يعني سبحان الله الطريقه المات بيها عصام كانت شينه شديد ، يعني لا غسلو جثتو لا عملوا ليهو المراسم البتتعمل للميت ، يعني كـل ما يخطر على بالي إنو لملمو كـل قطعه من جسمو و دفنوهو مقطع كدا شعر جسمي كـلو بقوم ! ... 3 أيام و الناس دي مخلوعـه ، داخلين و طالعين بتكلموا عن الطريقه المات بيها عصام ، جابو لقطات من الإنفجار الحصل في الشـقه الكان قاعد فيها عصام في القنوات السودانيه و قناة الحدث و العربيه ، موت عصام بقى حديث البلد ، منو الدخل القنبله و منو الفجرها و أساساً جابها كيف و من وين مـاف زول عارف بس الحاجه الكانت واضحه زي عين الشمس إنو دي تصفيه ، عصام من أكبر الفاسدين و المجرمين في البلد دي ، شغلو كـ طبيب نفسي كان ستارهـ عشان يغطي بيها أعمالو و هو نفسو كان ستار أو واجهة لـ كتاااار زيو بعملوا في الخفاء بعيداً عن الأنظار و بما إنو الستار دا انشال حسو بالخطر ، و بما إنو عصام كان مُلاحق من قبل الأجهزه الأمنية هم خافوا إنو يتم القبض عليهو و يعترف و يدلي بأسماء الناس الورا الشغل الوسخ و القذر دا ، عشان تمت تصفيتو بطريقه بشعه شديد ، دا ما بس تحليلي أنا دا تحليل كل الصحفيين و السياسيين التمت استضافتهم في القنوات التلفزيونيه ....
طبعاً دكتورهـ رانيا اتصلت علي تاني يوم طوالي لأنو الخبر انتشر ، برضو كانت مصـدومه و كمان جات البكى هي و خالتو رشيدهـ و بالمرهـ غشونا في البيت ، ما دكتورهـ رانيا بس ، كل الدكاترهـ و الممرضين الكانوا شغالين معاهو جوا العزا حقو ، رغم عمايلو بس الناس ما وقفت و جات طوااالي أول ما سمعت الخبر ، طبعاً طول التلات أيام دي ما مشيت الشـركه و رابع يوم نفس الشي ، معظم الناس اهل ناس عمو عمران الجو من البلد للعزاء جزو نزل في بيت البكى و جزو نزل في بيت خالتي نجوى و جزو جابوهم بيتنا ، الناس كانوا مباااالغه كأنو الإتوفى دا رئيس ولا شيخ قبيله!!
المهم عدا أسبوع ما مشيت فيهو الشركه قلت لو فصلوني على كيفهم ، بس كان في إحساس جواي بقول لي إني ما حـ انفصل طول ما قصي صاحب الشركه ، المهم في اليوم التامن ، لمن دخلت الواتس لقيت رسايل مرهـ من قروبنا أنا و طيف و ناس داليا و مرهـ من قروب موظفين القسم تبعنا ، الرسايل كانت كتيرهـ شديد لمن أنا استغربت ، لمن دخلت و قريتهم عرفت إنو في وحدهـ من الموظفات فجرت ليهم قنبلة الموسم و قالت ليهم إنو طيف جعفر الشغاله معانا هي أخت مستر قصي صااااحب الشركه ، طبعاً كلهم كانوا شغالين ليها احلففففيي !! وااااي مبالغه !! ، بالجد الكلام دا !! قالت ليهم أنا و صحباتي مشينا ليها في البيت و انصدمنا لمن شفنا مستر قصي هناك و الصدمه الأكبر لمن قالت إنو أخوهااا ....
وحده قالت ليهم واااي لو كنت عـارفاها أختو كان مشيت و صاحبتها 😭 ليه ماا قالت إنها أختو عاد لو دي أنا و الشركه حقت أبوي والله كنت كل دقيقتين أذكر الموظفين بالحاجه دي و اعمل عمايل .... طبعاً قعدوا يضحكوا على كلامها و بعدها إتوالت الرسايل و كلها عن نفس الموضوع !!
في القروب التاني حقنا لقيتهم اول شي سألو عني و قالوا غيابي كتر ، بعدها اتكلموا في نفس الموضوع الكان في القروب تبع القسم و داليا عامله لي منشن و سألتني إذا أنا كنت عارفـه إنو طيف أخت مستر قصي ولا لا ، ندى كاتبه ليها بتكون عـارفه لأنو هي صحبتها شديد و كذا مرهـ شفت مستر قصي واقف معاهم ، شادي قال ليهم دا حـ يبقى حديث الشركه ، سمير قال ليهم طلعنا مصاحبين أخت المدير و نحنا ما جايبين خبر 😂
طبعاً رسايلهم دي قبل يومين ، إتونسوا قدرتهم في الموضوع بعدها سكتوا ، طبعاً لقيت مكالمات من داليا و ندى قبل يومين بس عشان كنت خاته تلفوني في الدولاب ما انتبهت ، رسلت ليهم في القروب و قلت ليهم شباب السلام عليكم ، كيفكم ، أول شي آسفه يا داليا و ندى لأني ما رديت على مكالماتكم ، كان عندنا وفاة و التلفون بعيد مني طول الأيام ديك ، بالنسبه للموضوع الكنتوا بتتكلموا فيهو ايوهـ كنت عـارفه ، بس طيف ما حبت يعرف زول إنها أخت مدير الشركه ... بس دا كل الموضوع ...
لمن طلعت من دردشة القروب انتبهت إنو سمير مرسل لي ، لمن فتحت دردشتو لقيتها قبل أسبوع ، كاتب ليها مها كيفك ان شاء الله كويسه ، خير اليوم ليه ما جيتي !؟
بعدها بـ يومين برضو رسل لي و قال لي بس ان شاء الله تكوني كويسه ، بديت أقلق عليك ...
في اليوم الرابع كاتب لي ان شاء الله يكون المانع خير ، رسلت و سألت طيف عنك قالت إنو عندكم بكى ، البركه فيكم و أحسن الله عزاءكم....
طبعاً أنا إستغربت فيهو !!
رديت عليهو و قلت ليهو أنا كويسه يا سمير ، فعلاً كان عندنا بكى.... رديت على رسالة العزا و قلت ليهو آمين يارب ، لمن طلعت من دردشتو لقيت رادي علي في القروب ، قبل ما ألحق أرد عليهو في القروب لقيتو راادي على كلامي في الخاص ، كاتب لي نورتي ... طبعاً إحترت فيهو !!
بعد مسافه رديت على رسالتو و قلت ليهو بـ نورك و عشان ما أكون بايخه شديد قلت ليهو الشغل ماشي كيف ؟؟ الفاتني شنو ؟؟
قال لي أنا ذاتي بقيت ما مركز مع الشغل ، قلت ليهو عيان ولا شنو ؟
قال لي كنت عيان ، قلت ليهو سلامتك ، قال لي الله يسلمك ، قبل ما أطلع من دردشتو لقيتو كاتب لي بكرا حـ تجي ؟؟ قلت ليهو ان شاء الله ، قال لي كفااايه بعد دا عشان ناس الشركه ما يطردوك ولا عشان انتِ صحبة أسياد الشركه 😂🤣
قلت ليهو يمكن...
المهم طوالي قفلت الشبكه و طلعت من الواتـس عشان ما يفتح معاي مواضيع تـانيه ، المهم في اليوم البعـدو ، جهزت نفسي و مشيت الشغل ، طبعاً أول ما جيت داخـله ، داليا و ندى طلعوا في وشي ، قلت ليهم شكلو الشمار حـارقكم شديد ، سلموا علي سريييع سريع كدا و جروني على الكافتيريا ، لمن قعدنا قالوا لي أرح أحكي لينا !! قلت ليهم أحكي ليكم شنو !؟ طيف أخت قصي و خـلاص ، ندى قالت لي واي صدمه صدمه ! اخخخ عشان كدا كان بقيف معاكم على طول ، داليا قالت لي و دا ببرر غيابك الكتير 😭😭 اتاريك زولة ناس الشـركه ، قلت ليهم ما تظلموني ياخ ، صدقوني أنا عااادي انطرد من هنا ، حتى لو كنت زولتهم زي ما قلتو هههه...
و نـحنا بنتكلم كدا سمير و شـادي جو داخـلين ، لمن وصلونا سلموا علينا و سمير قال لي و أنا أقول ليه الكافتيريا دي منورهـ كدا ؟!!
ندى قالت ليهو دا غزل يا سمير !!
طبعاً هنا كلنا عاينا ليهو ، ضحك و قال ليهم مالكم يا جماعه !! شادي قال الناس في شغلها و انتوا من صباح الرحمن في الكافتيريا ! والله كنت عارف إنو حـ نلقاكم هنا ! داليا قالت ليهو جابنا هنا الشـمار ، ضحك و قال ليها ولا انتوا !! المهم مدام جينا هنا أنا عايزا عصير ، انتوا طلباتكم شنو ؟؟
كلنا قلنا عصير ، سمير قال حـ يمشي يجيبو ، رغم اننا أصرينا ندفع بس هو رفض و قال لينا إعتبروني عازمكم ، شادي قال ليهو والله مفاجآت يا سمير ، أنا معاك 100 سنه يوم واحد قلت لي أنا عازمك ماف ، سمير ضحك و مشى ، داليا قالت سمير دا اليوم شكلو مبسوط شديد ، ندى قالت ليها كيف ما ينبسط و هو شاف فراشة قلبو ، قلت ليهم لقاها يعني ؟؟ قالت لي أكيد و من بدري بس كان بستهبل علينا و بأشر لـ بعيد و هي قريبه منو و حولينو !! قلت ليهم خلاص المرهـ الجايه وروني ليها ، ندى طلعت مرايه من شنطتها و ختتها قدام وشي ، قلت ليها وشي فيهو حاجه ؟ عاينت للمرآيه بس ما كان في شي على وشي
قالت لي مش قلتي عايزا تشوفي حبيبة سمير !؟ ياها القدامك دي ....
قلت ليها ندى !!... شنوووو !!!
طبعاً إتهجمت ! بقيت مبحلقه عيوني فيهم و هم البتبسموا ! شادي قال ليها يا ندى كنتِ تخلي سمير على راحتو !... فجأه سمير جا و هو شايل العصاير ، ختاهم و قال لينا اتأخرت عليكم ! كنت بعاين ليهو بخلعه كدا لمن هو استغرب و بقينا يعاين فينا كلنا ، قال لينا خير يا شباب ؟؟
طوالي وقفت على حيلي ، شلت شنطتي و قلت ليهم عن إذنكم ، من دون ما انتظر رد أي زول ، طوالي اتخارجت من الكافتيريا و أنا لسه ما مستوعبه الموضوع !! سمير بحبني !!؟
ليييه بس دائماً بحبوني الناس الأنا ما عايزاهم ؟؟
لمن قلت كدا اتذكرت تامر و حسيت كأنو سمعي كلامـي دا ، حسيت بوخزهـ في قلبي و قلت تامر الوحيد الكان حبو لي مختلف ، و كونو هو البادر و حباني في البدايـه دا ما معناهو إنو هو الشخص الغلط لأنو مع الأيام قدر يثبت لي إنو هو الشخص الصح بس جا في الوقت الغلط ، في وقت ما كنت قادرهـ فيهو افهم نفسي ، ما كنت قادرهـ اقدم حاجه لأي زول ، زمن ما كنت بعرف فيهو يعني شنو حب و يعني شنو تنازل و غض نظر عن أخطاء الطرف التاني ، تامر علمني دروس في الوفاء و الصبر و التسامح و طولة البال و الأهم إنو كان متمسك بي شديد و متحمل تصرفاتي البايخه 💔
قبل ما أطلع المصعد سمير جا لاحقني ، قال لي ممكن تخليني اتكلم معاك ؟؟
قلت ليهو سمير أنا هـسي مصدعه ! قال لي ما حـ آخد كتير من زمنك ، قلت ليهو مرهـ تانيه و إتحركت على المصعد ، جا و وقف قدامي و قال لي على فكره عارف انك ما مصدعـه ، أديني فرصـه بس عشان اتكلم معاك ، عارف إنو ندى صدمتك لأنها فجأه قالت ليك القالتو ، ما عارف قالتو ليك بأي طريقه أو قالت شنو بالظبط بس دي الحقيقه ، أنا من أول يوم شفتك فيهو والله حبيتك و لمن قلتي لي انك متزوجه حسيت الدنيا ضلمت في وشي و كنت بحاول أبعد عنك بعد العرفتو منك بس بالصدفه يوم جبنا سيرتك و عرفنا من طيف انك كنتِ متزوجه بس زوجك إتوفى ، صراحة ما عرفت أزعل عليك ولا أفرح ، بس حسيت إنو في بصيص أمل و من يومها ما قدرت أمنع عقلي من التفكير فيك و ما قدرت أسيطر على قلبي ... بقيت بعاين ليهو ساي !!
قال لي أنا بكل صراحه بحبك يا بت الناس و أنا بالجد ما بتاع لف و دوران و مستعد أصل بيتكم ...
و هو بقول في الجمله دي باب المصعد فتح و قصي طلع و سمع الكلام القالو ، بقينا التلاته نعاين لبعض ، قصي ما وقف كتير طوالي طلع.....
سمير واصل كلامـو و قال لي ما عايز منك جواب حالياً ، فـكري على راحتك و أخدي فترهـ كافيه ، أنا مستعد انتظرك .... قلت ليهو سمير أنا ... قاطعني و قال لي حالياً ما تقولي حاجه ، عـارف إنو الموضوع صعب عليك و عارف انك قد تكوني ما فكرتي في الزواج مرهـ تانيه بعد زوجك ، بس دي سنة الحياة و الواحد صعب عليهو إنو يقضي عمرو براهو ، خليك متـأكدهـ إني زول جادي و حـ اشيلك في راسي و حـ أبذل أقصى جهدي عشان أسعدك .... طبعاً تااااني قصي جا ماري بـ جنبنا و كانت معاهو وحدهـ من الموظفات شايله ليهو ملفات ، برضو سمع الكلام بس ما وقف ولا عاين لينا ، المهم سمير قال العندو و مشى طوالـي.....
كلامـو ذكرني بـ تامر يوم لاقيتو جنب الميدان و فاتحني في الموضوع ، حسيت كأنـو التاريخ بعيد نفسو ، قلبي قبضني شديد و حسيت إنـو نفس التجربه يمكن تتكرر !!
من مكاني داك طوالي طلعت برا الشركه ، قعدت في الحديقه المعموله قدامها ، كنت حاسه إني عايزا أبكي ، أبكي و بس ، قعدت في أقرب كرسي و بديت أبكي ، دموعي كانت بتزيد في كـل مرهـ اتذكر فيها العشتو ، في كـل مرهـ اتذكر تامر و كلامو و مواقفو ، من يوم فترهـ و أنا بحاول أظهر إني كـويسه ، أظهر إنو جروحي اتداوت ، بس في الحقيقه لسه وجع فراق تامر جواي ، لسه بحس قلبي بنزف دم في كل مرهـ اتذكر فيها إنو تامر حالياً تحت التراب و مرت شهور على وفاتو ، افتكرت إني بزواجي منو حـ أعاقب أختي و أشيل منها حاجه هي عايزاها بس أنا الإتعاقبت في النهايه ، أنا الإنشال مني إنسان عزيز علي ، و أنا ببكي كدا فجأه جاني صوت بقول مها !!!
لمن إتلفت لقيت داليا و معاها ندى ، قالوا لي في شنو يا بت مالك ؟؟
مسحت دموعـي و قلت ليهم ماف شي ، جوا قعدوا جنبي ، وحدهـ يميني و التانيه شمالي ، ندى قالت لي آسفه يا مها لو زعلتي بسبب كـلامي ، داليا قالت لي والله ما قصدنا نزعلك ، حـبينا نساعد سمير و نوضح ليك الما شايفاهو ، لأنو حسينا إنـو سمير ما قادر يفاتحك في الموضوع عشـان كدا كان بلمح ليك ، آسفين يا مـها مرهـ تانيه و حقك علينا .... ندى قالت لي عليك الله ما تبكي خلااااص ، حسستينا بالذنب ، مسحت دموعي تاني و قلت ليهم ما زعـلانه منكم ولا زعلانه من سمير بس كان في موضوع مضايقني عشان كدا حسيت اني عايزا أبكي ، قالوا لي طيب خلينا ندخل بعد دا و كمان ما تنسي تغسلي وشك ، المهم مشوا معاي لحد الحمامات ، لمن جيت طالعه ندى قالت لي نسيييت ما قلت ليك ، مستر قصي طالبك في مكتبو !... هزيت ليها راسي بس ، قالوا لي يلا نحنا ماشين نشوف شغلنا ، المهم هم مشوا و أنا استغربت قصي طالبني ليه ؟؟ إحساسي الجواي قال لي إنو عايز يشاكلني بسبب الكلام القالو لي سمير ، المهم طلعت المصعد و مشيت فوق ، لمن وصلت مكتبو سألت السكرتيره إذا هو موجود ، قالت لي ايوه موجود انتِ مها ؟؟
قلت ليها ايوه ، قالت لي أمشي غرفة الإجتماعات ديك و أشرت لي عليها !! قلت أكيد دي حركات من قصي ، زي المرهـ الفاتت لمن قال لي في إجتماع و قعدني معاهو في المكتب ، ما فهمت إنو بكذب إلا لمن طلعت من مكتبو....
المهم لمن مشيت غـرفة الإجتماعات لقيت مستر عزام ، قصي و معاهم اتنين كدا ما بعرفهم ، قلت ليهم السلام عليكم و دخلت ، ردوا لي السلام و قالوا لي أتفضلي ، كلنا كنا قاعدين إلا قصي كان واقف و شايل قلم ، قال ليهم طيب يا جماعه دي مها الإقترحت إنشاء قسم المخترعين ، عرفني على المتواجدين و أصلاً مستر عزام معروف بالنسبه لي لأنو مدير قسمنا ، قال لي أخدنا إقتراحك على محمل الجد و عملنا دراسه الفكره ، و درسنا أهميتها و أهدافها و أبعادها ، ما أكذب عليك معظم الإداريين في الإجتماع الفات ما وافقوا على الفكرهـ دي و تقريباً ديل بس الدعموا إقتراحك ، أنا حـ اسلمك الملف دا و أخلي الموضوع بين يديك ، بما إنو دي فكرتك معناها عـارفه حـ تنفذيها كيف ، واحد من الإتنين قال لي أنا بحب التطور و بحب الناس البكون عندها رؤيه بعيدهـ ، فكرة إنو يتم إنشاء قسم مخترعين في الشركه دي فكره ممتازهـ شديد و أنا دعمت فكرتك لأني كنت مفكر فيها ، التاني ضحك و قال ليهو يعني سرقت فكرتك يا صلاح 😂😂
مستر عزام قال لي أقعدي مع مستر صلاح و ادرسو الموضوع دا تاني و شوفوا حـ تبدوا متين و كـيف ، مستر صلاح قال لي كدي قولي لينا العندك ، اتكلمت و بديت أشرح ليهم الفـكره و كيف حـ نبداها ، مستر عزام قال لي ممتاز بس الحاجه دي مكلفه شديد !!
مستر صلاح قال ليهو لكن العائد البجي لقدام حـ يحقق أرباح كبيرهـ للشركه ، التاني اسمو ابراهيم قال ليهو دا في حال إنو الموضوع دا مشى تمام التمام من دون كسل أو انسحاب ! لأنو كتير من الناس بتبدا بإندفاع و بتكون مليانه حماس بس في الآخر بتمل و بتكسر الحنك ان صح التعبير ، قلت ليهو لا لا ما حـ يحصل كدا ان شاء الله....
المهم بعدها قالوا حـ يمشوا بعد دا ، مستر عزام قال لـ قصي راجع معاها الميزانيه دي تاني و شوف إذا في حاجه ممكن نتنازل عنها أو ماف داعي ليها ، هز ليهو راسو بس ، فعلاً مشوا و خلونا برانا أنا و قصي ، اتكلم معـاي بكل رسميه و في الختام قال لي الميزانيه ما مشكله بس شدي حيلك لأنو نحنا ختينا ثقتنا فيك ، قلت ليهو تمام ، بعـدها استأذنت منو و طلعت ، حسيت بالغرابه لأنو المـرهـ دي حسيتو متغير شديد....
المهم بعد الكلام دا بأربع أيام أمي و خالتو نجوى قالوا ماشين لـ ناس طيف ، طبعاً أنا استغربت فيهم !! قلت ليهم ليييه ؟؟ خالتي قالت لي كيف يعني ليه ؟؟
قلت ليها يعني الناس ديل انتوا ما شفتوهم إلا مرهـ وحده لمن جوا تخريج عبدالله ، ايوه بتعرفوا طيف بس أهلها لا !! يعني ما لدرجة..... أمي قاطعتني و قالت لي رشيدهـ بنفسها قالت لي تعالوا لينا و كم مرهـ قالت لي لا انتوا لا بتكم ما جيتونا ، قلت ليها شنووو !! انتِ لقيتيها وين يا أمي ؟؟
قالت لي يوم تخريج عبدالله شلنا أرقام بعض !! و كنا متواصلين ! صحي انتِ مالك ما مشيتي لطيف ، والله اتلومت و إتكومتي معاها ، حقو تمشي معانا ، قلت ليها ياريت لكن ياداب دي دخلتي للبيت و أنا تعباااانه شديد ، قالت لي كويس بنمشي أنا و خالتك ، عملت ليكم الغدا ، لو ابوك اتأخر ختوا أكلو و ما تنتظروهو ، قلت ليها طيييب....
المهم هم مشوا و بقينا قاعدين أنا و لميس و أسيل و لمن عبدالله جا نادى أسيل ، شالت ولدها و مشت ليهو و تاني ما جات راجعه ، لميس قعدت تضحك و قالت لي جوز اللوز ديل شايفاهم بقوا ما بقدروا من دون بعض ، قلت ليها احسن ليهم بدل كل يوم عاملين لينا وجع راس بمشاكلهم الما بتخلص .... كانت شايله تلفونها و بتشوف فيهو ، بعدها قالت لي عايني مش دي شجن مرة قصي أخو طيف ؟؟
لمن عاينت لتلفونها لقيتها فعلاً دي هي ، كانت عامله إعلان لـ ماركة فساتين و فستانها كان ضيق شديد و مفصل و غير كدا يدينو قصار شديد و فاكه شعرها ، لميس قالت كتير قاعده اشوفها في الميديا ، صورهـا في كل مكان ، قلت ليها على كيفها دا شغلها ، قالت لي راجلها راضي بشغلها دا ؟؟
قلت ليها ما عارفه ، ما عندنا بيهم شغله ، هم حرين ....
المهم عدا أسبوع و أنا ما مشيت لطيف تاني ، كنت مركزهـ على شغلي بالذات موضوع القسم الحـ يتم إفتتاحو ، بداية اقترحت نعمل مسابقة سميناها الإبداع التكنولوجي ، إخترنا فئات معينه و يلي هم الشباب ، فضيت المعرض الفي الشركه و بموافقة قصي عملنا مسرح و خلفوا كواليس و جبنا ناس ديكور ، ظبطوا لينا الإضاءات و الصوت ، بعدها عملت بوستر ظابط و مشيت لناس قسم التسويق طلبت منهم يروجوا لينا للمسابقه دي و فعلاً دا الحصل ، بعدها الشركه بقت زحمه عشان في كميه من الناس العندهم موهبة الإختراع جوا عشان يشاركوا في المسابقه ، ناس الـ HR , اختاروا 50 نفر عشان يدخلوا المسابقه دي و في كـل مرهـ حـ يتم تصفيتهم ، لحد ما نصل لـ عدد 10 أشخاص ، ديل برضو حـ يتنافسوا في المرحله الآخيرهـ ، البفوز حـ ياخد مبلغ مالي كبير و يشتغل في الشركه و اختراعو حـ يتنسب للشاركه و يتباع و الـ 9 الباقين حـ يتم إختيار افضل 5 اختراعات منهم و برضو حـ يشتغلوا في الشركه ، لو المسابقه دي نحجت و الموضوع سلك معانا حـ تتعمل سنوياً أو كل 5 شهور ... كمان إتواصلت مع مقدمين برامج عشان يقدموا المسابقه و كمان مصورين ، أما لجنة التحكيم فـ إختاروهم قصي و مستر عـزام ....
كان لسه عليها شويه المسابقه دي و ترتيبات القسم الجديد كانت كتيره ، كان في إقتراح إنو يكون في جمهور يجي و يحضر المسابقه بس الإدارهـ رفضت و قالت ما عايزا زحمه في الشركه ، قالوا كفايه جداً يكون في شوية موظفين يحضروا المسابقه دي.....
المهم بعد الأسبوع دا تاني مشيت لـ طيف مرتين ، والله رغم انها ما شـغاله بي بس بقيت بعمل العلي ، بقيت بسمع كلام دكتورهـ رانيا ، دائماً بتقول لي أعمالي العليك و ريحي ضميرك ، يعني حتى تعاملي اتغير شويه مع لميس و دا كلو بسبب جلساتها ، بتقول لي ماف شعور بضاهي شعور انك تكون خفيف ، بمعنى خالي من الحقد ، من الزعل ، من الكرهـ لزول ، بتقول لي وسعي صدرك و اتخلصي من كل شي بعكر مزاجك بس برضو خلي بالك طويل و ما تستعجلي للشينه ، أدي الناس فرصه و الزعلان منك لو حسيتي بالجد إنو معاهو حق يزعل أعذريهو و خليهو ياخد زعلتو و لو اضطر الأمر اعتذري منو .... حسيتها كأنو بـ كلامها دا عرفت إنو طيف زعلانه مني ! ما عارفه طيف حكت ليها ولا لا ، المهم آخر مرهـ مشيت لطيف كان عندهم حفله ، اليوم داك اعتذرت منها و قلت ليها أنا عندي أسبابي الخلتني اتجاهلك و بعترف إني غلطت بس كنت مشوشه و ما عـارفه اتصرف كيف ، قالت لي ماف مشكله و حصل خير و أنا ما زعلانه....
صح إنها قالت كدا بس انا حسيت إنها ما سامحتني و يمكن اتجاوزتني !! لأنو لو بالجد سامحتني كان أصرت تعرف شنو الزعلني و خلاني اتجاهلها و ما أرد عليها ، بس خالص ما سألتني كأنو الموضوع ما بهمها ....في الأيام الأخيرة لمن لقيتها بتتجاهلني كتير لمن أمشي ليها اتحسست و قررت إني ما أمشي ليها تاني ، بس خالتو رشيدهـ ما ريحتني و أمي كمان ، الزمن كلو شابكني انتِ و طيف متشاكلين ولا شنو و خالتو رشيدهـ دائماً بتلومني و بتقول لي يخسسسي عليك ما عايزا تجي لـ صحبتك ! تقريباً معظم الناس كانت حاسه إنو في شي حاصل بيني و بين طيف ، قصي ذاتو انتبه و يوم لمن كنت في بيتهم سألني و قال لي انتِ متشاكله مع طيف ؟؟
قلت ليهو هي شكله شكله بس ما عارفه اقول شنو المهم طيف زعلانه مني رغم إني إعتذرت منها ، قال لي طيف ما النوع البزعل لفترهـ طويله ولا النوع البحب الخصام ، قلت ليهو معناها شكلي زودتها و هي خلاص شمتني ، قال لي بكرا حـ ترجعوا أحسن من الأول ، انتِ بس خليك معاها و ما تنقطعي منها ، قلت ليهو طيب ، و نحنا واقفين كدا جات خالتو رشيده طالعه و يمكن دي المرهـ التالته تشوفنا واقفين برااانا ! أنا طبعاً اتحسست لأنو اتختيت في الموقف دا أكتر من مرهـ ، هسي تقول عني شنو !!
أنا أصلاً كنت طالعه ، قلت ليها يلا يا خالتو أنا مشيت قالت كان حـنستك تاني ما بتقعدي ، سمح سلمي لي على ناس أمك ، قلت ليها حاضر ، قصي قال لي أنا كمان طالع ممكن أوصلك معاي ، قلت ليهو لا لا بمشي براي 😅 قلت كدا و عاينت لأمو سرعه كدا و عاينت ليهو نظام ، أمك قااااعده أسترنا معاهااا !! خالتو رشيدهـ قالت ليهو هسي ما قلتي لي ما طالع ، لكن خلاص وقت جات مرقه الأفضل توصلها معاك ، قلت ليها لا لا ما.... قاطعتني و قالت لي يا بتي هو أصلاً طالع فـ خليهو يوصلك ساي ، فجأه جات شجن طالعه و قالت ليهو عندي مشكله في عربيتي وصلني معاك ، قال ليها ماشه وين انتِ ؟؟ قالت ليهو أمدرمان .... طوالي أنا قلت ليهم يلا مع السلامه و إنسحبت ، طلعت طوالي و مشيت من جنب بيتهم بإستعجال ، مرتو ماشه شمال و أنا ماشه جنوب ماف داعي أخليهو يلفلف كدا عشان يوصلني....
من ناحيه تانيٕه :
خالتو رشيدهـ قالت ليهو ألحق البت يا قصي ، شجن قالت ليها يعني عايزاهو يشيلها و يركبها جوهـ العربيه ! ما عارفاكم ليه مهتمين بالبت دي و بتحنسوا فيها كأنها حاجه سمحه و 24 ساعه ماسكين سيرتها 🙄
قصي قال ليها ماشه ولا لا ؟؟
قالت ليهو أكيد ماشه و طوالي إتحركوا على الباب ، خالتو رشيدهـ صرت وشها و هي بتعاين لـ شجن و هي طالعه ، شجن إتلفتت عليها و عاينت ليها عين حقااارهـ ، خالتو رشيدهـ قالت ليها إحترمي نفسك يا بت ما قدرك أنا عشان تعايني لي بالطريقه دي ، قصي إتلفت و قال في شنو ؟؟! مالا يا أمي ، قالت ليهو مرتك دي أحسن تلمها عليك ، قالت لي هسي أنا سألتك يا خالتو ؟؟ مالك قاعدهـ لي بس على الهبشه ، قصي قال ليها شجن !! قفلي و إتحركي قدامي ، قالت ليهو أمك دي بس عايزا ليها مشكله معاي بأي طريقه و والله لو ما كان وراي شغل مهم كنت تميت ليك البديتو ، أصلاً انتِ كما عملتي معاي مشكله قلبك ما ببرد ، عشان لي كم يوم انشغلت و بقيت اتجاهلك قلبك وجععععك ..... هنا قصي نهرها بصوت عالي و قال ليها احسن تحترمي نفسك ، خالتو رشيدهـ جاتها قريب و قالت ليها والله كما البيت مليان ضيوف كنت زعطتك و معطتك معطة حداده بس أصبري لي ، شجن قالت ليها أعملي البريح ، انتِ ما بتغلبيني والله ، قالت كدا و طلعت طوالي ، قصي مسح وشو بـ يدينو و قال الله يطولك يا روووح !! أمو قالت ليهو مع المرهـ ما حـ تلقى راحه ، أنا وريتك الحل و قلت ليك عرس فوقها و ارتاح بس انت لسه قاعد لي و مربع يدينك !! يعني ما شايف تطاولها و قلة أدبها علينا كلنا !! البت دي لا محترمانا لا مناسباتنا بتهمها ، كل أهلنا و معارفنا البجوا و بسألوني مرة ولدك وين بقول ليهم ماف ، يعني كأنو ماف مناسبه في البيت ، 24 ساعه طالعه بلبسها المخلشع دا !!
أخد نفس و قال ليها معليش يا أمـي ، بعـدها طلع طوالي ، رشيده كانت واقفه في مكانها و بتقول في نفسها انت بس قول لي عايز أعرس و شوف أنا حـ اعمل شنو ، الكلبه الإسمها شجن دي كما طلعتها من البيت دا ما أبقى إسمي رشيده ، جات دكتورهـ رانيا طالعه و لقتها واقفه و واضح إنها مضايقه ، قالت ليها خير مالك في شنو ؟؟
قالت ليها اتناقشت مع الحيوانه الكلبه ديك ، قالت ليها شجن ؟؟
قالت ليها منو غيرها ، دكتورهـ رانيا قالت ليها طنشيها و ما تتعبي نفسك معاها ، حالياً ركزي على تجهيزات عرس بتك و بس ، رشيدهـ سكتت مسافـه بعدها قالت ليها انتِ رايك شنو في مها دي ؟؟
رانيا قالت ليها كيف يعني راي فيها شنو ؟؟ بس ما تقولي لي انك !! رشيدهـ قالت ليها ايييوه ياهو الفي بالك ، البت دي بتسمع كلامي و ما شاء الله حلاتها و فاهمه و واعي و صحبة طيف ، أحسن لينا من الشومه الإسمها شجن دي !!
رانيا قالت ليها بس يا رشيده البت دي..... قاطعتها و قالت ليها ايييوه عارفه و ما عندي مشكله ، خلي بس قصي يقول عايزها ، قالت ليها و انتِ ليه واثقه إنو قصي حـ يقول عايزها ؟؟
قالت ليها شاااايفه نظراتو ليها و كم مرهـ شفتهم واقفين مع بعض ، مرهـ سمعتو بتكلم مع واحد في التلفون و كان بشكرها ليهو و قال إنو شغلها كويس و إنها موظفه ممتازه ، رانيا قالت ليها فعلاً هي كدا و طبيعي قصي يقول عنها كدا بما إنها شغاله في شركتو !! قالت ليها يومتا كان عايز يقول يا شجن قال يا مها و لمن انتبه انخلع و عمل رايح و أنا أديتو إحساس إني ما سمعتو ، دكتوره رانيا قالت ليها أنا والله خايفاك تخربي بيت ولدك يا رشيده !! قالت ليها بيتو أصلاً مخروب و هو خلااااص قنع من مرتو دي ، و أصلاً بعد عمايلها دي طارت لينا كلنا ، أنا لو مكان قصي بشردها من البيت دا ، ما عارفه كيف قلبها طاوعها و خلاها تجهض أكتر من مرهـ من دون ما تحس بتأنيب الضمير !! البت دي خلااااص أنا شميتها و لو علي أكلها بأسناني و أقرمش عضامها .... دكتوره رانيا قالت ليها ما عارفه اقول ليك شنو ، بس فرضاً قصي وافق مها ما ظنيتها تقبل بالحاجه دي لا هي لا أهلها !! قالت ليها أهلها خليهم علي ، أصلا مصاحبه أمها و بكرا حـ أقدر أقنعهم !!
قالت ليها ليه البت دي تحديداً يا رشيده !؟ قصي عندو بنات أهل كتاااار !؟ قالت ليها كلهن لئيمات و خفيفات و ما بنفعن معاي ، أنا خلااااص قفلت على البت دي و براااي حـ اظبط موضوعها هي و قصي.....
أتعرفون ماهو الغريب في مشاعرنا..
إننا ..نبتعد
ونحن في أمس الحاجة للقرب.
إننا.. نتماسك
ونحن في أمس الحاجة للانهيار.
اننا .. نصمت
ونحن في أمس الحاجه للعتاب.
إننا...نبتسم
ونحن في أمس الحاجة للبكاء .
نعم ،قد نبدو بخير ولكن لن يبوح أحدنا بما يؤلمه ف بعض الكذب كرامة ياسادة
لكاتبه
يتبع......
