قريت نتيجة الفحوصات دي مرتين !!
يمكن للسبب دا تامر كان مضايق شديد في الفترهـ الآخيره و أنا مفتكره إنو زعلان مني بسبب مشاكلي مع أهلو و بس ، طلع المضايقو أكبر من كدا بكتير !!
لمن جا راجع ما قدرت اسألو ، أساساً ما عرفت أبدا ليهو من وين و أقول ليهو شنو ، ما حأكذب و اقول حكاية إنو تامر عقيم ما بتهمني أو ما بتأثر علي ، في البدايه قلت حصل خير و سكت بس الموضوع دا ما فارق عقلي ثانيه ، كل ما أشوف تامر بتذكر نتيجة الفحوصات الأصلاً ما نسيتها ، قلت بما إنو ما جا و حكى لي براهو ما حـ اسألو ، لأنو أكيد متحسس من الموضوع و محتاج شوية وقت عشان يتقبل الحقيقه المره و يجي يصارحني بيها ، يوم قال لي : اليوم حـ نمشي نفطر مع أهلك ، قلت ليهو طيب و فعلاً جهزت إفطار و شلناهو مشينا بيهو ، لقينا خالتي نجوى جاتهم قبلينا بشويه ، طبعاً أنا كل العارفاهو إنو العصابه ديلك ما إعترفوا إنو أبو القاسم هو الرسلهم و واحد منهم قال إنو شاف عبدالله مع أختو عشان كدا جاب أصحابو و وقعوا فيهو ضرب ، يعني أبو القاسم خلاهم يكذبوا عشان يطلع نفسو من القصه دي ، حتى الورقه الإترمت في بيتنا ما قدرت
تثبت إنو أبو القاسم هو الوراها و هو المهددنا ، المهم بعد الإفطار ناس أمي بدوا يتكلموا عن موضوع عبدالله ، طبعاً لميس متجاهلاني على الآخر كأنها ما شايفاني بس لمن عملت الجبنه و جات قعدت جنبي همست لي و قالت لي ان شاء الله مرتاحه في حياتك مع تامر بتاعك .... قالتها بإبتسامة شماته كدا ، هي أكيد ما بخفى عليها المشاكل الحاصله بيني و بين أهلو و أكيد عارفه إنو حالياً أنا و تامر الوضع بيناتنا متوتر ، حتكون عرفت كدا من خالتي نجوى الحتكون عرفت من نسابتي ... المهم خالتي نجوى قالت لـ أمي يعني هسي خلاص إتفقوا ؟؟
أمي قالت ليها إلا كدا ، الناس ديل كعبين شديد و لو ختونا في راسهم بودونا ورا الشمس ، بعد الحصل مع لميس و هي راجعه من الجامعه خُفنا شديد ، قلت لأبوها اتصرف بعد دا لأنو ما معقوله نعيش حياتنا كلها في خوف و قلق حتى و نحنا في نص بيتنا ، ياهو في النهايه مشى إتكلم معاهم و وافق على كلامهم الأول ، خالتي قالت ليها يعني ماف طريقه إلا عبدو يعرس بتهم !؟ قالت ليها إلا كدا ! على الأقل نرتاح شويه و قلوبنا دي تطمن ، انتِ قايلاهم حـ يخلونا في حالنا !؟ لميس قالت ليها خليهو يعرسها ساي و يتحمل نتيجة تصرفاتو ، لازم أي زول يدفع ثمن أفعالو ، قالت كدا و عاينت لي ، ناس أبوي و تامر كانوا قاعدين بعيد مننا ، طبعاً أنا استغربت و ما عرفت الحصل شنو مع لميس ! الناس ديلك عملوا ليها شنو !؟ ما قدرت اسألهم ، بس من خلال ونستهم عرفت انو رسلوا ليها كم نفر كدا و هي راجعه من الجامعه ، طلعوا في وشها ، هددوها و هم شايلين سكاكين بس ما عملوا ليها حاجه ، واضح انهم كانوا عايزين يخوفوها و يزرعوا الرعب و القلق وسطنا ، هم بتونسوا و أنا شغاله بـ تلفوني ، خالتي نجوى قالت لي انتِ يا مها مالك تاني مع نسابتك ؟؟ قلت ليها مالي !؟ قالت لي مشاكلكم كترت والله ! .... أمي قالت ليها يتشكلوا كدا و يقعدوا ، خالتي قالت ليها لا لا كدا بتخرب بيتها والله ! هسي انتِ لو احترمتيهم و خففتي مشاكلك معاهم و حاولتي تكسبيهم مالك ؟؟ قلت ليها انتِ عارفه اسباب مشاكلنا شنو !؟ قالت لي اي عارفه ، قلت ليها بعد دا لو شايفه انهم صح فأنا ما عندي حاجه أقولها ليك ، لميس قالت ليها عليك الله أسكتي خليها يا خالتي ، دي لو سكنوها في غابه حـ تتشاكل مع الحيوانات ، وين ما تمشي بتعمل مشاكل ... طبعاً ولا عاينت ليها ، قبل ما نمشي أبوي ناداني على جنب كدا ، قال لي ما تقولي أنا غافل عن عمايلك و ما سامع بالمشاكل العاملاها مع نسابتك ، انشغلت بموضوع أخوك بس ما ناسيك عشان ما تقولي الناس دي ساكته خوفاً منك ، انتوا أصلكم كما وطيتوا راسي و دفنتوا في التراب و عملتوا لي سمعه شينه بين الناس ما بترتاحوا .... رفع أصبعو و قال لي أعملي حسابك ، ما عايز تجيني أي شكوهـ منك ، لو نسابتك ساكتين ليك انا ما حـ أسكت ليك والله ، خليتو يقول العندو للنهايه ولا حاولت أشرح ليهو و أحكي ليهو عمايلهم ، لأنو هو ما بهمو يعرف هم عملوا شنو خلاني أدخل معاهم في مشاكل و نقاشات ، هو بهتم بالناس كلها عداي ، ياخ إذا أمي الولدتني ما شغاله بي ولا بهمها أمري فأكيد أبوي ما حيكون أحسن منها ، لمن أنا و تامر وصلنا البيت قال لي أبوك قال ليك شنو لأني شايفاك متضايقه من لمن اتكلم معاك !؟
قلت ليهو نبهني و حذرني ما أعمل مشاكل مع أهلك ، رغم إنو ما حضر ولا شكله أو نقاش بيني و بين أهلك بس مع ذلك واثق إني غلط و هم صح ، ما هو بس كلكم واقفين ضدي و ما قادرين تشوفو إني مظلومه ، بس ما مشكله براي بدافع عن نفسي ، اتنهد و دخل الغرفه ، مشيت عملت العشا و خليتو جاهز ، لمن مشيت ليهو في الغرفه لقيتو نايم ، طلعت و رقدت ، ما صحيت تاني إلا لمن هو صحاني و قال لي قومي إتسحري ، قمت ختيت الأكل و قعدنا ناكل و نحنا ساكتين ، بعد مسافه قلت ليهو تامر انت برضو زعلان مني ؟
أخد نفس عميق و قال لي ما عارف ، قلت ليهو ما عارفه ليه كلكم شايفين إني غلطانه مع انو كل العملتو إني رديت الإساءه و على فكره اتهامي لـ عصام عمك ما جا من فراغ ، قال لي مها أنا مصدع و ما عندي حيل للنقاش أو الجدال والله .... قال كدا و قـام طوالي .... ما جادلتو تاني لأنـي عارفـه البيهو و العليهو ، الموضوع داك ما بس مؤثر عليهو هو ، أنا كمان حاسه الدنيا لافه بي و ما قادره استوعب .... قعدت مع نفسي و بقيت أفكر ، اتذكرت كلام لميس لمن دعت علي و قالت لي ان شاء الله ما تشوفي يوم سعيد معاهو ، قلت دعوتها استجابت ، يمكن لأني عرسـت تامر معرزه ليها بس ! لأني رغم معرفتي إنها عايزا تامر وافقت عليهو بعد رفضتو و كلو عشان أحرق قلبها و في الآخر أنا القلبي إتحرق !... هم طول عمرهم كانوا بظلموني و بشيلوا مني و بدوا لميس بس ماف واحد فيهم ضميرو أنبو ، ماف واحد فيهم إتعاقب على ظلمو لي ، لمن جيت أعمل نفس العملوهو و آخد حقي على حساب لميس .... إتعاقبت 💔
بعدها عدت الأيـام و تامر حالتو بقت ما عاجباني ، أنا اتأكدت إنو ما مضايق بسببي و إنو زعلان على الإبتلاء الأصابنا ، مرات كتيره بفكر أمشي ليهو و أواسيهو بس انا فاشله في الحاجات دي ، ما بعرف أحنس زول أو اطبطب عليهو ، كلام كتير بكون نفسي أقولو ليهو بس أول ما اقيف قدامو افكاري بتجوط و لساني ببقى تقيل و بنسى عايزا اقول ليهو شنو ، تامر حالو اتبدل و اتغير 180 درجه ، و التغير دا كان ظاهر عليهو شديد لدرجة إنو أي زول بشوفو بسألو إذا عيان ، طبعاً أهلو قالوا دا كلو بسببي و إني وصلتو للحاله دي ، أمو قدامي قالت ليهو البت دي لو قعدت معاها أكتر من كدا حـ تجن والله ، في اليوم داك ديك كانت أول مرهـ أسكت أخليها ، كنت بعاين لـ تامر البحاول يظهر إنو مركز مع الناس بس عقلو شارد 24 ساعه ، يوم العيد الكان بكون فيهو تامر مرتب و بشوش و بطلع يلف كل البيوت من الصباح و يجينا نحنا اول ناس بعد بيوتهم ، اليوم اول ما صلى صلاة العيد جا راجع طوالي ، ما قدرت أسكت أكتر من كدا ، مشيت قعدت جنبو و أنا متوترهـ ، قال لي مالك ؟؟ في حاجه ؟؟
قلت ليهو أنا المفروض اسألك السؤال دا من بدري ، في شنو يا تامر مالك انت ، قال لي ماف شي ، قلت ليهو أحكي لي !! أخد نفس و قال لي ما تشغلي بالك ، وقف على حيلو و قال لي ماشي أعيد على ناس حبوبه آمنه و اغشى أهلك بهناك ، أول ما إتحرك كدا قمت من مكاني و مشيت وقفت قدامو و ضميتو شديد ، قلت ليهو تامر أنا شفت نتيجة الفحوصات ، و صدقني أنا حاسـه بيك ، ما قال لي شي ، لمن رفعت راسي و عاينت ليهو لقيت دموعو نازله ، قلبي وجعني شديد والله اول مره اشوفو ضعيف كدا و زي الطفل ، مسحت ليهو دموعو و قلت ليهو دي إرادة ربنا ولا اعتراض على حكمه و ذاتو ما معروف يا تامر ، يمكن في غلط في الفحوصات و..... قاطعني و قال لي : اللهم لا اعتراض على حكمك ، أنا عملت الفحص اكتر من مرهـ و في مستشفيات مختلفه و النتيجه كانت واحده ، أنا ما مكتوب لي أبقى أب ، إنحرمت من اعظم حاجه في الدنيا دي ، إنحرمت من الذريه ، ما حيكون عندي طفل يناديني بابا ، بيتي ما حـ يتملي بالأطفال ، عمري ما حأكون أب 💔
قلت ليهو تامر ما تقول كدا إلا ما يكون في حل ، انت بس خلي ثقتك في ربنا كبيره و أدعي كتير و أنا كمان حـ أدعي معاك ، اتنهد و قال لي أهلي ليهم فتره بنقوا في موضوع إنو لسه ماف حمل و أنا مليت و زهجت من الأسئلة دي عشان كدا اليوم حـ أكلمهم ، قلت ليهو تامر ..... قاطعني و قال لي و انتِ أنا ما ناسيك ، خليني بس أخت ديل في الصوره و أحكي ليهم ، بعدها نجي لـ موضوعك ، قلت ليهو موضوعي ؟؟؟
قال لي ايوه ، أكيد ما حـ تقبلي تقضي عمرك كلو مع واحد عقيم !!
قلت ليهو أنا قلت ليك كدا ؟؟
قال لي لو هسي ما قلتي كدا بكرا حـ تقولي و إذا بكرا ما قلتي أكيد لقدام حـ تقوليهو ، انتِ ياداب في بداية العشرينيات و في ريعان شبابك فـ شنو البجبرك تقضي عمرك معاي ؟؟ شنو البخليك تدفني نفسك و تحرميها من الأطفال !! قلت ليهو تامر أنا والله ... تاني قاطعني و قال لي دا لمصلحتك ، حتى لو ما فكرتي في الإنفصال أنا حـ أفكر فيهو ، من حقك تعيشي حياتك .... قال كدا و زحاني منو و طلع طوالي 💔
حسيت قلبي بتآكل من جوهـ ، ما إتخيلت في يوم يحصل معاي كدا !! العرس دا أساساً ما كان في بالي و لمن عرست البحبني بالجد و اتقبلتو و شبه اتأقلمت عليهو و كنت مستعده أكمل معاهو باقي حياتي ، حالياً ناوي ينفصل عني !! ايوه هو عايز يعمل كدا عشان مصلحتي بس انا متأكدة ماف زول بتحملني كدا زي تامر ، ماف زول حيكون لطيف و حنين علي زيو ، ماف زول حيقدم لي القدمو و ماف زول حيقدم سعادتي على سعادتو ، العملو عشاني تامر أهلي ما عملوهو لي ، أنا مهما لفيت ما حـ ألقى زي تامر دا ...
قعدت و بقيت اتذكر في مواقفو معاي ، من دون ما أحس دمعتي نزلت .....من فترهـ طويله دي كانت أول مرهـ تسيل دمعه على خدي...
تامر ما جا راجع تاني ، اتصلت عليهو كتير بس ما رد علي ، مع العصريه كدا ، تامر جا و قال لي إنو بعد شويه حـ يجمع أهلي و أهلو و يكلمهم ، أنا قلبي وجعني و اتوترت أكتر منو و حسيت إنو حـ يتخت في موقف صعب ، عارفه ما حتكون ساهله عليهو يقول قدامهم كلهم إنو عقيم 💔
حاولت قدر الإمكان أقنعو إنو ما يكلمهم ، قلت ليهو خلينا نطلع و نفتش و نحاول نلقى علاج إذا الموضوع مؤثر عليك شديد و إذا إضطرينا ممكن نسافر برا السودان ، ما سمع مني ، جمعهم كلهم و حكى ليهم .... ديك كانت من أصعب اللحظات علينا كلنا ، أمو قعدت تبكي و قالت ليهو قول لي انك بتهظر معانا يا تامر ، أبوهو قال ليهو انت ما تقيف على كلام دكتورين تلاته و تستسلم ، العالم اتطور و كل شي عندو علاج حتى لو استغرق سنين ، أبوي قال ليهو نفس الشي ، و كلهم قالوا ليهو ما تيأس و نصحونا إنو نسافر و نفتش علاج ، تامر كان رافض و قال تاني ما عايز يمشي لأي دكتور و ما عايز يتكلم في الموضوع دا تاني ، عاين لأبوي و قال ليهو بتك أنا ما ناسيها ، ما حأكون أناني و أجبرها تتقبلني كدا و تقضي عمرها كلو معاي ..... في اللحظات ديك أنا ما قدرت أمسك دموعي ، بديت أبكي من دون ما أحاول أسكت نفسي ، جات حبوبه آمنه ضمتني و بقت تتكلم معاي و تواسي فيني و تامر كان مواصل كلامو في الموضوع ، قلت ليهو بزهج أنا متين قلت ليك عايزا اتطلق !؟... انا شبر ما حأطلعو من البيت .... قلت كدا و طوالي مشيت خليتهم ، رجعت بيتي و قعدت أبكي هناك ، بعد مسافه طويله هو جا ، ضماني عليهو و قال لي والله كدا أفضل ليك ، انتِ عايزا تقعدي معاي العمر كلو في بيت ما فيهو طفل !! عايزا نكون أنا و انتِ و الحيطان بس في البيت دا !؟
قلت ليهو ايوه عايزا كدا....
قال لي حالياً ردك دا طبيعي و اي وحده مكانك كانت حتقول كدا في البدايه ، بس صدقيني الوضع لقدام حـ يختلف ، بكرا حـ تزهجي و تملي و قلبك حيوجعك لمن تتذكري إني عقيم ، لا قادر أكون اب لا انتِ معاي قادره تكوني أم ، قلت ليهو ما عايزا أكون أي حاجه ،. عايزا أكون معاك انت و بس ..... قعدت أبكي ليهو كدا لمن صدعت ، احتار و ما عرف يسكتني كيف ... تاني يوم برضو نفس الموال و كل ما يجيب لي سيرة الطلاق أقعد أبكي ليهو ، كنت حاسه إني ما مفروض اتخلى عن تامر عشان فيهو عيب ، حتى لو كان العيب دا حـ يقيدني و يحرمني من حاجات كتيره ، كنت حاسه إني لو فقدت تامر حـ أفقد حياتي كلها ، أنا معاهو عرفت يعني شنو حياة و يعني شنو طمأنينه و إحتواء ....
في الآخر قال لي طيب انا حالياً ما حـ أطلقك ، حـ اخليك براك تزهجي و تطلبي مني الطلاق ، قلت ليهو إلا لو عايز تعمل لي حركات و تحاول تعذبني و تكرهني فيك ، باس كفة يدي و قال لي مستحيل أنا أعمل كدا ، قال لي صدقيني أنا قادر أشوف الما بتقدري تشوفيهو انتِ ، بكرا حـ تفهمي أنا قاصد شنو و بكرا براك حـ تقتنعي إنو الطلاق هو أفضل حاجه أنا اخترتها ليك ...
بعدها بفتره نزلت جامعه السنه الآخيره و علاقتي بـ تامر ما إتغيرت ، كان بعاملني زي ما إتعودت عليهو و أكتر ، أهلو اتكلمو معاهو أكتر من مرهـ عشان يسافر برا السودان و وصفوا ليهو دكاتره شاطرين بس هو رفض ، يوم جوني أمي و خالتي و لميس جات معاهم ، في البدايه استغربت لمن شفتها ، بس لمن فضلتهم و قعدت و فتحوا معاي الموضوع داك و هي كانت بتتبسم عرفتها جايه عشان تشمت !! 💔
خالتي قالت لي يعني عايزا تقعدي معاهو كدا ؟؟ قلت ليها ايوه ، أمي قالت ليها دا كلام ساي ، بكرا عقلها برجع ليها و حـ تقول ليهو عايزا الطلاق ، خالتي قالت ليها هو ما عندو مانع يطلقها لكن هي رافضه ، لميس قالت الحمدلله ما إتدبست و عرستو رغم إنكم كنتوا عايزنوا لي ، ربنا بحبني شديد ، الحمدلله ما دخلت في تجربه قاسيه زي دي و ما اتختيت في مواقف صعبه ، أي زول بحصد الزرعو ، قالت كدا و عاينت لي جوه عيوني ، خالتي قالت ليها اي سبحان الله ، قربتي تبقي مرتو لكن ربنا ستر !! أمي قالت لي شفتي الكعوبيه و شناة القلب دي بتوصل الزول لـ وين !؟ عرستيهو مغرزه لأختك و شوفي ربنا عاقبك كيف ، لو كان عرستي غيرو كان أفضل ليك ..... قلت ليها مفروض انتِ تشكريني لأني عرستو بدل بتك لميس و إلا كانت هي حتكون مكاني ، ما تنسوا انكم شالتوني عشان وافقت عليهو ما لأنو مصلحتي بتهمكم ، لأنكم عايزنوا لـ بتكم دي ☺️ و أنا ما زعلانه و ما شايفه إنو دا عقاب و لو عقاب أو إبتلاء أنا رضيااانه بيهو ...
طبعاً أهلو كانوا مستغربين فيني لأني ما رضيت اتطلق من تامر بس مع ذلك الوضع بيني و بينهم ما إختلف زي ما هو ، طبعاً عبدالله أخو انجبر يعرس أسيل ، عرسهم كان كلفته ساي ، لا فيهو حفله لا زغاريد ، عقدوا ليهو عليها و ساقوها جابوها البيت ، زعلت عليهو والله ، ما اتخيلتو يعرس و هو ياداب وصل العشرين ، بس دا كلو نتيجة طيشو و نتيجة دلع أبوي ليهو و عدم إرشادو ليهو حتى لمن يشوفو بعمل في الغلط ، أبوي هو الخلاهو يتمادى ، أولاد ذاتهم بحتاجوا مراقبه و متابعه زيهم و زي البنات ، بالذات البكون في فترة مراهقه و أعمار الطاشرات لحد بداية العشرينيات ، ديل اكتر الفئات المحتاجه مراقبه مشدده ، ماف حاجه اسمها دا ولد و عارف نفسو بعمل في شنو ، كلنا محتاجين أهل و ناس أكبر مننا يقودونا و ينوروا طريقنا مهما كبرنا....
يوم و أنا طالعه ماشه البقالـه لاقيت عصام في الطريق ، قال لي اوو زوجة ولدنا كيفك ، ولا رديت عليهو طوالي إتحركت من جنبو ، إعترض طريقي و قال لي هسي لو كان عرستيني مش كان أفضل ليك من العقيم داك !؟
ضربتو كف و قلت ليهو ياخ أخجل ! مصنوع من شنو انت يا عواليق ! تامر دا عدوك عشان تشمت فيهو كدا !؟ قال لي ما شمت بس ذكرتك إنو لو كان قبلتي بي ما كان عرستي واحد.....لمن عاينت ليهو بحده قعد يضحك ، خليتو واقف و مشيت البقالـه ....
بعدها حياتنا أنا و تامر بقت هاديه شديد ، أولاد أختو كانوا معانا 24 ساعه و أنا الكنت بناديهم عشان يجوا يغيروا مود خالهم ، هم بحبوهو شديد و هو نفس الشي ، عشان كدا هم الوحيدين الكانوا بقدروا يملوا فراغ الأبوه الجواهو ، يوم و هو بنوم في رؤى قلت ليهو ما عارفه إذا انت ملاحظ للحاجه دي ولا لا ، قال لي شنو !؟
قلت ليهو انك اب ! عاين لي و ما قال حاجه ، قلت ليهو انت اب من زمان و لـ تلات أطفال ، ربنا عوضك قبل ما تعرس و أنعم عليك و خلاك تجرب إحساس الأبوه ، أنا متأكدة إنو حتى لو كان عندك اطفال كنت حـ تحبهم بنفس درجة حبك لـ رؤى و أخوانها ، هم بريدوك يا تامر و انت بالنسبه ليهم في خانة الأب ما في خانة الخال ، اتنهد و قال لي الحمدلله على كل حال ، قلت ليهو عندك 3 أطفال منتظرنك تربيهم و تأمن ليهم مستقبلهم ، قال لي ما 3 ، عندي 4 أطفال ، قلت ليهو الرابع جا من وين ؟؟
جراني من أنفي و قال لي ناسيه نفسك ولا شنو !؟ قلت ليهو يخسسسي عليك ، أنا تشوفني شافعه ! الله يسامحك يا تامر ، ضحك و قال لي أجمل شافعه في حياتي ، قلت ليهو بعد رؤى طبعاً ، قال لي انتِ و رؤى نفس الشي ، حبايب قلبي والله 💜
انك الجميع ، وَكل من إحتل قلبيّ.
أجد كفايتي عن هذا العالم بقربك، وأستريح من هذه الحياة على كتفيك 💜
يتبع......
