عاين لي جوه عيوني و قال لي ما عايز منك جـواب هسي بس أسمعيني للآخر و ما تقاطعيني ....هزيت ليهو راسي ، قـال لـي أنا ...قبل ما يتم كلامو باب بيتنا إنفتح و طلع مؤيد ولد خالتي نجوى ، طبعاً هو عمرو 11 سنه ، قال بصوت عاالي يا خاااالتي ناهد مها جات ، ناهد دي أمي ، استغربت و قلت ليهو في شنو ، أول ما دخلت كدا تامر قال لي مها أسمعيني ، قلت ليهو ثواني ، لمن دخلت ليهم جوه الزفت الإسمو عصام داك كان قاعد و مـعاهو خالتي و حمواتها يعني أخوات عصام يلي هم عمات تـامر ، أمـي قالت ليهم ياها جات ، تعالي سلمي ....بالغصب سلمت على أخوات عصام و هو لا ، ما سلمت عليهو ، خالتي قالت لي أقعدي ثواني ، قعدت و أنا بعاين ليهم بإستغراب ، قلت ليهم قولوا في شنو ؟؟
لميس ضحكت مسافه بعدها قالت لي جاك عريس !!....انصدمت و بقيت أعاين ليهم بخلعه !! من الشايفاهو قدامي عرفت إنو العريس عصام !!...ياخ أنا لو انتحر ما بعرس التافه دا و بعدين ليه يجيبوا لي راجل قدر أبوي !! للدرجه دي أنا ما بهمهم و عايزين يعرسوا لي أي راجل و السلام !! و بعدين هل أنا شكيت ليهم و قلت ليهم عايزا عريس!!؟ عايزين بأي طريقه يتخلصوا مني ، خالتي قالت لي العريس ما غريب و كلنا بنعرفوا حق المعرفه .... طبعاً عصام كان بتبسم ساي ، قالت لي عشان ما تكوني قاعده كدا و ما فاهمه حاجه عـ.....قبل ما تكمل كلامها تامر جا داخل و قال لي أنا طالب يدك ...
كلهم إتلفتوا عليهو بخلعه و أنا قبل ما استوعب الكلام الأول جاني كلام تامر !! قلت ليهو شنووو ؟؟
عصام وقف على حيلو و قال ليهو انت مجنون ولا شنو يا تامر !؟ البت دي انـا جاي و طالب يدها ، قال ليهو معليييش يا عم بـس أنا طالبها قبليك و حاجزها من زمان و مكلم أبوها قبل يومين و لو ما مصدق اتصل و اسألو ، عمتو اسمها علياء وقفت على حيلها و قالت ليهو عيب منك يا تامر !! دي عايزها عمك ، عمتو التانيه اسمها نوال قالت ليهو خلينا أول شي نعرس لـ عصام دا و لمن يجي دورك أنا بنفسي بفتش ليك عروس ....وقفت على حيلي و قلت ليهم على كيفكم هو ؟؟....شايفني لعبه قدامكم ؟؟ عصام شنو الجاي يتقدم لي !!؟ ياخ دا قدر أبوي ، أمـي قالت لـ تامر انت كنت قاصد مها ولا لميس ؟؟
قال ليها مها ، أمي عاينت لـ لميس و سكتت ، فهمت وقتها إنو تامر مكلمهم من بدري و أمـي دي يا فهمت غلط و كانت قايله إنو تامر عايز لميس يا هي عارفه هو قال عايز منو بس عايزا بأي طريقه تشربكو في لـميس ....اتزهجت فيهم و قلت ليهم ما على كيفكم ، خلااااص خليتو مشاغلكم كلها و قبلتوا علي أنا ؟؟ مالكم و مالي ، أعرس ولا اقعد ساي ما حاجه تخصكم !! عملت ليكم شنو أنا لمن فكرتو تعرسوا لـي الراجل الكبير و المعرس دا ؟!!... طبعاً قلتها بقرف كدا و أنا بعاين ليهو جوه عيونو ، قلت ليهو و انت جايب ثقة إني ممكن أوافق عليك دي من وين فهمني ؟؟! أختو قالت لي يا بت إحترمي نفسك ، قلت ليها الحمدلله محترمه نفسي ، الإحترام دا مفروض يتعلمو الشايب دا ! عليك الله بدل ما تقعد تباري بنات عمرك بساوي عمرهم مرتين أمشي عرس القدرك ، خالتي قالت لي بنهره عيب يا مها !!
قلت ليها العيب في أمخاخكم المعفنه دي !! مخلين بنات أهلكم و معارفكم كلهم و جاين عشان تعرسوا لـي الشايب دا !؟؟
أختو نوال ، قالت لي والله لو علينا ولا بنتلفت عليك ولا بنفكر فيك و نديك لـ واحد من أولادنا بس نسوي شنو إذا عصـام قـال ما عايز غيرك ! قلت ليها و عصام بتاعكم دا انـا ما عايزاهو و عليكم الله ما تقعدوا تنقوا كتير في الموضوع دا لأنو انتهى و انت ....رفعت أصبعي و وجهتو على عصام و قلت ليهو أحـسن تحترم نفسك عشان المستور ما ينـكشف ... طبعاً هنا بلع ريقو و نطط لـي عيونو ، قلت كلامي دا و طلعت من المظله و هم جوطتهم قامت و عصام اشتبك مع تامر ، بقى يقول ليهو أنا عمك ولا عدوك يا حيوان و و و .....الخ
دخلت الأوضه الفي ركن البيت و قفلت الباب علي ، بقيت أمشي و أجي في الغرفه و أنا الدم بغلي جوه شراييني !! رغم كل شي إلا إني ما إتوقعت حاجه زي دي من أمـي !! يمكن ما كنت حـ أزعل قدر دا لو عرفت إنها عايزا تعرس لي و تخارجني بس كونها تجيب لي راجل أكبر مني بأكتر من 20 سنه دا ما ليهو أي مبرر غير انها بتحقد علي و ما بتتمنى لـي الخير ، يعني ليه تختار تامر لـ لميس و أنا تختار لي الراجل المقرف دا !! أصلاً هي مالها و مالي من متين بتدخل فيني و بتهمها مصلحتي !💔
