بعدها إستمرت حياتنا كدا و تامر لسه مُصر إنو ما نسافر عشان نقابل دكتور ، قدر ما حنستو رفض ، يوم لقاني فاتحه اللابتوب و بحضر في فلم ، قال لي لغة الفلم دا فرنسيه ؟؟
قلت ليهو "سي جيست C'est juste" ، قال لي هسي فاهمه هم بقولوا في شنو ؟ قلت ليهو أيوه ، قال لي كويس والله ، دخلتي كورسات ؟؟
قلت ليهو أيوه كورسات اون لاين و كتب pdf , دخلت في كميه من القروبات الفرنسيه ، كنت أي جمله عايزا اعرفها بالفرنسيه بدخل النت بترجمها و بشوف نطقها ، قال لي حسستيني انو الفرنسيه ساهله ، قلت ليهو هي لا ساهله لا صعبه ، محتاجه صبر و إصرار ، أنا بديت من الصفر ، اتعلمت الأحرف الفرنسيه ، بعدها تكوين الكلمه و الجمل مع طريقة النطق ، قال لي بحب الناس البتشتغل على نفسها ، كونك تتعلمي تعليم ذاتي دي ما حاجه ساهله و زي ما قلتي محتاجه صبر و إصرار ، أنا فخور بيك جداً 💜
إبتسمت و قلت ليهو حالياً مفكره أركز على اللغه الإسبانيه شويه ، قال لي حاولتي تتعلميها قبل كدا ؟؟ قلت ليهو أيوه و بعرف فيها شوية جمل و كلمات ، قال لي ممتاز شديد والله ! ليه انا ما عندي علم بالإبداع الفيك دا كلو !؟ قلت ليهو المشاكل شغلتني و نستني كنت بعمل في شنو ذاتو 😂 ضحك و قال لي معناها بطلي مشاكل و ركزي على مواهبك و طلعي أحسن ما عندك ، قلت ليهو ان شاء الله ، قال لي لغاتك دي حـ تنفعك لـ قدام و حـ تفتح ليك أفاق أوسع ، قلت ليهو أنا ما اتعلمتهم عشان شغل و كدا ، كان حب إستطلاع ساي مني 💜🌷قال لي ايوه عارف بس برضو حـ تنفعك ، قلت ليهو ان شاء الله ، قال لي اول كلمه قلتيها لي معناها شنو ؟؟ قلت ليهو :" سي جيست ، C'est juste" ؟؟ معناها هذا صحيح ، قال لي طيب ممكن تقولي لي جمل بالإسبانيه و معناها ؟؟ قلت ليهو أيوه ، مثلاً : "c'est mon avis , سي مون افي " بمعنى هذا رأيي ، و Prenez votre temps ، بغوني فوتغ طون ، بمعنى خذ وقتك
، قال لي ما شاء الله عليك .... حبيبتي الشاطره ، لمن قال لي كدا قلبي عمل شححح مع إنو معودني على كلام زي دا بس في كل مـره بتوتر لمن يقول لي كدا ....
المهم لمن إمتحانات السمستر الـتاسع بدت ، طيف كانت بعد كل امتحان بترجع معاي البيت عشان نقرا للماده الجايه ، هي قطعت علاقتها مع ناس قبس و آيات و حسيتها بقت شبه وحيده رغم كترة الناس حولينها في الجامعه ، طبعاً هي دائماً بتقول لي أرح معاي البيت بس انا بتحجج ليها ، يوم جات معاي البيت و قالت لي ناس أمك مش ساكنين قريب منكم ؟؟ قلت ليها ايوه ، قالت لي طيب ليه ما حصل صادفتهم في بيتك ! قابلت خالتك بس .... عشان ما تقعد تحقق معاي و تسألني اسئله كتيره كذبت عليها و قلت ليها قاعدين يجوا بس ما حصل صادفتوا بعض ، قالت لي خلاص أرح ليهم ، قلت ليها ما هسي بعدين ، قالت لي لا لا بعدين أنا حـ أرجع ، المغرب ما حـ يلقاني هنا ... أصرت شديد إنو نمشي ليهم ، المهم لبست عبايتي و كلمت تامر اننا حـ نمشي ناس أمي ، قال لي طيب ، طبعاً ناس البيت اتفاجؤا لمن شافوني ، طيف كانت متحمسه لـ شوفتهم أكتر مني ، براها عرفتهم على نفسها و قالت ليهم أنا صحبتها في الجامعه و حكت ليهم انها بتجيني على طول تقرا معاي بس ما حصل صادفتهم ، قالت ليهم عشان كدا جيت أشوفكم ، أمي قالت ليها نورتينا والله ، جات أسيل عاينت كدا و مشت ، لميس جابت الضيافه و قعدت معانا !! أمي بدت تتونس مع طيف و تسألها هي بت منو و أهلها منو و كدا ، حسيتهم اندمجوا مع بعض ، لميس ذاتا بقت تتونس معاهم ، رغم إنو طيف صحبتي أنا إلا اني حسيتها بتعرف أهلي أكتر مني ، طبعاً أنا كنت بتكلم لمن طيف تسألني عن حاجه ، بعد شويه عبدالله جا داخل ، سلم علينا و طلع مشى أوضتو ، طبعاً هو و مرتو قعدوا في الأوضه الكنت بقعد فيها براي في نهاية البيت ، قريب للمغرب كدا قلت لـ طيف ارح بعد دا أنا راجعه البيت ، أمي قالت لي تمشوا وين ! خليها تقعد تتغدا ، طيف قالت ليها لا لا مره تانيه ، اتأخرت يا خالتو ، أمي حلفت إلا طيف تقعد تتغدا ، قالت لـ لميس قومي جهزي الغدا ، طيف قالت ليها لكن يا خالتو.... أمي قاطعتها و قالت ليها والله لو ما اتغديتي ما تطلعي من بيتي ، طبعاً أنا كنت بعاين لأمي ساي ، طريقتها البتتكلم بيها و تتعامل بيها مع الناس أنا بتمنى إنو تعاملني بيها 💔
فجأه تلفون طيف رن ، قالت لأمي شفتي يا خالتو دا قصي أخوي ، الليله حـ يضبحني ، أمي قالت ليها جيبي التلفون أنا بتكلم معاهو ، فعلاً أمي شالت التلفون و ردت عليهو ، بعد السلام عرفتو بنفسها و قالت ليهو أختك معانا و أنا أصريت إنها ما تمشي إلا تتغدا .... لا لا ما حـ تتأخر ، طيب هاك ليها ، المهم طيف مشت إتكلمت مع أخوها و جات راجعه ، أمي قالت ليها بعد دا أقعدي مرتاحه و خلي القلق ، المهم ختينا الغدا و بدينا ناكل ، طبعاً أسيل ما كانت معانا ولا في زول قال أمشو نادوها ، قلت شكلهم بعاملوها بنفس الطريقه الكنت بتعامل بيها في البيت دا ، بعد الغدا جابوا الشاي ، طيف قالت ليهم والله ما كان في داعي للتعب يا جماعه ، لميس قالت ليها ماف تعب والله و شاي المغرب دا ثابت عندنا ، المهم بعد شربنا الشاي و طلعنا ، أمي قدمتنا لحد الباب و قالت لـ طيف كرريها تاني ، طيف قالت ليها لمن بتك الكعبه دي تمشي معاي بيتنا ، اتخيلي نحنا صحبات من زمان بس نهاي ما حصل مشت معاي البيت ، أمي ضحكت و قالت لي أمشي معاها طوالي يا مها ، المهم ودعناها و مشينا ، طيف تلفونها تاني رن ، قالت لي دا قصي ، بعد ردت و قفلت قالت لي قال جاي علي ، طبعاً أخوها عارف بيتي لأنو قبل كدا جا ساقها ، مشينا وقفنا جنب بابنا ، قلت ليها يمكن لسه أرح خشمي معاي ، قالت لي لا لا هسي بجي ، أحسن اقيف ليهو هنا ، المهم وقفنا و بقينا نتكلم ، قالت لي أنا كنت مفتكره انك رسميه مع الناس الغريبه ، بس لاحظت حتى أهلك بتتكلمي معاهم برسميه !! قلت ليها طبعي كدا ، قالت لي صحي اتذكرت ! البت القبيل الجات عاينت و ما سلمت دي منو ؟؟ قلت ليها مرة أخوي ! قالت لي بالجد !؟ عندك كم اخ انتِ غير الجا قبيل و سلم علينا ؟!... قبل ما أرد أخوها جا بعربيتو ، قلت أحسن ، ريحني من الجواب لانو لو قلت ليها إنو عبدالله معرس حـ تستغرب و تشك ، لأنو لسه صغير و اسيل كمان صغيره ، أخوها وقف و نزل قزاز العربيه ، قال لينا السلام عليكم ، قلنا ليهو و عليكم السلام ، أشر لـ طيف عشان تركب ، ودعتني و مشت معاهو ..... المهم الإمتحانات عدت بصعوبتها و سهولتها ، أنا عملت العلي و اجتهدت قدرتي عشان كدا واثقه من نتيجتي و متأكدة انها حتكون نضيفه ، فعلاً لمن ظهرت بعد أسبوعين كانت نضيفه و المعدل عالي و طيف نفس الشي ، فرحت شديد و قالت لي تاني كل امتحان حأجي أصبها معاك ، أنا معدل زي دا ما كنت بحلم بيهو حلم ، قلت ليها دا كلو بسبب إجتهادك ، قالت لي انتِ علمتيني الإجتهاد ، طبعاً تامر انبسط أكتر مني ، قال لي بالمناسبه دي عازمك برا ، قلت ليهو طوالي ، مشينا أرقى مطعم و اتغدينا هناك و إحتفلنا بالمناسبه دي ، حقيقة يعني تامر كان أول زول يخليني أعرف قيمتي ، و أول زول يصفق لي على إنجازاتي .....
بعدها بديت سمستر 10 آخر سمستر ، أنا و طيف بقينا أفضل ثنائي في الدفعه كلها من كل النواحي للأسباب دي قبس و آيات حاولوا يقربوا من طيف و يصاحبوها من جديد ، طبعاً عشان الدكاتره و الأساتذه بشكرونا على طول و بقولو للدفعه ابقوا زي مها و طيف ، تساليمنا أول باول بنسلمها ، كل البرامج و لغات الحوسبه بنعرف نشتغل بيها ، يعني في الجامعه بقى يشار علينا بالبنان ..... المهم قريب لإمتحانات الفاينل تامر مرض ، غبت عن الجامعه 3 أيام و بقيت قاعده معاهو ، قال لي إمتحاناتك قربت و ما في صالحك تغيبي الجامعه ! قلت ليهو نحنا أساساً خلصنا ، باقي الإمتحانات بس و حأقرا في البيت ، تامر تلات أيام هو مريض ، أصرينا عليهو يمشي الدكتور ، مشينا معاهو أنا و سامر أخوهو ، طلع عندو ملاريا و تايفود و إلتهاب ، أخدنا العلاجات و رجعنا البيت ، أمو و أختو جوا شافوهو و اتطمنوا عليهو ، أمو قالت ليهو أرح اقعد معاي في البيت عشان تاخد علاجك اول بأول ، أنا قاعده و أختك قاعده ما بنقصر منك ، قلت ليها لو قعد هنا ما حـ ياخد الأدويه يعني ؟؟ قالت لي ما قصدي كدا بس انتِ مع الجامعه ما أظنك تفضي ليهو ، قلت ليها الجامعه أنا لي منها 3 أيام عشان تامر مريض و ما عندي مشكله أغيب عنها اكتر ، قالت لي كان كدي خلاص ، ما تفهمي غلط ، المسا أهلو كلهم جوا يكفروا ليهو ، حبوبتهم آمنه ذاتا جات و ناس بيتنا لمن عرفوا برضو جوهو ، طبعاً أولاد أختو ما فارقوها ثانيه ، دائماً معاهو على طول و إلا ما يقول عايز مويه أو عصير طوالي بجروا يجيبوها ليهو ، المهم جات الإمتحانات و عدت على خير و تامر الحمدلله اتحسن ، بعدها بدت المناقشات و برامج التخرج ، أنا كلمت تامر إني ما عايزا أي حفلة تخرج ، حـ استلم شهادتي و خلاص ، قال لي لا ، حـ تتخرجي زيك و زي كل الناس ، قلت ليهو الحفله ما مهمه بالنسبه لي ، قال لي اعتبريها حفلة توديع لـ دفعتك ، قلت ليهو والله دفعتي آخر همي ، من يومي ما عندي ليهم حاجه ولا حاسه بذرة حزن عشان ما حـ ألاقيهم تاني .... غيتو قدر ما حاول يقنعني بحفلة التخريج دي رفضت فـ استسلم في الآخر بس قال لي حـ اعمل ليك حفله هنا .... فعلاً عملها و عزم كل أهلو و معارفو و الما حضروا عرسنا عرفني عليهم ، من ضمنهم كان في أهل زوجة مياده مرة عصام ، مياده دي لمن هربت أنا عمري كان 15 سنه ، من غابت ليها 6 سنوات ، لحد الآن ما ظهرت ولا حاولت تطمن أهلها عليها.....
تعالوا أحكي ليكم شويه عن مياده ... أنا ما احتكيت بيها كتير ولا بقدر أجزم إذا الإنقال عنها صحيح ولا لا ، أنا اصلاً عمري كلو قضيتو في بيتنا بعيداً عن الناس ، بس السمعتو عنها بعد ما هي هربت ، إنها كانت بتخون عصام مع واحد كدا و هو نفسو الهربت معاهو ، بس كمان في قصه تانيه غريبه و مناقضه لحكاية انها هربت مع الراجل الخانت بيهو عصام ، مياده دي كان عندها بت أختها جاتها عشان تقرا المدرسه ، عمر البت كان 15 نفس عمري ، كانت في أولى ثانوي ، أهلها دسوا قصتها بس السمعناهو من بعيد إنو الراجل الكانت بتجيبو خالتها يلي هي مياده اغتصبها و البت ماتت ، أنا المحيرني ليه مياده تهرب مع الراجل الإغتصب بت أختها !!
في نهاية اليوم شكرت تامر على الحفله العملها عشاني ، قال لي لو سمعت منك كلمة شكراً دي تاني حـ أزعل منك والله ، الشكر بكون للغريب ما للقريب ، مفهوم ؟! ابتسمت ليهو و قلت ليهو مفهوم ، قلت ليهو أرح خلينا نقعد برا ، حابـه أتونس معاك ، قال لي قلقتيني بـ حابه أتونس معاك دي ! بس ما يكون عايزا تجيبي لي سيرة العلاج و السفر برا السودان !؟ قلت ليهو صراحة دا الكنت عايزا أتكلم معاك فيهو ، تامر فيها شنو لو حاولنا !؟ ما حـ نخسر شي صدقنا ، خت يديهو على أكتافي و قال لي أنا انكتب لي كدا ، دا قدري ، أنا ما عايز نسافر و أعيش نفس الإحساس مرهـ تانيه ، قلت ليهو ما معقوله يا تامر تكتفي بنفرين تلاته من الدكاتره ! خلينا نسافر و نلف قدرتنا و نقابل كل الدكاتره و لو لا قدر الله نفس النتيجه على الأقل حنكون وصلنا لقناعه تامه و بردنا قلوبنا ، قال لي متذكره لمن قلت ليك مع الزمن الوضع حـ يختلف و حـ تزهجي و تضايقي لمن تتذكري إني.... عقيم !؟ قلت ليهو تامر أنا بقول كدا عشانك انت ! قال لي لا انتِ بتقولي كدا عشان نفسك و أنا عاذرك لأنو صعب الواحد يتقبل إنو حياتو تكون بالشكل دا ، قلت ليهو تامر والله انا .... قاطعني و قال لي قسمتي أنا راضي بيها و زي ما قلتي ربنا عوضني في أولاد أختي ، أنا بعتبرهم زي أولادي و الله ، قلت ليهو طيب آسفه ، ضماني عليهو و قال لي على فكره أنا عند كلامي ، من دون حرج يا مها بتقدري تطلبي الطلاق في أي لحظه ، زحيت منو و عاينت ليهو بحده بعدها ضربتو على كتفو و قلت ليهو ما حـ تتخلص مني ، ضحك و ضماني عليهو تاني ، قلت ليهو انت ما ملاحظ انك اليوم ضاميني اكتر من 4 مرات ؟ قال لي انتِ لاقيه زول يضمك !؟ قلت ليهو و انت لاقي زول تضمو !؟ قال لي ايوه في كتييير ، لمن ضيقت ليهو عيوني ، ضحك و قال لي زي أمي ، أبوي ، أخوي ، رؤى و أخوانها ، تيسير أختي ، حبوبه آمنه و..... قاطعتو و قلت ليهو خلااااص خلاااااص ....
تاني يوم طوالي طيف اتصلت علي و قالت لي إنو خالتها جات امبارح من برا السودان و بكرا عاملين كرامه قالت لي لازم لازم تجي ، قلت ليها بحاول ، قالت لي لو ما جيتي بزعل منك والله .... أنا ما اكدت ليها إني حأجي بس كمان لو كنت رفضت كانت حتعمل لي موضوع و تقول لي ما جايه ليه و و و .... أنا والله زحمة الناس دي ما بتنفع معاي والله فـ ما بالكم بناس ما بعرف فيهم غير زول واحد ، يلي هي طيف ، المهم تاني يوم ما مشيت و لمن طيف اتصلت علي ما رديت عليها عشان ما تنق في راسي و هنا أنا بالجد غلطت و ما كان اتهرب ، كان أرد و اقول ليها أنا ما جايه و خلاص ، للأسباب دي أنا ما بحب أكون علاقات ، بكرهـ الإلتزامات ، بحب اكون حرهـ في أفكاري و تصرفاتي ، بعد اليوم داك طيف زعلت مني و بقت لا بتتصل لا بترسل لي ، خليتها على راحتها ، يمكن لأني ضامناها ؟؟ ضامنه إنو هي كدا كدا براها حـ ترجع لي ولا عشان أنا من البدايه ختيت ليها النقاط على الحروف و وريتها أنا شنو !؟!!
