بعدها عدت الأيام و إنطلقت أولى حلقات المسابقة التكنولوجيه ، عملنا ليها ترويج كبير و حمسنا الناس كتتتير و الحمدلله أول حلقه كانت موفقه شديد و نالت قبول و إستحسان من الكُل ، تقريباً كل السودان حضرها و الناس كلها كانـت مبسوطه و فخورهـ بالمسابقه دي ، لأنها تعتبر الأول من نوعها على مستوى السودان و أنا طموحه و متفائله جداً إنها تكون على مستوى إفريقيا ، من جهه كانت المسابقه و تجهيزاتها و رعايتها و من جهه تانيه ترتيبات عرس طيف ، حرفياً ديك كانت أكتر فترهـ انضغطت فـيها و أكتر فترهـ كنت فيها أول ما أخت راسـي على المخدهـ بنوم طوالي ، طبعاً طيف لـسه زعلانه مني و ماخدهـ موقف ، أنا كان بمقدوري أكسر حنكها كـ عادتي بس المرهـ دي اتنازلت ، و ما كنت مجبورهـ إني اتنازل بس كمان طيف ما قصرت مـعاي و أكتر من مرهـ وقفت معااي و اتجاوزت لي مواقف كتيره و اتحملت تصرفاتي غير المرضيه و ما زعلت من عدم مبالاتي ، زوله زيها صعب الواحد يلقاها بالساهل ، محاولاتي في تحسين علاقتي بيها ولا شي قصاد مواقفها الكبيرهـ ، حتى لو لا قدر الله طيف دي قطعت علاقتها بي ، أنا ما حـ اندم على إني مشيت ليها في بيتهم ، ما حـ اندم على إني اعتذرت منها كتير و حاولت أراضيها ، ما حـ أزعل لأنها بتتجاهلني و أنا مع ذلك بمشي ليها في بيتهم و بشاركهم تفاصيل مراسم عـرسها.....
لمن كان باقي لـ عرس طيف 3 أيام ، أنا و لميس و أسيل قصينا فساتين نفس اللون بس تفصيلتهم بتختلف ، إخترنا اللون العُنابي ، طبعاً كلهم كانوا متوقعني أكون من الشباين بس طيف سلفاً كانت مختاراهم و ما فضلت إنـي أكون معاهم ، برضو عذرتها و قلت لـ ناس أسيل إنو أنا القلت ليها ما عايزا أكون مع الشباين ، المهم يوم و أنا في داخـله الشركه ، إتلاقيت مع سمير ، بعد سلم علي ، قال لي على فكرهـ أنا لـسه منتظر ردك ، قلت ليهو والله يا سمير أنا حالياً ما بفكر في الزواج ، ما تضيع زمنك و تنتظرني ساي ، قال لي لو دا السبب فـ ما عندي مشكله انتظرك ، أخدك زمنك ، قلت ليهو سمير أنا .... قاطعني و قـال لي ما تقولي حاجه ، زي ما قلت ليك حـ انتظرك ، لمن تبدي تفكري في الزواج بصورهـ جديه أديني خبر ، قال كدا و مشى ، حسيتو بضغط علي و ما عايز يسمع مني كلمة لا أو أي جمله معناها إني رافضاهو !!
احترت معاهو و ما عرفت اعمل شنو ، خاصة إنو بقى الزمن كلو سارح و متأمل فيني ، حتى كل الزملاء لاحظوا الحاجه دي و تقريباً كلهم بقوا عارفين إنو سمير بحبني و شايفين سكوتي أو تجاهلي لـ مشاعرو غرور و إفترى مني !!!
من ناحيه تانيه ، تعاملي مع قصي إختلف ، أو خليني أقول إنو بقى رسمي شديد معاي ، كلامو بقى في حدود ، لو ماف شي مهم مستحيل يفتح خشمو معاي ، لو طلعنا في نفس الوقت مرات كتيرهـ ما بقول لي تعالي أوصلك معاي و لو قالها بقولها مرهـ وحدهـ بس و ما بصر علي ، حسيتو الفترهـ ديك كان شاميني شديد و صراحة تجاهلو لي و تعاملو الجديد دا كان بخنقني ، مرهـ و أنا في جلسه مع دكتورهـ رانيا استدرجتني في الكلام و من دون ما أحس حكيت ليها بالحاسه بيهو بس الحمدلله ما قلت ليها إنو البتكلم عنو دا قصي ، هي عارفه جزو من الحكايه دي لأنو قبل كدا حكيت ليها و كلمتها إنو الراجل دا متزوج و أنا ما عايزا أدخل بيناتهم و اني شبـه ما واثقه في كلامو و تلميحاتو ، كانت بتصر تعرف دا منو و لقيتو وين بس كنت بتهرب من اسئلتها دي و بقيت أتجنب أحكي ليها عنو بس نظراتها بقت توترني....
المهم دخلت مكاتب الموظفين ، سلمت على ناس داليا و باشرت شغلي طوالي ، ندى جات قعدت جنبي و قالت لي انتِ يا مها رافضه سمير دا ليه ؟؟ الولد والله ميييت عليك و مشاعرو بقت ما بتندس ! لمن عاينت ليها قالت لي خلااااص خلااااص ما تزعلي بس حرام والله يحبك الحب دا كلو و انتِ ما شغاله بيهو و معلقاهو !
قلت ليها أنا ما معلقاهو ! قلتها ليهو عديل و هسي كنت بتكلم معاهو و شرحت ليهو أكتر من مرهـ إني ما بفكر في الزواج ولا نفسي ارتبط ذاتو !! بس هو مع ذلك مُصر أوافق عليهو ! الحب دا إجباري هو ؟؟
قالت لي ما إجباري بس الولد بحبك ، قلت ليها بس أنا لا و ما بقدر أكذب عليهو و أسايرو ، قالت لي في زول في حياتك ؟؟
سرحت مسافه تاني قلت ليها لا !
قالت لي أنا ما لاقيه ليك أي مبرر ! منو فينا ما بتحلم بواحد وجيه و شغال و اهم شي جادي و وضعو تمام !! سمير دا عيبو شنو ؟؟
اتنهدت و شلت الملف القدامي و قلت ليها وراي شغل ، مليت من الكلام دا يا ندى لأني سبق و شرحت ليك إنو سمير ما فيهو عيب و لو كان أي واحد غيرو برضو كنت حـ أرفض ، المهم طلعت منها و أنا زهجانه لأنو فجأه كدا معظمهم بقوا يحنسوني عشان سمير !!
مشيت مكتب مستر عزام عشان كان في ملف عايز مراجعه و توقيع بس السكرتيره قالت لي إنو ما جا ، في الحـاله دي كان قدامي خيار إنو أمشي لـ قصي لأنو الملف مهم و توقيعو أتأخر ، المهم طلعت المصعد و مشيت فوق ، لمن وصلت مكتبو السكرتيره قالت لي إنو معاهو زول ، قعدت و بقيت منتظراهو ، عدا ربع ساعه و لسه المعاهو ما طلع ، قلت ليها في منو جوهـ ؟؟ يعني قصدي في اجتماع ؟؟
قالت لي لا بس معاهو ضيفه ما بعرفها !
طبعاً الشمار حرقني ، دي منو القاعده معاهو من قبيل دي و براهم كمان !!
بقيت قـاعده و بهز في رجلي و عيني على باب المكتب و قلبي ماكلني ، شويه كدا السكرتيره شالت كذا ملف و مشت بيهم ، مع إنو دي ما حركاتي بس قلبي كان بغلي ، مشيت وقفت جنب باب المكتب بس ما سمعت شي ، بقيت مترددهـ اضرب الباب ولا لا و أنا خايفه السكرتيرهـ تجي راجعه ، خلااااص لمن فاض بي ، ضربت الباب و دخلت تووووش ....
ايوه انا عارفه إنو قاعدهـ معاهو بت بس اتفاجأت لمن لقيتهم مقربين من بعض بالطريقه المقرفه دي !! قصي للمرهـ الألف سقط من نظري !
حسيت حيلي مات و أنا بعاين ليهم و هم متوترين ! ما قدرت أتحكم في نفسي ولا في نظرة عتابي لـ قصي فـ طوالي طلعت ليهم من المكتب ، طلعت المصعد و أنا باخد أنفاسي بصعوبه ! ما قادرهـ استوعب الشفتو ، كيف قصي طلع بالنداله و الوساخه دي !!
رجعت شغلي و أنا ما على بعضي و أطراف يدي بترجف ، داليا جات سألتني عن حاجه و رديت ليها بزهج لمن استغربت ! لمن وعيت على نفسي إعتذرت منها و قلت ليها ما قصدي والله .... رغم إني حاولت اتصرف بشكل طبيعي و أخفي ضيقي و غضبي بس فشلت !
حسيت بـ نار في قلبي ، المكتب كلو حسيتو ضااق بي ، عديل كنت مخنوقه و اتمنيت في اللحظه ديك أخلي أي حاجه قدامي و أمشي من هنا بس ما كان في طريقه ، ما صدقت متين الدوام خِلص ، شلت شنطتي بس و بقيت مارقه لقيتو برا واقف جنب عربيتو و بتكلم بالتلفون و إبتسامتو للضرس الآخير ، لمن جيت مارهـ بجنبو أشر لي عشان أقيف ، رسمت إبتسامه مزيفه على وشي و مثلت إني طبيعيه عشان لمن يحاول يبرر لي الشفتو ما يحس إني كنتِ متضايقه ... بقيت واقفه و منتظراهو يخلص مكالمتو ، لمن خلص قلع نظارتو الشمسيه و قال لي كيفك ؟؟
قلت ليهو كويسه ...
قال لي كنت بتكلم مع مستر عزام و قال لي إنو معاك ملف ضروري يتوقع اليوم ، قلت ليهو أيوه ، قال لي ليه ما جبتيهو لي ؟؟
قلت ليهو لأنك كنت مشغول و ما فاضي ، قال لي كان ممكن تديهو للسكرتيره و لمن أفضى هي حـ تجيبو لي ....
طبعاً قلبي وجعني وجع ما عادي !!
قال لي المهم وين الملف ؟؟
قلت ليهو جوه في الشركه ، قال لي تعالي ، لمن دخلنا قعد في الإنتظار و قال لي أمشي جيبيهو ، فعلاً مشيت شلتو و جيت طالعه ، المكاتب كانت فاضيه ومعظمهم طلعوا بس سمير كان موجود ، قال لي طالعه ؟؟ قلت ليهو لا ، قال لي ليه عندك شغل ؟؟ قلت ليهو أيوه .... أخد نفس و قال لي أنسي إني طرحت ليك و اتعاملي معاي عادي ، ماف داعي للحساسيه ، قلت ليهو والله مستر قصي قاعد لي في الإنتظار عشان يوقع لي الملف دا !! قال لي تمام حـ انتظرك يلا....
طبعاً ما عرفت أتخلص منو كيف !!
المهم لمن وصلنا الإنتظار هو مشى معاي لـ مستر قصي سلم عليهو و قعد بعيد منو شويه ، أديت قصي الملف و بقيت واقفه ، اتخيلوا الصفحه الواحدهـ أخد فيها 5 دقايق !! حسسني كأنو بستهجي الكلمات ياداب !! أول بحلل فيهم !... زهجت من الوضع و إتلفت عاينت لـ سمير المنتظرني ! قصي قال لي وقفتك حـ تطول عشان كدا أقعدي ، قلت ليهو الملف ما محتاج تدقيق كتير أنا راجعتو قبل كدا و..... قاطعني و قال لي أنا ما بوقع ساي 😊
قال كدا و قلب الصفحه و بقى شغال على راحتو ، إتحركت من جنبو و مشيت لـ سمير و قلت ليهو شكلي حـ اتأخر عشان كدا انت أمشي ، قال لي مش مفروض يوقع ليك الملف و خلاص ؟؟
قلت ليهو أيوه بس دا شكلو حتى الكلمات عايز ينظر فيها و يحللها ، قال ما بوقع ساي !! قال لي دا كمان مالو !!؟
قلت ليهو أمشي يا سمير عشان ما تتأخر ، قال لي ثواني ، قام من مكانو و مشى لـ قصي و قال ليهو يا مستر ممكن تستلم منك الملف دا بكرا ؟؟
طبعاً قصي ولا عاين ليهو ، سمير بالجد زعل و حس بإحراج ، عاينت ليهو بنظرهـ كأني بعتذر منو ، قصي بعد مسافه قال ليهو ليه ؟؟
رديت عليهو أنا و قلت ليهو عشان اتأخرت ، عاين لـ سمير و قال ليهو و انت البوديغارد تبعها ؟؟
سمير قال ليهو لا ما كدا بس..... قصي قاطعو و عاين لينا الإتنين و قال لينا قصصكم دي ما بتنفع معاي في الشـركه ، الحبكانيات دي مكانها خارج الشغل ما هنا ، ياريت تركزو بس على شغلكم و برا الشركه أعملو البريحكم ....
طبعاً كلامو زعلني شديد و من دون ما أفكر ، قلت ليهو طيب انت أدينا فرصه عشان نعرف نحب بعض برا الشركه !!
لمن قلت كدا سمير بقى يعاين لي ، قصي طوالي وقع الملف سرعه سرعه و رماهو في التربيزه القدامو و قال لي بعد دا بتقدروا تطلعوا يا عصافير الحب ، شلت الملف بس و طوالي طلعت مع سمير و أنا عايزا أطق من الزعل ، سمير كان بعاين لي ساي ، ركبت معاهو عن سكات ، أول ما دور العربيه قال لي الحصل غريب !! يعني.... قاطعتو و قلت ليهو سمير !! رجاءً أنا ما حابه أتكلم في أي موضوع ، براي زهجانه و مصدعه و ما عندي حيل آخد و أدي في الكلام ، قال لي تمام و سكت بس كان في علامة إستفهام كبييييره على وشو....
رجعت البيت و أنا واصله الحد من الضيق ، أمي جابت لي مويه و قالت لي خير مالك ؟؟
قلت ليها ولا شي ، زهج شغل بس ، قالت لي في الفترهـ الآخيره دي شايفه الشغل بقى يزهجك شديد !! في شنو قولي لي ؟؟
قلت ليها ياخ ماف شي يا أمي !!... بعد طلعت جاتني أسيل قالت لي مالك يا بت الليله قالبه خلقتك كدا و بتتزهجي في أمك ؟؟
قلت ليها وااااي أنا منكم !! ياخ ماف شي خلوني في حالي !!
تاني سكتت و ما قالت لي حاجه ...
دا كلو كان قبل عرس طيف بـ يوم ، المهم يوم الجمعه يلي هو يوم العرس ، من الصباح أنا كنت صاباها معاها ، خليت كل شي على جنب و مشيت ليها ، ندى و داليا ذاتهم لقيتهم هناك ، كنت شغاله بكل طاقتي و بساعد في النسوان الكبار ، و معظم شغلي كان في المطبخ ، خالتو رشيدهـ طلعتني و قالت لي دا ما مكانك ، البنوت بتظبطوا و انتِ واقفه في المطبخ ؟؟ قلت ليها ماف مشكله يا خالتو و لسه في زمن ، قالت لي لا لا سريييع خشي ليهن جوهـ ، المهم دخلت جوه و قعدت معاهم شويه ، لمن جات الساعه 8 طيف و كم بت من بنات أهلها مشوا الكوافير ، داليا مشت معاهم و ندى قعدت ، بقينا بنخدم في الضيوف الكانوا مباااالغه ، مع إنو في شغالات و ناس جايبنهم مخصوص عشان يخدموا الضيوف بس برضو اشتغلنا أحسن من القعاد الساي ، خالتو رشيدهـ نادتني على جنب و قال لي ليه ما مشيتي مع طيف ؟؟
قلت ليها المشوا معاها كتار عشان كدا حبيت أقعد ، قالت لي أنا إحترت معاكم ! طيف دي قدر ما حاولت أعرف منها سبب الخلاف البيناتكم شنو ما ورتني !! قولي لي انتِ يا مها في شنو ؟؟
قبل ما أرد جا قصي و قال ليها يا حاجه الجلابيه حقتي وين ؟؟
قالت ليهو قاعدهـ جوه ، قال ليها ان شاء الله مكويه ، قالت ليهو ما عارفه والله انا ذاتي انشغلت و لبسي ذاتو ما عارفاهو وين ، إتلفتت علي و قالت لي معليش يا مها أتعبك معاي ؟؟
قلت ليها ماف تعب والله ، قولي لي بس ، قالت لي اجيب ليك جلابية قصي تكويها ليهو ؟؟ قلت ليها جيبيها و كمان ممكن تجيبي لي ملابسك أكويها ليك بالمرهـ ، قالت لي الله يرضى عليك يا بتي ... المهم دخلت معاها جوه و جابت ليك جلابية قصي ، قالت لي لقيت ملابسي مكويات ، اكوي حقات قصي بس ، المهم بقيت أكوي فيهم ساي ، فجأه كدا قصي جا داخل ، إتخلعت طبعاً ، من دون ما يعاين لي قال لي خلصتي ؟؟
قلت ليهو باقي الشال بس ، المهم انتظرني لحد ما كويتهم ليهو ، شالهم مني و كلمة شكراً ما قالها لي ، طلع طوالي ، في سري قلت ليهو لو ما خالتو رشيدهـ ما كان كويتهم ليك !!
بعدها ناس أمي جوا و أنا و ندى مشينا جهزنا نفسنا و غيرنا ملابسنا للعقد ، لمن ناس أمي جوا خالتو رشيدهـ قعدتهم في طاوله قدااام و هي ذاتا جات قعدت معاهم عشان تفطر ، قالت ليهم من قبيل منتظراكم ....
طبعاً أنا مستغربه في صحبتها هي و أمي البقت فجأه كدا !! يعني البشوفهم بقول صحبات من زمااااان !!
المهم بعدها قعدوا طوالي و البيت إتملى زغاريد و الناس كلها بدت المباركه ، أنا و ندى طوالي اتصلنا على طيف في نفس اللحظات و باركنا ليها ، كانت بتبكي سااااي ، اتكلمت معاي عادي و هي مبسوطه شديد ، من شدة فرحتها نست أي شي و رجعت تتكلم معاي زي زمان ، استغليت الفرصه دي و شلت التلفون و مشيت بعيد من ندى و قلت ليها طيف أنا بالجد آسفه و زي ما قلت ليك عندي أسبابي و حـ أحكيها ليك بس ما هسي ، أنا والله ما هاين علي اشوفك زعلانه مني للدرجه دي و ما أقدر أراضيك ، انتِ عارفه إني ما بعرف أواسي و ما بعرف أعتذر زي الناس و ما ببادر بأي شي ، مفروض تفهمي و تعرفي غلاوتك عندي من أول يوم حاولت فيهو أعتذر منك و أبرر ليك ، أنا يا طيف ما بتمسك إلا بالناس البحبهم و بحسهم قريبين مني ... بقت تضحك و تبكي في نفس اللحظه ، قالت لي خلاص حـ تبكيني زيـاده ، أنا المفروض أعتذر منك لأني زودتها شديد 💔 بسبب زعلي و حماقتي انتِ حالياً ما موجودهـ معاي ، قلت ليها ما مشكله يا طيف أنا.... قاطعتني و قالت لي أنا زعلانه من نفسي ، قلبي واجعني شديد لأنو في أسعد لحظات حياتي انتِ ما موجوده مـعاي في نفس المكان .... إتكلمنا مسافه و عاتبنا بعض ، البنات المعاها قالوا لي خلااااص خربتي ليها الميك أب تبعها 😂 أدي راجلها فرصه عشان يتكلم معاها ، ضحكت و قلت ليها خلاص يا طيف نتقابل بعدين ، قفلت منها و أنا بمسح دموعي ، طبعاً ما لقيت طريقه أبارك بيها لـ خالتو رشيده لأنو الناس كتيره و كلهم كانوا متلمين فيها ، بعدها جوا الرجال داخلين ، في زي 3 كدا شايلين سلاح ، و شغالين مباركات ساي والله من شفتهم طلعت من الزحمه و أول ما ضربوا سلاح ختيت يديني على اضنيني و طواالي اتجهت على باب الشـارع لأنو كان قريب مني ، طبعاً جاريه و أنا مغمضه ، فجأه ضربت في زول ، لمن فتحت عيوني لقيتو قصي ، كان لابس الجلابيه القبيل و لافي الشال و ريحة عطرو مـاليه المكان ، ضحك و قال لي يا خوافه !
قلت ليهو أخـاف من شنو ؟؟
قال لي واضـح انك ما خايفه من صوت الرصاص عشان كدا لسه خاته يدينك على اضنيك ، نزلتهم و قـلت ليهو طالعه بس عشان أشم هوا ، قال لي عشان جوهـ بيتنا الأوكسجين معدوم ، قلت ليهو الناس زحممممه ياخ !!
قال لي المهم مبـروك لـ صحبتك و عقبالك ، قلت ليهو الله يبارك فيك و عـقبالك دي مفروض أنا أقولها ليك ، قال لي لـيه يعني ؟؟
قلت ليهو لأنك بقيت تهاتي كتير بالعرس ، فالأحسن تستر نفسك و تستر بت الناس معاك 😊
قال لي دي منو دي ؟؟
قلت ليهو المهم دا ما موضوعنا و مبروك لـ طيف و ربنا يسعدها و يهنيها ، قلت كدا و كنت حأطلع بس هو وقف لي جنب الباب و قال لي دي منو المفروض أسترها مـعاي ؟؟
قلت في نفسي وااااي أنا منك يا لساني !!
قلت ليهو ما عارفه و زح من وشي ، حاكاني و قال لي إلا تقولي لي البت دي منو ؟؟
قلت ليهو افففف منك ياخ !! قال لي أف دي لي أنا ؟؟ قلت ليهو قصي ياخ زي لي عايزا أمشي ! و بعدين انت واقف في الباب و الناس عايزا تطلع و تدخل ، زح من الباب و طلع ، قال لي تعالي أقول ليك دا ، ما عارفه الوداني ليهو شنو بس مشيت ليهو برا و قلت ليهو اهاااا ، قال لي البت منو ؟؟
قلت ليهو ياخ انت مالك بتحرق الروح كدا ؟! البت ياها الكانت معاك في المكتب !!
طبعاً أول ما اتذكرت المنظر ملامح وشي اتبدلت و نبرة صوتي إتغيرت ، قال لي اهاااا البت السمحه ديك ! قلت ليهو أيوه ، قال لي بس أنا ما قلت عايزها !!
قلت ليهو زي ما إتوقعت ، شكلك عايزا تتسلى ببنات الناس !! كل مرهـ يا قصي بتصدمني فيك !! انت ما اتغيرت ولا حـ تتغير حـ تفضل طول عمرك نسونجي بتتنفس بنات 💔
طبعاً كنت بشاكل فيهو عديل و أنا ما حاسه بنفسي و جد جد كنت زعلانه شديد و حالتي إتبدلت لمن هو إستغرب ، خليتو واقف و طوالي دخلت جوه ، حاولت أكون عاديه ، مشيت لخالتو رشيده ضمتني عليها و باركت ليها ، قالت لي عقبالك يا رب ، أمي قالت ليها آميييين.....
بعدها بمسافه طيف اتصلت علي و قالت لي أنا كلمت قصي و قلت ليهو يجيبك لي في الكوافير ، هو هسي منتظرك ، أمشي ليهو عشان تجيني معاهو ، قلت ليها شنوووو !!
قالت لي عايزاك معاي ، سرعه ما تتأخري علي ، قلت ليها تمام بس ما كان تكلمي أخوك براي بجيك ، قالت ليها يااااخ تعالي معاهو ساي ، يلا باي .... ما خلتني اتكلم زيادهـ قفلت الخط طوالي ، شلت حاجاتي و مشيت لناس أمي و كلمتهم إني حأمشي لـ طيف ، خالتو رشيدهـ قالت لي خلي قصي يوصلك ، قلت ليها طيف كلمتو ، قالت لي كويس يلااا أمشي معاهو ....
طبعاً طلعت الشارع و أنا مترددهـ ، ما عايزا أمشي معاهو ياخ !! فجأه هو إتصل علي ، ما رديت عليهو و قررت أمشي براي ، فعلاً إتحركت شويه من جنب بيتهم لأنو الشارع كان ملياااان ناس ، فجأه و أنا ماشه جا وقف قدامي بـ عربيتو ، نزل القزاز و قال لي ما تضيعي زمن يا بتنا !!
قلت ليهو بمشي براي ، قال لي كلامك دا قوليهو لـ طيف ما لي أنا !!
قلت ليهو زي ما قلت ليك براي بمشي ، قال لي تمام على راحتك و كان حـ يتحرك بس جات خالتو رشيده و هي شايله معاها أكياس راقيه كدا قالت لي ديل طيف نستهم و هسي قالت يجيبوهم ليها ، مسكتني ليهم و قالت لي يلاااا أركبي سرعـه عشان ما تتأخري عليها ، قصي قال ليها يا حاجه البت دي.... طوالي فتحت باب العربيه و ركبت ، قالت ليهو مالا ؟؟
عاينت ليهو و ضيقت ليهو عيوني !!
ضحك و قال ليها قصدي طيف ، كلامها كتير ، هسي بعد ما اتحرك تتصل و تقول نست حاجه تاااانيه ، ضحكت و قالت ليهو أعذرها أختك اتلبشت 😂
المهم اتحركنا ، قلت ليهو حركتك بايخه ، ما كان في داعي تقول لأمك إني كنت رافضه أركب معاك ، قال لي بس انا ما قلت ليها !! قلت ليهو بس كنت حـ تقول !!
قال لي انتِ قاعدهـ جـواي عشان تعرفي عايز أقول شنو ؟؟
في اللحظه دي الإتنين عاينا لبعض !!
سكت ما رديت عليهو ، بقينا ساكتين ساي ، فجأه تلفوني رن ، كان سمير ، ما رديت عليهو ، تاني كرر الإتصال ، قصي قال لي ردي على تلفونك دا !!
رديت و قلت ليهو آلووو !!
قال لي مهااااوي كيفك ؟؟
قلت كمان دي شنو مهاوي دي ! ... قلت ليهو كويسه و انت ؟؟
قال لي هسي بقيت كويس ، ها أجواء عرس طيف كيف ؟؟ قلت ليهو حلوهـ شديد ، قال لي عقبالنا .... ما قدرت أقول حاجه ، ضحك و قال لي طبعاً لمن تفكري في الزواج .... المهم أنا بعدين حـ أجي الصاله و أشوفك هناك ، قلت ليهو تمام ، قال لي بس اتصلت عشان أسـمع صوتك ...
بعدها قفلنا من بعض و أنا مزعوجه ، قلت بعدين حـ أخت ليهو النقاط على الحروف عشان تاني لا يتصل علي لا يتعشم فيني أكتر ، سرحت بعيد و بقيت أفكر ، فجأه قصي و بعد سكات طويل قال لي دا حبيب القلب ولا شنو ؟؟
عاينت ليهو بغيظ و سكته ، قال لي ليه عاينتي لي كدا كأني قلت حاجه غلط !! ما عرفتو تحبوا بعض على راحتكم ولا شنو 😂😂
قلت ليهو قصي سوق سواقتك ، قال لي أداك شاكوش ؟؟😂
قلت ليهو قصييييي !!
قال لي معناها حبيبتو قبضتكم مع بعض ، قلت ليهو وااااي أنا منك ياخ ! شلت علبة المناديل و رميتها عليهو ، قال لي الشاكوش حار ، ما مشكله تكبري و تاخدي غيرو ، قلت ليهو أساساً أنا ما شغاله بيهو و هو الجاري وراي ...
ضحك بشماااته كدا و قال لي كل البنات بقولوا كدا لمن يتموسروا ، قلت ليهو بس انا ما اتموسرت ، و دي الحقيقه هو الجاري وراي و نفسو بس اتكلم معاهو كلمتين ورا بعض ، قال لي بيني و بينك كدا دي الحقيقه ؟😂
قلت ليهو الشركه كلها عارفه إنو سمير بحبني و هو عديل طرح لي و فاتحني في الموضوع ، قال لي والله !!
قلت ليهو اييييوه
قال لي و انتِ بتتغلي عليهو ليه ؟؟
قلت ليهو ما بتغلى عليهو يا قصي ، أنا قلتها ليهو أكتر من مرهـ إني ما جاهزهـ و أصلاً واضح من طريقة تعاملي معاهو إني ما عايزاهو و ما مدياهو فرصه !!
قال لي ماف حاجه اسمها واضح من طريقة تعاملي معاهو إنو كدا أو بيعني كدا ... ما عايزا زول عديل قوليها ليهو في وشو أفضل من انك تتحججي ليهو ! يعني انتِ مدياهو وش و بتخليهو ينتظرك عشان يوصلك و هو طاااارح ليك ، عايزاهو يفهم شنو ؟؟
قلت ليهو يمكن وصلني مرتين بس و دا بعد إصرار شديد منو ، و كوني خليتو يوصلني ما معناها إني فاتحه ليهو باب قلبي ، انت ناسي انك كنت بتوصلني برضو رغم إني كنت برفض ! يعني دا ما معناهو إني..... سكته لمن عاين لي ، قلت ليهو المهم فهمت قصدي ، قال لي يعني هو مضايقك ؟؟
قلت ليهو لا ، هو بعمل حسابو و بحاول ما يضايقني بس تصرفاتو و كلامو بحسسني إنو عايزني أديهو موافقتي في أي لحظه و بأي طريقه ، كل الزملاء في الشغل يحنسوا فيني عشانو ، شايفنو جنتل و ماف زيو ، قال لي و انتِ شايفاهو كيف ؟؟
قلت ليهو هو كذلك بس انا ما عااااايزااااهو يا ناس أفهموني ما عايزا و خلاص بدون ما انسئل عن السبب ، قال لي بس انتِ قبل كدا قلتي لي انك مرتبطه و الفهمتو إنو سمير هو الإنتِ مرتبطه بيهو !! و امبارح قلتي لي أدينا فرصه عشان نعرف نحب بعض برا الشركه !
طبعاً إتوترت بالذات لمن قعد يعاين لي بـ ريب كدا ، قلت ليهو عشان كلامك غااااظني ، قال لي يعني سنغل 😂
قلت ليهو لا ، قال لي مُصره تكذبي ، قلت ليهو ما قاعده أكذب ، أنا فعلاً مرتبطه و ما عايزا أفصح عن اسم الشخص دا و ما اعتقد إنو دي حاجه بتخص زول غيري !!
بعد كلامي دا ما قال حاجه تانيه ، ساق بكل هدوووء....
المهم وصلني الكوافير و مشى طوالي ، كنت واقفه و بعاين لـ عربيتو و هي متحركه ، أحاسيسي كانت جايطه شديد و حسيت إنو سأل الأسئلة دي كلها عشان يعرف في زول في حياتي ولا لا ، ابتسمت لمن إحساسي الجواي قال لي إنو قصي بغير علي و إتذكرت امبارح لمن أخد زمن طويل في مراجعة الملف و كلو عشان سمير كان منتظرني 😂
المهم لمن دخلت ليهم جوه ، طيف جاتني طاااالعه و هي مندفعه ، ضمينا بعض شديييييييد و قعدت أبارك ليها ، بت خالتها قالت ليها يعني قومتنا و قعدتنا معاك دي كلها ما قدرت تفرحك و تضحكك قدر دا ، عاد من مها جات وشك نور ، قالت ليها أكيييد لأنو دي صحبتي و حبييييبة قلبي....
المـهم قعدنا نتونس في الكوافير و نحنا بنتظبط ، كنت مبسوطه شديد ، أولاً بسبب فرح طيف و زواجها و بسبب اننا إتصالحنا و يمكن بسبب .... موقفي القبيل مع قصي ...
المهم لمن جا المسا و العريس وصل ، طيف قالت ليهم مها حـ تركب معانا ، بت عمها قالت ليها خلااااص بعتيني بعد ما قلت ليك أنا مخصوص عايزا أركب معاكم عشان هيثم هو الحـ يسوقكم 😭😭
طبعاً العريس منذر أخو شجن ، طبعاً هي نهااااي ما شفتها في بيت ناس طيف ، سامعاهم قالوا ليها اسبوع في بيت أهلها عشان ترتيبات العرس و كدا ، المهم طلعنا لـ منذر من الغرفه عشان يدخل و يبارك لـ طيف ، طبعاً طووولو لينا جوهـ و نحنا بنضحك عليهم و شغالين ليهم أمرقونا ياخ ، لمن جوا طالعين البنات قعدوا يزغردوا ، طبعاً أنا ما بعرف أزغرت نهاااي ، المهم طلعنا برا و العربات كانت واقفه صف ، كانوا مرتبين روحهم و أي وحدهـ عارفه نفسها حـ تركب مع منو ، أنا عشان طيف قالت لي حـ تركبي معانا طوالي مشيت قدام بس اكتشفت إنو بت عمها ركبت قبليني ، قالت لي معليش يا مهاااوي بس الكراش هو الحـ يسوق عشان كدا أعذريني ، قلت ليها ماف مشكله ، بعدها ركبو ناس طيف و جا هيثم المجنن بت عمها ركب و اتحرك ، طبعاً طيف زعلت بس تاني ما قدرت تقول حاجه ، المهم بعدها كلهم ركبوا مع بعض ، و اتحركوا آخر عربيتين ناسها لاحظوا إني براي قالوا لي خلاص أركبي في وحدهـ من العربيتين ، طبعاً كل عربيه فيها 4 ، قبل ما أركب قصي اتصل علي و قال لي جاي عليك ما تمشي و قفل طوالي !!
طبعاً إستغربت !
على أساس كلامو دا قلت ليهم انتوا أمشوا أنا في زول حـ يجيبني معاهو ، المهم هم مشوا و بقيت واقفه براي و بفكر في قصي و بتبسم ساي لحد ما جاني ، فتحت الباب و ركبت معاهو طوالي ، قال لي الليله شايفك مبسوطه شديد ، قلت ليهو دا عرس صحبتي كيف ما أكون مبسوطه ؟؟
بعدها بقينا نتكلم عادي و شبه نسينا اننا كنا متزاعلين ، كنت حاسه نفسي طايرهـ من الفرح ، لحد ما وصلنا الصاله ، ديلك لقيناهم لسه واقفين برا و بتناقشوا في حتة منو الحـ يدخل الأول ، قلت ليهم خلوني أدخل بعدها اتجادلوا على راحتكم ، وحده منهم قالت لي انتِ و قصي أدخلوا مع بعض .... صراحة ياداب وعيت على نفسي و خجلت ليها !! اتخيلوا أجي داخله معاهو قدام الخلق ديل كلهم !! مرتو حيكون إحساسها شنو لو شافتنا داخلين مع بعض و الأهم أنا منظري حيكون كيف قدام الناس و بالذات أهلي !!
قلت ليهم لا لا و طوالي دخلت و مشيت قعدت مع ناس أمي ، كانوا قاعدين مع ناس خالتو رشيدهـ في طاوله وحدهـ ، بعدها طيف و منذر جوا داخلين بأغنية سيره و ناس أمي و خالتو رشيدهـ مشوا إستقبلوهم و هناك كان في شجن و أهلها ، الصاله كانت مليااااانه شديد ، طبعاً أنا انتظرتهم بعد ما سيروهم و رقصو أسلو و مشوا قعدوا حتى مشيت باركت ليهم الإتنين مع بعض ، بعدها الحفله بدت ، طبعا أسيل و لميس و بنات دكتورهـ رانيا عملوا جنس عمايل ، أسيل مسكت حمودي لـ عبدالله و مشت ترقص و هو يحمر ليها ساااااي 😂
طبعاً نص ناس الشركه جو و كانوا عاملين دااائره براااهم و برقصوا بمزاااج ، في عز الهجيج دا كلو سمير اتصل علي ، قلت حـ أحسم الموضوع دا ، عشان ما حـ أسمعو كويس أول ما فتحت الخط قلت ليهو خلينا نطلع برا الصاله ، قال لي تمام ، المهم طوالي اتجهت على باب الصاله و طلعت ، مشيت وقفت بعيد و بقيت منتظراهو ، اتصل علي و قال لي وين انتِ ؟؟
إتلفت و وصفت ليهو مكاني ، كان ماشي علي و هو مبتسم ، أول ما وصلني قال لي دي شنو الحلااااوه دي كلها !؟؟ مشتاقين ، ولا اقول ليك ، مشتااااق ليك !!
طبعاً حسيت لساني إتربط ، ضحك و قال لي دائماً بتتوتري لمن اقول ليك كلام زي دا ، قلت ليهو صراحة أنا ما بحب الكلام دا ، قال لي طيب ما حـ أقول ليك كدا تاني بس للمرهـ الآخيره خليني اقول ليك إني طالعه توووحفه ، لمن عاينت ليهو خت يدو على خشمو و بعدها قعد يضحك....
ما عرفت أبدا ليهو من وين أو اقول شنو !
قلت خلاص حـ أقول الحاسه بيهو بس و الأنا عايزاهو ، قبل ما أقول شي ، شفت البت الكانت مع قصي في مكتبو داخـله الصاله !! حسيت بكتمة نفس و تقول يادااااب وعيت على نفسي !! مش أنا كنت ماخده موقف من قصي و بسبب الشفتو في مكتبو شميتو !! طيب ليه قبل قعدت اتكلم معاهو عادي و نسيت العملو !! خليكم من دا ، أساساً أنا منو عشان أزعل من تصرفو و ليه أغير ذاتو من البت دي !!
زعلي و ضيقي و غيرتي دي أولى بيهم مرتو ، أنا متغمصه الشخصيه الغلط !! أنا لاعبه دور ما حقي و عمرو ما حيكون حقي 💔
قال لي مها في شنو ؟؟ خير ليه فجأه كدا حسيتك اتغيرتي !؟
قلت ليهو ماف شي...
بقى واقف بتكلم معاي عادي و أنا مرهـ أرد و مرهـ لا ، في الآخر قلت ليهو أنا حـ أدخل بعد دا ، قال لي خليك شويه ، قلت ليهو لا و طوالي إتحركت من جنبو ، جا وقف قدامي و قال لي ممكن تفهميني حصل شنو فجأه كدا ؟؟
قلتي لي خلينا نتقابل برا الصاله و لمن جيتك كنتِ تمام حتى اني حسيتك عايزا تقولي حاجه مهمه و فجأه كدا مزاجك اتعكر و خلاص ماشه ؟؟
بقى يشيل و يلوم فيني و يقول لي انتِ ما شغاله بي و ما مديه أهميه لـ مشاعري ، لمن زهجت قلت ليهو من الآخر يا سمير أنا ما عايزاك ، قال لي نعم ؟؟
قلت ليهو عشان ما تقول مقضيه بيك زمن و لاعبه بمشاعرك ، بالواضح أنا ما عايزاك ، انت زول كويس و ما فيك عيب بس انا الما.... قاطعني لمن رفع يدو عشان أسكت ، قال لي اتوقعت منك حركه زي دي ، ضحك بشماته و قال لي كيف تعايني للموظف و انتِ خاته عينك على المدير 💔
حسيتو بكلامو دا غز خنجر جوه قلبي ، قلت ليهو ما تتجاوز حدودك ، قال لي دي الحقيقه يا مها ، ما تنكري انك خاته عينك على مديرنا المتزوج !! ما عارف كيف وحده زيك تفكر كدا و تعشم نفسها في راجل متزوج و تخطط تخرب بيتو ، نهرتو و قلت ليهو سمييييير !!
قال لي ما آسف على الحـ أقولو بس انتِ وحدهـ أنانيه ... ، قال كدا و طوالي مشى ، في نفس اللحظات قصي ظهر قدامي و لقاني مع على بعضي ، قال لي عمل ليك شنو الكائن دا ؟؟
ما رديت عليهو ، قال لي شاكلك ؟؟
قلت ليهو بزهج و انت مالك ؟؟ حاشر نفسك ليه فهمني ؟؟ عايز مني شنو ؟؟ مرتك قاعده جوه فـ ليه مركز مع بنات الناس ؟؟ بتدخل فيني بصفتك شنو أساساً ؟!!
قلت كدا و مشيت خليتو واقف ، دخلت الصاله و أنا قرفانه من نفسي ، عيني طوالي وقعت على شجن و هي بترقص سااااي مع أخوها ، حسيت نفسي وحدهـ رخيصه و واطيه و أساساً قصي دا لو كان ما عايزها ما كان قعد معاها للحظه دي و هي طالبه منو الطلاق !! مرتو الأساس و الباقي كلو لعب و تسليه ، في اللحظات ديك عزمت إني أحسم نفسي و أمنع الفارغه و اقفل كل الأبواب البتجيب لي الهوى و الكلام ، أصلاً كلو باقي لي شهر و نص في الشركه بعدها حـ اتخارج ، و أنا بتكلم كدا مع نفسي ، جا اشعار في تلفوني ، لقيتها رسالة SMS من قصي ، لمن فتحتها لقيتو كاتب لي :
بالفرنسية je t'aime "جو تام"
بالإسبانية te quiero "تي كييرو"
بالتركيه Seni seviyorum "سوني سيفيورم"
بالإيطالية te amo " تيامو"
"لا أريد أيام في غاية الروعة ، أريدها عادية، عادية جداً ، مليئة بالطمأنينة و مليئة بتفاصيلك " 💜🥀
