قال لي كنتِ في المصحه العقليه صح ؟؟
قلت ليهو طيف كيفها كويسه ؟؟
قال لي طيف كويسه و حالياً ما عندها علم إنك هنا ، ماف زول غيري و غيرك عارف بوجودك هنا ، المهم جاوبي على سؤالي !
سكت ما رديت عليهو...
أخد نفس و قال لي ما عيب لو قلتي لي انك كنتِ في مصحه عقليه ، كنت عايزا أتكلم معاك و أعرف تفاصيل الحصل ليك ... يمكن انتِ حالياً في مرحلة لا ثقه في أحد بس صدقيني ما حتقدري براك ، و غير كدا حتخافي مني ليه يعني ؟؟ حـ أعمل ليك شنو مثلاً ؟؟
طقطقت أصابعي و قلت ليهو فكرت انك ممكن ترجعني المصحه العقليه ، قال لي يعني انتِ كنتِ هناك و هربتي ! هزيت ليهو راسي بس ، قال لي اتطمني ما حـ أرجعك لأي مصحه عقليه ، بتقدري تقعدي هنا لأطول مدهـ و زي ما عايزا ، قلت ليهو ما عايزا زول يعرف ، قال لي حتى طيف صحبتك ما حتعرف ، بعدها سكتنا الإتنين ، بعد مسافه قال لي ما تعتبريهو عدم ذوق مني بس انا قريت الدفتر حقك ، طلعو من جيبو و ختاهو لي في التربيزه ، قال لي من دون قصد مني اتطفلت و قريت مذكرتك ، استغربت و قلت ليهو جبت الدفتر من وين !؟
قال لي لمن كنت داخل المصحه و انتِ كنتِ طالعه بإستعجال ، ضربتي فيني من دون قصد و الدفتر وقع منك ، لحد اللحظات ديك ما كنت عارف إنو دي إنتِ لأنك ما إتمعنت في ملامحك بس شبهتك ، لمن جيت طالع من المصحه لسه الناس كانت جايطه و بقولوا إنو في مريضه هربت ، الدفتر كان واقع في مكانو ، شلتو معاي و طلعت ، ركبت عربيتي و إتحركت و بالصدفه شفتك بالشارع الورا المصحه جاريه و الحرس وراك ، عرفت انك المريضه نفسها بس وشك ما كان ظاهر لي كويس ، لمن قربت اضربك بالعربيه ، شبهتك و بقت أحاول اعرف إنتِ منو لأني كنت متأكد إني شفتك قبل كدا ، لمن الطرحه وقعت عن وشك ياداب عرفتك عشان كدا جيتك راجع تاني و ركبتك معاي ، كنت مستغرب و أفكاري جايطه عشان كدا ما سألتك عن شي من البدايه ، لمن خليتك و مشيت بطلب منك أول ما رجعت البيت قريت الدفتر تبعك ، حسب الكاتباهو عرفت إنك ما حترجعي لأهلك لأنك محملاهم مسؤولية الحصل ليك ، حسيت وقتها إني ما كان لازم أمشي و أخليك بس أنا كنت مفتكرك حترجعي بيتكم لأنو ما عندي خلفيه عن الحاصل في حياتك ، المهم رجعت لنفس المكان الخليتك فيهو و بقيت لافي و بسأل عنك في المنطقه نفسها ، حسيت انك ما حتمشي بعيد بما إنو حالياً ما ليك زول تلجئ ليهو ، لفيت كدا لحد ما لقيتك ، أصلاً أول مكان خطر على بالي و حسيت إني ممكن ألقاك فيهو هو المسجد ، لافيت المساجد الفي المنطقه كلها و في ناس أكدوا لي إنهم شافوك في واحد من المساجد ، المهم في النهايه وصلت ليك ...
كنت ساكته و أنا بسمعو ، هو ذاتو سكت مسافه بعدها قال لي الحياة غريبه شديد ، بس كلو حيكون تمام ، المهم أنا حـ أمشي بعد دا .... وقف على حيلو و طلع تلفون من جيبو ، قال لي مشي بيهو حالك ، لو احتجتي حاجه اتصلي علي طوالي ، مسجل ليك رقمي ، المهم خت التلفون و طلع ....
بعدها عشت حكاية 3 أسابيع منعزله في عالمي الخاص ، قاعدهـ في البيت لا بطلع بشوف زول لا في زول بجي يشوفني ، قصي ما كان بجي كتير ، بطِل علي من أسبوع لأسبوع ، يوم سمعت صوت الباب ، لبست التوب بس ما فتحتو طوالي إلا لمن عاينت بالقده ، شفت نسوان إتنين ، ما كنت حابـه أفتح بس تاني دقوا الباب و غير كدا الإتنين ديل قبل كدا جوا دقوا الباب بس ما فتحت ليهم ، قلت أشوفهم عايزين شنو ، لمن فتحت الباب قالوا لي السلام عليكم كيفك و مدو يدينهم سلموا علي ، سلمت عليهم و دخلتهم جوه و مشيت جبت ليهم مويه ، وحده منهم قالت لي رحلتوا جداد مش ، قلت ليها ايوه ، التانيه قالت لي أعفي لينا ما جينا عليكم ، قلت ليها ماف مشكله ، قالت لي لكن قبل كدا جينا و دقينا الباب بس شكلكم ما سمعتو ، قلت ليها إلا كدا ، قالت لي انا اسمي زحل و دي رحاب أنا بيتي فاتح عليكم و رحاب دي جارتك بالحيطه طوالي ، البيت اليمينك دا ، قلت ليها اها كويس والله ، أنا مها ، قالت لي إتشرفنا ، رحاب قالت لي راجلك قاعد ؟؟
طبعاً بلعت ريقي ، بتردد قلت ليها لا لا طلع ، زحل قالت لي عرستو قريب صح !؟ قلت ليها ايوه ، قالت هييي طيب مالك قاعدهـ غبشه كدا و انتِ عروس جديده !؟ الرجال ديل ما عليهم ضمان ، بكرا عينو تزوغ و يعرس تاني ، عشان كدا اتجيهي ليهو عشان ما يمشي يفتش برا ، رحاب ضحكت و قالت لي زحل دي استشارية العلاقات الزوجيه في حينا 😂
زحل قالت ليها اضحكي كويس بكرا حتجي تستشيريني والله ما أفتح ليك خشمي إلا بالقروش ، أنا نسوان الحي ديل مثبتاهم في بيوتهم لو ما نصايحي كان زمانهم مطلقات ، إتلفتت علي و قالت لي اسمعي كلامي يا مها ، خليك متجيه طوالي و رتبي بيتك و بخريهو ، خاصة انو راجلك شخصيه و حلاتو و لو ما عاين للنسوان براهن بعاينن ليهو ، أنا شفتو قبل كدا كان طالع ، سلمت عليهو و قال لي انكم عرسان جداد ، طبعاً لمن قالت كدا نططت ليها عيوني ، رحاب قالت ليها أنا شايفه إنها تعمل حسابها منك انتِ دي اول شي ، قالت ليها لو اضطر الأمر خليها تعملو ساي 😂🤣
المهم ونسوني كويس و قبل ما يطلعوا قالوا لي بعد دا تعالي مارقـه علينا ، قلت ليهم ان شاء الله ، بعد طلعوا قفلت الباب و جيت راجعه مكاني ، قلت قصي كيف يتصرف من عندو و يقول ليهم اننا متزوجين !؟
لمن جا تاني يوم قلت ليهو انت قلت للناس ديل اننا متزوجين ؟؟ قال لي عايزاني أقول ليهم شنو يعني !؟ صدقيني هم ما حـ يقبلوا أي عذر أو تبرير أول ما يعرفوا اننا ما متزوجين طوالي حيفكروا فينا شمال ، أنا ما بفرق معاي كتير لكن انتِ بت و حاجه زي دي حـ تفرق معاك و تأثر على سمعتك ، فكوني قلت ليهم اننا متزوجين دا أحسن خيار ، قلت ليهو مع الأيام حـ يعرفو ، قال لي إلا لو تكلميهم انتِ....
بقيت واقفه و بفكر ، قال لي عايني الموضوع ما مستاهل ، أنا ما معرسك جد جد عشان تشيلي هم قدر دا ، ما رديت عليهو ، قال لي أقعدي عايزا أتكلم معاك ، لمن قعدت قال لي أهلك حالياً بفتشو عليك .... قال كدا و عاين لي عشان يشوف ردة فعلي ، كنت مربعه يديني و بعاين ليهو ، قلت ليهو و بعد داك ؟ قال لي دكتور عصام .. نسيبك ، باذل أقصى جهد عشان يصل ليك..... طبعاً أنا استغربت هو بعرف عصام من وين و من وين عرف إنو نسيبي ؟!
ايوه هو قرا دفتري بس انا في الدفتر في حاجات كتيره ما موضحاها ، ذاكره مواقف لكن ما ذاكره اسامي اصحاب المواقف دي !، كاتبه قصة التحرش و باقي التفاصيل و شكل حياتي في بيتنا و الجامعه و الناس الفيها و قصتي مع دكتور خالد و حياتي مع تامر لحد لحظة دخولي المصحه العقليه ، آخر حاجه كنت كاتباها إنو أهلي هم السبب و إني ما حأسامهم و كاتبه عن شعوري بعد ما أخدت أول صدمه كهربائيه و عن شكل الحياة هناك و عن تصرفات المجانين المعاي .... يعني ما ذاكره إسم عصام ولا ذاكره إسم طيف رغم إني كاتبه مواقفها بس بدون ذكر أسماء ماف غير اسم تامر الإنكتب أكتر من مية مرهـ في دفتري ، يمكن اسم دكتور خالد دا ذكرتو مرهـ أو مرتين فقط ، باقي الناس المروا في حياتي ما ذاكرهـ أساميهم ، قصي دا ذاتو اسمو ما مذكور رغم إني كاتبه المواقف الحصلت بيناتنا ، قلت ليهو انت بتعرفو من وين ؟؟.... اتذكرت إني اصطدمت بـ قصي لمن جا هناك و أنا نسيت و ما سألتو بعمل شنو في المصحه العقليه ! قلت ليهو و جابك شنو للمصحه العقليه ! أنا نسيت و ما سألتك !؟
قال لي بتعرفي دكتورهـ رانيا صح !؟
هزيت ليهو راسي و أنا مستغربه ! قال لي دي خالتي و اليوم داك أنا جيت عشان أديها ملف هي نستو في البيت ، و الأخبار دي عرفتها منها هي ، كنت عايزا أتكلم سبقني و قال لي أنا ما كلمتها ولا قلت ليها البت البتفتشو عليها أنا بعرفها ، و عارف مكانها ، ما جبت سيرهـ لأي زول ..... بقيت ساكته و بحاول استوعب إنو دكتورهـ رانيا طلعت خالتو في النهايه ، قال لي حتى لو خالتي عرفت صدقيني ما حتعمل حاجه تضرك و ماف زول حـ يوديك مكان انتِ ما عايزاهو ، قلت ليهو برضو ما عايزا زول يعرف ، قال لي تمام ، طيب الخطوهـ الجايه شنو ؟؟.....
قلت ليهو ما عارفـه ، حـ أقعد هنا لحد ما أموت و ارتاح ، قال لي طيب لو ما مُتي !؟ عاينت ليهو بغيظ و سكت ضحك و قال لي البشوفك هسي ما بقول دي نفسها البت الإتشاكلت معاها قبل 3 سنوات ، لسه متذكر كيف كنتِ لئيمه و شرسه ، مظهرك كان بيوحي بالقوه و الصلابه بس هسي حاسي إنك بقيتي باهته و هشه شديد !!
قلت ليهو ما بقيت هشه أنا بقيت حُطام ، أو رماد متناثر ، عايزا متين يجي يومي عشان أموت و أرتاح ، الإنتحار لو كان حاجه سهله كنت عملتو مع إني قبل كدا حاولت انتحر في المصح بس الحياه متمسكه فيني أكتر من تمسكي بيها ... لمن قلت كدا عاين لـي بشفقه كدا و قال لي شفتي العذاب الجبرتيهو في الحياة دي لو انتحرتي حـ تجربيهو أضعاف مضاعفه ، قلت ليهو ما فرقت اتعودت على العذاب ، قال لي دامك اتعودتي فـ ليه عايزا تنهي حياتك في الوقت البتقدري فيهو تبدي من جديد ، قلت ليهو أبدا شنو !؟
لا المشاعر بتتجدد لا الذكريات بتتنسي لا الأوجاع المنحوته جوه القلب حـ تختفي ، أنا ما عندي طـاقه تاني عشان استنزفها و أصلاً استنزفها على شنو و لـ شنو !؟ أنا قنعانه من الحياة دي ....
قال لي لو بالجد قنعانه من الحياة ما كان حـ تهربي من المصحه العقليه ، قلت ليهو هربت لأني ما عايز الظروف و الأشخاص يفرضو علي واقع مميت تاني ، ما هربت حباً في الحياة أو رغبة في الحريه ، هربت عشان ما أخلي زول يتحكم فيني و يستغفلني و يستقلني لمصلحتو .. . المهم البيت دا حق منو !؟ وين سيدو ؟؟
قال لي حقي أنا ، كنت مأجرو قبل سنه و الناس رحلوا منو ، قلت ليهو رحلوا و خلوا عفشهم !؟ قال لي لا العفش دا حقي أنا ، قلت ليهو كنت ساكن هنا !؟ قال لي ممكن تقولي كدا ، لمن أكون متخاصم مع ناس البيت بجي أفتحو و أقعد فيهو ، قلت ليهو أنا هسي قاطعه رزقك لأني قاعده فيهو و ماف زول حـ يأجرو ، قال لي لا هو أصلاً فاضي و ما جا زول عشان يسكن فيهو ، كدا انتِ حارساهو لي ، قلت ليهو طيب لو جا زول !؟ قال لي لمن يسأل حـ يعرف إنو البيت ما للإيجار ، قلت ليهو دا قطع رزق ولا ما قطع رزق !؟ .... فجأه تلفونو رن ، وقف على حيلو و قال لي حأمشي بعد دا ، طلع قروش و ختاها لي في التربيزه و رد على المكالمه ، كنت عايزا أتكلم بس هو رفع لي يدو و أشر لي عشان أسكت ، كان بقول في المكالمه انو حـ يجي بعد شويه ،قال ليها ما حـ أتأخر والله ، قلت أكيد دي مرتو ، أنا نسيت إنو متزوج ، لوح لي يدو و طلع مني و هو لسه بتكلم بالتلفون ، مشيت تربست الباب و جيت دخلت الغرفه و قفلت الباب علي ، فتحت الشباك و وقفت جنبو و تكلت راسي و بقيت أعاين في الحوش و الشجيرات الصغيره و الفراش اللافي حولينها ، زي الساعه 8 م كدا ، شلت التلفون و بقيت أشوف فيهو ، كان فيهو فيس و واتس و كل تطبيقات السوشيال ميديا ، عملت فحص للرصيد لقيت فيهو كمية من الرصيد !!
صراحة حسيت إني بقيت مسؤوليه على عاتق قصي ! يعني هو ماف شي جابرو علي عشان يسكن في بيتو الكان ممكن يأجرو و يستفيد منو ، حتى الملابس الفي الدولاب شكلهم جداد ، و القروش الخاتيهم لي ، كمان التلفون الجابو لي دا ، ايوه هو ما جديد بس برضو كلفتو ، يعني تاني حـ يضطر يكلف نفسو معاي و أنا ما بحب أتعب زول معاي و أكون ليهو هم على قلبو ، أهلي المن لحمي و دمي ما كانوا شغالين بي ليه هو يهتم و يشتغل بي !.... اتصلت عليهو و رد علي في المرهـ تانيه ، قال لي آلو .... قلت ليهو بكرا ما تنسى تجي تشيل القروش الخليتها قبيل ، قال لي كويس ، قلت ليهو أنا جادهـ ، قال لي تمام .... قلت ليهو ما عايزا أكلف زول معاي ، انت ما مجبور علي ، يعني فوق ما أنا قاعدهـ ليك في بيتك الكان ممكن تأجرو و تستفيد منو كمان بتديني قروش !؟
قال لي يعني انتِ متحسسه من الحاجه دي !؟ قلت ليهو أكيد ، قال لي خلاص اتحركي !!.. اشتغلي عشان تدفعي لي حق الإيجار .... سكته و ما عرفت أقول ليهو شنو ...
قال لي فهمتي !؟
أكيد قلتي في نفسك من وين حـ اجيب ليهو القروش ، لو كان قلتي الكلام دا لنفسك قبل ما تتصلي علي كنتِ عرفتي إنو دا نفس السبب الخلاني أخلي معاك شوية قروش ، يعني لو كان عندك أساساً ما كنتِ حتجي معاي ولا كنتِ حتلفي في الشوارع صح ولا لا ؟؟... على فكرهـ دي ما شفقه مني عشان ما تتحسسي ساي و دا ما معناهو إني فقيرهـ أو شحادهـ مع إنو الفقر ما عيب بس انتِ حالياً مارهـ بظروف ممكن نقول عليها صعبه ، محتاجه زول يسندك و يقيف معاك لحد ما تقدري تقيفي على رجلينك و ما تحتاجي زول تاني ، بس المشكله كيف انك تتحركي و تتخلصي من الحياة السوداويه المعيشه نفسك فيها دي !!
بالنسبه لي الزول البحاول ينهض حتى لو فشل في النهوض أفضل من الزول البربع يدينو و بقول ما بقدر أقوم ، دا ما عندي ليهو أي مبرر غير إنو انسان كسلان و حاسد نفسو ....
بقى يتكلم معاي كتير و أنا من دون ما أحس لقيت نفسي بسمع ليهو بكل حواسي و مركزهـ شديد مع كلامو ، بعد خلص قال لي الأمر بيدك بعد دا ، لو عايز تنهضي بنفسك و تقيفي على حيلك قولي لي ، أما لو عايز تقعدي كدا بين 4 حيطان و تخلي الناس تشفق عليك برضو قولي لي ☺️
طبعاً كلامو وجعني ، قبل ما أقول حاجه جاني صوت بت بتقول ليهو قصي بتتكلم مع منو انت من قبيل ، تعال ياخ عايزاك تساعدني في حاجه ، قال ليها ثواني هسي بجيك..... قال لي لحد بكرا قولي لي قرارك شنو .... على كدا قفلنا من بعض ، طبعاً واضح إنو الإتكلمت ديك مرتو ....
الليل كلو قضيتو تفكير في كلام قصي ، تاني يوم هو ما جاني ، عدت 3 أيام ما جا فيها ، لا أنا اتصلت عليهو لا هو إتصل علي ، قلت كويس إنو ما جا ، ما عايزا اعمل ليهو موضوع تاني و ابقى ليهو مسؤوليه لازم كل مرهـ يجي يشوف الناقصها شنو....
في اليوم الرابع صحيت على صوت ضرب شديد على الباب ، قمت من السرير مخلوعه و ماف زول خطر على بالي غير عصام .... الباب لسه كان بنضرب بشدهـ و أنا ما قادرهـ أمشي أفتحو .... بقيت أفتش على التلفون عشان اتصل على قصي بس ما لقيتو ، نسيت نفسي ختيتو وين ، بقيت أقلب في الغرفه زي المجنونه بس ما لقيتو و هناك الباب لسه كان بضرب ... قلبي كان شغال دق دق ، عصام لو ساقني معاهو المرهـ دي راحت علي 💔
"كنت أخشى أن يؤلمك شي بسببي و أنا لاأعلم ، كنت أخشى أن تبكي ولا أكون المجفف لدموعك ، و كنت لا أستطيع النوم و أنتِ لم تنامِ ، أحاول حمل همك عنك و أعلم أنه لا يمكنني ذلك و لكن كنت أبذل كل جهدي في ذلك ، حقاً كنت أخاف عليك من كل هذا الحزن ...
يتبع.....
