بقيت أفتش على تلفوني زي المجنونه لحد ما لقيتو ، بإستعجال إتصلت على قصي ، رد علي طوالي ، قبل ما يقول حاجه ، قلت ليهو واااي يا قصي ألحقني ، في زول بضرب في الباب شكلو دا.... قاطعني و قال لي افتحي ، دا أنا ! قلت ليهو بالجد !؟ قال لي تعالي شوفي بنفسك ، طوالي طلعت و مشيت عاينت بفتحة الباب ، لقيتو فعلاً دا هو ، لمن فتحت ليهو قال لي و هو بضحك تلفونك دا كنتِ خاتاهو وين ، اتصلت عليك كتير ، لمن عاينت لسجل المكالمات فعلاً لقيت مكالمات منو ، قلت ليهو التلفون دا أنا ذاتي ما كنت عارفـه نفسي جادعاهو وين ، المهم دخل و قفل الباب ، كان شايل معاهو أكياس ، قلت ليهو متصل علي قدر دا ليـه !؟
قال لي ضربت الباب و لمن ما فتحتي لي اتصلت عليك و لمن ما رديتي علي ظنيت انك عملتي شي في نفسك ، قلت ليهو زي الإنتحار !؟
قال لي ما بعيد عليك .... خفتي ولا شنو عشان كدا ما فتحتي !؟ قلت ليهو لا بس كنت نايمه ، قال لي بتبالغي ! الساعه ماشه لـ 9 و انتِ لسه نايمه !؟ قلت ليهو أعمل شنو يعني ؟
قال لي لو عايزا تعملي حاجه بالجد كنتِ عملتيها ، بس شكلك إخترتي إنك تعزلي نفسك و تكتفي بالحُطام و الخسارات !.... ما رديت عليهو ، دخلت الهول و قعدت ، أما هو دخل الحاجات المطبخ و جاني راجع ، شغل التلفزيون و قال لي على الأقل خليك مواكبه ، تابعي أخبار و أحضري برامج أو مسلسلات أو أفلام المهم رفهي عن نفسك و فيديها ، قلت ليهو ديل كلهم أنا ما بحبهم ، قال لي أشك إنو في حاجـه بتحبيها في الدنيا دي !؟ قلت ليهو فعلاً ما عندي حاجه بحبها في الدنيا دي ولا حيكون في شي أحبو ....
قال لي طيب شربتي الشاي ؟... نسيت انك صحيتي قبل شويه فأكيد ما شربتيهو ، شايف انك الأحسن تفطري عديل ، قلت ليهو شايفه موضوع إني صاحيه في وقت متأخر دا مزعلك شديد !
قال لي ياداب حسيت إني بتكلم مع مها اللئيمه العرفتها زمان ! قلت ليهو ما شايفه أي لئامه في الموضوع ، قال لي اسألك سؤال !؟
قلت ليهو لو قلت ليك لا حـ تسأل !؟
قال لي أكيد ، قلت ليهو أصلاً عـارفه انك على كل الأحوال حـ تسأل ، بس لو السؤال ما عجبني أو ضايقني ما تزعل لمن ما أرد عليك ، قال لي تمام .... انتِ على طول بتصحي متأخرهـ كدا !؟ قلت ليهو أيوه ، مرات لحد الساعه 9
قال لي ما بتصلي ؟؟
هنا قلبي نتح ! لي فترهـ بقيت ما مواظبه على صلاتي و لمن كنت في المصحه حالتي كانت بطاله و كنت 24 ساعه مكتئبه بين 4 حيطان ، سؤالو حسيتو غريب علي !!.... أنا رغم كل شي عشتو و كل حاجه مريت بيها عمري ما خليت زعلي أو ضيقي من الحياة يمنعني من الصلاة ، سكته و ما رديت على سؤالو ، ما لأنو ما عندي جواب ، لأنو صعب علي أشرح ليهو ، أنا لمن قنعت من الحياة دي قنعت من أي شي كنت بعملو و إكتفيت بالجلوس في الركن أو الزاويه....
لمن سكاتي طال ، قال لي أكيد ليك حرية الإجابه أو لا ، بس خليني أقول ليك ، الواحد كل ما إبتعد عن ربنا كل ما همومي و مشاكلو زادت ، حـ تقولي لي يعني الناس البتكون قريبه من ربنا ما بتعاني أو ما بتمر بمشاكل !؟
هم بعانوا و بتختوا في إبتلاءات و إمتحانات صعبه و كتيره بس عارفه الفرق شنو ؟... الفرق إنهم عارفين بعد إنو العسر يسر و بعد الكرب فرج ، يقينهم و حسن ظنهم بالله و محافظتهم على صلواتهم و تمسكهم بيها هي البتعينهم و بتصبرهم على الشدائد ، صدقيني عدم الصبر دا شين ، يعني إذا كدا كدا قدر ربنا نافذ فـ ليه الواحد يضايق نفسو و يكرهـ عيشتو في الوقت الممكن يتقرب فيهو أكتر عن ربنا و يصبر على مصيبتو !.... صدقيني نحنا المحتاجين لـ ربنا ما هو ، فكونو الواحد يزعل و ينكد عيشتو و يبغض حياتو و يترك عبادتو بسبب إعتراضو على قضاء ربنا دا واحد من الأسباب الما حـ تخليك مرتاح طول عمرك ، مهما تعمل و وين ما تمشي حتحس بعدم الراحـه ، العبادات دي بتفيدك انت و تركها ما بنقص من قدرة الخالق ، بالعكس انت كدا بتعاقب نفسك و بدل ما تهونها عليها و ترضى بالمكتوب بـتصعبها على نفسك و بتزيد الطين بله و ........الخ
بقى يتكلم معاي و انا ساكته بسمع فيهو ، في نهاية كلامو قال لي كل العايز أقولو ليك يا مها إنو مهما الدنيا دي جارت و قست عليك ما تخلي صلاتـك ، حتى لو حسيتي باليأس و عدم رغبتك في الحياة برضو ما تخليها ......
بعد سكت بقى يعاين لي و منتظرني أقول حاجه ، لمن ما قلت شي وقف على حيلو عشان يمشي ، قال لي اليوم كان مفروض أجي و أسمع قرارك بس شكلك محتاجه زمن لسـه أو متخذهـ قرارك من بدري و هو انك تقعدي كدا و تخلي الناس تشفق عليك ☺️
قال كدا و إتحرك من قدامي ....
أنا والله ما قاعدهـ أحب أبرر لـ زول أو اوريهو أنا شنو ، بس في نقطة الصلاة دي حسيت إني لازم اتكلم ، طلعت برا و لحقتو ، قلت ليهو ثواني ، وقف لي جنب الباب ، لمن وصلتو قلت ليهو على فكرهـ أنا لا كافره لا مسيحيه لا ملحدهـ ، ما بشكر نفسي بس انا الصلاة دي ما حصل يوم زول نبهني عليها لأني ما محتاجه ينبهوني ، أنا ما حصل قبل كدا خليت ظرف أو أي شي تاني يمنعني من صلاة .... بس لمن كنت في المصحه..... قاطعني و قال لي ما تفهمي كلامي غلط ، صدقيني أنا ما مشكك فيك ولا قصدي الإهانه و أكيد انتِ لا كافره لا مسيحيه لا ملحدهـ ! الصفات دي بعيدهـ كل البعد عنك و على فكرهـ أنا قلت كدا لأني لاحظت من يوم جبتك هنا إني ولا يوم شفتك بتصلي ، طبعاً ما نسيت المصحه و كنت عارف إنو عدم انتظامك في الصلاة أو انقطاعك عنها بدا بعد ما دخلتي المصحه العقليه ، عشان كدا أنا فتحت معاك الموضوع دا و ما قصدي أي تشكيك ، هزيت ليهو راسي بس ، قال لي يلا حـ أمشي بعد دا اتأخرت على شغلي .... كان فاتح الباب لمن قال جملتو الآخيره دي ، في باب البيت المقاصدنا كانت واقفه زحل الجاتني قبل كدا مع رحاب ، رفعت يدها و سلمت علينا و سألتنا عن حالنا ، بعد سلمنا عليها ، قالت لي بعدين عاملين قعدة صندوق في بيتي لازم تجي ، عاينت لـ قصي و هزيت ليها راسي ، ضحكت و قال لـ قصي ولا انت ما بتخليها ؟؟
قال ليها أبداً والله ، حـ تجيكم طوالي ، قالت ليهو تمام ، بعدها دخلت و قفلت الباب ، قلت ليهو ياريت لو انت ما فتحت الباب ، قال لي ناس أمدر ديل ناس طيبين و بحبوا يتداخلوا بين بعض و بحبوا يدخلوا في الناس ، مجتمعهم مترابط شديد ، تحسيهم حنينين على بعض ، قلت ليهو يعني نحنا في أمدرمان ؟؟
قال لي ما عارفـه يعني ؟؟
قلت ليهو لا ، لمن ركبت معاك راسي كان ضارب و الشرق من الغرب ما كنت عارفاهو ، قال لي لو كنتِ بتطلعي على الناس كان عرفتي نفسك ساكنه وين ، ما رديت عليهو ، طلع كدا و قبل ما أقفل الباب تاني رجع و قال لي حاجه آخيره ، الناس ديل يا مها زي ما قلت ليك طيبين و بسيطين و على نياتهم ، بتمنى إنك ما تجرحيهم سواء بالكلام أو التعامل ، خلي أسلوبك فيهو لين شويه ، قلت ليهو لو مشيت ليهم حـ يضايقوني بأسئلتهم ، حـ اضطر أفكر في اجوبه و أكذب كتير في موضوع الزواج الكذب دا !!
قال لي جاوبي حسب السؤال و خلاص ! و ممكن تغيري الموضوع و تقلبي الطاوله ، بدل ما هم يسألوك ، انتِ اسأليهم و إتعرفي عليهم ، قلت ليهو مهمه صعبه !! قال لي دا في صالحك ، على الأقل تطلعي نفسك من العزله و الوحدهـ العايشه فيها دي !!
المهم لمن رجعت بقيت قاعدهـ و بفكر ساي ، لمن الضهر أذن حسيت كأنو دي أول مرهـ اسمع فيها صوت الأذان ، قمت دخلت الحمام و قلت حـ ابدا من جديد ، اغتسلت و لمن طلعت اتوضيت و فرشت المصلايه عشان أصلي ، أنا ما عملت كدا عشان كلام قصي و أساساً أنا ما كنت منتظرهـ يجي زول عشان يكلمني عن تقصيري ، عملت كدا لأنو أصلاً الصلاة دي ما حاجه غريبه علي ولا حاجه جديده ، دي حاجه واجبه علينا و دا المفروض نعملوا كلنا ، بعدها بقيت أدعي إنو ربنا يغفر لي و استغفرت كتير ، دخلت جوه فتشت الدولاب لأني قبل كدا لمحت فيهو مصحف ، لمن لقيتو طوالي فتحتو و قعدت أقرا في سورة البقرة لحد ما سمعت صوت الباب ، لمن مشيت و عاينت بالقدهـ لقيتها بت يمكن عمرها 12 ، 13 سنه ، لمن فتحت ليها الباب قالت لي أمي قالت ليك تعالي أشربي الجبنه ، قلت ليها انتِ بت زحل ؟؟ قالت لي آي ، قلت ليها خلاص قولي ليها هسي حـ تجي...
دخلت جوه فتحت الدولاب ، لقيت فيهو 3 عبايات ، لبست وحده سودا مع طرحه سوداء و طلعت مشيت بيت زعل ، لقيت معاها كميه من النسوان ، طبعاً أجواء زي دي ما بتعجبني ، سلمت عليهم و قعدت معاهم ، ياداب كانوا بقلوا في البن ، كانت بتقلي فيهو وحدهـ اسمها عواطف ، رفعت طوة البن و جات لافه بيها علينا ، قالت لينا شمن ريحة القلوهـ ، طبعاً أنا عيوني وجعوني بسبب دخان البن و ما حبيت ريحة القلوهـ ، النسوان ضحكوا و قالوا لي شكلك ما متعودهـ على جبنة الكانون ، قلت ليهم لا والله ، أمي و نسوان الحله على طول بعملوهو و بحبوها أكتر من جبنة البتوجاز ، وحدهـ منهم قالت لي ناس أمك ساكنين وين ؟؟ قلت ليها في الشجرهـ ، زحل قالت لي يا حليلك بعيدهـ عن أهلك والله ، رحاب قالت لي أهل راجلك ما قريبين منك ؟
طبعاً هنا اتوترت و بلعت ريقي ، اتذكرت إنو طيف أكتر من مرهـ قالت إنهم ساكنين بحري ، قلت ليها ساكنين في بحري ، قالت لي برضو بعاد ، بس أحسن ليك ، النسابه قربهم ما بندار والله ، النسوان قعدوا يضحكوا على كلامها ، قالت ليهم عاد أنا ما مجربه مغصة النسابه و العيشه معاهم ، الحمدلله ربنا ريحني منهم ، المهم بقوا يتونسوا و يضحكوا لحد ما الجبنه بقت جاهزه ، كانوا عاملين فشار و فنكوش و كيك و زلابيه و عدسيه ، رحاب قالت لي عايزا تشربي في كبايه ولا فنجان !
نحنا غيتو بنشرب بالفناجين ، قلت ليها ما مشكله بشرب معاكم ، المهم أدوني فنجاني و الشفع طوالي جوا داخلين و بقوا يخمشوا في الصحاني و أمهاتهم جايطات معاهم ، زحل طلعت و جات شايله فرع شجرهـ قالت ليهم الليله بقطع الفرع دا كلو فيكم لو ما طلعتوا من هنا ، طوالي قاموا جاريين و هم بضحكوا ، قالت شفع غلباوين شديد والله ، رحاب جابت صينيه ختت فيها عدسيه و فشار و زلابيه و كيك و قالت ليهم حـ أمشي اطلعها ليهم برا عشان ما يجونا تاني ، عواطف قالت ليها أنا قبيل أديتهم بس ديل بحبوا الشغب ، أولادي حالتي حذرتهم و قلت ليهم ماف زول يجيني هناك كأني ما اتكلمت معاهم ، زحل قالت ليها ياهو حال الشفع .... المهم كان معاهم حبوبه كبيرهـ كدا اسمها بدريه ، قالت لي من عرستي ليك كم ؟؟
طبعاً أنا الأسئله دي بتوترني ، قلت ليها شهرين و حاجه ، قالت لي و لسه ماف حاجه كدا ولا كدا ؟؟
بلعت ريقي و قلت ليها لا لا لسه ، عواطف ضحكت و قالت ليها يا حاجه بدريه ديل ياداب عرسان جداد و بدري عليهم و بت ذاتا لسه صغيره ، حبوبه بدريه قالت ليها نحنا في زمنا البنات بعرسوا من عمر 13 و الوحدهـ بتحمل طوالي من أول شهر ، بس انتوا عادي الوحدهـ تتم سنه بعدها تحمل ، زحل قالت ليها إذا ربنا أراد كدا يا حاجه بدريه الناس إلا ترضى بالمكتوب !؟ قالت ليها أنا قصدي الببلعن ليهن مصايب عشان يمنعن بيها الحمل ، طبعاً أنا بقيت أعاين ليها بس و الكلام ما عجبني و دا كان ظاهر علي ، النسوان حسوا بي ، ضحكوا و قالوا لي حاجه بدريه دي أصلاً كدا ، بتخبط سااااي في الكلام ، قالت لي أعفي لي يا بتي لو كلامي زعلك ، قلت ليها لا لا ما زعلت ، عاينت لـ رجليني و قالت لي ليه ما متحننه ؟؟
النسوان بصوت واحد قالوا ليها حاااجه بدرييييه !!!
قالت ليهم خلاص سكت ، بعدها بقوا يتونسوا عادي و الجو بقى لطيف و الونسه كانت خفيفه و ظريفه ، صراحة ما إتوقعت نفسي إنو أقعد معاهم للعصر ! بس زي ما قال قصي الناس ديل بسيطين و طيبين ، والله حسسوني كأنهم بعرفوني من زمان ، حسيت نفسي قاعدهـ مع ناس بقربوني ما ناس أول مرهـ ادخل بيتهم ! بعد ما صلينا العصر طلعنا كلنا من بيت زحل و نحنا لسه بنتونس في الشارع ، عواطف قالت لي بكرا تعالي داخله علي ، أنا بيتي بعد بيت رحاب دي بـ بيتين ، البيت بابو أزرق داك بس دا بيتي ، قلت ليها كويس بجي عليك ان شاء الله ، حاجه بدريه قالت لي و أنا بيتي في الشارع التاني ، لو جيتي لـ رحاب دي بتجيبك لي ، قلت ليها ان شاء الله ، المهم كل وحدهـ بقت تقول لي إلا تجيني و أنا شغاله ليهم طيب ان شاء الله ، لمن رجعت البيت كنت حاسـه براحه و إحساس حلو شديد ، بعدها عدت الأيام و مر أسبوع قصي ما جا فيهو ، يوم كنت مع عواطف في بيتها و دا بعد إصرار من رحاب إنو نمشي ليها ، كانت بتورق في خضرهـ فـ بقينا نورق معاها ، كانت بتتكلم عن الشغل و قالت لـ رحاب إنها خلت الشغل في المدرسه و عايزا تشوف ليها حاجه تانيه ، قلت ليها انتِ أستاذه ؟؟
ضحكت و قالت لي ياريت ، لكن أنا بعمل الفطور للمعلمين هنا في البيت و بوديهو ليهم في المدرسه بس قلت عايزا أشوف لي شغلانيه تانيه ، رحاب قالت ليها شغل تلقيهو وين ! هم العندهم شهادات ما لاقين شغل يا عواطف ، قالت ليها شغلي البفكر فيهو دا ما عايز ليهو شهاده ، قالت ليها إلا لو عايزا تبيعي خرد .... ظنيت إنو عواطف حـ تزعل بسبب كلام رحاب بس الإتنين كانوا ميتين من الضحك !!
عواطف قالت ليها شفتي دكان عوض الكريم عايزا اأجرو منو ، رحاب قالت ليها و تشتري بضاعه عشان تبيعيها في الدكان !؟ قالت ليها لا ، حـ اعملو نظام مطعم أو استراحه صغيرهـ كدا ، أنا أكلي سمح و يدي طاعمه و عايزا أستفيد من موهبتي دي ، رحاب قالت ليها النصيحه أكلك سمح والله يا عواطف ، عواطف قالت ليها تسلمي لي يا رحوبه ، عاينت لي و قالت لي رايك شنو ؟؟
قلت ليها فكرهـ ممتازهـ والله ، ربنا يوفقك و يفتح ليك أبواب الرزق ، قالت لي آمين جمعاً يا رب ، رحاب قالت أنا عندي كراسي و طاولات في المخزن حقي تعالي شيليهم ، قالت ليها ما بتقصري والله يا رحاب ، اها انتِ ما ناويه تجيبي بضاعه تاني ؟؟ قالت ليها ناويه ولا بس منتظرهـ الراجل اب كرش دا يرسل لي القروش ، قلت ليها دا منو ؟؟
عواطف ضحكت و قالت لي دا راجلها ، اسمو جلال ، بالجد ضحكتني ، قلت ليها ليه بتقولي عنو كدا !؟ قالت لي راجل فقر خلاص و بخيل ، قروشو دي كلها كابيها في كرشو دي .... طبعاً أنا و عواطف ضحكنا ضحك ... قعدنا اتونسنا كدا للعصر بعدها قلت لـ رحاب خلينا نمشي بعد دا ، قالت لي آي أرح ، راجلك بكون جا ، غيتو حيكون شمانا شديد لأننا مخلين مرتو 24 ساعه برا البيت 😂 قلت ليها لا لا والله ما حيفكر كدا ، المهم ودعنا عواطف و طلعنا مشينا ، لمن وصلنا قلت ليها اتفضلي معاي البيت ، قالت لي مفروض أنا الأقول ليك كدا لأنو واقفين جنب بيتي ، قلت ليها البيتين جنب بعض ، أرح معاي ساي ، قالت لي بري كفاني حوامه ، الراجل اب كرش دا بعد دا حـ يطلقني و أنا عندي شفع أقع بيهم وين ، ضحكت على كلامها ، قالت لي يلا مع السلامه و طوالي دخلت بيتها ، أنا ذاتي دخلت البيت ، طبعاً تلفوني كنت ناسياهو في البيت ، لمن شلتو و فتحتو لقيت 4 مكالمات من قصي ، لمن رجعت ليهو ما رد علي ، خليتو و مشيت دخلت المطبخ ، كسلت أعمل حاجه و أساساً الشاي و الجبنه الشربناها مع عواطف ملت لي بطني ، حسيت نفسي نعسانه ، رجعت الغرفه تاني عشان أنوم لقيت تلفوني برن ، كان قصي ، لمن رديت عليهو قال لي كيفك ، قلت ليهو كويسه الحمدلله ، قال لي كنتِ بعيدهـ عن التلفون ولا شنو ؟؟
قلت ليهو فعلاً طلعت مع رحاب ، قال لي دي منو !؟ قلت ليهو جارتي ، قال لي اهااا كويس ، دا تطور ملحوظ ، قلت ليهو طلعوا ناس حلوين و طيبين ، قال لي أنا قلت ليك كدا .... تاني ما عرفنا نقول شنو ، قال لي حـ اقفل بعد دا ، قلت ليهو طيب و قفلنا على كدا....
بعدها مرت الأيام و قصي بقى ما بجي على طول و أنا لحد الآن ما قلت ليهو حاجه أو وريتو قراري ، عواطف أجرت الدكان من عوض الكريم ، نقلت جزو من مطبخها هناك و شالت طاولات رحاب و كراسيها ، بقت تفتح مع العصريه عشان بكون في ضل تخت فيهو الكراسي و الطاولات ، بتشتغل لحد الساعه 9 بليل بعدها بتنادي أولادها الصغار يدخلوا ليها الطاولات و الكراسي جوا الدكان و بتطبلهم و بتجيهم تاني يوم و هكذا ،نحنا في الأيام الأولى مشينا و ساعدناها....
طبعاً أنا فكرت الشغل بقت لافه لي في كراسي ، ما شاء الله كل النسوان الفي الحي شغالات و بجازفوا القروش دي بأي طريقه ! فيهم التاجرهـ و فيهم الخياطه و فيهم البترسم حنة و فيهم البتمكيج و عامله ليها صالون تجميل و فيهم ستات الشاي و فيهم فراشيات في المدارس و الأسواق ، يعني ما شاء الله نسوان يشهوك الشغل ، يوم مشيت ليها و قلت ليها يا عواطف أنا عايزا أشتغل معاك ، استغربت فيني ، قلت ليها ما عايزا قروش كتيرهـ والله 😅😂
ضحكت و قالت لي ما كدا لكن راجلك رايو شنو ؟؟ ما ظنيت يرضى ليك والله ! قلت ليها هو ما عندو مانع و بعدين ذاتو أحسن لي ، الشغل قريب هنا و متى ما حبيت أرجع البيت برجع بـ رجليني ، قالت لي والله انا ما عندي مانع لكن .... قاطعتها و قلت ليها صدقيني هو ما عندو مانع ، قالت لي سمح بتعرفي تعملي شنو ؟؟
قلت ليها ممكن أبقى ليك كاشير و أغسل ليك الصحون و انتِ تطبخي ، قالت لي طيب يا زوله ما عندك أي مشكله ، قلت ليها بالجد شكراً كتييير ليك يا عواطف ، قالت لي يا بت انتِ عويرهـ ولا شنو !؟ ما تقولي لي كلمة شكراً دي تاني ، بعدها طوالي نزلت اشتغل معاها ، الأكل الكانت بتعملو بوش و عصيدة بالروب و التقليه و كسرهـ بالتقليه و مرات بتنوع و بتعمل شية ضان ، قالت لي شويه شويه حـ اعمل أكلات جديدهـ بس الأمور دي تظبط شويه ، قلت ليها ان شاء الله ، أنا الشغل كان عاجبني لأنو مالي لي فراغي ، بس كنت بتضايع من مشاغلات الرجال ، البجونا كلهم رجال ، ياهم ناس الحي و الأحياء الجنبنا ، معظمهم عمال أو عزابه بجوا يتعشوا عندنا ، عواطف كانت بتقول لي ما تشتغلي بيهم ، ديل قليلين أدب ساي طنشيهم ، يوم قررت أعمل قعدة جبنه في البيت ، لأني خجلت من نفسي ، النسوان ديل ما قصروا مني و كل يوم أنا معزومه في بيت وحدهـ و ما حصل جبتهم البيت ، ايوهـ هو ما بيتي لكن هم ما عارفين الحاجه دي ، المهم رشيت الحوش كلو و كنستو و دخلت جوه مسحت الأرضيه و غيرت موقع كراسي الجلوسي و ناديت رحاب و خليتها تجي تعمل معاي حاجه خفيفه زي الفشار و الزلابيه و الفنكوش ، قلت ليها عايزا تسالي و فول أختهم في الصينيه ، قالت لي حاجه بدريه بتلقي عندها لأنها بتبيعهم ، قلت ليها طيب حأمشي ليها ، قالت لي لا لا خلي معتز ولدي يمشي ليك ، فعلاً نادتو بالحيطه و قالت ليهو تعال لي سرعه عايزا أرسلك ، جاها طوالي و هو بطنطن ، معتز دا تقريباً عمرو 10 سنوات ، دخلت جوهـ عشان أجيب ليهو القروش جيت لقيتو ماف ! قلت ليها أبى يمشي ولا شنو ؟😂
قالت لي لا مشى ، قلت ليها من دون قروش !! أنا دخلت أجيبهم ليهو ، قالت لي عندي قروش رابطاها في طرف توبي أديتها ليهو ، قلت ليها بتبالغي والله يا رحاب ! أنا كنت حأجيب ليهو القروش !! قالت لي ما فرقت يا زوله ! حق التسالي و الفول دي اسمها قريشات ما قروش ، مديت ليها القروش و قلت ليها برضو شيلي القريشات ديل ، قالت لي يا بت انتِ الحاجات دي جايباها لأمك ولا لأبوك مش لينا نحنا !؟ خلي العواره و لمي قروشك دي عليك ، التسالي دا ذاتو أنا عايزاهو و نفسي فيهو ،
المهم ولدها جا و جاب لينا التسالي و الفول ، كان بياكل في تسالي ، أمو جضمتو و قالت ليهو مية مرهـ قلت ليك لمن أرسلك لحاجه أوعك تفتحها و تشيل منها ، قال ليها دا حق المشوار .... ضحكت على كلامو و قلت ليهو معاك حق ، قالت لي عامل زي أبوهو ، لو قدمك لي خدمه إلا يشيل مقابل ، قال ليها بعدين بكلم ليك أبوي ، قالت ليهو الببو ان شاء الله يلا طير من هنا ، قال ليها بعد شويه بتناديني عشان ترسليني ، قالت ليهو يلا يلا ما عايزين وجع راس نحنا ، بعد ما مشى رصينا الحاجات في صينيه كبيره ، رتبت الهول و طلعت تربيزه كبيرهـ ختيت فيها الصينيه ، و جبت الفناجين الإشتريتهم من القروش الطلعتها من شغلي مع عواطف ، بعد شويه كدا معتز ركب في الحيطه و بقى ينادي على أمو ، قالت لي الشفع ديل وااي أنا منهم ، مشت ليهو و قالت ليهو اها مالك !؟ قال ليها بتك دي صحت و قاعدهـ تبكي تعالي ليها ، جاتني و قالت لي بتي صحت إلا امشي ليها لكن بجيك ، قلت ليها كويس ، بعد شويه كدا جا معتز و هو شايل كانون فيهو فحم ، قال لي أمي قالت ليك مسكي الفحم دا ، قلت ليهو تمام ، مشى و خلاني بحاول أولع النار في الفحم بس حلفت ما تولع !! رحاب لمن جات لقتني لسه ما ولعت الفحم ، ضحكت و قالت لي لسه لازمك دروس و دروس يا العروس الجديدهـ ، قلت ليها هسي لو كان اختصرنا الموضوع و عملنا الجبنه في الهيتر أو البوتجاز مش أحسن ، قالت لي نحنا جبنة الكانون دي بنتكيف ليها عديل ، رقدت بتها و شالت الكانون طلعت بيهو برا ، مشت على الشجره و شالت منها لحاء و فروع صغيره و خفيفه ، جات ختتهم في الكانون و ختت فوق ليهم الفحم و شختت الكبريت و بقت تنفخ فيها لحد ما ولعت ، وجهت فتحة الكانون على اتجاه الرياح ، قالت لي هسي بولع ، قلت ليها لو كان شلنا الفحم دا و ختيناهو في نار البتجاز مش كان أحسن من التعب دا كلو ، قالت لي لا لا كدا بس 😂😂
المهم زي الساعـه 12 كدا النسوان جوا داخلات ، قالوا لي ما شاء الله بيتك بسيط و منظم ، عواطف قالت لي ما قليتي البن صح !؟ قلت ليها لسه ما قليتو ، قالت لي كووويس لأني حـ أقليهو ليكم ، حاجه بدريه قالت ليها المرهـ دي خلوني أنا أقليهو عشان تشوفوا قليتي سمحه كيف ، المهم حاجه بدريه بقت تقلي لينا في البن و نحنا بنتونس ساي ، قلت ليهم انتوا زحل وين ليه ما جات !؟ قالوا لي هسي بتجي ، فعلاً بعد شويه جات داخله و هي شايله ليها مشط ، سلمت علينا و قالت لـ وحدهـ اسمها منيرهـ يلا أرح أرح التسريح ، قالت ليها شعرك دا انا قبل اسبوعين مشطتو ليك ، غيتو واااي منك يا زحل ، المهم زحل فرشت الفرشه و قعدت فيها و منيره قاعده في السرير و بتمشط ليها شعرها و عواطف جات بخضرتها و بقت تورق فيها و نحنا بنساعدها ، حاجه بدريه بعد ما قلت البن قالت لي جبت ليكم بخور سمح خلاص ، الليله شمن ريحتو و بكرا تعالن اشترن مني ، قلنا ليها كويس ، طبعاً بخورها كان فظيع ، قلت ليها جبتيهو من وين !؟ قالت لي بعملو أنا ، قلت ليها ما شاء الله والله ، قالت لي الله ما ضراك ، كمان بعمل أرياح ، ما بشكر ليك روحي لكن اسألي النسوان ديل ، قالوا لي فعلاً أرياح حاجه بدريه ما بتتنافس ، قالت لي تعالي شيلي مني ، قلت ليها كويس ، قالت لي لو ما عندك بديك ، النسوان ديل كلهن بشيلن مني و بجيبن لي القروش على راحتهن ، قالوا ليها يا حاجه ماف داعي للفضايح و قعدوا يضحكوا ، قالت لي أنا ما ناسيه ليك موضوع عدم الحنه دا ، ما تضايقي مني ، والله انتِ بقيتي مننا و فينا و أنا بعتبرك زي بتي والله ، عشان كدا بدور ليك السمح و بدور أنصحك ، كلامها لامسني والله ، أول مرهـ أحس بشعور الإنتماء ، أول مرهـ يصلني إحساس إنو في زول غير تامر بهمو أمري و بفكر في مصلحتي .... قلت ليها أنا ذاتي بعتبرك زي أمي والله ، لكن ما قاعده اتحنن عشان في واحد قريبي شديد إتوفي قبل فترهـ كدا ، قالوا لي ربنا يرحمو ، حاجه بدري قالت لي الحزن لفترهـ طويله ما سمح والله ، عارفاها حارهـ لكن البشتنه و عم الجيهه ما بترجع ميت ، راجلك كمان ليهو حق عليك .... طبعاً بقيت أبلع في ريقي و أنا بطقطق في أصابعي ، منيره قالت لي سيرة أهلك من جيتي هنا ما حصل جوك !؟ لأني بالغلط ما شفت زول داخل بيتك !؟
طبعاً هنا قلبي بقى شغال دق دق ، قلت ليهم قبل 3 أيام كانوا معاي هنا ، رحاب قالت لي يخسي عليك ، أنا جارتك بالحيطه و ما بتناديني عشان أجي و اسلم عليهم !! زعلت والله ، قلت ليها معليش ، لمن يجوا المرهـ الجايـه بكلمك....
المهم لمن العصر أذن صلوا و مشوا بعد ما رتبوا معاي البيت ، ناس عندهم ذوق والله و خجلوني بسبب تعاملهم الكويس ، قفلت الباب بعد قدمتهم و قبل ما أدخل جوهـ سمعت صوت الباب ، قبل ما أعاين بالقدهـ سمعت حاجه بدريه و زحل بسلموا على زول ، لمن فتحت الباب شفت قصي ، كانوا بسلمو عليهو ، حاجه بدريه قالت ليهو طولنا ما شفناك يا ولدي ، قال لي مع جري الشغل بس والله ، قالت ليهو ربنا يعينك و يوفقك و بقت تتكلم معاهو و أنا كنت واقفه بعاين ليهم ، زحل قالت ليها خلاص يا حاجه بدريه ، الراجل مرتو منتظراهو .... لمن قالت كدا قربت أقفل الباب ، حاجه بدريه قالت ليها صحي والله ، أمشي يا ولدي مسكناك من مرتك ، قالت كدا و عاينت لي و هي بتضحك و هو بعاين لي ، والله خجله ساي قفلت الباب ، سامعاهم بضحكوا ساي ، تاني سمعت صوت الباب ، فتحتو و دخلت طوالي ، قصي جا داخل و هو بتلفت في البيت ، قال لي ياداب بقى بيت !! طبعاً ريحة البخور كانت فايحه ، قلت ليهو كنا بنشرب جبنه ، قال لي ان شاء الله في ؛!؟
قلت ليهو ايوه في و طوالي مشيت كبيتها ليهو و جبتها ، شربت منها و قال لي من دون مجامله دي أجمل جبنه أشربها في حياتي ، قلت ليهو عملتها حاجه بدريه ، قال لي جبنتها سمحه ، شوفي لي كان عندها بت ما معرسه عايز أبقيها نسيبتي ، قلت ليهو ماف مشكله بشوفها ليك لكن مرتك حيكون موقفها شنو !؟ قال لي حـ أعرسها بالدس ، قلت ليهو عشان جبنه !؟ قال لي ايييوه و قعد يضحك ، لمن بقيت أعاين ليهو ، قال لي والله بمزح ، وحدهـ كفايه ما عايزا أدبل ، المهم شرب الجبنه و قعد شويه بعدها مشى ، أصلاً هو بقى لو جا بمشي ما بقعد كتير و أصلاً المسافه حتكون ليهو بعيده من امدرمان لـ بحري ...
المهم يوم بعد صليت المغرب مشيت لـ عواطف و بديت اشتغل معاها ، كانوا في زي 4 رجال قالوا عايزين بوش ، عواطف جهزتوا ليهم و أنا شلتو وديتو ليهم ، واحد قال لي تسلم يدك يا عسل ، ما رديت عليهو ، أول ما إتحركت كدا واحد مسكني من طرف التوب ، لمن إتلفت عليهو قال لي عايزين شطه ، فكيت طرف التوب منو و مشيت جبت ليهم الشطه ، قال لي في زيت سمسم !؟ البوش دا ما بمشى إلا بزيت سمسم ، بآخر نفس قلت ليهو أيوه في و دخلت جبتو ليهم ، بعد شويه كدا جوا زي ناس غيرهم قعدوا ، عواطف المرهـ دي هي الشالت الطلب و أنا جوهـ بغسل في العدهـ ، بعد ما جهزت ليهم طلبهم أنا كنت خلصت العدهـ ، شلت الطلب عشان أوديهو للناس الجات قبل شويه ، أول ما طلعت كدا و أنا شايله الصحن واحد من الأربعه القبيل قال لي بصوت عالي يا عسل جيبي لينا الشاي ، طبعاً كل الناس سمعتو ، ما اشتغلت بيهو ، مشيت على الطاوله المقصودهـ ، في اتنين متلفتين علي و اتنين عكسي ، المهم ختيت ليهم الصحن من دون ما أعاين ليهم ، أول ما إتحركت كدا جاني صوت بقول لو سمحتي !!... الصوت ما كان غريب علي ، لمن إتلفت ، لقيتو قصي !!... هو ذاتو إتفاجأ لمن شافني !!
"شكرًا لكل شخصٍ حنون ، لا يهون عليه حزن أحد و قلبه لا يهدأ و أحدهم حزين بسببه ، شكرًا لكل شخصٍ طيب ، هيِّن ليِّن في معاملته ، شكرًا للمتسامحين الذين يملؤهم الحب و الرضا لأي شيء و أي شخص ، الذين يُسهِّلون الدنيا على بعضهم لتتيسَّر الأمور ولا يخسرون بعضهم البعض ، شكرًا للعاقلين الذين مهما كانت تصرُّفاتهم تافهة إلا أنهم يتجنبون كسر الخواطر تمامًا ، شكرًا للطيِّبين ، الواضحين ، أصحاب القلوب و النوايا النقيَّة ، الذين يملؤهم الخير للقريب و الغريب 💜
لكاتبه
يتبع.....
