خالتو رقيه قالت لينا أجي !! مالكم مستغربين كدا !؟
تيسير قالت ليها اتخلعوا يا أمي ، شكلهم ما مخططين للحاجه دي ، تامر ضحك و قال ليها لا لا والله ، أمو قالت ليهو اها ليه لحد الآن ماف حاجه كدا ولا كدا !؟
طبعاً انا إتوترت ، تيسير قالت ليها أمي خلاص خلي تحقيقاتك دي ، المهم قعدوا شويه و مشوا بس رؤى قعدت مع خالها ، قلت كويس تشغلو عني شويه لأني محتاجه أقعد براي ، طول الفتره الفاتت كنت بساير في تامر و بتجاوب معاهو لأني عارفه إنو مستعد يعمل أي شي عشاني ، رغم إني ما قاعده أجامل ولا بظهر عكس الجواي بس القدمو لي تامر ما شويه ، دخلت غرفتنا و قعدت حكاية ربع ساعه كدا براي ، بعدها تامر جا داخل و هو شايل رؤى قال لي مشيتي وين و خليتينا برانا ! قلت ليهو جيت عشان أنوم بس ما قدرت ، قال لي ليه في شنو !؟
قلت ليهو ماف حاجه بس عشان صحيت مع المغرب تاني ما قادره أنوم ، قـال لي ثواني طيب ، مشى رجّع رؤى لأمها و جاني ، فرش الأرض و خت عليها جداعات ، مشى المطبخ عمل شاي لبن و جاب معاهو بسكويت ، جا ختاهم و فتح الشاشه جاب mbc 2 , قعدني جنبو و خت راسي على كتفو ، قال لي بما إنو ما جايك نوم نساهر مع بعض ....المهم ساهرنا لحد الساعه 2...
بعدها استمرت حياتنا كدا و عدت أيامنا ، إهتمام تامر بي ما قل بس عارفين الإتغير شنو ! إني بديت أزهج و اختنق من إهتمامو و دا الكنت خايفه منو ، أنا زوله بتمل بسرعه ، و زي ما قلت ما بقدر استحمل علاقه لـ فتره طويله ، عشان كدا بقيت اتزهج فيهو لمن يقرب مني أو يعمل حاجه عشاني ، يوم جاتني تيسير ، قالت لي جيت أخت ليك حنه لأنو ما معقوله تقعدي كدا ، قلت ليها لا لا ما عايزا ، قالت لي ما بتعمل ليك حاجه و أساساً انتِ حتنومي صح !؟ حـ اختها ليك و نومي بيها لمن تصحي العصر طلعيها ، المهم ختتها لي و قعدت شربت معاي الجبنه ، قبل ما تمشي قالت لي ما عايزا اتحشر في حياتكم لكن انتِ و تامر من عرستوا ليكم شهرين و حاجه و لسه ماف حمل !!
ما عرفت أقول ليها شنو ، قالت لي ما تزعلي مني ما قصدي اتدخل بس إذا في مشكله أحكي لي ، نحنا نسوان زي بعض ، قلت ليها لا ماف شي ، لمن قالت حـ تمشي قلت ليها اقفلي معاك الباب يا تيسير ، قالت لي كويس قفلتو و مشت ، صلحت مخدتي و طوالي نمت ، صحيت لمن حسيت بحركه ، قبل ما أفتح عيوني كويس حسيت بـ حاجه ماشه في رجلي و إنو الجلباب بترفع ، قمت مخلوعه و طوالي لمحت واحد قام جاري طوالي و طلع من الغرفه ، قمت مخلوعه و عفصت الحنه و جسمي كلو كان برجف ، جريت برا بس ما شفت زول ، أطرافي كلها كانت بترجف و عقلي ما كان قادر يستوعب فكرة إنو في زول كان معاي جوه الغرفه و أنا نايمه و كان بحاول يعتدي علي ، مشيت لـ ناس خالتو رقيه و أنا في حاله تانيه ، تيسير جات علي و قالت لي بسم الله يا بت في شنو ؟؟ لاحظت إنو جسمي كلو برجف بالذات يديني ، دخلتني جوه و نادت أمها ، جات و قالت في شنو يا ناس ، لمن شافت حالتي و الحنه المعفصاها و أطرافي البتترعش ، إتخلعت و قالت لي بسم الله مالك يا بت ؟؟!
ما كنت قادره اتكلم عشان كدا ما جاوبت على أي سؤال فـ اضطروا يمشوا يكلموا أهلي ، جات أمي بس لأنو اصلاً أبوي في الشغل و عبدالله لافي ساي و لميس ما عارفه مشت الجامعه ولا موجوده و أصلاً وجودها ما كان حـ يشكل فرق بالنسبه لي ، أمي لمن جات و سألت الحاصل شنو خالتو رقيه قالت ليها بري والله ما عارفين مالا من قبيل بنتكلم معاها و هي ما راضيه تتكلم ، أمي قالت لي مالك في شنو يا بت ما تقعدي تسكتي لينا كدا ، قولي في شنو ؟؟ !!
تيسير ختت يدينها على أكتافي و هزتني و قالت لي قولي بسم الله يا مها و ورينا مالك ، طبعاً كنت شارده و عالقه في اللحظه الصحيت فيها و ادركت إنو في زول كان حـ يعتدي علي بس ما قدرت أشوف وشو ، في لحظات لا وعي مني بقيت اتمتم في الكلام و حكيت ليهم الحصل ، صدقوني أنا لو كنت واعيه على نفسي ما كنت حأحكي ليهم ، بس في لحظات الخوف و الخلعه الشديده الواحد مرات بتكلم طوالي من دون ما يفكر ....
كلهم اتخلعوا و قالوا لي شنووو ؟! أمي قالت لي دا منو كمان ! خالتو رقيه قالت لي راجل البدخلو بيوتنا شنو !؟ انتِ مش قافله باب الشارع عليك !؟ تيسير قالت لي بابكم حق الشارع متربس من جوه ، معقوله يكون نط بالحيطه !! ....قالوا إلا يمشوا و يقصوا دربو ، مشوا أمي و خالتو رقيه و تيسير قعدت معاي لمن جوا راجعين أمي قالت الزول دا شكلو جا داخل بـ بيوتكم دي يا رقيه بعدها دخل بيت مها ، تيسير قالت ليهم دربوا جاي من هنا ؟؟ أمي قالت ليها الدرب جايط ، كأنو لف و الدار في البيت بس ماف أثر بدل على إنو نط بالحيطه ، خالتو رقيه قالت ليها انتِ قاصده شنو !؟ منو من بيتنا ممكن يمشي ليها هناك !؟ تيسير قالت ليها ذاتو ماف زول غيرنا هنا أنا و أمي و في بيت عمي ماف غير حبوبه و عماتي ، في البيتين ماف راجل !!
أمي قالت ليهم حاجه بتحير والله ، لكن الدرب دا وقف هنا في بيتكم دا ، خالتو رقيه قالت ليها خلاص فتشي بيتنا دا كلو لو لقيتي سيد الدرب تعالي تفي في وشي ...
بقوا يتجادلوا و يتناقشوا و أنا ساكته ساي ، لحد ما بعد المغرب أنا كنت قاعده معاهم و أمي ذاتا كانت قاعده ، جا سامر داخل و قال خير يا جماعه في شنو ؟؟
ماف زول رد عليهو ، تاني عاد لينا السؤال ، خالتو رقيه قالت ليهو في راجل دخل على مرت أخوك دي و أمها قالت الراجل دا من بيوتنا دي ، أمي قالت ليها دربو القال كدا ، سامر قال ليهم شنوووو !؟ حرامي يعني !؟ جا من وين و مشى على وين ؟؟
وجه اسئلتو دي علي بس ما رديت عليهو ، تيسير قالت ليهو أنا كنت قاعده معاها ختيت ليها الحنه و لمن طلعت قفلت ليها باب غرفتها و قفلت باب النص فـ ما عارفين الراجل دا جا من وين و كيف جاتو الجراءه يفتح باب النص و يمشي يفتح باب غرفتها !!.... طبعاً سامر زعل و قال ليهم كيف زول يجي داخل و يطلع و ماف زول يشوفو !! خالتو رقيه قالت ليهو لو شفناهو كنا سكتنا ! معقوله نخلي راجل غريب يدخل بيوتنا ! قال ليهم تامر وين حالياً ، تيسير قالت ليهو في الشغل ، قال ليهم ما كلمتوهو يعني ؟؟ خالتو رقيه قالت ليهو أنا الما خليت تيسير تتصل عليهو ، ماف داعي يخلي شغلو و يجي ، أصلاً كدا كدا هو جاي فـ ننتظرو لحد ما يجي ، سامر طلع تلفونو و طوالي اتصل على تامر ، قال ليهو وين انت !؟ بعد قفل منو قال لينا تامر جاي على البيت ، أمو قالت ليهو أنا قلت ما أكلمو عشان عارفاهو بخلي كل شي وراهو و بجي جاري و أساساً ما كان حيقدر يعمل شي ، ماف زول رد عليها ، المهم جا تامر و هم طوالي حكوا ليهو ، غضب غضب ما عادي و قال ليهم دا منو البجي ماشي بيكم و انتوا ما جايبين خبرو ، أمو قالت ليهو نحنا من وين حـ نعرف إنو في راجل حـ يجي يدخل بيوتنا عشان نطلع و نقيف ليهو في نص الحوش !!....جاط فيهم شديد و ساقيني و مشينا بيتنا ، أول ما دخلنا ضماني عليهو و قال لي آسف شديد ، قلت ليهو أنا ما قادره أستوعب الحصل ، قال لي ما شفتي وشو ؟؟
قلت ليهو لا ما شفتو ، لأنو أول ما فتحت عيوني هو طوالي جرا بس كان لابس قميص أصفر ، قال لي ما حـ ارتاح لو ما عرفتو ....سكته ساي و أنا بفكر ما عرفت اقول ليهو أنا شاكه إنو دا عصام ولا لا ، قال لي حبيبي خلاص حاولي تنسي و طلعي نفسك من الحاله دي ، زحيت منو و عاينت ليهو مسافه ، قال لي شاكه في زول ؟؟!
لمن ما رديت قال لي إياك تترددي حتى لو كان مجرد شك قولي لي شاكه في منو ، قلت ليهو عصام عمك .... سكت و بقى يعاين لي ، قلت ليهو من يوم قلت ليك إنو في زول في الشباك و أنا شاكه فيهو و ما متطمنه من ناحيتو ، لمن ما قال حاجه قلت ليهو عشان كدا أنا ما فتحت خشمي من قبيل و ما قدرت أقول إنو دا عصام و.....قاطعني و قال لي أنا ما مكذبك و خلي الموضوع دا علي و تاني حـ تقعدي مع ناس أمي و لمن أجي راجع من الشغل تجي البيت .... طبعاً الكلام ما عجبني ، نهاي ما بحب اقعد مع الناس ولا بحب قعاد بيوت الناس حتى لو كانوا نسابتي....
المهم ما سمعت كلام تامر ، بقيت لمن أرجع من الجامعه بقعد في البيت بس بقفلو كويس و بقفل باب الغرفه علي و تامر تاني ما جاب لي سيرة عمو ولا قال لي عمل شنو بخصوص الموضوع و دا الزعلني منو زياده ، قلت ما بسألو لكن تاني حـ اعمل ألف حساب لنفسي ، يوم رؤى جات و شالت تلفوني بالدس ، دائماً بتعمل لي كدا و أنا بمشي أجيبو منها ، أنا ما عندي مشكله إنها تلعب شويه بالتلفون بس ما بحب فكرة إنو تشيلو مني بالدس زي الحراميه و تمشي بيهو بيتهم ، مشيت ليهم بهناك ، قبل ما أدخل ليهم في المظله سمعت خالتو رقيه قالت غيتو هي قالت كدا ، وحده قالت ليها مستهبله ساي ، بتكون جابتو هي و إلا كيف يجي راجل داخل بكل ثقه و جراءه ، تيسير قالت ليهم لو هي الجابتو ليه تجي و تقول في راجل دخل عليها !؟؟ أمها قالت ليها بتكون خاته في بالها إحتمال إنو زول يشوفو و عشان ماف زول يجي يسألها سبقتنا و جات شكت و أنا الواجعني إنها عايزا تقول دا واحد من أولادنا دخل عليها و أساساً ما كان في ولا راجل لا في بيتي لا في بيت عمهم ، عمتهم علياء قالت ليهم أظنها قالت كدا لـ تامر و اتهمت عصام أخوي عشان كدا تامر دا و حقق معاهو و هددو مع إنو عصام دا أصلاً ما كان قاعد في البيت ، نوال قالت ليهم البت دي عايزا تعمل فتنه بس ، طلعت ما هينه ساي كاتله حيلها ، رقيه قالت ليهم وحده ناس بيتهم ذاتهم بشكوا منها ، تتوقعي شنو منها ؟؟! وحده قالت ليهم هسي بتقعد براها في البيت ؟؟ تيسير قالت ليها اي ما بتطلع إلا للجامعه و مع إنو تامر قال لينا تاني تجي و تقعد معاكم بالنهار و لمن هو يجي ترجع بيتها بس ما جات ، عمتهم نوال قالت ليها لا خلاص بقت واضحه ، معناها عايزا الجو يفضى ليها ، يغسي عليها الما بتخجل دي !! معقوله تدخل راجل بيتها و كمان في غياب راجلها من دون خجل !!....
طبعاً عرفتهم بتكلموا عني ، أصلاً هم من يوم الحصل بقوا يعاينوا لي بعين الرخصه بس ما اتوقعتهم يتونسوا بي بالطريقه دي قدام الناس !!...مفروض أدخل عليهم و اشاكلهم و أجوط فيهم و أحاول أبرر ليهم و ابرئ نفسي من التهمه الوسخه دي صح ؟؟
بس ما عملت كدا ، لا بكيت لا نويت أشاكلهم ، شلت في قلبي و حسيت بنار جواي ، رجعت و جيتهم بعد دقايق ، لقيتهم خفوا بس عماتهم نوال و علياء قاعدات ، من دون ما أسلم قلت لـ تيسير رؤى وين ؟؟ قالت لي جوه بتحضر في التلفزيون ، طوالي مشيت دخلت عليها و قلت ليها رؤى جيبي تلفوني ، قالت لي ما عندي ، قلت ليها عندك جيتي و شلتيهو من البيت ، جيبيهو عشان بعدين ما أكلم ليك خالك ، قالت لي ما عندي و فتحت لي يدينها ، جيت رفعت اللحاف و المخده الكانت راقده فيهم بس ما لقيتو ، قلت ليها رؤى طلعيهو ياخ عايزاهو ضروري ، جات تيسير و قالت لي في شنو ؟؟ قلت ليها رؤى شالت تلفوني و بتقول ما عندها ، قالت ليها صح الكلام دا يا رؤى !؟ قالت ليها لا ، أنا اصلاً زهجانه و الزاد زهجي و زعلي كلامهم القبل شويه عني ، قلت ليها بنهره التلفون معاك طلعيهو سرعه ، تيسير قالت لي طيب ما تجوطي فيها كدا ، جات خالتو رقيه داخله و معاها عمات تامر الإتنين و قالت خير في شنو كمان ؟!! تيسير طوالي حكت ليهم ، عمتي رقيه قالت لي انتِ شفتيها لمن شالتو ؟؟ قلت ليها هي كل يوم بتعمل الحركه دي و انتوا شايفني كل مره بجي هنا و بشيلو منها ، كنت خاتاهو في غرفتي و هي كانت قاعده مسافة أصلي لقيتو ماف ، قالت لي و دا معناهو انها شالتو !؟؟ يا بت هوووي بطلي حركاتك دي ! علياء عمة تامر قالت لـ رؤى انتِ شلتي تلفونها ؟؟ رؤى قالت ليها لا ما شلتو ، عمتهم التانيه نوال قالت لي الشفع ما بكذبوا ، تلفونك دا شوفي نفسك جادعاهو وين ، قلت ليهم أنا متأكدة إنو معاها ، إتلفت على رؤى و قلت ليها بحده : سرعه طلعيهو ، أمها طوالي ساقتها من يدها و طلعت بيها من الغرفه الكنا فيها ، قالت لي كان مرهـ تعالي لاحقاها تاني ، عايزا تشاكليها بسبب حاجه هي ما عملتها !!؟
قالت كدا و طلعت مع بتها و أنا خالتو رقيه و عمات تامر لموا فيني و قالوا لي أصلك دايره المشاكل و من زمان منتظره ليك فرصه ، طلعت منهم و أنا واصله الحد من الغضب ، أنا متأكدة إنو رؤى شالت تلفوني ، البت دي رغم إنها شافعه بس لئيمه و بتتصرف تصرفات ناس كبار و بتعرف تكذب كويس ، أنا الصفات دي ملاحظاها فيها من بدري بس ما كنت بدخل نفسي فيها و ما محتكه بيها ، حتى لمن تجينا في البيت تامر هو الوحيد البشاغلها و بلعب معاها ، أنا ما بعادي لي شافعه ولا بكرها بس هي حرقة روحي بكذبها و تصديق أهلها ليها ، رجعت بيتي و قلت إلا ما تامر يجي ، حـ أخليهو يتصل في تلفوني عشان أعرف هو وين ، متأكده إنو هناك ، المهم بعد نص ساعه كدا جات علياء عمتو ، قالت لي ما تكوني زعلتي !!؟ ما رديت عليها ، قالت لي معليش حقك علينا لكن رؤى دي ما بتكذب ، قالت ما شالتو معناها ما شالتو ، ولا اتكلمت معاها ، خليتها تقول العندها و مشت ، قلت نهاي ما بفتح خشمي مع وحده فيهم لحد ما يجي تامر و يشوف شغلو معاهم ، تامر لمن جا بعد المغرب قبل ما يقول ماشي ليهم بهناك قلت ليهو تعال عايزاك في موضوع ، قال لي خير في شنو ؟؟
قلت ليهو قبيل حصل.....الخ ، طبعاً ما كذبت في شي ، قلت الحصل زي ما هو ، حتى لمن اتكلموا عني و قالوا إني جبت الراجل داك ، تامر زعل شديد من مكانو طوالي قام و مشى ليهم ، بعدها عِلت أصواتهم و بقوا يتشاكلوا ، خالتو رقيه طوالي جاتني ناطه ، قالت لي يا وسخه يا فتانه نحنا متين جبنا سيرتك !؟ طبعاً وراها جات تيسير و عماتها و تامر جا لاحقهم ، قلت ليها أنا سمعتكم ☺️
قالت لي تسمعي الطرش ان شاء الله نحنا اسمك دا ذاتو ما ذكرناهو ، قلت ليها طيب دي منو دي الدخلت راجل في بيتها و لمن راجلها قال ليها أمشي أقعدي مع ناس أمي ما مشت !! قالت لي يعني انتِ جبتي راجل دخلتيهو البيت عشان كدا قلتي قاصدنك !؟؟
قلت ليهم أنا متأكدة انكم كنتوا بتتكلموا عني ، عمتو نوال قالت ليهو تامر أنا النقاشات الفارغه دي ما بتنفع معاي ، مرتك دي نحنا سيرتها ما جبناها ، ايوه قطعنا و اتكلمنا في الناس بس اسمها ما ذكرناهو ، أمو قالت ليهو بالنسبه لي الموضوع دا انتهى شوف البعدو ، تيسير قالت ليهو نجي لـ قصة التلفون و برضو منتهيه بالنسبه لي لأنو رؤى بتي ما شالتو و هي ما حراميه عشان مرتك تجي تشاكلها في نص بيتنا ، قلت ليهو تامر اتصل في تلفوني و خلونا نمشي بهناك عشان تتأكدوا بنفسكم ، فعلاً تامر طلع تلفون و إتصل في تلفوني ، أول ما اتحركنا عشان نمشي البيت التاني سمعنا صوت رنة تلفون ، بعرفها كويس دي رنة تلفوني !!!....الصوت كان جاي من جوه و نحنا في الحوش ، تامر عاين لي و قال لي مش دي رنة تلفونك !!؟
بإستعجال دخلت جوه و اتفاجأت لمن لقيت التلفون في الصاله !! كان واقع تحت الكرسي !! متأكده إنو ما كان موجود هنا !! ديلك كلهم جوا لاحقني و هم شمتانين ، تيسير قالت لي دا تلفونك ولا ما ياهو !؟؟
قلت ليهو تامر أنا متأكده إنو التلفون دا ما كان هنا !!...ما عارفه وصل هنا كيف !!... اتذكرت إنو قبيل عمتو نوال جاتني قلت معناها ختتو و طلعت ، إتلفت عليها و قلت ليها دي انتِ صح ؟؟ لمن جيتيني قبيل جبتيهو معاك و ختيتيهو تحت الكرسي عشان تطلعيني غلطانه صح !!؟
قالت لي يا بت هوي كان جنيتي قولي لينا ، أمو قالت ليهو مرتك دي شكلها إشتهت ليها فتنه !! ما معقوله البتعمل فيهو دا !! عمتو علياء قالت ليهو نحنا العندنا قلناهو ليك و أنا حلقي دا نشف من الكلام الكتير ، تاني ما عندنا ليك لا شرح لا تبرير ، لو عايز تصدقها فـ انت حر بس ما تعمل لينا وجع راس بسبب الموضوع دا تاني ....قالت كدا و طلعت طوالي و ديلك لحقوها ، قلت ليهو تامر ...رفع لي يدو بمعنى أسكتي ، قلت ليهم هم كذابين و منافقين و.....نهرني و قال لي البتتكلمي عنهم ديل أهلي ما أصحابي فاهمه ولا لا !!
قلت ليهو حتى لو أهلك دا ما معناها إنهم ما بكذبوا ، أنا قلت ليك الحقيقه و بعد دا انت حر ، قلت كدا و مشيت خليتو ....
من هنا بدت المهاترات و المشاكل ، أهلو كل مرهـ عاملين لي قصه و موضوع جديد !! في البدايه كنت مستغربه و بسأل نفسي أنا عملت ليهم شنو عشان يعادوني كدا !! أنا معظم وقتي في بيتي و قافله بابي علي فـ ما كنت عارفه هم مالهم معاي ، بس من خلال مشاكلهم الكتيره و الكلام البقولوهو لي اثناء نقاشنا و قطيعتهم فيني ، عرفت إنو إنعزالي عنهم هو المضايقهم ! قالوا إني مفتريه و شايفه نفسي و بكرهم و ما مقيماهم و عايزا أمنع تامر منهم عشان كدا ما قاعده أجيهم ! و تيسير طلعت أصلاً زعلانه من بدري من يوم كان تامر مفروض يطلع أولادها و يفسحهم بس عشان كنت مريضه قعد معاي و ما ساقهم و الجمعه البعدها برضو إنشغل و ما ساقهم فـ هي إفتكرت إني عايزا أوقفو منهم ، قالت إني للسبب دا إتهمت بتها إنها سرقت تلفوني ! لأني عايزا أطلع أولادها غلطان قدام تامر و اخربو علاقتو بيهم !!
حرفياً ديك كانت أكتر فترهـ تعبت فيها نفسياً و تامر بقى واقع بين نارين و ما عارف يقيف مع منو ، عادة الواحده لمن بيت راجلها يضيق عليها و تكتر مشاكلها مع نسابتها بتلجأ لأهلها و بتمشي بيت أبوها ، بس انا أهلي ماف فرق بينهم و بين نسابتي ، ما كنت عارفه أمشي وين عشان أهرب من المشاكل دي كلها ، عشان كدا بقيت أرجع من الجامعه قريب من المغرب و يوم يكون ما عندي جامعه ، بقفل باب الغرفه علي و نهاي ما بفتحو حتى لمن يجوا رؤى و أخوانها ، طبعاً وصلوا حركتي دي لـ تامر و قالوا إني طردت أولاد أختو ، لمن جا سألني قلت ليهو ما عايزا اتعب خشمي معاكم ، أي كلام عايز تصدقو صدقو ولو عايز تطلقني طلقني ما ناقصه وجع راس أنا ، لأني مليت منك و من مشاكل أهلك الما بتخلص دي ، أنا والله ما عندي طاقه للمهاترات دي كلها ولا قاعده أحب أبرر لزول أو اشرح بالذات انت مستحيل أبرر ليك لأني قبل العرس كلمتك و كذا مره أشرت ليك على عيوبي الأصلاً انت عارفها و حذرتك ، مع ذلك جيت و اتقدمت لي ، أنا ما جبرتك علي يا تامر ، اتذكر إنو دا اختيارك انت ، و هسي برضو ليك حرية الإختيار و الطلاق خيارك الأول ☺️
كلنـا متعبون .. نتألم بطريقة أو بأخرى ..
جميعنا عشنا ظروفًا ظنًا منا إننا إنتهينا ..
نبكى أوقات عجزنا و ضعفنا ..
نودع أشخاصًا ما كانت تطيب الحياة إلا بهم ..
نبتسم رغم كل الإنكسارات ..
لكن نبقى نبحث عن الأمان فى مكان ما ربما نجده ...
لكاتبه
يتبع......
