لمن طلعت و لاحظت إنو الزمن متأخر قلت خلاص أحسن أمشي ليها بكرا الجمعه ... أسـيل لمن عرفت إنـي ماشه لطيف لأنها عيـانه قالت لي خليني أمشي معاك ، أمي قالت لي سوقيها و سوقي لميس معاكم و سلمي لي على طيف ، البت دي ما بتقصر عشان كدا ما تقصروا منها ، أمشوا شوفوها و تعالوا ، طبعاً عاينت لـ لميس و منتظراها تقول لا ما ماشه بس حيرتني لمن قالت لأمي تمام !!!
طبعاً حمودي كان نايم ، أمي قالت لأسيل خليهو ما تسوقيهو عشان الجو و زحمة المواصلات ، أسيل قالت ليها لكن لو صحى و لقاني ماف حـ يشق البيت من شدة البكى ، أمي قالت ليها أصلاً البكى دا حقو ، كدا كدا حـ يبكي فلو عايزا تمشي ما تسوقيهو ، المهم في الآخر قالت حتمشي بس بشرط ما نتأخر ، المهم طلعنا و مشينا ركبنا المواصلات ، أنا و أسيل جنب بعض و لميس ورانا ، أسيل كنت بتونس فيني ، اتذكرت موضوع المدرسه و قلت ليها انتِ ما عايزا تكملي دراستك ؟؟
ما ردت علي ، قلت ليها جاوبيني عايزا ولا لا ؟؟ قالت لي رغبتي حـ تغير شنو ؟؟ انتِ عارفه و شايفه و ما مفروض تسألي سؤال زي دا ، قلت ليها بس جاوبي !!... قالت لي عايزا ، قلت ليها بس خلي الموضوع دا علي ....
المهم لمن وصلنا بيت ناس طيف ، أسيل قالت بيتهم كبير و سمح شديد ، إذا دا شكلو من برا ، من جـوهـ حيكون عامل كيف ؟؟ طبعاً و هي بتتكلم أنا كنت خاته يدي على الجرس ، لميس لكزتها و قالت ليها هسسس في زول جاي يفتح الباب ، نزلت يدي من الجرس لمن اتأكدت إنو في زول جاي يفتح الباب ، أول ما الباب إنفتح كدا شفت قصي في وشي !!.... ما عاين لي كتير ، قال لينا مرحب بيكم ، اتفضلوا ، قلت ليهو جايين نشوف طيف ، قال لي طوالي ، اتفضلوا ، دخلنا و هو كان ماشي قدامنا و بنادي على ناس أمو ، طبعاً بيتهم كلو شجر ، عجبنا الممر لأنو في شجيرات على أطرافو ، لمن أمو جات طالعه قال ليها ديل صحبات طيف جاين يشوفوها ، قالت لينا مرحب بيكم يا بناتي و جات سلمت علينا و ساقتنا لـ جوهـ ، قعدتنا في صاله كبيرهـ ، مشت و جات راجعه مع الشغاله ، كانت جايبه لينا مويه و عصير و حلويات ، قلت ليها طيـف وين ان شاء الله بقت أحسن ، قالت لي الحمدلله اليوم اتحسنت أكتر ، قلت ليها مشت لدكتور ؟؟
قالت لي أيوه ، طلع عندها إلتهاب لوز و على جيوبها الأنفيه جننوها جن ، قلنا ليها ربنا يشفيها و يعافيها ، قالت لي آمين يارب ، فجأه جات بت نازله ، لمن جاتنا قريب و سلمت اكتشفت إنها شجن ، كانت قاشره قشرهـ عجيبه ، لابسه فستان و شايله شنطه راقيه و ماسكه نظارهـ شمسيه ، قالت لي أنا حاسه اني شفتك في مكان بس ما متذكرهـ ، خالتو رشيدهـ قالت ليها دي مها صحبة طيف و جات عرسك ، قالت ليها اهااا دي القاعـده تتكلم عنها طيف طوالي !! المهم يا حلوين أنا طالعه ، أول ما طلعت كدا خالتو رشيده قالت لينا طيف فوق ، امشوا بالسلم داك و أول غرفه على الشمال دي غرفتها ، قلنا ليها تمام ، قمنا و مشينا على السلم ، لمن إتلفت لقيتها طالعه الحوش بإستعجال ....
المهم لمن وصلنا غـرفة طيف لقيناها قاعدهـ في نص السرير و شكلها ياداب صحت من النوم ، لمن شافتنا ضحكت و قالت لينا أحلللللى مفاجأه والله ، نطت من السرير و جات سلمت علينا ، قلت ليها دي حالة زول عيان ؟؟
ضحكت و قالت لي والله عيانـه ما تشوفي وقفتي دي و ضحكي ، قلت ليها سلامتك يا رب هسي بقيتي كيف ؟؟ قالت لي كويسه الحمدلله ، جيتوا متين و ليه ماف زول كلمني ، اتفضلوا.... قعدنا و قلت ليها جينا قبل شويه استقبلتنا أمك ... أسيل قالت ليها ما شاء الله أمك عسل و بتشبهك ، قالت ليها انتِ العسل والله .... لميس كانت ساكته ساي ، فجأه سمعنا صوت جوطه و كواريك ، طيف مشت على الشباك زحت الستاره عاينت تحت بعدها قفلت الشباك و غطتو بالستارهـ ، من الأصوات عرفت إنو دي أمها و شجن مرة أخوها ، طبعاً طيف حست بالإحراج ، جات قعدت و قالت لينا هااا أخباركم شنو و شغل ماشي كيف في الشركه يا مها ؟؟
قلت ليها تمام ، نفس الروتين ماف جديد ، قالت لي الروتين دا انا إشتقت ليهو والله ، أسيل قالت ليها راجيك كتير أحسن تقعدي و تريحي نفسك شويه ، الشغل ملحوق ، طيف قالت ليها بتقولي نفس كلام أمي 😂
شويه كدا جات الشغاله و جابت لينا العصير الخليناهو تحت ، بقينا نتونس نحنا الـ 3 و لميس ساكته ، طيف قالت ليها لموووسه ساكته ليه قولي حاجه !!؟
لميس إبتسمت و قالت ليها ما عـارفه اقول شنو عشان كدا فضلت أكون مستمعه جيده ، طيف ضحكت و قالت ليها قولي أي شي المهم شاركي معانا ، مثلاً كيف الجامعه معاك ، أحكي لينا قراية الطب كيف ، لميس قالت ليها صعبه والله ، والله مرات ببكي و بقرا ، أسيل قالت ليها أصلاً الطب دا صعب عشان كدا أنا فكرت اقرا أدبي ، ما اظن في أصعب من الطب ، قلت ليها في أصعب من الطب .... عارفه إنو الهندسه أصعب من الطب !! عارفه إنها أصعب تخصص في العالم ؟؟
طيف قالت لي فعلاً الهندسه صعبه شديد ، لميس قالت لي بس ما أصعب من الطب والله لو قريتوا البنقراهو براكم حـ تقتنعوا إنو الطب أصعب ، قلت ليها قرايتكم دي ولا شي قصاد قراية ناس هندسات ، ياخ ديل نص الملي بحسبوهو ، طيف قالت لي الناس قايله الهندسه تلوين و شخابيط و رسم بيوت 🙆
المهم إتونسنا مساااافه بعدها قلت ليها حـ نمشي بعد دا ، قالت لي والله إلا تقعدوا تتغدوا ، قلت ليها لا لا والله اتأخرنا .... فجأه جات أمها لقتنا واقفين ، قالت لينا على وين يا شابات ؟؟
طيف قالت ليها قالوا ماشين يا أمي !! قالت لينا بري والله ما بتمشوا هسي !! أنا متين قعدت إتونست معاكم ! حالتي جايه اناديكم تنزلوا تتونسوا معانا تحت ، رانيا ذاتا جات قبل شويه و معاها بناتها و أمي تعالوا إتعرفوا عليهم ، طيف قالت ليها مها بتعرف رانيا خالتي ، أمها قالت ليها آي عارفه ، ارحكم يلا ، قلت ليها مرهـ تانيه يا خالتو ، قالت لي عايزا تزعليني منك ؟؟ أرح أرح ما عايزا إعتراض !!
فـي الآخر إستسلمنا و نزلنا معاهـا تحت و سلمنا عليهم ، دكتورهـ رانيا قالت لي ديل بناتي ، دي لُدن و دي ليان ، و دي أمنا حاجه زهراء ... المهم اتعرفنا على بعض ، بناتها حلاتهم و شكلهم شهاده عربيه و اتأكدت من كدا لمن قالوا انهم كانوا عايشين برا السودان و جوا هنا عشان الجـامعه ، الإتنين بقروا طب وحده في السنه الأولى و التانيه في التالته ، عرفت كمان إنو عندهم أخوهم اكبر منهم برضو في الجامعـه آخر سنه ليهو ، طيف قالت لي متذكرهـ لمن كان اتصلت عليك و قلت ليك عاملين كرامه عشان خالتي جات من برا السودان!؟ بس ياها خالتي رانيا الكنت قاصداها ليك ....المهم إتونسنا قدرتنا ، جابوا كيك و مشروبات و حاجات خفيفه ، حبوبتهم الزهراء دي وناااااسه ، صراحة ما متأكده هل هي وناسه ولا أنا بقيت بتكيف لـ ونسة الحبوبات 😂 طبعاً عاينت لأسيل و قالت ليها شكلك معرسه ، أسيل اترددت قبل ما تجاوبها ، سبقتها و قلت ليها ايوه دي مرة أخوي و عندهم ولد ، خالتو رشيده أم طيف قالت لي يا حليلها عرست صغيرهـ ، حبوبه الزهراء قالت ليها كلنا عرسنا صغار ، أحسن ليها والله ، البوره ما سمحه ، طيف قالت ليها يا حبوبه ما تلبعي فينا 😂😂 ليان قالت ليها الكلام دا لينا نحنا ، انتِ مخطوبه و عرسك قرب مفروض طرف السوط ما يهبشك ، لميس قالت ليها السوط هبشني أنا كمان ، لُدن قالت ليها ما براك و قعدوا يضحكوا ، طبعاً هم شكلهم عارفين إني كنت معرسه و راجلي متوفي عشان كدا ما حبوا يجيبوا لي سيرهـ ، حبوبه الزهراء قالت لـ أسيل من بكرا تختي ليك حنه و ترسم و تدخني ، خليك مرهـ مجيه ، انتِ صغيره و حلاااتك و لو اتحننتي حلاتك حـ تزيد زياده ، أسيل قالت ليها حاضر يا حبوبه .... و نحنا بنتونس كدا فجأه جا واحد جاري و هو بضحك ، خالتو رشيده قالت ليهو بسم الله يا ولد في شنو ، مالك ما شايف الضيفات ديل ؟؟ قال لينا سلااااام كيفكم يا ضيفات ، حبوبتو جدعتو بـ المسند و قالت ليهو سلم زي يا ناس ، قال ليها يعني أنا هسي سلمت زي الحيوانات يا حـبـوبـه ؟ 😂😂 لمن قال كدا قعدنا نضحك ، طيف قالت لي دا محمد أخوي الكان قلت ليك عنو ، محمد قال ليها اممممسك !بتحكي لـ صحباتك عني ؟! نعم الأخت والله 😂 قالت ليهو دي مها صحبتي البرضو بحكي ليكم عنها و دي أختها و دي مرة أخوها.....فجأه جانا صوت قصي و هو بنادي بزهج ، محمد ، يا محمد ... يا زفت !!... حبوبه الزهراء قالت ليهو هببت شنو !؟
قام من مكانو و جرا على السلم قال لينا ما تقولوا ليهو إني فوق ، قصي جا داخل زهجان و كان عايزا يرفع صوتو و ينادي على محمد بس لمن شافنا سكت ، اظنو قايلنا مشينا ، خالتو رشيده قالت ليهو في شنو مالك يا قصي ؟؟
قال ليها محمد وين ؟؟
قالت ليهو مالو عمل شنو ؟
قال ليها بس هو وين ؟؟ جاكم هنا صح ؟؟
كلنا سكتنا ، بس لُدن قعدت تضحك ، عاين ليها و قال ليها محمد مشى وين ؟؟
قالت ليهو لو وريتك بعدين بليل تطلعنا مشوااار ، قال ليها ياخ ما فاضي ليك أنا و طوالي طلع زهجان ، دكتورهـ رانيا قالت الولد دا بقى قاعد على الهبشه ! 24 ساعه زهجان و قرفان ! خالتو رشيدهـ قالت ليها ليهو حق ، حبوبه الزهراء قالت ليهم طارت وين هسي ؟؟
خالتو رشيدهـ قالت ليها طلعت و عملت ليها حركه بـ عيونها نظام ما يتكلموا قدامنا ، طبعاً فهمت انهم قاصـدين شجن و هي ذاتا كان ظاهر عليها الغرور و التكبر حتى لمن سلمت علينا كانت رااافعه راسها فوق ، المهم بعد إتغدينا معاهم صلينا المغرب و قلنا ليهم نمشي بعد دا ، حبوبه الزهراء قالت لي ما قصرتوا والله يا بناتي ، الله يرضى عليكم ، لميس قالت ليها طيف ذاتا ما بتقصر على طول كانت بتجي تسلم علينا و تسأل عن مها ، خالتو رشيده قالت لي ربنا يديم صداقتكم خليكم كدا ماسكين في بعض و تعالوا شوفوا و اتفقدوا أحوال بعض ، في الزمن العلينا دا صعب الواحد يلقى صاحب وفي ، أنا والله من كلام طيف عنك رِدتك و لمن جيتي عرس قصي و شفتك رِدتك زياده ، قلت ليها تسلمي يا خالتو ، و طيف دي زي أختي والله ، دكتورهـ رانيا قالت لي ربنا يديم البينكم ، المهم و نحنا ماشين على الباب كل اتنين كانوا بتكلموا مع بعض ، طبعاً كلهم طلعوا عشان يقدمونا ، طيف و لميس ما عارفه كانوا بتكلموا عن شنو بس قبل ما نطلع طيف وقفتنا و قالت لـ لميس تعالي أوريك ليهو ، طبعاً أنا استغربت !! المهم دخلوا جوه و قالوا هسي برجعوا ، ناس حبوبه زهراء ودعوني و قالوا لي سلمي على ناس بيتكم و رجعوا دخلوا جوهـ ، دكتورهـ رانيا وصفت لي بيتها الكان فاتح عليهم و قالت لي سجلي لي زياره قلت ليها ان شاء الله ، جاها تلفون و مشت نهاية الحوش و بناتها مشوا لحقوا ناس طيف ، ما عارفه كانوا بتكلموا عن شنو ، دكتورهـ رانيا نادت خالتو رشيده و مدت ليها التلفون و بقت واقفه معاها ، كانو بعيدين شويه عننا ، كنا واقفين تحت شجرهـ جنب الباب ، أسيل قالت لي شكلها فردة حلقي وقعت مني جوهـ ماشه أشوفها قلت ليها طيب ، بقيت واقفه براي جنب الباب ، فجأه كدا جا قصي طالع ، طبعاً لمن كان ماشي علي قلبي اشتغل زي الدلوكه و أطراف يدي حسيتها بقت باردهـ ، لمن وصلني حسيت إنو ضربات قلبي بقت مسموعه ، ما قدرت أعاين ليهو في وشو رغم إني حاسه إنو نظراتو علي ، إتحرك خطوتين و مسك الباب بس فكاهو و إتلفت علي ، قال لي بنبرهـ حاده ياريت ما تكرري حركتك ديك تاني ... رغم إنو صوتو ما كان عالي بس إتلفت عشان اتأكد إذا أمو و خالتو سمعونا ولا لا ، بس كانوا مشغولين بالتلفون و صوتو ما وصلهم ، عملت نفسي رايحه و قلت ليهو حركة شنو ؟؟
لمن اتقدم علي و هو خاتي عيونو في عيوني بلعت ريقي و خفت زول يشوفنا ، طوالي إتحركت من جنبو بس فجأه كدا أحسو ليك جراني من طرحتي !! قلبي وقف بالجد !! طوالي عاينت على إتجاهـ أمو و خالتو ، برضو ما كانوا مركزين معانا ، بسرعه إتلفت عليهو و جريت منو الطرحه بزهج و قلت ليهو دي شنو الحركات البايخه البتعمل فيها دي ؟؟
قال لي نفس حركاتك و نفس بياختك ، قلت ليهو احترم نفسك و لو ما محترمها احترم أمك و خالتك و ناس بيتك و.... مرتك
حسيت الكلمه النطقتها دي الخنجر الإنغز جوا قلبي !!
واصلت كلامي و قلت ليهو أنا ما بحب الحركات دي ، راجع نفسك يا قصي ، راجع تصرفاتك و حركاتك معاي ، أنا ما بت شوارع ولا وحدهـ رخيصه عشان تفكر فيني بالطريقه دي و تتوقع إني اتجاوب معاك أو أرخي ليك الحبل و.....سكت لمن لقيتو مربع يدينو و بعاين لي جوهـ عيوني ، مسك طرف طرحتي تاني و شال عنها فرع شجرهـ صغير و رماهو على الأرض و فك لي الطرحه !!
ساعتها إتمنيت الأرض تتشق و تبلعني ، أكيد من دون ما أحس طرحتي مسكت في طرف شجرهـ عشان كدا كان في فرع في طرحتي و هو كان عايز يشيلو من الطرحه !!... هسي حيقول شنو عني ؟؟
حيقول إني خاته عيني عليهو و بفكر فيهو و زعلان عشان معرس كمان !!
حسيت شويه كدا و دموعي تنزل ، موقفي كان بايخ شديد ، هو ما قال حاجه بس كان مربع يدينو و بعاين لي و أنا تاني ما قدرت أرفع عيوني و أعـاين ليهو ، حسيت الجو اتوترت ، للحظات جاني إحساس إنو ماف زول غيري و غيرو في المكان ، المشي غلبني و بعد القلتو إتمنيت بس إني أختفي من قدامـو ، كسر الصمت و قال لي ما فهمت !! أنا بفكر فيك كيف ؟؟ و منو القال انتِ بت شوارع أو رخيصه !؟
لا عاينت ليـهو لا قدرت أتكلم ، قال لي بتكلم معاك جاوبيني لأنك.... فجأه ظهرت خالتو رشيده و قالت لينا بإستغراب في شنو ؟؟ عاينت لـ قصي و قالت ليهو مالك معاها ؟؟
قال ليها ماف شي ما تشغلي بالك .... أما أنا لا جاوبت أمو لا عاينت لـ وحيد فيهم ، بقيت أدعي إنو لميس أو أسيل يجوا و ينقذوني من الموقف دا و فعلاً جوا طالعين ، بإستعجال قلت لـ خالتو رشيده يلا مع سلامه ، ودعتها و فتحت الباب و طلعت قبل أسيل و لميس ، اتمنيت أجري بس و ما أقيف إلا في محطة المواصلات......
أسيل و لميس جوا طالعين و طيف وراهم ، قالت لي يا بت انتِ في كلب ساكيك ؟؟ مالك مستعجله كدا ؟؟ خالتو رشيده جات طالعه و قالت لي خلي قصي يوصلكم لأنو طالع ، قلت ليها لا لا ماف داعي ، قصي جا طالع و هو بلعب بمفتاح عربيتو ، طيف قالت ليهو وصلهم معاك يا قصي ، عاين لي جوهـ عيوني و قال ليها إذا هم ما عندهم مشكله بوصلهم معاي ، خالتو رشيده قالت لينا خليهو يوصلكم ساي..... أنا ما كنت عايزاهو يوصلنا بس ما كان في طريقه أقدر أمنعو بيها ، فـ استسلمت في النهايه ، ركبنا التلاته ورا ، قصي قبل ما يتحرك قال لينا مالكم كلكم قاعدين ورا ؟؟ خايفين مني ولا شنو ؟؟
لميس و أسيل ضحكوا و قالوا ليهو لا لا والله 😂 كنت أنا جنب الباب المقاصد الكرسي القدام ، أسيل قالت لي انزلي و أركبي قدام ، قلت ليها أنا بحب أقعد ورا ، نزلت هي و ركبت معاهو قدام بعدها إتحرك ، طول الطريق أسيل و لميس بتكلموا معاهو و أنا ساكته ، لمن وصلنا البيت شكرناهو و نزلنا ، أول ما فتحنا الباب كدا و دخلنا البيت لقينا عبدالله في وشنا ! قال لينا كنتوا وين للزمن دا !؟
قالها بنبره عاليه ، قلت ليهو مشينا لصحبتي و ديل مشوا معاي و أمي عارفـه ، عاين لأسيل و قال ليها انتِ استأذنتي من منو عشان تمشي ؟؟ قايلاها زريبة غنم هي عشان تطلعي و تدخلي على كيفك ؟؟
قالت ليهو عمتي ناهد عارفه 😊
هرشها و قال ليها ما تقولي لي عمتي عارفه ، أنا ليه ما عارف !! شايفاني صنم هنا !؟ جادعه الولد و ماشه تحومي ، قالت ليهو جدعتو في الشارع ؟ و انت مالك ما أبوهو ؟
جا عليها و قال ليها شفتي أوعك ترفعي صوتك علي ، أمي جات طالعه و قالت ليهو انت يا عبدالله كما عملت مشكله مع مرتك دي ما بترتاح !؟
أسيل قالت ليهو انت معتبرني مرتك عشان أكلمك ؟؟ مش شايفنا أنا و ولدك مصيبه و وقعت على راسك !؟ مالك و مالي أمشي وين ما عايزا و أجي في أي وقت بعجبني ، و ولدي الما معتبرو ولدك دا شفت لو لقيتو عايزا يتشق من البكى عديل ما تشتغل بيهو ، أنا عفيتك عن مسؤوليتي و مسؤوليتو و أصلاً ما قاعده اطلب منك حاجه فـ ياريت تخليني في حالي ، قالت كدا و طوالي مشت دخلت !!
قلت لـ عبدالله كدا مرتاح ؟؟
ما رد علي ، فتح الباب و طلع طوالي.....
المهم بعد يومين من الكلام دا ، فتحت مع عبدالله موضوع دراسة أسيل و قدرت أقنعو إنو يخليها تواصل قرايتها ، في البدايه كان معترض و قال كدا ما حتقدر تهتم بـ حمودي ، دخلت أمي في الموضوع و قبل ما افاتحو هو حنستها تحانيس عشان تقنعو معاي ، المهم في النهايه أقنعناهو ، أمي قالت ليهو ممكن تقرا منزلي و لو عايزا ممكن تمشي مرهـ أو اتنين للمدرسه ، بعد سلة روح وافق ، ياخ أسيل دي فرحت جنس فرح ، ما باقي ليها إلا تنطط ، في لحظة فرح بس حضنت أمي و قالت ليها شكراً ليك يا عمتي و جات ضمتني أنا كمان ، بتصرفها داك ياداب حسيت انها بالجد صغيره و شافعه ساي و على نياتها ، بعدها سقتها معاي السوق و اشترينا ليها أدواتها المدرسه و في اليوم البعدو عبدالله و أمي ساقوها و مشوا سجلوها في مدرسة غير القرت فيها....
طبعاً من اليوم داك أنا و قصي لو إتلاقينا بنعاين لبعض بس و ماف زول شغال بالتالي ، يوم أثناء ما أنا شغاله اتذكرت موضوع كنت اتكلمت عنو لـ مستر عزام مدير القسم حقنا ، وقت البريك مشيت ليهو في مكتبو بعد ما أذن لي بالدخول ، قلت ليهو مشغول ؟؟ قال لي لا اتفضلي ، قلت ليهو متذكر الموضوع الكان فاتحتك فيهو ؟؟
قال لي ايوه ما نسيتو و أنا وصلت فكرتك للإداره العليا بس ما أدوني أي رد ، غالباً هم ما خاتين فكره زي دي في بالهم و إلا كان اشتغلو على الموضوع دا من زمان ، قلت ليهو بس القسم دا مهم و حيكون إضافه حقيقيه للشركه ، قال لي شوفي نحنا بنشتغل بالموجود و بالبنقدر عليهو ، ما اظن الشركه تجازف و تفتح قسم يمكن تكون نسبة نجاحو ما واصله 50٪ بعدين أنا ما شايف أي مخترعين في البلد دي !؟ والله إلا لو قاصده الشفع البعملو ليهم عربات من علب صلصه ! قلت ليهو يا مستر .... قاطعني و قال لي المجال دا اسأليني منو هنا ، هو مجال حلو و بفتح أفاق أوسع و. بقدم و بطور الدول بس نحنا في السودان بعيدين كل البعد عن الإختراعات دي ، لا عندنا إمكانيات لا عقول مفكرهـ ، بس لو لسه مصره و متمسكه بفكرتك بتقدري تمشي و تقابلي الإداره العليا لو لقيتيهم فاضين أصلاً ، لأنهم حـ يوزعوك و نادراً ما يهتموا بـ آراء الموظفين ، قلت ليهو تمام ، أول ما إتحركت من جنبو و وصلت الباب قال لي عايني ، لمن إتلفت عليهو قال لي انصحك بـ مستر قصي ، يعني هو الوحيد الممكن يتفاهم مع الموظفين في الشركـه دي ، قلت ليهو تمام ، المهم طلعت من مكتبو و بقيت اطقطق في أصابعي ، قلت أمشي ليهو ولا لا ؟؟؟ خاصة بعد الموقف داك ، قلت أصلاً الموقف داك عدت عليهو أيام ولازم اتصرف عادي و أخلي في بالي فكرهـ وحده بس و هي إنو قصي دا مديري في الشركه و بس .... شجعت نفسي و مشيت على مكتبو ، لمن وصلتو اترددت ادخل ولا لا ، سكرتيرتو ما كانت موجوده ، قويت نفسي و ضربت ليهو الباب ، لمن قال اتفضل ، طوالي دخلت و قلت ليهو السلام عليكم ، رفع راسو عاين لي و قال لي و عليكم السلام ، إتحركت و مشيت وقفت قدامو و أنا مشربكه أصابعي في بعض ، عاينت لـ يديني و قال لي أنا بوتر للدرجـه دي ؟؟
قلت ليهو نعم ؟؟
قال لي خير ؟؟
قلت ليهو صراحة أنا ... أنا ....حسيت نفسي متلخبطه و نظراتو وترتني ، قال لي والله ما فهمت شي ، قلت ليهو مستر عزام فتح معاي موضوع .... قصدي أنا فتحت ليهو موضوع أو بالأصح إقتراح بتاع.....
الكلام طار لي من راسي و هو خالف رجل على رجل و بعاين لي جوهـ عيوني ، ارتبكت و نسيت أساساً أنا جيت لـ شنو !! دي أول مـرهـ اتصرف تصرف زي دي أو أحس بإحساس زي دا !!
جنبو كان في كباية مويه ، شالها و قام من مكانو و جا وقف قصادي و مداها لي ... في اللحظه ديك حسيت قلبي حـ يطلع من مكانو ، قال لي أشربي عشان تعرفي نفسك عايزا تقولي شنو ... نهاي ما عاينت ليهو في عيونو ، لمن مديت يدي عشان أمسك الكبايه بالغلط لمست يدو ، حسيت بتيار كهربائي و برعشه سرت فيني ، مسكت الكبايه بس ما مسكتها كويس و من الحاله الكانت فيني الكبايه وقعت من يدي و اتكسرت ، إتخلعت و نزلت تحت عشان ألمها و أنا شغاله ليهو آسفه آسفه ما قاصده والله ، قال لي اقيفي على حيلك ، قلت ليهو ثواني عشان.... قاطعني و قال لي قلت ليك اقيفي !! خليها ما قلت ليك نضفي المكان ، لمن وقفت على حيلي أشر لي على الكرسي و قال لي أقعدي ، لمن قعدت كنت بهز في رجلي ، قال لي الإتكسر دي كبايه و الموضـوع ايزي بس أحـكي لي مالك انتِ ؟؟😂😂
قلت ليهو ماف شي ، وقفت على حيلي و قلت ليهو لمن اتذكر الموضوع حـ أجي راجعه ، كنت حـ أمشي بس هو وقفني و قال لي من دون مناسبه ، امبارح داهمو المصحه العقليه و البت رجعت لأهلها .... إتلفت عليهو و قلت ليهو شنووو ؟؟
قال لي ما تابعتي الأخبار ؟؟... الكلام دا كان من بعد المغرب ، قلت ليهو لا لا ما سمعت ! قال لي زي ما اتوقعتي كان في طابق تحت الأرض بعد طابق التخزين ، و معظم الشغالين هناك ما كانوا عارفين بـ وجودو و في واحد تاني كان في نهاية المصحه بدخلو ليهو عن طريقه غرفه مبنيه في نهاية سور المصحه على أساس إنها مكان للحرس أو الغفير ، قلت ليهو الطوابق كان فيها شنو ؟؟
وقف على حيلو و دخل يدينو جوهـ جيوبو و قال لي ، الصحفيين ، الدكاتره ، السياسين ، الإعلاميين و أي زول كان بشكل خطر على الناس الفوق ديل كانوا بخفوهو ، جزو منهم ماتوا في المصحه دي و جزو بقوا مجانين و معظمهم كانت بتتم عملية بيع أعضائهم ، المصحه دي كان فيها كترة بلاوي ماف زول عارفها ، كل الناس الكانوا مسجونين فيها أهلها ما كانوا عارفين هم وين ، الحاله الطلعوا بيها من تحت الأرض كانت بطاله شديد ، الناس دي من سنين ما شافوا الشمس و لمن طلعوا كأنو كأنهم أشباح !!!
قلت ليهو ما قادرهـ أصدق !! معقوله في كدا في السودان دا ؟؟ قال لي و اسوأ كمان ، في الأكعب و الأخطر من عصام دا ، في قصص و خفايا كتيره بتحصل و ما بتخطر على بال أي زول !....بقى يحكي لي و أنا ساكته و بحاول استوعب ! ايوه كنت شاكه إنو في حاجه بس ما اتخيلت الموضوع بالفظاعه دي !!؟ قلت ليهو عشان كدا اسامي الناس ديل ما كانت موجوده في ملفات الأرشيف !! قال لي ماف أي معلومه حـ تتكتب عنهم لأنو الهدف إخفائهم من الوجود ! قال لي ثبت تورط ناس كبار مع عصام و للأسف كلهم هربوا ! قلت ليهو لا ياخ 💔
قال لي عصام موجود في السودان بس ديلك من قبل المداهمه بأيام طلعوا برا السودان ، شكلو الخبر واصلهم ، عاين لـ ساعة يدو و قال لي دا زمن الأخبار ... ثواني ، فتح الشاشه و جاب وحده من القنوات السودانيه ، كانت الأخبار ياداب باديه ، قلب القنوات السودانيه دي كلها و قال لي شايفه الخبر منتشر كيف و انتِ ما جايبه خبر !!
قلت ليهو ما قاعدهـ أخش النت و حساباتي من زمان قافلاهو ، واصلت كلامي و قلت ليهو معقوله ماف زول من زمان قدر يكشف البلاوي دي !؟
قال لي أكيد في و أكيد كتار حاولوا بس كانت بتتم تصفيتهم هم كمان ، يعني لو ما ماجد دا هو و أسرتو ناس نزيهه و يدهم واصله كان ممكن يتستروا على الموضوع دا ....
قلت ليهو راسي لف عديل ! يعني ميادهـ حالياً مع أهلها ؟؟ قال لي أيوه ، قلت ليهو و عرفوا إنو عصام هو السبب ؟؟
قال لي أيوهـ حالياً أهلها عارفين الحقيقه ، وقفت على حيلي و أنا في بالي إنو أهلها ما حيكونوا عرفوا الحقيقه كلها ، حقيقة قصة الإغتصاب الأنا متأكده إنو عصام وراها بس ماف دليل !! يعني مستحيل اقول ليهم أنا حاسه إنو عصام هو الإغتصب بتكم ! كمان ميادهـ ما في وضع يسمح ليها تقول الحقيقه !! قصي قال لي في حاجـه تانيه ؟؟
قلت ليهو لا ، وقفت على حيلي و قلت ليهو عن إذنك ، لمن وصلت الباب قال لي على فكرهـ أنا عارف الوترك شنو ، طبعاً ما قدرت أتلفت عليهو ، ضحك و قال لي أمشي و لمن تروقي شويه و تتذكري الموضوع الجيتي عشان تعالي راجعه ..... فتحت الباب بس و طلعت و انـا خاته يدي على قلبي !! طلعت تلفوني و إتصلت على دكتورهـ رانيا ، ردت علي في نفس اللحظه و قالت لي سمعتي الخبر صح ؟؟ قلت ليها ايوه و حكيت ليها باقي التفاصيل ، قالت لي الحمدلله إنو الحقيقه ظهرت ، اتكلمت معاها شويه و سألتها عن طيف قالت لي بقت كويسه ، يوم يومين و حـ تنزلي تداوم ، قفلت منها و اتصلت على طيف اتطمنت ليها و طبعاً اتكلمنا عن الحصل ، قالت لي الميديا كلها بتتكلم عن الموضوع ، الحصل دا ما حصل قبل كدا في السودان ، اتخيلي جابو الأخبار دي قبل شويه في قناة الحدث ، قلت ليها لمن أرجع البيت حـ أحضرها ، المهم بعدها قفلت منها و مشيت على شغلي و أنا من جواي بقول الحمدلله إنو في ناس كانت محبوسه تحت الأرض و قدروا يـطلعوا ، اتمنيت أشوف ردة فعل أهلهم لمن يشوفوهم بعد السنوات دي كلها .... ما صدقت متين الدوام خلص ، طوالي طلعت من الشركه ، المطرهـ كانت صابه ، ركبت و أول ما وصلت البيت لقيتهم كلهم قاعدين و فاتحين قناة الحدث ، قلت ليهم الخبر دا جايبنوا من امبارح ليه ما كلمتوني ؟؟
أمي قالت لي هو الكان عارف منو ؟؟ التلفزيون دا ذاتو ماف زول قاعد يفتحو ، بقت تقول حسبي الله ونعم الوكيل في عصام !! والله ما قادرهـ أصدق يخواني إنو دا كلو يطلع من الراجل الحيوان دا !!... شويه كدا سمعنا صوت الباب و خالتي جات داخله و هي تسكلب و شغاله الليله ووووبعليناااا ، جات داخله و لقتنا فاتحين الأخـبار ، لميس قالت ليها اتمنيت إنو يتقبض التافهه الحيوان ، أسيل قالت غيتو الراجل دا من شكلو الشر باين فيهو ، كريه خلاص نهااااي ما حبيتو ، خالتي قالت لينا انا مصدومه والله !! حماي دا كلب و حيوان و أي حاجه لكن ما اتوقعت منو كدا ! عاد فضحنا فضيحة السواد ، ما شفتو نسابتي متجرسين كيف ، خليتهم جايطين و داخلين و طالعين عاد عملتو شيييينه و الناس حـ تمسكها ذله لينا ، قلت ليها ما عندنا بيهو شغله ، دي عمايلو و هو المفروض يتحمل نتيجتها ، بقوا جايطين و بتكلموا عن الموضوع ، بعد مسافه قلت ليهم أنا لمن كنت في المصحه شفت ميادهـ هناك ....
كلهم إتلفتوا علي ، أمي قالت لي مياده منو ؟؟
خالتي قالت ليها ووووب نسيت و ما قلت ليك و أنا جايه منها هناك للشمار دا بس من كترة المصايب و المواضيع نسيت عايزا اقول ليك شنو ، قالوا ميادهـ زوجة عصام كان خاتيها في المصحه يعني كذب علينا كلنا لمن قال إنها هربت و هسي هي ما أهلها ، أمي ختت يدينها على راسها و قالت حسبي الله ونعم الوكيل فيهو !!.... خالتي قالت لي و ليه ما إتكلمتي ؟؟
قلت ليها في البدايه ظنيت إنو أهلها عارفين لحد ما مشيت ليهم في أمدرمان ! لميس قالت لي متين الكلام دا ؟؟
قعدت أحكي ليهم من لمن شفتها هناك لـ زيارتي لأهلها و الأسباب المنعتني أكلمهم و حكيت ليهم عن دكتورهـ رانيا و إنو الكشف الحكايه دي كلها ضابط صاحب أخو طيف و حكيت ليهم إني اتسللت و دخلت المصحه و في النهايه سلمت الفلاشه للضابط و و ....الخ
طبعاً كانوا بعاينوا لي و هم كل وحده خاته يدها على خشمها ! أمي قالت لي شنوووو ؟؟!! دا كلو حصل وين و متين !! خالتي قالت لي انتِ ليه ما بتكلمي الناس يا بت !! هسي لو حصلت عليك حاجه !! أسيل قالت لي والله بتبالغي يا مها ، أمي قالت لي أوعك تحكي الكلام دا لزول ، نسابتك لو عرفوا بكرا يلوموك و يقولوا انتِ السبب ، قلت ليها السبب في شنو ؟؟ خليهم يعرفوا سااااي ، يعني ولدهم يعمل السبعه و ذمتها و لمن الناس تكشف حقيقتو يقوموا يزعلوا ؟؟! خليهم يطرشقوا ساي .... طبعاً أبوي و عبدالله لمن جوا أمي حكت ليهم الكلام كلووو ، أبوي لمن ناداني بدون تردد إعترفت ليهو و وريتو العملتو ، والله قايلاهو حـ يجوط فيني و يقول لي عايزا تجيبي لينا بلاوي و قايله نفسك منو انتِ عشان تدخلي في حاجه ما بتخصك و و و ....الخ بس سبحان الله ما حصلت ردة الفعل الإتوقعتها !! قال لي كووويس شديد دا الصح خير العملتيهو و أنا متكيف منك والله ، عبدالله قال لي طلعت خطيرهـ عديل ..... طبعاً في حاجه كانت مزعلاهم شديد و أنا حسيت بيهم ، اتذكروا انهم و بسبب عصام دخلوني المصحه دي ، شفت الأسف و الندم في عيونهم ، قلت ليهم عصام واحد حيوان و ما بخاف الله ، بس سبحان الله سحرو انقلب عليهو ، دخلني المصحه لمصالحو الشخصيه و لو ما كان دخلني فيها ما كنت شفت ميادهـ هناك....
طبعاً ناس حينا و كل الأحياء الجنبنا قعدوا يتكلموا في الموضوع و عصام و عمايلو بقوا حديث الساعه ، طبعاً في اليوم البعدو طوالي خالتو بتول أم ميادهـ و معاها أولادها الإتنين مجدي و منير و أسمهان مرة ولدها ، غيتو عملوا عمايل في بيت ناس خالتو رقيه ، شاكلوهم قدرتهم و إتفشوا فيهم ، حاجه بتقول قالت ليهم حق بتي أنا ما عاااافياهو لـ ولدكم ، شاحده ربي لو مات ما يرتاح في قبرو و لو حي ما يرتاح و يشقى في الدنيا دي و يكوس الموت و ما يلقاهو.... طبعاً يومتها حصلت شكله طويله عريضه خلت معظم الجيران يقيفوا جنب باب ناس عمو عمران و يسألو الحاصل شنو ، هم عارفين بس عايزين يتشمروا أكتر ، عمو عادل و عمران كانوا يشيلوا و يعتذروا منهم و يقول ليهم حقكم علينا ، أمسحوها لينا في وشنا ، بعد الكلام دا بـ يومين تاااااني جوا أسرة مياده و المرهـ دي الشكله كانت أكبر ، خالتي خمت توبها و جات علينا و قالت لينا ألحقوا الناس ديلك شغالين خبيت ، قلنا ليها في شنو ؟؟
قالت لينا أهل ميادهـ جو تاني و المرهـ دي جوا كلهم و مرة أخوهم الكبير واااقعه خبيت في نوال و علياء ، أمي قالت ليها مالهم تاني ، آخر مره عمران و عادل هدوا النفوس و طايبوها !! قالت ليها أنا ما عارفه القال ليهم الكلام دا منو ، بس قالوا إنو عصام هو الإغتصب الشافعه الزمااان ديك بت أخوي مياده ، المعفن إغتصبها هو و اخواتو المعفنات لمن شافنو بعد ما عمل عملتو اتسترن عليهو و ميادهـ دي أظنها جات و شافتو عشان كدا غطس حجرها و وسخ سمعتها و قال إنها هربت و إنو الهربت معاهو هو الإغتصب البت .... أمي ختت يدها على خشمها و قالت لا حول ولا قوة إلا بالله!! حسبي الله ونعم الوكيل!!
طوالي طلعنا ما خالتي لقيناهم في الشارع و الناس ديل كلهم متلمين ، لمن قربنا و دخلنا جوهـ اللمه لقينا ليلى أم الاء الماتت مقهوره شديد و ماسكه نوال دي من شعرها و ممرمطاها في التراب و هناك بثينه و سهيلا ماسكين علياء و بكفتوا فيها و بكبوا ليها التراب في شعرها و سهيلا دي شغاله في الإتنين ، مرهـ تمعطي نوال و مرهـ تمعط علياء ، طبعاً خالتو رقيه و تيسير و وسام يصرخن ساي و كل ما يقولن عايزين يفكوا علياء و نوال سهيلا بتلزهم ، النسوان ديل جو مقهورات شديد ، ماف زول قدر يحجزهم ، أمي و خالتي دخلوا في نصهم و بقوا بحاولوا يهدوا فيهم ، حاجه بتول دي كانت بتتفرج بس ، قالت لأمي و خالتي انتوا أطلعوا من الموضوع دا ، الليله لو الدم دا سال من هنا ما بنتحرك شبر ، في عز الجوطه و الكواريك دي كلها أنا كنت بعاين لـ حاجه بتول و أنا مستغربه !! المرهـ دي و بنات أولادها ما قايله بطلع منهم تصرف زي دا !! لمن مشيت ليهم حسيتهم ناس طيبين و على نياتهم بس كمان الحصل لـ بتها و بت ولدها ما هين و البزعل بالجد إنو أخوات عصام عارفات و إتستروا عليهو !! بالجد صدق القال اتقي شر الحليم إذا غضب !!
طبعاً ماف زول قدر يوقفهم ، عملوا عمايل في نوال و علياء و على شقاوتهم في اليوم داك تحديداً ما كان في راجل في البيت لا عمو عادل لا عمران لا سامر ولا أولاد نوال ، والله دقوهم دق العيش ، على بال ما اتصلنا على عمو عمران و عادل و كلمناهم خالتو نوال و علياء ديل بقوا زي السلطه ، بشتنوهم بشتنة السواد ، رغم عمايلهم ما رضيتها ليهم بس ما قدرنا نعمل شي قصاد أهل ميادهـ ، وجعتهم كانت حارهـ ، بس انا المحيرني هم عرفوا من وين....
المهم لمن ناس عمو عمران ديل جوا أم مياده و نسوان أخوانها كانوا أخدوا حقهم و مشوا و قبل ما يمشوا قالوا لينا لو عايزين تمشوا تشتكوا أمشوا طوالي كدا نحنا بردنا قلوبنا ، والله لمن جا عمو عمران و شاف منظرهم و دمهم العلى الأرض طوالي وداهم أقرب مركز صحي ، قالوا ليهم ديل أخوات و اتشكلو ، سامر كان حالف إلا يمشي يشتكيهم و عمو عمران رغم زعلو و الغضب الكان فيهو منعو و قال ليهو خلينا اول شي نعرف سبب المشكله و نمشي نفهم منهم الحصل....
فعلاً مشوا و الحقيقه ظهرت و خالتو علياء و نوال لمن عمو عمران ضغط عليهن و شاكلهن إعترفوا بـ عملة عصام و تسترهم عليهو ، علياء قالت ليهو يعني عايزنا نفضح أخونا و ندخلو في سين و جيم ؟ خالتي قالت ليها أخوك الإتسترتي عليهو دا إغتصب بت و ماتت بسببو و ما إكتفى بـ دا ، إتمادى أكتر و وسخ سمعة مرتو و اتهمها اتهام باطل و كذب علينا كلنا حتى أهلها و خلانا نصدق انها خاينه و انها هربت مع الراجل الإغتصب بت أخوها مع إنو كلام ما بدخل عقل لكن نحنا الهُبل صدقناهو و طلعنا البت غلطانه و هي المسكينه 6 سنوات كانت في المصحه لحد ما بقت مجنونه جد جد و انتوا ما شاء الله ضميركم مريحكم و بكل أريحيه كنتوا بتتكلموا عنها و بتقولوا إنها هربت !! نوال قالت لـ عمو عمران اقسم بالله نحنا ما كنا عارفين انها في المصحه ، قايلنها هربت لأنو عصام قال لينا كدا ، عمو عمران ولا اتردد قدامنا كلنا و قدام أولادهن جاب سوط عنج و وقع ليك فيهم خبيت و عمو عادل كمان ما قصر ، دا يفك السوط و دا يمسكو ، ياخ دقوهم دق العيش و هن نسوان كبار......
رغم إنو عدا على الكلام دا أسبوع بس الناس لسه كانت بتتكلم فيهم و من يومهم نوال و علياء بقوا ما بطلعوا من بيوتهم ، أولادهم ذاتهم زعلوا منهن ....
كنت مع طيف في الكافتيريا و أنا بحكي ليها الحصل دا كلو خلال أسبوعين ، قالت لي مبالغه والله !!! بس يستاهلوا العملوهو ما هين ، أخوهم المعفن حرق قلب أمهات على بناتهم ، الله يأذاهو ، قلت ليها مرات بقعد و بفكر في الحصل دا كلو و بقول يمكن دا كلو حلم ، أحداث و قصص كتيره مؤلمه بتحصل قدامي و بحس نفسي عايشه قصة كل طرف ، بداية من قصتي لـ قصة اسيل و بعدها وسام و بعدها مياده و حاجه بتول و ليلى أم الاء البت المسكينه 💔
ربنا وحدو عالم بالألم و الغصه الجواهم ، عارف بالمروا بيهو و بالمُر الإتعايشوا معاهو ، ربنا يصبر أي زول محتاج الصبر و يسكن آلامو و يعينو على تجاوز و تخطي مُصابو الجلل ، قالت لي آمين يارب ، بعدها قالت لي نرجع لـ شغلنا ؟؟
هزيت ليها راسي و طوالي مشينا على شغلنا ، أول ما قعدت كدا ، طيف جات وقفت قصادي و قالت لي حلو إنو الواحد يحس بالناس بس ما كويس إنو يتغمص دورهم و يعيش آلامهم ، اتذكري إنو في رب أرحم مني و منك عليهم ، قلت ليها فعلاً ، أخدت نفس و قلت ليها أنا قبل يومين وعدت دكتورهـ رانيا إني حـ اتغير ، ما عشان هي في يوم طلبت مني كدا ، لا عشان أنا حاسه إني عايزا اتغير ، عايزا أطوي صفحة الماضي و أبدا صفحه جديدهـ ، قالت لي دا الكلام الصح و أنا معاك في كل خطوهـ 💜
المهم في نهاية الدوام طيف طلعت قبليني بـ ساعه عشان اليوم الشيله حقت بت جيرانهم و هي ذاتا بعد دا حـ تبدا تتحبس لـ عرسها ، المهم و أنا طالعه اتلاقيت مع قصي ، طبعاً لينا فترهـ متجاهلين بعض و أنا تاني ما رجعت ليهو للموضوع القلت نسيتو لمن جيت مكتبو ، حسيت إنو للسبب دا زعل مني و حركة تجاهلو بقت واضحه شديد ، أول ما إتخطانا قلت ليهو قصي.... قصدي مستر قصي ، لمن إتلفت مشيت عليهو و قلت ليهو كيفك ؟؟
قال لي تمام و انتِ قلت ليهو كويسه ....فـ بس ما عرفت ابدا ليهو من وين ، كنت مشربكه أصابعي و عايزا أتكلم ، لمن شفتو عاين لساعتو قلت ليهو بإختصار أنا ما عايزا يكون في عداوه أو حساسيه بيني و بين زول بالذات فـ الشركه ، قال لي طيب !! قلت ليهو ما عارفه بس حسيت انك زعلان مني !!
قال ليه ؟؟ قلت ليهو دا المحـيرني ، قال لي لا ماف كلام زي دا و الله لا جاب الزعل 😊
قلت ليهو تمام لأني صراحة قررت ابدا بداية جديدة و أقلب صفحة الماضي فـ ما عايزا أي حساسيه أو مشاكل في حياتي الجديـده ، عشان كدا حـ ابدا من هسي .... مديت ليهو يدي و قلت ليهو أنا مها..... مد لي يدو و قال لي و أنا دكتور خالد...
ماذا اكتب لك ِ اليوم.. ؟
شيئا من الحنين
أم قليل من العتاب
ام كثير من الشوق...
ف لك ِ بقلبي عبارات حب لا تكتب
ونبضات شوق لا توصف..
ها أنا اتظاهر بالصبر
بينما يتناول قلبي مسكنات الشوق كل لحظة..💜
لكاتبه
يتبع........
