لمن وصلت الشركه طيف كانت منتظراني برا ، سلمت علي و دخلتني معاها ، ما شاء الله الشركه كانت فخمه شديد ، لمن دخلنا قالت لي أهلاً بيك في شركة js التكنولوجيه ، اليوم حـ ألففك الشركـه كلها و اعرفك على الموظفين البعرفهم ، قلت ليها طيب بس ممكن سؤال ؟؟ قالت لي ممكن ؟؟ يا بت نحنا ياداب بنتعرف ؟؟ قلت ليها لااا ، قالت لي اسألي ساي ، قلت ليها اسم الشركه اختصار لـ شنو ؟؟
قالت لي اختصار لـ jafar suliman , يلي هو اسم أبوي ، قلت ليها اها ، قالت لي الشركه مكونه من 8 طوابق ، الطابق الأرضي زي ما شايفه فيهو ريسيبشن و إنتظار و كافتيريا و غرف طوارئ و كمان في هايبر ماركت و قاعة مؤتمرات بتفتح في الداخل و الخارج و قاعات ورش و معرض هنا و التاني فوق و مكاتب مفتوحه ، تعالي أوريك ليها ، فعلاً لمن دخلنا لـ جوهـ لقيت كميه من الموظفين شغالين على كمبيوتراتهم في مكاتب مفتوحه ، إتحركنا و مشينا شمال ، قالت لي دي قاعة اجتماعات و ديك مكاتب بتتم فيها المعاينات ، بعدها طلعنا المصعد و مشينا الطابق الأول ، كل ما نمشي مكان بتعرفني على مكوناتو ، لمن وصلنا الطابق الخامس قالت لي دا طابق خدمي ، زي ما شايفه في أكتر من كافتيريا و إستراحات و مصلى و غرفه تخزين تبع مطبخ الكافتيريا و غرف تبديل ملابس لـ عمال النظافه و العاملين في الكافتيريا ، بعدها مشينا الطابق السادس ، كان برضو مكاتب بس شبه مفتوحه ، قالت لي هنا الإدارة الوسطى ، لمن وصلنا الطابع السابق قالت لي دا طابق ميكانيكي ، هنا في غرف صيانه و غرف تبريد و غرفة داتا سنتر و داتا بيز و مولدات و في سيكيورتي و غرف أمن و تخزين و غرفة مراقبه و مكاتب ، قلت ليها ليه وقفنا خلينا ندخل نشوفهم !!
قالت لي لا الطابق دا ما بجيهو أي زول ، أنا جبتك بس عشان أعرفك على مكونات الطابق السابع بس ممنوع الموظفين يجوا هنا ، الطابق دا و البعدو نادراً ما تلقي فيهو موظفين ، هنا في معلومات سريه عن الشركه و الموظفين ، قلت ليها لكن انتِ .... قاطعتني و قالت لي ماف زول عارف إني بت صاحب الشركه و اخت قصي ، ما عايزاهم يعرفوا عشان ما يتعاملوا معاي على أساس إني بت صاحب الشركه و يحاولوا يتقربوا مني لـ مصالحهم الشخصية ، يعني ما عايزا أي صحبة مصلحه ، قلت ليها فهمت عليك .... طيب فوق في شنو ؟؟
قالت لي فوق آخر طابقين يلي هم الإدارهـ العليا ، في قاعة اجتماعات و مكاتب مغلقه و مكاتب ناس الماليه بالإضافة للخدمات ، قالت لي أنا تعبت و جعت كفايه حوامه ، قلت ليها أنا نفس الشي ، فجأه جا واحد من رجال الأمن و قال لينا بتعملوا شنو هنا ؟؟
طيف قالت ليهو دي موظفه جديدهـ و حبيت أعرفها على الشركه ، قال ليها هنا ماف شي عشان تعرفو ، قالت ليهو أصلاً نحنا كنا ماشين ، يلا يا مها ، رجعنا المصعد و نزلنا تحت ، الطابق الخامس ، دخلنا الكافتيريا عشان نفطر ، الزمن داك الساعه كانت 11 ، أثناء ما نحنا بنفطر كدا تلفون طيف رن ، قالت لي دا قصي ، ردت عليهو و قالت ليهو ايوهـ جات ... لا حالياً نحنا في كافتيريا الطابق الخامس ...طبعاً لفيت بيها الشركه كلها... طيب طيب ، بعد قفلت قالت لي قصي كان خايف انك ما تجي و ما ترضي تشتغلي ، قلت ليها قصي فاهمني كويس لأني كنت مفكرهـ أعمل كدا ، قالت لي يا زوووله هوي ما اسمعك تقولي كدا تاني ، شدي حيلك و قوي نفسك و واصلي مشوار حياتك ... المهم بقينا نفطر و نتكلم ، قالت لي الشركه فيها أقسام كتيرهـ زي قسم التسويق ، المبيعات ، الشبكات ، نظم معلومات ، نظم حوسبيه ، نظم إداريه و..... الخ ، و أنا في قسم نظم المعلومات ، انتِ عايزا تكوني في أي قسم ؟؟ قلت ليها والله يا طيف أنا زوله ماشه ساي و ما عارفه نفسي عايزا شنو و..... قاطعتني و قالت لي معناها نظم معلومات ... فجـأه قصي جانا ، قال لينا السلام عليكم كيفكم ، ردينا ليهو السلام و هو قعد طوالي ، قال لي ها مبدئياً كدا أخدتي أي طابع عن الشركه ؟؟ قلت ليهو شكلها مرتب شديد و الموظفين واضح إنهم ملتزمين و بحبوا شغلهم ، طبعاً الناس كانوا بـ عاينوا لـ قصي ساي ، إحساس إنو مدير و قاعد معانا ، حسيت انو نفسهم يعرفوا علاقتو بينا شنو ، بالذات البنات الشمار كان حارقهم ، المهم بقوا يتكلموا مـعاي كدا لحد ما جا زمن المعاينات ، طيف قالت لي يلا بالتوفيق ، قصي قال لي على فكرهـ أنا موصيهم يزنقوك كويس في الأسئلة و يضغطوا عليك شديد ، قلت ليهو برضو ماف مشكله ، قال لي الله ! على الثقـه في النفس ، المهم أنا ماشي ، يلا بالتوفيق ... هو مشى قدامنا و أنا و طيف طلعنا بعدو من الكافتيريا ، قالت لي أنا قلت ليك حـ أعرفك على الموظفين بس من كترة اللف نسيت ، لكن ما مشكله أول ما تخلصي معاينه حـ أعرفك بيهم ، قلت ليها طيب ، مشت معاي لحد الطابق الأرضي ، كان في كميه من الناس قاعدهـ منتظرهـ دورها ، قلت ليها وااااي انتظر ديل كلهم ؟؟
قالت لي قالوا ليك بدخلوا الناس عشوائياً !؟ الناس دي حـ تدخل بالترتيب ، أسماءهم موجودهـ في لسته ، انتِ تقريباً خامس وحدهـ ، تعالي نقعد هنا ، المهم قعدت معاي لحد ما جا دوري ، قالت لي يلا بالتوفيق .... ظنيت انها حـ تمشي بس بعد دخلت و طلعت لقيتها لسه موجوده ! قلت ليها يا بت هيييي انتِ ما عندك شغل ؟؟ قالت لي خليك مني هااا المعاينه كانت كيف ؟؟ قلت ليها طلع جد جد أخوك موصيهم ، ياخ صعبين و دقيقين في الأسئلة و نهااااي لا بضحكوا لا ببتسموا و ما بدوك إحساس انهم اقتنعوا بـ كلامك ، غيتو انا اتأكدت إني غير مقبوله في الشركه دي ، قالت لي أنا قلت ليك تعالي و اشتغلي سااااي بس براك قويتي راسك و قلتي إلا تجي بالطريق العديل ، قلت ليها المهم ننتظر و نشوف النتيجه البقت معروفه بالنسبه لي ، قالوا لي لو قبلناك حـ نتصل عليك بعد يومين ..... المهم مشيت معاها القسم الهي شغاله فيهو ، كان في الطابق التالت ، عرفتني على زملائها الموظفين و قالت ليهم دي موظفه جديدهـ حـ تنضم لينا ، همست ليها و قلت ليها ما تكوني واثـقه كدا !! ضحكت و واصلت كلامها و قالت ليهم متأكدهـ انها حتكون إضافـه مثريه بالنسبه لينا ، كلهم رحبوا بي و قالوا لي أهلاً و سهلاً بيك وسطنا ، المهم بعدها طلعنا ، قلت ليها أنا حـ أمشي بعد دا و انتِ أرجعي لـ شغلك يا طيف ! ما معقوله الإستهتار دا ، انتِ موظفه مهمله يا طيف ، قعدت تضحك و قالت لي فعلاً بس أول ما تنزلي و تشتغلي معاي حأكون منضبطه ، المهم ودعتها و مشيت ، أول ما طلعت من الشركه كدا قصي كان جاي داخل ، قال لي المعاينه كانت كيف ؟؟
قلت ليهو طلعت جد جد موصيهم ، ياخ ديل ما بشر ، ضحك و قال لي شكلي اتشددت في التوصيه و كترت المحلبيه ، قلت ليهو فعلاً ، قال لي يعني ماف أمل إنو نشوفك في شركتنا ؟؟
قلت ليهو أمل ذاتا كانت من ضمن ناس الـ HR العملوا لي المعاينه ، قعد يضحك و قال لي يعني زيرو أمل ! المهم موفقه يا زوله ، عن إذنك ، أول ما نحنا الإتنين إتحركنا اتذكرت حاجه ، إتلفت عليهو و قلت ليهو قصي !!!
إتلفت علي و قال لي نعم !!... قلت ليهو دفتري في بيتك ! قال لي ايوه لو مشيت تاني حـ اجيبو ليك معاي ، قلت ليهو طيب ، قال لي بالمناسبه جاراتك يسألو عنك ساي ، قلت ليهو يا حليلهم ، قلت ليهم شنو ؟؟
قال لي المرهـ الأولى لمنض جيت و سألت عنك و قالوا إنو ليك يومين مختفيه هم ذاتهم قلقوا عليك فلمن مشيت المرهـ التانيه و سألوني عنك قلت ليهم كنا متناقشين في موضوع و هي رجعت بيت أهلها من دون ما تكلمني و في الآخر اتصالحنا بس أصرت تسكن جنب بيت أمها ..... قلت ليهو مبالغه يا قصي !! قال لي كنت عايز أقول ليهم طلقتها و أنهي الموضوع دا بس تاني قلت لا أحسن أسكنها جنب بيت أهلها ..... إبتسمت و قلت ليهو فظيع انت !!
المهم بعدها كل واحد مشى على إتجاهـ ، لمن وصلت البيت و سألوني عن المعاينه حكيت ليهم الحصل ، أول ما دخلت جوهـ أمي جات شايله كباية مويه ، قالت لي هاك أشربي !!.... طبعاً شلتها منها من دون ما أظهر ليها إني مستغربه أو أعاين ليها ، عارفـه انها بتعمل كدا في محاوله منها لتصليح الإنكسر ، بس دا كلو ما بفيد والله ، ايوه يمكن يجي يوم و اتعود على طريقتهم الجديدهـ في التعامل معاي بس عمري ما حـ أنسى كيف كانو بعاملوني لأنو السنين العشتها و هم بعاد عني ما بتنعاد و ما بتتعوض ، المهم بعد يومين اتصلوا علي و كلموني إنهم قبلوني في الشغل و للأمانه أنا كنت واثقه إني حـ انقبل في الشركه دي لأنها بتاعة أبو طيف و قصي ، دا ما معناهو إنو المعاينه كانت من دون فايدهـ أو أنا ما بستحق الوظيفه دي ، أنا واثقه من نفسي و عارفـه إني حـ أبدع شديد في أي مجال تكنولوجي لأنو دي الحاجه البحبها ، لو فرضنا مثلاً انهم مع ذلك مع قبلوني بعد المعاينه متأكدهـ إنو طيف و أخوها حـ يجيبوني غصب ، المهم كلمت ناس البيت ، أبوي قال لي حاجه كويسه ، بالتوفيق ، أمي قالت لي ربنا يوفقك ان شاء الله ، أسيل قالت لي بعد تتمكني في شغلك ما تنسي أخوك دا بعدين ، كلها كم شهر كدا و يتخرج ، طبعاً ما وريتكم ، أسيل دي صغيرهـ يمكن عمرها 17 ، 16 سنه يعني في الثانوي ، المهم بعد يومين طوالي نزلت الشغل ، طيف كانت مبسوطه أكتر مني ، حتى انها طلبت من واحد يبدلني عشان أكون قاعدهـ قريبه منها ، يوم بعد جيت من الشغل ، وسام جاتني ، طبعاً استغربت من جيتها لأنها خالص ما قاعدهـ تطلع للناس ، سلمت علي و قعدت ، مشيت جبت ليها مويه و جيت قعدت معاها ، كنا قاعدين في الحوش في ضل الأوضه و الدنيا عصريه ، أمي طلعت و أسيل شالت ولدها و مشت لـ ناس أمها و لميس جوهـ الأوضه ، أنا و هي لحد الآن ماف كلام كتير بيناتنا ، وسام قالت لي مليت براي و انتِ أول زول خطر على بالي ! قلت ليها يمكن لأننا اتعرضنا لنفس الحادثه و من نفس الشخص عشان كدا حاسـه اننا حـ نفهم بعض !!
قالت لي يمكن ، المهم أنا زهجت و حاسه بـ قرف ، قلت ليها اشتغلي ، قالت لي أنا بكسل من أي شي ، لو علي أقعد بس و أربع يديني ، قلت ليها و دا حـ يزيد زهجك و قرفك ، على فكرهـ أنا زيك و مريت بالمريتي بيهو و أكتر بس في ناس دعمتني و شجعتني و بسببهم أنا قررت أنزل و اشتغل ، قالت لي طيب بحاول .... بقينا نتكلم مع بعض و دي اول مرهـ انسجم مع زول ، يمكن لأنو وسام زيي !! بشوف إنعكاسي فيها ، نفس الصفات و الطبع ، أثناء ما نحنا بنتكلم جبنا سيرة عصام ، قالت لي يومتا شاكلوهو شكل شديد و ما سلم من سامر و رجال خالاتي ، أمي دي كفتتو كدا لمن يدها وجعتها و أبوي برضو لمن عرف ما قصر منو و هو بعدها ما قدر يقعد في البيت ، مشى قعد في شقتو جنب مستشفتو ، قلت ليها هو مش كان متزوج ؟؟
قالت لي ايوه ، مرتو مياده نسيتيها ؟؟ قلت ليها ايواااا ياداب اتذكرتها ، حتى إنها هربت ، قالت لي بركه الهربت منو دا ما بشر ، قلت ليها يا حليلها لحد الآن ماف خبر عنها ، قالت لي فعلاً من بدري شديد ، قلت ليها معقوله أهلها ما يكونوا عندهم علم عن مكان تواجد بتهم ؟؟ قالت لي ما عارفين لأنو لو كان عندهم علم ما كانوا حـ يخلوها في حالها لأنهم حالفين على الراجل الهربت معاهو ، زي ما عارفه هو اغتصب بت أخو ميادهـ الكانت قاعدهـ معاها في البيت و البت ماتت ، قلت ليها مياده دي مش كانت ساكنه في بيت حبوبه آمنه ؟؟ فـ كيف هي حـ تجيب راجل و تدخلو البيت و حميانها ساكنين جنبها و نسيبتها معاها في البيت ، قالت لي لا لا البيت مقسوم و عندو بابين واحد فاتح شمال و التاني جنوب ، يعني عادي تجيب زول و تدخلو من دون ما زول يشوفها ، قلت ليها طيب ليه تخاطر و تجيبو بيتها في الوقت الكان ممكن تطلع و تمشي ليهو ؟؟
قالت لي والله انا ما عارفه يا مها ، دا البسمعو و القصه دي قديمه شديد ، قلت ليها طيب أهلها ديل ساكنين وين ؟؟ قالت لي في أمدرمان ، قلت ليها يعني جنب وين ؟؟ قالت لي ماشه تزوريهم ولا شنو ؟ قلت ليها ما كدا بس برضو لو مشيت ما عيب ، الناس ديل جونا في عرسنا أنا و تامر ربنا يرحمو و في وفاتو كمان جوا و قبلها كان تامر عزمهم و برضو جوا ، قالت لي بالجد هم ناس كويسين و بجونا على طول ، و رغم بعد المسافـه إلا أنهم بجونا يمكن لأنهم خجلانين من عملة بتهم !! قلت ليها يمكن بس انا ملاحظه انكم ما قاعدين تمشوا ليهم ، قالت لي ناس أمي ما بطيقوهم بسبب عملة ميادهـ ، لحد الآن ماخدين موقف و كارهين أهلها رغم إنو ما ليهم ذنب ، المهم إتونسنا مسافه بعدها وسام استأذنت مني و مشت ....
بـ كدا أنا شبه اتأكدت إنو أهل ميادهـ بالجد ما عارفين هي وين ، ما عندهم علم إنو بتهم في المصحه العقليه ، بس برضو ما حـ اتفاجأ لو عرفت إنهم عارفين و انهم الدخلوها المصحه العقليه و يمكن بمساعدة عصام ، لو فرضنا كدا ، فـ ليييه ؟؟ و الراجل الخانت بيهو عصام مشى وين و ليه ما اتعاقب بسبب تهمة الإغتصاب الإتوجهت ليهو ؟؟
في اسئله كتيرهـ ما لقيت ليها أجوبه بس الأكيد إني حـ أمشي أزورهم في امدرمان ، عشان لو اتأكدت إنهم بالجد ما عارفين إنو بتهم في المصحه طوالي حـ أكلمهم عشان يمشوا يطلعوها ، المهم في اليوم البعدو جهزت نفسي و مشيت الشركه ، أثناء ما أنا شغاله على الكمبيوتر طيف جات و قالت لي تعاااالي سرعه ، قلت ليها في شنو ؟؟ قالت لي انتِ بس تعالي و جرتني من يدي و طلعتنا برا مكاتب الموظفين ، قلت ليها طيف في شنو !؟ وراي شغل أنا ، قالت لي في زول منتظرك ، مفروض تمشي انتِ و تزوريهو لكن هو جا لحد عندك عشان يشوفك ، قلت ليها زول ؟؟ دا منو كمان ؟؟
قالت لي ما زول ، زوله ، تعالي بس ، المهم أول نزلنا الطابق الأرضي لمن مشينا صالة الإنتظار ، اتفاجأت لمن شفت دكتورهـ رانيا ، مشيت سلمت عليها ، قالت لي مشتاقين والله ، قلت ليها كتير و عاينت لـ طيف ، قالت لي عرفت في النهايه زي ما أنا عرفت ، قالت لي طمنيني عليك كيفك ان شاء الله كويسه ؟؟ قلت ليها كويسه الحمدلله انتِ كيفك ، قالت لي الحمدلله في نعمه ، بقت تتونس معاي و طيف مشت جابت ليها مويه و عصير لينا كلنا ، قالت لي والله لمن هربتي كنت شايله همك و افتكرت انك غلطتي غلطه كبيره لمن طلعتي من المصحه بس هسي بعد شفتك كويسه اتأكد إنو العملتيهو دا الصح ، قلت ليها أكيد لأنو أنا ما مفروض أكون هناك ، قالت لي فعلاً ، لو كنت ماسكه حالتك كنت حـ اعرف إذا المصحه مكانك أو لا ، المهم كويس إنو أهلك ما رجعوك هناك ... هم ما مفكرين يرجعوك صح ؟؟
قلت ليها لا شالوا الفكرهـ دي من بالهم و حالياً أنا كويسه ، قالت لي ممتاز شديد ، عاينت لـ ساعتها و قالت لينا مفروض أمشي بعد دا ، طيف قالت ليها انتظري شويه ، قصي نازل ليك ، فعلاً انتظرت زي 5 دقايق بعدها قصي جانا ، سلم علينا و قال ليها منورهـ الشركه يا أجمل خاله في الدنيا ، قالت ليهو حبيبي والله ، بنورك ، اخبارك شنو ، قال ليها زي ما شايفه شديد و لضيض ، قعدت تضحك و قالت ليهو بقيت تتكلم كلام حبوبات ، طيف قعدت تضحك عليهو ، قالت ليهو أنا حـ أمشي العيادهـ بعد دا ، جيت مارهـ بـ هنا و اتذكرت إنو طيف قالت لي انو مها شغاله معاكم في الشركـه فـ قلت أدخل أسلم عليها ، قال ليها ايواااا يعني انتِ جايه عشان البت دي و ما جايه تشوفي ولد أختك !؟؟ كويس يا دكتورهـ رانيا ، طيف قالت ليها في زول غاااار يا خالتو ، اشتري ليهو مصاصه ، لمن قالت كدا أنا فجأه ضحكت ، كلهم بقوا يعاينوا لي ، طيف قالت لي ضحكت حلوهـ ، دكتورهـ رانيا قالت لي شفتي الإتنين ديل مجانين لو جيتي البيت و قعدتي معاهم دقيقه بس تموتي من الضحك ، طيف قالت ليها هي ما شافت محمد ، داك مجنون رسمي ، دكتورهـ رانيا قالت ليها و أنا الغبيانه بعالج في المجانين الفي المستشفيات و ناسيه أولاد أختي ، على راسهم محمد ، المهم ونستنا كويس بعدها قالت لينا أخرتوني عن شغلي حـ أمشي بعد دا ، قالت لي أديني رقمك ، طوالي أديتها رقمي ، قصي طلع معاها و قدمها لحد باب الشركه و أنا و طيف رجعنا شغلنا ، كنت براجع و بشوف في التطبيقات الصنعتها الشركه ، شغلهم حلو بس ماف شي جديد ، نفس باقي التطبيقات ، آخر تطبيق كان أبليكشن تم تصنيعو لـ شركة مواصلات يلي هو زح ترحال ، المهم بعدها جاتنا السكرتيره و قالت لينا إنو مدراء الأقسام و الإدارة العليا بعد ربع ساعه عامله إجتماع في غرفة الإجتماعات "A " و " B " طبعاً الموظفين كتار عشان كدا حيكون الإجتماع في قاعتين ، المهم أنا و طيف مشينا الكافتيريا و نسينا الإجتماع خالص ، بس فجأه اتذكرتو و قلت لـ طيف واااي أنا من النسيان !! الإجتماع يا بت !! قالت لي نسيناهو عديل ، قمنا طوالي و أنا مشيت قدامها و من دون ما أعاين قدامي ضربت في واحد ، رغم إنو أنا الغلطانه بس اتعصبت شديد و إتزهجت فيهو ، طيف إعتذرت منو و جرتني معاها ! قالت لي في شنو يا مها الموضوع ما مستاهل ! ليه التعصيب دا كلـو !؟
صـراحة أنا ذاتي استغربت في نـفسي ! الموضوع بالجد ما مستاهل حتى إنو الولد لا شاكلني لا اتكلم معاي ذاتو !!... المهم لمن مشينا القاعه A , أول ما جينا داخلين لقيناهم شغالين اجتماع و ماف كرسي واحد ، فـ طوالي طلعنا و مشينا القاعه B , أول ما فتحنا الباب كدا كلهم إتلفتوا علينا ، طبعاً كانوا شغالين إجتماع و نحنا قاطعناهم ، كان في واحد بتكلم و نحنا دخلنا توووش كدا ، طبعاً زهج ، قال لينا أطلعوا برا ، طوالي عاينا لـ قصي ، قعد يتبسم لينا بس ، الراجل قال لينا ما سامين ؟؟ اطلعوا برا لأنو ما معقوله تجوا داخلين في نص الإجتماع و تقاطعونا ، موظف غير مهتم بالمواعد دا ما بلزمنا هنا .... طبعاً أهانا قدام الموظفين و الإداريين كلهم ، بالجد الموقف كان زباله و حسيت بالتصغير ، طوالي طلعنا طيف قالت لي دا 3 إجتماع ما أحضرو 🤣🤣
هـي كانت ماخدهـ الموضوع كوميدي بس أنا لا ، لمن لقتني ساكته و زهجانه قالت لي يا بت هوووي حركات الطالبه المثاليه دي خليها ، ما مشكله الجايات أكتر من الرايحات ، زاتو الراجل الفقر دا كان حـ يمعطنا بالكلام .... ما رديت عليها ، بعد شويه قصي جا طالع ، قال لي يا مهملات كنتوا وين انتوا ؟؟ من بدايتها كدا يا مها ؟؟ قلت ليهو بزعل ، نسينا ، قال لي كيف يعني نسيتو ؟؟ طيف قالت ليهو مشينا الكافتيريا و الونسه جرت و نسينا الإجتماع و بعدين ليه انت ما قلت حاجه لمن عاينا ليك ؟؟
قال ليها اقول شنو ؟؟ انتِ عارفه كويس إنو مستر مدثر ما بقبل بأي تأخير ، ما هو بس كلنا كدا ، الإلتزام بالمواعيد من شروط شغلنا هنا ، ياريت لو كان اتأخرتو دقيقه أو اتنين ، انتوا متأخرين ربع ساعه عديل و عايزني بعد دا كلو أشفع ليكم عشان تحضرو الإجتماع !؟ ما تتوقعوا حاجه زي دي مني يا طيف و يا مها ، انتوا هنا بالنسبه لي زيكم و زي باقي الموظفين ، لو كنت مكان مستر مدثر برضو ما كنت حـ أخليكم تدخلوا ، دي شركه ما جامعه و الإجتماع ما محاضرهـ عشان تجوا داخلين في أي زمن ..... طبعاً كلامو زهجني زياده ، خليتو بتكلم و رجعت مكاني ، لمن روقت شويه ، بقيت اسأل نفسي ليه انا متضايقه ؟؟ حصل شنو عشان مزاجي يتغير فجأهـ كدا ؟؟ غضبي ما ليهو مبرر ، أنا فترهـ كدا كنت باردهـ و ضابطه أعصابي الإتغير شنو عشان عادة الإنفعال و التعصب السريع ترجع لي تاني ؟؟
المهم بعد مسافه الموظفين جوا راجعين لأماكنهم ، بعدهم بشويه طيف جات داخله ، جات قعدت قصادي و قالت لي بما إنو عدم حضرانك للإجتماع دا مضايقك كدا تعالي أقول ليك مخرجات الإجتماع دا ....... الخ ، لمن خلصت قالت لي ان شاء الله قلبك يكون برد شويه ، قلت ليها أنا آسفه ، قالت لي عادي ولا يهمك .....
المهم بعدها عدت الأيام و أنا ما لقيت طريقه أمشي بيها لأهل ميادهـ في أمدرمان ، يوم اتصل علي رقم غريب ، لمن رديت عرفت إنها دكتورهـ رانيا ، سلمت علي و سألت عن حالي بعدها قالت لي دا رقمي سيفيهو قلت ليها طيب ، بقينا متواصلين على بعض طوالي و هي على طول بتسألني عن يومي و تفاصيلو ، في يوم قالت لي رايك شنو بعد تخلصي شغلك نتلاقى في مطعم نتغدا فيهو سوا ، ما لاقيه لي زول يطلع معاي ، قلت ليها طيب .... صراحة أنا كنت مستغربه و ما عارفه ليه الإهتمام دا كلو ! يعني فجأه كدا شالت رقمي و فجأه كدا بقت متواصله معاي و فجأه كدا عايزانا نطلع سوا !! رغم إنو كان ممكن تطلع من طيف أو قصي أو أي زول تاني يطلع معاها ! إشمعنى أنا !؟ قلت ما مشكله حـ أمشي و بطريقه أو بأخرى حـ اجيب ليها سيرة المصحه و اعرف إذا بتعرف ميادهـ و كيف دخلت المصحه .....
المهم اتفقنا نتلاقى تاني يوم ، قلت أخلص شغلي بدري و أطلع أمشي ليها....
أبكي و أغضب ، أخاف و أرتجف ، و كأنني حبست كل هذه المشاعر لحين موعد وصولك، و عندما جئت لعبتَ بها بطريقةٍ غير معقولة و حولتها إلى قدرٍ كبير من الأمان 💜
لكاتبه
يتبع........
