عاين لي جوهـ عيونو بعدها عاين قدامو و قال لي قلتها ليك قبل كدا ، انتِ و طيف عندي واحد و أنا بعتبرك زي أختي عشان كدا خوفي عليك مبرر و أمرك بهمني ....
حسيت إنو قلبي اتصدع !!
ما عارفـه هل هو كان عايز يقول كلام غير دا ولا أنا براي واهمه نفسي و حاسه انو دا ما الكلام الكان مفروض يقولو !؟
قلبي قبضني في نفس اللحظه الإتذكرت فيها شجن ! للمرهـ التانيه أنا كيف أسمح لنفسي تتمادى للدرجـه دي !... أنا العمري ما انتظرت حب أو نظرات أو تلميح من راجل حالياً متأمله و منتظراهم من راجل متزوج !؟
عاتبت نفسي أشد العتاب ، لسببين ، الأول إنو متزوج و التاني لأني حسيت إني ظلمت تامر معاي و قلبي وجعني ، يعني تامر حباني حب خلاهو يعمل أي شي عشاني ، بس أقصى جهد عشان يخليني مرتاحه ، اتحمل تصرفاتي كتير و ما حصل لامني أو طلب مني أبدلو بنفس الإحساس ... يعني ليه الظلم دا ؟؟ تامر نقص مني شنو أو قصر مني في شنو عشان اتجاهل العملو عشاني كلو في محياهو و ما أحبو بنفس طريقة حبو لي و في النهايه أجي أحب قصي !!.... ايوه ما بكذب بيني و بين نفسي ، من فتره أنا بنفض الأفكار دي و بقول مستحيل أكون حبيتو دا مجرد إعجاب و ما لازم يكون في بيني و بينو لا حب لا إعجاب بس بقيت ما قادرهـ اتحكم في نفسي ...
سرحت بعيد و اتخيلت تامر بعاتبني و بقول لي ليه ما حبيتيني بعد كل العملتو ليك ، دا قدم ليك شنو أو أحسن مني في شنو عشان تمشي تحبيهو....
من دون ما أحس دموعي جات جاريه .... فجأه سمعت قصي و هو بقول لي بصوت عالي يااا مهااا !!
ياداب صحيت من سرحتي ، عاينت ليهو و أنا مخلوعه و قلت ليهو شنووو !!... دموعي كانت لسه نازله ، عاين لي بـإستغراب و قـال لي بتبكي ليه ؟؟
مسحت دموعي و قلت ليهو ماف شي ، قال لي يعني بتحبي تبكي ساي ؟؟؟
طبعاً عشان ما يقول إني بكيت بسبب كلامو و بسبب جملة بعتبرك زي أختي قلت ليهو اتذكرت تامر ، قال لي ربنا يرحمو و يوسع مرقدو ، قلت ليهو آمين يا رب ، شال علبة المناديل و مداها لي ، شلت منديل مسحت بيهو دموعي ، بس أخدت عهد على نفسي إنو ما أخلي الجواي دا يتمادى أكتر ، الما قدرت أديهو لـ تامر و هو الأجدر بيهو ما مفروض أديهو لـ غيرو الما قدم لي ربع القدمو تامر 💔
بعد مسافه وقف العربيه و قال لي الحصل شنو جوهـ المصحه ؟؟ قلت ليهو بتسأل عن حاجه شايف إنو ما منها فايدهـ ليه ؟؟
قال لي مش إعتذرت منك ؟؟ ... و بما انك قلتي انك عارفه كويس إذا العملتيهو منو فايده ولا لا فـ حابي أعرف الحصل بالتفصيل و النتيجه الإتوصلتي ليها ، قلت ليهو ما عايزاك تدخل في الموضوع دا ، قال لي اتدخل كيف ؟؟ أنا بس عايزا أعرف ! إعتبريهو فضول مني ... قلت ليهو طيب اسمع .......... الخ
لمن خلصت قال لي لا بالجد انتِ عشتي دور البطله و إتخيلتي انك بتصوري فلم إثارة و غموض !... قلت ليهو شفت عشان كلامـك دا ما كنت حابه أحكي ليك .... قال لي يعني كدا اتأكدتي من شكوك ؟؟ المشكله وين لو اختصرتي دا كلو و كلمتي أهل البت !….. قلت ليهو عايني اتحرك اتحرك عليك الله أو خليني انزل ، عايزا أمشي البيت ، قال لي تمام تمام ، خطوتك الجايه شنو ؟؟
قلت ليهو ما حـ أقول ليك شي تاني عشان ما تقعد تضحك و تستهيني بالعملتو و البعمل فيهو !!
طيب تمام لا حـ اضحك لا حـ استهين بالعملتيهو و البتعملي فيهو 🙂
قلت ليهو يا قصي انت لو ما ماشي نزلني !! ما معقوله تتحرك دقيقتين و تقيف بعدها !!
قال لي تمام فهمت و طوالي إتحرك ، تاني ما إتكلمنا مع بعض ، لمن قربنا من البيت قلت ليهو نزلني هنا ، ما سألني ليه ، وقف بس ، نزلت و قلت ليهو شكراً ، هز لي راسو بس و إتحرك ، المهم لمن وصلت البيت طوالي طلعت لابتوبي ، ركبت فيهو الفلاشه و بديت أشوف في الملفات ، كنت خاته في بالي ملفات معينه ، يلي هي من 2014 لحد 2020 ، طبعاً كانت كتيره و عرفت إني ما حـ أقدر أخلصها في نفس اليوم ، لمن دكتورهـ رانيا اتصلت علي حكيت ليها بإيجاز الحصل ، قالت لي بكرا لمن نتقابل حـ نشوف الموضوع دا ، قلت ليها تمام ، قالت لي طيف الإتصلت عليك ؟؟ قلت ليها أيوه لمن كنت في المصحه ، ما اتكلمت معاها كتير قلت ليها ما تتصل علي حالياً ، قالت لي أنا ذاتي اتصلت علي لمن كنت في الإجتماع ، رسلت ليها و قلت ليها أنا مشغوله ، قلت ليها بكون عشان كدا كلمت قصي ، قالت لي أكيد كلمتو عشان كدا جا !!
المهم لمن طلعت برا و قعدت في الحوش أمي جات قعدت معاي في نفس السرير ، قالت لي يومك كان كيف ؟؟ قلت ليها تمام ، قالت لي جيبي ليك حاجه أفرشيها على الأرض و أقعدي ، شعرك دا بهدلتيهو شديد ، قلت ليها ما عندي ليهو أخلاق ، قالت لي بسرحو ليك أنا ، قواام جيبي ليك حاجه تقعدي فيها ، فعلاً مشيت جبت فرشه صغيرهـ فرشتها و قعدت ليها ، شالت من الزيت و كان حـ تمسح بيهو شعري ، قلت ليها ما عايزا زيت ! قالت لي سمح يعني أسرحو ليك بالتراب ولا المويه ؟؟ قلت ليها بكره الزيت ، هسي لو رقدت ساي كلو يتمسح في المخده و أكعب لو سال ، رقبتي كلها حتكون زيت ، قالت لي ما بكترو ، قلت ليها الودك دا اسوأ شي ، قالت لي بالعكس سمح و بطول و بنعم الشعر ، عملت معاهو زيت نارجين و خروع و شمع و كركار ، قلت ليها دا كلو !!😥😰
المهم بقت تسرح لي في شعري و أنا حسيت نفسي نعسانه ، حلو إحساس يكون في زول بسرح ليك شعرك ، شويه كدا جا عبدالله داخل ، سلم علينا و مشى أوضتو طوالي ، جا راجع بعد مسافه و قعد في طرف السرير ، أمي قالت ليهو كنت في الجامعه ولا كالعادهـ ؟؟
قال ليها في الجـامعه يا أمي ، ما معقوله كل مرهـ تسأليني السؤال دا !! قالت لي ما بكضب ، عاد انت ما بتوثق فيك ، قام من مكانو و مشى دخل المطبخ و جا طالع تاني ، أمي قالت ليهو جعان ؟؟ قال ليها لا لا بس ... آي جعان .... كان متلخبط و متردد في الكلام ، أمي قالت ليهو أجي !! في زول ما بعرف نفسو جعان ولا لا ؟؟ و بعدين مالك زي الرايحه ليك حاجه ؟؟ قال ليها ماف شي .... أمي بقت تنادي على لميس ، لمن جات طالعه قالت ليها أمشي ختي أكل لأخوك دا .... طبعاً أنا بقيت استغرب فيها !! أمي ما كانت بتشغل لميس دي نهااااي ، راحتها و قرايتها عندها في المقام الأول بس شكلو رسوب لميس و ربيتها زعل أمي شديد منها و طمم ليها بطنها و قفل نفسها !!
المهم عبد الله جا قعد معانا و لميس عن سكات مشت جهزت ليهو الأكل و جابتو ، ختتو و رجعت دخلت جوهـ ، عبدالله بقى ياكل و يتلفت و أنا بعاين ليهو ساي ، بعد مسافه قلت ليهو انت بتفتش على حاجه ؟
أمي قالت لي شايفاهو بتلفت زي المروحه ، يا ولد انت كان ضايعه منك حاجه قول عشان نفتشها ليك ، قال لينا منووو !؟ أنا ! لا ما بفتش على حاجه ، أمي قالت ليهو بس ما يكون باريت الأولاد الما ياهم و بقيت تشرب و تتعاطى معاهم سم هاري ، الليله وووب !! قال ليها عليك الله يا أمي انتِ بتقولي في شنو ياخ !!... لمن قام على حيلو أمي قالت ليهو أقعد كمل أكلك ، قال ليها شبعت ، أول ما اتحرك كدا قلت ليهو أسيل مشت بيت خالتي نجوى .... طبعاً ما إتلفت علي واصل مشيهو وصل الوضايه غسل يدينو و طلع ، أمي قالت لي يعني هو كان بفتش عليها ؟؟ قلت ليها اييوه و خجلان يسأل منها ، قالت لي غايتو جنس محن... قلت ليها البت دي يعني خلاص مسيرتها التعليمه انتهت !؟
قالت لي نعمل ليها شنو يعني !؟ ليه ما فكرت في حياتها و قرايتها و شرفها و أسرتها قبل ما تعمل عملتها مع الصايع أخوك دا !!
قلت ليها هم الإتنين غلطوا ، عبدالله مواصل حياتو عادي و بمشي الجامعه فـ ليه هي توقف تعليمها !؟ قالت لي البت زي الولد !؟ و بعدين هي بقت عندها مسؤوليه ، ولدها دا حـ تخليهو لمنو !؟ و أساساً هي ذاتا شبها ما شبه القرايه و إلا ما كان بارت الفارغه ، قلت ليها أهلها برضو غلطانين و بالذات أمها ، معقوله ما حست على بتها !؟ ما عارفه كيف مخلياها على راحتها لمن تغلط غلط زي دا ، يا ربي في الوقت الكانت فيهو البت دي مباريه الفارغه أمها كانت وين ؟؟
طبعاً قلت الكلام دا قاصـده و أمي فهمتني عشان كدا سكتت و ما قالت حاجه ، سلكت لي شعري و لفتو لي و قالت لي خلاص قومـي ...
المهم لمن قمت و مشيت دخلت الأوضه لقيت لميس بتمسح في دموعها ، يمكن دي المرهـ التالته أشوفها بتبكي ، شلت اللابتوب بس و طلعت بيهو برا ، قعدت شويه بعدها مشيت لأمي في المطبخ ، قلت ليها عشان ما تخسري بتك التانيه الأفضل تمشي تشوفيها مالا ، قالت لي منو ! لميس ؟؟ هزيت ليها راسي ، قالت لي مالا كمان ؟؟ قلت ليها لو عايزا تعرفي اسأليها ... أول ما اتحركت كدا ، قلت ليها لو بقيتي تتعاملي معاها معامله سيئه كدا عشان تخففي تأنيب ضميرك أو تحسسيني اننا في نفس المستوى بالنسبه ليك ما حـ تستفيدي حاجه والله و ماف داعي لـ دا كلو ، أما لو بتتعاملي معاها كدا عشان ربتت عايزا اقول ليك ما تنسي إنو دي لميس الكنتِ ماليه يدك بيها و ما شايفه غيرها ، لميس بتك المفضله و تكاد تكون بتك الوحيدهـ عشان كدا ما تخسريها عشان ما يكون عندك ولد وااحد ، بس مفضل عند أبوهو....
إتلفتت عاينت لي كدا و طلعت مشت لـ لميس ، المهم بعد المغرب كدا أسيل جات داخله و هي شايله حمودي و في اليد التانيه شايله كيس كبير فيهو عده ، أمي كانت في الوضايه فـ إتناولت منها الكيس لأنو كان تقيل ، قالت ليها كنت تخلي واحد من أولاد نجوى يشيلو ليك لأنك شايله ولدك ، قالت ليها عبدالله كان شايل لي حمودي ، وصلني جنب الباب و مشى ، أمي قالت ليها كويس خشي ، أسيل قالت لي عمتي نجوى قالت ليك المرهـ بتاعة العده كانت حتجيك و تجيب ليك العدهـ بنفسها لكن جاها اتصال مهم و اضطرت تمشي عشان كدا نجوى رسلتو ليك معاي.....
المهم بعدها بشويه أبوي جا ، ختينا الأكل و قعدنا كلنا ناكل ، عبدالله ذاتو جا راجع طوالي ، فهمت إنو ما كان عايز يدخل مع أسيل قدامنا عشان كدا وصلها للباب و مشى ، قلت غيتو عليهو جنس حركاااات !.... المهم بعد العشا شلت تلفوني و إتصلت على طيف ، انتبهت انها تاني ما إتصلت علي ، رديت علي بعد مسـافه و من صوتها عرفتها زعلانه ... اعتذرت ليها و حكيت ليها الحصل و السبب الخلاني اختصر مكالمتها ، قالت لي أنا المزعلني انك اتصرفتي من دون ما تكلميني !! يعني حتى لمن قمتي طالعه ما أديتيني خبر !!... قلت ليها طيف بصراحه انا ما عايزا أدخلك في الموضوع دا ، لا انتِ لا أخوك ، قالت لي خلاص تمام و طوالـي قفلت الخط ، حسيت إنو المرهـ دي زعلها كبير و حقيقي ، حتى إعتذاري ما كان كافي بالنسبه ليها !!...
في اليوم البعدو لمن مشيت الشركه و جيت سلمت على طيف سلمت علي بـ برود و وقت البريك على غير عادتها ما جات قالت لي أرح الكافتيريا ! شفتها مشت مع ناس ندى و داليا ! في اليوم داك خالص ما شفت قصي ولا لمحتو بالغلط ، يمكن ما جا ، قلت أحسن ذاتو ، المهم بقيت مواصله في شغلي و طيف مركزهـ في الكمبيوتر حقها و لو عايزا حاجه أو أي استفسار بتمشي لـ ناس داليا أو شادي ، بقيت أعاين ليها ساي و هي عامله نفسها ما شايفاني ، كانت بين كل دقيقه و التانيه تجيني و تتكلم معاي شويه بس اليوم لا !... شويه كدا جاني سمير و قال لي مها كيفك ؟
قلت ليهو كويسه الحمدلله ، قال لي و أنا كمان كويس 😅....المهم عايزا اسألك كم سؤال كدا ، قلت ليهو اتفضل ، المهم قعد يسألني و أنا بجاوب ، اسئلتو كانت في حدود الشغل ، لمن خلص اسئله قال لي مشكووورهـ ما نعدمك ان شاء الله ... كان ناوي يتحرك كدا بس رجع تاني و قال لي ممكن سؤال ، قلت ليهو عادي اتفضل ، قال لي انتِ و طيف متزاعلين ؟ لأنو اليوم على غير العادهـ ما شايفكم مع بعض ، قلت ليهو لا ماف شي ، قال لي ايواااا كويس ، صداقتكم حلوه ، ربنا يديمها ، قلت ليهو آمين يا رب ، سكت شويه تاني قال لي حـ تقولي علي متطفل بس انا متشحتف بسبب السؤال دا ، قلت ليهو يلي هو ؟؟
قال لي انتِ مرتبطه ؟؟
قلت ليهو و متزوجه كمان ، اتفاجأ و قال لي يا خساره ، بس طبيعي وحدهـ زيك ما تكون سنجل ساي 😔
ما رديت عليهو و هو مشى طوالي ، لمن خلصت شغلي إتصلت دكتورهـ رانيا و قلت ليها انتِ في المصحه ولا في عيادتك ؟؟ قالت لي في العيادهـ قلت ليها خلاص حـ أجي عليك ، قالت لي تعالي طوااالي.....
المهم اول ما الدوام خلص طلعت طوالي ، طبعاً عـارفه مكان العيادهـ و أنا في الحقيقه ما ماشـه ليها عشان اتكلم معاها بخصوص الحصل أمبارح ، أنا ماشه ليها بإعتباري مريضه و هـي دكتورتي النفسـيه ، أنا خلاص اقتنعت إنو لسه فيني شوائب ، لـسه في مواقف أنا ما قادرهـ اتجاوزها ، لسه في حاجات بتعكر مزاجـي ، لـسه في حاجات كتيرهـ فيني ما اتغيرت ، زي عدم مبالاتي ، يعني لو كان حاصل العكس و انا الزعلانه من طيف كانت حتجي و تراضيني و أنا حالياً حسيت نفسي مكتفه و لساني مربوط !! ما عرفت أراضيها ، غير إعتذار أمبارح ما قدرت أقول ليها شي ....
أول ما وصلت العيادهـ انتظرت شويه لأنو كان في مريضه ، بعد ما طلعت إتصلت عليها و كلمتها إنو وصلت و منتظراها برا ، قالت لي خشي طوالي ، دخلت و قلت ليها ان شاء الله ما أكون عطلتك عن شغلك ، قالت لي أبداً ، القبل شويه دي كانت آخر مريضه عندي ، المهم حكيت ليها الحصل امبارح بالتفصيل و طلعت ليها الفلاشه ، قالت لي زي ما كنا متوقعين ، الموضوع دا كبير و الكبكبه و الجهجه الحصلت امبارح في المصحه بسببك كانت خير دليل على إنو في شي بحصل خلف الكواليس ، عصام دا أمبارح أول مرهـ اشوفو متوتر كدا ، تسجيل كاميرات المراقبه دي عادوها أكتر من 3 مرات و حاولوا يعرفوا انتِ منو و شغاله مع منو ، بعدها شددوا الحراسه و عملوا استدعاء لكل الناس الجات جديده من دكاتره لـ ممرضين لـ عمال نضافه و قعدوا يحققوا معاهم ....
قلت ليها أنا شفت كل ملفات سنة 2014 الهناك بس ما لقيت اسم ميادهـ ، و الملفات الفي الفلاشه دي شفت جزو منهم لأنهم حصيلة سنوات ، قالت لي يمكن ملف ميادهـ تبع سنة 2013 أو 2012 لحد 2020 ، ما ضروري تكون في المصحه من نفس السنه الهربت فيها !! قلت ليها و يمكن ما هربت !! قالت لي دا موضوع تاني حـ يخليني ندخل في تحليلات و إتحمالات كتيره بس الأكيده إنو الموضوع دا ما بشمل ميادهـ براها و بعيداً عنها في شي حاصل في المصحه دي ، قلت ليها فعلاً لأنو مستحيل يشدد الحراسه و يعمل دا كلو عشان ميادهـ في المصحه !! قالت لي ما فـاهمه ليه عصام يدخل مرتو المصحه !؟ قلت ليها زي ما قلت ليك قال إنها بتخونو ، قال لي للسبب دا دخلها المصحه و كذب على أهلها و كل الناس و قال إنها هربت ؟؟ لا ما أعتقد دا السبب ، قلت ليها حيكون شنو ؟؟ قالت لي قلتي لي إنو مياده عندها بت أخوها كانت معاها في البيت تم إغتصابها و ماتت ! و المتهم الراجل المفتكرين إنو مياده خانت بيهو عصام .... ما عارفه كيف بس القصه دي كلها ما مقنعه يعني أنا الما بعرفهم و بعيده كل البعد عن القصه دي ، أول ما سمعت بيها حسيت إنو في شي ما تمام فـ محتاره كيف أهلها و أهلو صدقو كلام زي دا !!؟ معقوله تجيب راجل و تدخلو في وسط بيوتهم بعدين الراجل يغتصب بت أخوها و هي تهرب معاهو ؟؟ جادين الناس ديل ؟؟
قلت ليها معاك حق أنا ذاتي فكرت كدا بس عصام دا واحد محتال و عندو قدره هايله على الكذب و الإقناع....
قالت لي جيبي الفلاشه ، أديتها ليها ، ركبتها في لابتوبها و بقت تشوف في الملفات ، ما طولت ، طلعت الفلاشه و قالت لي الملفات دي كلها ما حـ نستفيد منها حاجه ، قلت ليها كيف ؟؟
قالت لي فكري معاي ، لو انتِ عندك سر داساهو أو مريض ما عايزا زول يعرف شي عنو هل حـ تعملي ليهو ملف فيهو بياناتو و مراحل علاج !! يعني عصام لو كان هدفو يخفي مرتو أو يجننها عديل ليه يعمل ليها ملف و يختو في الأرشيف كمان !! أنا فهمت ليه لمن كانو يجوا عناصر أمن هو بكون شبه متطمن و الأخبار بتصلوا قبلها بأيام ! شكلو عامل حسابو بس دخولك للمصحه و طلوعك منها من دون ما تتمسكي هددو و جهجه أفكارو .... بقيت أفكر في كلامها مسافه بعدها قلت ليها في احتمال يكون في ناس غير ميادهـ هو خافيهم ؟؟ .... كانت بتهز في قلمها ، قالت لي أنا ذاتي قلت كدا ، القصه دا كان ممكن تتحل ببساطه بمجرد ما نفتح بلاغ بس زي ما قلت ليك عصام شكلو يدو واصله و في ناس كباااار داعمنو عشان كدا أنا قلت ما عايزا قصي و طيف يدخلو في الموضوع دا و ياريت انتِ ذاتك يا مها ما تدخلي نفسك و الأحسن تكلمي أهل البت لأنو دا لا شغلي لا شغلك.... قلت ليها انتِ عارفـه إنو .... قاطعتني و قالت لي زي ما قلت ليك كلمي أهلها و خلي موضوعها عليهم لأنها بتهم في النـهايه....
بس عشان ما تحاول تقنعني بالموضوع قلت ليها تمام و غيرنا السيرهـ و كلمتها إني جايه مقابله عديل و قررت آخد جلسات معاها ، قالت لي قرارك سليم و دا العرفتو من لمن قلتي لي جاياك في العيادهـ ، المهم المره الفاتت أنا قلت ليك أحكي لي عن طفولتك و مراهقتك لحد ما كبرتي و انتِ حكيتي لي أبرز الأحداث ، المرهـ دي عايزا اسم منك بالتفصيل ، شنو البضايقك و شنو البفرحك و اهم حاجه عايزاك تقوليها لي في نهاية الجلسه دي عيوبك و مميزاتك و لازم تعترفي بيها عشان لقدام تقدري تعالجي عيوبك و سلوكياتك الغلط .... قلت ليها طيب ، قالت لي لو في موقف حسيتي انك ما بتقدري تقوليهو لي و انتِ بتعايني لي ، بتقدري تعايني للكرسي الجنبك أو اقول ليك حل ، حـ اخت ليك قماشه على عيونك عشان تاخدي راحتك في الكلام و تحسي انك قاعدهـ براك ، قلت ليها طيب ، فعلاً لفت قطعت قماش حولين عيوني و قالت لي ابدي......
فعلاً بديت أحكي ليها و أنا حاسه إني براي في الغرفه ، المرهـ دي حتى أحاسيسي قلتها ليها ، من زمن طويل ديك كانت أول مرهـ أفتح قلبي ضلفتين و أبوح بالجواي بكل التفاصيل ، فـي نهاية كلامي قلت ليها حالياً أنا ما قادرهـ اتعامل مع أهلي ولا قادرهـ أنسى العشتو ولا قادرهـ اتجاوز قصة التحرش ، كمان أنا حاسه بالذنب و قلبي واجعني شديد و ضميري مأنبني على طول ، أنا ما مرتاحه ، صح بشغل نفسي و بمشي الشغل و يومي كلو ملان بس مع ذلك حاسه نفسي وحيده و أبداً ما مرتاحه .... قالت لي محافظه على صلواتك في وقتها ؟؟ قلت ليها ايوه ... قالت لي طيب أحكي لي ليه حاسه بتأنيب الضمير ؟؟
فجأه كدا قعدت أبكي و ما قدرت أكمل ، شلت القماشه عن عيوني و فتحت شنطتي طلعت منديل مسحت بيهو دموعي بس كانت مصرهـ تنزل ، دكتورهـ رانيا قالت لي ما تمسكي دموعي ، آخدي راحتك على الآخر ، طالعه هسي برجع ليك ، لو عايزا أبكي على راحتك لأنو في حالات كتيره البكى بكون مفيد ... لمن طلعت خلتني ياداب بكيت كويس ، جاتني راجعه بعد مسافه لقتني خلاص أخدت كفايتي من البكى ، أدتني مويه و قالت لي حاسه نفسك أحسن ؟؟ قلت ليها ايوه ، شلت منها المويه شربت و قلت ليها ما قادرهـ اتكلم أكتر ، قالت لي تمام ماف مشكله أصلا الفضفضه ما بتنقال دفعه وحده ، المهم في المرهـ الجايه لمن تجي عايزاك تجيني و انتِ مطلعه عيوبك و مميزاتك ، إتفقنا ؟؟
قلت ليها ايوه ، شلت شنطتي و وقفت على حيلي عشان أمشي ، بس قبل ما أطلع قلت ليها أنا ما عارفه سعر الجلسه بكم ، قالت لي هسي أنا ما سألتك عن شي ، قلت ليها أنا ما حـ أرضى والله إني أجيك من دون ما أدفع قرش ، ضحكت و قالت لي طيب بس الجلسه دي ما محسوبه ، المهم قدمتنا لحد الباب و رجعت ....
بعد تلات أيام كنت خلاص خلصت الملفات كلها و زي ما لقيت إسم مياده ، حتى إني راجعت سجلات الناس الطلعت من المصحه لحد سنة 2020 بس إسمها بالغلط ما لقيتو !... دخلت كل ملف و عرفت عدد المرضى ، جمعت عدد المرضى المسجله اسمائهم في باقي الملفات كان عددهم كبير ، ديل ما مهمين مهمين الموجودين حالياً ، بقيت أحسب و أضرب لحد ما وصلت لعدد تقريبي لـ المرضى الموجودين حالياً في المصحه ، إتصلت على دكتورهـ رانيا و قلت ليها عايزا أعرف عدد الغرف في كل طابق كم ؟؟
قالت لي يعني ما نسيتي الموضوع داك زي ما إتوقعت ، قلت ليها ضروري أعرفهم ، قالت لي طيب ثواني بس ، فصلت و رجعت لي بعد مسافه و ورتني عدد الغرف في كل طابق ، ضربت عدد الغرف في عدد الطوابق و عرفت إجمالي عدد الغرف في المصحه و لمن قارنتها مع عدد المرضى لقيت إنو الغرف أكتر من المرضى ، قلت يمكن شي طبيعي لأنو في مرضى جداد بجوا المستشفى!! لمن اتصلت على دكتوره رانيا و كلمتها قالت لي عايني الحاجات دي بتكون منظمه و مرتبه ، يعني لو المصحه مليانه مستحيل يقبلو مريض ، قبول مريض جديد ليهو علاقه بخروج مريض من المصحه ، الغرفه الكانت ليك بكرا لمن تطلعي منها بتبقى لـ غيرك .... كنت بتكلم معاها و أنا لسه بشوف في الملفات ، قلت ليها حالياً لاحظت إنو عدد الغرفه الفائضه دي هي عدد طابقين !! يعني معقوله يكونو في طابقين خاليات !! وين ديل و المستشفى لحد الطابق الخامس ملانه !! لو قلنا الطابق التالت دا واحد ، طيب الطابق التاني الفيهو غرف فائضه دا وين ؟؟
قالت أنا كمان محتارهـ !! الطوابق كلها مليانه و ماف طابق خالي من المرضى ! قلت ليها دا البحير....
المهم في اليوم البعدو مشيت ليها لأنو كان عندي مقابله معاها ، بقيت أرتاح شديد لمن اتكلم معاها ، نصايحها و تشجيعها لي بحمسني شديد ، في نهاية الجلسه لمن كنا بنتكلم عن أهلي وكدا قالت لي انتِ أعملي العليك بِري أمك و أبوك ، راحة الضمير أهم شي و رضى الوالدين سبب في راحة القلب و العقل ، ايوه عارفه انهم قصروا منك و انك زعلانـه شديد بس بأكد ليك انك حـ تستشعري الراحه و الطمأنينه لمن تعملي واجبك تجاهـ أمك و أبوك و أخوانك ، أعملي العليك بس و كملي حياتك عادي ، والله ماف حاجه أهم من راحة البال ، بعدها قالت لي يلي قولي لي عيوبك و مميزاتك ، قلت ليها ما عندي ميزه ، كلي عيوب ، ما بسأل عن زول ، ما بقدر اقدم حاجه لزول ، لامباليه ، ما بقدر اتفاعل مع زول ، أقصى حاجه ممكن أعملها لزول لمن اغلط معاهو هو إني أعتذر و بس ، ما بعرف أواسي ، ما بعرف اقول كلام ايجابي لزول ، بكرهـ التجمعات ، ما بتأقلم على ناس جديده و ما بحب اتعرف على زول ، قالت لي طيب كدا مرتاحه ؟؟
قلت ليها ما عارفه ، مرات بحس إني كدا مرتاحه عشان ما حـ اضطر ابرر لزول ، ولا حأكون مجبورهـ أراضي زول ، قالت لي قلتي مرات ، يعني أحياناً بتحسي عكس كدا ؟؟
قلت ليها صراحة ايوهـ ، أنا و طيف لينا كم يوم كدا ما بنتكلم مع بعض ، هي زعلت مني عشان ما كلمتها بموضوع المصحه ، أنا غير اعتذرت ما قدرت أقدم ليها شي أو اقول ليها شي ، أنا انسانه غير صالحه للعلاقـات 💔
قالت لي طيف حكت لي ، هي المزعله أكتر انك ما حاولتي تراضيها ، ما إهتميتي بزعلها ، طيف من نوع الناس البعطي بسخاء ، بتديك من دون ما تحسسك انها عايزا مقابل ، بتقدم من دون ما تفكر حـ تستفيد شنو من الزول القدمت ليهو دا أو هو بقدر يعمل شنو عشانها ، بتتبع إحساسها و مشاعرها و بتعمل البتحس إنو صح ، بس دا برضو ما معناها انها ما حتزعل لو ما لقت مقابل للشي البتعملو ، المهم العايزا اقولو ليك اتحدي نفسك ، أكسري قواعدك ، أخرجي عن المألوف حقك ، حاولي تليني قلبك و أهم اتخلصي من تأنيب الضمير ، ما عيب إنو الواحد يعترف بـ غلطو ، ما عيب انك تحاولي تصلحي الغلط ، لو انتِ و طيف في بداية صداقتكم كنت حـ اعذرك و اقول انك خايفه تثقي في زول و يخذلك ، حـ اقول انك ما بتدخلي في الناس بسهوله ، بس حالياً انتِ و طيف ليكم كم مع بعض ؟؟ السنوات دي كلها ما أثبتت ليك إنو طيف بتستاهل إنو ينقال عليها صديقه وفيه ؟؟ ما بتستاهل تعتذري منها و تراضيها بكل الطرق ؟؟
المهم بقت تتكلم معاي مسافه و أنا بسمع فيها و كلامها بدا يأثر علي ، هي دكتورهـ لطيفه و ظريفه و كلامـها يتحب والله 💜
