قبل ما ألحق أستوعب الرسـاله الأولى رسل لي وحده تـانيه :
بالدانماركية Jeg elsker dig " يا إلسكا داي "
بالألمانية Ich liebe dich " إيش ليبديش "
بالصينية 我爱你 " وا آي ني "
بالإنجليزية I love you
بالسودانية بريدك 💜
المهم بكل لغات العالم بحبك....
طبعاً بقيت أعاين للرسايل و أنـا مخلوعـه !! دا شنووو دا !! معقوله دا قصي !؟
بقيت أتلفت يمين و شمال بس خالص ما شفتو ! قلبي كان شغال دق دق و حسيت جسمي كـلو إرتعش ، دخلت في حاله تانيه و حسيت نفسي في القطب الجنوبي من شـدة البرد الكنت حـاسه بيهو !!
أقرب طـاوله لقيتها قعدت فيها طوالي !! أسيل جات و قالت لي انتِ كويسه ؟؟
قلت ليها ايوه ، قالت لي خلاص مدام عايزا تقعدي أرح مـعاي نقعد مع أخوك هناك 😭 من قبيل بحمر لي سااااي و أشر لي عشان أجيهو ، أرح معاي عشان ما يشاكلني ، قلت ليهو لو عايز يشاكلك بشاكلك قـدامي ، قالت لي برضو أرح معاي ، المهم مشيت معاها للطاولـه القاعد فيها عبدالله ، قال ليها هاك ولدك دا من قبيل يبكي و انتِ ولا على بالك !! شالت حمودي منو و قالت ليهو طولت من الحفلات ، قال ليها دي آخر حفله ليك ، قالت ليهو ما عليك كيف ، قال ليها نعم نعم !! على كيف منو ان شاء الله !؟.....
بقوا يتناقروا و أنا سرحانه بعيييد في الآخر قلت ليهم ماشه لناس أمي ، مشيت قعدت معاهم قدام و أنا في نفس حالتي ، أمي قالت لي مالك انتِ ؟؟ قلت ليها ماف حاجه ، قالت لي خلاااص قومي أرقصي مع الناس ! قلت ليها لا لا ما عايزا ، شويه كدا جات خالتو رشيده و هي بتلقط في أنفاسها ، قالت غايتو الليله عملت جنس عمايل ، أمي ضحكت و قالت ليها ما عرس بتك 😂 لكن رقااااصه ما شاء الله ، قالت ليها و انتن قاااعدات ليه ؟؟ قواااام أرح هججوا معانا ، خالتي قالت ليها أنا ركبي واجعاني لكن سوقي معاك مها و ناهد ، المهم اضطريت اقوم معاهم ، بقوا يرقصوا و أنا بس واقفه بصفق ، أمي قالت لـ خالتو رشيده المرهـ الماسكه بتك طيف و بترقص معاها دي منو ؟؟ خالتو رشيدهـ لوت خشمها و قالت ليها دي مرة راجلي ، شايفه الراجل اب كرش داك اللابس عمه زي عمة ترباس ياهو الخايب الكنت معرساهو ، أمي ضحكت و قالت ليها يخسي عليك يا رشيده ! قالت ليها المعاهو ديلك أولادو ، أمي قالت ليها ما شاء الله والله ، خالتو رشيدهـ قالت ليها مااااغصني مغصه اصبري بس يوم بحكي ليك عمايلو ، أمي قالت ليها سمح ، عايزين لينا قعدة جبنه 😂😂
طبعاً قصي جا عاااادي و بقى يرقص و يبشر معاهم كأنو ماف شي !! كل ما عيوني تلاقي عيونو ببتسم لي و أنا لحد ما الحفله و الجرتق خلصوا ما فـاهمه شي !!!
طبعاً رجعنا البيت متأخرين ، ناس البيت من الفتر و التعب نامو طوالي إلا أنا الكنت صاحيه ، طبعاً أبوي ما مشى معانا ، كلهم كانوا نايمين في الحوش إلا أنا راقـده جوه و بتقلب يمين شمال و رسايل قصي في بالي !!
معقـوله بحبني ؟؟
طيب و مرتو ؟؟
طيب الناس حتقول علي شنو ؟ ناس البيت حتكون ردة فعلهم شنو ؟؟ ئهه ، كمان فاتحه نفسي و واثقه إنو حـ يوصل الموضوع لناس البيت ؟؟!! يعني أنا عايزاهو و ما عندي مانع ؟؟
حسيت عقلي حـ يطق من كترة التفكير ، النوم جافاني ، بقيت أحنس فيهو تحانيس عشان أنوم و عقلي يبطل تفكير ...
تاني يوم ما مشيت الشغل لأني صحيت مصدعه و من الصباح قافله معاي ، أخدت يومين بفكر في الموضوع ، في الآخر قلت ما حـ آخد كلام قصي على محمل الجد ، حـ اعمل نفسي كأني ما قريت رسايلو ، في اليوم التالت رسل لي في الواتس و قال لي غايبه 3 أيام ليه يا أستاذه ؟؟
قريت رسايلو من فوق بس ما فتحتها ، تاني رسل لي و قال لي ما تسفهيني ، برضو قريتها من فوق ، تاني ما رسل ، ختيت التلفون و مشيت قعدت برا في المظله مع أسيل و لميس ، كانوا عاملين جبنه و بتونسوا ، أمي مشت لخالتي ، لميس كانت بتحكي لـ أسيل عن حاجه لمن أنا جيت سكتت و تاني غيرت الموضوع ، المهم قعدت معاهم و أنا ما على بعضي بس كنت بحاول اتصرف عادي ، أسيل قالت لي انتِ من يوم عرس طيف ما تمام ، مالك حسيتي القطر فاتك و شلتي هم العرس ولا شنو 😂😂 قلت ليها لا ما كدا ، قالت لي اها في شنو ؟؟ قلت ليها ولا شي !! قولي لي قرايتك ماشه كيف ؟؟ قالت لي ماشي حاله ، أمبارح لميس كانت بتقريني في العربي ، قلت ليها تمام لو احتجتي مساعده برضو تعاليني ، قالت لي حاضر ، المهم أثناء ما نحنا بنتونس كدا سمعنا صوت الباب ، لمن لميس مشت فتحتو جاتنا داخله هي و وسام بت نوال ، سلمت علينا و قعدت ، طبعاً كنا مستغربين لأنو نحنا و هم ما بجيبنا لبعض إلا الشديد القوي ، أنا شخصياً ما عندي معاهم مشكله بس هم في وجود تامر و عدم وجودو شايلنها معاي ، طبعاً هي ذاتا حست بإستغرابنا ، قالت لينا طولت منكم فـ بس قلت أجي و أتونس معاكم مدام ماف موضوع ، قلنا ليها طوااالي ما عندك مشكله و كبينا ليها جبنه و قعدنا نتونس و إمتصينا الإستغراب الكان حاصل ، بعدها أسيل مشت لـ ولدها لأنو قعد يبكي و لميس تلفونها رن شالتو و مشت ، فـ بس بقينا أنا و وسام ، حسيتها من قبيل جايه و عايزا تقول حاجه بس ما لقت فرصه ، قلت ليها خير في شنو يا وسام ؟؟
اتنهدت و قالت لي متضايقه من فترهـ ، قلت ليها ليه مالك ؟؟ قالت لي عملت حاجه و ضميري مأنبني عليها ، حسيت إني عايزا أتكلم فـ ما خطر على بالي زول غيرك ، عارفاك مستغربه بسبب اننا ما قريبين من بعض ولا صحبات حتى بس ما عارفه أول ما حسيت إني عايزا أتكلم ، رجليني ساقتني ليك ، قلت ليها ولا يهمك قولي عادي ، كلي أذن صاغيه ، قالت لي : لمن موضوع خالي عصام اتفضح لأهلي كلهم و أمي زعلت منو شديد بقى تنكت في عمايلو القديمه ، سمعتها بتتكلم مع خالتي علياء ، كانوا بحكوا عن عمايلو القديمه و أمي بتنبذ فيهو ، طبعاً بسبب قصة إنو كان بتحرش بي ، المهم من الحاجات القالتها أمي مياده و الحصل ليها ، حتى قصة إغتصاب بت أخوها ، من أمي و خالتي عرفت إنو عصام هو الإغتصب البت و كذب في ميادهـ و اتهمها اتهامات باطلة و طبعاً أمي و خالتي اتستروا عليهو ، أنا انصدمت لمن عرفت الحقيقه بس ما قدرت أواجهم ولا عرفت أعمل شنو و أساساً بالنسبه لي كان فات الأوان ، يعني بعد مرور أكتر من 6 سنوات الفايده شنو اقول الحقيقه و أصلاً أقولها لـ منو و الحـ يتغير شنو !! ما جبت سيرة الموضوع دا لزول بس ما قدرت أسامح أمي و خالتي ، لمن ميادهـ ظهرت بعد السنوات ديك كلها أنا لحد اللحظه الجو فيها أهلها و عملوا جوطه مع أهلي ما كنت مخططه أتكلم و أزيد الوضع سوء ، يوم بس اتناقشت مع أمي في موضوع و زعله سااااي مني خلتني أفتش رقم حاجه بتول في دفتر الأرقام ، شلتو و رسلت ليها و حكيت ليها الحصل كلووو على أساس إنو الرساله جاياها من مجهول ، لحد اللحظه دي ماف زول عارف إنو أنا الكشفت الحقيقه لأهل مياده ، لمن جوا و ضربوا أمي و خالتي أنا يادوب حسيت بالذنب و قلبي وجعني ، هسي كل ما أعاين لأمي ضميري بأنبني لأنو فوق الضرب الإتعرضت ليهو من أهل مياده ، خيلاني ضربوها 💔
مـرات كتيرهـ بفكر أمشي أكلم أمي و أعترف ليها بالعملتو ، قلت ليها لا لا يا وسام ، الحصل حصل و كل واحد أخد ولو جزو قليل من عقابو ، إعـترافك ما حـ يغير شي ، بما إنو السيره دي إتقفلت ما تفتحيها تـاني ، قالت لي قلبي واجعني يا مها ، قلت ليها خففي وجعو دا عن طريق بِرك لـ والدتك ، خلي إعتذارك و أسفك على الحصل ليها عن طريق الأفعال ، ما إلا تجي و توريها انتِ عملتي شنو ، إعتبري أمك و خالتك نالوا جزات تسترهم و سكاتهم و مشاركتهم لـ عصام في جريمتو ، قالت لي طيب ، كلامك ريحني شديد .... المهم اتكلمنا مسااافه في الموضوع و قدرت أخليها تشيل فكرة إنها تحكي ليهم ، الموضوع اتقفل و ماف داعي تفتحو تاني ، الحصل دا الصح و أنا مبسوطه إنو أهل ميادهـ و كل الناس عرفوا الحقيقه...
المهم في اليوم الرابع طوالي مشيت الشركـه ، ختيت كل شي على جنب و ركزت على شغلي ، طول اليوم كنت بتجنب أشوف قصي ، لو سمعت صوتو ساي بغير اتجاهي طوالي ، يعني اليوم كلو لا شافني لا شفتو و إستمر الحال كدا أسبوع كامل ، في نفس الشركه بس ما بنشوف بعض و لو لمحني ساي طوالي بتهرب منو ، طبعاً رسل لي و قال طالبني في مكتبو بس نهاااي ما مشيت ليهو....
______________________
