المهم وصلني الجامعه و مشى ، كلامو عشعش في بالي ، بس نفضت الأفكار دي من بالي لأني ما بحب أعيش في أوهام أو تخيلات ، أيوه هي تخيلات لأنها لسه ما حصلت في الحقيقه ، أنا بخاف من الحب و ما بحب اتمادى فيهو لا حقيقة لا خيال ، ما الحب بس أي شعور حلو ما بتمادى فيهو و ما بعشم أكتر من اللازم ، الفيني مكفيني.....
المهم بعدها رجعت البيت و بعد ارتحت شويه طلعت اللابتوب و بديت اشتغل عليهو ، شويه كدا لميس جات داخله ، رزعت الباب و قالت لي حقدك دا حـ تخليهو متين ؟؟
من دون ما أعاين ليها قلت ليها لـمن انتِ تخليهو ، قالت لي اول ما عرفتي إنو أمي عايزا لي تامر طوالي وافقتي عليهو بعد ما رفضتيهو ، قفلت اللابتوب و مشيت وقفت قصادها و قلت ليها انتبهي انك قلتي أمك العايزا ليك تامر ما تامر العايزك و بعدين إجباري هو ؟؟ حـ تغصبي ولد الناس عليك ؟؟ هو لو كان عايزك مالو ما شايفك ولا ما بـعرف إسمك !؟
قالت لي أحقد منك أنا ما شفت ، انتِ وحده حيوانه و حسودهـ ، قلت ليها مـش اختك في النـهايه ؟
قالت لي لا أختي لا بعرفك ، بلا يخمك ياخ ....قالت كدا و طلعت مني و هي زي البركان ، ما تمت دقيقه أمي جاتني داخله و قالت لي قلتي شنو لـ لميس خليتيها تبكي كدا ؟ قلت ليها معقوله ما حكت ليك ؟؟
رفعت أصبعها و قالت لـي يا بت هوي بطلي البتسوي فيهو دا !! شناة قلبك دي جايباها من وين انتِ ؟ أختك دي عملت ليك شنو عشان تحسديها للدرجه دي ؟؟
قلت ليها وين الحساده ما فهمت ؟؟ واحد قال عايزني و أنا وافقت عليهو ! كلمة حسوده دي تقوليها لي لو كان تامر دا قبل كدا خاطبها أو عاقد عليها ، لكن هو اسمها بالغلط ساي ما قالو فـ المزعلكم شنو ؟؟
قالت لي المزعلنا انك غيرتي رأيك عشان تقهري أختك و تعاكسيها ، قلت ليها ما عندي كلام اقولو ليك و ما عايزا اتكلم كتير في الموضوع دا لأني صدعت ، طلعت مني زعلانه زي بتها....
قعدت و قلت سبحان الله !! نهاي ما بشوفوا عيوبهم و ما بنتبهوا لأخطاءهم و ظلمهم لـي !! يعني أمي دي ليه ما بتفكر غير في لميس ؟! ليه ما بتهتم بمصلحة زول غيرها !؟... دا واحد من الأسباب الخلتني أكرهـ لميس ...
التميز بين الأخوان بولد الكراهيه و البغضاء ـبيناتهم و بخليهم يحقدوا على بعض ...
المهم المسا أبوي لمن جا أمي جات شكت ليهو عبدالله ، قالت ليهو : ولدك دا ليهو يومين ما مشى الجامعه ، عبدالله قال ليها ما تكذبي ، أمي قالت ليهو يا ولد هوي ما قدرك أنا عشان تقول لي ما تكذبي ! شافعه أنا عشان أكذب !؟....واصلت كلامها و قالت لأبوي رجع تاني و بقى يباري ولد الناس الشماسي داك ، أبوي عاين ليهو بنظره حاده و قال ليهو الكلام دا حقيقه ولا لا ؟؟ قال ليهو أكيد لا يا أبوي و مرتك دي بتكذب ساي ، أمي قالت ليهو اقسم بالله ما بكذب و لو ما مصدقني خليني اناديك ليك شاديه جارتنا عشان تسألها لأنها قبل كدا شافتو مع ولد الناس داك و جات كلمتني و اليوم أنا شفتو بعيوني دي ، عبدالله قال ليهو والله بتكذب يا أبوي !!....دقيقه عشان أثبت ليك ...طلع تلفونو و قال لأبوي حـأتصل على عثمان صحبي في الجامعه ، المهم اتصل و فتح الإسبيكر و قال ليهو عثمان كيفك ، اسمعني قبيل أنا كنت وين ؟؟
عثمان ضحك و قال ليهو دا سؤال شنو ؟؟ جاك زهايمر ولا شنو ؟ عبدالله قال ليهو انت بس جاوب ، قال ليهو من الجامعه مشينا شارع النيل بعدها كل واحد رجع بيتو ، قال ليهو طيب أمبارح ؟؟ قال ليهو برضو في الجامعه و منها انت مشيت معاي المستشفى لأنو عمي عمل حادث ...بس ما فهمت بتسأل ليه ؟؟
قال ليهو شكراً ليك يا عثمان و قفل الخط ، عاين لأمي و قال ليها بعد دا لو عندك مشكله في طلوعي البعد الدوام الجامعي قولي !! أبوي عاين لأمي و قال ليها يا مرهـ هوي أنا السواطات و القوالات دي ما بتنفع معاي ، قبل ما تتأكدي من حاجه ما تجي تقوليها لـي ، قالت ليهو يشهد الله ولدك دا غاشيك و بكذب عليك و بكرا براك بتشوف و تقتنع ، قالت كدا و دخلت جوه و لميس وراها ، كنت واقفه بعاين لـ عبدالله و مستغربه كيف هو قادر يثبت و يمثل كدا من دون ما يتوتر!! ولا بتلفت للكذب ! بقدر يألف سيناريو تحت أي ظرف ! و صحبو دا ذاتو شكلو فاهمو كويس و فاهم المغزى شنو من سؤال عبدالله ليهو ، صحبو كذب زيو لأنو عبدالله دا فعلاً ليهو يومين ما مشى الجامعه ، انا قبيل الصباح شفتو مع ولد ناس الطاهر الأبوي دائماً بحذرو منو لأنو ولد ما كويـس ، عبدالله قال لأبوي أنا ما عارف أمي دي عايزا تصل لشنو ! يمكن مشبها زول علي !! لكن كان تجي تسألني قبل ما تشتكيني ليك !؟ أبوي قال ليهو معليش براك عارف أمك جنها شمارات المهم انت ما تشتغل بيها ولا تبرر ليها ، اعمل البريحك لكن خليك بعيد من ولد ناس الطاهر ، قال ليهو انت صدقت كلام أمي ولا شنو يا أبوي ؟؟
قال ليهو لا بس بحذرك منو كالعاده ، قال ليهو حاضر.... طبعاً أبوي مدلع عبدالله دا دلع شديد ، مديهو حريتو و لو غلط ببرر ليهو و مرات عبدالله بكذب و أبوي بصدقو و مستحيل يكذبو حتى لو كل العالم دا شِهد ضدو ، المهم بعد يومين عبدالله جا داخل و هو جاري لميس من شعرها و كان بصرخ فيها و بنادي على أمي ، طلعت ليهو و قالت ليهو بسم الله في شنو يا ولد ، مالك جاري أختك دي كدا ؟؟
قال ليها اسأليها كانت واقفه بتقول في شنو مع حازم ؟؟
أمي قالت ليهو ووووبعلي حازم منو كمان ؟؟ قال ليها اسألي الحيوانه دي ! لميس قالت ليهو حيوان براك ، طوالي كشطها كف و قال ليها والله العظيم تاني ألقاك واقفه معاهو إلا أكسر ليك رجلينك ديل ، لميس كانت بتبكي ساي و أمي جايطه مع عبدالله ، قالت ليهو انت اسمعها بعد داك اتكلم ، لميس قالت ليها والله يا أمي حازم وقفني و سلم علي و سألني عن أحوالي و عنكم و جاوبتو و كنا بنتكلم عادي ، عبدالله أول ما شافني واقفه معاهو جا جراني قدام الناس كلها ، أمي قالت ليهو غلطان والله !! العيب وين يعني إذا اتكلمت مع حازم ولد حلتنا البنعرفو حق المعرفه !؟ لو كنت شاكي فيها على الأقل كان تنتظرها لمن تجي داخله البيت و تحقق معاها احسن من جرها قدام الناس !! هسي يقولوا عليها شنو !؟
قال ليها ما بعرف بس بتك دي تاني ما ألقاها واقفه مع ولد عشان ما أضبحها ، لميـس إتفكت منو و قالت ليهو بزهج انت ما عندك شغله غيري ؟؟! كرهتني حياتي بلا يخمك ياخ ، كان حـ يضربها كف بس أمي مسكت يدو و قالت ليهو ما عافيه ليك لو ضربتها تاني ، قال ليها ما تعفي لي ياخ !! رفع اصبعو و قال لـ لميس دا إنذار و المرهـ الجايه ضبح عديل ، ما اشوف وحده من البيت دا واقفه ليها مع ولد ، قالت ليهو عامل لينا فيها الشريف الرضي و انت كل يوم لافي مع بت و الشوارع دي تشهد عليك ، في زول جا سألك ولا قال ليك مالك بتلف مع البنات !؟ قال ليها جايه تحاسبيني يعني ؟؟
أمي قالت ليهو زي ما بتحاسب الناس كمان لازم تتحاسب ، ديل بنات منو اللافي معاهم ديل ، قال ليهم ما عندكم بي شغله و لو في حساب ما بتحاسبوني انتوا ، أمي قالت ليهو كويس خلي أبوك يجي ، قال ليها ما بتهدديني بيهو والله ....المهم بعدها عبدالله مشى و لميس قعدت تنبذ فيهو ، أمي قالت ليها ما تشتغلي بيهو ، خشي غيري ملابسك و ارتاحي شويه عشان سايقاك معاي مشوار ، قالت ليها وين ؟؟
قالت ليها ماشه لـ وفاء الليله حنت بتها ، لميس قالت ليها انتِ يا أمي وفاء دي مش كنتِ متشاكله معاها ؟؟ قالت ليها آيي و برضو حأمشي حنة بتها ، عزمتني عاااد كيف ما أمشي ، لميس قالت ليها ياخ أنا المرهـ دي ما بطيقها يا أمي لا هي لا بتها خاصة بعد ما شاكلتك و إتكلمت فيك ، قالت ليها عشان كدا أنا ماشه ، مش قالت توبي واحد و ما عندي شي و ما بعرف ألبس !؟ عااااد الليله إلا أوريها توبي و دهبي و انتِ ذاتك اتجيهي كويس و ظبطي لي نفسك عشان تشوف السمحه منو انتِ ولا بتها الما بتشبه البنات ، لميس ضحكت و قالت ليها والله انتِ يا أمي !! قالت ليها المهم خشي جوه و استعجلي لي عليك الله ، قالت ليها حاضر.....
المهم بعدها جهزوا نفسهم و اتظبطوا كويس و مشوا ، لمن جوا راجعين لقوا أبوي جا ، أصلاً دخل قبليهم بدقايق ، قال لأمي مشيتي وين بدهبك دا و ليه متأخره للزمن دا ؟
قالت ليهو اتأخرنا شنو و الساعه ياداب 6 !! قال ليها مشيتوا وين ؟ و ليه ما كلمتوني ؟؟
قالت ليهو مشينا حنة بت وفاء ، قال ليها ما كلمتيني !! قالت لـ لميس عليك الله امشي ادخلي جوه أبوك دا ما عندو موضوع ، قال ليها شبر ما تتحرك لا انتِ لا هي ، حيطه أنا عشان دائماً تطلعوا من ورا ضهري ؟؟ قالت ليهو خلاص المرهـ الجايه حـ نطلع من قدام ضهرك ...هنا لميس ختت يدها على خشمها و قعدت تضحك ما سكتت إلا لمن أبوي هرشها و جاط فيها لمن بكت ، أمي قالت ليهو هسي البت ذنبها شنو أنا السقتها معاي ، لو عندك كلام تعال قولو لي ما تفش غبينتك فيها.....عاينت لـ لميس و قالت ليها خشي جوه ، المهم لميس دخلت و ديل قعدوا يتشاكلوا و أصواتهم فوق ، عبدالله جا لقاهم بتشاكلوا قال لأبوي هسي ما لقيت ليك مره غير أمي دي !؟
قالت ليهو بعد دا كلو بتقول أمي !؟ اصلاً انت طالع لأبوك ، أصلك ما نافع و ما عندك أي إحترام لي ، بتتعامل معاي كأني قدرك أو اصغر منك يا حطب النار ، أبوي قال ليها الولد ذنبو شنو لو عندك كلام قوليهو لي أنا 😏 قالت ليهو ولدك دا انت العلمتو قلة الأدب و عدم الإحتـرام ، هسي أنا أمو ولا مرة أبوهو لمن يقول ليك بكل وقاحه ما لقيت مره غيرها !!
أبوي قال ليها ولدي و حر فيهو ، ما انتِ البتحددي لي اتعامل معاهو كيف و اعلمو شنو و ما أعلمو شنو و لو عبدالله دا ما محترمك فـ دا بسببك انتِ ما بسببي أنا لأني ما حصل قلت ليهو ما تحترم أمك ، قالت ليهو ما حصل قلت ليهو بس برضو ما حصل منعتو و وقفتو عند حدو لمن يقل أدبو و يعلي صوتو علي و دا معناها إنك مؤيدو و واقف معاهو ، عبدالله قال ليها عليك الله يا أمي خلاص صدعتي بينا ، ما معقوله الواحد داخل و طالع يلقاك تكوركي ، قالت ليهو قاعده اكورك ساي أنا ما دا كلو بسببك انت و ابوك جننتوني و كرهتوني حياتي !! عبدالله عمل حركه لأبوي نظام ما تشتغل بيها و خلينا ندخل ، أمي لاحظت ليهم قالت ليهو الليله عشان لئامتك دي يا عبدالله حأقول لأبوك انك لافي مع البنات من شارع لـ شارع و أوعك تنكر لأنك قبيل قلت كدا ، قال ليها ما نكرت ، اعمل شنو لو البنات جاريات وراي و بحبوا يتكلموا معاي ! أنا ما نطيت لـ وحيده في بيتهم ولا شركت ليها عشان تهدديني بأبوي ، أمي عاينت لأبوي و هي منتظراهو يقول حاجه بس ما إتكلم ، عبدالله قال لأبوي : مرتك دي ما بترتاح لو ما شمرت ليك ، منتظراني أغلط بس عشان تجي تشتكيني ليك ، قال ليهو أنا عارفها كويس عشان كدا مرات كتيره ما بشتغل بكلامها .... طبعاً أمي اتملت و زعلت شديد ، دخلت جوه و هي عايزا تطق من شدة الزعل ، طبعاً أنا بعاين ليهم بس.....
المهم في اليوم البعدو ما كان عندي جامعه ، حسيت نفسي مخنوقه لأني حأقضي يوم بطولو و عرضو في البيت ، المهم لمن دخلت الواتـس لقيت الليدر مرسل في قروب الدفعه إنو الدكتور طالب مننا بحث مطبوع لازم يتسلم بكرا و ورانا عنوان البحث ، المهم طوالي بديت في البحث و لقطت معلومات منوعه و عملتو pdf و قلت بكرا حـ أطبعو ، فتحت شنطتي و حسبت قروشي ، قلت بتمشي الحال ، انـا ما قاعده أشحد أبوي حاجه غير قروش المواصلات المرات براهو بديني ليها غير كدا مهما اشتهيت حاجه أو نفسي كانت فيها ما بمشي أقول ليهو عايزا لا هو لا أمي ، أصلاً هو بعد مرات بتزهج و بقول رسوم الجامعات كتيره و إنو عليهو ديون و هموم مع إنو قروش لميس و عبدالله أضعاف قروشي أنا لأنهم بقروا خاص ، أمي دي مرات تدين و مرات تبيع من دهبها عشان تدفع لـ لميس حبيبة قلبها رسوم الجامعه و أبوي رغم شكوتو المستمره من القروش الكتيره إلا إنو عبدالله أول ما يقول ليهو قالوا عايزين قصد الجامعه طوالي بمشي و بدفع ليهو ، مستعدين يعملوا المستحيل عشان أولادهم ديل ، هم مقرنهم خاص و انـا حكومي عشان كدا ماشه بالتكه و هم عشان خاص بمشوا أسرع مني .....
المهم بعدها دخلت الفيس ما لقيت ولا رساله من دكتور خالد ، من اليوم داك تاني لا رسلت ليهو لا رسل لي ، طلعت من الفيس و فتحت لابتوبي و بقيت أحضر فيهو فيديوهات عن اللغه الفرنسيه ، بعد شويه سمعت صوت الباب و بعدها صوت تامر و صوت أمي و هي بتسلم عليهو ، الوقت داك كان العصر بأذن ، طبعاً ما طلعت ليهو و أنا اصلاً ما قاعـده أطلع أسلم على زول ، استمريت في البعمل فيهو ، بعدها طلعت عشان أصلي العصر ، كنت لابسه بجامعه رماديه و ما عـارفه إنو تامر لسه موجود ، مشيت الوضايه و بديت أتوضا اول ما خلصت و إتلفت لقيت تامر في وشي ، قال لي طلعت في الوقت المناسب و إلا كنت حأضطر أمشي من دون ما أشوفك .... طبعاً إتوترت و إنتبهت إني ما لابسه لا توب لا طرحه ، حسيت بحرج ، هو حس بي و فهم علي ، نزل عيوني و قال لي آسف ، إتحركت بإستعجال من جنبو ، أمي جات طالعه و قالت ليهو لو قعدت شويه مالك يا تامر !! قال ليها ماشي والله بجيكم مره تانيه ، قالت ليهو كويس ، قدمتو لحد الباب و رجعت و أنا كنت بعاين ليهم بالشباك ، شايفاهو بتلفت ساي ، منتظرني أطلع تاني ، طبعاً لميس كانت في الجامعه ، المهم المسا لمن جا أبوي ناداني و قال لي إنو الجماعه ديل قالوا عايزين يعملوا الخطوبه خلال الأسبوع دا و أنا ما مانعت فـ بس شوفوا اليوم المناسب ليكم عشان أديهم خبر .... طبعاً اليوم دا كان يوم سبت ، أنا أول ما جاب لي سيرة الخطوبه اتوترت و للحظات حسيت إني إستعجلت لمن وافقت على تامر ، لميس زعلت و دخلت جوه و أمي طوالي لحقتها و أنا زعلت أكتر منها لأنو أمي ما بتتحمل تشوف لميس زعلانه أو بتبكي ، أما أنا لو زعلت أو بكيت أو ولعت بجاز ما بتشتغل بي ، دخلت الأوضه و قفلتها علي ، بقيت ماشه شرق و غرب و أنا بطقطق في أصابعي ، حسيت راسي حـ يضرب ، ما عارفه الصح شنو و إذا أنا استعجلت لمن وافقت على تامر أو لا !!
دخلت الفيس و رسلت لـ دكتور خالد ، كتبت ليهو السلام عليكم ، المرهـ دي على غير عادتو ما كان داخل ، مرت ساعه و ساعتين و هو ما ظهر ، قلت غريبه ! هو طوالي بكون داخل الليله المنعو شنو ؟؟
المهم تاني يوم أول ما وصلت الجامعه طبعت البحث و مشيت سلمتو لـ الليدر ، المهم بعد المحاضره خلصت ما طلعت من القاعه ما كان عندي مزاج أطلع أفطر و أجي للمحاضره التانيه ، المهم و أنا قاعده براي جات فاتن داخله ، قالت لي مهوووش حبيبتي كيفك و جات سلمت علي ، طبعاً فاتن دي قريبة طيف من بعيد ، بت حنكوشه و بتاعة حركات عشان كدا أنا ما بحبها مع إنو الدفعه كلها بتحبها و الأولاد معجبين بيها ، ما عارفه كيف بس أنا بحسها بت ما كويسه ، ما هي بس في غيرها كتار بحسهم كدا رغم إنو غيري شايفهم عكس نظرتي ليهم ، أنا يمكن يتميز بشدة الملاحظه ، بنتبه لأصغر التفاصيل و كل كلمه أو حركه ، قادرهـ أميز بين البحبني و البكرهني حتى لو هم ما صرحوا لي بمشاعرهم دي ، بعرف منو البتهمو مصلحتي و منو البدعي انو مصلحتي بتهمو ، بعرف كويس بواعث التصرفات حتى النظرات بقدر أفسرها ، حاسه إنو عندي ميزه خارقه مرات كتيره بتمنى لو ما عـندي الميزه دي لأنها متعبه شديد ، مقيداني و مخلياني ما قادرهـ اتعامل مع الناس لأني بكون عارفه نواياهم سواء من كلامهم أو تصرفاتهم أو نظراتهم و أنا مستحيل اتعامل مع زول بتنافق علي و فاتن دي بتتنافق علي لأنو قبل كدا قالت كلام سئ و كعب عني ، قايلاني ما جايبه خبر و هي ما عارفه إنو كلامها عني كلو واصلني ! ما عارفه الجابرها على النفاق شنو ! من وراي بتاكل لحمي أكل و قدامي شابكاني حبيبتي و بتاع !! ما بعرف ليه بتتنافق و أساساً ليه بتتكلم عني !! مالها و مالي متعبه نفسها معاي و شايله ذنوب بسببي !!
قالت لي أكيد جاهزه لـ تيست الأسبوع الجاي ، قلت ليها والله لسه ما قريت ، قالت لي ياها حركات أوائل الدفعه ، الواحد يشبكك ما قاري ما قاري و في الآخر يقفل المادهـ ، قلت ليها ماف شي جابرني على الكذب ، لو قريت كنت قلت ليك عادي ، قالت لي المهم ما علينا ، شايفه ادوك عشرين في التيست الفات !.... طبعاً أنا زهجت منها و أصلاً ما بطيق أتكلم معاها ، قلت ليها : "C'est juste "، سي جيست "، ضحكت بمياعه كدا و قالت لي فلهمه جد !! خلاص عرفناك بتعرفي أكتر من لغه ، عاينت لـ تلفوني و قلت ليها حـ أمشي بعد دا ، طبعاً هي بتتغاظ شديد مني و عشان ما عايزا معاها كلام إتكلمت ليها بالفرنسي طبعاً نرجسيتها ما بتخليها تقول لي دي أي لغه و معناها شنو ، شلت شنطتي و قلت ليها يلا أورفوار يا سكر و طوالي طلعت و هي مغيوظه مني ، مشيت قعدت برا و تاني جيت راجعه لمن المحاضره بدت ، بعد خلصت بقيت قاعده براي في القاعه ، فتحت تلفوني و دخلت الفيس ، ما لقيت رد على رسالتي الكانت لـ دكتور خالد ، حذفتها و طلعت من الماسنجر و بعدها طلعت من المبنى ، المهم لمن جيت مارهـ بالبينشات لقيت ناس طيف هناك ، رفعت يدها و نادتني ، مشيت سلمت عليهم و انـا واقفه ، قالت لي أقعدي ما تمشي ، قلت ليها لا لا حأمشي ، قالت لي نحنا بعد شويه طالعين نتفسح و نرفه شويه ، أرح معانا ، طبعاً آيات و قبس كانوا صارين وشوشهم ، عاينت ليهم و قلت ليها مرهـ تانيه ، قالت لي بلييييز يا قلبي وافقي ، عليك الله أرح معانا ، غيري جو شويه و فكي النفسنه دي ، بقت تحنس فيني و قبس و آيات بحمروا ليها ، قالت لي ما تشتغلي بـ ديل لأنهم بس زعلانين منك بس الأكيد إنو هم ما عندهم مشكله إذا مشيتي معانا ، قالت ليهم مش ؟؟
قبس قالت لي شوفي نحنا ما عندنا مشكله معاك ، براك المتعقده و ما شايفه زول ، آيات قالت لي لو عايزا تمشي أهلاً وسهلاً و إذا لا معليش أنا و قبس ما حـ نحنسك ، طيف قالت لي بالجد ماف زول عندو مشكله حـ نستمتع كتييير لأنو حـ نمشي جماعه ، بلييييز يا مهاوي ، أخدت نفس و قلت ليها أوكي ، فرحت و قالت لي ثواني الكلمه البتقوليها ديك شنو .... ثواني .... اتذكرت ، اون فا Enfin 😍
قلت ليها حفظتيها خلاص ، قالت لي تقريباً معظم الجمل و الكلمات الفرنسيه البتقوليها حفظتها منك ، قلت ليها super _ سْيُپِغ ، ضحكت و قالت لي سْيُپِغ شديد ، المهم قعدت معاهم شويه بعدها مشينا الإستراحه ، هم بدوا يظبطوا في نفسهم و مكياجهم و أنا ماسكه تلفوني و بشوف فيهو ، طيف قالت لي مهاوي تعالي اظبط ليك حواجبك و اعمل ليك ميك اب خفيف ، قلت ليها لا لا ما عايزا ، جات قعدت جنبي و قالت لي ما على كيفك ياخ ، جرت الطرحه و طلعت فرشه و مشط من شنطتها و بقت تسرح لي في شعري ، شقتو لي النص و لمتو و مسكتو لي بمشبك ، قلت ليها ما بحب اعمل فاونديشن أو كونسيلر في وشي ، بتضايق شديد ، قالت لي ما مشكله هاك غسلي وشك بالغسول دا و اعملي واقي شمس و تعالي اظبط ليك الباقي ، فعلاً عملت القالتو ، سرحت لي حواجبي و ظبططتهم لي و عملت لي إيلاينر و ماسكرا و روج كبـدي ، كنت لابسه عبايه سوداء و طـرحه سوداء و شنطة يد سوداء ، عاينت لي و قالت لي ما حـ تمشي معانا بالعبايه دي ، قلت ليها خلاص ما ماشه ، قالت لي لااااا ياخ ، أنا عايزا انعنشك يا عسل و احسسك بالتغير ، معظم لبسك أسود عشان كدا حابه أغير ليك شويه ، قلت ليها أكيد ما حأرجع البيت أغير و أجيكم راجعه عشان كدا خليت المشي ، قالت لي لا محلوله ، شالت تلفونها و عملت مكالمه بعدها جات راجعه و قالت لينا ارحكم معاي الداخليه القريبه من هنا ، المهم مشينا معاها ، كانت بتعرف بنات هناك ، دخلنا غرفة بت كدا طيف عرفتني بيها و قالت لي اسمها ريل ، قالت لي ريل دي باديه شغل جديد جايبه بضاعه رهيبه شديد ، ريل قالت ليها تسلمي يا قلب ، قبس قالت ليها طلعي لينا الملابس أنا ذاتي حابه أشتري ، ريل قالت ليها حاضر و فعلاً طلعت لينا الملابس و ختتهم قدامنا ، أنا كنت متضايقه و محرجه في نفس الوقت لأنو ما معاي قروش ، مصروفي محدود و ما بقدر أشتري حاجه زياده ، طيف قالت لي حابه تلبسي شنو ؟؟ قلت ليها لا لا ما عايزا لأني برتاح شديد و أنا لابسه العبايه ، ما ردت علي ، شالت فستان كبدي فيهو حزام و اختارت معاهو طرحه مخططه ، قالت لي الفستان دا حلو شديد ، طبعاً كنت ساكته ساي و هـم بختاروا ، بقيت أفكر موقفي حيكون شنو لمن تجي لحظة الدفع ، قطع تفكيري صوت طيف و هي بتقول لـ ريل حلو ، خلاص اخترنا ديل ، قولي لي حسابك كم ؟!! قالت ليها 70 ألف ، قالت ليها طيب رقم حسابك ، قلت ليها طيف ، قالت لي خليك ساكته ، دي هدايا ليكم انتوا التلاتـه ، ريل ادتها رقم حسابها و رقم الإشعار، طيف قالت لينا الآن عايزاكم تبدلوا ملابسكم و تلبسوا الفساتين دي ، يلا يلا عشان ما نتأخر ، طبعاً أنا كنت متحسسه شديد و متضايقه لأني ما بحب زول يدفع لي من قروشو بالذات طيف لأنو تعاملي معاها ما كان حلو حتى و لو كان من غير قصد ، آيات و قبس كانوا عكسي و عادين الحـاله وحده لأنهم بشتروا لبعض و دائماً طالعين و نازلين سوا ، أخدت طيف على جنب و قلت ليها والله ما كان في داعي أنا ما بحب.....قاطعتني و قالت لي وين المشكله إذا حبيت أشتري حاجه لـ صحباتي !! مها عليك الله ما تتعاملي معاي برسميه و ماف داعي للحساسيه المفرطه دي !!
المهم جربنا الفساتين و طلعوا حلوات علينا ، ريل قالت لينا طالعين ولا شنو ؟؟ طيف قالت ليها ايوه ، قالت ليها اخوك السمح داك طالع معاكم ؟؟ طيف ضحكت و قالت ليها ايوه ، قالت ليها والله لو ما عندي مشوار مهم كنت عزمت نفسي و مشيت معاكم ، طيف قالت ليها ما مشكله بعزمك المرهـ الجايه ، قالت ليها بشرط أخوك يكون موجود ، آيات قالت ليها زمن الغتغته و الدسديس انتهى ، أجي يا البتنبرشي في الولد قدام أختو ، ريل قالت ليها اي عادي 😂 قالت لينا ممكن تدوشوا هنا و تلبسوا الملابس الجديده دي ، قبس قالت ليها اخخخ بعد الجلبطناهو في وشنا دا ، قالت ليها ماف مشكله أنا بعمل ليكم الميك اب ، شغلي حلو ، آيات قالت ليها اكيد ما حتشيلي مننا قروش ، ضحكت و قالت ليها لا لا اتطمني 😂
المهم اتدوشنا و جهزنا نفسنا و أنا الوضع ما كان عاجبني ، لأني ما متعوده على اللمه و قعدة البنات ، ريل قالت لي تعالي امكيجك حـ تطلعي تحفه ، قلت ليها لا لا ما عايزا ، المهم عملت للتلاته ديلك ، شلت عبايتي و طرحتي و دخلتهم جوه الشنطه ، أول ما طلعنا من الداخليه تلفون طيف رن ، قالت لينا دا أخوي ، المهم ردت عليهو و قالت ليهو نحنا قريبين ، خليك هسي حـ نجي عليك ، المهم مشينا على الجامعه ، كان في 3 عربات واقفات ، طبعاً نحنا تابعين طيف بس ، مشت على العربيه القدام ، آيات و قبس طوالي ركبوا بس انا إترددت ، طيف قالت لي مها يلا دا أخوي ما بتعرفيهو !! للحظات كنت ناويه أغير رأيي و أمشي البيت بس طيف فتحت لي باب العربيه و قالت لي حأزعل منك لو ما ركبتي ، المهم ركبت ورا مع قبس و آيات و هي ركبت قدام مع أخوها ، أول ما اتحرك شغل موسيقى بصوت عالي و آيات و قبس بقوا يرقصوا و يتفاعلوا معاهو !! طيف كانت بتصورهم و بتضحك عليهم ، قالت ليهم بالجد انتوا مجانين ، حتى ناس العربيتين الورانا كانوا مشغلين موسيقى و طالعين بالشبابيك و شغالين صفافير و كواريك ! بالجد صدعت ! طيف قالت لي طبعاً الأجواء دي ما حتعجبك بس بكرا حـ تتعودي .....بقوا عاملين جوطـه و فوضى في الطريق لا و كمان بتسابقوا بالعربات ، آيات و طيف كل وحده ركبت في شباك و بقت تكورك معاهم ، قبس قالت لي ممكن تقعدي في النص و تخليني اقعد بالطرف ؟؟! قلت ليها ممكن ، بدلتها و قعدت في النص و هـي طوالي طلعت بالشباك التاني ، أنا الوحيده الكنت هاديه و متضايقه من الحاصـل دا و شايفه أخو طيف واحد طايش و فوضوي و هو كذلك !! كان بضحك للضرس الآخير و هو زايد السرعـه !! قال لـ طيف كفايه ادخلي عشان ما تقعي ولا تحصل ليك حاجه ، طيف ما كانت سامعاهو بس لمن ضرب ليها بوري قعدت مكانها و قالت ليهو دائماً قاطع متعتي يا قصي ! قال ليها لو حصل ليك حاجه أمك حـ تشنقني 😂😂
طيف قالت ليهو دقيقه انت ماشي وين ؟؟
قال ليها عايزين نلف شويه و نهيص بعداك نمشي المزرعه ....أنا الصراحة ما حبيت العواليق و الشماسه الماشين ورانا ولا الموسيقى و الفوضى العاملنها ديل ، قلت ليها طيف !! ما سمعتني و أصلاً الصوت عالي و كلهم بتكلموا في نفس الوقت ، عليت صوتي و قلتي ليها طيييف !! اخوها عاين لي في المرآيه و اتخيلوا إنو زاد الصوت !! مديت يدي و ختيتها في كتفها ، لمن إتلفتت علي قلت ليها عايزا أرجع البيت ، قالت لي شنووو ما سامعاك والله ، قصي وطي الصوت دا شويه ، اخوها زادو تاني و عمل نفسو ما سامعها ، قالت ليهو خلي ثقالتك دي و طوالي مدت يدها و قفلت الموسيقى ، قالت لي قلتي شنو ؟؟ قلت ليها عايزا أرجع البيت ، قالت لي ليه يا مها ياااااخ !! قلت ليها تعبانه و ما لي في الأجواء دي ، قبس قالت ليها مش قبيل كلمناك و قلنا ليك انها حـ تغير رأيها في أي لحظـه ! عاينت لأخوها و قلت ليهو ممكن تنزلني هنا ؟؟! عمل نفسو ما سامعني ، قلت ليهو لو سمحت نزلني هنا !!...برضو ما رد علي ، قلت لـ طيف اتكلمي مع أخوك دا ... طبعاً قلتها بزهج لأني زهجت و اتوترت و هـو كأني ما بتكلم معاهو ، قلت ليهو بنهره أطرش انت !! قبس و آيات قعدوا يعاينوا لي بخلعه !! طيف قالت ليهو قصي مـ....قاطعها و قال ليها حأقيف لمن أحس اني عايزا أقيف ، هي في زول جبرها تجي معانا ؟ مالا شافعه عشان ما تعرف روحها عايزا شنو ؟؟
قلت ليهو ايوه شافعه و ما بعرف روحي عايزا شنو و يا طيف لو كنت عارفه أخوك كدا و ما عندو أسلوب صدقيني ما كنت جيت معاكم ، قال ليها و يا طيف أنا قبل كدا حذرتك و نبهتك أكتر من مرهـ انو ما تجيبي الناس الزيها لأني بمجرد ما أشوفهم بحس بـإكتئاب و بطاقه سلبيه ، عشان كدا المنفسنه دي ما تجيبيها معـاك تاني ، قلت ليهو من وين جايب ثقة إني ممكن أجي معاكم تاني ! ياخ أنا من قبيل بنبح معاك عشان تنزلني و انت عامل فيها ما سامع ، قال لي معليش بس أنا ما بفهم لغة الكلاب .... طبعاً هنا الدم غلى جواي لأنو اتواقح شديد ، طيف قالت ليهو قصي بتبالغ والله !! ياخ مالك انت !؟
قلت ليهو لو ما كنت متأكدهـ انك كلب ما كان نبحت معاك ، طبعاً التلاته عاينوا لي بخلعه ! أما هو كان بعاين لـي بحده بالمرآيه ، إتلفت علي و قال لي لو ما كلبه ما كان فهمتي لغة الكلاب ، قلت ليهو لعلمك انا عندي حب إستطلاع و تعلم اللغات ، حتى لو كانت اللغه دنيئه زي لغتك الكلبيه مثلاً ، اتعصب و قال لي كمان في عربيتي و بتشتمي فيني ! قلت ليهو نزلني !!
ما رد علي ...طيف حست بالحرج بسبب تصرف أخوها ، قالت لي قصي بحب الهظار و مرات هظارو بايخ و تقيل ، قلت ليها أنا لا اختو لا صحبتو عشان يهظر مـعاي ، بتكلم معاك يا إنسان وقف عربيتك دي عشان ما أصرخ و أخلي كل الناس تنتبه لينا .....شغل أغاني و قعد يغني ساي و أنا كأني ما بتكلم معاهو ، زحيت قبس شويه و مسكت مقبض بـاب العربيه بس ما فتح فـ عرفتو مُأمنها !
*سأضعك داخل قلبي ، وسأضع حوله ألف جدار ،
ولن يسكن فيه أبدًا أحدٌ غيرك ، وإن سألوني عنك يومًا ، سأقول بكل إفتخار بأنني أحسنت الأختيار ..💜
" أغار أن يغرم أحدهم بعينيك و لا يعلم أنها لي "
يتبع.......
