لمن إتلفت لقيتو عصام !!
قال لي قولي بسم الله شايفه شيطان قدامك ولا شنو !!...قلت ليهو فكني يا حيوان و بقيت أحاول أفك يدي منو ، قال لي أهدي أنا بس جاي أتونس معاك و أعرف أخبارك ....رخيت يدي و بطلت صراع ، قال لي ايييوه كدا خليك هاديه .... أوهمتو إني هديت و ناويه اسمعو ، بعدها بكل قوتي لزيتو و دخلت الغرفه و قفلت الباب علي ، طوالي شلت تلفوني و إتصلت على تامر ، أول ما فتح الخط قلت ليهو ألحقني يا تامر ، قال لي بخلعه في شنو ؟؟ طوالي حكيت ليهو الحصل و قلت ليهو حالياً هو واقف لي برا الغرفه ، قال لي خليك قافله الباب عليك ، مسافة الطريق بس و أكون معاك.... كان واضح من صوتو إنو إتملى غضب ، عصام كان شغال لي أفتحي الباب ما عايز أعمل ليك شي يا بت الناس ، في شنو ، مالك بتتعاملي معاي كدا !؟
فتحت مسجل تلفوني و قلت ليهو عدم الحياء دا انت جايبو من وين ؟؟ لمتين حتكون ملاحقني كدا !!؟ عايز مني شنو فهمني !؟
قال لي حأكون عايز منك شنو مثلاً ؟؟ مجنونه انتِ ولا شنو ؟؟
طبعاً قدر ما حاولت أخليهو يقول نواياهو الخبيثه عشان تتسجل الغتيت ما قال شي ، كأنو عارف إني قاعده أسجل !!.... أنا متأكده إنو سمعني لمن كنت بتكلم مع تامر ، طيب ليه ما مشى لحد الآن ؟؟ فهمو شنو الراجل القذر دا !؟
بعد مسافه صوتو إختفى بس برضو ما فتحت الباب إلا لمن سمعت صوت تامر ، طوالي فتحت ليهو الباب و ضميتو ....هو إتخلع أكتر مما كان مخلوع لأنو ما حصل بادرت و عملت تصرف زي دا ، دائماً هو البخطي ناحيتي ، قال لي أحكي لي بالتفصيل الحصل شنو ، قلت ليهو نفس الكلام و سمعتو التسجيل عشان يتأكد إنو بالجد عمو كان واقف لي جنب باب الغرفه ، من مكانو داك طوالي مشى عليهو و أنا وراهو ، دخلنا بـ بيتهم و كنا ماشين بـ باب النص لـ بيت عصام بس فجأه كدا جانا صوت خالتو رقيه و هي بتقول في شنو يا ولد يا تامر !!؟ مالك هايج كدا ؟! ما رد عليها و واصل مشيهو و أنا وراهو ، قالت ليهو لو عايز عصام ياهو قاعد معانا في المظلـه ، في اللحظه ديك الإتنين إتلفتنا عليها !! أول ما عصام جا طالع من المظله و وراهو أخواتو و تيسير تامر بإستعجال مشى عليهو و أول ما وصلو وقع فيهو ضرب و قال ليهو يا وسخ يا حيوان تخت عينك على مرتي ، اخواتو بقوا يصرخوا و حاولوا يفكوهو منو بس ما قدرو ، خالتو رقيه جات وقفت في نصهم و لزت تامر بكل قوتها و قالت ليهو لو مديت يدك عليهو ما عافيه ليك والله ، قال ليها يا أمي انتِ بس ما عارفه الوسِخ دا بعمل في شنو !!؟
قالت ليهو حاول ينتهك حرمتك و يعتدي على مرتك !؟؟
قال ليها عارفه و مع ذلك لسه بتدافعي عنو و انتِ مره زيها !؟ عمتو علياء قالت ليهو دا حصل بس في مخيلة مرتك ، و دا الكنا متوقعنوا منها ، و من قبيل مترقبين الحاجه دي لأنو حفظنا تصرفات مرتك حفظ ، انت ما ملاحظ إنها بتحاول تعمل فتنه بينك و بين عمك !؟
طبعاً أنا كنت متوقعه حاجه زي دي ، طوالي فتحت تلفوني و سمعتهم التسجيل ، قلت ليهم كمان قولوا دا ما صوت عصام و قولوا التسجيل دا موجود بس في مخيلتي !!
نوال قالت لي ماف شي في التسجيل بيوحي لينا إنو عصام حاول يعتدي عليك !؟؟
تامر قال ليها بنهره فهميني طيب كان بعمل شنو في بيتي و أنا مافي !؟ بعمل شنو ورا باب غرفتي !؟ عايز يتونس معاها و يعرف أخبارها ليه و أنا غايب !؟
عصام قال ليهو اسمعني يا تامر ، ماف أي شي حصل أو كان حيحصل من الفي بالك ، ما قادر استوعب انك بتصدق إني ممكن أفكر بالطريقه دي في مرتك و أنا عمك !! ايوه صح كنت عايزها و اتزاعلنا بسببها بس صدقني أول ما بقت في عصمتك أنا شلتها من بالي ، تامر قال ليهو بحدهـ كنت بتعمل شنو في بيتي و أساساً ليه تمسك ليها يدها ؟؟
تيسير قالت ليهو نفسي أعرف البت دي ألفت ليك أي سيناريو خلتك بيهو تتهم عمك بالباطل !! أمو قالت ليهو قبل كدا كذبت عليك و خلتك تشك في عمك و هسي عايزا تزيد شكك و تخلق الفتن بيناتكم ، قلت ليها أنا ما كذبت و أساساً حـ استفيد شنو لو عملت فتنه بيناتهم !؟ ما قدام تامر بس ، قدامكم كلكم حأقولها ليكم ، الراجل الجا داخل علي في البيت دا عصام شئتم أم أبيتم ، إتلفت على عصام و قلت ليهو غلطت لمن لبست لون بارز زي الأصفر ، عاينت لـ تامر و قلت ليهو نفس القميص الكان لابسو الراجل الجا داخل علي شفت عمك لابسو ، و انتوا كـ أهلو أكيد عارفين إنو عندو قميص أصفر ما تنكروا ، عصام قال لي فعلاً عندي قميص أصفر ، بس أفهمي يا بت الناس في اليوم داك أنا أساساً ما كنت موجود ، و حتى لو موجود ما حـ أفكر اعمل كدا ، على الأقل احترميني شويه ، ما تتهميني اتهام قذر زي دا ، أنا عم راجلك و أكبر منك بكتير ، قلت ليهو ياداب عرفت نفسك أكبر مني بكتير ؟؟
خالتو رقيه و أخواتو و تيسير قعدوا يجوطوا و تامر حسيت مخو ضرب ، نهرنا و قال لـ عمو سؤالي واضح كنت بتعمل شنو في بيتي ؟؟
قال ليهو دا الكنت بحاول أفهمك ليهو من اللحظه الجيت و اتهجمت علي فيها ، و على فكره ديل كانوا متوقعين حاجه زي دي من مرتك ، عشان كدا لمن حكيت ليهم التصرف الغريب العملتو لمن مشيت ليها ، قالوا لي إنو دي حركات منها و عاتبوني لأني مشيت ليها بكل حسن نيه ، لأنها عايزا فينا ثغره تعمل بيها جوطه ، و عشان اتأكد بنفسي و ما يكون كلام نسوان ساي ، فضلت إني اقعد و أشوف بعيوني و أكون موجود فـ حال انك جيت تفتش علي و فعلاً دا الحصل ، تامر قال ليهو ما تخليني أعيد السؤال تاني يا عصام !
علياء قالت لـ خالتو رقيه ، شايفه ولدك بتكلم كيف مع عمو ؟؟!
عصام قال ليهو ، ديل اتشاكلوا مع مرتك و مشاكلهم بقت كتيره ، لمن سألتهم حكوا لي سبب المشكله بس زي ما سمعت منهم حبيت أسمع منها و أحاول أحل المشكله ، أنا ما كنت قاصد أمسك يدها و لو مسكتها ما حيكون بـ نيه سوداء أو خبيثه ، لمن قلت ليها عايز اتونس معاك ، قلت كدا عشان هي ما تحس إني جاي أشاكلها بسبب النقاش الحصل بينها و بين أختك و أمك ، أنا ما نطيت في بيتك ولا جيت ليها في غرفتها ولا إتهجمت عليها ، جيتها عديل بالباب بس هي من دون ما تتأكد اتخلعت و قامت جاريه ، عرفتها خافت عشان كدا من دون قصد مسكتها و كنت عايزها تعرف إنو دا انا ما زول غريب ، بس سبحان الله ، مرتك حتى بعد ما عرفت اتصرفت بغرابه و دخلت و قفلت باب الغرفه و بقت تقول كلام خارم بارم !! حاولت أخليها تطلع عشان افهم منها في شنو و ليه هي اتصرفت كدا بس ما طلعت فـ خليتها و رجعت لـ ديل و لمن سألوني حكيت ليهم تصرف مرتك الغريب !!
أمو قالت ليهو بعد دا الغلطان منو ؟؟
عماتو قالوا ليهو تاني أوعك تسمع كلامها و تصدق أي شي تألفو ليك ، ما تكون راجل سميع أي حاجه تقولها ليك تتنفخ و تجينا جاري و تنتفض فينا ، تيسير قالت ليهو مرتك دي عندها مشكله معانا كلنا ، حتى أولادي الصغار ديل عندها مشكله معاهم و سبب نقاشنا معاها إنها شاكلت رؤى و طردتها من البيت ، رؤى دي جاتني تبكي ، لمن مشينا ليها أنا و أمي كذبت و قالت رؤى خربت ليها !!
طبعاً أنا صدعت !! مبالغه والله ! ما قادرهـ استوعب كمية الكذب و النفاق الفيهم دا !! يا ربي هم بتفقوا كلهم ولا أي واحد بتم كلام التاني !!
ختيت أصابعي بين حواجبي و قلت ليهو تامر أنا صدعت بالجد ، أكتر من كدا ما قادره والله ، أهلك شاطرين شديد في الكذب و التأليف و على فكره أنا حاجه ما رفعتها من الغرفه ، خليتها زي ما هي عشان تامر يجي و يشوف بعيونو ، خالتو رقيه قالت لي نحنا ذاتنا حاجه ما رفعناها من المطبخ ، عشان تامر يجي و يشوف بعيونو ، قلت ليها شنووو ؟؟ أنا متين دخلت مطبخكم ؟؟ أساساً بيتكم دا ما قاعده أجيهو ، قالت لي أخليك تكذبي براك يعني ؟؟ زي ما أنا بقدر أجوط المطبخ و اقول دي انتِ ، كمان انتِ بتقدري تعملي نفس الشي في غرفتك و تقولي دي رؤى ، قلت ليها ياخ أنا مستحيل أعادي لي شافعه ، و رؤى انتوا الموصنها عشان تعمل كدا ، تيسير قالت لي ماف داعي للكذب ، انتِ ريدة تامر لأولادي و ريدتهم ليهو دي واجعاك شديد و لو عليك تحرميهم منو و تمنعيهم من بيتك يلي هو بيت خالهم ، و على فكره أنا عارفه انك ما بتاكلي معاهم في صينيه وحده لأنو وجودهم بضايقك .... عاينت لـ تامر و قالت ليهو عرفت ليه انا بجي أناديهم عشان ياكلوا هنا ما هناك ؟؟
طبعاً أنا خلاص حسيت راسي لافي بسبب تأليفهم دا !! ما قدرت عليهم والله !! كيف هم قادرين يكون بالبشاعه و الفظاعه دي !!
خليتهم واقفين و رجعت بيتي و أنا عايزا أطق من الزعل ، تامر لمن جا راجع ما إتكلم معاي خالص ، فهمت إنو هم أقنعوهو بـ كلامهم ، الفرق بيني و بينهم إني واضحه شديد و شفافه قدام تامر بـ عيوبي قبل محاسني بس هم عكسي ، قدامو بظهروا محاسنهم كلها و أنا بوروني الوش التاني ، يمكن لو كنت زيهم بقدر اتنافق و اتظاهر قدام تامر إني بحبهم و بحترمهم كان وقف معاي بدون ما يتردد أو يشك .... بس انا ما بقدر أنافق ولا بحب أعكس شعور أو حاجه أنا ما حاسه بيها....
بعد اليوم داك تامر بقى بتجنبني و ما بتكلم معاي إلا إذا لزم الأمر ، أنا الوقت داك خلصت إمتحانات و نتيجتي طلعت و الحمدلله زي ما إتوقعت معدل عالي ، برضو في الفتره ديك أخبار أهلي إنقطعت عني لأني بعد أجزت بقيت 24 ساعه في البيت و خالتي بقت ما بتجيني ، حسيت إنو كلهم محاربني و كلهم واقفين ضدي ، بس كلهم ما كانوا بهموني بإستثناء تامر ، يعني فجأه كدا تجاهلو لي وجعني ، فقدت حنيتو و إهتمامو بي ، ما متأكدهـ إذا دا حب أو لا بس سفهتو لي حسستني بوخزه في قلبي ، بقيت أتمنى لو يقول لي كلمه واحده بس أو يعاين لي في عيوني ، طبعاً رمضان جا و برضو الحال بيني و بين تامر ما اتغير ، بشيل صينيتو و بمشي يفطر مع الرجال و تاني ما بجي راجع إلا مع زمن السحور ، رغم إني عارفه إنو قاعد قريب من البيت بس اتمنيتو يكون معاي ، حاسه بغربه و أنا في نص بيتي ، يوم بعد الفطرات و أنا بغسل في العده جاتني وسام ، دي بت نوال ، في نفس عمري ، قلت في نفسي شكلهم اشتاقوا للمشاكل ، شياطينهم لسه قاعده معاهم ، قالت لي مها كيفك ، قلت ليها أهلين ، كويسه الحمدلله ، قالت لي رمضان مبارك عليك يارب ، قلت ليها و عليك .... سكته و بقيت منتظراها تقول هي جات ليه ! يعني أسبوعين بفطروا عند بعض ياداب اتذكروني يعني !! ما مهم ما عايزاهم يتذكروني ذاتو ، بحرج قالت لي ممكن أقعد ؟؟
قلت ليها اتفضلي و مشيت جبت ليها عصير ، أديتو ليها و قعدت ، قالت لي تامر وين ما شايفاهو ، في نفسي قلت اهااا معناها مرسلنها لي جاسوسه ، عايزين يعرفوا إذا تامر قاعد يفطر معاي ولا بفطر برا البيت على طول ، رغم انهم حيكونوا عارفين إنو بقعد برا البيت بس عايزين يتشمروا زياده ، قلت ليها هسي كان قاعد بس طلع ، قالت لي كويس لأني ما حابه أزعجكم لو كان قاعد ، في سري قلت ليها انتوا كما أزعجتوني و عملتوا لي وجع راس ما بترتاحوا ..... كنت فاتحه قناه سودانيه فـ هي إندمجت و بقت تحضر ساي و أنا مراقباها بحذر و عامله حسابي ، قلت ما تكون عايزا تخت لي حاجه و تتهمني بيها قدام تامر ، فتحت تلفوني و شغلت المسجل ، عشان لو عملوا لي قصه و البت دي نكرت إنها جاتني هنا يكون معاي دليل ، بعد البرنامج خلص ، قالت لي ممكن أغير القناة ؟؟ ناولتها الريموت و أنا ساكته ، جابت mbc2 , ما تمت 3 دقايق من قلبت القناة جاها محمد ولد تيسير و قال ليها الليله أمك بتقتلك قالت ليك تعالي ، قالت اففف ، قال ليها قالوا ليك تعالي سرعه ، قالت ليهو أمشي قول ليهم جايه ، بعد ما مشى ، قالت لي عارفه جيتي غريبه بالنسبه ليك ، أنا كنت حاسه بكهربة الجو بيناتنا بس حاولت اتصرف عادي رغم إنك حاسه انك نافره مني و ليك حق بسبب مشاكلك الكتيره مع أهلي ، بس انا صدقيني ما قاعده أهتم بالمشاكل دي كلها ولا داعمه أي طرف و الموضوع كلو ما بهمني ، أنا عشان وجع الراس و المشاكل الما بتخلص دي ما قاعده أجي بيوت أعمامي ولا قاعده أخوض في نقاشاتهم أو اشاركهم ، عشان كدا خلي تعاملنا عادي و ما تتحسسي ، هسي أنا هربت من مواضيعهم و جوطتهم و جيتك هنا ، أساساً ما كنت عايزا أجي بس أمي أصرت المرهـ دي أجي معاهم عشان نفطر عندهم ، المهم حـ أمشي بعد دا ، يلا مع السلامه....
فعلاً وسام دي بعيده عن المشاكل البتعملها أمها نوال و باقي أهلها ، أساساً ما قاعده تجي كتير لـ بيوت أعمامها ، عندها أخوين أكبر منها ، هي أصغر وحده ، ديلك كمان ما قاعده أشوفهم و ما عارفاهم بمشوا وين ، لا مركزين مع زول لا في زول مركز معاهم ، وسام رغم انها كانت واضحه و كلامها يمكن يكون صادق نوعاً ما إلا إني ما بقدر أثق في فرد من أفراد الأسرة ديك ....
لمن تامر كتر المحلبيه و بقى ما بديني وش ، لأول مرهـ في حياتي اتنازلت ، قعدت مع نفسي و حاولت أشوف الموضوع من وجهة نظرو ، قلت من عرسنا هو ما شاف شي غير المشاكل و وجع الراس ، ما أنسى إنو وقف معاي كتير و دافع عني و الناس الوقف ضدهم ديل ما غرباء ديل أهلو ، تامر قدم لي الما قدروا يقدموهو لي أهلي طول ال 21 سنه من عمري ، لو جيت عشان أجازيهو و أديهو حقو على الأقل مفروض أتفهمو و أراعي ليهو شويه ، في النهايه عصام دا عمو و علاقتو بـ عصام و شعورو اتجاهو ما زي علاقتي بيهو و شعوري اتجاهو ، هو ما عارف ليه انا ما بطيق عمو ولا عارف ليه انا من البدايه وجهت أصبع الإتهام على عصام و ما عارف ليه انا بكره عصام للدرجه دي .... عشان كدا قررت إني أحكي ليهو ، حأقول ليهو عصام زمان كان بتحرش بي و بعد ما كبرت كان لسه بلاحقني و بحاول يقرب مني و لو لقى فرصه في أي لحظه أو زمان بحاول يقل أدبو علي ، حـ أخليهو يكتشف حقيقة عمو و يعرف إنو عصام الشايفو قدامو دا ما زي عصام الوسخ الأنا بعرفو .....
بقيت بقلب في القنوات و أنا منتظراهو يجي ، مشيت عملت العشا و هو لسه ما جا ، دخلت غرفتنا و شلت تلفوني و إتصلت عليهو عشان اقول ليهو تعال عايزاك ضروري بس ما رد علي ، ختيت التلفون على جنب و انتبهت إنو ما دخل ملابسو الكواهم قبيل في الدولاب ، شلتهم و مشيت فتحت الدولاب و ختيتهم فيهو ، بس انتبهت إنو في طرف ورقه مختوت تحت الملابس ، رفعتهم و شلتهم و عيني وقعت على الجمل الأولى ، المن ضمنها إسم المستشفى المشينا ليها أنا و تامر و قابلنا فيها الدكتور داك ، طبعاً أنا الموضوع دا نسيتو عديل ، كنت متذكراهو كم يوم كدا و كم مرهـ قلت اسأل تامر إذا النتيجه طلعت أو لا لأنهم قالوا حـ تطلع خلال يومين فقط بس تاني نسيتو بسبب كترة المشاكل ...
قبل ما أقرأ التفاصيل قلبي بقى يضرب شديد ، جاني نفس إحساسي لمن أدخل رقمي الجامعي عشان أشوف النتيجه و الخلاني أقلق زياده إنو تامر دس مني الأوراق دي ، بمعنى إنو ما عايزني أعرف النتيجه ! إذاً في مشكله ...
أميل إلى الشخص الذى يُلاحظنى بصوره عميقه ويفهم الكلمات المحذوفه في حديثي، يرى ذلك الجدال الكتوم في عيناي، أميل إلى الذي لاينسى الود في الخصام يقطع شك الكلام بيقين الفعل، أميل للذي يبقى مدركا لطباعي ويستثنيني ويلتمس لي العُذر ليحتفظ بي بأجمل صوره مُمكنه في عيناه
لكاتبه
يتبع.....
