لمن رجـعت البيت أمي من الباب إتلقتني و قالت لي مشيتي لناس رقيه صح ؟؟ قلت ليها لا مشيت الدكان و طوالي دخلت جوه ، جات لاحقاني و قالت لي أنا شفتك لمن دخلتي بيتهم ، الحصل شنو هناك و أساساً مشيتي ليهم لشنو ؟؟
أخدت نفس و قلت ليها مشيت وضحت ليهم إني ما خاته فكرة العرس في بالي ، قالت لي انتِ غبيانه ولا شنو ؟؟ يعني عشان ترضيهم عايزا تقعدي كدا عمرك كلو ؟؟ رفضك للزواج حـ يرجع ليهم تامر !؟ دي ذاتا أنانيه و حقد منهم ، عاملين نفسهم حزنانين على ولدهم و هم من بدري بتشاكلوا في الورثه حقتو ، الناس ديل أعوذو بالله منهم و من قلوبهم السوداء ، السمح دا نهاي هم ما عايزنوا ليك ، قلت ليها يا أمي عليكم الله هسي أعفوني من حكاية العرس دا ، أنا الفيني مكفيني والله و ماف زول حاسي فيني أو قادر يفهمني ، دموعي نزلت فـ بقيت أمسح فيها ، أمي ضمتني عليها و قالت لي والله حاااسه بيك و عارفه انتِ مارهـ بشنو ... مع ضمتها دي ياداب بكيت كويس ، قالت لي لو البكى بريح أبكي لمن تحسي نفسك بقيتي أحسن ... بقيت أبكي و اقول ليها قلبي واجعني يا أمي و حاسه نفسي تايه ، كانت بتطبطب علي و بتقول لي عارفه إنو موت تامر واجعك و عارفه إنو العرس التاني دا باقي ليك شين ، لكن دي سنة الحياة و انتِ لسه العمر قدامك ، تامر في قلوبنا كلنا و دعواتنا ما قاعده تقيف منو ، ربنا يرحمو و يطيب ثراه ، هو بإذن الله مرتاح في قبرو لأنو ما كان زول هين والله ، حزنك عليهو و تعطيلك لحياتك صدقوني ما بفيدوهو بشي ، أرحمي نفسك يا بتي و أطلعي من حزنك دا و شوفي الدنيا دي فيها شنو ، ربنا زي ما أخد منك تامر عوضك بواحد غيرو ، و الأهم و المريحني إنو أهلو عايزنك و كلهم بريدوك ، معاهم أنا حـ اتطمن عليك ، بختك والله نسابتك كويسين 💜
المهم اتكلمت معاي مسافه و قدرت تحتويني و تواسيني ، آخر حاجه قالتها لي : بكرا طواالي تمشي الشـركه و تواصلي شغلك ، عارفاك خليتي المشي بسبب موضوع الزواج ، واصلي شغلك عادي و السيره دي حالياً ما حـ نفتحها مـعاك...
بسبب كلام أمي دا في اليوم البعدو جهزت نفسي و مشيت الشركه ، ناس الـ H R , طلبوني في مكتبهم ، كنت عارفه هم عايزني ليه و ظنيت إني مجهزه شعوري و حـ اتحمل نتيجة غيابي بـس ما قدرت أستحملهم و هم بجوطوا فيني ! إنقال لي كلام زي السم و إتعرضت لإهانه كبيره ، بالجد ما قدرت استحمل كلامهم المستفز ، ايوه الشركه ما حقت أبوي و صراحة غيابي كتر بس دا ما معناهو إنو يذلوني بالطريقه دي ! أفضل لي انفصل ولا اتعرض لإهانات زي دي ، ولا خليتهم يتموا كلامهم للآخر ، قلت ليهم حـ أقدم إستقالتي و إتحركت طوالي ، أول ما طلعت من المكتب ظهر قصي في وشي ، طبعاً عيوني كانت ملـيانه دموع ، قال لي ما تلومي زول غير نفسك ، كنت بتستر عليك و بداري غيابك بس الموضوع زاد عن حدو لأنك شـغاله على كيفك ، قلت ليهو بس دا ما بديهم الحق يذلوني بالأسلوب دا .... طبعاً لمن إتكلمت دموعي نزلت مع إني حاولت أمنعهم و ما أبكي قدامو ، لمن لقيتو ساكت و بعاين لي بس كنت حأمشي من قدامو بس هو منعني و قال لي ألحقيني ، مسحت دموعي و قلت ليهو وين ؟؟ قال لي طالعين مشوار ، قلت ليهو طلوعي من هنا حيكون للبيت لأني خلاص حـ أخلي الشغل الزفت دا ، قال لي مشوار قصير ، قلت ليهو ما ماشه ، قال لي بنبرة حِده : ما عندي أخلاق للجدال ! قلت ليك مشوار قصير يعني قصير و ما حـ آخد من زمـنك الثمين ..... صراحة صابني الفضول فـ بقيت عايزا أعرف هو عايز يوديني وين !! مشى قدامي و أنا وراهو ، هو طلع و لمن جيت أطلع سمير جا داخل فـ إتلاقينا في الباب ! عاين لي بنظرات مليانـه زعل ، قال لي سلام ، قلت ليهو يا سمير كيفك ، قال لي تمام و طوالي مشى و هو زعلان ، لمن إتلفت لقيت قصي واقف لي جنب عربيتو و بعاين لينا ساي ، لمن وصلتو ما قال لي حاجه غير أركبي ، المهم ركبت معاهو عن سكات ، دور العربيه و إتحركنا ، كان في صمت حاصل ، كسرتو و قلت ليهو ممكن أعـرف ماشين وين ؟؟
قال لي أخـبارك شنو ؟؟
قلت ليهو قصييي !!
قاال لي أخباااارك شنو ؟
قلت ليهو تمام و سكته مسافه بعدها قلت ليهو و انت ؟ قال لي ماشي الحال .... على كدا سكتنا ، بعدها بشويه تلفونو رن ، كان خاتيهو جنب علبة المناديل ، قال لي ردي لأني سايق ، قلت ليهو شنوووو !!؟ لا لا دا تلفونك انت معناها ترد انت ، قال لي شايفاني سايق ولا لا ؟! بقدر أرد بس ما بقدر أركز مع حاجتين ، فلو عملنا حادث ما تلومي إلا .... قاطعتو و قلت ليهو خلاااص خلاااص ، شلت تلفونو و لمن لقيتو اسم بت عاينت ليهو و قلت ليهو إسمها و أنا بلومي في خشمي ، ضحك و قال لي دي السكرتيره ، ردي عليها و قولي ليها إني مشغول ، قلت ليهو اتخيل حتفكر في شنو لو ردت عليها بت و قالت ليها المدير مشغول !!
قال لي قايله كل الناس اتجاها واااحد زيك ! عادي تفتكر انك مرتي ، صح ولا لا ؟؟
طبعاً لمن قال كدا قلبي عمل شححح ، قال لي يا بتنا ردي التلفون دا من قبيل يفصل و يرن تاني ! قلت ليهو في المسافه دي كان عادي ترد عليها و تنهي الموضوع ، قال لي طيب أفتحي لي الخط ، لمن فتحتو قال ليها يا سيما أنا حالياً مشغول ، أجلي لي الإجتماع لـ يوم تاني ، قالت ليهو تمام و على كدا انتهت المكـالمه ، كنت حـ أرجع التلفون مكانو بس هو قال لي عايزك ترسلي نيابة عني لـ كذا شخص كدا كان عندي معاهم إلتزام اليوم بس ما فاضي ، قلت ليهو شنووو !! أنا ؟! قال لي أدخلي الواتس و حـ أوريك ترسلي لـ منو ، قلت ليهو انت مشغلني سكرتيره غصب عني صح !؟
قال لي لا ما سكرتيره ، هسي لو قلت ليك أنا مديك تلفوني بصفتك شنو حـ تزعلي ، عشان كدا أحسن أسكت 😂😂
طبعاً قلبي اشتغل زي الدلوكه ، بلعت ريقي و دخلت الواتس حقو ، كان فيهو دردشات كتيييره بس ما حـ أقدر أعرف فيها شنو و طبيعة علاقتو بالناس ديل ، المهم وراني أسامي الكم نفر العايز يعتذر منهم ، بعد رسلت ليهو الرسائل نيابة عنو ، قال لي ممكن ترفعي لي إستوري في الواتس ؟؟
ضيقت ليهو عيوني و قلت ليهو انت اليوم ما طبيعي !! قال لي أكتبي في الإستوري : " منذُ أن أحببتُك لم أعد أنتظر من الحياة أن تجلب لي الحظ ، أو تغمرني بقوس الفرح
أنا حين أحببتُك رأيتُ بِك كُل ما تُريده نفسي
بحلقت ليهو عيوني لمن قال كدا ! قال لي حـ تقعدي تندهشي كدا مـع كل جمـله مني ؟؟
بتردد قلت ليهو عيد القلتو تاني عشان أكتبو ، طبعاً وترني لمن بقى يقولو لي كلمه كلمه و هو بعاين لي ! عملت ليهو الإستوري و من دون ما أفكر قلت ليهو شجن حـ تنبسط بيها ، رايك شنو ارسل ليها الكلام دا في رساله نصيه نيابة عنك ؟؟
سكت ما رد علي و أنا إنتبهت على نفسي !! ليييه جبت سيرتها ذاتو !
تاني ما إتكلمنا مع بعض ، لحد ما وصلنا مطعم مشاوي على النيل ، قلت ليهو قصييي ! يعني دا المشوار القلتو !؟
قال لي تعالي ، لمن دخلنا جا واحد كدا و سلم عليهو و قال لينا إتفضلوا ، المطعم عندو جلسات خارجيه من الإتجاهين الشمالي و الجنوبي ، الإتجاه الشمال مُطلع على النيل و دا للناس العايزا تشوي ، و نحنا مشينا للإتجاهـ دا ، طبعاً قعدت و أنا بتلفت ساي ، ما كان في ناس كتار ، قصي قال لي المكان دا مع العصريه بكون زحمه ، الناس بتفضل الشواء بليل أو مع العصريه كدا بكون النسيم عليل و النفسيه منتعشه ، بعدها جا واحد و جاب لينا كل الحاجات البنحتاجها للشواء ، قصي إنشغل و بقى يهبب في الفحم و أنا بعاين ليهو سااااي من دون ما ينتبه ، فجأه كدا عينو جات في عيني و عرف إني من قبيل بعاين ليهو ، إتوترت و شلت عيوني عنو ، إبتسم و قال لي تعالي ساعديني بدل ما تسرحي فيني ، قلت ليهو منو القال ليك إني كنت سرحانه فيك ؟؟
ضحك و قال لي مستحيل تتغيري يا مها ، المهم اعملي صحن سلطه ، قلت ليهو دا مشوارك القصير ؟؟
قال لي أكيد لو جيت و قلت ليك تعالي عازمك ما حـ تقبلي تجي معاي !! موضوعنا طويل و اليوم كلو لينا ، اتطمني أنا كلمت أهلك و استأذنتهم إني حابي اتكلم معاك و نوصل لـ قرار نهائي أحسن من الشحتفه دي كلها ، قلت ليهو شنووو !؟ بس.... قاطعني و قال لي ممكن ننسى كل الناس و ننسى : ليه و كيف و متين و نركز بس في البنعمل فيهو حالياً و الحـ نعملوا مستقبلاً !؟
قلت ليهو و شجن !
قال يا لطييييف ! انتِ شجن دي دامك بتغيري منها للدرجه دي رافضه البينا و ناكراهو ليه ؟؟
قلت ليهو بينا في شنو ؟؟
قال لي كلامك دا هو البزعلني و دا الكان مضايقني الفترهـ الفاتت ديك كلها و دا المزهجني منك ، ما عارف هل دا غرور ولا عدم ثقه فيني مانعك تبوحي بـ مشاعرك ! انتِ بتنكري ليه يعني ممكن أفهم ؟؟
قلت ليهو قصي أنا.... قاطعني و قال لي حالياً أنا جعان و عارف كويس لو بديت كلام معاك في الموضوع دا يا زعلتيني يا زعلتك و متأكد انك قبل ما نتفاهم حـ تشيلي نفسك و تمشي ، عشان كدا هسي خلينا مروقين و بعد ما نفطر لكل حدث حديث ، قلت ليهو طيب ، عاين لي و رفع حاجبو ، قلت ليهو خلاص ما طيب ، قعد يضحك و قال لي في ثانيه تزهجي الزول و في ثـانيه تضحكيهو ، قلت ليهو فحمك دا قرب يبقى رماااااد !!
المهم هو بقى يشوي و أنا بديت أقطع سلطة خضار و بعدها عملة سلطة فواكه ، حسيت نفسي في البيت والله ، المكان دا بخليك تاخد راحتك و الحلو انك بتطبخ لنفسك و انت مُطلع على النيل ، طبعاً عاملين مظلات صغيره تحت كل وحده طاوله و كراسي ، أنا كنت قاعده في الضل بس قصي واقف في الشمس لأنو الشوايه خارج المظله ، قلت ليهو ممكن تجي ترتاح شويه ، قال لي لا قربت ، قلت ليهو الشمس سخنه ! ما شايف نفسك عرقت كيف !!... قال لي قربت ، قلت ليهو تعاااال داخل يااااخ !! لمن قال لي ما تخافي علي من ضربة الشمس طوااالي بلعت لساني و تاني ما سألتو ...
المهم خلص شغلو و خت اللحمه المشويه في صحن كبير ، جا ختاهو على الطاوله ، قطع بصل و ليمون و ختاهم فوقو ، قال لي هسي برجع ، مشى و جا و هو شايل بارد ، قال لي جبتا أهم حاجه ، قلت ليهو شنو ؟؟ قال لي الشطه ، كانت شطه مطبوخه ، قلت ليهو يا سلاااام والله ذكرتني الضحيه ، قال لي بتاكلي شطه ؟؟ قلت ليهو دي العششششق ياخ أنا عادي أحشيها و آكلها ، قال لي واضح انك آخر فرد من سلالة التنانين ، قعد أضحك على كلامو ، قال لي يلا بسم الله خلينا نبدا .....
بعد خلصنا بقينا نشرب في البارد ، قال لي والله ضحيه جد جد ، قلت ليهو فعلاً ، بعد ما ضايرنا المكان جينا قعدنا قصاد بعض ، شال الكرستالة و لفاها ، قال لي صراحه ولا تحدي ؟؟
قلت ليهو ما جادي يا قصي ، قال لي دي فرصه عشان تاخدي أجوبه لكل الأسئله الفي بالك ، قلت ليهو صراحـه ، قال لي رافضه زواجنا ليه ؟؟ و خليك صريحه معاي زي ما أنا حأكون صريح معاك ، أخدت نفس عميق و قلت ليهو تمام حأكون صريحه و أجاوب بكل صدق ، زي ما سؤالك واضح كمان الجواب واضح ، قال لي حابب اسمع منك ، قولي الفي قلبك ، قلت ليهو أول شي يا قصي انت قبل كدا كذبت و كنت بتتنافق علي لمن انتحلت شخصية دكتور نفسي ، دا بوصلنا لنقطة انك نسونجي ، عادي تزيف مشاعرك و تلعب بـ بنات الناس ، لمن بررت و قلت إنو حركاتك دي كلها كانت حركات زمان و خليتها صراحة سامحتك و نسيت الموضوع ، بس لمن دخلت مكتبك و لقيت معاك البت دي و انتوا قراب من بعض صراحة ثقتي فيك إهتزت و حسيت إنو انت عمرك ما حـ تتغير ، حتى لمن كنت تلمح لي و لمن إعترفت عديل كنت شاكه فيك و حاسه انك عايز تتلاعب بي ، نجي لموضوع زواجنا الإنطرح فجأه دا ! أولاً مشكلتي مع نفسي إني كنت مقصره في حق تامر ، هو عكسي كان بعذرني و بتحملني و أنا ما قدرت أرد ليهو ولو جزو قليل من القدمو لي ولا قدرت أكون ليهو زوجه مثاليه مع ذلك ما شكى مني فأنا حالياً حاسه بالذنب و شايفه إني حأكون أنانيه لو حبيت غيرو ، يعني الحب الحـ أحبو لـ غيرو ليه ما حبيتو ليهو هو و ريحت قلبو !؟
تاني حاجه انت متزوج يا قصي و أنا ما عايزا بيت ينخرب بسببي و ما عايزا أكون خاينه في نظر الناس و ينقال عني خطافة رجال ، انت شكلك صاحب بالين و بتقدر تحب اتنين في نفس الوقت و أنا ما عايزا أتقارن مع زول ولا عايزا أكون ضرة وحده ، بس دا كلو العندي ....
ما قال شي ، لف الكرستاله و لمن جات عليهو إختار صراحه ، قلت ليهو انت حصل حبيت بصدق !؟ لأني شايفه إنو حبك عباره عن إعجاب ، ما بحسك بتحب بصدق ....ضحك و قال لي الله يسامحك يا مها ، قلت ليهو لي حق اشكك في صدق مشاعرك لأنك نسونجيييي ، قال لي برضو الله يسامحك ، قلت ليهو اتفضل جاوب .... قـال لي كنت نسونجي لكن حالياً محترم نفسي 😂
قلت ليهو بعد دا ! قال لي اعمل شنو إذا الفراشات لسه حايمين حوليني ! على فكره البت اللقيتيها معاي في المكتب زميله قديمه و من زمان بتحاول تتقرب مني و انتِ لمن جيتي داخله جيتي في اللحظه الهي من دون مقدمات حاولت تتقرب مني و على الأساس دا فهمتيني غلط ، قلت ليهو بالله !! يعني كانت بتحاول تتحرش بيك !؟
قال لي والله دي الحقيقه و ما حاولت أبرر ليك أولاً لأني ماخد منك موقف بسبب زميلك داك و لأنك ما كنتِ مدياني إحساس إنو الموضوع بهمك أو فارق معاك رغم انو مرات كتيره حيكونك بتكون فاضحاك ...
قلت ليهو برضو ما جاوبت علي ، حصل حبيت بصدق ؟؟ قال لي حبيت كتير بس ما إستمريت مع وحده لأنو التفاهم و الإحترام أهم من الحب ...
لف الكرستاله و تاااني طلعت عليهو ، قال لي كأنو الكرستاله دي حاسه إنو عندك كميه من الأسئله في بالك ، قلت ليهو يمكن ، لمن اختار صراحه قلت ليهو أحكي لي عنك شويه بإيجاز ، قعد يحكي لي عن نفسو و أنا منتظراهو متين يجيب سيرة شجن و يحكي لي اتعرف عليها كيف و حباها قدر شنو و ليه لسه متمسك بيها ، بس نهاي ما جاب لي سيرتها ، لمن سكت كنت لسه بعاين ليهو ، قال لي شكلك منتظراني أقول حاجه و ما قلتها ؟؟
قلت ليهو لا ، قال لي متأكدة ؟؟ هزيت ليهو راسي بس ، المهم لمن جا دوري سألني و قال لي زميلك داك بالنسبه ليك شنو ؟؟
قلت ليهو براك قلتها "زميل " قال لي هو شايفك أكتر من زميله ، قلت ليهو أيوه عارفـه ، قال لي إذا ما يئس و حاول معاك أكتر من مـره حـ يجي يوم تقبلي بيهو ؟؟ قلت ليهو لاحظ أنهم سؤالين بس حـ اجاوب ، ما حـ اقبل بيهو ، قال لي ليه ؟؟ قلت ليهو ببساطه لأني ما بحبو ، إبتسم و قال لي انتِ غريبه شديد !! بتبعدي عن الشخص البحبك و ما بتحبيهو و عن الشخص البتحبيهو !!
لمن قالت كدا قلبي عمل شححح ، لف الكرستاله و المره دي جات علي ، برضو اخترت صراحه ، قال لي متمني انك تجاوبي على السؤال دا بـ نعم أو لا ، اتفقنا ؟؟
قلت ليهو اتفقنا ، قال لي بتحبيني ولا لا ؟؟
طبعاً الكلام غلبني ، بقيت اطقطق في أصابعي من شدة التوتر ، قال لي ماف مفر من السؤال دا ، نعم ولا لا ؟؟
بعد مسافه هزيت ليهو راسي ، قال لي افهم شنو من هزة الراس دي ، قلت ليهو قصييي انت عارف ياخ !! قال لي اسمي دا حلو ولا بس لمن تنطقيهو انتِ ؟!😂 .... خجلت طبعاً ! قال لي نعم ولا لا ؟؟
قلت ليهو عكس لا ، ضحك و قال لي بخيله شديد ، لمن جا دوري ، سألتو نفس سؤالو ، عاين لي جوه عيوني و قال لي انتِ بتسألي سؤال عارفه جوابو كويس ، أنا شايف كلمة بحبك دي عاديه و شويه ، أنا بس حـ أقول ليك إني مغرم بيك و بكون مطمئن جداً و أنا معاك و دا شعور بفوق شعور الحب 💜ّ
قلت ليهو طيب من متين ؟؟
إبتسم و قال لي للصراحه من أول لقاء بينا حسيت انك مختلفه و مميزه و ما بنكر انك كنت بتستفزيني ، متذكره لمن اتشاكلت معاك في العربيه و ردحنا كويس لبعض !؟ صراحة رغم إني اتضايقت منك و من ردودك بس برضو في شي جذبني ليك ! عنادك و شخصيتك و كارزمتك مختلفات ! يعني فيك حاجه ملفته للنظر ، أنا متأكد إنو لو ما كان في وحده في حياتي و لو كان احتكينا ببعض و اتعاملنا كتير كنت حـ أحبك من أول صدفنا ، زحيت الكرستاله و قلت ليهو طيب حبيت شجن متين ؟؟
ضحك و قال لي والله من قبيل متوقع منك سؤال زي دا ، المهم شجن دي حبيتها بعد ما إتخرجت من الجامعه ، هي بتشبهني شديد في طريقة التفكير و نمط الحياه و إستايلاتنا ، و كان في حاجات كتيره مشتركه بيناتنا ، زي اننا بنحب الحفلات و السهر و رحلات و علاقاتنا ذات نطاق واسع ، يعني ببساطه بنحب الحياة و بنحب نبسط نفسنا ، بس بعد الزواج فهمت إنو الحب ما كفايه و إنو الجوهر أهم من المظهر ، شجن علمتني دروس و ورتني حقيقتها ، لا احترمتني لا إحترمت أهلي ولا قدرت حتة إني بتنازل عشانها ، إني و رغم البتعمل فيهو ما نويت استعجل و أهني البينا ، أنا عكس البظهرو للناس ما بحب استعجل في القرارات المصيريه ، قلت ليهو يعني دا مبرر لعدم طلاقك ليها رغم أنها عايزا كدا ؟؟... ما تفهمني غلط ما قصدي انك تطلقها أو اني ساعيه عشان.... قاطعني و قال لي يمكن أنا أكتر واحد فاهمك كويس يا مها و عارف انتِ شنو ، انتِ مستحيل تأذي زول أو تفكري تخربي بيت زول ، ما عارف حـ تفهميني ولا لا ، بس الزوله دي حرقة قلبي و ما قدرتني ، خربت حياتي و حياة أهلي و ضميرها ما أنبها ، بتعمل دا كلو عشان تخليني أطلقها ، لأنها ملت مني و لقت واحد جديد ، و أنا مستحيل أطلقها بالبساطه دي ، مستحيل أخليها تتحصل على العايزاهو ، عقابها حيكون إني أعرس فيها و ارضي نفسي و أرضي أهلي و هي تكون في ذمتي و ما تحصل على العايزاهو ، قلت ليهو يعني عايز تعرس بس عشان تقهرها ؟؟
قال لي ما ممكن اضرب عصفورين بحجر واحد ؟؟ أعرس البحبها و أقهر القهرتني و قهرت أهلي !
قلت ليهو طيب و أنا ؟؟... متوقع إني أقبل بوضع زي دا ؟؟ لو هي ما بتهمك يا قصي ما كنت حـ تفكر تقهرها و تعرس فيها عشان تأدبها ، لو بالجد ما بتهمك كنت طلقتها من زمان بس انت لسه بتحبها و لسه متمسك بيها ، اسمعها نصيحه مني ، ما تخرب بيتك ، حل مشكلتك مع مرتك و خلاص و لو لسه مصر على فكرة الزواج دي أجر ليك بت عديل و اتفق معاها على الزواج دا ، عشان بعد ما تقهر مرتك و تأدبها تطلق البت المستأجره بكل سهوله 💔
قال لي يا مها.... قاطعتو و قلت ليهو أكيد ما حـ أقول ليك يا انا يا مرتك لأني مستحيل أخت نفسي في مقارنه زي دي و غير كدا أنا الموضوع دا بقى محسوم بالنسبه لي .... طبعاً في اللحظات ديك اتذكرت خالتو رقيه و لمن قلت ليها إني ما عايزا أعرس....
قال لي افهم انك متخذه قرارك من بدري و مقتنعه بيهو ؟؟
قلت ليهو أيوه ، أنا مش قلت ليك قراري دا و كلمتك تقول لأمك تشيل الفكره من بالها ؟؟
قال لي يعني قعدتنا دي كلها ماف داعي ليها ؟؟
قلت ليهو والله يا قصي ما شايفه لينا مستقبل مع بعض ، قال لي ما تعقدي الأمور ، قلت ليهو من يومها معقده و بعدين انت ليه واثق إنو السعاده الما لقيتها مع شجن حـ تلقاها معاي ؟؟ على فكره أنا برضو كنت بعمل مشاكل مع نسابتي و طوالي كانوا بشكوا مني ، قال لي محاوله فاشله للتنفير ، قلت ليهو والله العظيم دي الحقيقه ، قال لي برضو عايزك ، قلت ليهو كدا ما حتكون غيرت شي يا قصي ، يعني حأكون ليك زي شجن فالأحسن تقعد معاها ، قال لي دي حاجه ما بتحدديها انتِ ، قلت ليهو أوكي لأنك الزواج دا بقدر أقررو و أنا مقرره إنو ما يحصل من الأساس ....
حسيتو اتضايق و بقى مخنوق ، قال لي حتفضل مشكلتك انك بتفكري في كل الناس إلا انتِ ، بتفكري في كل الإحتمالات إلا احتمال سعادتك و حـ تفضل أكبر مشاكلك انك براااك بتقفلي الأبواب في وش سعادتك و براك بتخربي حياتك ، الموضوع كان ممكن يتحل ببساطه ، كفايه جداً إننا عايزين بعض ، زيدي على كدا موافقة أهلك و أهلي و إصرارهم الشديد ، لو ما كانوا شايفين اننا مناسبين لبعض ما كان أًصرو على الزواج دا و على فكره أنا لمن اتكلمت مع أبوك و شرحت ليهو ما كان عندو مانع و قال الراي رأي البت ، يعني الناس دي كلها ما فيهم زول ممانع غيرك ، ياخ شجن الخايفه تخربي بيتها دي هي الموضوع ذاااتو ما فارق معاهو و لو عليها دقيقه ما تقعد معاي !! قلت ليهو طيب مدام عارف إنو الموضوع ما فارق معاها ليه لسه ماسكها و عايز تقهرها ؟؟ فهمني بس كيف حـ تقهرها بحاجه هي ما فارقه معاها ؟؟ يا قصي لو ما قدامي على الأقل إعترف بينك و بين نفسك إنـك بتحبها !! صدقني الموضوع ما خطير !!
اتنهد و قال لي برضو ما حـ تفهميني ، انتِ لو عايزا ممكن بكلمه واحده تخلينا تحت سقف واحد و تخلينا أسعد اتنين بس أعتقد أنك بتحبي تتعايشي مع التعاسـه 💔ّ
قلت ليهو صدقني كدا أحسن لينا كلنا ، متمنيه إنو الموضوع دا ما يعمل حساسيه بيناتنا ، ما عايزا نتخاصم أو تخلق مشاكل بيناتنا سواء على مستوى الشغل أو على المستوى الشخصي ، مش كنت بتقول إنو أنا و طيف واااحد بالنسبه ليك ؟! حالياً إعتبرني كدا و أنا برضو حـ أعتبرك زي أخوي يا قصي و خليك عارف إنو أول ما اقع في مشكله أو تحصل لي حاجه غصصصصب عنك حـ أجيك جاريـه ، ما رد علي بس الضيق كان باين عليهو ، غيرت الموضوع و بقيت افتح في مواضيع تانيه و طبعاً هو سافهني ، والله كنت بتظاهر بالقوهـ و أنا من جواي مقهوره و حاسه قلبي بنزف دم ، لمن الزمن اتأخر قال لي خلينا نمشي بعد دا ، الطريق كلو هو كان ساكت ، لحد ما وصلني البيت ، نزلت و جيتو بالشباك و قلت ليهو والله ما نفسي تزعلي مني يا قصي ، ما رد علي و كان حـ يدور عربيتو بس اول ما قلت ليهو إني مسافره إتلفت علي !!!
قلت ليهو ماف زول غيرك عارف ، لسه ما فاتحت ناس البيت في الموضوع ، عايزا أمشي من هنا و آخد لي فترة نقاهه بعيداً عن كل الناس دي ، عشان كدا ما عايزا و انت زعلان مني و ما عايزا أمشي من دون ما أودعك ، قال لي درب السلامه و طوالي مشى !!
حـسيت بوخـزه في قلبي ، بقيـت أعاين لـ عربيـتو و هـو مـاشي منـي بعيـد و أنا بـقول فـي نفسـي الله اعـلم مـتين نشـوف بعض تاني يا قصي ، ما اتمنيت إنو وداعنا يـكون باهـت بالـطريقه دي 💔
لمن دخلت البيت لقيت خالتو رشيدهـ قاعده و معاها دكتوره رانيا ! لمن جيت و سلمت عليهم خالتو رشيدهـ قالت لي حقو ما اسلم عليك ، دكتوره رانيا قالت لي والله رشيده زعـلانه منك شديد و قالت تاني السلام دا ما عايزاهو معاك و طبعاً شكتك لـ طيف و في البيت 24 ساعه تنقنق و تجيب سيرتك و تورينا قدر شنو هي زعلانه منك ، قعدت جنبها و قلت ليها يا خالتو والله زعلك ما هاين علي بس كمان ما معقوله تخربي بيت ولدك و تجبرينا على حاجه نحنا ما عايزنها !! قالت لي منو القال ليك قصي ولدي ما عايزك ؟؟ انتِ اليوم طلعتي معاهو ولا لا ؟؟ اتكلمتوا قلتوا شنو ؟؟
قلت ليها قلنا إنو ماف مستقبل لينا مع بعض أو خليني اقول أنا القلت ليهو كدا ، ولدك باقي على مرتو والله و أنا ما عايزا أدخل بيناتهم ، دكتوره رانيا قالت لي افهمي يا مها شجن هي الخربت بيتها و هي العايزا الطلاق ، قلت ليها و قصي ما عايز يطلقها ، أمو قالت لي ما عارفه المانعو شنو بس قصي دا ما عندو ليها حاجه و عايزك انتِ ، قلت ليها معليش يا خالتو بس الموضوع دا اتحسم ، خالتي نجوى قالت ليهم دا كلو بسبب نسابتها يلي هم نسابتي برضو ، دكتوره رانيا قالت ليها ليه مالهم ؟؟ طوالي خالتي حكت ليها بالقالوهو عني ، خالتو رشيدهـ قالت لي عشانهم عايزا تخربي حياتك ؟؟ يعني لـ متين حـ تقعدي كدا ؟؟... عاينت لأمي و قالت ليها عليك الله اتكلمي مع بتك دي يا ناهد ! وعيها و خليها تعرف الصالحها من الضارها !! أمي قالت ليها والله يا رشيده اتكلمت معاها كدا لمن فترت ، لميس قالت لي والله يا مها لو عايزا مصلحتك وافق على قصي ، أسيل قالت لي آيي عليك الله يا مها ، نفسي أشوفك عريس و أشوفك مبسوطه ، خالتي قالت لي لو ما عشانك وافقي عشان أمك الشايله همك دي !!
قلت ليهم يا جماعه والله ماف طريقه و الموضوع دا اتحسم ، طبعاً خالتو رشيدهـ زعلت زعل ما عادي ، وقفت على حيلها و قالت لأختها نمشي بعد دا ، أمي قالت ليها كدي أقعدي يا رشيده و ماف داعي للزعل ، قالت ليها الموضوع بزعل و بتك كسرت خاطري والله ، جيتها عشمانه و حـ أرجع بخيبة أمل ، قلت ليها معليش يا خالتو.....
المهم في الآخر مشوا ، أمي جات لاحقني في الأوضه و قالت لي لمن اتكلمتي مع قصي قال ليك شنو ؟؟
قلت ليها سألني رافضه ليه و وريتو أسبابي و أقنعتو إنو ماف قسمه بيناتنا ، قالت لي وااااي أنا منك يا بتي يا البترفسي النعمه برجلينك ، زي قصي دا تااااني ما حـ يجيك يا بتي ، انتِ بتسوي كدا ليه ربنا يهديك !!
قلت ليها أمي والله ما عايزا أتكلم في الموضوع دا تاني و خلااااص إنتهينا ، أسيل و لميس جوا داخلين و قالوا لي ما كان تستعجلي ، قصي زول كويس و أهلو ناس كويسين و و و .....الخ
قلت ليهم أنا صدعت بسبب السيره دي !! خلاص الموضوع دا إتقفل شوفوا ليكم سيره غيرو !!
أمي زعلت و طوالي طلعت و وراها لميس و أسيل ، المهم بعد المغرب كدا أبوي جا و قعد معاي و حكي لي بلقائو هو و قصي ، قال لي الراجل محترم و كلامو كان مرتب و أنا ما شايف إنو شرط يطلق مرتو عشان يعرس تاني !! الراجل محللات ليهو أربعه !
صراحة سألت نفسي و قلت معقوله قصي يقول لأبوي إنو ما طلق شجن عشان يأدبها !!؟ قلت ليهو هو قال ليك شنو ؟؟ قال لي هو سألني إذا نحنا شايفين إنو زواجو الأول مشكله ، الأكيد ما حأقول ليهو أيوه زواجك مشكله و لو عايز بتي معناها تطلق مرتك !! قلت ليهو يا أبوي في اب برضى حاجه زي دي لـ بتو ؟؟! قال لي يعني ماف زول معرس اتنين و تلاته و اربعه ولا ماف اب مدي بتو لـ راجل متزوج !! شوفي أنا ما جابرك عليهو ، أنا و بصفتي اب بهمني أخلاق الراجل المتقدم لوحده من بناتي ، معرس ، مطلق ما بهمني إذا هو زول أخلاقو كويسه و قادر يعدل بين زوجاتو و مستطيع يفرز بيوت زوجاتو و قادر يعيش بتي حياة كريمه ، قلت ليهو أنا رفضت يا أبوي و الموضوع دا خـلاص إتقفل ، قال لي أنا ما حصل جبرت وحده فيكم على زول بس انتِ استعجلتي لمن رفضتي ، قلت ليهو انتوا محسسني إنو آخر راجل إنو خلاص كدا حياتي حـ تقيف ، أمي جات داخله و قالت لي فعلاً حياتك حـ تقيف !! حـ تقعدي براك كدا لمتين ؟؟ ما تشوفي البيت مليان و نحنا حولينك ، أنا و أبوك ما دايمين ليك والله ، لميس دي بكرا بتعرس و بتمشي و أخوك ياداب بادي يكون نفسو و عندو ولدو و مرتو ، نحنا لو حصلت لينا حاجه تقبلي على وين ؟؟ تقولي يا منو ؟؟ انتِ لو بتفكري زي ما نحنا بنفكر في مستقبلك ما كان اترددتي في الموافقه ، مجتمعنا أصلو ما برحم و براك شايفاهم بنظرو للأرمله كيف ، والله حتى لو كانت بت صغيره عندهم فيها كلام و ما بجوها عرسان كتار ، انتِ وقت الله فتحها عليك و جاب ليك راجل ما شاء الله خلقه و أخلاق مابياهو مالك ؟؟
المهم اتكلمت معاي كتير في الموضوع و قعدت تلومني ، عبدالله جا داخل و قال لي سؤال و جواب يا مها ، انتِ رافضه عشان ما عايزاهو ولا رافضه بسبب نسابتك ؟؟
أمي قالت ليهو بسبب نسابتها أكيد ، أبوي قال ليها خليها تتكلم هي ، عبدالله قال لي على كل الأحوال ماف زول حـ يغصبك على حاجه بس كمان عايزين نعرف سبب رفضك .... بتردد قلت ليهو عشان أنا ما عايزا ....
قال ليهم خلاص ماف زول يغصبها على حاجه و أقفلو السيره دي ...
في اليوم البعدو دكتوره رانيا اتصلت علي و قعدت تتكلم معاي عادي ، بعدها قالت لي انتِ رفضتي قصي بسبب الراجل القلتي بتحبيهو داك ؟؟
قلت ليها لا لا بس انا حالياً ما مستعده للزواج ، سكتت مسافه بعدها قالت لي الراجل البتحبيهو دا و المتزوج ياهو قصي صح ؟؟؟
قلت ليها شنووو ؟؟ لا لا ما هو ، قالت لي ما تكذبي علي يا مها ، أنا من البدايه كنت فاهماك و عارفاك قاصده منو بس عملت رايحه ، قلت ليها لا لا صدقيني ما هو ، قالت لي ما تخافي ما حـ اشاكلك والله 😂😂
صراحة تاني ما قدرت أنكر ، قالت لي والله يا مها شجن دي ما شايفه ليها مستقبل مع قصي و هو كذلك و إلا ما كان فكر فيك و على فكره هو ذاتو بريدك والله ، عادي ما شفتيهو زعلان قدر شنو ، والله ما راضي يتكلم مع واحد مننا ، أمبارح جا البيت و اليوم من الصباح طلع و ما جا راجع تاني ، والله يا مها كدا حـ تضيعي نفسك ساي ، مالك و مال الناس !!
قلت ليها بعيداً عن الناس أنا جربت الزواج و المشاكل الفيهو ، و بعد التجربه دي ما حابه استعجل و ما جاهزه أخوض التجربه دي تاني ، قالت لي زواجك الأول فعلاً كان تجربه و زواجك التاني دا مفروض يكون ليك زواج حقيقي بمعنى إنو كل العيوب الشفتيها في زواجك الأول عالجيها في التاني ، أقعدي مع نفسك و شوفي التقصير كان وين و شنو الخلى تجربتك الأولى يكون فيها مشاكل ، لمن تصلي للأسباب حـ تلقي الحلول و حـ تحاولي تمني تكرارها في الزواج التاني ، قلت ليها موضوعي مع قصي اتحسم !! قالت لي بتكلم ليك بشكل عام ، يعني مستقبلاً لو اتقدم ليك زول غير قصي ، قلت ليها حاضر ، قالت لي مش كان قلتي لي انك حاسه بالذنب و ضميرك ما مريحك لأنك ما قدرتي تقدمي شي لـ تامر في الوقت الكان فيهو هو مغرقك في عطاؤ و محبتو ليك !؟ ما شايفه انك بتكرري في نفس السيناريو !؟ خايفاك بكرا تندمي و تقولي ياريت و ضميرك الكان مأنبك على تامر حـ يأنبك على قصي برضو ، لمن قالت لي كدا قلبي قبضني و خفت على قصي 💔
قالت لي المهم يا مها ربنا يوفقك و يرزقك ود الحلال ، طبعاً كلامها حسيتو فتح لي عقلي بس بعد فوات الأوان ، دعيت إنو قصي ما يصيبو مكروه و دعيت إني ما أندم على العملتو ، بعد العشا كنت بتكلم مع طيف و برضو نفس الموضوع و هي كمان قالت زعلانه مني عشان أنهيت الموضوع و و ....الخ قلت ليها طيف الموضوع دا انتهى و أنا تعبت من تكرار الجمله دي والله !! المهم تاني اتكلمنا عادي و خلصت مواضينا ، رقدت على السرير و قلت بكرا حـ أكلمهم إني عايزا اسافر ، غمضت عيوني و أنا بدعي إنو ربنا ينزع حب قصي من قلبي ، ما عايزا اتعلق في زول تاني ، عايزا أطوي صفحة كل الحصل و أبدا صفحه جديده بس في مكان تاني.....
كُلِّ شَيءٍ تخسره في سبيلِ راحتك وسلامك النفسي فهوَ في الحقيقة مكسبٌ عظيمٌ، لا تُوافق خجلًا على شَيءٍ ليس بِوسعك أَن تتقبله، لا تَتمسَّك فيما يتعبك ويرهقك، ضَع حُدودًا لمن يُحاول أن يتطفل على حياتِك، ضع مسَافة أمان بينك وبين العلاقاتِ التي لا تَجلب لَك سوى الأذَى، اهجر الأماكن التي يتَشابَه فيها حُضُورك وغيابك، تنازل عن الجدالات والنقاشات التي لا نفع فيها ولا جدوى منها، لا تُجبر نفسك على أحد ولا تجبر أحَدٌ عَليك، أعَز نفسك وأدرك قيمتك 💜
#رهام_العوران
يتبع.....
حـ اعدل البارت القبلو ، وفاة تامر مرت عليها سنه و حاجه و عدتها قضتها قبل دخولها للمصحة
