المهم تاني يوم جهزت نفسي و مشيت الشركه ، أول ما جيت داخـله المكتب لقيتهم كلهم عاملين قروبات و بتكلمو !! طيف رفعت لي يدها و نادتني ! لقيتها برضو قاعدهـ ليها مع قروب ، كانو 4 و طيف الخامسه ، ولدين و بتين ، مشيت عليهم و أنا مستغربه ، طيف قالت لي أولاً صباح النور ، تاني شي مالك مستغربه كدا ؟؟ قلت ليها في شنو ما فاهمه ؟؟
قالت لي صح إنو نحنا ما حضرنا الإجتماع بس أنا وريتك مخرجاتو كانت شنو و كلمتك إنو تم تقسيمنا لـ قروبات ، قلت ليها صحيح ، نسيت بس ، طيب المطلوب شنو ؟؟
قالت لي مفروض نصمم تطبيق لـ بنك من أكبر البنوك في السودان ، كل قروب حـ يصمم تطبيق في أسبوع ، بعدها حـ ندرسهم كويس و نشرح فكرتهم في وجود كل الإداريين و وفد من البنك المفروض يختار تطبيق واحد فقط و يعمل مفاضله بينهم و بين تطبيق تاني من شركه منافسه ، بعدها يختار الطبيق البناسبو و يشتريهو ، طبعاً القروب الحـ يتم إختيار تصميمو حـ يتكافئ بمبلغ مالي كبير ...
قلت ليها Super ، يعني انتوا حالياً بديتوا ولا لسه ؟؟ قالت لي لسه و لو بدينا ما حـ نطرح أفكارنا قدام باقي القروبات ، المهم خليني أعرفك على أفراد قروبنا ، دا شادي ، سمير ، داليا ، ندى ، و يا شباب دي مها ، قلت ليهم اهلين اتشرفنا ، قالوا لي عظيم الشرف ، قلت ليهم طيب مفروض نبدا من متين ؟؟
شادي قال لي ممكن من اللحظه دي ، ندى قالت لينا ارحكم قاعة الإجتماعات ، المهم طلعنا و مشينا قاعة الإجتماعات ، سمير قال لينا طيب يا شباب بداية حـ اتكلم ليكم شويه عن الأبلكيشنات البنكيه ، بقى يتكلم و يشرح لينا ، لمن خلص داليا قالت ليهو حلوو ، التطبيقات البنكيه يمكن صعبه نوعاً ما بس منتشرهـ بكثرهـ يعني لو اتشفينا ساي حـ ننجز 😂
قلت ليهم طيب مفروض نحنا نجيب التطبيقات البنكيه دي و نحللها كويس بس ما بهدف إنو نتشف بالعكس بهدف إنو نصمم أفضل منها ، حـ نطلع عيوبها و نعملها محاسن في التطبيق تبعنا ، شادي قال لي بالظبط كدا ، فتح اللابتوب و وصلو في البروجكتر ، قال لينا حـ أعرض عليكم أشهر التطبيقات البنكيه في السودان ، و حـ ندرسهم سوا و نشوف مميزاتهم و الحاجات الما موجودهـ عندهم بحيث إنو نضيفها في تطبيقنا ..... فعلاً بدينا دراسة و تحليل التطبيقات البنكيه ، لمن خلصنا ندى قالت لينا التطبيقات بتتشابه لحد الآن ما عارفه شنو الميزات الممكن نضيفها في تطبيقنا ! حيكون تطبيق عادي زيو زي غيرو !!
قلت ليها لا ، على الإطلاق ماف تطبيق خالي من عيوب ، تطبيقاتنا البنكيه دي مليانه عيوب و حالياً أنا قدرت أحصر عدة عيوب ، شادي قال لي و أنا كمان ، زي انو معظم التطبيقات البنكيه بتتعارض مع بعض الهواتف ، زي جلاكسي و ايفون ، قلت ليهو و سامسونج كمان ، تاني حاجه بحصل تعليق في لوقو التطبيق و مرات اثناء المعاملات داخل الأبلكيشن و مرات التطبيقات دي بتتعطل لـ عدة أيام ، و فيها البجبرك انك تعمل تسجيل دخول في كل مرهـ بتطلع فيها من التطبيق و دي حاجه مزعجه لي كـ مستخدم ، بالإضافة لإنو معظمها بيعتمد على الأمان الذاتي زي النمط أو كلمة سر ، شادي قال لي بالظبط كدا لو اتعمل التطبيق بـ بصمه مثلاً أو بصورة الوش حيكون افضل ، قلت ليهو فعلاً ، المهم دي النقاط القدرت أحصرها ، لو عندكم زيادهـ ممكن تقولوها ، قالوا لي قلتيهم كلهم ، ملاحظاتك كويسه شديد .....
بعدها جبنا ورقه و قلم و كتبنا العيوب دي بخط عريض و عكسناهم عشان نطلع المميزات ، طيف قالت لينا كدا اتوصلنا للمميزات الحـ نصممها في الأبلكيشن تبعنا ، نمشي للخطوه البعدها يلي هي حـ نستخدم أي لغة برمجه ؟؟
سمير قال لينا :
Python
Bascal
Java
C++
JavaScript
كلـهم دي من أفضل لغات البرمجه ، ندى قالت لي أنا شايفه بايثون كويسه ، شادي قال لينا برضو سي ++ ما بطاله ، طيف قالت ليهم خلاص بقيتوا على شنو ؟؟ سمير قال ليها انتِ و مها ما قلتوا آراءكم قالت ليهو ما فارقه المهم كلنا نتفق على نفس اللغه ، ندى قالت نختار بايثون صح ؟؟ قلت ليها لو علي نختار جافا لأنها لغه سهله بس لو متفقين على بايثون مـاف مشكله ، سمير قال لي أنا كمان شايف جافا مناسبه .... المهم في الآخر اخترنا لغة جافا....
المهم بعد خلصنا إجتماع كلهم طلعوا بس انا كنت قاعده منتظره طيف و هي بتتكلم بالتلفون ، أشرت لي عشان أنتظرها ، مشت وقفة في واجهة الغرفة الزجاجيه و بقت تعاين برا و هي بتتكلم بالتلفون و تتخجل ، طبعاً عرفتها بتتكلم مع منذر خطيبها ، بعد خلصت قالت لي دا منذر ، قلت ليها ايوه واضح من خدودك البقت ورديه ، ضحكت و قالت لي إحسـاس حلو والله ، المهم خلينا نمشي .... أول ما طلعنا من كدا لقينا قصي في وشنا ، طبعاً من الصباح ما شفتو ، قال لينا كان في شنو هنا !؟ طيف قالت ليهو قروبنا كان عامل إجتـماع هنا ، درسنا و حللنا الـ.... قاطعتها و قلت ليها طييييف ! دي أسرار قروبنا ما مفروض تطلعيها !... قصي ضحك و قال لي أسرار دولـه هـي ؟؟
قلت ليهو C'est juste _ سي جيست ، قال لي اها يا بتاعة الفرنسي ! طيف قالت ليهو على فكرهـ يا قصي مها شاطرهـ في الفرنسيه بالإضافـه للإنجليزيه و الإسبانيه و جزو من الإسبانية ، قال ليها ايوه عارف !... لمن الإتنين عاينا ليهو قال لينا قصدي إنو واضح عليك انك متعددة اللغات ، فجأهـ كدا تلفونو طيف رن ، استأذنـت و مشت من جنبنا ، قصي دخل يدو جوه جيبو و طلع دفتر و قال لي هاك ، دا دفترك ، شلتو منو و قلت ليهو شكراً ، قال لي العفو ، بعدها بقينا ساكتين ، لا هو مشى لا أنا مشيت ، عن نفسي كنت منتظرهـ طيف بس ما عـارفه هو شنو الكان موقفو لسه !... لمن شفت طيف مطولـه في مكالمتها قلت ليهو أنا حـ أمشي على شغلي ، قال لي تمام ، المهم رجعت المكتب و باشرت شغلي ، بعد مسافه طيف جات راجعه و قعدت تحكي لي عن منذر ، قلت ليها تقريباً هو بتصل عليك كل 5 دقايق صح ؟؟ ضحكت و قالت لي لا بس قبل ما كمل كلامو معاي لأنو في زول قاطعنا فـ قال لي برجع ليك و قفل و هسي رجع لي .... المهم لمن خلصنا ، طيف قالت لي خلينا ننتظر قصي عشان نوصلك معانا الموقف ، قلت ليها لا لا أنا طالـعه عندي مشوار ، ضيقت لي عيونها و قالت لي على وين !؟ قلت ليها بليدهـ انتِ ؟ أكيد ما الفي بالك و ذاتو ما تفكري فيني كدا ! متوقعه إني احب و ادخل في علاقه كمان ! قالت لي حاجه مستحيله ؟؟ قلت ليها ايوه و أساساً أنا ما عايزا لا حب لا زواج لا غيرهم .... طبعاً قلت الكلام دا و أنا منفعله شديد ، طيف استغربت فيني ، فجأه جا قصي طالع ، أصلاً كنا قاعدين في الإنتظار ، قال لينا خير في شنو و عاين لينا الإتنين بإستغراب ، طيف قالت ليهو بزعل ماف شي ، لمن عاين لي ما اتكلمت ، إتحركت من مكاني طوالي و طلعت برا الشركـه ، قصي كان لاحقني و بنادي علي بس ما رديت عليهو ، استعجل و جا وقف قدامي و قال لي مالك انتِ ممكن أفهم ؟؟
قلت ليهو مالي ؟؟
قال لي أنا بسألك ما تجاوبي علي بسؤال !! قلت ليهو ماف شي ، قال لي متضايقه ساي يعني ؟؟
سكت ما رديت عليهو ما لأني ما عايزا أرد ، لأني ما عـارفه أصلاً أنا مالي ! ايوه موتة تامر لسه واجعاني بس برضو دا ما مبرر لـ غضبي و الحاله الأنـا فيها دي !!
قال لي تـمام نحنا طالعين بعد دا ، ياها طيف ذاتا جات ، طيف جات و هي ساكته بس كانت بتعاين لـي ساي ، قلت ليهو أنا عندي مشوار ، قال لي نوصلك معانا !! قلت ليهو لا شكراً ، طريقي غير طريقك .... تاني ما قال لي حاجه ، إتحركت من جنبهم و مشيت ، طبعاً ما قلت ليهم إنو حأقابل خالتهم رانيا ، يعني أنا اتوقعت إنو طيف تكون عارفه بس بما إنو خالتها ما كلمتها انها حـ تقابلني معناها ما عايزاها تعرف أو شايفه إنو ما ضروري تكلمها ، المهم إتصلت على دكتورهـ رانيا و كلمتها إني في الطريق ، قالت لي تمام أنا كمان هسي بتحرك ، المهم مشيت و قابلتها في المكان الإتفقنا عليهو ، بعد سلمنا على بعض و قعدنا ، قالت لي كيفك ان شاء الله كويـسه ، قلت ليها كويسه الحمدلله ، عاينت لي جوهـ عيوني و قالت لي متأكدهـ ؟؟.... استغربت من كلامها ، قلت ليها بالجد كويسه !!!
قالت لي ها كيف كان يومك في الشغل ؟؟ قلت ليها تمام و انتِ ؟ قالت لي برضو تمام ..... المهم بقت تتكلم معاي و اسئلتها كترت و رغم إني ما بحب الأسئله الكتيره بس كنت بجاوب على كل اسئلتها عادي !!
كانت بتسألني عن حياتي زمان من طفولتي لـ مراهقتي لـ زواجي و ما بعد الزواج و دخولي للمصحـه ، لمن جبنا سيرة المصحه ، قلت ليها كانت مرتبه و مهيأه للمرضى بس ممرضاتهم فقر ، قالت لي فعلاً بس ما كلهم ، قلت ليها هسي في ناس بتتعالج و بترجع طبيعيه ؟؟ قالت لي أكيد ، قلت ليها ما عارفه بس ما قادرهـ أصدق إنو في زول بدخل المصحه مجنون و بطلع كويس ، بحس إنو أي زول دخل هناك خلاص مصيرو يموت هناك ، بحسها سجن مؤبد ، قالت لي لا لا والله ، في ناس كتيرهـ اتعافت و رجعت كويسه و قدرت تطلع من المصحه ، قلت ليها بعد ما دخلتها اقتنعت إنو السودانين معظمهم مجانين !! يعني 4 طوابق و كلها مجانين رغم انها مستشفى خاصه و قروشها كتيره ، يعني إذا في الخاص في الكم الهائل دا من المجانين طيب في المستشفيات المجانيه أو الغير خاصه حيكونوا قدر شنو !!؟ قالت لي ربنا يصلح الحال ، قلت ليها المصحه كلها إزعاج و كواريك إلا الطابق التالت ، بحس ناسو ما مجانين ، مش لاحظتي إنهم هاديين ؟؟ قالت لاحظت هدوئهم بس ما عندي خلفيه عنهم ، الطابق التالت دا بمشوا ليهو دكاتره
معينين ، قلت ليها يعني انتِ ما قاعده تمشي هناك ؟؟ قالت لي ماف سبب يخليني أمشي هناك ، المرضى تبعي كلهم في الطوابق التحت ، قلت ليها شي غريب ، قالت لي فعلاً بس ما عارفه السر شنو !!!....
سكتت مسافه بعدها قالت لي زي ما عارفـه أنا قريت دفترك من لمن كنتِ في المصحه و عارفـه المريتي بيهو ، بس سؤالي هل انتِ اتجاوزتي الحصل معاك ؟؟ تحديداً قصة التحرش من حمى خالتك !!
لمن قالت لي قعد رفعت راسي و عاينت ليها ، ما عارفه إذا طيف حكت ليها إنو الكان بتحرش بي دا دكتور عصام ولا لا ، بس لو كانت عارفه عديل كانت سألتني ، ما اظن طيف حكت ليها عن الفضفضه القلتها ليها ، قلت ليها ايوه اتجاوزت ، قالت لي حالياً أهلك بتعاملوا معاك كيف ؟ قلت ليها هم بحاولوا يصلحوا الإنكسر بس في حواجز بيناتنا و أنا بتعامل معاهم بـ رسميه ، قالت لي أنا مستغربه شديد ! أهلك على أي أساس قرروا يجيبوك المصحه ! يعني المصحه دي ما بدخل ليها أي زول !!... قلت ليها في واحد حيوان ، استغل فترة صدمتي و عدم تقبلي لـ وفاة تامر يلي هو زوجي و أقنعهم إني حـ أجن و إنو تصرفاتي بقت ما طبيعيه ، كنت بصرخ فجأه كدا و بدخل في نوبة بكى و ما كان في زول بعرف يسكتني ، قالت لي طيب دا ما سبب قوي يخليهم يجيبوك المصحه بالبساطه دي ! قلت ليها فعلاً بس زي ما قلت ليك في ثعلب أقنعهم و هم عشان بعيدين مني و ما بحسوا بي صدقوا كلامهم و ما عرفوا مصلحة بتهم وين و عمرهم ما حـ يعرفوها ، يعني انت كـ اب و انتِ كـ أم ليه تخلي الناس تتخذ قرارات نيابة عنكم و تحديد بيها مصير بتك أو ولدك ؟؟ ليه يدوا الناس أولوية التصرف في حياة أولادهم ، قالت لي و الزول الأقنعهم دا علاقتو بيك شنو و حـ يستفيد شنو من الحاجه دي ؟؟
طبعاً اسئلتها الكتيرهـ شككتني فيها ، خطر على بالي انها عايزا تلقي فيني عيب أو ثغرهـ بسببها ترجعني المصحه بـ توصيه من عصـام !! غيتو لاوزت منها ، قلت ليها ما عارفه هدفو شنو بس هو السبب في دخولي المصحه العقليه ، قالت لي أهلك ذاتهم بالغوا والله ، يعني أي زول يقول ليك ودي ولدك المصحه طوالي تسمع كلامـو !!
قلت ليها أصلاً أنا ما متوقعه منهم شي ، قالت لي السؤال البطرح نفسو ، لييه قعدتي فترهـ طويله في المصحه و انتِ كويسه ما فيك شي !! قلت ليها برضو ما عارفه ، قالت لي و برضو عصام ما عارف ؟؟
هنا سكت ، قالت لي هو الأقنع أهلك عشان يدخلوك المصحه صح ؟؟.... لمن قالت كدا عاينت ليها ، قالت لي و خليني أخمن ، هو الكان بتحرش بيك صح !؟
قلت ليها يعني عارفه ؟ طيف حكت ليك مش ؟؟
قالت لي أبداً طيف غير هنا قالت لي انتِ صحبتها و توتر علاقتك بأهلك ما قالت لي شي تاني بخصوص الموضوع دا و ما تنسي إني قريت دفترك ! أيوه ما كنتِ كاتبه اسامي بس الموضوع بقى واضح ، بعد مسافـه قلت ليها فعلاً دا عصام و بديت أحكي ليها العملو كلو ، لمن خلصت عيوني كانت مليـانه دموع بس ما بكيت ، ختت يدها على يدي و قالت لي أنا طبيبه نفسيه أعرف إذا الزول القدامي دا اتجاوز أزمه ولا لسه بعاني منها ، حالتك العقليه سليمه و حالتك النفسيه ما سيئه لدرجة إنو تدخلي مصحه بس دا ما بمنع إنك تتابعي مع طبيبه نفسيه ، لمن عاينت ليها ، فتحت شنطتها و قالت لي دا كرتي ، فيهو اسم العياده و موقعه ، قلت ليها أنا ما مجنونه !! قالت لي معقوله يا مها وحده زيك كدا بتعتقد إنو البقابل طبيب نفسي معناها مجنون ؟؟ اسألك سؤال ، في الشركه غير طيف عندك كم صحبه أو صاحب ؟؟
قلت ليها ما عندي غيرها ، قالت لي عشان ما بتحبي تختلطي بالناس صح !؟
هزيت ليها راسي ، قالت لي شوفي طول ما انتِ شغاله و شاغله نفسك و بالك حـ تحسي انك نوعاً ما بقيتي كويسه و ماف حاجه مضايقاك و مزاجك صافي و بالك رايق بس صدقيني أول ما يجي الفراغ حـ تحسي بواقعك و المراره الفيهو و بتبدي غصب عنك تفكري في حاجات كتيرهـ كنتِ هاربه منها و شاغله عقلك بغيرها عشان تتناسيها ، الشغل يعتبر مسكن فـ ليه تختاري مسكن لفترهـ مؤقته في الوقت المتاح ليك تعالجي نفسك و ترمميها ؟؟
قالت لي والله انا من أول يوم شفتك إعتبرتك زي بتي و انتِ ذاتك بتشبهيها و مكانـتك عنـدي بقـت زي مكانـة قصـي و طيف ، انتِ حاليـاً ما بس وحدهـ كانت معاي في نفس المستشفى ، انتِ صحبة أولاد أختـي البـحبهم شديد عشان كدا مصلحتك بتهمني 💜
حقيقة كل كلمه و كل حرف قالتو دكتورهـ رانيا لامس قلبي ، سألت نفسي هل أنا كويسه لدرجة إنو الناس من أول مرهـ تشوفني تحبني و تشيل همي ولا بس عشان شفقانين علي !؟؟
على كل الأحوال كلامها كان صادق سواء كان شفقه أو غيرها ، بس انا متأكدهـ إنو البطلع من القلب ، بدخل القلب ، و أنا حسيت بكل كلمه هي قالتها لي ....
بعد مسافه قلت ليها طيب و شلت الكرت حقها ، قالت لي نمشي بعد دا ، قلت ليها طيب ، ركبت معاها و وصلتني لحد الموقف ، من هناك ركبت و لمن وصلت البيت المغرب كان بأذن ، بعد ما وصلت البيت و إرتحت شويه قلت موضوع ميادهـ دا طول ، حرام البت تكون حيه و في مصـحه عقليه و أهلها يمكن ما عارفين !! بكرا لازم أمشي أمدرمان ، طبعاً طيف عملت قروب واتس و ضافتنا كلنا كـ قروب ، أمي جات و قالت لي أرح أكلي ، قلت ليها ما جعانه ، قالت لي ما جعانـه أكلتي شنو ؟؟ قلت ليها أكلت قبل ما أطلع من الشركه ... فعلاً أنا ما كنت جعـانه ، بعد شويه جات أسيل و هي شايله ولدها و هو عاد بكى عجيب ، قالت لي لا أكل لا خلاني آكل ، تمسكيهو لي لحد ما اتغدا ؟؟ قلت ليها جيبيهو طيب ، أدتني ليهو ، مشت و جات و هي شايله صينية أكل ، قالت لي أكلي و لو رضى أكليهو معاك ، قلت ليها أنا شبعانه كنتِ تجيبي لـ حمودي دا بس ، قلت لي قلت إحتمال ما عايزا تاكلي مع أهلك .... قالت كدا و طلعت ، أكلت شويه و بقيت بحاول أكل حمودي بس ما رضى و كان بصرخ شديد ، بعد شويه جا عبدالله و هو زهجان ، شالو و بقى يقول ليهو هسسس !! أسكت خلاص !!
قلت ليهو هو شافع و كلامك دا كلو ما بفهمو ليك ، أسلوبك معاهو حـ يبكيهو زيادهـ ، جات أسيل داخله و طوالي شالتو منو و قالت ليهو خليك بعيد منو مش قلت ما ولدك و ما كنت عايزو ، حمر ليها كويس و طلع ، طبعاً حمودي غلبنا الإتنين ، شويه كدا جات أمي داخله ، شالتو من أسيل و طلعت بيهو برا ، أمي رغم إني شايفه علاقتها بـ أسيل و عبدالله زيرو بس لمن ولدهم يغلبهم الإتنين بتجي تشيلو معاها و سبحان الله بسكت ليها ، في نفسي قلت لو حنيتها و طريقتها البتتعامل بيها مع حمودي أنا لو لقيتها حـ أستكين ما حمودي بس ....
عاينت لأسيل كانت لـسه واقفه ، قلت ليها مالك مع عبدالله ؟؟ قعدت و قالت لي هو البراهو لا عايزني لا عايز الولد دا ، زهجان و غضبان 24 ساعه و إلا ما بسمع حمودي ببكي طوالي بجي يتزهج فينا الإتنين .... ياخ أنا تعبت منو و تعبت من العيشه معاهو ... قالت كدا و هي بتبكي ، قلت ليها انتوا الإتنين صغار عشان كدا صعب تتقبلوا انكم بقيتوا اب و أم ، بعدين دا كلو نتيجة غلطتكم ولازم تتحملوا العواقب و ختوا في بالكم إنو الولد ما ليهو ذنب .... قالت لي عارفه إنو غلطنا و غلطتنا ما بتغتفر بس ليه اتعذب عمري كلو على حاجه حصلت في لحظه شيطانه و اتعاقبت أشد العقاب عليها ، من يوم الحصل و من يوم ظهر حمل و أهلي عرفو و كمية الضرب الإتعرضت ليهو و بعدها فترة الوحم و القهر اللقيتو الفترة ديك لحد لحظة ولادتي الكانت من اسوأ اللحظات ، حسيت فيها إنو روحي قاعدهـ تطلع و ما إتوقعت أعيش و ما أكذب كنت متمنيه إني أموت بس للأسف ما مت ، مكتوب لي اتعذب لسه 💔
صراحة ما عرفت أقول ليها شنو و ما قدرت أواسيها ، أنا فاشله في الحاجات دي ....
المهم في اليوم البعدو طوالي طلعت و مشيت أمدرمان ، تحديداً ود نوباوي ، ما كلمت أي زول ، لمن وصلت بيت أهل مياده الساعه كانت 12 ، دقيت الباب بعدها فتح لي شاف صغير ، ما عرفتو ولد منو ، قلت ليهو أمك قاعده ؟؟ قال لي آي و بدا ينادي على أمو و هو داخل لـ جوهـ ، بعدها جات طالعه مرا و هي بتلبس في توبها ، وصلتني و سلمت علي بحراره و قالت لي اتفضلي ، طبعاً شكلها ما غريب علي لأنها جاتنا قبل كدا بس ما عارفـه اسمها منو ، دخلت معاها جوه ، جابت لي مويه و قالت لي انتِ زوجة المرحوم تامر صح ؟؟
قلت ليها ايوه ، انتِ بت حاجه بتول صح ؟؟ قالت لي لا لا أنا مرة ولدها ، قلت ليها ايواااا ، قالت لي عمتي في بيت ولدها التاني ، ثواني أناديها ، المهم مشت و جاتني بعد شويه هي و حاجه بتول أم مياده ، جات سلمت علي ببشاشه و قالت لي كيفك يا بتي و كيف أهلك كلهم ان شاء الله طيبين ، قلت ليها كويسين الحمدلله ، قالت لي طولنا منكم ، قلت ليها نحنا كمان إتلومنا معاكم ، أعفوا لينا ، قالت لي الظروف جبارهـ ، ناس أمك و هناك ناس رقيه و حاجه آمنه كويسات ، قلت ليها كويسات ، طبعاً كانوا مستغربين من جيتي و كان في حيرهـ في الموضوع ، يعني لا نسابتي لا أهلي ما حصل جوهم ، اللوم أكتر شي على نسابتي بينهم و بين ناس حاجه بتول نسب ، يعني لو زعلوا من حتة إنو ماف زول قاعد يجيهم حـ يزعلوا من نسابتي ما من أهلي ، مرة ولدها مشت عملت لي عصير و جابتو ، بقوا قاعدين يتكلموا و يتونسوا معاي ، بعد شويه جوا نسوان اتنين داخلات ، حاجه بتول قالت لي ديل نسوان أولادي ، قالت ليهم دي مرة المرحوم تامر ، متذكرنها مش ، قالوا ليها اي ، سلموا علي و سألوني عن أهلي و قالوا لي أساميهم ، الإستقبلتني أول وحده إسمها اسمهان و الإتنين الجو داخلين وحدهـ سهيلا و التانيه بثينه ، سهيلا قالت لي نسابتك مالهم ما جوا معاك ؟؟ بثينه قالت ليها بتسألي سؤال انتِ عارفه جوابو ؟؟
طبعاً طوااالي استغليت الفرصه ، قلت ليها حقكم علينا والله ، يعني مهما حصل الناس مفروض ما تقيف من بعض ، في النهايه انتوا نسابة ولدهم ، أنا والله عشان ما كنت بعرفكم شديد ما حصل جيتكم بس لمن اتذكرتكم و اتذكرت جيتكم لينا و انكم ما وقفتوا مننا والله حسيت خجلت من نفسي و قلت أجي اشوفكم ، اسمهان قالت لي انتِ ما عليك لوم ، قلت ليهم الحصل حصل و ميادهـ ذاتا ما معروف مشت وين و القصه دي طولت فـ مفروض يتجاوزها أو على الأقل ما يعاقبوكم على غلط مياده و يقطعوا علاقتهم بيكم ، سهيلا قالت لي تقولي شنو بس ، كما ناس كعبين ميادهـ دي هربت من بيتهم ولا من بيوتنا هنا !؟ عمايلها هم كانوا عارفنها أكتر مننا و مع ذلك ساكتين و لمن سوتها كبيرهـ جوا رموا اللوم علينا رغم إنو البحصل عندهم هناك لا شفناهو لا سمعنا بيهو ، بثينه قالت ليها عملت عملتها و هربت و هسي بتكون عايشه حياتها بمزاج .... قالت الكلام دا بنبره حاده ... قالتو و هي بتعاين لـ حاجه بتول ، سهيلا قالت ليها عارفنها بتك يا عمتي لكن العملتو ما هين ، وسخت سمعتها و سمعتنا و كتلت بت أخوها ..... طبعاً حاجه بتول دي زعلت شديد و الزعل كان باين في وشها ، حسيت إنو هي الوحيدهـ القلبها واجعها على ميادهـ ، فجأه كدا سمعنا صوت الباب و جات وحده داخله ، كنا بنعاين ليها و هي ماشه علينا ، سهيلا قالت لي دي زوجة حمانا الكبير و أم الاء البت الماتت... قالت. كدا و عاينت لـ عمتها ، كلمة الإغتصاب دي نهاي ما حبوا يقولوها ، المهم المره جات داخله سلمت علي و قالت لـ اسمهان ولدك جاني جاري و قال لي جاتنا ضيفه ، مالكن ما بتنادني ! سهيلا قالت ليها عارفنك حتجي ، دا وقت الجبنه ذاتو .... المهم جابوا كانون و عملوا الجبنه و تاني فتحوا الموضوع ، حسيتهم مقهورات من سنين بسبب الموضوع دا و عايزين يتفشوا ، أم البت اسمها ليلى ، قالت أنا بتكم ديك ما عافيه ليها و شاحده ربي لو حيه ما ترتاحي و لو ميتة جوه قبرها ما ترتاح .... لمن قالت كدا حاجه بتول ما قدرت تمسك دموعها فـ طوالي قعدت تبكي ، اسمهان قالت ليهم عليكم الله أقفلو الموضوع دا ، بتدعوا على وحده ما معروف ذاتو إذا حيه ولا ميته ؟؟
فجأه سمعنا صوت راجل بقول بنبره عاليه ، بثينه يا بثينه !! قالت ليهو مالك يا مجدي ؟؟ سهيلا قالت لحاجه آمنه أمسحي دموعك دي سرعه يا عمتي ، براك عارفه الرجال ديل هسي يتنفخوا فينا ، حاجه بتول مسحت دموعها و دخلت جوه ، الراجل جا داخل زهجان و كان عايز يكورك في مرتو بثينه بس لمن شافني رخى شويه و سلم علي من بعيد ، بثينه قالت ليهو دي زوجة تامر يا مجدي ، قال ليها والله !! جا سلم علي و قال لي معليش ما قدرت استحضر شكلك ، قلت ليهو عادي ، بعد سألني عن نسابتي و ناس بيتنا قال ليهم أمي وين ما شايفها ؟؟ طوالي سهيلا قالت ليهو قاعدهـ تصلي ، قال لـ بثينه ألحقيني في البيت ، مشى و طوالي هي مشت وراهو ، اسمهان قالت ليهم الليله لو كان سمعكم كان علق مشنقتكم ، ليلى قالت ليها خليهو يسمع ساي ، أنا أمي قلبها لسه ما برد على بتها و كل ما اتذكرها و اتذكر الكان سبب في موتها قلبي بيوجعني زياده ، فوق دا كلو حتى الكلام عايزين تمنعوني منو !؟ ختت فنجانها حق الجبنه و طوالي مشت بيتهم ... غيتو حسيت إني جيت و حفرت ليهم الدافننو و ذكرتهم بيهو تاني و وجعت قلوبهم 💔
سهيلا قالت لي هسي علاقة نسابتك معاك كيف بعد وفاة تامر ؟؟ بجوك ؟؟ قلت ليها ايوه ، قالت لي عندك نسابه شوووم ، تامر الوحيد الطلع ما بشبهم ، والله ما حصل انقطع مننا كان بجينا على طول و لو ما جا بتصل على عمتي بتول يسأل عن حالنا و إذا محتاجين حاجـه .... طبعاً و هي بتتكلم عن تامر أنا خلاص دموعي نزلت ، اسمهان قالت ليها سهيلاااا خلاص أسكتي و اقفلي السيره دي ، يعني يوم البت دي تزوركم و تتونس معاكم تفتحوا معاها مواضيع زي دي !؟ اسكتي خلاص عشان لا مجدي لا عثمان لا منير يسمعك و يزفتها معاك ، اسمهان قالت كدا و دخلت تشوف حاجه بتول ، حسيت إني لازم أمشي بعد دا ، وقفت على حيلي و قلت لـ سهيلا أنا حـ أمشي ، قالت متين جيتي ! عليك الله أقعدي ، حاجه بتول جات طالعه مع اسمهان و قالت لي وحاة اسم الله ما ترجعي في الشمس الحاره دي ! متين جيتي انتِ يا بتي عشان تمشي ، قلت ليها وراي شغل بس قلت أغشاكم اسلم عليك ، اسمهان و قالت لي و أمهات لواسين ديل عكروا ليك مزاجك ، قلت ليها لا لا والله ، سهيلا قالت لي والله نحنا الفي قلوبنا على لسانا بس معليش أعفي لينا ، قلت ليهم والله يا جماعه ما ماشه بسبب كلامكم ! انتوا قلتوا المزعلكم بس ، حاجه بتول جات قعدتني و قالت لي إلا تقيلي معانا .... كانوا مصرين شديد و حلفوا ما يخلوني أمشي فـ اضطريت أقعد و تاني ما فتحوا المواضيع ديك ، صليت الضهر و جيت قعدت تااااني أشرب الجبنه ، جاراتهم جوهم و بقت ونسه كبيره ، حاجه بتول قالت لي قومي خشي جوه و ارتاحي شويه ، ديل بنقتهم الكتيره دي بصدعوا بيك ، قلت ليها لا لا بقعد معاكم ، أدتني مخده و قالت لي خلاص أخدي ليك تكيه شويه ... بقيت سانده راسي و أنا بسمع في ونستهم و ريحة البخور فوق ، حكاياتهم ما بتخلص بس كانت مضحكه و مسليه ، ذكروني ناس رحاب و زحل و عواطف و حاجه بدريه يا حليلهم ...
لمن جا العصر و صليتو ، حلفوا كمان ما أمشي إلا اتغدا ، كل وحده من نسوان أولادها جابت صينيتها و جات إلا ليلى ما ظهرت تاني ، طردوا الشفع بعيد و قالوا ليهم أمشوا البيت التاني ، المهم ما صدقت متين اتغديت عشان أمشي بس برضو مسكوني و قالوا أشرب الشاي 😂😂 قلت ليهم يخوانا بجنس الطريقه دي و الدلع دا انا تاني كل مرهـ حأصبها عندكم هنا ، قالوا لي طوااالي نحنا لاقنك وين !!!؟
طبعاً طيف اتصلت علي من قبيل و كلمتها إني اليوم ما حـ أقدر أجي لأسباب ، ما قلتها ليها ، المهم بعد انتهينا من موال الشاي ، طلعوا معاي و قدموني لحد الباب ، حاجه بتول قالت لي تعالينا طوالي ، قلت ليها ان شاء الله ، بعدها مشيت طويل بس لمن شفت أولاد قاعدين في آخر الشارع قررت أغير شارعي و فعلاً مشيت بطريق تاني ، ما كنت مستعجله رغم إني بخاف الاماكن الجديده علي و ما بحب أمشيها براي ، بس المرهـ دي إتحديت نفسي ... خليني اقول إني كنت بتجول ، بعاين للناس و سلامهم و مقالدتهم لبعض ، للبيوت المليانه شجر ، للشفع البتجاروا في الشارع ، للأولاد البلعبوا كورهـ في الميدان ... بقيت تابعه إحساسي و ماشه لحد ما مريت بشارع ما غريب علي !! لمن ركزت كويس عرفت إني في شارع بيتي !؟ قصدي شارع بيت قصي الكنت قاعده فيهو ! عربية قصي كانت واقفه ، فـ عرفتو قاعد في البيت ، شمالي بيت زحل و يميني بيت رحاب البعدو طوالي البيت الكنت قاعدهـ فيهو !! بقيت أعاين في البيوت و اتذكر أيامي القعدتها هنا ، اتمنيت أدخل و اسلم عليهم بس كنت تعبانه و مرهقه و ما عندي حيل لأسئلتهم كلها ، إتحركت و مشيت و فجأه سمعت صوت باب إتفتح ، لمن إتلفت شفت قصي ، هو ما كان شايفني ، طلع و كان بقفل في الباب بالمفتاح ، أول ما خلص و رفع راسو شافني !!
قال لي اليوم شاردهـ من الشغل ! كيفك ! قلت ليهو كويسه ، قال لي شكلي حـ تمشي في سكة طيف ، من هسي بتتسيبي من الشغل ... قلت ليهو أبداً والله بس كان عندي شغل ضروري مفروض أخلصو ، قال لي ما تكوني رجعتي لـ شغلك القديم داك !؟ قلت ليهو لا لا ، قال لي تمام أنا ماشي تعالي أوصلك معاي ، قلت ليهو بس..... قاطعني وقال لي من دون بسبسه ، المهم ركبت معاهو ، قلت ليهو اليوم شكلك متشاكل مع ناس البيت ، قال لي كيف !!!
قلت ليهو مش كان قلت لي انك بتجي البيت دا لمن تكون متشاكل مع ناس بيتكم !؟ قال لي ايوه بس المره دي ما متشاكل معاهم ، من فترهـ للتانيه بجي أديهو طله .... بعدها سكتنا .... بعد صنه كدا قال لي اشتقتي لـ جاراتك ولا شنو !؟ قلت ليهو يمكن لكن ما جيت أزورهم ، قال ليها اهااا .... حسيتو عايز يعرف الجابني هنا شنو بس ما أديتو مجال ، قال لي قبيل ما شفتك في الشركه فـ قلت يمكن خليتي الشغل ، قلت ليهو انت فاهمني كويس 😂
قال لي يعني كنتِ مفكرهـ تخلي الشغل ؟؟
قلت ليهو أنا على طول بفكر أخليهو ، بس براك عارف أختك زعاطه و معاطه ، قال لي يا زوله هو دي أختي و ما برضى فيها ، اصبري لمن أصل و أكلمها ، قلت ليهو خلي الفتنه ، قعد يضحك بعدها قال لي شغلكم ماشي كيف ؟؟
قلت ليهو تمام ، قال لي نفسي شديد البنك دا يشتري تطبيقنا عشان يتعامل معانا لـ قدام و يعتمد علينا في كل أجهزتو الآمنيه و غيرها من الأجهزه الإلكترونية ، قلت ليهو اتطمن لأنو عندك موظفين ما شاء الله عليهم ، التقول معزلنهم عزيل ، قال لي فعلاً نحنا بنعزل البعجبنا و بنفع معانا ، ناس الـ HR ,تبع الشركه قمة الدقه و الإحترافية ، بكم سؤال بس بقدرو يحددوا قدراتك ، قلت ليهو واضح عليهم .....
المهم لمن وصلت مكان مواصلات قلت ليهو نزلني هنا ، قال لي عشان شنو ؟؟ ما شايفه الدنيا مغربت ؟؟ قلت ليهو أنا ما عايزا.... قاطعني و قال لي ما تقولي لي ما عايزا اتعبك و بتاع ، أنا السايق ما انتِ عشان كدا خليك ساكته ، قلت ليهو على راحتك ، إذا عايز تتعب نفسك معاي ، خلاص تعبتها Pas de problème 💁
حاكاني و قال پا دو بخوبلام ، قلت ليهو أيييوه إتعلم ، قال لي على فكره أنا مديرك ، قلت ليهو في الشركه ما هنا ، قال لي كويس ، بكرا بتجي الشركه ، قلت ليهو بكرا الجمعه ، قال لي خلاص يوم السبت ، قلت ليهو ما جايه ، قال لي يا سلاااام ، انتِ مديرة الشركـه و أنا ما عارف !؟
قلت ليهو لا لكن حـ آخد إذن ، قال لي لـ شنو و من منو يا أستاذهـ ؟؟
قلت ليهو من إدارة قسمنا 💁
قال لي و السبب شنو ؟؟ قلت ليهو مشوار أمدرمان تعبني و عايزا ارتاح ، قال لي راحه يومين ؟؟ هزيت ليهو راسي ، قال لي تمام و أنا حـ أوصيهم إنو يوم الجمعه ينزلوك و يخلوك تداومي ، ان شاء الله تكوني غفير ،... غصب عني ضحكت على كلامو و قلت ليهو انت حاقد بس ، المهم وصلني البيت ، نزلت و شكرتو بعدها مشى ....
زي الساعه 9 كدا لمن طيف اتصلت علي تاني عشان تعرف أنا ليه ما جيت ، أكدت ليها إني كويسه ، سكتت و ما قدرت تسألني لأنها حست إني ما عايزا أوريها ... المهم بعد قفلت منها بقيت أفكر مسافه و قلت إني لو ما طلبت مساعده من زول في قصة مياده دا ما حـ اعرف اتصرف براي ، أنا قبيل كنت عايزا أقول لأهلها إنو هي في المصحه العقليه بس اتراجعت لـ سببين ، الأولى إنو هم إذا مشوا المصحه أو لـ عصام أكيد ما حـ يسمحوا ليهم يدخلوا توووش كدا و بما إنو عصام خافيها معناها ما عايز زول يعرف هي وين و عادي ينكر إنو هي في المصحه و ممكن يطلعها و يوديها مكان تاني ، السبب التاني من خلال كلامي مع دكتورهـ رانيا اتأكدت إنو في شي في الطابق التالت و إلا ما كان منعوا الناس منو و سمحو لـ دكاترهـ معينين يدخلوهو .... بعد تفكير عميق ، اتصلت بـ طيف و قلت ليها بصراحه انا محتاجه مساعدتك ، قالت لي طوااالي قولي لي بس في شنو ؟؟
نميل دائمًا لمن يجيدون مواساتنا، أولئك الذين يمكنهم تحمل الضغوطات عنك دون أن يشعروك بأنك عبء وحمل عليهم، لمن يرفعون عنا عناء التفكير في نظرتهم لنا ، لأصحاب الظل الخفيف الذين يملكون نظرة ساخرة يستطيعون بكلمات بسيطة تحويل أشد لحظات بؤسنا وتعاستنا للحظات من الضحك وإطلاق النكات على مواقف كانت تستدرجنا للبكاء ، نميل لأولئك الذين يحاولون دائمًا مساعدتنا بلا مقابل ، لا يبخلون علينا بالود والكلمات اللطيفة والإعجاب بتفاصيلنا في أشد لحظات فقدان الثقة بأنفسنا ، و لأولئك الذين يمدوننا دائمًا بكلمات القوة و الأمل حين نشعر بالهشاشة و اليأس.. نميل لكل الأشخاص الذين لا يبخلون بالمواساة والود والحب و لو بأبسط الكلمات 💜🌻
لكاتبه
يتبع.....
