بدايـة "من جد وجد ومن زرع حصد " و نحنا حالياً بنقطف ثمار عملنا و صبرنا و تفانينا ، مبسوطه جداً إنو شركتنا نافست شركات كتيره و بحمد الله نلنا عدة جوائز منها جائزتي أفضل شركـه تكنولوجيه على مستوى السودان و على مستوى إفريقيا ، حقيقة تميزنا ما كان بإجتهادنا و إصرارنا فقط ، كان بتكاتفنا ، و إيمانا بأنفسنا و إخلاصنا في العمل و الأهم بمحبتنا لشركتنا و سعينا لإعلاء شأنها ، قبل فتره الشركه كانت مارهـ بفتره عصيبه متأكده انها أثرت علينا كلنا بس انا كنت واثقه إنو شركتنا حـ ترجع أقوى من أول ، دائماً لمن يشتد علي التعب و الضغط بواسي نفسي بـ جملة إنو ربنا ما بحملنا فوق طاقتنا و لو وضعنا في طريق مليان مصاعب و مفروش أشواك يا سهل علينا الطريق يا أدانا قدرهـ هايله عشان نستحمل بيها مشتقة الرحله دي ، حقيقة يعني طريق النجاح صعب و عايز عزيمه و إصرار بس لذة الوصول حـ تنسيك مشقة الطريق كلو....
في الختام حابه أشكر إدارة الشركه لأنها وضعت كل ثقتها فيني و لأنها أتاحت لي فرصة قدرت من خلالها أبوح بأفكاري و أطبقها و شكراً لـ منحي منصب مديرة قسم الـ information system و ان شاء الله حأكون قدر الثقه دي ، ما أنسى كمان أوجه شكر لـ موظفين الشركه من أصغر عامل لـ أكبر عامل ، شكراً لأنكم كنتوا جزو من أسرتنا الجميله دي ، شكراً على تفانيكم في العمل ، أنا متأكده إنو لو سرنا على نفس الوتيره دي حنكون موعودين بنجاحات مكلله 💜ّ....
خلصت كلامـي و نزلت من المنصه وسط أصوات التصفيق العاليه ، طبعاً قصي كان واقف جنب المنصه و بصور فيني ، لمن وصلتو قال لي أنـا فخور بيك شديـد ، ضحكت و قلت ليهو أنا كمان فخورهـ بيك يا حضرة المدير ، المهم مشينا و قعدنا مكانا ، الخطاب البعدو كان لـ مستر جعفر سليمان ، يلي هو مالك الشركه و أبو قصي و كمان ....نسيبي 🌚
طبعاً قعد يمدحني و شيد بـ دوري في الوصلت ليهو الشركه ، و قال إنو فخور بينا كلنا و مبسوط إنو ولدو قصي كان عند حسن الظن و إنو قدر يدير الشركه خير إداره في غيابو ، و هو بتكلم قصي كان ماسك يدي و هو مبتسم و عيونو مليانه فرح ، المهم بعد ما خـلص الإحتفال كلنا طلعنا من القاعـه ، الساعه كانت 5 ، قلت لـ قصي يلا نمشي بعد دا ، قال لي عندي شغل مهم لازم أخلصو ، قلت ليهو طيب حـ انتظرك ، قال لي ما تعبانه ؟؟ قلت ليهو حـ ارتاح في مكتبك ، المهم مشيت معاهو مكتبو ، قال لي تاكلي و تشربي شنو ؟؟ قلت ليهو ما نفسي في شي غير النوم ، قلعت الهيلز و شلت الطرحه عن راسي ، قلت ليهو كان يوم طويل و متعب بس ممتع قال لي فعلاً ، مددت رجليني و غمضت عيوني ، فتحتهم لمن حسيت بقصي ضاغط على رجليني ، قال لي أكيد تعبوا من الوقوف ، قلت ليهو بالإضافه للهيلز الكنت لابساهو ، بقى يعصر لي رجليني و أنا بس بعاين ليهو مبتسمه ، فتحت تلفوني و بقيت أصور فيهو ، لمن انتبه خطفو مني و قال لي عارفك عايزا تمسكيها ذله لي ، قلت ليهو أبداً والله يا قصي 😂😂
رجع لي التلفون و قال لي ما مشكله ، أصلاً أنا ما شايفها إهانه أو مذله و دي ما حاجه بتنقص من رجولتي ، بكل بساطه مرتي رجولها واجعاها و أنا بحاول اخفف عنها ، قلت ليهو حبييبي والله ، قال لي تعالي نتصور مع بعض ، جا قعد جنبي و رفع التلفون و صورنا و هو ببوسني على خدي ، فجأه تلفونو رن ، قام و مشى رد عليهو ، بقى يتكلم و هو واقف على النافذه الزجاجيه و مدخل يدو جوه جيبو و مديني ضهرو ، كنت بعاين ليهو بكل الحب الفي الدنيا ، قمت من مكاني و مشيت وقفت قدامو ، إتلفت مني للجهه التانيه و واصل كلامو برضو إتلفت و وقفت قدامو و بقيت أعمل ليهو حركات و هو بتكلم بالتلفون ، زح من جنبي ، تاااني لحقتو و علقت يديني على رقبتو و بقيت اتهابل ليهو و هو طبعاً اتلخبط ، نزل يديني من رقبتو و قال لي بصوت واطي بتعملي شنو انتِ !! ما اشتغلت بيهو تاني علقت يديني على رقبتو و بقيت أقول ليهو قصييييي ، حبيييبي ، خت يدو على سماعة التلفون و قال لي ما معقوله معاك يااااخ !!.... قعدت اضحك و استمريت في البعمل فيهو لمن هو زهج مني ، لمن خلاص حسيتو حـ ينهي المكالمه نزلت يديني و كنت حـ ابعد عنو بس هو مسكني و شداني عليهو ، قفل التلفون و قال لي البادي أظلم و بقى يقرب مني و على وشو إبتسامه خبيثه ، قلت ليهو والله العظيم يا قصي كنت بهظر معاك ، قال لي أنا ما بعرف الهظار و لازم أتم البديتيهو ، فجأه كدا سمعنا صوت الباب ، قال اففف ياخ !! طوالي اتفكيت منو ، انتظرني ألبس طرحتي و أرتب نفسي و بعدها قال اتفضل ، جات السكرتيره داخله و أدتو ملفات و قالت ليهو ديل من مستر عزام ، قال ليها تمام ، أول ما إتحركت كدا طوالي مشيت وراها ، قصي قال لي تعالي هنا ماشه وين و جا علي و هو بضحك ولا كذبت استعجلت و سبقت السكرتيره عديل و طلعت برا مكتبو و قلت ليهو بنتظرك تحت ، طبعاً السكرتيره قعدت تضحك علينا ، قصي وقف جنب الباب و قال لي أحسن ذاتو لأنك حـ تشغليني عن شغلي ، قلت ليهو الكديسه لما تقدر تصل اللبن بتقول عليهو عفن ، المهم لفيت في الشركه و لمن وصلت الإنتظار لقيت ناس داليا و ندى و كانوا طالعين ، قالوا لي يا زوووجة المدير ، مشتاقين والله ، ضحكت و قلت ليهم الشركه كلها بقت بـ تناديني بـ زوجة ، ندى قالت لي اقسم بالله الإتنين حلوين حلااااه و منورين الشركه ، المهم قعدنا على جنب كدا و بقينا نتونس ، جانا شادي و قال اووو زوجة المدير ، قلت ليهم يخوااانا !!😂 سلم علي و قعد يتونس معانا ، بعدها جا سمير قال لي سلام و إتلفت على شادي و قال ليهو طالع ولا لا !؟شادي قال ليهو أيوه طالع ، ناس داليا قالوا ليهم خلاص وصلونا معاكم ، المهم ودعوني و مشوا ، طبعاً سمير لحد الآن ماخد موقف مني مع إنو مر على حكايتو دي 3 سنوات و زواجنا أنا و قصي مزعلو زيادهـ ، طبعاً قصي مانعني اتكلم معاهو أو اقعد معاهو في نفس الجلسه ، متأكدة إنو لو كان شافو قبل شويه معانا كان عمل لي قصه ، طبعاً سمير دا نفسو الولد الكان اتصدمت بيهو لمن كنت طالعه من الكافتيريا مع طيف و اتزهجت فيهو ، يومها كان لابس كمامه و أصلا ما ركزت فيهو عشان كدا ما عرفتو و ما فهمت قصدو لمن كان بلمح لي ، و لمن فتر من التلميح جا و قال لي أنا حبيتك من أول يوم شفتك فيهو لمن ضربنا في بعض في مدخل الكافتيريا ، بعدها اتذكرتو......
المهم طلعت تلفوني و قعدت اتكلم مع طيف مكالمة فيديو ، طبعاً ولدت و جابت ولد عمرو 2 ، سمتو عمر و حالياً حامل في التالت ، قالت لي عمر دا معذبني شديد ، مشاغب شغب ما عادي ، ضحكت و قلت ليها واااحد و بهدلك كدا لمن يبقوا اتنين حـ يعملوا فيك شنو ؟😂 قالت لي بخليهم لأبوهم و برجع بيتنا ، مالي و مال الهم ، ياخ اشتقت لأيام كنت free و أميرة البيت و أمي و أخواني يدلعوا فيني ساي ، هسي زمن عشان اسرح فيهو شعري ما لاقياهو ، ضحكت و قلت ليها ما للدرجه دي ، قالت لي والله جد ، بكرا لمن تجيبي بيبي حـ تعرفي معاناتي و بالجد حـ تحسي الوقت ضيق بسبب مسؤولية البيت و الشفع ، قالت لي ياداب انتبهت انك في الشركه ، قلت ليها سلامة نظرك ، اتخيلي قاااعده في الريسيبشن من قبيل و منتظره أخوك الثقيل دا ! قالت لي عاااادي هو انتظرك سنتين غالبك تنتظريهو دقايق ! قلت ليها اوووبس نسيت انك أختو ، قعدت تضحك المهم اتكلمنا مسااافه بعدها قفلنا من بعض....
اتصلت على قصي ، لمن فتح الخط قلت ليهو بصوت نعاس قصييي ، قال لي عيوني ، قلت ليهو لسه ؟؟ قال لي دقايق بس ، قلت ليهو أنا عايزا أنوم ، قال لي تعالي نومي في مكتبي ، قلت ليهو ابييييت عندي مكتب و في استراحه بقدر أنوم فيهم ، قال لي معقوله تنومي بعيد عن راجلك ؟؟ قلت ليهو ايوه معقوله لأنو راجلي مشغول و ما مهتم بي ، قال لي انتِ عارفه كويس إني ما بهتم بشي أكتر منك ، انتِ أولى أولوياتي و صدقيني أنا بنشغل عشان أفضى ليك ، عندي شوية ملفات عايز انتهي من موضوعهم عشاااان أفضى ليك 😈 قالها بخبث كدا ، بلعت ريقي و طوالي قفلت الخط ....
طلعت دفتري و قعدت أقرا في الكتبتو من اليوم القررت فيهو اقول لأهلي إني عايزا اسافر خارج الخرطوم :
تاني قلت لأهلي إني عايزا اسافر ، أمي قالت لي شنووو شنووو ؟؟ عايزا تمشي وين ان شاء الله ! قلت ليها أيام مكان المهم عايزا أطلع من الخرطوم دي ، أبوي قال لي عايزا تسافري لـ شنو و تخلي شغلك !!؟ مالك انتِ الحاصل عليك شنو !... طبعاً دي كانت أول مرهـ أبوي يسألني الحاصل عليك شنو ، قلت ليهو زهج بس و عايزا أغير جو ، عبد الله قال لي لو مسافره عشان تتهربي من موضوع الزواج فـ اتطمني لأنو ماف زول حـ يغصبك على حاجه ، قلت ليهو لا لا ما كدا بس عايزا اسافر ، أسيل قالت لي انتظريني امتحن عشان نسافر سوا ، عبدالله حمر ليها و قال ليها همله هي !!... طبعاً أصريت شديد على موضوع السفر دا و بقيت كل يوم انقنق ليهم و احسسهم إني ما مرتاحه بالقعاد هنا ، في الآخر أبوي وافق و قال لي خلاص أمشي لـ حبوبتك في البلد ، المهم جهزت بديت أجهز نفسي للسفر ، كنت متوقعه إنو قصي يتصل أو يرسل لي في محاولة منو عشان يمنعني بس من يوم وصلني و وريتو إني مسافره تاني ما سأل عني ، قلت كدا أحسن ماف داعي نعشم بعض أكتر ، قبل يومين من سفر أمي قالت لي ما تضايقي مني بس لو فكرتي في الموضوع تاني المشكله وين !! لأنو رشيده دي لسه باقيه عليك ، قلت ليها اتصلي لي عليها ، لمن اتصلت عليها ، أول شي سلمت عليها و سألتها عن حالها ، نبرتها كانت نبرة زول زعلان ، قلت ليها انتِ في مقام أمي والله و زعلك ما بهون علي بس في حاجات بتكون خارجه عن إرادتنا ، الواحد ما بقدر يكون أناني لدرجة إنو يخرب بيت زول و يحرض راجل عشان يطلق مرتو ! قصي موقفو موقف بطولي و سليم ، ما تنسي يا خالتو إنو أخو شجن متزوج بتك و قصي مراعي للحته دي و عامل حساب و دي حاجه كويسه شديد منو ، قالت لي أخوها على العين و الراس و أنا بحترمو شديد و عاااداهو ولدي بس دا ما معناهو إنو نستحمل أختو ، ماف داعي للخبطة الكيمان و بعدين هم عارفين بتهم كويس و عارفين إنها طالبه الطلاق ، والله العظيم لو حسيت سااااي إنو طلاق شجن ممكن يأثر على زواج بتي من دون تردد حأقول لـ منذر يسلمني ورقتها ، لأنو حيكون أثبت إنو ما شادي حيلو و ما راااجل و ما بستحق بتي ، قلت ليها والله يا خالتو الموضوع دا خلاص اتقفل و أنا بعد يومين مسافره ان شاء الله ، سكتت ما ردت علي ، أديت أمي التلفون و مشيت قعدت في المظله مع أسيل فجأه كدا سمعنا صوت الباب ، أمي كانت جايه علينا فـ مشت فتحتو ، من الصوت عرفت إنو ديل حبوبه آمنه و خالتو رقيه و وسام ! طبعاً استغربت جيتهم و قلت في شنو تاني ، أمي فضلتهم و جونا داخلين سلموا علينا ، لميس قامت و ضيفتهم ، بقى في توتر حاصل و كلنا بنعاين لبعض ، حبوبه آمنه قالت تتكلمي يا رقيه ولا اتكلم أنا ؟؟
خالتو رقيه قالت بتردد الدنيا زايله و العمر محدوده و الحياة دي أصلاً قصيره و الواحد لو قال يقضيها زعل و خصومات عمرو بروح ساي والله ، أمي قالت ليها فعلاً ، الناس لو عامله حساب للآخره ما بتسوي جنس عمايلها دي في الدنيا 😊😏
وسام قالت ليها خالتو رقيه جايه تعتذر ، حبوبه آمنه قالت لينا والله كلكن بناتي و نحنا قبل ما يكون بيناتنا نسب كنا جيران و حبايب ، بيتكم بيتنا و بيتنا بيتكم و يوم واحد ما وقفنا عن بعض ، أمي قالت ليها براااكم خربتو وش و نسيتو العشره و الملح البيناتنا ، خالتو رقيه كانت قاعده جنبي ، ختت يدها على كتفي و قالت لي أعفي لي يا بتي ، ما كنت عادله و تصرفي كان أناني شديد و متأكده إنو ما برضي تامر ، والله كان معمي علي و ما شايفه شي غير انك غلطانه ، رغم انك اتنازلتي عن حقك و وقفتي حياتك و رفضتي تعرسي بس مع ذلك كنت شايفاك منافقه و كنت متأكده إنو بكرا حـ نسمع انك عرستي بس ما حصل و دا أثبت لي صدقك و حسسني بالذنب ، قعد مع نفسي و راجعت حساباتي و فهمت إنو وجعنا واحد و إنو ماف زول غيري و غيرك بفكر في تامر و لسه موجوع عليهو ، انتِ لسه صغيره و ما صح تقضي عمرك براك و تحرمي نفسك من الزواج و الذريه بسببي ، والله ما برضى حاجه زي دي لـ بتي فـ أعفي لي ... قالت كدا و قعدت تبكي ، وسام جات ضمتها و قالت ليها خلاااص يا خالتو ما تبكي ، حبوبه آمنه قالت ليها البكى دا دليل على لين القلب و على إنو النيه بقت صافيه ، كلنا بنغلط و بنظلم بس المحظوظ فينا هو البراجع حساباتو و بعرف غلطو و بعترف بيهو و بحاول يصلحو و دا العملتو رقيه ، ان شاء الله تقبلوا اعتذارها و اعتذارنا كلنا و ربنا يصفي القلوب و يألف بيناتها.... خالتو رقيه و حبوبه آمنه قالوا كلام كتير و إعتذرو قدرتهم ، قلت ليهم حالياً أنا ما زعلانه والله و إعتذاركم مقبول ، أمي قالت ليهم بناتي ما بحقدوا على زول و قلوبهم زي اللبن ، ما كل الناس عندها نعمة التسامح و الصفح و ما كل الناس بتعفي بالساهل ، بتي نست عمايلكم كلها و سامحتكم عليها لأنها ما بتشيل في قلبها و ما عايزا تعيش عمرها كلو و هي حاقده أو زعلانه من زول ، و بما إنها سامحتكم فـ خلاص كلنا حـ نسامح و عفا الله عما سلف.... قعدتهم معانا طالعت ، لمن قالوا ماشين خالتو رقيه قالت لي ما عايزا أي كرت عرس يصلني ، قلت ليها أساساً ماف أي عرس ، قالت لي منو القال ؟؟ ما عايزا كرت عرس لأني في مقام أم العروس و من أهل البيت ولا شنو يا ناهد !؟ أمي قالت ليها بعد فوات الأوان ، قالت ليها ما مشكله بجي غيرو و لو ما جا براااي بجيب ليها عريس ،عاد هي منو الما بتمناها !؟
في سري قلت ليها الكلام دا ليه ما قلتيهو من زمان و محبتك دي كانت وين ! تاني قلت أنسي يا مها و ما تشغلي بالك بيهم تاني داعمك سامحتيهم ، طبعاً أبوي و عبدالله لمن جوا حكينا ليهم ، أبوي قال لي كدا أحسن و على كل الأحوال لو اعتذرت أول لا بتنا ما شغاله بيهم و لا حاقده عليهم ....
في اليوم البعدو مشيت لـ دكتوره رانيا في عيادتها و في نهاية الجلسه كلمتها إني مسافره بكرا ، قالت لي لو مسافره عشان تغيري جو سافري عادي أم لو هربانه بنصح ما تمشي ، خليك قاااعده و واجهي مخاوفك و ما تخلي الشركه عشان قصي فيها ، لو ما واجهتي الحـاجات البتأذيك و بتخوفك ما حـ تقدري تتجاوزيها و بما انك قلتي الموضوع دا خلاص اتقفل ليه هاربه ؟؟ ما واثقه في نفسك ولا شنو ؟؟
قلت ليها لا ما كدا ، قالت لي اها شنو ؟ انتِ جبانه يا مها و ما قادره تتحكمي في نفسك و ما قادره تتحملي نتيجة قرارك 😊
طبعاً كلامها وجعني ، طويل الليل بقيت أفكر فيهو و سألت نفسي و بعد ما اسافر مفروض اعمل شنو تاني و ابدا شغل وين و كيف !؟ و أساساً أنا مسافره ليه مدام قلت الموضوع اتقفل و عامله فيها ما فارق معاي ؟؟
بعد تفكير عميق قلت الراحه مرات في الجرحه و الحكمه إنو الكي علاج ، و فعلاً الحاار بداوي الحار ، بين ليله و ضحاها خليت السفر و قررت أواصل شغلي حتى لو حأشوف قصي كل يوم ، تاني يوم طوالي مشيت الشركه و أول شي مشيت لـ ناس الـ HR ، اعتذرت منهم و قلت ليهم جاهزه عشان اسمع بهدلتكم ، قالوا لي نحنا فترنا منك والله ، وحده قالت دا عيب الناس البجوا بواسطه ، هسي طرد ما قادرين نطردها ، طبعاً فهمت إنو قصي موصي علي ، وحده قالت لي ليها ما على كيفها والله و تنطرد زيها و زي باقي الموظفين .... وقفت و سمعت بهدلتهم و جوطتهم للنهايه بعدها طلعت و مشيت لـ قصي في مكتبو و من دون مقدمات قلت ليهو للمره الآخيره ممكن تمنعهم ما يطردوني ؟؟ عارفه نفسي كترتها بس من اليوم حـ ألتزم ، ممكن تشفع لي المرهـ دي برضو ؟؟
هز لي راسو بس ، طلعت من مكتبو و مشيت واصلت شغلي ،
بعدها عدت الأيام و قصي كان ماخد موقف و بختصرني كتير و أنا كنت عكسو ، بسلم و بصبح عليهو عادي و لو احتجت استفسر عن حاجه بمشي ليهو من دون تردد ، غيتو اجتهدت عشان أحسسو إنو ما فارق معاي و إني اتجاوزتو بس من جواي كنت عكس كدا ، والله لو شفتو واقف مع موظفه زعل بس بكتم جواي ، بعدها جاني يوم و قال لي أنا طلقت شجن ، قلت ليهو صدقني يا قصي طلاقها ما فارق معاي و الموضوع لا بخصني لا بعنيني ، الإتقفل مفروض ما ينفتح تاني و أنا والله العرس دا ذاااتو خليتو ، عندي أهداف عايزا أحققها عشان كدا خليني في حالي و ربنا يرزقك بـ بت الحلال ...
كلامي دا زعلو شديد مني و خلاهو شبه يفقد الأمل ، يعني كان بتعامل معاي برسميه و بعد كلامي دا بقى ما بتعامل معاي خالص و لو سلمت عليهو ما برد لي السلام ، في الفتره ديك علاقتنا باظت على الآخر و قصي غيابو كتر عن الشركه و بعد شهر تاني بقى ما بجي عديل ، كنت متواصله على طول مع طيف بعد ما رجعت السودان و هي حامل ، كنت بتمنى انها تجيب لي سيرتو بس ما كانت بتجيبها حتى سيرة العرس بقت ما قاعده تقولها لي ، يوم قالت لي انها جات زياره لناس أمها ، قلت ليها خلاص حـ أجيكم ، مشيت ليهم طوالي ، عشان أشوفها و عشان أعرف أخبار قصي ، ايوه انا رفضتو لكن ما قادره امنع نفسي من القلق عليهو ، طبعاً خالتو رشيده لسه كانت زعلانه مني عشان كدا اتعاملت معاي برسميه لمن زرتهم ، طيف قالت لي أنا ما قاعده افتح ليك الموضوع عشان تزعلي مشكلتك كانت شجن و اتطلقت و أنا و منذر علاقتنا زي السمنه على العسل و طلاق أختو ما أثر على علاقتنا فـ شنو المانعك تفكري في قصي تاني ؟؟ قلت ليها انتوا مفتكرين إني منتظراهو يطلق مرتو عشان أعرسو ؟ يخوانا الموضوع دا أنسوهو و شيلو الفكره من بالكم ، فجأه كدا قصي ظهر قدامي و قال لـ طيف عندي قميص هنا شوفيهو لي ، كان جنبها شالتو و أدتو ليهو ، طبعاً لا سلم علي لا عاين لي ، لاحظت انو وشو شاحب و عيونو واقعه ، طيف قالت ليهو ما بتسلم مالك ، ما رد عليها طلع طوالي ، قالت لي ما تزعلي منو ، قلت ليها عاذراهو ، قالت لي ليهو فتره عيان و حالف ما يمشي للدكتور .... المهم إتونست معاها بعدها استأذنت عشان أمشي ، كنت بتلفت عشان ألمحو ، طيف قالت لي بكون برا الشارع ، قلت ليها منوو ؟ قالت لي البتفتشي عليهو ، المهم ودعت ناس خالتو رشيدهـ و طلعت ، لقيتو جنب الباب قاعد تحت الشجره ، إتحركت و تاني جيتو راجعه و قلت ليهو ما ماشي الدكتور ليه ؟؟
ما رد علي و أساساً ما عاين لي ، جيتو قريب و ربعت ليهو يديني و قلت ليهو قصي أنا بتكلم معاك !! قال لي انتِ منو ؟ قلت ليهو أمشي الدكتور ، ما شايف نفسك بقيت عامل كيف !! المرض ظاهر عليك ، قال لي حاجه ما بتخصك ... زعلت منو شديد و قلت ليهو على راحتك .... بعدها مروا أسبوعين و هو برضو ما جا الشركه ، بقيت أحس بفراغ و قلبي كان بوجعني شديد بس مافي اليد حيله و خلاص مفروض اتحمل نتيجة قراري ، بعدها بـ شهرين هو نزل الشغل ، ما حـ أقدر أوصف ليكم إحساسي لمن شفتو داخل ، حسيت روحي إرتدت لي ، كنت مشتاقه ليهو شوق ما عادي ، لو كان عندي حق عليهو كنت مشيت و ضميتو ، ما قدرت أخفي لهفتي عليهو و فرحتي بشوفتو ، كنت منتظره متين الموظفين ينهوا سلامهم و يخلوهو لي براي عشان أعرف أسلم عليهو و اتكلم معاهو ، أول ما الموظفين مشوا هو رغم إنو شافني بس ما أبدا ردة فعل و مشى طوالي ، حسيت قلبي إنكسر ، زي إحساس انك تقوم جاري على زول من شوقك ليهو و أول ما تصلو يضربك كف !!
بعدها هو بقي يجي الشركه على طول بس تعاملوا معاي زي ما هو و بنفس الجفا ، كنت بتألم والله بس شوفتو كويس و قدام عيوني كانت بتخفف عني ، طيف نزلت الفتره شركه و حاولت تصلح بيناتنا بس من دون فايده و هو عديل قال ليها أنا قنعت منها و ما عندي رغبه في الزواج منها ، سمعتو صدفه و كلامو كسر قلبي و خلى الفجوه البيناتنا تكبر ، كلامو كتل الصوت الجواي الكان بقول لي أديهو فرصه ، كلامو ولع نار البين جواي و خلاني أحس نفسي بعيده عنو ألف ميل و نحنا في نفس الشركه ، حقيقة ديك أكتر فتره كنت فيها ما طايقه نفسي و زهجانه على طول ، كنت مصندده و حاسم نفسي بس فجأه كدا حسيت إني ضعيفه قصاد حبي ليهو ، الزمن البقولو عليهو كفيل بإنو ينسيك و يدفن مشاعرك كان بزيد شوقي و كل يوم حبو بكبر جواي ، مرات كتيره لمن نتلاقى بنقيف نعاين لبعض من دون كلام و أول ما ننتبه على نفسنا بنمشي ، مشاعرنا كانت فاضحانا في الشركه كلنا بس كبريائنا وقف حاجز بيناتنا ، ايوه عارفه إنو قصي كان متمسك بي بس في الآخر رفع يدو و إستسلم ، مرات كتيره بضعف و بقول لو لسه هو كان مصر علي و بحاول معاي يمكن كنت وافقت عليهو ، بس اول ما عقلي يرجع لي بسحب كلامي و بقول ما مفروض أنسى إنو قصي بحب مرتو و طلقها بعد سلة روح ، أكيد هي نقت في راسو و عملت ليهو مشاكل فـ اضطر يطلقها ، من ناحيه تانيه ما قصرت في شغلي ، و الحلو إني ما معتمده على شغل الشركه و بس ، شغاله أون لاين ، بصمم مواقع و تطبيقات لمختلف المؤسسات و بفضل دا كلو خلال سنه بنينا بيتنا و اشترينا أثاث جديد ، أمي أكتر وحده كانت مبسوطه و فخوره بي و طبعاً عشان هي بتحب الفشخره شكل البيت و اثاثو الراقي خلاها كل يوم تعزم نسوان الحله عشان تتبوبر بيهم و تخليهم يشوفو البيت ، و دائماً بتشكرني و تمدحني قدامهم ، كانت بتقول ليهم أولادي ما شاء الله عليهم اتنين شغالين في شركه و وحده بتقرا طب و قربت تتخرج ، طبعاً أبوي كان متكيف شديد مني ، اتمنيت اقول ليهو لسه بتفضل عبدالله علي ولا لا بس تاني قلت ماف داعي ، طبعاً أمي و خالتو رشيدهـ كانوا متواصلين و بجوا لبعض و خالتو رشيدهـ وصت قصي إنو يشغل عبدالله في الشركه ، طبعاً هو كان شغال مع أبوي في الإجمالي حقو بس الشغل ما نفع معاهو ، قصي طوالي شغلو ، لمن مشيت عشان أشكرو قال لي ماف داعي للشكر لأني ما عملت كدا عشانك ، دا ولد صاحبة أمي و شغلتو عشان حاسي إنو زول تمام و يستاهل يكون موظف في الشركه 😊
طبعاً دا بقى شكل العلاقه بيناتنا ، دخلنا السنه التانيه و نحنا مخاصمين بعض بس ما كنا بنقدر نخفي غيرتنا ، ياخ أنا بقرب أطرشق لمن اشوفو بتكلم مع موظفه و هو عارفني طبعاً عشان كدا قصداً لمن يشوفني اقرب بت جنبو بقعد يتكلم معاها ، و أنا عشان عارفه عفاريت الدنيا بتنطط قدامو لمن يشوف سمير بتكلم معاي قاااصدهـ كنت بقيف مع سمير ، مع إنو كلامنا عادي بس قصي بكون بعيد و ما عارفنا بنقول في شنو ، كنت حريصه إنو ما اعشم سمير و عامله حسابي و في نفس الوقت مجتهده عشان قصي يفهم غلط و يحس إني بديت أميل لـ سمير ، مره حصل نقاش بين سمير و واحد من الموظفين و قصي لقى الشكله قدامو و مع إنو الإتنين غلطانين إلا إنو قصي شاكل سمير فقط ... حسيتو من زمان عايز ليهو فرصه عشان يتفشى فيهو ، حسيت بالذنب والله لأني عارفه ليه قصي عمل كدا ، بعد ما الناس مشت سمير كان لسه واقف في مكانو فـ مشيت واسيتو و اعتذرت منو ، قال لي أنا عارف ليه هو عمل كدا 😊 و نحنا واقفين قصي تاني جا راجع و شافنا مع بعض ... بعدها بقى صعب شديد معاي و واقف لي على الغلطه و دائماً بتزهج فيني لمن أجيب ليهو ملفات أو اناقشو في شغل ، يوم نسيت ملف ما جبتو ليهو فـ طوالي جاط فيني و شاكلني قدرتو ، بالجد المرهـ دي زعلت و طلعت من مكتبو و أنا بمسح في دموعي ، طلعت برا الشركه طوالي و قعدت أبكي هناك ، لمن حسيت بزول واقف جنبي رفعت راسي و لقيتو قصي ، كان مدخل يدينو جوه جيوبو و بعاين لي و ملامحو ملامح زول زهجان ، مسحت دموعي و وقفت على حيلي عشان أمشي ، قال لي انتِ الجبرتيني اتصرف معاك كدا ، قلت ليهو يا قصي أنا بس نسيت الملف و....ما قدرت أكمل كلامي ختيت يديني على وشي و قعدت أبكي تاني ، قال لي ما دا كلو بسببك انتِ ، حرقتي قلبي و أعصابي بتصرفاتك ! انتِ عارفاني ما بطيق الإسمو سمير دا فـ ليه بتتعاملي معاهو ؟؟
قلت ليهو و انت مالك ؟؟ مش نحنا خلاص طوينا صفحتنا و انت بنفسك قلت اني ما بهمك و ما عايزني ؟؟؟
قال لي كلامي وجعك و فرق معاك ؟؟ ياداب حسيتي بالوجع لمن أنا قلت كدا ؟؟
طيب ليه ما حسيتي بوجعي لمن اعترفت ليك و قابلت صد منك ! ليه ما حسيتي بي لمن اتقدمت ليك و اترفضت أكتر من مـره ، ليه ما حسيتي بوجعي لمن كنت بعيد عنك ، ليه ما حسيتي بي لمن طلقت مرتي و جيتك عشان نبدا صفحه جديده و خيبتي ظني !؟ ليه ما حسيتي بي و أنا بموت ألف موته لكن أشوفك مع سمير ! ليه ما حسيتي بشوقي و لهفتي عليك و أنا شايفك قدامي بس ما قادر أصل ليك ؟؟
كلامو بكاني زيـاده ، قلت ليهو قصي أنا ... قاطعني و قال لي عارفك عايزا تقولي دا موضوع و إتقفل بس ممكن نرجع نفتحو تاني ؟؟
شلت يديني عن وشي و نططت ليهو عيوني و أنا دموعي نازله زي المطر ، قال لي أنا ما متعود على الرفض ولا متعود أسعى و أجري ورا حاجه ولا متعود اتنازل أكتر من مـره ، بس إذا عشانك انتِ مستعد أحاول ألف مـره ، عارفه ليه ؟؟
لأني حاولت أنساك و اتجاوزك ، حاولت أشغل نفسي عنك ، حاولت أبهت صورتك في نظري بس في كل مره بفشل و بحس إني ما عايز شي غيرك ، بحاول اضبط نفسي قبل ما أدخل الشركه و بردد في جملة أنساها يا قصي و أنا داخل بس اول ما أشوفك بنسى أنا كنت بقول في شنو ، كل محاولاتي عشان اتجاهلك كانت بتقودني للتركيز عليك أكتر ، رغم إني بحاول أكون مصندد و بكون بقنع في نفسي انك بقيتي ما مهمه بالنسبه لي بس اول ما أشوفك مع سمير أو غيرو بس إنو ما من حق أي بشر يتكلم معاك أو يقيف جنبك غيري ، بحس انك ما مفروض تضحكي و تتعاملي مع أي زول غيري ، بحسك حاجه خاصه بي أنا ، أنا و بس 💜ّ
قلت ليهو قلبي كان بوجعني شديد في كل مره أشوفك مع غيري ، ظنيت إني خلاص خسرتك و إني جد جد بقيت عاديه في نظرك و ما بهمك ، قال لي حتى و انتِ عاديه ما بتكوني عاديه في نظري ، رغم نظراتك و تصرفاتك فاضحاك بس مع ذلك بتكابري و دا البضايقني منك و بخليني اتزهج فيك ، عارف نفسي بهمك و عارف انك بتجي بيتنا عشاني و مع ذلك بتكابري ! بتعذبي روحك و بتعذبيني معاك ، لمتين حنكون في الجحيم دا ؟؟
ما قدرت أتكلم كنت لسه ببكي و بطلع في قهر و زعل سنتين ، قال لي شفتي برااك بتكابري و بتمرمطي نفسك و بتمرمطيني معاك و في الآخر تقعدي تبكي و رغم انك السبب إلا إني ما بقدر أشوفك تبكي فـ بحس نفسي مخنوق و مكتف ما قادر أعمل شي !! قولي لي بس مفروض اعمل شنو أنا عشان أرضيك ؟؟ عايزا شنو انتِ عشان أنا خلاص نويت أعرس و حاسي إني حأعرس من طـرف بس بعد دا ما بقدر على الشحتفه دي 🙂
قلت ليهو كدي عرسها عشان أحرقكم انتوا الإتنين ، ضحك و قال لي أعرس منو طيب ؟؟
قلت ليهو ما عارفه ، أخد نفس و قال لي مهاوي أنا جادي ، قولي لي بس الحل شنو عشان نطلع من الدوامه دي !!؟ عشان كل واحد يشوف طريقو من دون زعل و عن قناعه ، قلت ليهو التخلي عندك ساهل ، قال لي ما ساهل لكن ما بقدر أغصبك على حاجه ، قلت ليهو و منو القال انك حـ تغصبني ، قال لي أصلاً ما بقدر ، المهم اختاري لي عروس ، أعرس منو لأني خلاص فاض بي ؟؟ قلت ليهو عرس البت الإنت عايزها 🙂 قال لي لكن هي ما عايزاني ، قلت ليهو احتمال غيرت رأيها ، ضحك شديد و قرب مني بس تاني رجع و قال لي ياريت لو لي حق عليك ، قلت ليهو لو جيت رجالك و سد مالك حيكون ليك حق ، طبعاً حسيتو حـ يطير من الفرح ، أنا ذاتي كنت مبسوطه و في نفس الوقت ملخبطه و ما عارفه كيف قلت ليهو كدا بس الأكيده إني ما قدرت أمنع نفسي و ما قدرت أكتم جواي أكتر ، كفايه ياخ سنتين بنعذب في روحنا على الفاضي ....
قصي ما صدق و طوالي في نفس اليوم كلم ناس بيتهم و اتصل على أبوي و كلمو و قالوا حـ يجونا بكرا ، طبعاً كان مستعجل شديد ، أبوي من شغلو اتصل على أمي و كلمها و أنا من جوه سامعاهم و خجلانه منهم ، طبعاً قفلت من أبوي كدا سامعاها بتتكلم مع خالتو رشيدهـ بعدها قعدت تزغرد و لميس و أسيل بسألوها في شنو ، لمن حكت ليهم قعدوا يزغردوا معاها ، عرفتهم هسي حـ يجوا ناطين لي ، طبعاً أسيل امتحنت و نجحت الحمدلله و حالياً في الجامعه و ولدت جابت بت سمتها يقين ، طبعاً أمها بقت تجيها مرات مرات بعد ما نجحت و ولدت بس باقي أهلها ما شغالين بيها كتير ، المهم جوني ناطين التلاته و هم شغالين لي يا غتيته ، يا كلبه ليه ما كلمتينا و و ..... الخ قعدوا قعدت أبرر ليهم ساي و قلت ليهم والله العظيم ما كنت عارفه انهم حـ يجوا بكرا لأنو قصي ما كلمني ، أسيل قالت لي شكلها علاقتكم ظبطت من زماااان و انتوا غانجين بيها في الشركه ، طبعاً لمن انتبهت لأمي ختت يدها على خشمها ، عاينت لأمي و قلت ليها أبداً والله 😭
ضحكت و قالت لي عارفه ، الله اعلم قصي أقنعك كيف بس الحمدلله ، أصلاً دا الكنا عايزنوا ، ربنا يتم ليكم على خير و يسعدكم و يهنيكم و يارب حياتك كلها تتملي سعاده و ربنا يرزقكم الذريه الصالحه و يبارك ليكم في الزواج دا ، ضمتني و هي لسه بتدعي لي ، عرفتها اتذكرت تجربة زواجي الأولى ، عيوني دموعو والله لمن اتذكرت تامر ، أسيل قالت ليها ليه تحضنيها براها ؟؟ قالت ليهم تعالوا انتوا كمان و حضنتنا التلاته
طبعاً خالتو رشيدهـ في نفس اليوم اتصلت علي و هي فرحانه و قالت لي والله قصي ولدي هدي و رضي و حـ يسعدك والله ، قلت ليها بإذن الله ، قالت والله حاولت أعرس ليهو و رشحت ليهو عروسات طول السنتين دي بس رفضهم كلهم لأنو كان لسه باقي عليك ، والله زعلت و اتحسرت عليهو و قلت بسببك ما حـ يعرس و انتِ ما حـ تقبلي بيهو ، المهم ربنا يسعدكم و يهنيكم ...
المهم فعلاً قصي جاب أهلو و جا ، أبوهو ذاتو جا معاهو و كمان محمد أخوها و اتنين من خيلانو و اعمامو و ناس امو و خالتو رانيا ، و حددو موعد العرس طوالي ، يلي كان في نهاية السنه التانيه ، ناس خالتو رقيه ما قصروا ، بالذات هي جات و وقفت على زواجي دا و تعبت زي أمي في التجهيزات ، صراحة ما إتوقعت منها تصرف زي دا ، بس كويس إنو دا حصل و أنا كنت عندي كلامي و رفضت نصيبي من الورثه رفض قاااطع و قلت لـ عمو عمران تاني ما تفتح معاي الموضوع دا ، المهم حسيت الزمن جرا بسرعه و كل تفاصيل و ترتيبات الزواج و حفلاتو حسيتها مرت بسرعه بس لسه متذكره كل تفصيله من يوم التعارف لحد لحظة الجرتق ، بعدها طوالي سافرنا و مشينا شهر العسل كان في جزر المالديف ، قعدنا هناك شهرين و جينا راجعين و كلهم قعدوا يشغلوها لينا عشان قعدنا شهرين 😂😂
_________________
و أنا بقرا في الكلام دا كنت بضحك ساي و نسيت أنا قاعده وين ، ما انتبهت على نفسي إلا جاني صوت قصي و هو بقول لي خلصتي ؟؟
إتلفت عليهو مخلوعه و قلت ليهو جيت متين ؟؟ قال لي من لحظة اتزهجت فيك و بسببي بكيت و طلعتي برا الشركه ، ضحكت و قلت ليهو قاعد تقرا معاي هنا من قبيل و أنا ما منتبه ؟! قال لي ايييوه ، قال لي رايك شنو أطبع ليك قصتك دي ؟؟ قلت ليهو كنت بفكر كدا ، قال لي حـ تغيري اسمها ؟؟ قلت ليهو لا ، شايفه اسم #أنين مناسب ليها ، قال لي طيب أنهيها هنا ، لأنو حياتنا الحـ نعيشها لقدام ما تستاهل ينقال عنها #أنين ، قلت ليهو فعلاً صح كلامك ، زواجنا هو نهاية لرواية أنين الفي الدفتر بس بدايه لـ حياتنا الحقيقيه ، قال لي تمام حـ اتابع ليك موضوع الطباعه دي 🥀
عاين لـ ساعة يدو و قال لي المغرب خلاص جا خلينا نصلي و نمشي ، قلت ليهو طيب و مشينا صلينا و طلعنا ، ركبنا و اتوجهنا على البيت ، طبعاً سكنا في أمدرمان ، في نفس بيت قصي القديم ، قصي ظبط البيت و بنى فيهو غرف فوق و عشان عارفني بحب الشجر زرعو فيهو كتير من يوم ما اتقدم لي جا و بدا يظبط في البيت ، طبعاً أنا الإقترحت عليهو إنو نسكن هنا ، حبيت ناس زحل و رحاب و العيشه وسطهم عشان كدا جيتهم راجعه 💜ّ
لمن جا زمن النوم ، أول ما رقدت و إتوسدت يد قصي حسيت نفسي حـ استفرغ ، طوالي جريت الحمام و استفرغت هناك ، قصي جا لاحقني و قال لي بكرا حـ نمشي الدكتور غصب عنك لأنو الحركه دي اتكررت أكتر من مرهـ ، غسلت وشي و ارتحت شويه بعدها قلت ليهو ماف داعي قال لي ما على كيفك ، مسكت يدو و طلعت بيهو من الحمام ، وقفت قصادو و علقت يديني على رقبتو و قلت ليهو امممم أنا شاكه إني حامل ، قال لي شنوووو !! قلت ليهو ناس زحل و حاجه الزهراء كمان قالوا لي كدا ، و قال واضح علي ، بقى مبلحق عيونو فيني ، ضحكت و قلت ليهو قول حاجه ياخ !! قال لي دقيقه خليني استوعب ، يعني أنا حـ أبقى أب !؟ هزيت ليهو راسي ، شالني و بقى لافي بي ، قلت ليهو قصي كفاااايه كفااايه ياخ ، نزلني و قال لي آسف آسف نسيت انك حامل ، طبعاً كان بتكلم بسرعه من شدة الفرحه و اللهفه ، كنت بضحك عليهو ساي ، قلت ليهو أنا نعسانه أرح ننوم ، أول ما إتحركت كدا لقيتو شايلني ، قلت ليهو الحامل بتقدر تمشي براها ، قال لي هوووس ، وداني الغرفه و رقدني ، قال لي ما جعانه ، حابه تاكلي شنو ، ثواني طيب قام و كان حـ يمشي مسكتو من يدو و قلت ليهو قصي تعال نوم ساااي ما جعانه أنا ، ايوه عارفاك فرحان بس ما لدرجة تأكلني غصب 😂
جا رقد جنبي و بقى كل ما اتحرك هو بقوم و بقول لي في شي واجعك ، بقول ليهو لا ، حسيتو الليل كلو براقب فيني ، اقسم بالله ضحكني ضحك...
تاني يوم كان يوم جمعه و مفروض الجمعه دي نمشي بيت نسابتي و على سيرتهم في موقف حصل لي مع خالتو رشيدهـ ، طبعاً أنا كنت عارفه إنو هي كانت عايزا شجن لـ قصي زي ما هو عايزها و كانت بتريدها شديد و العرس دا تم بموافقتها بس بعد العرس حصل بيناتهم خلافات و شجن كانت بترد ليها الكلمه بالكلمه و مع ذلك قصي ما رضى يطلقها و دا القوم النار جواها و خلاها تنق فوق راسو عشان يطلق مرتو ، يلا لمن أنا عرست قصي بديت أحس انها بتزعل أو بتغير لمن قصي يشتري لي حاجه أو يتغزل فيني قدامهم ، أنا منعت قصي من الحاجه دي و قلت ليهو في بيتنا انت حر بس قدام أهلنا ما تقول لي حاجه و خلينا عاديين فـ هي اتغيرت علي و أصلاً دا الكنت متوقعاهو لأني فهمت إنو مشاكل النسيبه دي حاجه تكاد تكون طبيعيه و أم بتغير من مرة ولدها لأنها بتحس انو مقيمها اكتر منها و هي ولدتو و ربتو و كبرتو فـ بجيها إحساس إنو لازم يكون ليها النصيب الأعظم في كل شي بقدمو ولدها ، بجيها إحساس إنو لازم تكون فايته زوجة ولدها بدرجة و إنو ما مفروض ولدها يساويها بـ مرتو ، أنا والله لو ما تجربتي المريت بيها و لو ما كلام دكتوره رانيا الإجابي معاي كنت أخدت موقف و قاطعتها زي ما كنت بعمل مع ناس خالتو رقيه ، بس زي ما أمي قالت لي اتعلمي من تجربتك الأولى و المره دي أمسكي بيتك و اتصرفي بحكمه ، دكتوره رانيا قالت لي ما أكذب عليك ، رشيده بتحب انها تكون مسيطره و بتحب إنو تكون مفضله عند أولادها عشان كدا عادي مرات تزعل منك لمن تحس إنو قصي بفضلك عليها ، طبعاً أنا حكيت لدكتوره رانيا بتصرفات أختها كـ فضفضه ساي لأني عارفاها ما حـ تحكي ليها ، و فهمت إنو خالتو رشيدهـ كانت مصره علي عشان تتخلص من شجن و عشان شايفه قصي مايل علي فـ اتصدرت المشهد و قررت تعرسني ليهو عشان تحسسو إنو عملت ليهو الحاجه العايزها و عشان أنا ما أكون ليها زي شجن و افضل تحت جناحها عمري كلو ، ما جبت الكلام دا من عندي سمعتها يوم قالت كدا و قالت إنها خايفاني امنع قصي منهم و أبقى زي شجن و خوفها دا بدأ من لمن قصي رفض يسكن معاهم في البيت و قال ليهم حـ نسكن في بيتي تبع أمدرمان ، طبعاً أنا في البدايه طنشت الموضوع بس لمن شفت زعلها كتير و كل مره متغيره علي أكتر ، قررت أمشي و اواجها ، أنا ما عايزا أي مشاكل تاني و لأني وصلت لقناعة إنو الحاجه الوحيده البتستاهل الواحد يحارب عشانها هي راحة البال ، من دون شعور الراحه مستحيل الواحد يتهنى بأي حاجه ، طول ما بالك مشغول و ما مرتاح و حياتك مليانه مشاكل لا قروش لا سيارات لا نجاحات حـ تريحك ، عشان كدا أنا ساعيه أخلي حياتي خاليه من المشاكل و سوء التفاهم ، ما عايزا شي غير أكون مبسوطه مع قصي و كل الحولينا مبسوطين بينا و بتمنوا لينا الخير ، المهم مشيت ليها و طوالي دخلت ليها في الموضوع و قلت ليها عارفاك متغيره علي لأنك كدا و كدا و كدا .... رصيت ليها الكلام كلو و قلت ليها في الأول و الآخر انتِ أمو و ماف زول حـ ياخد مكانك يا عمتي و صدقيني أنا مستحيل أمنعو منك ، انتوا و اهلي واااحد والله و ماف شي يخليني أحقد عليكم و احوال أمنع قصي منكم !! سكنا بعيد عشان كدا أفضل والله و ولدك لو حابه ممكن كل يوم يجيك ، ما اتكلمت معاي ، قلت ليها للسبب دا انا من البدايه ما وافقت على قصي أو غيرو ، مشاكل النسابه بخلوني أفكر ألف مره قبل ما اقبل بزول و انتِ عشان كنتِ معاي و مع أسرتي طيبه و ما شفنا منك شينه كلنا ارتحنا ليك و أي زول كان بقول ليك بختك لأنو نسيبتك بتحبك ! أنا ذاتي دا الطمني و خلاني أوافق على قصي و افتكرت انك حـ تعتبريني بتك بس ما حصل ، مع ذلك والله العظيم يا خالتو رشيدهـ أنا بعتبرك زي أمي و صدقيني عمري ما فكرت ولا حـ أفكر أمنع قصي منكم .... طبعاً يومها اتكلمنا كلام كتير ، فتحت لي قلبها و قالت لي المضايقها كلو و أنا طمنتها و قلت ليها عايزا منك حاجه وحده بس ، في يوم لو شفتيني غلطت سواء بقصد أو بدون قصد في حقكم أو حق قصي و زعلتي عليك الله تعالي واجهيني بغلطي بس ما تشيلي في قلبك مني و أنا كمان لو في تصرف زعجني حـ أجي اقول ليك زي ما جيتك هسي ... طبعاً كلامي كيفها و اتصافينا في اليوم داك و هي اعتذرت مني ...
المهم لمن وصلنا هناك لقيناهم كلهم متلمين و طيف و منذر و ولدهم برضو معاهم ، جات خالتو رشيده و استقبلتنا بكل بشاشه و عاد من اليوم داك بقينا صحبات ، كلنا كنا مجتمعين في مكان واحد و عاملين كل مراسم الجبنه ، لمن جيت أشربها قصي قال لي ثواني ما تشربيها ، سأل أمو و حبوبتو و قال ليهم الجبنه بتأثر على الحمل ؟؟!
طبعاً خلوا سؤالو و بقوا شغالين لي ألف مبروووك و ربنا يحلك بالسلامه و ان شاء الله يتربى في عزكم ، طيف قالت لي خيراً حـ تضوقي عذابي 😂 دكتوره رانيا قالت لي مشيتي فحصتي ؟؟ خالتو رشيدهـ قالت ليها دا حمل وااضح أنا ذاتي لمن كلمتني بأعراضها قلت ليها حمل ، حبوبتهم قالت لي خيانه جد ، يعني ليه تكلمي نسيبتك "أ " و ما تكلمي نسيبتك " ب " طبعاً لمن قالت كدا ضحكتنا ضحك ، قصي قال ليهم جاوبو يا جماعه الجبنه بتأثر ؟؟ كلهم قعدوا يضحكوا ، أمو قالت لي ما تكتري منها بقولوا ما بتنفع في الشهور الأولى ، قصي قال لي سامعه ! قلت ليهم خايف و متوتر أكتر مني ، طيف قالت ليهو يا حليلك إذا من هسي كدا يوم الولاده حالتك حتكون كيف ؟😂🤣
طبعاً يومها شغلوها ليهو ، قيلنا معاهم لحد بعد المغرب بعدها طلعنا منهم و مشينا عملنا فحص و زي ما إتوقعت حمل ، ياخ قصي دا حسيتو شويه كدا و حـ يحضن الدكتوره ، عيونو كانت قلوب قلوب ، لمن رجعنا البيت قال لي من اليوم ممنوع الحركه ، ممنوع السهر ، ممنوع تتعبي نفسك بمعنى إنو ماف ليك شغل ، قلت ليهو من هسي عايزا تقعدني في البيت !! بري ما بقدر من دون شغلي ، قال لي شغلي بجيبو ليك لحد البيت ، قلت ليهو قصييي ياخ ياداب أنا في بداية الشهر التاني !!يعني لسه قدامي كتير ، قال لي لا ما تجادليني ، مشى جاب لي حليب و غصبني أشرب كبايه طويله و عريضه ، طوالي إتصلت على أمي و كلمتها عشان ما تزعل ، قعدت تزغرد بصوت عالي و نادت لميس و أسيل و كلمتهم ، بقوا يتخاطفوا في التلفون ، تشيلوا وحده و التانيه تخطفو منها 🤣
تاني يوم طوااالي جوني في البيت ، لقوا معاي ناس رحاب و زحل قيلوا معاي لحد المغرب ، طبعاً قصي جا بدري ، لقى ناس أمي معاي ، سلم عليهم و قال لي يومك كان كيف ؟؟ قلت ليهو عادي قمت نضفت البيت و رتبتو و سقيت الشجر و.... قاطعني و قال لأمي اتكلمي مع بتك دي يا عمتي !! أنا مقعدها عشان ترتاح و شغاله في البيت ! قلت لأمي قصي عايزني من السرير ما أقوم ، ضحكت و قالت ليهو عادي تشتغل بس تعمل حسابها ، قلت ليهو مش قلت ليك !!
لميس قالت ليهو انت بعدين شكلك حـ تخلي شغلك و تقعد معاها في البيت ، قال ليها لو هي استمرت كدا إلا أخلي شغلي و أقعد أحرسها ، أسيل ضحكت و قالت شكلو دا مرض عام صاب الرجال لأنو عبدالله كمان بدا يعمل لي حركاتو دي ، قال ليها لأنكم ما بتسمعوا الكلام .... المهم اتونسوا شويه و قالوا حـ يمشوا ، قصي قال حـ يوصلهم لكن أمي رفضت و قالت ليهو المسافه بعيده من امدرمان الشجره اقعد مع مرتك و ما تخليها براها ، على كدا طلب ليهم ترحال و مشوا بيهو....
المهم بعدها استمرت أيامنا كدا ، من حلاوتها خفت أنحسد عليها فـ كنت بدعي ربنا إنو يحفظنا من كل شر و نكون أجمل أسره و نعيش في سلام و أمان ، قصي الحمدلله طبع لي الروايه و اتعملت كتاب ، فرحت شديد والله ، طبعاً ناس خالتو رقيه جوني زياره و باركوا لي ، جيتهم بسطتني والله ، طبعاً ديك أكتر فتره اتدلعت فيها من قصي و أهلي و نسابتي و جيراني حبايب قلبي ، قصي أكتر واحد كان تعبان معاي و في الوحم عذبتو جنس عذاب بس ما زهج و بالو كان طويييل ، و الحمدلله في الآخر جبت بت و سميناها أريج ، طبعاً طيف ولدت قبليني و المره دي جابت بت سمتها مزن و توته توته خلصت الحتوته ....
في الختام :
كتير من الأمهات و الأباء بفرزوا بين أولادهم ، بقللوا من شأن واحد عشان يرفعوا شأن التاني و في الآخر بتولد حقد و بغضاء بين الأخوان بسبب أهلهم ، للأسف كتير من الأهل مفتكرين إنو المقارنه و التمييز هي خير وسيله عشان يأنبو بيها ضمير بتهم أو ولدهم و يخلوهو يبقى زي الأخ الإتقارن بيهو و هم ما عارفين الكارثه البعملو فيها دي ، ما عارفين إنهم بالأسلوب دا بزرعوا بذور الحقد ، طال أو قصر الزمن حـ تنمو البذره دي و كل ما زادت المقارنه و المفاضله بين الاخوان كل ما زاد حقدهم على بعض و شويه شويه الحقد و الكرهـ دا ما حيكون بين الأخوان فقط ، حـ يشمل الأم و الأب لأنهم السبب و مع مرور الزمن حـ يشمل كل الناس معظم الناس الكبرو و هم في جواهم كراهيه و ما بقدروا يحبوا زول أو يقدموا ليهو حاجه هم فاقدنها ، مناشدتي دائماً بتكون للأمهات ، لأنو الأم بتقدر تسد خانة الأب و العكس غير صحيح ، نفسية الأبناء قد تسوء إذا كان الأب غير سوي أو غير عادل بس نفسيتهم دي قد تدمر على الآخر لو الأم ذاتها بقت ما عادله و بتفرز بين أولادها ، و زي ما بقول دائماً الأسرة نواة المجتمع فـ حاولوا تطلعوا لينا و ليكم أبناء اسوياء ، أملوهم حب و حنان عشان ما يطلع و يفتشوا الفاقدنوا في البيت خارج البيت و عشان ما يبقى عندهم بلادة أو برود في المشاعر و يفقدوا قدرتهم على حب الناس و حب أنفسهم ....💜ّ
