلاص بقى في رحمة ربو ، أمي قالت ليها لا حول ولا قوة إلا بالله .... طبعاً بعدها الناس فرشوا الفرشات و بقوا قاعدين و منتظرين الجنازهـ ، أنا للوقت داك حسيت نفسي بحلم ، ما قادرهـ أصدق إنو عصام الكابوس خلاص مات !!
باب الشارع كان فاتح للنهايه و الناس جزو قاعد في الشارع و جزو قاعد جوهـ البيت و نحنا قاعدين جوهـ المظله ، شويه كدا سمعنا واحد قال الجنازهـ جابوها يا جماعه ، كلنا طلعنا و مشينا برا الشارع ، حبوبه آمنه و بناتها جوا بدافروا في الناس لحد ما طلعوا برا و بقوا واقفين قدام بكوسي عمو عادل راجل خالتي ، نزل هو و أبوي و عمو عمران و معاهم زي 6 أنفار من الرجال ، حبوبه آمنه مسكت في عمو عمران دا و بكت فيهو قدرتها و هو كمان كان ببكي فيها ، غيتو ملوا الشارع كواريك ، بعدها عمو عادل إتحرك بأمو عشان يدخلها ، قالت ليهو ولدي وينو ؟؟ حتى لو جنازهـ عايزا أشوفو حشاي محروق عليهو يا عادل ، يعني خلااااص أخوك مات ، يا حليلو فات و خلانا ، ما شفتو يخواني أنا طولت منو ، ولدي مات بعيد عني ، عمو عادل ما كان قادر يتكلم ، كل ما يحاول يفتح خشمو دموعو بتجري ، جا عمو عمران و قال ليهم أدخلو جوه ، مسك أخواتو ديل وحدهـ وحدهـ و دخلهم ، حبوبه آمنه دي كانت حالفه تشوف جنازة ولدها ، بعد ما الناس دخلت جوه الحوش و هم لسه ببكوا ، عمو عمران قال ليهم استغفروا يا جماعه و خلوا الكواريك دي لأنها ما بتفيد بشي ، أدعوا ليهو بس ، عمو عادل شاف أقرب كرسي و قعد ، أبوي و سامر جوا وقفوا جنب عمو عمران لمن بدا يتكلم ، قال لينا الجنازه دفناها قبل ساعه ، طبعاً حبوبه آمنه و بناتها جاطوا فيهو و قالوا ليهو كيف تتصرف من عندك و تدفنوا من دون ما تخلينا نشوفو .... أبوي قال ليهم يا جماعه كدي ختوا الرحمن في قلبكم و ادعوا ربنا يثبتكم ، عصام دا والله ما مات موته عاديه ، فجروا المكان الكان قاعد فيهو لمن وصلناهو..... والله ما قدرنا نعاين ليهو مرتين .... هنا أبوي سكت و حبوبه آمنه لسه بتصرخ و بضرب عمو عمران في صدرو و بتقول ليهو ليه ما خليتني أشوفو ، ضماها و قعد يبكي فيها و قال ليها يا أمي زول متقطع حـ نجيبو ليك كيف !؟
هنا حبوبه آمنه تاني غمرت و الكواريك المرهـ دي حسيتها حـ تكسر البيت .... طبعاً كلنا إتخلعنا !!!
يُلهمنا حب التفاصيل، فنركز في كيف ينطق أحدهم اسمنا بطريقة لا تشابه الجميع، ونركز في توتر غيابنا بنبرة صوت أحدهم وهو يتحدث صادقًا عن الفقدان، في هؤلاء الذين يعرفون متى يشدون على أيادينا، ومتى يبتسمون بتركيز في عيوننا، يُلهمنا حب التفاصيل الصغيرة جدًا فنصنع بها طرقًا عديدة للارتياح والسعادة، فيكفينا من أحدهم كلمة طمأنينة في لحظة خوف من البُعد و الغياب، يكفينا نبضًا يشاركنا الأمل و اليأس، الخوف و الطمأنينة، يشاركنا حكايات الانكسار و الانتصار 🖤.!
لكاتبه....
يتبع.....
