طبعاً دكتور خالد ما رد علي خالص رغم إنو قرا رسالتي !! لحد تاني يوم ما كان في رد ، إحترت !! قلت يمكن انشغل ، المهم جهزت نفسي عشان أمشي الجامعه ، أول ما طلعت لمحت عبد الله أخوي من بعيد واقف مع بت و بشرب سجارهـ كمان !! قلت لو أبوي شافو حـ يطير ليهو السجاير دي من راسو ، بس عبودي مكار و بقدر يكذب على أبوي و عندو قدره كدا مبالغه على الإقناع ، لدرجة إنو عادي يخليك تكذب الحاجه الشفتها بعينك !!
قلت ما حأهتم ، ابوي براهو مدلعو و خارب طبعو و ما برضى فيهو ، طبعاً نسيت تامر خالص ما اتذكرتو إلا لمن طلع في وشي ، قال لي صباح الخير يا حب ، نططت ليهو عيوني و قلت ليهو أهلين صبـاح النور ، قـال لي كنتِ حـ تمشي من دون ما تتصلي علي ؟؟ ....لمن لقاني متردده و ما عارفه أقول شنو قال لي المهم خلينا نمشي عشان ما تتأخري ، ركبت معاهو و أنا ساكته و هو عكسي طول الطريق كان بونس فيني و أنا بس بجاوب لمن يسألني ، المهم لما وصلنا الجامعه قال لي اول ما تخلصي اتصلي علي ، قلت ليهو تمام ، قبل ما انزل مسك يدي و كان ناوي يقول حاجه بس انا إتوترت و براحه سحبت يدي منو و نزلت ، لوحت ليهو و مشيت دخلت الجامعه و أنا خاتـه يدي على قلبي ، أول ما وصلت القاعه لقيت ناس طيف واقفين جنب الباب ، طبعاً كنت راسمه و محننه يديني ولابسه الخاتم فـ هم عاينوا لي بإستغراب خاصة إنو الرسم مبالغ فيهو و واضح إنو رسم عروس ، قبس ضحكت و قالت لي عرستي في اليومين ديل ولا شنو ، قلت ليها فعلاً ، آيات قالت لي ما جاده والله ، دخلت خليتهم واقفين ، قعدت في البنش الأول ، طيف جات قعدت جنبي و قالت لي مهاوي دا شنو ؟؟ قلت ليها رسم و حنه !! قالت لي المناسبه شنو ؟؟ قلت ليها عرست ، عاينت لي مسافه بعدها قامت من جنبي و طلعت ، المهم بعدها بدقايق الدكتور جا داخل و هم دخلوا قبليهو ، بعد المحاضره خلصت و طلعت طيف جات لاحقاني ، جرتني من يدي و ودتني على البينشات البرا ، قعدتني و قالت لي ممكن أفهم الحصل شنو ؟؟ كيف يعني عرستي ؟؟ قلت ليها عادي زي ما الناس بتعرس !! قالت لي عرس في يومين و من دون ما تكلمي زول !! في زول جبرك صح ؟؟ أحكي لي !!
قلت ليها لا ماف زول جبرني و العرس دا تم برضاي التام و أصلاً هو كان عقد بس ، قالت لي برضو ما كلمتيني !! مها أنا ما عندي إعتراض على طبعك لأنو في حاجات الواحد ما بقدر يتخلص منها بسهوله زي الإنطوائيه بس دا برضو ما بمنعك تتصلي علي أو على الأقل ترسلي لي رساله تكلميني فيها !!
ما عرفت أقول ليها شنو لأنو كلامها صح ، سكتت مسافه بقت تعاين لي و أنا مرهـ أعاين ليها و مرهـ لا ، بعدها جوا قبس و آيات ، قالوا لي يا بت جادهـ انتِ ؟؟ بالجد عرستي ؟؟ قلت ليهم ايوه و طوالي شلت شنطتي و طلعت مشيت البيت ، طبعاً تامر دا نهاي ما اتذكرتو إلا لمن اتصل علي و قال لي خلصتي ولا لسه ، لمن قلت ليهو أنا في البيت ، سكت مسافه بعدها قال لي طيب تمام ، كنت ناويه اقول ليهو آسفه أنا نسيت بس حتى التوضيح أو التبرير بغلبني ....
طبعاً لميس بقت قاعده لي في العزيزه ، 24 ساعه جايطه و منتظراني أهبشها بس عشان تتفشى ، ديك كانت أكتر فتره شفتها فيها زعلانه و متعصبه ، سمعت أمي يوم قالت ليها خلاص ولد الناس عرسها و انتهى و انتِ ماف داعي الزمن كلو تقعدي تتبكي عليهو و تضيعي نفسك ساي ، ركزي لي على قرايتك بس و بكرا يجيك الأحسن و الأفضل من تامر دا بـمية مرهـ ، ما معروف يمكن يجيك دكتور أو مهندس ، اتطمني بس و صفي دهنك طول ما أمك حيه ما بتعرسي أي زول و السلام و بعدين انتِ ما شاء الله عليك ناقصك شنو عشان تقعدي تبكي على تامر ؟؟
قالت ليها يا أمي أنا مشكلتي انها عرستو حساده و حقاره بس و هي ما عايزاهو ، هدفها تشوفني زعلانه و ببكي 24 ساعه ، كدا هي بترتاح و قلبها الأسود المولع نار ببرد شويه ، أمي قالت ليها عشان كدا بطلي بكى و تامر دا خليهو ليها ، أختك دي حيرتني معاها ، يمكن أنا لو كان جبتها من الشارع و ربيتها ما كان اتعاملت معاي كدا !!
طبعاً انا إستغربت !
كلامهم وجعني بس تركيزي كلو كان على كلام أمي الآخير !! معقوله في زول ما بشوف غلطو ؟؟
أمي ما حاسه انها ظالماني ؟؟ يا ربي ما ملاحظه انها بتفضل لميس علي ! ما شايفه أنا موقعي وين في الأسرهـ دي !؟ يا ربي ما حصل سألت نفسها أنا ليه نافرهـ منها كدا !! ما حاسه انها مقصرهـ في حقي !! بتشوف إني قليت أدبي عليها و إني ما محترماها بس سبحان الله ما بتقدر تشوف انها بتعاملني بنفس الطريقه و هي الخلتني اتعامل معاها كدا و وصلتني للحاله دي !!...أنا اتمنيت بالجد أكون داخل عقل أمي دي عشان اشوفها بتفكر كيف و شايفاني شنو !!
بعد مسافه شلت تلفوني و دخلت الفيس ، لقيت دكتور خالد نشط الآن ، قلت ليهو يا دكتور ممكن سؤال ؟؟
قرا رسالتي بس ما رد عليها ، ما عرفت السبب شنو بس الفهمتو إني بعد دا مفروض ألم نفسي و ما أعمل ليهو وجع راس ، هو كمان عندو حياتو و مشاكلها و المرضى تبعو الدااافعين ليهو قروش ، كتر خيرو استحملني شهرين ...طلعت من الفيس و ختيت تلفوني على جنب و حسيت الدنيا دي مضلمه ، أنا طول عمري كنت كتومه و ما بحب اشارك زول لأني عارفه ما كل الناس حـ تفهمك ولا حـ تحس بيك و يمكن يقولوا عليك نكدي و كلامك كتير لأنك حكيت ليهم أكتر من مرهـ ، دكتور خالد ما كان مجبور علي بس استحملني لمن زهج و أنا ما حـ ألومو و أساساً ما كنت متوقع منو شي زياده ، المهم بعدها عدت الأيام زي ما هي ، من الجامعه للبيت و من البيت للجامعه و طبعاً تامر بقى جزو من يومي ، كل يوم بوصلني معاهو ، مرهـ قال لي عازمك بس أنا رفضت ، هو ما قال حاجه بس حسيتو زعل و أنا ما قادرهـ اعمل ليهو شي ، لو اليوم راضيتو و غصبت نفسي أكيد بكرا ما حـ اعمل كدا و أصلاً أنا من مـده طويله بطلت أغصب نفسي على حاجه ، و طيف زعلت فترهـ بس تاني جات راجعه ، بالجد البت دي حيرتني !! ما عارفه هي الجابرها علي شنو !! عندها اصحاب قدر التراب خارج و داخل الجامعه بس مع ذلك بتجيني على طول و بتسأل عن حالي حتى و هي زعلانه مني !! آخر مرهـ قالت لي أنا سامحتك رغم إني عارفه إنو أنا ما بفرق معاك بس انا بعتبرك صديقتي زيك و زي قبس و آيات ، طبعاً كلامها مساني ، أنا حاسه بيها والله بس مرات كتيره الكلام بغلبني ، طيف دي بريئه و طيبه و دمها خفيف و بتسامح على طول ، لـ مرهـ وحده حركت لساني و حاولت أعبر ، قلت ليها أنا ما قصدي أزعلك والله بس.....ما قدرت أكمل ، قالت لي بس طبعك دا !! أنا عارفه والله عشان كدا ما بحب اضغط عليك أو احسسك انك لازم تقدمي لي حاجه أو تعتبريني صديقتك ....قالت كدا و كانت حـ تمشي ، استعجلت و قلت ليها بس أنا بالجد بعتبرك صديقتي !! إتلفتت علي و هي بتضحك قالت لي تطور ملحوظ 😂🤣 قلت ليها المهم ممكن تقعدي معاي شويه ؟؟ قالت لي من دون ما تطلبي ، المهم قعدت و كالعاده هي بتتكلم و أنا بسمعها بس كنت مستمتعه و مهتمه بكلامها عشان ما تحس إني متجاهلاها ، في نهاية ونستها قالت لي على فكره بعد اسبوعين عرس قصي أخوي و لازم تكوني موجوده ، قلت ليها ان شاء الله ، قالت لي عارفاك بتمشي فيني بس انا المرهـ دي مُصرهـ شديد و لو اضطريت حـ أجي عديل بيتكم ، فجأه جات فاتن سلمت علينا و قالت لـ طيف بقيتي مفتريه ، من قبيل بتعايني لي و غالبك تجي تسلمي علي أو أقلاها كان ترفعي لي يدك ! طيف قالت ليها الكلام دا بنطبق عليك و أساساً انتِ براك خاصمتيني ، فاتن قالت ليها أنا ما مخاصماك و خلاص أنسي الحصل ، ناس خالتو رشيده كيف ، قالت ليها كويسين ، سكتت مسافه كدا بعدها قالت ليها و قصي أخبارو شنو بقيت ما بشوفو في الجامعه !!! طيف قالت ليها قصي مشغول بتجهيزات عرسو .... طبعاً فاتن كانت بتشرب في مويه لمن طيف قالت كدا هي إتشرقت و قالت ليها شنووو ؟؟ قالت ليها و العرس بعد أسبوعين كمان ، فاتن وقفت على حيلها و قالت ليها دي شنو الكعوبيه دي !! ليه ما كلمتونا ! طيف قالت ليها والله الناس كلها عندها علم حتى ناس بيتكم ، ما عارفه كيف انتِ ما سمعتي !! ... طبعاً فاتن وشها جاب ألوان ، شالت شنطتها و مشت ، من ردة فعلها عرفت إنها خاته عينها على أخو طيف ، طيف ضحكت و قالت لي المصلحجيه دي شوفتيها اتشرقت كيف !! قلت ليها واضح إنها عايزا أخوك ، قالت لي فعلاً و كلنا عارفين الحاجه دي حتى قصي عارفها بس ما عندو ليها حاجه ، فاتن دي كلنا ما شغاله بينا و بيتنا دا نهاي ما بتجيهو إلا لمن تتأكد إنو قصي موجود ، طبعاً لمن هو خطب قبل 3 شهور هي خاصمتني و زعلت مني بدون سبب لكن أنا ما ركزت معاها ولا مشيت سألتها زعلانه مني في شنو ، كانت عندها أمل إنو الخطوبه دي تتفسخ بس هسي أملها مات 🤣🤣
قلت ليها عشان كدا الواحد ما يحب و ما يوجع قلبو بالحاجات دي كلها ، قالت لي الحب سمح والله بس لمن يكون من طرفين ، فاتن دي قصي ما عايزها يعني يجبر نفسو عليها عشان سيادتها تكون مبسوطه !! غير كدا هي زاتا ما مناسبه ليهو لأنها أنانيه و الشر بجري في عروقها ، قلت ليها المهم جاهزه للفاينل ؟؟
قالت لي نص نص بسبب انشغالي بتجهيزات العرس ، قلت ليها أخوك دا لو كان صبر و انتظرك لحد ما خلصتي الإمتحانات مالو يعني ؟؟
قالت لي فعلاً ، صح العرس بعد امتحاناتي بس تجهيزاتو شاغلاني و هو مستعجل شديد ، ياخ شجن دي هو من زمان منتظر متين يعرسها و تبقى مرتو ، ما شفتيهو متلهف عليها كيف ، فجأه تلفوني رن ، المتصل كان تامر ، لمن رديت عليهو قال لي طلعتي ولا لسه ؟؟ قلت ليهو لسه ، قال لي طيب خليك أنا جاي عليك ، قلت ليهو طيب ، بعد نزلت التلفون لقيت طيف بتتبسم و ترفع لي في حواجبها ، قالت لي دا تموووري مش ، قلت ليها ايوه قال جاي علي ، قالت لي شهيتوني العرس والله ، ما شاء الله كل يوم بوصلك معاهو ، الليله حأصبها معاك عايزا أسلم على راجل صحبتي ، قاعده اشوفو من بعيد ما حصل شفتو عن قرب ، قلت ليها طيب ، المهم لمن وصل طلعت ليهو مع طيف ، و نحنا ماشين عليهو هي شغاله لي ما شاء الله الولد سمححح ، سمممح والله ، يا بختك بيهو ، ربنا يخليكم لبعض ، لمن وصلناهو سلمت عليهو ، قالت ليهو مها أكيد ما بتكون حكت ليك عني ، أنا طيف جعفر صحبتها ، قال ليها اتشرفنا و أنا تامر عمران ، المهم اتكلموا شويه بعدها قالت ليهو بعد أسبوعين عرس أخوي و انتوا الإتنين معزومين ، شفت البت دي عنيده و حـ تحاول تتهرب عشان كدا انا كلمتك انت يمكن تقدر عليها ، ضحك و قال ليها دي ما بقدر عليها إلا رب العالمين ، لمن قال كدا ضيقت ليهو عيوني ، طيف ضحكت و قالت ليهو الليله سجمك يا تامر ، قال ليها جبتي لي الهوا ، قالت لينا المهم ما اأخركم ، قال ليها اتفضلي نوصلك معانا ، قالت ليهو لا لا أنا راجعه الجامعه ، المهم ودعتنا و مشت ، لمن ركبنا و اتحركنا تامر قال لي صحبتك دي ظريفه ، قلت ليهو فعلاً ، تاني ما عرفت اقول شنو ، مع إنو دي ما أول مرهـ نكون سوا ولا أول مرهـ يوصلني ، بديت أزهج من نفسي لأني قاعده ليهو زي الصنم لا بعرف أونسو لا بعرف أشاركو لمن يفتح موضوع ، بس هو مع ذلك مستحملني و مخليني على راحتي ، يمكن الشخص الوحيد البسببو عاتبت نفسي و اتمنيت أكون ليهو أفضل بكتير من كدا هو تامر ، المهم بعدها عدت الأيام و بدت امتحانات الفاينل و أنا طبعاً في الإمتحانات ما بهظر ، شيتاتي من السرير ما برفعها ، تامر كان متابع معاي و كل مرهـ يتصل و يقول لي قومي أكلي ليك شي لأني عارف انك مع امتحاناتك دي حـ تهملي نفسك ....
يوم كنت قاعده تحت الشجره و بجهز نفسي للإمتحان ، ناس أمي كانوا بشربوا جبنه في المظله ، فجأه كدا نادوني ، اتأفأفت و قمت من مكاني و مشيت ليهم ، أمي قالت لي تعالي يا مها أعملي شاي لـ خالتك عواطف دي قالت ما بتشرب جبنه ، خالتو عواطف قالت ليها لا لا خليها ساي ، قومناها من قرايتها ، قالت ليها 5 دقايق ما بتأثر ، المهم عملت الشاي و جبتو ليها ، أمي قالت لي هاك السيرمس دي كبي فيها جبنه و جيبيها !! صريت وشي و شلتها منها ، سخنت الجبنه و جبتها ليهم ، خالتي قالت لي مها عليك الله بعدين تعالي لاحقاني البيت غسلي لي العده ، ضهري و رجليني واجعاتني والله الحركه ذاتا غالباني ، قدام النسوان قلت ليها كلمي لميس ، قالت لي وينا هي من قبيل ما شايفاها !! أمي قالت ليها يا حليلا لميس من قبيل تقرأ عشان امتحاناتها قربت ، قراية الطب دي صعبه والله ، النسوان قالوا ليها فعلاً بس لو شدت حيلها حـ تمر ، قالت ليهم هي ما شاء الله شاده حيلها و مركزه مع قرايتها هسي ما بتطلع إلا للصلاة .... اتخيلوا وحده منهم اسمها بتول قالت ليها يعني بناتك بصلوا !؟
طبعاً انا إستغربت فيها !! قلت مالنا يعني ؟!
أمي قالت ليها أجي دا كلام شنو ! خالتي ضحكت و قالت ليها ما تزعلي مني يا بتول بس دا عندكم انتوا بس ، نحنا الحمدلله شفعنا من هم و صغار بنعلمهم الصلاة .... طبعاً أنا لسه ما كنت فاهمه شي لكن مشيت خليتهم ، خلصت الشيتات كلها بتاعة الماده و مشيت صليت العصر ، لمن حسيت بالجوع قلت أمشي المطبخ أكل لي شي ، طبعاً مطبخنا فاتح جوه المظله ، لمن جيت داخله كان في أمي و خالتي نجوى و شاديه مرة جيرانا ، كانوا بتكلموا عن بتول القبيل و بضحكوا فيها !! خالتو شاديه قالت ليهم هم عشان ما بصلوا بشوفوا الصلاة دي حاجه غريبه ، خالتي نجوى قالت ليها لا لا هي بتصلي بس عندهم الشباب و الشفع الصغار ديل ما بصلوا ، يعني الوحده فيهم إلا تبقى حبوبه حتى تمسك مصلايتها ، شاديه قالت ليها فعلاً هسي بناتهم و أولادهم كبار و في الجامعات و فيهم المعرس و بأولادو بس نهاي ما بصلوا ، أمي قالت ليهم عاد نحنا أولادنا زي أولادهم ولا تربيتنا زي تربيتهم ، في سري قلت ليها انتِ متين ربيتينا ولا متين علمتينا الصح من الغلط ! دخلت المطبخ و بقيت اجهز لي في أكل و هم لسه بتونسوا في نفس السيره و أنا زهجت من كلامهم الكتير ، طلعت و قلت ليهم خلاص ما بصلوا دي حاجه بتخصهم هم ما عندنا بيهم شغله ، كل واحد مسؤول عن نفسو ، خالتي نجوى قالت لي فعلاً ماف زول مسؤول من زول و ماف زول بتحاسب مع زول ، أنا ما بزعلني الزول الما بصلي لأنو ما بقدر اغصبو على شي ، بعدين براهو بتحاسب ، أنا بزعلني الزول البستغرب لمن يشوف الناس بتصلي !! يعني بدل ما نحنا نستغرب فيهم هم بستغربوا فينا عشان بنصلي !! لو بسكتوا و بستروا نفسهم زول سائلهم ماف ، خالتو شاديه قالت لي كمان يا ريت لو نفر أو نفرين ، ديل قوم كامل عندهم الحاجه دي زي العاده و التقاليد ، الشباب و الأطفال عندهم ما ضروري يصلوا و ماف زول بغصبهم عليها ، عشان كدا نحنا مستغربين فيهم ، و فعلاً زي ما قالت خالتك ماف زول بتحاسب مع زول بس هم كمان ما يقعدوا يستغربوا كل ما يسمعوا أو يشوفوا زول بصلي كأنو الصلاة دي حاجه حرام أو عيب !!
أمي قالت ليهم ما تتعبوا نفسكم معاها ساي ، مها دي بتشوف الناس شايتين وين و بتشوت عكسهم ، عاد لو ما جات و عاكست الناس و خالفتهم ما بترتاح ، المهم شلت صحني و مشيت فطرت ، بس قلت معاهم حق في نقطة إنو في ناس بتستغرب لمن تشوف زول بتصلي !! ....لمن جيت راجعه عشان أرجع الصحن لقيت أمي بتعمل في عصير ليمون ، شالتو و طلعت من المطبخ ، خالتي قالت ليها و نحنا ماف لينا ولا شنو ؟؟ قالت ليهم كبايه وحده و عملتها لـ لميس ، البت دي من قبيل هالكه نفسها بالقرايه ، المهم ختيت الصحن و طلعت و أنا عايزا أطرشق من شدة الزعل ، دخلت الأوضه شلت تلفوني و فتحت الماسنجر بس ما لقيت ولا رساله من دكتور خالد و أساساً بقى ما بدخل ، طول ، قلت بس ان شاء الله يكون كويس ....المهم الإمتحانات عدت على خير و الحمدلله اشتغلت كويس ، رغم إني كنت مقهوره عشان أمي بتهتم بـ لميس و أنا لا ، كل يوم بتجهز ليها الأكل البتحبو و بتعمل ليها عصير و بتوديهو ليها لحد عندها ، القشه دي ما بتخليها ترفعها و أنا كأني ما ممتحنه زيها ، دائماً بتناديني عشان أساعدها ، في أيام الإمتحانات الآخيره عديل قطعتها معاها و قلت ليها تاني ما تناديني ، ديك بتك أمشي ليها ، طبعاً شبكتني ليك انتِ بت قليلة ادب و ما عندك إحترام لي مع إني امك و و و ....الخ كنت بتجاهلها و بسفهها و دا الكان غايظها و واجعها ، أما لميس لحد ما خلصت إمتحانات ما شفتها ، أنا خلصت قبليها ، المهم يوم إتصلت علي طيف و قالت لي عرس قصي بعد بكرا شفتي لو ما جيتي حـ اضبحك ، حفلات ما قبل العرس اتحججتي بالإمتحانات و أنا عفيتك منها بس لو ما جيتي العرس يا مها حـ اقتلك فاهمه ، قلت ليها طيب بحاول ، قالت لي الحركات دي ما علي ، أنا حـ اجيك لحد عندك ، المهم اتكلمنا و قفلنا من بعض ، بعد ربع ساعه كدا تامر اتصل علي ، بعد سلم علي و سألني عن حالي ، قال لي صحبي عرس أختو بعد بكرا و هو عزمني و قال لي جيب معاك المدام ، أنا ما أديتو موافقتي ، قلت اتصل و اسألك ، سكته ساي ، قال لي اذا ما حابه تمشي ماف مشكله ، قلت في نفسي ما تبقي قاسيه للدرجه دي كمان ، تامر دا أكتر من مرهـ عزمني بس كنت برفض مع ذلك ما زعل مني و ما غصبني على شي ، قال لي ما تضايقي نفسك ، حـ اتصل و اعتذر منو ، قلت ليهو لا ما عندي مانع ، قال لي بالجد ؟؟
قلت ليهو جاده والله ، انبسط شديد و بقى يتكلم معاي و هو مبسوط ، من فتره ما اتكلم معاي كدا بكل أريحيه لأني بعد العقد كنت صارمه شديد ، رغم تعبو معاي ما مدياهو وش ، مرات بحن عليهو والله و بقول هو يستاهل الأفضل مني ، في نهاية المكالمه قلت ليهو طيف صحبتي برضو عزمتنا عرس أخوها لو متذكر ، قال لي ياداب اتذكرتها ، قال لي ما مشكله نمشي عرس أخت صحبي بعدين نغشاهم ، قلت ليهو طيب ، قال لي عاملين عرسهم وين هم ؟؟ قلت ليهو ما عارفه ، نسيت اسأل طيف بس حـ اسألها ، قال لي طيب و بعدها قفلنا من بعض ....
طبعاً نحنا اتفقنا إنو نعمل العرس بعد شهر ، يعني مفروض اتحبس بعد خلال الأسبوع دا ، المهم طيف في قروبنا الخاص كانت مشاركانا بكل تفاصيل العرس ، من صور و فيديوهات و تجهيزات لـ قصة فساتينها هي و بنات أهلها ، قبس و آيات ديل مشوا و حضروا الحفلات القبل العرس بس انا لا .....
المهم يوم العرس جهزت نفسي ، لبست فستان فضي مزخرف فيهو أسود و طرحه سوداء و هيلز أسود و إكسسوارات فضيه و ميك اب خفيف ، طبعاً ناس بيتنا عارفين ، المهم لمن تامر جاني و ركبت معاهو بقى يعاين لي ساي ، قال لي رايك شنو نكسر حنك الناس ديل و نشرد من هنا ؟😂 قلت ليهو ما عندي مانع بس شوف نفسك حتقول شنو لأهلي ، بالذات أبوي ، ضحك و قال لي خلاص حـ اصبر شويه و ربنا يعدي الشهر دا على خير ، قبل ما نتحرك شال تلفونو و قال لي خلينا ناخد سلفي ، المهم اتصورنا و إتحركنا ، قال لي صحبتك ما قالت ليك عاملين عرس أخوها وين ؟؟؟....لمن وريتو قال لي عصفورين بحجر واحد !! يا محاسن الصدف ، قلت ليهو ما فهمت ؟؟
قال لي نحنا معزومين مرتين لـنفس العرس !! لأنو عرس أخت صحبي في نفس الصاله !! قلت ليهو معناها انت تابع لأهل العروس و أنا أهل العريس ، المهم لمن وصلنا لقينا الحفله شغاله و العرسان سبقونا ، تامر قال لي اتأخرنا شديد ، طيف من شافتني جات ضمتني و قالت لي إتوقعتك ما تجي والله ، بس كويس انك جيتي ، بعدها سلمت على تامر و فضلتنا جوه ، تامر قال لي تعالي عايز أعرفك على أصحابي ، طيف قالت ليهو بتعرف منو هنا ؟؟ قال ليها منذر أخو العروس صحبي ، قالت ليهو بالجد !! كويس والله ، المهم مشيت معاهو و عرفني على أصحابو من ضمنهم منذر أخو العروس ، طبعاً لمحت فاتن من بعيد صاره وشها و بتعاين لـ أخو طيف و مرتو ، منذر قال لينا تعالوا عايز أعرفكم على أختي ، طيف قالت ليهو هييي أنا كنت حأسوقهم قبليك !! قال ليها دا صحبي و أنا أولى بيهو فهمتي !!؟ قالت ليهو و دي صحبتي و أنا أولى بيها فهمت !؟ قال ليها صحبتك دي زوجة صحبي و المره في طرف راجلها .... طبعاً أنا و تامر بقينا نعاين ليهم ساي و هم بتناقشوا قدامنا ، تامر ضحك و قال ليهم يخوانا مش انتوا عايزين تودونا لنفس العرسان يلي هم أخو طيف و اختك يا منذر !!؟ قالوا ليهو أيوه ، قال ليهم طيب الشكل لزومو شنو ؟!😂
المهم مشينا للعرسان و باركنا ليهم رغم إني ما بطيق أخو طيف و هو كذلك لأنو كان ببادلني نفس نظرات الكراهيه ، طيف قالت ليهو طبعاً يا قصي انت بتعرف مها لأنها صحبتي ، بس شجن ما بتعرف مها ، المهم يا شجن دي مها صحبتي و دا تامر راجلها يلي عرفت قبل شويه إنو صاحب أخوك دا ، منذر قال ليها أنا ما عندي لسان ! ما بعرف اتكلم ؟؟! قالت ليهو أعمل ليك شنو يعني إلا احلفك عشان تتكلم !؟
شجن سلمت علي و قالت لي إتشرفنا ، طبعاً عشان أنا و أخو طيف ما بنطيق بعض نهاي ما اتكلمنا مع بعض و المباركه دي باركتها ليهو بخشمي من دون ما أعاين ليهو ذاتو عشان يعرف إنو ما عندو قيمه ، المهم نزلنا من المنصه لأنو بقت زحمه و الناس جايه ترقص و تبارك ، تامر كان ماسكني من يدي وين ما يمشي بسوقني معاهو ، عرفني على كل الناس البعرفهم ، لمن تعبت قلت ليهو تامر ياخ انا ما قادره اتحرك تاني ، خليني اقعد أرتاح ، قال لي طيب ، أقرب طاوله قعدنا فيها ، قلت ليهو أنا ما بقوم ليك تاني عشان كدا أمشي اسرح و أمرح و آخد راحتك ما تتقيد بي ، قال لي عارف دا فخ 😂🤣🤣
متأكده عايزاني اسرح و أمرح و آخد راحتي ؟؟
ضربتو على كتفو و قلت ليهو فكرك ما يمشي لـ بعيد و أنا من هنا حأكون مراقباك ، لف الصاله دي كلها بس أعرف إنو عيوني مراقباك ، ضحك و قال لي بختي بعيونك دي ، واحد من أصحابو اشر ليهو عشان يجيهم ، قال لي ما حـ أتأخر عليك بس حـ تتعبي من مراقبتي ، المهم هو مشى و أنا بقيت أعاين ليهو ، كل ما يتلفت بلقاني بعاين ليهو فـ بقعد يضحك ، طيف جات و قالت لي حلفتك تعالي ارقصي معانا ، قلت ليها لا لا ما قادره والله ، قالت لي طيب تعالي اقيفي معانا ساي و أساساً أنا عايزا أعرفك على أمي و أبوي ، تعالي ياخ و طوالي جرتني من يدي ، ودتنا لـ ناس أمها و قالت ليهم دي مها صحبتي ، أمها اسمها رشيده اتعرفت علي و قالت لي طيف دائماً بتتكلم لي عنك ، الزمن كلو ماسكه سيرتك ، بعدها جرتني معاها لأبوها جعفر و قالت ليهو دي مها صحبتي ، أبوها راجل عندو هيبه كدا و راكز برضو سلم علي و قال لي اتشرفنا ، قالت ليهو داك راجلها و أشرت على تامر ، أبوها قال ليها ليه ما جبتيهو لينا خليهو يجي هنا و يتعرف على أولادنا ديل ، طيف قالت ليهو ما بحتاج يا أبوي لأنو بعرف ناس كتار هنا على راسهم منذر أخو شجن ، المهم تاني رجعنا لـ ناس أمها لمن رقصوا و قعدوا في الطاوله القدام ، طبعاً طيف كلمتهم بـ تامر و جابتو سلم عليهم ، أمها قالت لي حلوين والله ربنا يتم ليكم على خير ، تامر قال ليها من هسي معزومين للعرس كلكم ، قالت ليهو ان شاء الله بنجيكم....
المهم حضرنا العرس للنهايه بعدها طلعنا و مشينا ، تامر قال لي من قبيل سرحان في العرسان و بتخيلهم أنا و انتِ ، قلت ليهو بس ما يكون في زول شافك عشان ما يقولوا سرحان في العروس 😂🤣🤣
قال لي لا لا اتطمني ، و أساساً أنا ما بشوف غيرك ، سكت و ما قدرت أقول حاجه ، غير الموضوع و قال كانوا طالعين حلوين شديد و أخو صحبتك دا واضح إنو بحب عروستو دي ، ياخ من قبيل ماسك يدها و ما راضي يفكها ، حسيت إنو لو عليهو يدخلها جوه ضلوعو و يخفيها من عيون الناس ، قلت ليهو فعلاً....
فعلاً قصي أخو طيف كان واضح شديد إنو بحب شجن ، أنا استغربت لأني كنت شايفاهو واحد صايع و قليل أدب و ما جادي في حياتو فـ مستغربه كيف واحد حامل للصفات دي يحب بصدق و يعرس كمان !! ياخ اخو طيف دا انا ما اتوقعتو يعرس إلا لمن يصل الأربعين شدة ما كان طايش و غياظ و دمو بقري ، سبحان الله ما كنت خاته ليهو العرس دا نهاي لأني بحسو ما بشبهو....
المهم بعدها إتحبست و الناس بدت تجهيزات العرس ، كل ما يقرب موعد العرس أنا بقلق و بتوتر و كذا مره كنت بدخل الماسنجر و بشوف دردشة دكتور خالد ، قلبي كان واجعني رغم إنو تامر مغرقني في حبو و إهتمامو ، بس برضو ما كنت مرتاحه ....يمكن لأني شلت حاجه ما لي !؟ يمكن لأنو لميس على الدخول و الطلوع بترمي لي في الكلام و بتدعي علي !!
بس تامر ما قال عايز لميس و أساساً ليه أحس بالذنب و لميس عمرها ما حست بالذنب و ما حصل حست إني مظلومه و إنو أنا و هي ما متساويين في البيت دا !! ليه انا بتألم لمن اظلم زول و هم لا !؟ ليه ما بقلقوا و ما بحسوا بالذنب زيي ؟؟
مش هم مجردين من الإحساس و ما شغالين بي أنا كمان حـ اتجرد من الإحساس ناحيتهم و ما حـ أدي أي إهتمام لمطاعنات لميس أو غيرها ، خليها تتوجع قدرتها ، تستاهل ....
طبعاً النتيجه ظهرت و الحمدلله معدلي 3 طبعاً ماف زول غير تامر عارف ، ناس بيتنا ديل ما حصل شافوا نتيجتي و ما اظن بتذكروها ذاتو و أنا ما قاعده أمشي أكلمهم ، طبعاً طيف كانت معاي خطوه بخطوه ، ما قصرت مني والله ، بتجيني لحد البيت و مهتمه بي أكتر من أمي ، قبل يومين من العرس أنا توتري زاد و بقيت مقلقه شديد ، مع إني قلت ما حـ ارسل لـ دكتور خالد تاني بس ما قدرت أمنع نفسي ، دخلت و كتبت ليهو رغم إنو فات الآوان بس انا لسه مقلقه و خايفه من الزواج الحيكون بعد يومين دا !! حاسه إني اتسرعت و ما كان استعجل !!
بعد ساعتين دخل و قرا رسالتي ، قال لي حأقول ليك حاجه وحده بس :
لو إتخذتي قرار بـ عقلك ما تسمعي كلام قلبك خالص ، حـ تتألمي يوم ، يومين ، أسبوع ، شهر ، بس إلا ما يجي يوم و يقيف الوجع دا ، بالنسبه لي الألم الناتج عن قرار نابع من العقل أفضل من الألم البكون ناتج عن قرار اتخذو القلب...
قلت ليهو ما فهمت ، طيب اعمل شنو حالياً ؟؟
قال لي حتعملي شنو مثلاً ؟؟ يا بت الناس مدام العرس دا خلاص تم خليهو يتم ساي المشكله وين !؟ ما تقعدي تعملي لي وجع راس ، ياخ أنا مالي و مال مشاكلك ، غلطان أنا لأني من البدايه ما كان أرسل ليك ، ياخ إذا أنا شهرين بس حسيت بطاقه سلبيه بسببك فـ ما بالك بناس بيتكم ، عرسي عرسك و خلي النكد و الكلام الكتير عشان على الأقل ترتاحي من ناس بيتكم و تطلعي من اكتئابك دا ....و حاجه آخيره ، ما ترسلي لي تاني...
بين الهدُّوء والوحدة، يولد طرفٌ ثالث وهو ،الألم الصامت،إنه قد يجعلك تصل لمرحلة شبه قاتلة، أو البُّكاء ولكن بطريقة صامتة... .💔
" المكتئب ليس شخصا مريضا فى نظرى .. بل هو انسان رأى الدنيا وأهلها على حقيقتهم .. وعجز عن التعامل مع كل هذا القبح
- أحمد خالد توفيق
يتبع.....
